Leita í fréttum mbl.is

Bloggfærslur mánaðarins, nóvember 2017

Ný alþjóðleg skákstig

Ný alþjóðleg skákstig eru komin út og taka þau gildi á morgun. Héðinn Steingrímsson (2574) er stigahæsti skákmaður landsins. Í næstum sætum eru Hjörvar Steinn Grétarsson (2565) og Jóhann Hjartarson (2536).  Björn Hólm Birkisson (+82) hækkar mest allra frá nóvemberlistanum.

Listinn í heild sinni

Topp 20

 NoNameTitDEC17DiffGms
1Steingrimsson, HedinnGM2574-89
2Gretarsson, Hjorvar SteinnGM2565-618
3Hjartarson, JohannGM253600
4Stefansson, HannesGM2523918
5Olafsson, HelgiGM250800
6Petursson, MargeirGM249900
7Danielsen, HenrikGM249311
8Gunnarsson, Jon ViktorIM246600
9Arnason, Jon LGM245700
10Kristjansson, StefanGM244700
11Gretarsson, Helgi AssGM244100
12Kjartansson, GudmundurIM2438317
13Gunnarsson, ArnarIM242800
14Thorsteins, KarlIM242600
15Thorfinnsson, BragiIM2426-179
16Thorhallsson, ThrosturGM241800
17Kjartansson, DavidFM240900
18Thorfinnsson, BjornIM240059
19Ulfarsson, Magnus OrnFM237100
20Arngrimsson, DagurIM237000


Listinn í heild sinni


Mestu hækkanir

Björn Hólm Birkisson (+82) hækkaði mest allra frá nóvemberlistanum. Í næstum sætum eru Arnar Smári Signýjarson (+61) og Gauti Páll Jónsson (+36). Ein og svo oft áður er ungir efnilegir skákmenn fjölmennir á þessum lista. "Gömlu kempurnar" láta sig þó ekki vanta!

 

 NoNameTitDEC17DiffGms
1Birkisson, Bjorn Holm 20848214
2Signyjarson, Arnar Smari 1351614
3Jonsson, Gauti Pall 21613613
4Bjorgvinsson, Andri Freyr 2003339
5Briem, Stephan 1911314
6Andrason, Pall 1834266
7Karason, Askell OFM22641510
8Bjornsson, Eirikur K. 1934155
9Viglundsson, Bjorgvin 2167146
10Sigurvaldason, Hjalmar 1524145


Stigahæstu ungmenni landsins (u20)

Dagur Ragnarsson (2332) er stigahæsta ungmenni landsins og það í síðasta skipti því frá og áramótum telst hann ungmenni lengur í stigalegu tilliti. Í næstu sætum eru Jón Kristinn Þorgeirsson (2319) og Vignir Vatnar Stefánsson (2304).

 NoNameTitDEC17DiffGmsB-day
1Ragnarsson, DagurFM2332001997
2Thorgeirsson, Jon KristinnFM23190111999
3Stefansson, Vignir VatnarFM230410282003
4Johannesson, OliverFM2277001998
5Birkisson, Bardur OrnCM2190-8162000
6Jonsson, Gauti Pall 216136131999
7Heimisson, Hilmir FreyrCM2136-54152001
8Hardarson, Jon Trausti 2127001997
9Birkisson, Bjorn Holm 208482142000
10Mai, Aron Thor 2066002001

 

Reiknuð íslensk kappskákmót

  • Framsýnarmót Hugins
  • Norðurljósamótið
  • Meistaramót Garðabæjar


Fjöldi innlendra at- og hraðskámóta var einnig reiknuður og verður þeim stigum gerð skil á næstunni.


Heimslistinn


Magnus Carlsen (2837) er venju samkvæmt langstigahæsti skákmaður heims. Í næstu sætum eru Levon Aronian (2805), Shakhriyar Mamedyarov (2799) og Fabiano Caruana (2799).

Sjá nánar hér.

 


Skrár tengdar þessari bloggfærslu:

Skemmtikvöld Skáksambandsins í kvöld: Friðrik segir frá Portoroz 1958

1958-Portoroz-aðalmynd

Fyrsta skemmtikvöld Skáksambandsins fer fram á fimmtudagkvöldið, 30. nóvember, kl. 20 ´í húsnæði SÍ, Faxafeni 12. Fyrsti stórmeistari Íslendinga, Friðrik Ólafsson, verður með fyrirlestur og mun segja frá millisvæðamótinu í Portoroz árið 1958. Þar endaði Friðrik í 5.-6. sæti ásamt Bobby Fischer og tryggði sér keppnisrétt á áskorendamóti þar sem keppt var réttinn að mæta Botvinnik í heimsmeistaraeinvígi.

Árangur Friðriks á þessu móti er eitt allra besta afrek Íslendings fyrr eða síðar í skáksögunni. Meðal annarra keppenda voru Tal, sem sigraði á mótinu, Fischer (þá 15 ára), Petrosian, Bronstein og Larsen.

Skemmtikvöldið er opið öllum þeim sem eru áskrifendur að Tímaritinu Skák. Engin aðgangseyrir. Boðið verður á upp á kaffi og með því. Að loknu fyrirlestri geta áhugasamir gripið í tafl.

Hægt er að lesa um mótið á vefsíðu tileinkaðri Friðriki Ólafssyni.


Pistill Hugins um Íslandsmót skákfélaga: Gott silfur í sjónmáli!

Fyrri hluti Íslandsmóts skákfélaga 2017-2018, sem fram fór 19. - 22. okt. var bráðskemmtilegur. Alltaf jafngaman að hitta fjölskrúðuga flóru skákmanna víða að af landinu og móttökur Helga Árnasonar og hans fólks til fyrirmyndar að venju.

Í efstu deild lá reyndar ljóst fyrir nokkru áður en leikar hófust að Víkingaklúbburinn gerði sterkt tilkall til gullverðlauna þessa leiktíð. Fulltingi Jóhanns Hjartarsonar, Jóns L. Árnasonar, Jóns Viktors Gunnarssonar og Björns Þorfinnssonar, auk fjögurra erlendra stórmeistara sem tefla eins og ofurtölvur frá Tölvulistanum, þýddi bara eitt: Ofurefli.

Eftir nokkra umhugsun töldum við stjórnendur Hugins ekki svara kostnaði að flytja hingað þann óvíga her erlendra málaliða sem þyrfti til að gulltryggja okkur fjórða sigurinn í röð á Íslandsmótinu. Þess í stað var stefnan tekin á 2. sætið með okkar frábæra liði enda er alkunna að gott silfur er gulli betra. Einn erlendur stórmeistari kom þó til liðs við okkur í þetta sinn: GM Karen Movsziszian. Valið var engin tilviljun. Þessi geðþekki Armeni er  nýbakaður Evrópumeistari 50+, en alkunna er að heilastarfsemi skákmanna tekur stórstígum  framförum á aldursskeiðinu frá fimmtugu til áttræðs, svo fremi líkamleg heilsa sé í lagi. Það kom líka á daginn að Movsziszian er afrenndur að hugarafli.   

Hitt markmiðið, sem við settum okkur, var ekki síður metnaðarfullt: að tryggja B-liði Hugins áframhaldandi sess meðal hinna bestu en mikil og góð breidd er einn helsti styrkur Hugins.

  1. umferð: Sigur á sporgöngumönnum og óvænt tap B sveitar

Í fyrstu umferðinni mætti A-sveit Hugins nýsamsettri skákdeild Breiðabliks og Bolungarvíkur. Þar á bæ fara menn að dæmi okkar Huginsmanna og standa sínum fætinum í hvorum landsfjórðungnum. Við óskum þessum sporgöngumönnum og nánum samstarfsmönnum Hugins til hamingju með samrunann enda hefur hann gefist okkur vel og skapað skemmtilega landfræðilega vídd og frábæran persónuleg tengsl. Úrslit viðureignarinnar urðu 6,5 - 1,5 okkur í vil en þar söknuðu andstæðingar okkar auðvitað mjög stórmeistaranna Jóhanns og Jóns L. frá fyrri leiktíðum.

Vestfjarðafræðimaðurinn skeleggi, Snorri Bergsson, náði jafntefli við Hannes Hlífar með klókindalegum uppskiptum og Guðmundur Gíslason felldi Helga Ólafsson með leggjarbragði í skák sem báðir höfðu teflt vel en Helgi stóð til vinnings fram að fingurbrjótnum í blálokin.

B-sveit Hugins tapaði nokkuð óvænt 3,5 - 4,5 fyrir B-liði SA þó að við værum stigahærri á öllum borðum. Svakaleg átök urðu í skák sóknarskákmannanna kunnu, Sigurðar Daða og Stefáns Bergssonar. Hvortveggi gekk hart fram en Stefán náði að máta Daða sjónarmuni á undan. Hefur Daði heitið því að hefna ófaranna grimmilega með því að leggja Stefán að velli í 10 næstu kappskákum þeirra.

Af öðrum viðureignum má nefna sláandi 8-0 sigur ofurliðs Víkingaklúbbsins á KR og öfluga framgöngu Garðbæinga sem náðu jafntefli við Fjölni.

 

  1. umferð: Bræðravíg

Í annarri umferðinni mættust A- og B sveit Hugins. Á 7 borðum urðu úrslit í samræmi við stigamun en á 7. borði náði B-liðsmaðurinn Gísli Hólmar Jóhannesson að leggja Kristján Eðvarðsson. Niðurstaðan: 7-1 A-liðinu í vil.

Af öðrum viðureignum kvöldsins vakti sérstaka athygli að Garðbæingar komu aftur á óvart og nú lögðu þeir TR-inga að velli. Víkingaskriðdrekinn óð áfram með braki og brestum, kremjandi mann og annan. Aftur urðu úrslitin 8-0 en að þessu sinni voru Bolvíkingar/Breiðablik fórnarlambið. Var þessum mönnum fyrirmunað að tapa stigum, eða hvað?

  1. umferð: Basl með Akureyringa og frækin framganga formanna

Í þriðju umferð lenti A-sveit Hugins í erfiðleikum með að knésetja ólseiga Akureyringa.  Við unnum örugglega á fjórum efstu borðum en fengum aðeins ½ vinning á fjórum neðstu þar sem Kristján gerði jafntefli við Arnar Þorsteinsson. Úrslit 4,5-3,5. Nokkuð óvænt niðurstaða ef miðað er við síðustu leiktíð þegar við lögðum Akureyringana að velli 7,5-1,5 en þeir hafa reyndar styrkt lið sitt síðan.

B-lið Hugins mætti Víkingum gráum fyrir járnum, hvassbrýndum og með blóðhleypt augu. Yrðum við 3. sveitin til að snúa tómhent af vígvellinum gegn þeim? Nei, sú varð sem betur fer ekki raunin, þökk sé fráfarandi formanni Hugins, Þorsteini Þorsteinssyni, og nýkjörnum formanni félagsins, Pálma R. Péturssyni, sem sýndu sanna forystulund. Þorsteinn náði jafntefli gegn járnmanninum Gajewski (2585) með öflugum hróksleik á e6 (sjá stöðumynd) eftir nokkuð sjaldgæfa leikjaröð hvíts gegn Sikileyjarvörn Pólverjans. Pálmi og Jón L. (2458) skildu jafnir eftir að Pálmi hafði fórnað manni en sterk peð hans á drottningarvæng sköpuðu skemmtilegt mótvægi í endataflinu sem Jón L. treysti sér ekki til að brjóta.

Af viðureignum annarra sveita vakti helst athygli að Fjölnir lagði TR 5-3. Það leyndi sér ekki að skörð þeirra Jóns Viktors Gunnarssonar og Björns Þorfinnssonar hjá TR eru vandfyllt.

En grípum nú niður í skák Þorsteins og Gajewsky. Gefum Steina orðið:

„Leikar í skák minni við GM Gajewsky (2590) tóku að æsast þegar tímahrakið var skollið á.

Ég var með hvítt og átti leik í stöðunni hér að neðan.

Stöðumynd1

 

Hér skellti ég á hann 36.He6! sem hann svaraði með 36. …Bd7.

Stöðumynd2

Og nú kom 37.Df6+ Kg8 38.Dg6+ fxg6 39.Hg6+ og skákin endaði með þráskák eins og sést að neðan.

Stöðumynd3 

Ég skoðaði reyndar 38.Hxb6 í stað þess að taka þráskák með 38.Dg6 en tíminn leyfði heldur ekki að tæma þá stöðu. Hún virðist þó vera unnin eftir 38. - Dd8 39.Be2 g4 40.Hb7 Dc8 41.Hbxd7 Hxd7 42.Bxg4.

En í stað 37. Df6 vinnur 37. Hf6 Be8 38. Df5! og svartur er óverjandi mát í 8 leikjum reyndar! Ég missti hreinlega af þessu framhaldi enda tímahrakið mikið. Staðan eftir 38. Df5 sést á síðustu stöðumyndinni.

Stöðumynd4

Þetta var a.m.k. ágætis skemmtun og alltaf gaman að geta strítt þessum stórmeisturum!“

  1. umferð: Garðbæingum kippt niður á jörðina og Skákdeild Breiðabliks og Bolungarvíkur lögð að velli

Garðbæingar höfðu komið allra liða mest á óvart í fyrstu þremur umferðunum, taplausir og í toppbaráttunni! En að þessu sinni reyndist A-sveit Hugins þeim ofjarl með 6,5-1,5 sigri. Hjörvar Steinn, Helgi Ólafsson og Ingvar Þór gerðu jafntefli en aðrar skákir unnust.  

B-sveit Hugins atti kappi við Bolvíkinga/Breiðablik og hafði betur 4,5-3,5 eftir harða rimmu þar sem Sigurður Daði og Þröstur Árnason lögðu stigahærri keppinauta en Gísli Hólmar sigraði ungan og efnilegan skákmann á 8. borði. Framtíð Skákdeildar Breiðabliks og Bolungarvíkur er sannarlega björt ef marka má barna- og unglingastarfið sem er til mikillar fyrirmyndar.

Á meðan tryggðu Víkingar sig enn betur í sessi með 7-1 sigri á Akureyringum og munurinn á þeim og A-sveit Hugins var þegar orðinn 5,5 vinningar.

  1. umferð: Tveir góðir sigrar!

Síðasta umferðin í þessari lotu reyndist okkur heilladrjúg. Fjölnismenn voru ofurliði bornir af A sveit Hugins:  6,5-1,5. Hjörvar Steinn, Þröstur Þórhallsson og Helgi Grétarsson gerðu jafntefli en Helgi, Ólafsson, Hannes Hlífar, Karen Movsziszian, Einar Hjalti og Ingvar Þór sigruðu. Sigurskák Helga Ólafssonar var einkar vel útfærð með glæsilegri peðsfórn á f5.

Stöðumynd5

Helgi Ólafsson – Jesper Thybo Söndergaard

Gefum Helga orðið:

„Í þessari skák fékk hvítur bera tafl eftir byrjunina en Jesper, sem talinn er eitt mesta efni sem Danir eiga um þessar mundir, varði stöðu sína vel og jafnaði taflið. Hann bauð jafntefli eftir 24 leiki en þegar þessi staða kom upp virtist fátt annað blasa við en þrátefli sem gæti hafist með 35. Hc8+ Kh7 36. Hc7 Kg8 37. Hc8+ o.s.frv. En óvæntur möguleiki leyndist í stöðunni: 

  1. f5!

Þessi snjalli leikur kom Jesper í opna skjöldu. Þar sem ekki er fýsilegt að hleypa peðinu áfram til f6 stendur svartur frammi fyrir tveimur kostum: að taka með e-peði eða g-peði. Hann valdi ... 

  1. ... exf5?

... betra er 35. .. gxf5 en þá á hvítur 36. Bh5!  Eftir 36. ... Hb2 37. Bxf7+ Kh8! getur svartur varist þó staðan sé erfið úrlausnar eftir 38. Hc8+ Kh7 39. Bxe6 Kg6 40. Hg8! því að eftir 40. ... Kh7 á hvítur öflugan leik: 41. Hb8! með góðum vinningsmöguleikum. Betra er 40. ... d4 með flókinni stöðu .   

  1. Bxd5 Hb2 37. Bxf7+ Kh7 38. Bc4

Gott var einnig 38. Be6 en þessi leikur er mannlegri. Hvítur sér fram á að þvinga fram endatafl þar sem biskup þarf að berjast gegn hrók. 

  1. ... Bxc4 39. Hxc4 Hd2 40. Hc7 Kg8 41. e6

Það mátti raunar bíða með þennan leik og leika fyrst 41. Kf3. 

  1. ... Hxd6 42. Hc8+ Kh7 43. E7 Bd4+ 44. Kf3 He6 45. e8(D) Hxe8 46. Hxe8 Kg7 47. He6 Kf7 48. Hd6 Bc5 49. Hc6 Bd4

Þessi staða er alls ekki eins einföld og margur myndi halda. Best er stilla peðinu upp á h5 og reyna að valda hornalínuna a1-h8 og sporna þannig við innrás kóngsins. Sjá t.d. skák Friðriks Ólafssonar og Bent Larsens sem tefld var í Las Palmas árið 1974. Slíkar stöður ertu oft jafntefli t.d. ef skiptist upp á e-peði hvíts og f5-peði svarts. Hvítur verður gæta þess að halda í e-peðið og leika g3-g4 á réttu augnabliki. Það á að duga til  sigurs.   

  1. Kf4 Kg7 51. g4 Bg1 52. gxf5 Bxh2+ 53. Ke4 gxf5 54. Kxf5 h5 55. Kg5

– og svartur gafst upp.“

B-sveit Hugins hefndi tapsins frá síðustu leiktíð með stórsigri á KR-ingum. Kristján Eðvarðsson, fyrirliði sveitarinnar, fór fyrir sínum mönnum á efsta borði, tefldi af miklu öryggi og gerði jafntefli við færeyska stórmeistarann Helga Ziska Dam (2545). Þorsteinn Þorsteinsson var grimmur sem svart ljón á 2. borði og lagði Fide-meistarann Sören Bech Hansen. Pálmi Ragnar Pétursson gerði jafntefli á 4. borði, sömu sögu er að segja af norðan-kappanum Tómasi Veigari á 7. borði en Lenka, Baldur, Bragi og Arnaldur unnu góða sigra. Niðurstaðan 6,5 - 1,5  okkur í hag og fyrir vikið lyftum við okkur rösklega af botninum.

Staðan

Að 5 umferðum loknum er Víkingaklúbburinn efstur með 37 vinninga af 40 mögulegum. A- sveit Hugins er í 2. sæti með 31 vinning en síðan kemur Fjölnir með 24 vinninga. Ljóst er að Víkingaklúbburinn hefur þegar tryggt sér gullverðlaunin í 1. deild og árnum við þessum vinum okkar og keppinautum til margra ára heilla með glæsilegan árangur. Að öllu óbreyttu ætti Huginn að taka silfrið en spennandi verður að fylgjast með keppninni milli Fjölnis, TR og Akureyringa um bronsið. Huginn og TG sigla nokkuð lygnan sjó um miðja deild en SA-B, KR og Skákdeildar Breiðablik og Bolungarvíkur berjast hart á botninum.

Flesta vinninga Hugins A-sveitar hlutu:

  • Karen Movsziszian         5,0 af 5
  • Hannes Hlífar Stefánsson  4,5 af 5
  • Einar Hjalti Jensson      4,0 af 4
  • Hjörvar Steinn Grétarsson 4,0 af 5
  • Helgi Ólafsson            3,5 af 5
  • Ingvar Þór Jóhannesson    3,5 af 5


Í B-sveit Hugins voru margir til kallaðir. Alls tefldu 17 skákmenn eina eða fleiri skákir fyrir sveitina. Það vitnar sannarlega um mikla breidd. Flesta vinninga hlutu:

  • Þorsteinn Þorsteinsson    2,5 af 4 (tefldi eina með A-sveitinni sem hann vann)
  • Gísli Hólmar Jóhannesson  2,0 af 2
  • Baldur Kristinsson        2,0 af 5 

Sjá stöðu í fyrstu deild hér

  1. deild

C-sveitin situr í 6. sæti að loknum fyrri hlutanum með 9 vinninga og 1 stig sem kom í 4. umferð gegn Vinaskákfélaginu. Hinar viðureignirnar töpuðust allar 4-2, flestar gegn sveitum í efri hluta deildarinnar.

Það er stutt í fallsætið og líka í næstu sveit fyrir ofan. Hrókar alls fagnaðar, C- sveit Hugins, Skákfélag Selfoss og C-sveit TR eru öll í harðri fallbaráttu. Í seinni hlutanum verður mikið um innbyrðis viðureignir liða í fallbaráttunni svo engin leið er að spá um hver niðurstaðan verður. Þetta er nokkur breyting fyrir C-sveitina frá síðustu keppni þegar hún var í toppbaráttunni allan tímann. Það sem veldur þessari breytingu er að uppstilling sveitarinnar er að meðaltali ekki eins sterk og síðast þótt stöðugleikinn hafi verið meiri núna, önnur deildin er sterkari og eins var gæfan okkur ekki eins hliðholl að þessu sinni. Sá sem náði í flesta vinninga fyrir sveitina var Húsvíkingurinn Smári Sigurðsson með 3v af 4. Hann tefldi af miklu öryggi.

Stöðuna í annarri deild má nálgast hér.

  1. deild.

D-sveitin er í svipaðri stöðu í þriðju deild og C-sveitin í 2. seild, rétt fyrir ofan fallsætin með 10,5 vinninga og 3 stig og er í 11. sæti af 14 sveitum. Mótið byrjaði vel hjá sveitinn þrátt fyrir 4-2 tap gegn sterkri sveit Skákgengisins í fyrstu umferð, því á eftir fylgdi samsvarandi sigur gegn TV A-sveit og jafntefli við B-sveit Fjölnis en þá viðureign hefðum við hæglega getað unnist. Staðan var því nokkuð góð fyrir viðureignina við Sauðárkrók á sunnudeginum. Sú viðureign tapaðist 4,5 – 1,5. Það sýndi sig að færslan á Óskari Víkingi upp í C-sveitina og frí hjá Erni Stefánssyni og Óskari Maggasyni var meira en sveitin þoldi, þótt stigamunur á liðum væri lítill og tapið því heldur stórt. Skorið hjá liðsmönnum sveitarinnar var nokkuð jafnt í fyrri hlutanum.

Sjá stöðu í þriðju deild hér.

 

  1. deild

Huginn tefldi fram tveimur liðum í 4. deildinni; E-liði og svo unglingaliði. Gengi E-sveitarinnar var eftir atvikum og í samræmi við andstæðingana og uppstillingu hverju sinni. Niðurstaðan var tvö töp, einn sigur og eitt jafntefli. Sigurður Daníelsson, Sigurbjörn Ásmundsson og Hjörtur Ingvi Jóhannsson fengu flesta vinninga eða tvo hver í mismörgum skákum þó. Sigurður tefldi þrjár skákir, Sigurbjörn fjórar og Hjörtur Yngvi tvær og vann báðar. Þátttaka unglingasveitarinnar markaðist dálítið af fjarveru lykilmanna. Því var ákveðið að gefa öllum sem vildu tefla tækifæri og vera ekki mikið að spá í árangurinn. Í einhverjum viðureignum hefði því verið hægt að stilla sterkar upp en var gert. Það má vera að þessi stefna haft einhver áhrif á skorið því sumir af sterkari liðsmönnum sveitarinnar voru að tefla undir getu og aðeins Óttar Örn Bergmann Sigfússon náði góðu skori eða 3 vinningum í fjórum skákum.

Stöðuna í 4. deild má finna hér

Höfundar pistils: Pálmi R. Pétursson, formaður Hugins, Jón Þorvaldsson, liðsstjóri A-liðs,  Kristján Eðvarðsson, liðsstjóri B-liðs. Vigfús Ó. Vigfússon, liðsstjóri C-Liðs, D-liðs, E-liðs og unglingasveitar.

 

 


Jólaskákmót grunnskóla Reykjavíkur fer fram á sunnudaginn

JólamotLogo_simple-2017

 

Jólaskákmót grunnskóla Reykjavíkur verður haldið í húsnæði TR að Faxafeni 12 sunnudaginn 3.desember. Mótið er sem fyrr samstarfsverkefni Skóla- og frístundasviðs Reykjavíkurborgar og Taflfélags Reykjavíkur. Mótinu verður skipt í þrennt að þessu sinni; 1.-3.bekkur, 4.-7.bekkur og 8.-10 bekkur.

Tefldar verða 6 umferðir með umhugsunartímanum 5 mínútur fyrir hverja skák og bætast 3 sekúndur við eftir hvern leik (5+3). Allir grunnskólar Reykjavíkurborgar eru hvattir til þess að senda skáksveitir í mótið. Engar takmarkanir eru á fjölda skáksveita og er skáksveitum hvers skóla styrkleikaraðað með bókstöfum (a-sveit, b-sveit, c-sveit og svo framvegis). Í hverri skáksveit tefla 4 keppendur og má hver sveit hafa 0-2 varamenn. Keppanda er heimilt að tefla í eldri flokki en aldur hans segir til um, en þó má einungis tefla í einum flokki (sem dæmi þá má keppandi í 3.bekk tefla í flokki 4.-7.bekkjar, en hann getur þá ekki teflt í flokki 1.-3.bekkjar). Mikilvægt er að liðsstjóri fylgi liðum hvers skóla og er æskilegt að hver liðsstjóri stýri ekki fleiri en þremur liðum.

Dagskrá mótsins:

  • Sun 3.des kl.09:30 – 12:00 – 1.-3.bekkur.
  • Sun 3.des kl.12:30 – 15:00 – 4.-7.bekkur.
  • Sun 3.des kl.15:30 – 18:00 –  8.-10.bekkur.

Veitt verða verðlaun fyrir þrjú efstu sætin í hverjum flokki. Einnig fær efsta stúlknasveit hvers flokks verðlaun.

Skráning fer fram í gegnum skráningarform sem finna má í gula kassanum á skak.is. Skráningu lýkur laugardaginn 2.desember klukkan 20:00. Ekki verður hægt að skrá lið á mótsstað.

Upplýsingar um þegar skráða sveitir má finna hér


Jólapakkamót Hugins fer fram 17. desember

20161218_155920 (1)

Jólapakkaskákmót Hugins verður haldið sunnudaginn 17. desember nk. í Álfhólsskóla (Hjallaskóli Álfhólsvegi 120). Mótið hefst kl. 13 og er ókeypis á mótið. Mótið er fyrir börn og unglinga og fer nú fram í 20. skipti en það var fyrst haldið fyrir jólin 1996. Síðan hefur það verið haldið nánast á hverju ári og hefur alltaf verið eitt fjölmennasta skákmót ársins.

Keppt verður í allt að 6 flokkum:

  • Flokki fæddra 2002-2004
  • Flokki fæddra 2005-2006
  • Flokki fæddra 2007-2008
  • Flokki fæddra 2009-2010
  • Flokki fæddra 2011 síðar
  • Peðaskák fyrir þau yngstu

Tefldar verða 5 umferðir með 10 mínútna umhugsunartíma á mann. Jólapakkar eru í verðlaun fyrir 3 efstu sætin í hverjum aldursflokki fyrir sig fyrir bæði drengi og stúlkur. Auk þess verður happdrætti um 3 jólapakka í hverjum aldursflokki fyrir sig.

Skráning fer fram á Skák.is (guli kassinn efst).


Skemmtikvöld Skáksambandsins á fimmtudaginn - Friðrik segir frá Portoroz 1958

1958-Portoroz-aðalmynd

Fyrsta skemmtikvöld Skáksambandsins fer fram á fimmtudagkvöldið, 30. nóvember, kl. 20. Fyrsti stórmeistari Íslendinga, Friðrik Ólafsson, verður með fyrirlestur og mun segja frá millisvæðamótinu í Portoroz árið 1958. Þar endaði Friðrik í 5.-6. sæti og tryggði sér keppnisrétt í áskorendamóti þar sem keppt var réttinn að mæta Botvinnik í heimsmeistaraeinvígi. 

Árangur Friðriks á þessu móti er eitt allra besta afrek Íslendings fyrr eða síðar í skáksögunni. Meðal annarra keppenda voru Tal, sem sigraði á mótinu Fischer (þá 15 ára), Petrosian, Bronstein og Larsen. 

Skemmtikvöldið er opið öllum þeim sem eru áskrifendur að Tímaritinu Skák. Engin aðgangseyrir. Boðið verður á upp á kaffi og með því. Að loknu fyrirlestri geta áhugasamir gripið í tafl.


Jólaskákmót Vinaskákfélagsins fer fram á mánudaginn

Jólaskákmót Vinaskákfélagsins verður haldið mánudaginn 4. desember kl: 13, í Vin að Hverfisgötu 47. Tefldar verða 6 umferðir með 7 mínútur á skák. Skákstjóri verður Hörður Jónasson. Mótið verður reiknað til hraðskákstiga. 

Í hléi verður boðið upp á hið landfræga kaffi og meðlæti. Góð verðlaun verða í boði. 

Þið getið skráð ykkur á mótið á gula kassanum efst á síðunni á skak.is. Einnig getið þið skráð ykkur á staðnum.

Allir velkomnir!!

 


Björgvin Víglundsson Íslandsmeistari öldunga fjórða árið í röð

Clipboard02Íslandsmeistaramót 65 ára og eldri var háð fyrir helgina í Ásgarði, félagsheimili FEB í Stangahyl, nær Kattholti og Árbæjarsafni, á vegum skákklúbba eldri borgara, Æsis og Riddarans.

Mótið fór hið besta fram og var vel skipað þrátt fyrir nokkur forföll og umferðatafir. Góður keppnisandi sveif yfir vötnunum eftir að Finnur Kr. Finnsson hafði ýtt því úr vör með því að leika fyrsta leikinn að loknu opnunarorðum Einars Ess, formanns mótsnefndar.

Ýmsir gamalkunnir garpar voru mættir til tafls - þar á meðal fjórir fyrrv. landliðsflokksmen - albúnir að selja sig dýrt. Það gekk því miður ekki eftir hjá öllum því Björgvin Víglundsson var í miklum vígahug eins og jafnan fyrr og var búinn að tryggja sér sigurinn 4ða árið i röð þegar 2 umferðir voru eftir. Hann vann svo mótið taplaus með 7.5v. af 9 mögulegum. Júlíus Friðjónsson varð annar líkt og í fyrra og hitteðfyrra með 7 v. eftir að hafa tapað slysalega fyrir Gísla Gunnlaugssyni í næstsíðustu umferð. Gunnar Gunnarsson varð þriðji, eins og sl. ár með 6 v. ásamt tveimur öðrum en hærri að stigum. Allir unnu þessir herramenn sér líka heiðurstitilinn "Bestur" í sínum aldursflokkum. Gunnar 80 ára og eldri; Björgvin 70-75 Júlíus 65-70. Jóhann Örn hlaut sömu nafnbót í flokki 76-80 ára líkt og í fyrra. Maggi Pé var aldursforseti mótsins.Clipboard03

Sigurvegurinn hlaut fagran minjagrip til eignar auk þess að fá nafn sitt skráð gullnu letri á sögunnar spjöld og á farandbikar sem Jói Útherji gaf til keppninnar í upphafi. Ennfremur hlaut hann 50.000 króna ferðastyrk frá SÍ á skákmót erlendis auk bókaverðlauna sem efstu menn og aldursflokkameistarar fengu allir auk verðlaunapeninga. Helstu úrslit má sjá á meðf. myndskreyttri mótstöflu og svo má finna nánari úrslit hér.

Mótshaldarar þakka stoltum styrktaraðilum þeim Jóa Útherja; KRST Lögmönnum, FEB og Leturprenti veittan stuðning og fyrirgreiðslu. Páll Sigurðsson var skákstjóri/dómari og á miklar þakkir skildar.

Clipboard04

 


Róbert Lagerman sigraði á þriðja Hlemmur Square-mótinu

IMG_1830-620x330
 
Þriðja skákmótið sem Hlemmur Square í samstarfi við Vinaskákfélagið héldu sunnudaginn, 26. nóvember setti met þar sem 27 skákmenn tóku þátt.

Margir sterkir skákmenn tóku þátt, en það var Forseti Vinaskákfélagsins Róbert Lagerman sem stal senunni og sigraði mótið með yfirburðum eða 7½ vinning af 8 mögulegum.

Annar varð Tómas Björnsson með 6 vinninga og þriðji Þorvarður F. Ólafsson líka með 6 vinninga. Sjá úrslit á Chess-Results

Tefldar voru 8 umferðir með 4+2 mínútna umhugsunartíma. Skákstjóri og dómari var Hörður Jónasson frá Vinaskákfélaginu.

Þátttaka var ókeypis á mótið en Hlemmur Square gaf gjafabréf fyrir efstu þrjú sætin auk þess sem medalía var veitt fyrir vinningshafann. 

1. verðlaun: Gjafabréf á Pylsa/Pulsa Restaurant / bar fyrir 7.000 kr. +medalía

2. verðlaun: Gjafabréf á Pylsa/Pulsa Restaurant / bar fyrir 5.000 kr.

3. verðlaun: Gjafabréf á Pylsa/Pulsa Restaurant / bar fyrir 3.000 kr. 

Gleðistundarverðlag var á kranaveigum fyrir þátttakendur mótsins. Greinarhöfundur (Hörður) þakkar fyrir frábært mót og hlakkar til næsta móts.


Leikar æsast í U-2000 mótinu – Þrír á toppnum

20171122_193626-1024x576

Þegar ein umferð lifir af U-2000 móti TR eru Alexander Oliver Mai (1875), Páll Andrason (1805) og Jón Eggert Hallsson (1648) efstir og jafnir með 5 vinninga. Í sjöttu og næstsíðustu umferð gerði Alexander jafntefli við Harald Baldursson (1935) í stuttri skák, Jón Eggert sigraði Stephan Briem (1895) nokkuð óvænt eftir mikla baráttu og þá lagði Páll Kristján Geirsson (1556) eftir að hafa verið með hartnær tapað tafl um miðbik skákar. Í næstu sætum með 4,5 vinning eru Haraldur, Óskar Víkingur Davíðsson (1777) og Jóhann Arnar Finnsson (1732).

Það er ljóst að spennan verður mikil í lokaumferðinni sem fer fram næstkomandi miðvikudagskvöld en þá mætast á efsta borði þeir Alexander og Jón Eggert. Á öðru borði kljást Páll og Óskar Víkingur og á því þriðja berjast Jóhann Arnar og Haraldur. Flautað verður til leiks stundvíslega kl. 19:30. Áhorfendur velkomnir!

 


Næsta síða »

Síðan

Skák.is
Skák.is

Skák.is, skákfréttavefur Íslands. Gunnar Björnsson er ritsjóri vefsins.

 

RSS-straumar

Erlendar vefsíður

Helstu erlendu fréttasíðurnar

Chessdom

  • Augnablik... Augnablik - sæki gögn...

Chess24

  • Augnablik... Augnablik - sæki gögn...

FIDE

  • Augnablik... Augnablik - sæki gögn...

Heimsóknir

Flettingar

  • Í dag (19.3.): 27
  • Sl. sólarhring: 64
  • Sl. viku: 341
  • Frá upphafi: 8763731

Annað

  • Innlit í dag: 23
  • Innlit sl. viku: 173
  • Gestir í dag: 22
  • IP-tölur í dag: 10

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband