Júlí-hraðskákmót SA fer fram á morgun.

Júní hraðskákmót Skákfélags Akureyrar fer fram
annað kvöld, fimmtudag 1. júlí og hefst kl. 20.00 í Íþróttahöllinni.
Keppnisgjald: kr. 500 fyrir 16 ára og eldri.

Héðinn með jafntefli í fimmtu umferð

Stórmeistarinn Héðinn Steingrímsson (2550) gerði jafntefli við hollenska stórmeistarann Friso Nijboer (2567) í fimmtu umferð opna HSG-mótsins sem fram fer í Hollandi.  Héðinn hefur 4 vinninga og er í 2.-4. sæti.

Efstur er rússneski stórmeistarinn Konstantin Landa (2603) með 4,5 vinning.  Jafnir Héðni í 2.-4. sæti eru Nijboer og úkraínski undradrengurinn  Illya Nyzhnyk (2543).

Í sjöttu umferð, sem fram fer á morgun, teflir Héðinn einmitt  við Nyzhnyk .  Skákin verður sýnd beint á vefsíðu mótsins en umferðin hefst kl. 11:30.

Alls taka 44 skákmenn þátt í efsta flokki og þar á meðal þrír stórmeistarar. Stigahæstur keppenda er rússneski stórmeistarinn Konstantin Landa (2603) en meðal annarra keppenda má nefna úkraínska undrabarnið Illya Nyzhnyk (2544).   Héðinn er þriðji í stigaröð keppenda.  

• Heimasíða mótsins
• Swiss Master (áþekkt og Chess-Results)
• Beinar útsendingar

 

Nýjar fundargerðir stjórnar SÍ

Fyrstu tvær fundargerðir stjórnar SÍ frá starfsárinu 2010-11 eru nú aðgengilegar á vef sambandsins.    Þar má m.a. finna verkskiptingu stjórnar og upplýsingar um nefndarmenn í nefndum SÍ.

Fundargerðir stjórnar SÍ 

Þriðja Sumarskákmót Vinnuskólans og Akademíunnar fer fram í dag

Í sumar efnir Vinnuskóli Reykjavíkur í samstarfi við Skákakademíu Reykjavíkur til útiskákmóta á útitaflinu við Lækjartorg. Mótin verða haldin miðvikudaganna 16, 23. júní, 30. júní og 7. júlí og hefjast klukkan 12:30 og má búast við að mótin taki um 2 klst. Mótin verða með sama sniði og í fyrra en tefldar verða 5-6 umferðir með 7 mínútna umhugsunartíma.  Mótaröðin er opin öllum og er að sjálfsögðu ókeypis að taka þátt.  Þátttaka takmarkast við 40 keppendur og er því mikilvægt að keppendur mæti tímanlega.

Sú skemmtilega hefð var sett á í fyrra að úrslitaskák mótsins væri tefld á stóra útitaflinu, enda léttleikinn í fyrirrúmi. Verðlaunin verða afar fjölbreytt allt frá skákbókum, kaffivinningum og gjafakörfum frá Kaffitár auk dýrindis máltíða á Hamborgarabúllunni og The Deli. 

Það er óskandi að veðurguðirnir leiki við skákmenn næstu fjóra miðvikudaga en engu að síður eru þátttakendur hvattir til að klæða sig eftir veðri!

Skákstjórar í sumar verða : Davíð Kjartansson, Björn Þorfinnsson, Bragi Þorfinnsson.

Myndaalbúm Sumarskákmótana

Héðinn með jafntefli í fjórðu umferð á HSG-mótinu

Stórmeistarinn Héðinn Steingrímsson (2550) gerði jafntefli við indverska alþjóðlega meistaranum Babu Lalith (2493) í fjórðu umferð HSG-mótsins sem fram fer í Hilversum í Hollandi.  Héðinn hefur 3½ vinning og er efstur ásamt stórmeisturunum Konstantin Landa (2603), Rússlandi, og Friso Nijboer (2567), Hollandi og Lalith.

Í fimmtu umferð, sem fram fer á morgun, teflir Héðinn einmitt  við Nijboer.  Skákin verður sýnd beint á vefsíðu mótsins en umferðin hefst kl. 11:30.

Alls taka 44 skákmenn þátt í efsta flokki og þar á meðal þrír stórmeistarar. Stigahæstur keppenda er rússneski stórmeistarinn Konstantin Landa (2603) en meðal annarra keppenda má nefna úkraínska undrabarnið Illya Nyzhnyk (2544).   Héðinn er þriðji í stigaröð keppenda.  

• Heimasíða mótsins
• Swiss Master (áþekkt og Chess-Results)
• Beinar útsendingar

 

Ólympíulið Íslands í opnum flokki

 

 

 

 

 

 

Helgi Ólafsson, landsliðsþjálfari, hefur tilkynnt stjórn SÍ val sitt landsliði Íslands sem tekur þátt fyrir Íslands hönd á

Ólympíuskákmótinu sem fram fer í Síberíu í haust.

Í liðinu eru tveir nýliðar og í fyrsta sinn tefla bræður saman í ólympíuliði Íslands.   Liðið skipa:

• SM Hannes Hlífar Stefánsson (2588)
• SM Héðinn Steingrímsson (2550)
• AM Bragi Þorfinnsson (2422)
• Hjörvar Steinn Grétarsson (2394)
• AM Björn Þorfinnsson (2390)

Liðsstjóri liðsins úti í Síberíu verður Helgi Ólafsson.  Hvorki Björn né Hjörvar hafa áður teflt á ólympíuskákmóti og Bragi aðeins einu sinni. 

Fyrr í sumar hafði kvennaliðið sem tekur þátt á ólympíuskákmótinu verður valið.  Það skipa:

• Lenka Ptácníková (2267)
• Hallgerður Helga Þorsteinsdóttir (1990)
• Sigurlaug R. Friðþjófsdóttir (1828)
• Tinna Kristín Finnbogadóttir (1791)
• Jóhanna Björg Jóhannsdóttir (1738)

Liðsstjóri þess verður Davíð Ólafsson.  Tinna og Jóhanna hafa ekki áður tefla á ólympíuskákmóti.

Fararstjóri og jafnframt fulltrúi á FIDE-þinginu verður Gunnar Björnsson.

Héðinn með fullt hús eftir 3 umferðir á móti í Hollandi

Stórmeistarinn Héðinn Steingrímsson (2550) er með fullt hús að loknum þremur umferðum á HSG-mótinu sem nú fer fram í Hilversum í Hollandi.  Í fyrstu umferð sigraði hann Hollendinginn Niels Hendrikx (2063), í 2. umferð vann hann hollenska FIDE-meistarann Jaap Vogel (2210) og í þriðju umferð lagði hann ísraelska alþjóðlega meistarann Youchanan Afek (2282).  Héðinn er efstur ásamt indverska alþjóðlega meistaranum Babu Lalith (2493). 

Í fjórðu umferð, sem fram fer í dag, teflir Héðinn einmitt  við ofangreindan Lalith.  Skákin verður sýnd beint á vefsíðu mótsins en umferðin hefst kl. 11:30.

Alls taka 44 skákmenn þátt í efsta flokki og þar á meðal þrír stórmeistarar. Stigahæstur keppenda er rússneski stórmeistarinn Konstantin Landa (2603) en meðal annarra keppenda má nefna úkraínska undrabarnið Illya Nyzhnyk (2544).   Héðinn er þriðji í stigaröð keppenda.  

• Heimasíða mótsins
• Swiss Master (áþekkt og Chess-Results)
• Beinar útsendingar

 

Bragi sigraði á öðru sumarmóti Vinnuskólans og Akademíunnar

Annað sumarmót Vinnuskóla Reykjavíkur og Skákakademíu Reykjavíkur fór fram miðvikudaginn 23. júní síðastliðinn við útitaflið í Lækjargötu. Mótið hófst kl.12.30 og voru tefldar fimm umferðir með 7 mín. umhugsunartíma. Veðrið var frábært sól og blíða og gátu mótshaldarar ekki beðið um betra veður. Alls tóku 34 skákmenn þátt í mótinu sem er aukning frá vikunni áður og verður að teljast magnað. Til leiks voru mættir margir gríðarlega sterkir skákmenn eins og Róbert Lagerman, Bragi Þorfinnsson og Davíð Kjartansson. Að vanda voru meirihluti skákmanna og kvenna á mótinu ungir og efnilegir.

Skákmótin eru liður í fræðslustarfi Vinnuskóla Reykjavíkur í að vekja áhuga unglinganna á skáklistinni, miðbæjarlífið og glæða bæinn mannlífi. Viðburðir sem þessi vekja óskipta athygli erlendra ferðamanna og gesta borgarinnar sem eiga leið hjá, og myndast því mjög skemmtileg stemmning í kringum mótin. Gunnar Björnsson forseti Skáksambands Íslands og Helgi Árnason skólastjóri Rimaskóli heiðruðu samkomuna með nærveru sinni.

Mótið var afar spennandi og til úrslita tefldu alþjóðlegi meistarinn Bragi Þorfinnsson og hinn síkáti Haukamaður Ingi Tandri Traustason, skákin fór að sjálfsögðu fram á útitaflinu og var tefld 5 mínútna hraðskák þar sem Ingi fékk að velja sér hvorum litnum hann vildi stýra. Skákin endaði með nokkuð öruggum sigri Braga eftir að Ingi hafði leikið af sér hverjum manninum og fætur öðrum.

Sigurvegari fyrsta mótsins Stefán Bergsson tók að sér að stýra skútunni í þessu móti og gerði það sennilega betur en sjálfur Jack Sparrow.

Röð efstu manna :

1.      Bragi Þorfinnsson

2.      Ingi Tandri Traustason

3.      Róbert Lagerman

4.      Kristófer Jóel Jóhannesson

5.      Sigríður Björg Helgadóttir

6.      Davíð Kjartansson

7.      Kristinn Andri Kristinsson

Bragi fékk að launum gjafakörfu frá Kaffitár enda kaffikall mikill, Ingi Tandri fékk pizzuveislu frá The Deli og Sigríður Björg sem hlaut kvennaverðlaun fékk hið forláta gjafabréf á Hamborgarabúllu Tómasar. Nokkrir ungir og efnilegir leikmenn fengu svo fótboltaspil fyrir góðan árangur í mótinu.

Skákþáttur Morgunblaðsins: Hjörvar sigraði á First Saturday-mótinu

Hjörvar Steinn Grétarsson vann góðan sigur í flokki alþjóðlegra meistara á First Saturday-mótinu sem lauk í Búdapest um helgina. Hjörvar hlaut átta vinninga af 11 mögulegum og varð einum fyrir ofan Bandaríkjamanninn Takashi Iwamoto sem hlaut sjö vinninga en í 3. sæti varð Ungverjinn Bela Lengyel með sex og hálfan vinning.

First Saturday-mótið hefst eins og nafnið bendir til fyrsta laugardag í hverjum mánuði og er því einhvers konar skákmóta-hringekja í fjölmörgum flokkum sem stendur yfir allt árið og er hugarfóstur og „eign“ Ungverjans Laszlos Nagys. Íslenskir skákmenn hafa oft gert góða hluti þarna og má nefna ágæta frammistöðu Dags Arngrímssonar, Guðmundar Kjartanssonar og Stefáns Kristjánssonar á liðnum árum. Mótið er upplagt fyrir skákmenn í leit að alþjóðlegum áföngum og margir skákmenn ferðast langan veg til þess að taka þátt í því.

Að þessu sinni var Hjörvar aðeins hálfum vinningi frá áfanga að alþjóðlegum meistaratitli. Hann hóf mótið með því að hljóta 3½ vinning úr fyrstu fjórum skákum sínum, tapaði næstu tveimur en kom sterkur til baka og hlaut 4½ vinning úr síðustu fimm. Hann hefði sennilega átt að vinna allar þessar skákir. Hjörvar hefur nú unnið fjögur mót á innan við á ári og gerir þ.a.l. sterkt tilkall til þess að vera valinn í íslenska ólympíuliðið sem teflir í Khanty Manyisk í haust.

Í lokaumferðinni dugði honum jafntefli til að verða einn efstur en hugleiðingar um slíkt voru víðsfjarri. Skákin er gott dæmi um kraftmikinn stíl Hjörvars.

Búdapest 2010; 11. umferð:

Hjörvar Steinn Grétarsson – Nicolas Tavoularis

Hollensk vörn

1. d4 f5 2. g3 Rf6 3. Bg3 g6 4. Rf3 Bg7 5. 0-0 0-0 6. b3 d6 7. bb2 e5 8. dxe5 Rg4 9. Ra3 Rxe5 10. Rxe5 dxe5 11. Dxd8 Hxd8 12. Rb5 Ra6 13. Had1 He8 14. Bd5+ Kh8 15. Bf7! Hf8 16. Ba3!

Með þessu nær hvítur fram veikingu á hornalínunni h1-a8 og þó einkum d5-reitnum. Þá öðlast riddarinn ákjósanlegan reit á d6, 16.... Hxf7 strandar á 17. Hd8+ Bf8 18. Bxf8! og vinnur.

16.... c5 17. Bc4 Bf6 18. Rd6 Rb4 19. c3 Rxa2 20. Bxc5 b6 21. Ba3 Rxc3 22. Hc1 e4 23. Rb5!

Annar snjall leikur, svartur verður að láta skiptamun af hendi.

23.... Rxb5 24. Bxf8 Bd7 25. Bb4 a5 26. Bd2 Rd4 27. Bc3 Bc6 28. Hfd1 Hd8 29. e3 Rf3+ 30. Kg2 Hf8

31. Hd8!

Laglegur lokahnykkur. Nú er 31.... Hxd8 svarað með 32. Bxf6+ og svartur stendur eftir hrók undir. Hann gafst því upp.

Jóhanna Björg og Lenka efstar á Íslandsmóti kvenna

Jóhanna Björg Jóhannsdóttir og Lenka Ptacnikova urðu jafnar og efstar á Íslandsmóti kvenna sem lauk sl. fimmtudagskvöld. Þær munu tefla tvær aukaskákir um sæmdarheitið Skákmeistari Íslands. Jóhönnu dugði jafntefli í lokaumferðinni en þá mætti hún Lenku og tapaði. Lenka hafði í umferðinni á undan lotið í lægra haldi fyrir Hallgerði Helgu. Lokaniðurstaðan varð þessi:

1.-2. Jóhanna Björg Jóhannsdóttir og Lenka Ptacnikova 4 v. (af 5). 3. Hallgerður Helga Þorsteinsdóttir 3½ v. 4. Sigurlaug Friðþjófsdóttir 2 v. 5. Hrund Hauksdóttir 1 v. 5 Elsa María Þorfinnsdóttir ½ v.

Fjórar efstu hafa ásamt Tinnu Kristínu Finnbogadóttur verið valdar í kvennalið Íslands fyrir næsta ólympíumót.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 20. júní 2010.

Skákþættir Morgunblaðsins

Björn með jafntefli í lokaumferðinni

Alþjóðlegi meistarinn Björn Þorfinnsson (2390) gerði jafntefli við Ísraelann Moshe Katzir (2252) í 11. og síðustu umferð alþjóðlega mótsins í Eforie í Rúmeníu.  Björn hlaut 6,5 vinning og endaði í 36.-56. sæti.   Frammistaða Björns var mjög góð en hún samsvaraði 2461 skákstigi og hækkar hann um 15 stig.   Björn lagði þrjá stórmeistara á mótinu og þar á meðal einn sigurvegara mótsins.  Björn var hálfum vinningi frá því að ná stórmeistaraáfanga eftir 9 umferðir.   

Birkir Karl Sigurðsson (1422) vann vann skák í lokaumferðinni, Örn Leó Jóhannsson (1820) gerði jafntefli en Mikael Jóhann Karlsson (1726) tapaði.  Mikael hlaut 4,5 vinning, Örn Leó hlaut 4 vinninga en Birkir hlaut 3,5 vinning. 

Sigurvegar mótsins urðu stórmeistararnir Maxim Turov (2624) og Alexei Gavrilov (2494), Rússlandi, og Marius Manolache (2527), Rúmeníu en þeir hlutu 8,5 vinning.

181 skákmaður tekur þátt í þessu skákmóti.  Þar 17 stórmeistarar og 21 alþjóðlegur meistari.  Björn er númer 34 í stigaröð keppenda.  

• Heimasíða mótsins 
• Chess-Results