Íslandsmótið hófst með látum - aðeins eitt jafntefli

Íslandsmótið í skák hófst í dag í Tónlistarskóla Seltjarnarness með því að bæjarstjóri Seltjarnarness, Ásgerður Halldórsdóttir, lék fyrsta leikinn fyrir stigahæsta keppenda mótsins, Hjörvar Stein Grétarsson, gegn Einari Hjalta Jenssyni.

Þeirri skák lauk með jafntefli eftir hörkubaráttu og í lengstu skák umferðarinnar. Það reyndist eina jafntefli umferðarinnar en taflmennskan var afar hressileg í dag. 

Úrslit 1. umferðar

Önnur umferð hefst á morgun kl. 15. Skákáhugamenn eru hvattir til að fjölmenna í Tónlistarskólann þar sem hægt er að fylgjast með skákunum á skjáum á skákstað.

Tónlistarskóli Seltjarnarness er í sama húsnæði og heilsugæslan (rétt fyrir ofan sundlaugina). Besta leiðin til að keyra þangað er Eiðisgrandi-Suðurströnd-Nesvegur-Kirkjubraut-Skólabraut. 

Einnig er hægt að fylgjast með skákunum beint á netinu t.d. á Chess24.

• Heimasíða mótsins
• Chess-Results
• Beinar útsendingar (kl. 15)

Íslandsmótið sett í dag kl. 14:45 í Tónlistarskóla Seltjarnarness - skákáhugamenn fjölmennið!

Landsliðsflokkur Íslandsmótsins í skák hefst með setningu mótsins kl. 14:45 í dag í Tónlistarskóla Seltjarnarness. 

Ásgerður Halldórsdóttir, bæjarstjóri, setur mótið og leikur fyrsta leik mótsins. 

Í fyrstu umferð mætast:

• Hjörvar Steinn Grétarsson (2580) - Einar Hjalti Jensson (2470)
• Héðinn Steingrímsson (2574) - Guðmundur Kjartansson (2457)
• Jóhann Hjartarson (2547) - Guðmundur Gíslason (2280)
• Jón Viktor Gunnarsson (2454) - Örn Leó Jóhannsson (2226)
• Bragi Þorfinnsson (2426) - Jóhann Ingvason (2142)
• Davíð Kjartansson (2371) - Björn Þorfinnsson (2410)

Skákáhugamenn eru hvattir til að fjölmenna á skákstað. Upplýsingar um hvernig best sé að nálgast skákstað má finna hér (Suðurströnd-Kirkjubraut-Skólabraut).

Hægt verður að fylgjast með skákum mótsins á tveimur skjám á mótsstað. 

Heimasíða mótsins

Íslandsmótið í skák hefst á morgun kl. 14:45 í Tónlistarskóla Seltjarnarness

Landsliðsflokkur Íslandsmótsins í skák hefst með setningu mótsins kl. 14:45 á morgun í Tónlistarskóla Seltjarnarness. Úrvalsaðstæður fyrir áhorfendur verða á skákstað en hægt verður að fylgjast með skákunum á skjám í skáksal sem og í hliðarsal. Ásgerður Halldórsdóttir, bæjarstjóri Seltjarnarness, mun setja mótið og leika fyrsta leik þess.

Keppendalisti mótsins er afar spennandi. Þátt taka meðal annars stórmeistararnir Jóhann Hjartarson, Hjörvar Steinn Grétarsson og Héðinn Steingrímsson sem hefur Íslandsmeistaratitil að verja.

Dregið var um töfluröð í dag og mætast og er röðun fyrstu umferðar sem hér segir:

• Hjörvar Steinn Grétarsson (2580) - Einar Hjalti Jensson (2370)
• Héðinn Steingrímsson (2574) - Guðmundur Kjartansson (2457)
• Jóhann Hjartarson (2547) - Guðmundur Gíslason (2280)
• Jón Viktor Gunnarsson (2454) - Örn Leó Jóhannsson (2226)
• Bragi Þorfinnsson (2426) - Jóhann Ingvason (2142)
• Davíð Kjartansson (2371) - Björn Þorfinnsson (2410)

Skákáhugamenn eru hvattir til að fjölmenna á skákstað. Upplýsingar um hvernig best sé að nálgast skákstað má finna hér (Suðurströnd-Kirkjubraut-Skólabraut).

Heimasíða mótsins

Dagur Ragnarsson sigraði á Meistaramóti Skákskóla Íslands

Dagur Ragnarsson vann sigur á Meistaramóti Skákskóla Íslands 2016 eftir sigur á Bárði Erni Birkissyni í lokaumferð mótsins í gær, sunnudag. Dagur hlaut 5½ vinning af sex mögulegum og var ½ vinningi fyrir ofan félaga sinn úr hinni sigursælu skáksveit Rimaskóla, Oliver Aron Jóhannesson sem vann meistara síðasta árs, Jón Trausta Harðarson. Fjórir skákmenn fengu 3½ vinning en í 3. sæti á stigum varð Björn Hólm Birkisson, síðan kom Jón Trausti og í 5. sæti varð Gauti Páll Jónsson.

Alls tefldu 17 skákmenn  í sterkari flokknum og voru tímamörk 90 30. Var mótið afar vel skipað  en keppt er um fern farmiðaverðlaun, sem komu í hlut tveggja efstu manna, Dags og Olivers. Í styrkleikaflokknum 1600 – 1800 elo varð Veronika Steinunn Magnúsdóttur hlutskörpust en hún vann Hilmi Frey Heimisson í lokaumferðinni. Í styrkleikaflokki 1800 – 2000 elo kom farmiðavinningurinn í hlut Björns Hólm Birkissonar. Allir verðlaunahafar eru á leið á skákmót erlendis í sumar þannig að verðlaunin komu sér vel.

Mestri stigahækkun á meistaramótinu náði Heimir Páll Ragnarsson en hann hækkaði um 67 elo stig og þar á eftir kom Robert Luu með 55 stiga hækkun.

 

Við mótsslit rakti Helgi Ólafsson skólastjóri Skákskólans gang mótsins og lét jafnframt í jós þá skoðun sína að skákhreyfingin á Íslandi mætti huga að meiri nýsköpun í skákmótahaldi.  Þannig væri ekki úr vegi að halda stórt alþjóðlegt unglingaskákmót á Íslandi með þátttöku skákmanna frá Norðurlöndunum og grannþjóðum ýmsum og nefndi t.d. þátttakendur frá Hollandi og Englandi.  

Helgi ræddi einnig um þá velvild sem aðalstyrktaraðili mótsins, GAMMA, hefði sýnt skákhreyfingunni á liðnum árum og sagði að þar væri komið fyrirtæki með mikla samfélagslega ábyrgð  sem skilaði sér út í lista- og menningarlíf.   Agnar Tómas Möller frá GAMMA afhenti síðan verðlaun að móti loknu. 

Meistaramótið fer að þessu sinni fram í tveimur hlutum en helgina á undan  sigraði Stefán Orri Davíðsson í flokki keppenda með 1600 elo stig og minna.

Mótstafla á Chess-Results.

Myndaablúm (GB)

Sólon sigraði á lokamóti Bikarsyrpunnar

Sólon Siguringason (1283) sigraði á sjötta og síðasta móti Bikarsyrpu TR sem fram fór um líðandi helgi. Sólon hlaut 4,5 vinninga og sigldi hann sigrinum í höfn í lokaumerðinni með sigri á Ísaki Orra Karlssyni (1111) en fyrir umferðina voru þeir efstir og jafnir með 3,5 vinning.

Í öðru sæti með 4 vinninga var Árni Ólafsson (1155) en Ísak og Kristján Dagur Jónsson urðu jafnir í 3.-4. sæti með 3,5 vinning þar sem Ísak hlýtur 3. sætið eftir stigaútreikning.

Auk verðlauna fyrir lokamótið voru veitt verðlaun fyrir samanlagðan árangur í mótunum sex og var þar hlutskarpastur Jón Þór Lemery. Annar var Kristján Dagur Jónsson og þriðji Ísak Orri.

Spennandi og skemmtilegri Bikarsyrpu er því lokið í ár og verður þráðurinn tekinn aftur upp í haust og aldrei að vita nema fyrirkomulag mótanna breytist lítið eitt.

 

Myndskreytt frásögn á heimasíðu TR.

Hraðkvöld hjá Hugin í kvöld

Hraðkvöld Hugins verður mánudaginn 30. maí nk.  og hefst taflið kl. 20:00. Tefldar verða 7 umferðir með umhugsunartímanum 5 mínútur + 3 sekúndur á hvern leik. Teflt er í félagsheimili Hugins í Álfabakka 14a í Mjóddinni. Nú fer að síga á seinni hlutann á þessum skákæfingum en auk þessarar æfingar er aðeins æfingin 6. júní eftir. Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu. Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Landsliðsflokkur Íslandsmótsins í skák hefst á þriðjudaginn í Tónlistarskóla Seltjarnarness

Íslandsmótið í skák hefst þriðjudaginn 31. maí nk. Teflt verður í Tónlistarskólanum á Seltjarnarnesi við Skólabraut við úrvalsaðstæður. Til hliðar við skáksal verður annar salur þar sem hægt verður að fylgjast með skákunum á skjá. Aðstaða fyrir áhorfendur verður því afar góð.

Setning mótsins hefst klukkan 14:45 og mun Ásgerður Halldórsdóttir, bæjarstjóri Seltjarnarness, setja mótið og leika fyrsta leik þess.

Keppendalisti mótsins er afar spennandi. Þátt taka meðal annars stórmeistararnir Jóhann Hjartarson, Hjörvar Steinn Grétarsson og Héðinn Steingrímsson sem hefur Íslandsmeistaratitil að verja.

Það vekur óneitanlega athygli að á keppendalistanum má finna feðga og bræður. Bræðurnir Björn og Bragi Þorfinnssynir taka þátt. Það gera einnig feðgarnir Jóhann Ingvason og sonur hans Örn Leó. Þetta er í fyrsta skipti í 103 ára sögu mótsins sem feðgar eru meðal keppenda.

Keppendalisti mótsins

1. SM Hjörvar Steinn Grétarsson (2580)
2. SM Héðinn Steingrímsson (2574)
3. SM Jóhann Hjartarson (2547)
4. AM Guðmundur Kjartansson (2457)
5. AM Jón Viktor Gunnarsson (2454)
6. AM Bragi Þorfinnsson (2426)
7. AM Björn Þorfinnsson (2410)
8. FM Davíð Kjartansson (2371)
9. AM Einar Hjalti Jensson (2370)
10. FM Guðmundur Gíslason (2280)
11. Örn Leó Jóhannsson (2226)
12. Jóhann Ingvason (2142)

Heimasíða mótsins

Frábær Flugfélagshátíð Hróksins í Nuuk: Gleðin og vináttan að leiðarljósi

Flugfélagshátíð Hróksins í Nuuk lauk á laugardag með einvígi Steffen Lynge, lögreglumanns, tónlistarmanns og eins fremsta skákmanns Grænlands, og Hrafns Jökulssonar forseta Hróksins. Undanfarna viku hefur höfuðborg Grænlands iðað af skáklífi og liðsmenn Hróksins farið víða að útbreiða fagnaðarerindi skáklistarinnar, gleðinnar og vináttunnar. 

Í frétt frá Hróknum sagði Hrafn Jökulsson að það hefði verið einstakur heiður að standa að einvígi Jóhanns Hjartarsonar og Nigels Shorts í Nuuk: "Þeir eru goðsagnir í skáksögunni, og mikil forréttindi að hafa staðið að Grænlandsheimsókn þeirra. Báðir eru þeir snillingar, og auk þess með djúpan skilning á einkunnarorðum Hróksins: Við erum ein fjölskylda."

Einvígi Jóhanns og Shorts lauk með sigri Englendingsins eftir æsispennandi viðureign, en Hrafn segir að úrslitin séu algjört aukaatriði. "Megintilgangur með Flugfélagshátíðinni var að útbreiða gleði og vináttu. Við heimsóttum fangelsið hér í Nuuk, athvarf fyrir heimilislausa og efndum til fleiri viðburða sem fyrst og fremst höfðu það markmið að skapa gleði og bjartsýni. Skákfélagið hér í Nuuk fékk að gjöf mikinn fjölda taflsetta frá Flugfélagi Íslands, sem verður dreift í skólana hér í höfuðborginni." 

Þetta var þriðja heimsókn Hróksins til Grænlands á þessu ári og framundan eru a.m.k. fjórar heimsóknir til viðbótar. Alls hafa liðsmenn Hróksins farið oftar en fimmtíu sinnum til Grænlands, síðan skáklandnámið hófst árið 2003. 

Hrafn segir að þakklæti sé efst í huga Hróksmanna eftir vel heppnaða Flugfélagshátíð: "Fjöldi einstaklinga og fyrirtækja hjálpuðu okkur við að gera þetta allt saman mögulegt. Það sem gerði þessa hátíð núna svo ánægjulega að meðal þátttakenda voru fremstu skákmenn heims, ráðamenn hér á Grænlandi, börnin í Nuuk, fangar, heimilislaust fólk og ótal vinir aðrir. Gleðin og vináttan eru okkar leiðarljós, og við þökkum öllum þeim sem gerðu dásamlega hátíð að veruleika."

 

Sameining Vinaskákfélagsins og Áttavilltra

Vinaskákfélagið og Áttavilltir hafa ákveðið að sameinast. Á næsta keppnistímabili á Íslandsmóti skákfélaga munu þessi félög tefla og starfa sem sameinað félag þ.e. Vinaskákfélagið og kennitölu þess. Forsetar félaganna sem og aðrir félagsmenn og konur, voru einróma sammála sameiningunni. Munu þessi félög koma enn sterkari til leiks undir sameinuðum hatti, bæði í keppni og ekki síður í útbreiðslustarfi skákarinnar. Kjörorð sameinaðs félags er "Við erum ein fjölskylda"

Dagur og Oliver Aron efstir á Meistaramóti Skákskóla Íslands - GAMMA aðalstyrktaraðili mótsins

Félagarnir úr Rimaskóla, Dagur Ragnarsson og Oliver Aron Jóhannesson gerðu jafntefli í fjórðu umferð Meistaramóts Skákskóla Íslands sem hófst á föstudaginn en lýkur á morgun, sunnudag. Þeir deila efsta sæti með 3½ vinning en í 3. sæti er Gauti Páll Jónsson með 3 vinninga og í 4.-7. sæti sæti eru Bárður Örn Birkisson, Björn Hólm Birkisson, Róbert Luu og Jón Trausti Harðarson allir með 2½ vinning.  

Meistaramótið fer að þessu sinni fram í tveimur hlutum en um síðustu helgi sigraði Stefán Orri Davíðsson í flokki keppenda með 1600 elo stig og minna.

Alls tefla 17 skákmenn  í sterkari flokknum og er mótið afar vel skipað en keppt er um fjögur farmiðaverðlaun, sem koma í hlut tveggja efstu manna og einnig eins keppenda í styrkleikaflokkum 1600 – 1800 elo og í styrkleikaflokknum 1800 – 2000 elo. Tímamörk eru 90 30 og verða tefldar sex umferðir. Aðalstyrktaraðili mótsins er GAMMA og mun einn stofnenda fyrirtækisins, Agnar Tómas Möller, afhenda verðlaun strax að móti loknu á morgun.

Mótstöflu má finna á Chess-Results.