Skákþáttur Morgunblaðsins: Bragi náði lokaáfanganum að stórmeistaratitli

Með því að vinna síðustu skák sína á opna alþjóðlega mótinu í Kragareyju í Noregi náði Bragi Þorfinnsson þriðja og síðasta áfanga sínum að stórmeistaratitli. Þá liggur fyrir að önnur skilyrði eru uppfyllt, t.d. það að hafa á einhverjum tímapunkti náð yfir 2500 alþjóðleg elo-stigum. Hann hlaut 7 vinninga af níu mögulegum, varð einn í 2. sæti á eftir norska stórmeistaranum John Ludwig Hammer sem kom í mark með 7 ½ vinning. Lykilsigrar Braga komu í fjórðu og fimmtu umferð þegar hann vann sænska stórmeistarann Tiger Hillarp Persson og þann norska, Espen Lie. Bragi lenti í krappri vörn gegn Tiger Hillarp og var með tapað tafl um tíma en það reyndist Svíanum erfitt að finna lokahnykkinn og Braga tókst með mikilli útsjónarsemi að sleppa með kónginn inn fyrir víglínu Svíans:

Kragareyja 2018, 4. umferð:

Tiger Hillarp Persson – Bragi Þorfinnsson

Þegar hér er komið sögu er leið kóngsins til d5 alls ekki greið og eftir 56. d5! er svartur í mikilli máthættu en getur samt varist með 56... cxd5 57. c6! De8! Tiger sá mest af þessu en valdi samt aðra útfærslu:

56. Dh7+? Ke6 57. d5+ cxd5 58. Dxh5

Nú á hann ekki kost á að leika c-peðinu og Bragi opnar leið fyrir kónginn:

58. ... d4!

Gott var einnig 58. .. Hg8.

59. Dg6 De8 60. Dg7 Kd5!

Kóngurinn tekur á rás inn fyrir varnargirðinguna.

61. Db7 Kc4 62. Df3 Kxb4 63. h5 Dg8! 64. h6

Svíinn er búinn að missa þráðinn. Eina vonin lá í að leika 64. e6!

64. ... Dc4+ 65. De2 Dc1+ 66. De1 Dxe1 67. Kxe1 Kc3 68. h7 Kc2 69. c6 d3 70. Bg5 b4!

Frípeð hvíts mega sín lítils gegn peðum svarts, gegn hótuninni 71. ... b3 er engin vörn. Hvítur gafst upp.

 

Seinni hluti Íslandsmóts skákfélaga hófst á fimmtudaginn

Seinni hluti Íslandsmóts skákfélaga hófst í Rimaskóla sl. fimmtudagskvöld með keppni í efstu deild. Eftir fyrri hlutann náði Víkingaklúbburinn sex vinninga á Íslandsmeistara Hugins og er fátt sem bendir til þess sigri sveitarinnar verði ógnað þar sem Víkingasveitin jók forskot sitt með 6:2 sigri yfir Fjölni en á sama tíma gerði Huginn jafntefli við TR, 4:4. Staðan þegar þrjár umferðir eru eftir: 1. Víkingaklúbburinn 43 v. (af 48) 2. Huginn 35 v. 3. Fjölnir 26 v. 4. SA 25 ½ v. 5. TR 25 v. 6. TG 20 ½ v. 7. Huginn (b-sveit) 20 v. 8. SA (b-sveit) 17 ½ v. 9. KR 15 v. 10. Skákdeild Breiðabliks og Bolungarvíkur 12 ½ v.

 

 

Fjórir efstir á skákhátíð MótX

Fjórir skákmenn urðu jafnir og efstir á Skákhátíð MótX sem lauk í Stúkunni á Kópavogsvelli sl. þriðjudagskvöld. Jóhann Hjartarson, Helgi Áss Grétarsson, Hannes Hlífar Stefánsson og Jón Viktor Gunnarsson hlutu allir 5 vinninga af sjö mögulegum. Alls hófu 27 skákmeistarar keppni í A-flokknum og var teflt einu sinni í viku, alls sjö umferðir. Leyfðar voru þrjár ½ vinnings yfirsetur en þess má geta að elstu keppendur mótsins Jóhann, Jón L. og Benedikt Jónasson nýttu sér aldrei þann rétt.

 

Í B-flokki urðu jafnir og efstir þeir Siguringi Sigurjónsson og Hilmir Freyr Heimisson með 5 ½ vinning af sjö mögulegum. Þeir tryggja sér þátttökurétt í A-flokki á næsta ári. Í 3. sæti varð Aron Thor Mai með 5 vinninga.

Í flokki hvítra hrafna þar sem keppendur voru sex talsins sigraði Júlíus Friðjónsson, hlaut 3 ½ vinning úr fimm skákum.

 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 3. mars 2018

Skákþættir Morgunblaðsins

Skákþáttur Morgunblaðsins: Reykjavíkurlundar stefna hátt

Ingvar Þór Jóhannesson er maðurinn á bak við þátttöku Reykjavik Puffins, sem stefnir að einu af fjórum efstu sætunum í sínum riðli í atskákkeppni á netinu, Pro chessleague. Ingvar er skráður í lið Reykjavíkurlundanna en þar sem hann heldur úti vefsíðu og beinum útsendingum á meðan á keppni stendur hefur hann látið sér nægja að bera fyrirliðabandið. Þeir sem teflt hafa fyrir sveitina auk greinarhöfundar eru Jóhann Hjartarson, Hjörvar Steinn Grétarsson, Hannes Hlífar Stefánsson, Þröstur Þórhallsson, Jón Viktor Gunnarsson og bræðurnir Björn og Bragi Þorfinnssynir. Fjögur efstu sætin í riðlinum gefa rétt á þátttöku í 16 liða útsláttarkeppni en þeim liðum sem síðan komast í undanúrslit verður boðið til New York í sérstaka úrslitakeppni og útsendingu kostaða af Chess.com vefnum.

Forsvarsmenn keppninnar hafa fengið til keppni kappa á borð við Magnús Carlsen heimsmeistara, Maxime Vachier-Lagrave, Viswanathan Anand og Hikaru Nakamura,Fambiano Carugna svo nokkrir séu nefndir. Það kom í hlut greinarhöfundar að tefla við Magnús á dögunum og tapaðist sú skák eftir snarpa baráttu en á ýmsu hefur gengið hjá okkar sveit. Tveir sigrar, tvö töp og eitt jafntefli og 5. sæti í riðlinum en betur má ef duga skal. Tímafyrirkomulagið er oftast 15 2 en stundum 10 2.

Þó að skemmtigildið sé vissulega í fyrirrúmi fylgir keppninni alvara og ákveðnar reglur sem krefja þátttakendur um að undirrita loforð um að hegða sér íþróttamannslega, hafa ekki samráð á meðan keppni á stendur, nota ekki hugbúnað o.s.frv. Keppendur sjást raunar í vefmyndavél á meðan teflt er, sem er ákveðin trygging, en einbeittur brotavilji gæti hæglega eyðilagt svona keppni nema sendur væri sérstakur eftirlitsmaður/dómari á vettvang.

Eftir fyrstu viðureign Reykjavik Puffins við franska liðið Marseille Migraines var sigurskák Braga Þorfinnssonar kosin skák umferðarinnar. Bragi vann með tilþrifum. Fögnuðu þeir bræður Björn og Bragi vel og lengi eftir á. Bragi hikaði ekki við að tefla fjögurra peða árásina í kóngsindverskri vörn, afbrigði sem hann lærði fyrir Ólympíumót 16 ára og yngri á Kanaríeyjum árið 1995:

Bragi Þorfinnsson – Etienne Bacrot

Kóngsindversk vörn

1. d4 Rf6 2. c4 g6 3. Rc3 Bg7 4. e4 d6 5. f4 0-0 6. Rf3 c5 7. d5 e6 8. Be2 exd5 9. cxd5 Bg4 10. 0-0 Rbd7 11. He1 He8 12. h3 Bxf3 13. Bxf3 a6 14. g4 h6 15. h4!

Hér duga engin vettlingatök.

15.... b5 16. g5 Rh7 17. e5!

Snarplega leikið, peðsleikurinn rýmir fyrir d-peðinu, riddaranum og biskupnum á f3.

17.... dxe5 18. d6 Hb8 19. Rd5 hxg5 20. hxg5 Rhf8 21. Rc7?!

„Houdini“ telur 21. Bg4! betra þar sem svartur getur nú leikið 21.... exf4 með góðri stöðu. En Bragi var greinilega búinn að slá Bacrot út af laginu.

21.... Re6 22. Rxe8 Dxe8 23. a4 Dd8 24. axb5 axb5 25. Bd5! Rdf8 26. fxe5 Rxg5 27. Dg4 Rge6 28. Ha7 Db6

(– Sjá stöðumynd)

29. Hxf7!

Glæsilega leikið. Eftirleikurinn ætti að vera auðveldur en Bacrot er harður í vörninni.

29.... Kxf7 30. Hf1+ Ke8 31. Bxe6 c4+ 32. Hf2 Hb7

 

 

33. Bf7+!

Hvítur vinnur nú mikið lið og úrslitin eru ráðin.

33.... Hxf7 34. Dc8+ Dd8 35. Dxd8+ Kxd8 36. Hxf7 Bxe5 37. Bg5+ Kc8 38. Hxf8+ Kd7 39. Hd8+ Ke6 40. d7 Bxb2 41. Hb8 Kxd7 42. Hxb5 c3 43. Kf1 Kc6 44. Hb8 Kd5 45. Ke2 Ke4 46. Hb4 Kf5 47. Hb5 Kg4 48. Bf6 g5 49. Hxg5 Kf4 50. Hc5 Ke4 51. Bxc3

- og svartur gafst upp.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 24. febrúar 2018

Skákþættir Morgunblaðsins

Skákþáttur Morgunblaðsins: Tvenn gullverðlaun Íslendinga á Norðurlandamótinu

Að vinna tvö gull í keppni fimm aldursflokka á Norðurlandamóti einstaklinga 20 ára og yngri er alltaf góð niðurstaða. Í Vierumaki í Finnlandi um síðustu helgi tókst Oliver Aron Jóhannessyni og Hilmi Frey Heimissyni að ná sigri í sínum aldursflokkum og Jón Kristinn Þorgeirsson nældi sér í bronsverðlaun.

Þessi frammistaða er einkar ánægjuleg og má geta þess að Alexander Oliver Mai var einnig í færum að vinna miðflokkinn en lenti þar í 5. sæti. Hann vanmat möguleika sína í næstsíðustu umferð mótsins er hann samdi jafntefli með hartnær unnið tafl.

Oliver Aron, sem er rólyndismaður, tefldi af mikilli keppnishörku og skákir Hilmis Freys Heimissonar voru afar viðburðaríkar. Hann missti af tækifæri á bráðsnjöllum biskupsleik til c7 í skák sinni við Einar Hjalta Jensson á Skákþingi Reykjavíkur og birtist hér í blaðinu á dögunum en tækifærið kom aftur til hans í Finnlandi! Þar var hið vinsæla Lundúna-afbrigði tekið til meðferðar:

NM 2018; 2. umferð:

Hilmir Freyr Heimisson – Milton Pantzar

Drottningarpeðsbyrjun

1. d4 Rf6 2. Bf4 d5 3. e3 c5 4. dxc5 Da5+ 5. Rc3 e6 6. a3 Dxc5 7. Rb5 Ra6 8. Rf3 Bd7 9. a4 Be7 10. Be2 0-0 11. 0-0 Hfc8 12. c3 Db6 13. Rfd4 Rc5?

Hann hefði betur valdað c7-reitinn með 13.... Re8.

14. Bc7!

Fangar drottninguna, 14.... Hxc7 er svarað með 15. a5 o.s.frv.

14.... Da6 15. a5!

Hann gat unnið drottninguna fyrir tvo létta með 15. Rd6 en þetta er enn betra.

15.... b6 16. axb6 Db7 17. Hxa7 Hxa7 18. bxa7 Re8 19. Bb8 Ra6 20. Da1 Hd8 21. Da5 Hxb8

 

22. axb8=D?

Mun sterkara var 22. Dxa6! sem vinnur strax.

22.... Rxb8 23. f4 f6 24. Ha1 Bc5 25. b4 Bb6 26. Da8 Dc8 27. Ha3 Kh8 28. f5 e5 29. Dxd5 exd4 30. Bc4? Rc7 31. Rxc7 Bxc7

Í tímahrakinu sást báðum keppendum yfir snjallan millileik, 31.... dxe3! sem heldur jafnvægi.

32. cxd4 Bxf5 33. b5 Bg6 34. Ha7 Bb6 35. Hb7 Ba5 36. Dd6!

– og svartur gafst upp.

Óopinber keppni milli Norðurlandaríkjanna fer einnig fram en þar er samanlagður vinningafjöldi keppenda frá hverju landi lagður til grundvallar. Skákbylgjan í Noregi talar þar sínu máli:

1. Noregur 38½ v. 2. Ísland 33½ v. 3.-4. Svíþjóð og Finnland 32½ v. Finnland 5. Danmörk 27 v. 6. Færeyjar 16 v. 

Jóhann og Helgi Áss efstir í A-flokki skákhátíðar MótX

Jóhann Hjartarson og Helgi Áss Grétarsson voru efstir í A-flokki skákhátíðar MótX fyrir lokaumferðina sem er á dagskrá næstkomandi þriðjudag. Þeir höfðu báðir hlotið 4½ vinning af sex mögulegum og ákváðu raunar að flýta viðureign sinni vegna utanferðar Jóhanns á skákmót í Austurríki sem hefst í dag. Úrslitaviðureignin fór fram sl. miðvikudag en úrslitunum er haldið leyndum fram á þriðjudag. Fyrir lokaumferðina eru Jón L. Árnason, Hannes Hlífar Stefánsson, Björgvin Jónsson, Þröstur Þórhallsson og Jón Viktor Gunnarson í 3.-7. sæti með 4 vinninga. 

Í b-flokki er Siguringi Sigurjónsson efstur með 5 vinninga af sex mögulegum. Í 2.-3. Sæti eru Gauti Páll Jónsson og Hilmir Freyr Heimsson með 4½ v. Meðal „hvítra hrafna“ dró til tíðinda í 4. umferð þegar forsprakki þessa móts, Jón Þorvaldsson, lagði Braga Halldórsson að velli og komst í efsta sætið ásamt Braga og Júlíusi Friðjónssyni. Þeir eru allir með 2½ vinning af fjórum mögulegum.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 17. febrúar 2018

Skákþættir Morgunblaðsins

Skákþáttur Morgunblaðsins: Stefán Bergsson er skákmeistari Reykjavíkur 2018

Stefán Bergsson er skákmeistari Reykjavíkur 2018 eftir sigur í lokaumferð mótsins sem fram fór sl. miðvikudagskvöld þegar hann tefldi við Dag Ragnarsson. Stefán hlaut átta vinninga af níu mögulegum, náði snemma forystunni með hverjum sigrinum á fætur öðrum, og það var ekki fyrr en í áttundu umferð að stigahæsti keppandi mótsins, Bragi Þorfinnsson, stöðvaði sigurgönguna en í lokaumferðinni var Stefán aftur kominn á ferð og vann örugglega.

Stefán er frá Akureyri og fékk sitt skákuppeldi nyrðra í góðum félagsskap Skákfélags Akureyrar ásamt jafnaldra sínum Halldóri Brynjari Halldórssyni. Hann á lögheimili í Reykjavík og þarf því ekki að sækja handhafa hinnar virðulega nafnbótar neðar í töfluna eins og stundum áður þegar „utanbæjarmenn“ hafa sigrað á þinginu. Stefán er ötull stjórnarmaður hjá Skáksambandi Íslands og veitti Skákakademíu Reykjavíkur forstöðu um margra ára skeið. Frammistaða hans undanfarin ár hefur verið nokkuð sveiflukennd en þetta er langbesti árangur hans á ferlinum.

Í 2. sæti varð Bragi Þorfinnsson með sjö vinninga eftir sigur á Hilmi Frey í lokaumferðinni. Í 3.-4. sæti urðu Sigurbjörn Björnsson og Einar Hjalti Jensson með 6½ vinning og þar á eftir í 5.-10. sæti Bragi Halldórsson, Dagur Ragnarsson, Hilmir Freyr Heimisson, Hrafn Loftsson, Lenka Ptacnikova og Júlíus Friðjónsson, öll með sex vinninga.

Í lokaumferðinni var mikið undir þegar Stefán settist við taflið andspænis Degi Ragnarssyni, sem með sigri gat náð honum að vinningum. Dagur varð í 3. sæti í keppni landsliðsflokks í fyrra og var til alls vís en brást þó bogalistin eftir lélega byrjunartaflmennsku:

Skákþing Reykjavíkur 2018; 9. umferð:

Stefán Bergsson – Dagur Ragnarsson

Frönsk vörn

1. e4 e6 2. d4 d5 3. Rd2 h6?!

Sjaldséður leikur. Dagur var greinilega staðráðinn í að sneiða hjá troðnum slóðum.

4. Rgf3 Rf6 5. e5 Rfd7 6. Bd3 c5 7. c3 Rc6 8. a3 a5 9. Rf1 a4 10. h4 Da5 11. Bd2 Da7 12. Be3 Rb6 13. Rg3 Rc4?

Afleitur leikur sem leiðir til óteflandi stöðu. Betra var 13.... cxd4 þótt hvíta staðan sé alltaf vænleg eftir mislukkaða byrjun Dags.

14. Bxc4 dxc4 15. dxc5! Db8

Vandinn er sá að eftir 15.... bxc5 kemur 16. Bxc5 dxc5 17,. Re4 og síðan – Rd6+ með vinningsstöðu.

16. Bd4 Be7 17. Re4 0-0 18. Dd2 Ra5 19. Hd1 Bd7

Stefán var að bíða eftir þessum leik...

20. Rf6+!

Og nú er svartur algerlega varnarlaus.

20.... Bxf6 21. exf6 Rb3 22. De3 Rxd4 23. Hxd4 Bc6 24. Hg4

– og svartur gafst upp.

 

Jóhann og Björgvin efstir á skákhátíð MótX

Jóhann Hjartarson vann stigahæsta keppanda í fimmtu umferð skákhátíðar MótX, Hjörvar Stein Grétarsson, og komst við það í efsta sætið þegar tefldar hafa verið fimm umferðir af sjö. Hann deilir því með Björgvini Jónssyni sem tók sér ½ vinnings yfirsetu í fimmtu umferð.

 

Í næstu sætum koma svo Hannes Hlífar Stefánsson, Jón Viktor Gunnarsson og Helgi Áss Grétarsson, allir með 3½ vinning. Í næstu umferð tefla saman Hannes Hlífar og Jóhann Hjartarson og Björgvin mætir Helga Ás. Í B-flokki eru fjórir skákmenn efstir, Gauti Pall Jónsson, Birkir Ísak Jóhannsson, Agnar T. Möller og Siguringi Sigurjónsson. Bragi Halldórsson er efstur meðal Hvítra hrafna, með 2½ vinning af þremur mögulegu 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 10. febrúar 2018

Skákþættir Morgunblaðsins

Skákþáttur Morgunblaðsins: Stefán Bergsson getur unnið skákþingið með fullu húsi

Sú staða er komin upp þegar tvær umferðir eru eftir af Skákþingi Reykjavíkur 2018 að Akureyringurinn Stefán Bergsson hefur tveggja vinninga forskot á næstu menn og þarf aðeins jafntefli til að tryggja sigurinn. Hann mætir raunar stigahæsta keppandanum, Braga Þorfinnssyni, í áttundu umferð sem fram fer á morgun. Þá fæst svar við þeirri spurningu hvort skákþingið vinnist með fullu húsi, sem gerðist síðast fyrir 25 árum og var þar að verki Vestfirðingurinn Guðmundur Gíslason. Staða efstu manna fyrir lokasprettinn:

1. Stefán Bergsson 7 v (af 7), 2.-10. Hilmir Freyr Heimisson, Björn Hólm Birkisson, Þorvarður Ólafsson, Bragi Halldórsson, Lenka Ptacnikova, Einar Hjalti Jensson, Bragi Þorfinnsson, Júlíus Friðjónsson og Dagur Ragnarsson 5 v.

Í 6. umferð vann Stefán snaggaralegan sigur á Hrafni Loftssyni:

Hrafn Loftsson – Stefán Bergsson

Kóngsindversk vörn

1 d4 Rf6 2. Rf3 g6 3. c4 Bg7 4. Rc3 O-O 5. e4 d6 6. Be2 e5 7. Be3 Rg4 8. Bg5 f6 9. Bc1 Rc6 10. d5 Rd4!?

Þessi peðsfórn virðist gefa góð færi þó að algengara sé að víkja riddaranum undan til e7.

11. Rxd4 exd4 12. Dxd4 f5 13. Dd1 fxe4!

Með hugmyndinni 14. Bxg4 Dh4! sem hótar biskupinum og máti á f2.

14. Rxe4 De7 15. f3 Bf5 16. O-O

16. ... Rxh2!?

Freistandi, en gott var einnig 16. ... Bxe4, t.d. 17. fxg4 Be5! og hvíta kóngsstaðan stenst ekki álagið.

17. Kxh2 Dh4+ 18. Kg1 Bxe4 19. fxe4 Hxf1+ 20. Kxf1 Hf8+ 21. Bf3 Dxe4 22. De2 Dh4 23. Df2?

Hann gat varist með 23. De1!

23. ... Dxc4+ 24. Kg1 He8!

Með vinningsstöðu!

25. Kh2 Bd4 26. Dd2 Be5+ 27. Kh3 Df1 28. Kg4 h5+ 29. Kh4 Dh1+ 30. Kg5 Kg7!

Kóngurinn rekur smiðshöggið á vel útfærða sókn.

31. Dd3 Bf6+ 32. Kf4 Dh4+ 33. g4 Dh2 mát.

 

 

Björgvin efstur í Stúkunni

Björgvin Jónsson vann Halldór Grétar Einarsson í fjórðu umferð skákhátíðar MótX sem fram fer í Stúkunni á Kópavogsvelli og þar er tefld ein skák í viku. Skákhátíðin dregur til sín flesta af sterkustu skákmönnum Íslands en í efsta flokki eru línur aðeins teknar að skýrast þó að stór hluti keppenda hafi nýtt sér möguleika á ½ vinnings yfirsetu, sumir oftar en einu sinni. Staða efstu mann í A-flokki er þessi: 1. Björgvin Jónsson 3½ v. ( af 4 ) 2.–4. Jóhann Hjartarson, Hjörvar Steinn Grétarsson og Þröstur Þórhallsson 3 v. 

Sjötti sigur Magnúsar Carlsen í Wijk aan Zee

Fremsti skákmaður Hollendinga, Anish Giri, hefur um nokkurt skeið átt við sérkennilegan ímyndarvanda að stríða. Mót eftir mót rigndi niður jafnteflum í skákum hans. Svo dæmi sé tekið má nefna áskorendamótið í Moskvu sem fram fór fyrri part árs 2016 en þar tefldi hann 14 skákir og þeim lauk öllum með jafntefli. Fyrir Tata Steel-mótið í Wijk aan Zee var honum ljóst að hann yrði að reka af sér slyðruorðið. Niðurstaðan varð þessi: 

1.-2. Giri og Magnús Carlsen 9 v. (af 13 ) 3.–4. Kramnik og Mamedyarov 8½ v. 5.–6. Anand og So 8 v. 7. Karjakin 7½ v. 8. Svidler 6 v. 9. Wei 5 ½ v. 10.–11. Jones, Caruana og Matlakov 5 v. 13. Adhiban 3½ v. 14. Hou Yifan 2½ v.

Nú hefur verið er tekinn upp sá siður í Wijk að tefla til úrslita verði tveir eða fleiri efstir og í tveim hraðskákum sem Magnús og Giri tefldu um sigurvegaratitilinn hafði Norðmaðurinn betur, 1½:½ , og vann þar með sinn sjötta sigur á þessu merka móti.

 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 3. febrúar 2018

Skákþættir Morgunblaðsins

Skákþáttur Morgunblaðsins: Heimsmeistarinn lék af sér manni en vann samt!

Hjörvar Steinn Grétarsson, Björgvin Jónsson og Halldór Grétar Einarsson eru efstir eftir þrjár umferðir í A-flokki skákhátíðar MótX en í 3. umferð bar helst til tíðinda að Jóhann Hjartarson tapaði fyrir Björgvini Jónssyni en í vinningsstöðu var hann sleginn heiftarlegri skákblindu. Hjörvar Steinn tók ½ vinnings yfirsetu.

Í B-flokki er einn efstur Gauti Páll Jónsson með 3 vinninga en hjá „Hvítum hröfnum“ hefur Bragi Halldórsson tekið forystu með því að vinna tvær fyrstu skákir sínar.

Á Skákþingi Reykjavíkur eru tefldar tvær skákir í viku og hefur Stefán Bergsson tekið forystu og unnið allar fimm fyrstu skákir sínar. Í 2.-5. sæti með 4 vinninga koma svo Hilmir Freyr Heimisson, Björn Hólm Birkisson, Hrafn Loftsson og Gauti Páll Jónsson.

Stefán mætti Hilmi Frey í fjórðu umferð og hafði sigur með skemmtilegri fléttu. En áður hafði Hilmir Freyr misst af góðum færum:

Skákþing Reykjavíkur 2018:

Hilmir Freyr Heimisson – Stefán Bergsson

Reti-byrjun

1. Rf3 d5 2. g3 Rf6 3. Bg2 Bg4 4. O-O Rbd7 5. d4 e6 6. Rbd2 Bd6 7. He1 c5 8. c4 cxd4 9. cxd5 exd5 10. Rxd4 O-O 11. h3 Bh5 12. Rf5 Bc5 13. Rb3 Bb6 14. Bxd5 R5 15. Bf4

Flækir taflið að óþörfu. Eftir 15. Bxb7 hefur hvítur yfirburðastöðu.

15. ... Dd7! 16. Rxg7! Kxg7 17. Bxe5 Df5!

Skemmtilegar vendingar en hvíta staðan er aðeins betri.

18. Bxf6 Dxf6 19. Hf1?

Öruggara var 19. Bf3.

19. ... Hfd8 20. Dd3 De5 21. e4 Hac8 22. Hab1??

Tapleikurinn. Hann varð að leika 22. g4 og staðan er í jafnvægi eftir 22. ... f5! 23. gxh5 fxe4 24. Dxe5 Hxd5 o.s.frv.

22. ... Be2!

Vinningsleikurinn. Hvíta drottningin verður að sleppa taki sínu á g3-peðinu.

23. Dxe2 Dxg3+ 24. Kh1 Dxh3+ 25. Kg1 Kh8 26. Bxf7 Hg8+

– og hvítur gafst upp. Hilmir lét ekki deigan síga því að í næstu umferð lagði sigraði hann næst stigahæsta keppandann, Einar Hjalta Jensson. 

„Magnús leikur af sér manni á nokkurra ára fresti“

Þetta var haft eftir öflugasta skákmanni Hollendinga, Anish Giri, þegar einni umtöluðustu skák síðari ára lauk í 8. umferð Tata Steel mótsins í Wijk aan Zee milli heimsmeistarans og Gawain Jones. Giri vísaði til þess að þegar hann tefldi við Magnús á þessum sama stað fyrir nokkrum árum lék Norðmaðurinn af sér manni snemma tafls og mátti leggja niður vopnin eftir aðeins 23 leiki. Í báðum tilvikum var riddari hvíts að vandræðast á g5. En sagan er ekki öll sögð þó að g5-riddarinn fyki út af borðinu:

 

Tata Steel 2018:

Magnús Carlsen – Gawain Jones

Staðan kom upp úr hinu þekkta „Dreka-afbrigði“ sikileyjarvarnar. Um þá byrjun hefur Gawain Jones skrifað tvær bækur. Nú lék hvítur:

17. g4??

Og svarið kom um hæl...

17. ... f4!

Og hvítur tapar manni.

Það sem á eftir kom var furðulegt, Magnús tefldi áfram eins og ekkert hefði í skorist og Gawain Jones lét hjá líða að loka línum á kóngsvæng. Við það vænkaðist hagur hvíts og að lokum hafði Magnús sigur sem ætti að gagnast vel í baráttunni um efsta sætið. Í gær hófst lokaspretturinn og þá var staða efstu manna þessi:

1. – 3. Magnús Carlsen, Mamedyarov, og Giri 7 v ( af 10 ) 4. Kramnik 6 ½ v. 5. Anand 6 v. 6. – 7. So og Karjakin 5 ½ v. 8. Svidler 4 ½ v. 9. – 12. Jones, Caruana, Matlakov og Wei Yi 4 v. 13. Adhiban 3 v.14. Hou Yifan 2 v.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 27. janúar 2018.

Skákþættir Morgunblaðsins

Skákþáttur Morgunblaðsins: Hjörvar og Jóhann efstir á skákhátíð MótX

Öflug innanlandsmót: Skákþing Reykjavíkur 2018, Skákhátíð MótX Kópavogi og Skákþing Akureyrar 2018, eru komin á dágóðan rekspöl. Á Skákþingi Reykjavíkur hafa þrjár umferðir verið tefldar og eru í efsta sæti með fullt hús Hilmir Freyr Heimisson, Björn Hólm Birkisson og Stefán Bergsson.

Á MótX-skákhátíðinni eru þeir stigahæstu efstir; Hjörvar Steinn Grétarsson og Jóhann Hjartarson hafa unnið báðar skákir sínar. Staðan í þessu móti er alltaf dálítið óljós því þátttakendur eiga kost á hálfs vinnings yfirsetu þrisvar í sjö umferðum og mun t.d. Hjörvar Steinn ekki tefla í næstu umferð.

Í B-riðli eru Gauti Páll Jónsson og Siguringi Sigurjónsson efstir með tvo vinninga en hjá Hvítum hröfnum er dálítið um frestanir en Júlíus Friðjónsson er efstur eins og staðan er með 1½ vinning úr tveimur skákum.

Skákþing Akureyrar er nú haldið í 80. skipti, en Skákfélag Akureyrar fagnar brátt 100 ára afmæli sínu. Rúnar Sigurpálsson tekur þátt í þinginu aftur en sigurstranglegastan verður að telja Jón Kristin Þorgeirsson. 

Magnaður Anand í Wijk aan Zee

Skákhátíðin í Wijk aan Zee, sem tekur nafn sitt eftir aðalkostanda þess, stáliðjuverinu Tata Steel, dregur að venju til sín nær alla bestu skákmenn heims með heimsmeistarann Magnús Carlsen í broddi fylkingar. Hann hefur unnið mótið oftar en nokkur annar eða fimm sinnum. Eftir fimm umferðir hefur hann skipað sér í hóp efstu manna en þó aðeins unnið eina skák og taflmennska hans verið fremur tilþrifalítil. Staða efstu manna:

 

1.-3. Anand, Giri og Mamedyarov 3½ v. (af 5) 4.-6. Magnús Carlsen, Kramnik og So 3 v. Keppendur eru 14 talsins.

Frískleg taflmennska gamla heimsmeistarans Wisvanathans Anands hefur vakið mikla athygli, en á dögunum varð hann heimsmeistari í atskák. Hið létta handbragð hans naut sín í viðureigninni við Fabiano Caruana, sem hefur átt erfitt uppdráttar í Hollandi:

Wijk aan Zee 2018; 4. umferð:

Wisvanathan Anand – Fabiano Caruana

Petroffs-vörn

1. e4 e5 2. Rf3 Rf6 3. Rxe5 d6 4. Rf3 Rxe4 5. d4 d5 6. Bd3 Bd6 7. 0-0 0-0 8. c4 c6 9. Dc2 Ra6 10. a3 Bg4 11. Re5

Þessi staða er er ekki ný af nálinni og útheimtir gríðarlega undirbúningsvinnu. Hér hefur áður verið leikið 11. ... Bxe5 12. dxe5 Rac5 13. f3 Rxd3 14. Dxd3 Rc5 15. Dd4 Rb3 16. Dxg4 Rxa1 17. Bh6 g6 18. Rc3 með afar óljósri stöðu. Það kom á óvart að Caruana skyldi velja leik sem ekki hefur gefist vel.

11.... Bf5!? 12. b4 Rc7 13. f3 Bg6 14. c5 Bxe5 15. dxe5 Rg5 16. Bb2 d4?!

Hyggst hasla sér völl á e3 en hvítur er fyrri til. „Houdini“ telur 16.... a5 betra.

17. f4! Rd5 18. fxg5 Re3 19. Dd2 Bxd3 20. Dxd3 Rxf1 21. Kxf1 Dxg5 22. Rd2 Dxe5 23. Rf3 Dh5 24. Dxd4 f6 25. Dc4 Kh8 26. Bc1!

Vel leikið. Anand veit auðvitað að biskup og riddari eiga erfitt uppdráttar gegn hrók og peði, einkum ef línur eru opnar. Biskupinn stefnir skónum á d6 þar sem hróknum er haldið niðri.

26.... Hfe8 27. Bf4 a5 28. Bd6 axb4 29. Dxb4 Dd5 30. Dxb7 h6 31. Kg1 Ha4 32. h3 Hc4 33. Db2 Dd3 34. Ha2 Dd1 35. Kh2 Hc1 36. a4!

Kóngsstaðan er alveg örugg og frípeðið skundar af stað.

36.... f5 37. Db7 f4 38. Bxf4 Hxc5 39. Hd2 Dxa4 40. Df7 Hg8 41. Be5!

Hótar t.d. 42. Hd8.

41.... Dc4

42. Hd6!

Glæsilega leikið, 42.... Dxf7 er svarað með 43. Hxh6 mát. Caruana gafst því upp. 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 20. janúar 2018.

Skákþættir Morgunblaðsins

Skákþáttur Morgunblaðsins: "Já, ég lét þig sleppa," sagði Friðrik

Óhætt er að fullyrða að skákvertíðin 2018 byrji með látum. Tveim dögum eftir að alþjóðlegu unglingamóti SÍ og Skákskólans sem haldið var til minningar um Steinþór Baldursson lauk í Stúkunni á Kópavogsvelli með sigri Hollendingsins Thomas Beerdsen hófst í sömu salarkynnum Skákhátíð Kópavogs kostuð af MótX, en mótshaldið er að samvinnuverkefni Hugins og Skákdeildar Breiðabliks. Jón Þorvaldsson á mestan heiðurinn af þessari framkvæmd og hefur með fortölulist mikilli fengið til leiks flesta af sterkustu skákmönnum landsins, t.d. stórmeistarana Hjörvar Stein Grétarsson, Jóhann Hjartarson, Hannes Hlífar Stefánsson, Jón L. Árnason, Helga Áss Grétarsson og Þröst Þórhallsson.

Í B-flokki hófu 33 skákmenn keppni og þriðji flokkur Skákhátíðarinnar sem fengið hefur nafnið Hvítir hrafnar skartar sex skákmönnum 60 ára og eldri og þar fer fremstur Friðrik Ólafsson. Jón Þorvaldsson fékk gamlan vopnabróður Friðriks, stórmeistarann Guðmund Sigurjónsson, til að leika fyrsta leikinn á borði Friðriks. Baksviðs rifjaðist upp að í vor verða 50 ár liðin síðan þessir tveir tefldu fræga maraþonskák á Fiske-mótinu í Oddfellow-húsinu við Vonarstræti í Reykjavík. Viðureigninni lauk með jafntefli eftir 109 leiki: „Já, ég lét þig sleppa,“ sagði Friðrik þegar skákina bar á góma.

„Góð vörn,“ áréttaði Guðmundur og brosti.

Áður en keppni á öðrum borðum hófst sagði bæjarstjórinn í Kópavogi nokkur orð og fagnaði sérstaklega því blómlega skáklífi sem þrifist í Kópavogi.

Skákþing Reykjavíkur hófst á miðvikudagskvöldið í húsakynnum TR og þar eru 57 skákmenn skráðir til leiks í efsta flokki. Stigahæstir eru Bragi Þorfinnsson, Einar Hjalti Jensson, Dagur Ragnarsson og Vignir Vatnar Stefánsson.

 

Vignir komst í efsta sætið

Með því að vinna rússneska stórmeistarann Kunin í sjöundu umferð alþjóðlega mótsins í Stuttgart í síðustu viku komst hinn 14 ára gamli Vignir Vatnar Stefánsson í efsta sætið þegar tvær umferðir voru eftir og hafði þá hlotið 6 vinninga af 7 mögulegum. Hann þurfti aðeins eitt jafntefli til að tryggja sér áfanga að alþjóðlegum meistaratitli en tapaði báðum skákunum í lokaumferðunum. Guðmundur Kjartansson hlaut 6½ vinning og hafnaði í 10. sæti.

 

Lítum á sigur Vignis yfir Kunin, en þar gekk á ýmsu í flóknu miðtafli:

Vignir Vatnar Stefánsson – Vitalí Kunin

Philidors-vörn

1. e4 d6 2. d4 Rf6 3. Rc3 Rbd7 4. Rf3 e5 5. Bc4 Be7 6. O-O O-O 7. He1 c6 8. a4 exd4 9. Rxd4 Re5 10. Be2 He8 11. f4 Rg6 12. g3 Dc7 13. Bf3 Bd7 14. Be3 Had8 15. b3 Db8 16. Kg2 d5 17. exd5 cxd5 18. Dd4 b6 19. a5 Bc5 20. Rxc5 bxc5 21. Dxc5 Dxb2 22. Ha2?

Mun sterkara var 22. Rxd5.

22. ... Db8 23. Hb1 Da8 24. a6 Hc8 25. Dd4 Re7?

Og hér var 25. ... Bg4 firnasterkur leikur.

26. Bf2 Bg4 27. Hb7 Bxf3+ 28. Kxf3 Hc4 29. Dd3 Dc8 30. Rb5 Dg4+ 31. Kg2 Rg6 32. Kh1 Re4 33. Bg1 h5 34. Ha3 Rf6 35. Rd6 He1

36. Rxc4 dxc4?

Hann gat leikið 36. ... Re4 með hótuninni 37. ... Rf2+ og 37. Df3 er svarað með 37. ... Rh4! með vinningsstöðu . Nú snýst taflið við.

37. Df3 Df5 38. He3 Hxe3 39. Bxe3 Re5 40. Dg2 Reg4 41. Bg1 Re4 42. He7 Rgf6 43. He5 Dg6 44. Bxa7 h4 45. Bg1 Rxg3+ 46. hxg3 hxg3 47. a7 Dh6+ 48. Bh2 Rg4 49. a8D+ Kh7 50. Dxg3 Rf2+ 51. Dxf2 Dc6+ 52. Dxc6

- og svartur gafst upp.

 

 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 13. janúar 2018.

Skákþættir Morgunblaðsins

Skákþáttur Morgunblaðsins: Skákin fangar athygli Jóns og Gunnu

Stór hluti norsku þjóðarinnar sat límdur við skjáinn síðustu daga ársins 2017 þegar heimsmeistaramótin í at-skák og hraðskák fóru fram í Riyadh í Sádi-Arabíu, en auk vefmiðlanna var norska sjónvarpið, NRK, með beinar útsendingar frá viðureignum Magnúsar Carlsen. Niðurstaðan: hinn 48 ára gamli Indverji Wisvanathan Anand varð heimsmeistari í atskák og Magnús Carlsen heimsmeistari í hraðskák.

Skákin er á mikilli uppleið í sjónvarpi og á netinu. Vandinn hefur verið sá að keppnisgreinin sem slík hefur þótt gera of miklar kröfur til þekkingar áhorfandans og ekki náð að fanga athygli Jóns og Gunnu. Eins og mótin eru matreidd nú til dags með skákskýringum, nærmyndum af keppendum, tímahraki og tölvugreiningu er að verða breyting á. Þegar við bætist hátt verðlaunafé eykst athygli stærstu fjölmiðlanna; 250 þúsund dalir voru í 1. verðlaun í hvoru móti og má geta þess að CNN sýndi langan þátt um mótið. En heimsmeistaramótið beindi einnig athygli að bjánalegum skákreglum og atvik úr viðureign Magnúsar Carlsen í 1. umferð hraðskákarinnar kallaði á sterk viðbrögð:

Magnus Carlsen – Inarkiev

Síðasti leikur heimsmeistarans var 27. Ha7xb7+. Rússinn Inarkiev sá fram á að staða hans væri töpuð eftir 27. ... Hxb7 28. Bxe8+ og eftir uppskipti á hrókum á hvítur að vinna á umframpeðinu en lék þess í stað ólöglegum leik, 27. ... Re3+. Af mörgu vitlausu regluverki sem komið hefur frá FIDE síðustu árin opnar ein sú vitlausasta á þann möguleika að sá sem leikur ólöglegum leik getur unnið skákina; Magnús lék nefnilega 28. Kd3 og Inarkiev krafðist vinnings á þeirri forsendu að Magnús hefði leikið ólöglegum leik! Þótti mörgum býsna lágt lotið en viti menn: dómarinn féllst á að það væri réttmæt krafa! Stuttu síðar var svo farið að rýna í reglurnar og niðurstaðan varð sú að skákinni skyldi haldið áfram eftir 27. leik hvíts. Inarkiev neitaði að tefla frekar en dómarinn var settur af og okkar maður í Sádi-Arabíu, alþjóðlegi dómarinn Omar Salama, var settur yfir viðureignir heimsmeistarans.

Atvikið virtist slá Magnús Carlsen út af laginu fyrri keppnisdaginn en þann síðari náði hann vopnum sínum og að lokum hlaut hann 16 vinninga af 21 mögulegum. Karjakin og Anand komu næstir með 14½ vinning hvor.

 

Minningarmót um Steinþór Baldursson

Skáksamband Íslands og Skákskóli Íslands hafa samvinnu um alþjóðlegt mót skipað skákmönnum 20 ára og yngri til að minnast Steinþórs Baldurssonar, stjórnarmanns í SÍ, sem féll frá langt um aldur fram haustið 2016. 24 skákmenn hófu keppni á fimmtudaginn og tefldar verða sjö umferðir með tímamörkunum 90 30. Eftir fyrstu tvær umferðirnar voru fjórir með tvo vinninga, þ.ám. Birkir Örn Bárðarson. 

Hinn 16 ára gamli Aron Thor Mai fékk á sig sjaldséða leið í Najdorf-afbrigði Sikileyjarvarnar en var öllum hnútum kunnugur:

Aron Thor Mai – Ljuten Apol (Færeyjar)

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 a6 6. Bg5 e6 7. f4 Rc6 8. Rxc6 bxc6 9. e5 h6 10. Bh4 g5 11. fxg5 Rd5 12. Re4 Db6 13. c3 hxg5 14. Bxg5 dxe5?

15. Dxd5! Be7

15. ... exd5 er svarað með 17. Rf6+ og 18. Rxd5+ sem vinnur drottninguna.

16. Dd2 Bxg5 17. Rx

 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 6. janúar 2018.

Skákþættir Morgunblaðsins

Skákþáttur Morgunblaðsins: Lausnir á jólaskákþrautum

D. J. Shire 1997 

Hvítur leikur og mátar í 2. leik.

 

1. Kh2

a) 1. ... Hxf3 2. De4 mát; b) 1. ... He3 2. Rd2 mát; c) 1. ... Hd2 2. Rxd2 mát d) 1. ... Hd4 2. Re5 mát; e) 1. ... Hd3-d1, d5, d6, d7, d8 2. Dxc3 mát. f) 1. ... Bb1 2. Db3 mát; 1. ... Bb3 2. Dxb3 mát; g) 1. ... Rxa4 2. Dxa4 mát; h) 1. ... Rd1 2. Dxa2 mát.

 

G. Heathcote 1911 

Hvítur leikur og mátar í 2. leik.

Hvítur leikur og mátar í 2. leik.

1. Rd4

a) 1. ... Dxd4 2. Dxh7 mát; b) 1. ... Bxd4 2. Db1 mát; c) 1. ... Kxd4 2. Db4 mát; d) 1. ...exd4 2. Dxd5 mát, e) 1. ... aðrir leikir 2. Hg4 mát. 

 

Thomas Taverner 1889 

Hvítur leikur og mátar í 2. leik.

 

1. Hh1

a) 1. ... c3 2. Rd3 mát b) 1. ... Be7 2. e3 mát; c) 1. .. Bf6 2. Df5 mát; d) 1. ... Bg5 2. Dh2 mát e) 1. .. Bh4 2. Hxh4 mát; f) 1. ... Bxh7 2. Rd5 mát; g) 1. ... Bf7 2. Df5 mát; h) 1. ...Be6 2. e3 mát; i) 1. ... Bd5 2. Rxd5 mát; j) 1. .. He7 2. Hh4 mát; k) 1. .. He6 2. Rd5 mát; l) 1. .. He5 2. Dg4 mát; m) 1. ... He4 2. fxe4 mát; n) 1. ... He3 2. Bh2 mát; o) 1. ... Hxe2+ 2. Rxe2 mát; p) 1. ... Hf7 2. Rd5 mát; q) 1. ... Hf6 2. Hh4 mát; r) 1. ... Hf5 2. Dxf5 mát.

 

Frá HM í Dresden 2017 

Hvítur leikur og mátar í 3. leik .

1. Ha7 - hótar 2. Hxd7 ásamt 3. De6 mát eða 3. Dh8 mát.

a) 1. ... Kd6 2. De6+ dxe6 3. Rf7 mát; b) 1. ... d5 2. Rec6+ og 3. De6 mát eða 3. Dxh7 mát; c) 1. ... d6 2. Rec6+ og 3. Df7 mát eða 3. Dxh7 mát; d) 1. ... Kd4 2. Hxd7+ Kc3 (2. ... Ke5 3. De6 mát) 3. Db3 mát.

 

A. Selezniev 1921 

Hvítur leikur og vinnur.

Hvítur leikur og vinnur.

1. d7 Kc7 2. d8(D)+ Kxd8 3. O-O-O+ og 4. Kxb2.

 

V. Korolkov 1935 

Hvítur leikur og vinnur.

 

1. d7 Ke7 2. Hb8 Bxg3 3. Ha8

Ekki 3. Kxg3 f1(D) 4. d8(D)+ Kxd8 5. Ba6+ Kc7 6. Hb7+ Kc8 7. Hb6+ Kc7 8. Hb7+ Kc8 9. Hxa7+ Kb8 10. Hb7+ Ka8 og svartur heldur velli.

3. ... f1(D) 4. d8(D)+ Kxd8 5. Ba6 Bb8 6. Bxf1 Kc7 7. Ba6 e2 8. Bxe2 Kb7 9. Bf3 Kxa8 10. Bxc6 mát.

 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 30. desember 2017.

Skákþættir Morgunblaðsins