Leita í fréttum mbl.is

Færsluflokkur: Pistlar

Manar-mótið: Pistill frá Hilmi Frey

Isle of Man International

23. september til 1. október 2017

Mótið var haldið á the Villa Marina, í höfuðstaðnum Douglas, sem er glæsilegt bygging og var í göngufæri frá hótelinu okkar. Ég tefldi í Masters flokki ásamt hópi Íslendinga, ég fékk stigahærri andstæðinga í öllum umferðunum og endaði með 3,5 af 9 og hækkaði um 44,4 elóstig.

Í fjórðu umferð vann ég skoska alþjóðlega meistarann Stephen Mannion (2320) og mig langar að sýna þá skák.

1.d4 d5 2.Bg5 f6 3.Bd2 Nc6 4.c4 dxc4 5.e3 e5 6.Bxc4 exd4 7.Qb3 Nh6 8.Nf3 dxe3 9.Bxe3 Na5 10.Qa4+ c6 11.Be2 þessi staða hér er nú bara tölvustúderingar sem ég aflaði mér fyrir skákina og gaman að segja frá því en hér er ég með klukkutíma og 35 mínútur á klukkunni og ákvað að fara út í ágæta veðrið sem þarna var og kíkti á fallegu fjöllin, dró andann hægt og rólega meðan að andstæðingur minn var byrjaður að svitna þar sem að hann var að detta í 20 mínútur, svo eftir dágóða stund kom ég aftur inn og sá hann leika 11.b5 12.Bxb5 cxb5 13.Qe4+ Be6 14.Qxe6+ Be7 15.Bxh6 gxh6 hér er ég bara kominn með yfirburða stöðu og hann með lélega peðastöðu, fullt af veikum reitum og með engar skaðabætur fyrir það og þar af leiðandi varð framhaldið bara tæknileg úrvinnsla.  16.O-O Qd7 17.Qe4 O-O 18.Qf4 Kg7 19.Nc3 Bd6 20.Qh4 b4 21.Ne4 f5 22.Nxd6 Qxd6 23.Rfd1 Qf6 24.Qxb4 Nc6 25.Qb7+ Kg8 26.Rac1 Rfc8 27.h3 Ne7 28.Rxc8+ Rxc8 29.Qxa7 Rc2 30.b4 Rb2 31.a3 Ra2 32.Qe3 Kg7 33.Re1 Ra1 34.Rxa1 Qxa1+ 35.Kh2 Nd5 36.Qa7+ Kf6 37.b5 Qb2 38.a4 Qb4 39.Qb8 Kf7 40.Qe5 Ne7 41.Qd4 Qa5 42.Ne5+ Ke6 43.f4 Nd5 44.Qc4 Qb6 45.Qc8+ Ke7 46.Qd7 +1-0.


Hilmir Freyr: Pistill frá Xtracon í Helsingør, Danmörku

Ég tók þá ákvörðun, með frekar stuttum fyrirvara að taka þátt í Xtracon skákmótinu í Helsingør í Danmörku, eftir að mér bauðst gisting með krökkunum sem tefla flest í danska ungmenna landsliðinu. Mótið var haldið var dagana 22. júlí til 30. júlí sl. Ég hef einu sinni áður teflt á þessu móti en það var árið 2013.

Hilmir1Teflt er í Konventum sem er bygging með mörgum rýmum og er borðunum raðað í þau og teflt er frá jarðhæð uppá 3.hæð í húsinu. Ég veit að það truflar suma en ekki mig. Meðfram sjálfu mótinu er boðið uppá aðra viðburði og ég tók t.d þátt í Parlyn móti þar sem ég var í liði með FM Mikkel Manosri Jacobsen vini mínum. Við fengum 8 ½ vinning.

Sjálft mótið var skemmtilegt, ég endaði með 6,5 vinning af 10 mögulegum.

Mig langar að sýna eftirfarandi skák:  Ég var hvítur á móti Andreas Fossan (1998) frá Noregi og við fórum í Uppskipta-Frakkann, Exchange-French.  

Hilmir21.d4 e6 2.e4 d5 3.exd5 exd5 4.c4 Nf6 5.Nc3 Be7 6.Bg5 c6 7.Bxf6 Bxf6 8.cxd5 O-O 9.Bc4 Re8+ 10.Nge2 b5 11.Bd3 b4 12.Ne4 Bxd4 13.Nxd4 cxd5 14.Ne2! Hér ef að svartur drepur nú riddarann á e4 þá kemur Bxe4 og svartur getur ekki drepið tilbaka útaf máti á áttundu reita röðinni, þannig (15.Bxe4 Dxd1+ 16.Hxd1 og hótunin er ennþá sú sama en svartur getur reynt (16.Ba6 17.Bxa8 myndi koma 17.Hxe2+ 18.Kf1 og 18.Rd2+ og þar myndi skákinn enda með þráleik. En hvítur er með frábæran leik í stað 17.Bxa8 og það er (17.Hd2!) valdar bara riddarann á e2 og svartur getur ekki drepið biskupinn á e4 útaf máti á áttundureitaröðinni og nú hótar hvítur bara að taka hrókinn á a8. Þess vegna hélt skákinn áfram svona þar sem ég var bara manni yfir og vann tiltölulega auðveldlega. 14.Nc6 15.N4g3 Qh4 16.Bb5 Bb7 17.Bxc6 Bxc6 18.O-O d4 19.Qxd4 Qg5 20.Qf4 Qd5 21.f3 Qc5+ 22.Kh1 Bb5 23.Rfe1 Qf2 24.Ne4 Qb6 25.N2g3 Rad8 26.Nf5 Qg6 27.Rac1 Bd3 28.b3 h6 29.Nxh6+ gxh6 30.Nf6+ Kf8 31.Qxb4+ 1-0.

Hilmir Freyr Heimisson.

 

-------------------

Fyrir áhugasama má vekja athygli á að Xtracon Chess Open fer fram 21.-29. júlí í ár. Meðal skráðra keppenda eru Jóhann Hjartarson og Baadur Jobava. 


Skrár tengdar þessari bloggfærslu:

Pistill: Þjáningar Þorfinnsbræðra í Þelamörk

18685672_10212221747154492_1448639347_n

 

Á dögunum héldum við bræður í víking til smábæjarins Kragerø í Þelamörk í Noregi.  Þar tókum við þátt í alþjóðlegu skákmóti sem skákfrumkvöðullinn Truls Jörgensen stóð fyrir. Truls er framkvæmdastjóri í öflugu fyrirtæki þar í bæ en er einnig ástríðufullur skákáhugamaður.  Hann heldur úti viðamiklu unglingastarfi á svæðinu og það mátti glöggt sjá á þátttakendalista mótsins þar sem ungir skákmenn voru áberandi. Mótinu var að sjálfsögðu skipt í A, B og C-flokk enda Truls víðsýnn og skynsamur maður í alla staði. [Aths. ritstj. Bjössi stríðinn]

Ferðin kom upp með skömmum fyrirvara hjá okkur bræðrum. Ástæðuna má helst rekja til þess að undirritaður var pirraður eftir sveiflukennt gengi í tveimur innlendum mótum í byrjun árs og vildi ólmur freista þess að hamra járnið á meðan það var heitt. Bragi hafði aftur á móti lítið teflt í nokkra mánuði og það var ekki ákjósanlegt því framundan var seinni hluti Íslandsmóts skákfélaga þar sem hann var í dauðafæri til þess að landa stórmeistaraáfanga eftir einstaklega gott gengi í fyrri hluta mótsins. Ferðin til Noregs var því hugsuð sem einskonar upphitun fyrir Íslandsmót skákfélaga.

Mótsstaður var Kragerø Resort sem er í alla staði glæsilegt hótel. Umhverfið er einstaklega fallegt og má segja að um einskonar heilsuhótel sé að ræða því  að fjölmargir valkostir eru í boði á staðnum varðandi hreyfingu, meðal annars glæsilegur 18 holu golfvöllur.  Lítill tími gafst til þess að njóta þess ef undan er skilin stórkostleg spa-aðstaða hótelsins sem var mikið notuð af okkur bræðrum. Þar var hægt að slaka á eftir erfiðan dag í sundlaug sem var með útsýni yfir stórbrotinn fjörð.

Mótið sjálft var með túrbó-sniði, níu umferðir á fimm dögum. Það er kannski ekki eftirsóknaverðasta fyrirkomulagið á alþjóðlegum skákmótum en hentaði okkur bræðrum afar vel í þetta sinn. Fimm stórmeistarar voru skráðir til leiks í mótinu og voru það góðkunningjar okkar Rozentalis og Kveinys frá Litháen, Miezis frá Lettlandi, Catalbashev frá Búlgaríu og Lie frá Noregi.  Að auki tóku þátt fimm alþjóðlegir meistarar en keppendur í A-flokki voru 26 talsins.

Við flugum út að morgni miðvikudags og vorum lentir um hádegisbilið. Fyrsta umferð átti að hefjast kl.19.00 og ráðgert var að rútuferðin á mótsstað myndi taka rúmlega þrjár klukkustundir. Það var öðru nær og þökk sé stórkostlegri umferðateppu út úr Osló þá vorum við rúmlega sex klukkustundir á leiðinni. Vorum við bræður nokkuð framlágir eftir þetta en fengum smá tíma til þess að úða í okkur kvöldverði og svo var hafist handa. Blessunarlega voru andstæðingarnir ekki mikil fyrirstaða í fyrstu umferð og því hófum við báðir mótið með sigri. Við vorum afar fegnir að komast klakklaust frá þessu ævintýri og vorum hvíldinni fegnir.

Næsti dagur var tekin snemma. Glæsilegt morgunverðarhlaðborð beið okkar og Norðmennirnir mega eiga það til hrós að boðið var upp á úrvals kaffi og te í hverri umferð. Það er ekki alltaf svo í skákmótum og vorum með bræður afar kátir með það enda miklir kaffiunnendur.  Andstæðingarnir í 2.umferð voru stórneistarnir Kveinys (Björn) og Catalbashev (Bragi).

Mér hefur gengið bölvanlega með Kveinys og var 3-0 undir þegar að þessari skák kom. Það skýrði mögulega linkulega og áhættufælna taflmennsku sem að endaði með leiðindajafntefli.  Skák Braga var öllu fjörugri en þó fékk hvorugur keppandinn tækifæri til þess að snúa henni sér í vil. Að lokum leystist staðan upp í jafntefli. 

Í seinni umferð dagsins tefldi ég við norska alþjóðlega meistarann Kristian Stuvik Holm sem er alræmdur hérlendis eftir að gerst sekur um svindl á Alþjóðlega Reykjavíkurskákmótinu fyrir nokkrum árum. Kristian var þá barnungur en höfuðpaurinn var Ragnar, faðir hans, sem fékk að sjálfsögðu bann við frekari heimsóknum á mótið. Þeir feðgar mættu saman á mótið í Kragerø og verð ég að viðurkenna að það var afar óþægilegt þegar Kristian var að drita út öflugum leikjum og labba fram á gang þar sem að faðir hans var að leika sér í snjallsímanum sínum! Sem betur fer fann ég lausnir á vandamálunum yfir borðinu og skákin leystist upp í jafntefli. Kristian  útskýrði þá fyrir mér að hann hefði verið með nákvæmlega sömu stöðu gegn Piu Cramling nýlega og var því öllum hnútum kunnugur . Ég var því í raun bara dauðfeginn að hafa sloppið með jafntefli.

Bragi var afar ófarsæll gegn Kveinys og tapaði illa. Hann tefldi byrjun sem Kveinys hafði stúderað vel með íranska kvennalandsliðinu nokkrum vikum fyrr og var því öllum hnútum kunnugur. Á meðan þekkti Bragi fínni blæbrigðri stöðunnar illa og fékk þungan skell. Vinur okkar Kveinys nánast skríkti af gleði eftir skákina yfir því að heilladísirnar hafi verið á hans bandi. Ekki annað hægt en að þykja vænt um þennan kall!

Í fjórðu umferð tefldum við bræður við mun stigalægri andstæðinga. Ég tefldi við ungan dreng sem hafði nýverið teflt á Norðurlandamóti ungmenna, Mads Vestby-Ellingsen að nafni. Í græðgi minni hirti ég peð snemma tafls og líklega hefði drengurinn getað refsað mér fyrir það. Hann fann hinsvegar ekki bestu leiðina og ég sveið endataflið af öryggi. Bragi bróðir mætti heldri skákmanni að nafni Oddvar Ull og verður honum tileinkaður sérstakur kafli.

Oddvars saga  Ull

Áður en við bræður héldum af stað til Þelamerkur leit allt út fyrir að ég myndi tefla við Oddvar í fyrsta umferð en hann var skráður með 1988 FIDE-stig. Ég hafði því aðeins rannsakað hugsanlegan andstæðing og meðal annars flett honum upp á Facebook. Þar blasti við mér langur pistill eftir Oddvar þar sem að lýsir andlegum veikindum og meðal annars tilraunum til sjálfvígs.  Varð ég nokkuð tómur við lesturinn en þessi vitneskja gerði það að verkum að ég fylgdist vel með framgöngu Oddvars í mótinu.

Talsverðar breytingar urðu á keppendalistanum rétt fyrir fyrstu umferð og svo fór að Oddvar tefldi við ungstirnið Tor Fredrik Kaasen. Sá ágæti drengur hafði á skömmum tíma rokið upp FIDE-stigalistann og státaði nú af 2468 stigum. Oddvar mætti ferskur í fyrstu umferð, greinilega spenntur fyrir viðureigninni og tefldi byrjunina af krafti með svörtu mönnunum.

Eftir 13.leik hvíts var staðan svona:

Clipboard02


Oddvar var einfaldlega að tefla skák lífs síns og allir sem voru á mótsstað hópuðust að borðinu. Það fór greinilega ekkert sérstaklega vel í okkar mann því augljóst var að hann var nokkuð stressaður. Í ofangreindri stöðu er hvítur einfaldlega óverjandi mát þó að það sé alls ekki augljóst. Fallegasta lausnin felst í 13. – Bd6+ 14.Kg4 Bf5+! 15. Kxf5 Dh4! 16. g4 He8 og mátið blasir við. Ég var nokkuð spenntur fyrir hönd Oddvars þegar hann lék 13. – Bd6+ eftir langa umhugsun.  Eftir hinn þvingaða leik 14. Kxg4 lék Ull hinsvegar 14. – Dd7+ sem er að mörgu leyti skiljanlegur leikur. Framhaldið varð 15. Kh4 g5+ 16. Dxg5 Be7 og hvíta drottningin fellur.  Svartur er að sjálfsögðu með gjörunnið tafl en smátt og smátt fór Oddvar að leika skákinni niður. Að lokum tókst honum að tapa skákinni á ótrúlegan hátt.

Það var ekki laust við að allir keppendur hafi vorkennt Oddvari eftir þessa niðurstöðu. Daginn eftir mætti hann frekar þreytulegur í morgunumferðina og vann sigur á stigalægsta manni mótsins. Mátti greina ljúfan angann af ótilgreindum kaupstað í loftinu. Í seinni umferð dagsins var okkar maður orðinn frekar þreytulegur en það stöðvaði hann ekki í því að tefla af krafti gegn nýkrýndum Norðurlandameistara Andreas  G. Tryggestad, 2316.  Óhætt er að segja að báðir keppendur hafi teflt frekar illa. Að lokum plataði Ull hinn unga andstæðing sinn upp úr skónum og eftirfarandi staða leit dagsins ljós.

Clipboard03 

Oddvar var með hvítt og átti leik. Hann er að sjálfsögðu með gjörunnið tafl en greinilegt er að hann hefur óttast framrás f-peðs svarts. Hann lék því hinum fyrirbyggjandi og ígulmenntaða leik 59. Bd4. Það væri frábær leikur í alla staði ef að svartur ætti ekki hinn óþægilega svarleik 59. – Dc1 skák og mát.

Síðar um kvöldið gekk undirritaður framhjá hótelbarnum á leiðinni í háttinn. Þar var einungis einn viðskiptavinur eftir, Oddvar Ull. Hann sat með drykk og horfði út í tómið. Í þessari stund fólst harmræn fegurð.

Andstæðingur Oddvars í fjórðu umferð var síðan enginn annar en Bragi bróðir. Við bræður höfðum skellt okkur í sund snemma morguns til þess að öðlast nauðsynlegan ferskleika fyrir strembinn dag. Það hafði Oddvar Ulll ekki gert. Hann var úfinn og þreytulegur í meira lagi. Hann tefldi þó vel gegn Braga og þrátt fyrir að vera peði undir þá var ekki augljóst hvernig Bragi ætlaði að fara að því að vinna skákina. Skelfilegur afleikur gerði þó að lokum út um skákina.

Eftir þessa skelli var Oddvar brotinn á bak aftur. Taflmennskan fór versnandi og aðeins kom eitt jafntefli í hús það sem eftir var móts. Hann endaði í deildu neðsta sæti í móti þar sem glæstir sigrar voru innan seilingar.

Í fimmtu umferð tefldi ég við alþjóðlega meistarann Espen Lie. Ég var með hvítt og beitti svonefndu London-kerfi sem er afar traust og einfalt. Ég ákvað að skipta upp í hundleiðinlegt endatafl eins og Kamsky hefur stundum gert í sömu stöðu en skyndilega fékk ég þá herfilegu hugmynd að sleppa drottningaruppskiptum. Afleiðingarnar voru þær að ég tapaði peði en öllu verri fréttir voru þær að mótspilið var minna en ekki neitt. Í örvæntingafullri leit minni að moldviðri framdi ég síðan virðulegt harikiri á borðinu, gafst upp, strunsaði niður í heilsulindina og refsaði sjálfum mér með ítrekuðum heimsóknum í kalda pottinn með tilheyrandi skrækjum. Eftir svona frammistöðu eiga menn ekkert gott skilið.

Frammistaða Braga var öllu betri. Hann vann góðan sigur með svörtu gegn alþjóðlega meistaranum Petter Haugli og var hinn kátasti þegar bugaður bróðir hans kom úr heilsulindinni.  Héldum við bræður þá í matsal hótelsins sem var glæsilegur í alla staði. Útsýni til allra átta og hlaðborðið sem boðið var uppá öll kvöld var frábært. Þá léttist lund okkar nokkuð þegar íslensk stúlka, sem búið hafði í Kragerø í rúman áratug, heilsaði upp á okkur. Hún hafði um nokkurt skeið unnið á hótelinu og var mætt á sína fyrstu vakt eftir að við bræðurnir mættum á staðinn.

Sjötta umferð hófst eldsnemma daginn eftir og framundan voru óþægilegir andstæðingar. Bragi fékk hvítt á ungstirnið Kaasen (2468) sem hafði farið mikinn í mótinu eftir heppnina gegn Oddvari í fyrstu umferð. Ég tefldi við með svörtu gegn nýkrýndum Norðurlandameistara, Andreas G. Tryggestad (2316). 

Hjá mér kom upp uppskipta afbrigði spænska leiksins og fórnaði ég peði á velþekktan hátt. Ég gaf færi á mér snemma tafls með yfirborðskenndri og vanhugsaðri hugmynd en hinn ungi mótherji minn treysti mér um of og greip ekki gæsina. Eftir það átti hann ekki möguleika og ég valtaði samviskusamlega yfir pjakkinn. Skák Braga var öllu flóknari og skipti nokkrum sinnum um eigendur. Bragi yfirspilaði Kaasen í byrjun tafls en síðan missti hann marks og endaði í nauðvörn. Sem betur fer hafði litli bróðir það af en síðan kom upp æsilegt tímahrak. Sem betur fer tefldi Bragi seinni hluta skákarinnar allt að því óaðfinnanlega og hafði afar mikilvægan sigur.  Voru Þorfinnsbræður vígreifir eftir þessa niðurstöðu. Hádegishléið var nýtt í velútlátinn hádegisverð, hressandi göngutúr og afar mikilvægan blund!

Síðar sama dag fór fram sjöunda umferð og vorum við bræður komnir í bullandi toppbaráttu. Bragi tefldi á fyrsta borði gegn stórmeistaranum Kjetill A. Lie og ég mætti goðsögninni Eduardas Rozentalis. Bragi tefldi nokkuð góða skák gegn Lie þar sem að þræðir valdsins voru alltaf í hendi litla bróður. Staðan batnaði jafnt og þétt hjá okkar manni og mátti Lie teljast heppinn að sleppa út í endatafl peði undir. Þar náði hann hinsvegar góðri blokkeringu með riddaranum sínum og jafnteflið varð ekki umflúið. Með örlítið meiri nákvæmni hefði Bragi vel getað unnið þessa skák.

Ég tefldi langa og flókna skák gegn Rozentalis. Ég var kominn með yfirburðatafl eftir byrjunina en þá réðst stórmeistarinn öflugi til atlögu svo um munar og fórnaði liði fyrir ógnvekjandi sókn. Var ég afar stressaður um að ég myndi enda sem fórnarlamb í einhverju ódauðlegu listaverki á hinum 64 reitum en það eru skelfileg örlög í alla staði. Sem betur fer fann ég hinsvegar ágæta varnarleiki og slapp síðan frá öllu saman með betra tafl. Rozentalis ætlaði hinsvegar ekki að tapa án baráttu og hann varðist af miklum krafti lengi vel. Í tímahraki lék hann hinsvegar af sér peði á afar klaufalegan hátt sem endaði með því að ég komst út í endatafl manni yfir. Slæmu fréttirnar voru hinsvegar þær að ég gat í raun ekki komið í veg fyrir að ég myndi missa öll mín peð og þyrfti þá að máta stórmeistarann með riddara og biskup.  Þetta var í fyrsta skipti á ferlinum, jafnvel í hraðskákum, sem að þetta endatafl kom upp hjá mér og var ég því nokkuð smeykur. Sem betur fer þá náði ég að muna aðferðina og Rozentalis gafst upp eftir 120.leiki.

Ef að við vorum montnir eftir fyrri umferð dagsins þá héldu okkur engin bönd eftir þessa umferð. Vorum við bræður í öðru sæti mótsins fyrir tvær síðustu umferðirnar með fimm vinninga. Efstur var Kjetill A. Lie með 5½. Héldum við í koju sannfærðir um að miklir sigrar væru yfirvofandi síðasta daginn. Það varð ekki raunin.

Lie-bræður voru andstæðingar okkar í 8.umferð. Ég tefldi við efsta manninn, Kjetil og Bragi tefldi við bróður hans Espen sem einnig státaði af fimm vinningum. Hann hafði teflt við aðeins sterkari andstæðinga en við bræður og var því hársbreidd frá sínum síðasta stórmeistaraáfanga. Til þess þurfti hann 1½ vinning í síðustu tveimur umferðunum.

18741573_10212221735314196_1019817430_n

Skemmst er frá því að segja að Bragi hélt uppteknum hætti varðandi gjafmildi okkar bræðra gagnvart Espen. Skákin var arfaslök í alla staði og Espen vann öruggan sigur og stórmeistaraáfangi hans því nánast gulltryggður.

Skák mín gegn Kjetil var talsvert meira spennandi.  Kjetil tefldi enska leikinn og ég svaraði því með kraftmikilli taflmennsku. Ég afréð að fórna peði fyrir talsverðar flækjur og mat tölvan stöðuna þannig að ég væri með úrvalsbætur. Staðan var þó vantefld og öllu verra var að ég kom mér í tímahrak sem að gerist sjaldan. Eftir smá ónákvæmi fórnaði Kjetil síðan skiptamuni og komst út í afar vænlegt endatafl. Mín tilfinning var sú að ég hefði átt að geta haldið jafnteflinu en með engan tíma á klukkunni var það nánast ógjörningur. Lie-bræður rassskelltu því Þorfinnsbræður 2-0.

Það voru þung skref í hádegisverðinn þennan síðasta dag.  Allir draumar að engu orðnir. Ekki léttist lund okkar þegar að pörun síðustu umferðar leit dagsins ljós en þar blasti við viðureignin Þorfinnsson – Þorfinnsson.  Þetta var stutt skák, án sviptinga, sem endaði með skiptum hlut.

Lokaniðurstaða mótsins var sú að stórmeistarinn Kjetill A. Lie vann glæsilegan sigur og hlaut 7 vinninga af 9 mögulegum.  Ekki síður var árangur bróður hans, Espen, glæsilegur en hann náði sínum síðasta stórmeistaraáfanga með því að hljóta 6,5 vinninga  af 9 og fór taplaus í gegnum mótið. Hann þarf núna aðeins stigin til þess að ná titlinum eftirsótta og með taflmennsku eins og hann sýndi í Kragerø mun það gerast innan tíðar. Í 3-4.sæti voru síðan stórmeistararnir Kveinys og Catalbashev með 6 vinninga. Kveinys vann hinn unga Kaasen í 15.leikjum með hvítu í síðustu umferð og var svo kátur eftir mótið að annað eins hefur vart sést.

Við bræður deildum 5-8.sæti ásamt Tryggestad og Miezis. Veitt voru peningaverðlaun fyrir sjö efstu sætin og var notast við athyglisvert kerfi. Í stað þess að deila þremur verðlaunum með okkur fjórmenningunum þá var sá stigalægsti skilinn út undan. Það kom í hlut stórmeistarans Miezis sem hafði átt arfaslakt mót en unnið sig upp í lokin. Fengum við bræður um 25 þúsund krónur á kjaft sem að er vissulega betra en ekki neitt! Við vorum þó frekar ósáttir með lokaniðurstöðuna og töldum að með smá stríðsgæfu þá hefði árangurinn getað orðið betri.  Ég græddi sjö stig í mótinu en Bragi heltraust 1 stig! Nokkrum dögum síðar landaði Bragi stórmeistaraáfanga í Íslandsmóti skákfélaga í Rimaskóla og því má segja að heimsóknin til Noregs hafi skilað sínu.

18716835_10212221766194968_630204986_n

 

 

Mótshaldarinn Truls Jörgensen er staðráðinn í að halda annað sambærilegt mót næsta ár. Það er mín skoðun að íslenskir skákmenn ættu að að íhuga það alvarlega að kíkja í heimsókn. Hótelið er fyrsta flokks, maturinn frábær og öll skipulagning mótsins til fyrirmyndar. Sérstaklega hefðu ungir skákmenn á bilinu 1600-1800 gott af því að mæta til leiks og spreyta sig í B-flokki mótsins. Þar voru góð tækifæri til þess að moka inn skákstigum og öðlast keppnisreynslu og sjálfstraust á erlendri grundu.

Björn Þorfinnsson með aðstoð Braga Þorfinnssonar.

 


Mai bræður- pistill frá Róm

IMG_1116Meðfylgjandi er pistill frá þeim bræðrum Aroni Þór og Alexander Oliver Mai. Bent er á pistilinn má finna einnig hér í PDF.

------

Í byrjun desember héldum við bræðurnir til Rómar að tefla á alþjóðlegu skákmóti: 1° International Chess Festival Roma Città Aperta 2016. Mótið var 9  umferða opið kappskákmót sem var teflt á sjö dögum. Í fyrstu þrem umferðunum var öðruvísi kerfi þar sem maður tefldi við menn sem voru með svipaðan styrkleika þannig að eftir þrjár umferðir voru sumir 1600/1700 stiga skákmenn í fyrsta sæti. En síðan breyttist þetta í hefðbundið svissneskt pörunarkerfi. Mótið var haldið á 4 stjörnu hóteli þar sem við meðal annars dvöldum á. Hótelið var skammt frá miðborginni, þar sem auðvelt var að taka neðanjarðarlest á helstu staði eins og hringleikahúsið, Vatíkanið og miðbæinn. Hitastigið var á bilinu 16-22 gráður sem var frekar þægilegur hiti.      

IMG_1263   

Í mótinu voru alls 182 keppendur frá 30 þjóðum frá fjórum heimsálfum. Það voru þó nokkuð margir sem vöktu athygli okkar á mótinu en uppúr stóð Fabio De Carlo. Fabio De Carlo (2055) sem Alex vann langa endataflsskák. Á einum tímapunkti vakti Alex upp drottningu í kolunnu endatafli og kallaði þá Fabio til skákstjórans og sagði að Alex gerði það vitlaust og vildi krefjast sigurs en skákstjórinn sá hvað gerðist og sagði að Alex gerði það hárrétt og gaf Fabio skákina stuttu seinna. Tveimur umferðum seinna fékk Aron einnig Fabio og tefldi hann sömu byrjun og Alex hafi teflt við hann. Skákin var löng og voru þeir einu eftir í salnum. Fabio var orðin þreyttur og fór að leika hratt og lék sér síðan í mát, síðan fleygði köllunum um salinn og hrópaði öllum illum orðum.       

Salurinn var mjög þægilegur enda var hann kældur fyrir umferðir.  Eini gallin var að menn máttu reykja fyrir utan svo að það dreifðist þó nokkuð mikil reykingarlykt inn. Á mótinu var mjög áhugaverð regla: maður þurfti að spyrja skákstjóra hvort maður mætti fara út úr salnum t.d. fara á klósettið, fá sér vatnsglas o.fl. 

Aron vann þrjár, þrjú jafntefli og tapaði þrem og endaði með 4,5 vinninga og hækkaði um 72 stig. 

Alex endaði í 1. sæti í flokki 1500-1799. Alex vann tvær, gerði sex jafntefli, og tapaði einni og endaði með 5 vinninga og hækkaði um 120 stig.      

Mælum með þessu móti. Þökkum Skáksambandinu og Taflfélagi Reykjavíkur kærlega fyrir stuðninginn.   

Skákir frá mótinu má finna hér að neðan.


Skrár tengdar þessari bloggfærslu:

Pistill frá Hilmi Frey

Meðfylgjandi er pistill frá Hilmi Frey frá móti sem hann tefldi á um síðustu áramót.

Pistilinn má finna myndskreyttan í PDF-viðhengi.

-------------------- 

Í desember 2015 tefldi ég aftur á mótinu Øbro CXU Nytår eins og í fyrra. Þetta er 7 umferða mót sem teflt er á fjórum dögum. Það þýðir auðvitað að það eru tefldar tvær umferðir á dag alla daga nema einu sinni. Ég tefldi í stigaflokki U2000 ELO og var númer 45 af 65 keppendum.

Mótið er haldið í húsnæði skákklúbbsins í Øbro að Rosenvængets Allé á Østerbro, aðstaðan er fín og daglega rútínan var að taka lestina frá Vesterbro og ganga svo að skákstað frá lestarstöðinni skammt frá. Milli umferða tók því ekki að fara upp á hótel svo við fengum okkur að borða og fórum í gönguferðir. Veðrið var stórfínt og hverfið í kringum skákstaðinn flott, góðir veitingastaðir og margt að sjá. 

Ég tefldi við stigahærri andstæðinga allar skákirnar og í fyrstu umferð var ég með hvítt á móti Henrik Porte 2215, ég gerði jafntefli í þessari skák og í raun lítið hægt að segja um hana meira.

Í annarri umferð var ég með svart á móti Henrik Mortensen 1980 og ég vann hann í jafnri skák þar sem hann lék af sér í 29. leik, Hb5 sem tapar skiptimanni og ég vann stuttu síðar.

Í þriðju umferð var ég aftur með svart á móti Jens Olaf Svanholm Fogh 2128 og vann hann í glæsilegri skák eftir 54 leiki. Í leik 34 lék ég Rf4 sem vinnur skákina.

Í fjórðu umferð hafði ég hvítt og tefldi við Brian Jørgen Jørgensen 2275 sem var 8. í stigaröð keppenda og vann hann eftir að hann var með betri stöðu eftir byrjunina. Ég hélt að ég væri búinn að tapa en svo lék hann af sér Drottningunni í 28. leik.

Í fimmtu umferð tefldi ég við Jan Nordenbæk Pedersen 2213 og var með hvítt og gerði jafntefli eftir að hafa verið með lélega stöðu út úr byrjuninni en náði að þráleika í endann.

Í sjöttu umferð var ég með svart á móti FM Jesper Mørch Lauridsen 2320 og gerði jafntefli. Hann sagði við mig eftir skákina: „I have never been out of the book after three moves“. Ég fékk fékk mjög góða stöðu eftir byrjunina og hélt jöfnu.

Í lokaumferðinni var ég aftur með svart og tefldi við Thomas Schou-Moldt 2210 sem ég gerði jafntefli aftur. Ég tefldi byrjunina lélega og fékk þar vonda stöðu en náði svo einhvernvegin að vinna Drottninguna hans með smá taktík og náði þannig að halda jafntefli og ég ætla að sýna hana. 

Þetta var auðvitað bara frábært mót fyrir mig, enda hækkaði ég um 141 elo stig, endaði í 5.sæti og vann minn stigaflokk að auki.Þó það sé erfitt að tefla svona stíft á fáum dögum þá er það samt mjög gaman og ég sé ekki eftir því að hafa eytt jólafríinu mínu í taflmennsku milli jóla- og nýárs. Ég vil þakka GM Henrik Danielsen fyrir að hafa hjálpað mér, fyrir mót og á meðan á því stóð.

Kveðja, Hilmir Freyr


Skrár tengdar þessari bloggfærslu:

Pistill Gumma Kja: Minningarmót um Capablanca

Minningarmót um Capablanca

Guðmundur Kjartansson hefur skrifað pistil um minningarmótið um Capablanca sem hann tók þátt fyrr í sumar. Þar minnist hann jafnframt á mótið í Sankti Pétursborg. Skýrða skák frá mótinu má finna hér.

Pistilinn skemmtilega má finna sem PDF-viðhengi.


Skrár tengdar þessari bloggfærslu:

Ólympíuskákmótið 2014 - Uppgjör liðsstjóra kvennaliðs

Áður hafði ég ritað pistla um fyrstu umferðirnar og mótsstaðinn auk þess sem ritaður var pistill þegar mótið var hálfnað. Mun reyna að skrifa um það sem gerðist hjá okkur seinni part móts ásamt því að gera aðeins upp árangurinn og annað.

Árangur í "seinni hálfleik"

Fyrstu sex umferðirnar hafði kvennasveitin meira og minna unnið þær sveitir sem þær átti að vinna en fylgt því svo eftir með því að tapa 3,5-0,5 gegn þeim sterkari. Nokkur styrkleikamunur var í þeim viðureignum en engu að síður voru töpin og stór og sérstaklega gegn Venezuela sem virðst hafa eitthvað tak á okkar sveit.

Sigurinn á Bangladesh var þó góður þar sem sú sveit var örlítið stigahærri en okkar. Í 7. umferð unnum við annan góðan sigur á svipaðri sveit þar sem Mexíkó lá í valnum 2,5-1,5 þó að við höfum snemma lent 0-1 undir í þeirri viðureign.

Áframhald varð á jójó-inu og enn töpuðum við 3,5-0,5 og nú gegn nokkuð þéttri tékkneskri sveit. Fyrir þetta tap var kvittað strax í næstu umferð með mjög góðum 4-0 sigri á sveit IBCA (fatlaðir) sem þó voru aðeins örlítið stigalægri en okkar sveit.

Tapið gegn El Salvador voru nokkur vonbrigði í 10. umferðinni en þar tapaðist viðureignin með minnsta mun en fyrirfram hélt ég að við ættum að hafa þar sigur.

Mótið kláruðum við þó á góðum nótum með 3,5-0,5 sigri gegn Jamaíku en þar náðu ansi margar stöður að snúast okkur í hag því snemma stefndi ekki í svo góðan sigur!

Í seinni hálfleik hjá karlaliðinu vannst fínn skyldusigur á Pakistan 3,5-0,5 og því var fylgt eftir með þéttum sigri á nokkuð reyndri skoskri sveit 3-1.  Í kjölfarið komu tvö jafntefli gegn Katar og Tyrklandi sem voru fín úrslit þó sóknarfæri hefði e.t.v. mátt reyna að finna gegn Katar.

Þessi fíni endasprettur þýddi að mikið sóknarfæri var í síðustu umferð gegn Egyptum þar sem möguleiki var að ná besta sæti sveitarinnar í mjög langan tíma. Því miður hittum við ekki áð góðan dag og úr varð gott mót í stað frábærs móts.

Ég mun fara yfir einstaklingsárangur í niðurlagi þessa pistils.

 

Kasparov-partýið

DSC_0568 

FIDE kosningarnar voru á mánudaginn 11. ágúst en laugardaginn 9. ágúst hélt Kasparov smá teiti þar sem meðal annars Nigel Short spilaði á gítar, Elisabeth Paetz tók lagið með honum og magnaður töframaður frá Indlandi lék listir sínar. Ýmis hamagangur var einnig á sviðinu eins og sjá má hér:

 

Þeir sem hamast þarna á sviðinu voru þeir sem dregnir voru í happdrætti aðgangsmiða en gefnir voru heilir þrettán (auðvitað 13!!) Samsung Tablets. Gummi var með miða nr. "H 13" og sturlaðist þegar lesið var "H thirtee.........TWO"

 Myndir úr partýinu:

Töframaður í Kasparov partýi 

Töframaðurinn að störfum, hann var frábær...að neðan er stutt myndbrot þar sem hann hafði verið bundinn af fjórum sjálfboðaliðum. Það varði ekki lengi!

 

Hljómsveit
 
 
 
 
 
 
 
 
 
 
 
 
 
 
Flott hljómsveit spilaði áður en partýið byrjaði og að því loknu fyrir dansi. 

 
Áður en heim var haldið hittum við mann frá Gabon sem afhenti okkur A4-blað með hans sögu. Hann var réttmætur fulltrúi Gabon og til þess valinn af "Ministry of Sport" í sínu heimalandi og fleira. FIDE (lesist Kirsan) hinsvegar hunsaði það bara og fulltrúinn á FIDE þinginu einhver allt annar.
 
Þarna var mér endanlega ljóst að kosningarnar voru skíttapaðar eins og allir höfðu talað um. 
 


Expo-salurinn
 
Skákstaðurinn sjálfur var að mörgu leiti frekar snautlegur. Reyndar hafði ég ekki aðgang að VIP aðstöðu og e.t.v. hefur Gunnar Björnsson aðra sögu að segja :-)
 
Allavega, skáksalurinn var vel skipulagður en vantaði bæði betri aðstöðu fyrir áhorfendur á neðri borðin og fleira sem ég e.t.v. fer betur yfir á eftir.
 
Ég saknaði þess að sjá enga bóksölu og eins var í raun ekkert afdrep þar sem hægt var að setjast niður en kannski var það erfitt í ljósi "vopnaleitarinnar" við aðalinnganginn.
 
Ég leit þó stundum inn í hið svokallaða Expo herbergi en þar var bein útsending hjá Chessbase, hægt var að kaupa sér hressingu og svo var mikið um kosningabása.
 
Azmai 
 
 Hér má sjá Azmaiparashvili í forsvari fyrir bás Batumi borgar en sú borg vann réttinn að halda  Ólympíuskákmótið árið 2018.
 
Kirsanbásinn 
 
 Básinn hans Kirsan. Þær voru vel þjálfaðar þarna og stilltu sér upp og brostu skvísurnar hans. Bæði Kasparov og Kirsan gáfu öllum keppendum veglegar gjafir eins og áður hefur komið fram, kosningabaráttan var hörð!
 

Kosningarnar
 
Gunnar sat FIDE og ECU þingin og veit því manna best gang mála í kosningunum. Ég visa á pistil hans. Kirsan vann að sjálfsögðu enda kosningavél hans vel smurð og stefnan var sett á fullnaðarsigur. 110 atkvæði gegn 61 var niðurstaðan eins og áður hefur komið fram.
 
Ljóst er að við sitjum upp með þennan Kirsan fýr svo lengi sem honum sýnist. Auðvitað má hann eiga það að hann er ágætis diplómat og kann allskonar trikk. Staðreyndin er hinsvegar sú að hann situr áfram og nú er bara að vinna með honum.
 
Ég tek það fram að það er mín persónulega skoðun að hafa mun fremur viljað Kasparov við stjórnvölinn. Hinsvegar fann ég það að mikill meirihluti keppenda var sammála mér. Flestir sem ég ræddi við voru mjög ósáttir við að Kirsan skildi vinna og eins og ég hef áður sagt þá fengu allir T-boli frá báðum aðilum og bolir Kasparovs voru mun meira áberandi á skákstað, í Tromsö og meira að segja nú eftir mót þegar ég rita þetta (tefldi við mann í slíkum bol í gærkveldi og sá annan erlendan á Facebook í sínum!)  
 
 En eins og ég sagði, kosningunum lokið og það sem meira er nánast allir sem Kirsan vildi koma að komust að og auk þess vann Zurab ECU þannig að segja má að fullnaðarsigur hafi unnist hjá Kirsan & co.
 
Kasparov verloren 
Kasparov hér nýbúinn að tapa kosningum. Væntanlega ekki sáttur
 
Kasparov_bíll 
 
Kasparov var vel merktur út um allt en það dugði einfaldlega ekki til :-( 
 
 
Fótboltinn 
 
Fótboltinn hélt áfram og var mikið spilaður. Aðeins fjaraði undan allra síðustu dagana en í heildina höfum við örugglega farið í fótbolta í 6-8 skipti svei mér þá!

Boltinn var misskemmtilegur. Mjög gaman var þegar jöfn og vel spilandi lið voru á ferðinni en auðvitað er allur gangur á því og sumir blessunarlega mjööööög góðir í skák því hreyfigeta þeirra ekki beint á háu stigi!
 
Hef áður nefnt ýmis nöfn sem tóku þátt en tek bara hérna smá lista til að hafa gaman af: Magnus Carlsen, GM's Borki Predojevic, Alexander Ipatov, Maze, Vachier-Lagrave, Libisewski, Fressinet, Tkachiev, Wesley So, Shulman, Akobian, Julio Granda, Helgi Olafsson og svo mætti lengi telja. 
 
Skemmtileg stemmning var eitt kvöldið þegar Varuzhan Akobian fór hamförum þrátt fyrir getulegar og hæðarlegar hömlur. Í hvert skipti sem hann var nálægt því að skora var hrópaðan á pöllunum "Akooobbbbbiaaaaan" og veðraðist hann allur upp og setti nokkur þrátt fyrir að ekki hafi verið mikil innistæða fyrir því ;-)
 
Virkilega gaman að þessu og bæði var nauðsynlegt fyrir menn að hreyfa sig aðeins og eins var þetta vettvangur til að kynnast ýmsum keppendum betur. 
 
 
Seinni frídagur
 
 
 Veðrið hafði leikið við okkur flest alla dagana en því miður gerði það það engan veginn þegar við héldum upp á fjall þarna í Tromsö og góðan göngutúr. Gengið var yfir forláta brú og þar með af eyjunni. Straumsey (Tromsö) er jú eyja! Hér er pistlahöfundur með Kirsan húfuna en hún var notuð í neyðartilviki þar sem ótækt var að láta rigna á skallann í kuldanum.
 
20140813_160609 

Á miðri leið yfir brúnna að kláfinum. 
 
20140813_162601 

Kvennaliðið vopnaðar regnhlífum á leið að kláfinum.

20140813_163349 

Á leiðinni upp. 
 
20140813_165020 
 
Því miður var útsýnið uppi ekki upp á marga fiska. Þessi mynd ætti í raun að sýna útsýni yfir sjóinn og Straumsey en eins og sjá má var skyggni ekkert!
 
20140813_172213 
 
Við misstum af fyrstu ferð til baka niður og þá var lítið annað að gera en að fá sér gómsætt í gogginn og taka nokkrar léttar tvískákir!
 
 
 
Dauðsföllin
 
Ég hef svosem engan sérstakan áhuga á að fjalla um dauðsföll en því miður var mikið fjallað um það í fjölmiðlum. Við höfðum á orði þarna úti þegar seinna dauðsfallið varð: "nú....verður þá önnur frétt á ______ (ákveðinn fréttamiðill) um Ólympíuskákmótið??"
 
Það er eiginlega skömm að því hvað fréttamiðlar (ekki bara hérlendis) vilja miklu frekar lepja upp svona leiðindafréttir heldur en að fjalla um mótið sem slíkt. Ég fór t.a.m. á twitter og fletti upp hashtaginu #olympiad og var nánast 90% af færslum á þessa vegu  "two people die...."
 
Ég varð því miður vitni að þessum atburði. Borð okkar var tiltölulega nálægt og heyri ég óp um hjálp á borði rétt hjá okkur. Ég geng að því til að sjá hvað er í gangi (ég kann grundvallaratriði í skyndihjálp) og sá þá að eldri maður hafði hnigið niður og var mjög liklega að fá hjartaáfall.
 
Sjúkraliðar komu nokkuð fljótlega á staðinn eftir að hrópað hafði verið á þá.
 
Medics 
 
 Fyrr í mótinu hafði ég einmitt tekið eftir þessum sjúkraliðum en í raun ekki spáð í hversu mikilvægir þeir væru í svo stóru móti.
 
Erfitt var fyrir marga að klára sínar skákir og fannst mér skákstjórum liggja full mikið á að hefja tafl aftur. Byrjað var að tefla aftur meðan lífgunartilraunir stóðu yfir og reglulega heyrðist tíst í hjartastuðtæki. Leiðinlegur endir á annars mjög góðu móti.
 
 
 
Skáksalurinn
 
Hef svosem áður talað um skáksalinn en af því litla sem setja mætti út á í þessu móti að mínu mati þá var það tvímælalaust skákstaðurinn. Eins og ég sagði var aðstaða fyrir áhorfendur nánast engin og ein mamma sem átti stelpu sem var að tefla í Noregi 3 varð frá að hverfa þar sem hún komst ekki inn á svæðið þar sem liðið var. Í raun var aðeins hægt að fylgjast með toppborðunum með fáum undantekningum. 
 
Margir kvörtuðu undan þungu lofti á efstu borðunum. Loftræsting var engin í salnum og því þurfti að opna stórar dyr en þá kom á móti að þeir sem tefldu þar var á meðan skítkalt! Yfirleitt vildi þannig til að Afríkuþjóðir tefldu þar.
 
 
Tapað/Fundið
 
Fyrir eina af síðustu umferðunum tilkynnt skákstjóri að farsími hefði fundist í skáksalnum. Eiganda hans var velkomið að nálgast hann hjá skákstjóra. Ekki er vitað hvort símans var vitjað ;-)
 
Ljóst er að einhver hefur komist framhjá öryggisleitinni með síma en svosem gætu verið ýmsar ástæður fyrir veru símans. Um gæti verið að ræða starfsmenn eða einhverja VIP's en svo er alls ekki útilokað að einhverjir keppendur hafi ætlað sér að nota smá aðstoð frá vélrænum vinum sínum ;-)
 
 
Árangur einstakra keppenda 
 
Renni aðeins yfir karlaliðið eins og það stóð sig frá mínum bæjardyrum séð áður en ég fer yfir í kvennaliðið.
 
1. borð Hannes Hlífar
 
Hannes var mjög traustur og mátti sjá glitta í gamla "Nesa" á köflum. Tapaði ekki skák fyrr en í síðustu umferð þar sem hann líkt og flestir náðu sér ekki á strik. Framan af því var hann mjög traustur og vann góða sigra og hélt góðum jafnteflum. Hannes vinnur sér inn 12 elóstig
 
 2. borð Hjörvar Steinn
 
Það er engin tilviljun að Hjörvar er kominn með 2543 skákstig og virðist bara á leiðinni upp. Hjörvar var eini íslenski keppandinn sem tapaði ekki skák. Í raun hefur hann lítið verið í því undanfarið og þarf líklega að fara aftur í meistara Rúnar Sigurpálsson í Íslandsmóti Skákfélaga til að finna tap hjá kappanum! Hann fór taplaus í gegnum mót í Andorra og svona til gamans hreinsaði hann 12/12 í hraðskákkeppni taflfélaga (var samt með'ann í síðustu :-( )  Hjörvar hækkar um 5 stig fyrir frammistöðuna. 
 
 
3. borð Guðmundur Kjartansson
 
Það geta ekki allir átt gott mót og að þessu sinni náði Gummi sér ekki á strik. Gummi teygir sig stundum of langt sem er kostur og galli. Vel má vera að hann þurfi að finna meira jafnvægi fyrir liðakeppnir. Bæði að vera meira solid með hvítu og eins varðandi rútínu. Gummi er manna duglegastur að vinna í sínum málum og ég veit að eftir þessa reynslu er hann bara ákveðnari að koma sterkur til baka og vinna sig inn í liði fyrir Baku 2016! Spakur liðsstjóri karlaliðsins benti einnig á að margir hefðu ekki byrjað vel á sínu fyrsta ÓL!

 
4. borð Þröstur Þórhallsson 
 
Lengi hefur verið talað um hversu góður liðsmaður Þröstur er. Hann sýndi það og sannaði í verki enn eina ferðina. Þröstur hækkaði um 11 stig í mótinu og var manna duglegastur að stúdera og peppa aðra upp. Þröstur átti t.a.m. mjög sterkt jafntefli gegn Ipatov með svörtu sem var mjög mikilvægt og hleypti kappi í liðið í erfiðri viðureign undir lokin. Í lok móts var bæði keppendum, liðsstjórum og öðrum tíðrætt um hversu góður mórall hefði verið í ferðinni og hjá liðunum og algjörlega morgunljóst að það skiptir miklu máli í svona keppnum.
 
5. borð Helgi Ólafsson
 
Helgi var að mörgu leiti óheppinn í þessari ferð og fannst mér hann tefla betur en töpuð stig gefa til kynna. Klaufalegt tap í síðustu umferð sat í Helga enda var það algjör óþarfi og var hann taplaus fram að því. Herslumuninn vantaði í nokkrum jafnteflum en andstæðingur hans varðist vasklega í einni skák peði undir og gegn Skotlandi var Helgi skynsamur og reyndi að tefla til vinnings eins og hægt var innan ramma þess að vera að keppa í liðakeppni. Helgi hefði getað tekið áhættur en hefði þá verið að bjóða upp á möguleika á tapi og kaus skynsamlega að gera það ekki.

Helga varð á orði við upphafi móts við liðsstjóra Dana (Lars Schandorff) þegar hann var spurður hvort hann væri að tefla: "I can still play some chess you know!"
 
Forsendur þessarar setningar hafa ekkert breyst og vonandi heldur Helgi ótrauður áfram að gefa kost á sér enda einn fremsti skákmaður okkar frá upphafi eins og hann hefur margoft sýnt. 
 
 
Ég færi mig þá yfir í kvennaliðið sem ég stýrði.
 
1. borð Lenka Ptacnikova
 
Lenka fór sem fyrr fyrir kvennaliðinu og ótrúlega sterkt að hafa hana alltaf á efsta borði. Að þessu sinni var e.t.v. árangurinn síðri heldur en undanfarin Ólympíumót en Lenka er alltaf "solid" eins og við segjum. Hún hefur átt gott ár og m.a. annars tók hún IM-norm á Reykjavíkurskákmótinu og vann sér rétt til að tefla í Landsliðsflokki að ári.
 
Lítið er í raun hægt að setja út á mótið hjá Lenku. Það er helst að Sarai Sanchez ásamt Venezuela virðist hafa eitthvað tak á Lenku og liðinu okkar en við töpuðum of stórt fyrir þeim aftur 3,5-0,5. Aö öðru leiti voru margar baráttuskákir sem gátu fallið öðruvísi og t.a.m. var grátlegt að fara úr betri stöðu í jafntefli og svo í tap gegn Ísrael. Lenka lenti einnig í því í miðju móti að strákurinn hennar þurfti að fara á spítala og er ég heilt yfir mjög ánægður með Lenku þrátt fyrir að hún tapi 8 stigum í mótinu.
 
Einnig gladdi hún liðsstjóra með því að nota hugmyndir úr undirbúningi fyrir mót í einni stuttri og snarpri skák, sjá neðst í pistli!
 
2. borð Hallgerður Helga
 
 
Hallgerður stóð sig frábærlega á þessu móti og sýndi að hún á að vera mun stigahærri. Hún var eini íslenski keppandinn sem tefldi allar skákirnar og sýndi engin þreytumerki. Ef einhver ætti að gera það væri það Hallgerður þar sem hún á það til að tefla langar skákir ;-)
 
Hallgerður tapaði aðeins tveim skákum gegn sterkum og stigaháum skákkonum en að öðru leiti gaf hún engin færi á sér og hækkar um heil 25 skákstig fyrir framimstöðuna! Hún er þá komin yfir 2000 elóstig þar sem hún á heima.
 
Hallgerður er með eitt traustasta byrjanakerfið af öllum liðsmönnum og þarf bara að vinna í því að viðhalda því og bæta við sig vopnum. Hún er komin með mikla keppnisreynslu og orðin góð í endatöflum enda leita skákirnar oft þangað. Hallgerður þarf að bæta eilítið við sig í taktík til að taka framfarastökk og hækka sig enn meira á stigum en ég tel fyllilega innistæðu fyrir því.
 

3. borð Tinna Kristín
 
Tinna átti nokkuð traust mót á 3. borði og meira og minna vann þær skákir sem til hefði verið ætlast fyrirfram og eins nokkrar sem fyrirfram hefðu átt að vera 50-50 skákir.  Töpin voru öll gegn skákkonum með 2200 stig eða meira og aðeins slysalegur afleikur á móti El Salvador sem hefði mátt ætlast til að færi betur.
 
Tinna getur verið sterk í taktíkinni á köflum og kom liðsstjóra t.a.m. vel á óvart með nokkrum lævísum gildrum þegar farið var yfir skákir eftir umferð. Tinna þarf að styrkja sig í ákveðnum stöðutýpum eða "pósanum" og þá tekur hún líka gott stigastökk.

 
4. borð Jóhanna Björg 
 
Líkt og hjá karlaliðinu náðu sér ekki allir á strik og að þessu sinni var Jóhanna undir getu. Það býr mikið í Jóhönnu og hefur hún margsannað það með góðum úrslitum  Hún lenti í slæmum kafla um miðbik móts en að hluta til höfðu utanaðkomandi hlutir þar einhver áhrif á.
 
Jóhanna hefur á köflum fínt stöðumat og er góð í taktíkinni en hefur glímt við sama vandamál og margir sterkir íslenskir skákmenn hafa oft þurft að glíma við, fljótfærni.
 
Ég geri orð KÖE í kommentakerfi skak.is að mínum: 
  

Það hefur vakið athygli hér heima að sumar stelpurnar okkar hafa verið að klára skákirnar sínar (tapað) með klukkutíma eftir á skáklukkunni (hafa leikið nær viðstöðulaust). Hvet þær til að nýta tímann betur, tefla í botn og hafa gaman af þessu!

 
Jóhanna sýndi engu að síður karakter og kláraði vel með tveimur sigrum í lokin og sleppur því vel stigalega frá mótinu. 
 

5. borð Elsa María
 
Elsa María komst einnig fínt frá mótinu stigalega og hækkar um nokkur stig. Elsa átti sterkt jafntefli gegn Ísrael og vann einnig skákir sem voru mikilvægar í að landa sigri í nokkrum viðureignum eins og t.d. gegn Mexíkó.  Á milli voru tapskákir þar sem Elsa sá ekki til sólar og því mjög sveiflukennt mót hjá Elsu.
 
Elsa getur teflt mjög vel ef hún fær einfaldlega skákstöður. Hún brást hinsvegar illa við óvæntum leikjum í byrjunum þó lítil ástæða hafi verið til. Ég verð að hluta til að taka á mig sökina þar!
 
 
 
Lokaorð

 
Heilt yfir geta bæði liðið verið sátt. Kvennaliðið endaði níu sætum ofar en upphafssætið og kláruðum við í 55. sæti.
 
20140814_174256 
 
Við loka liðskvöldverð fékk kvennaliðið pöntun númer 55, ótrúleg tilviljum en það var einmitt lokasætið í mótinu!
 
Heilt yfir ekki undan miklu að kvarta, góðir sigrar á sveitum á svipuðu róli eins og Bangladesh og Mexíkó og mjög góðir stórsigrar gegn IPCA og IBCA. Slæmu viðureignirnar voru helst gegn Venezuela og El Salvador. 
 
Fyrirfram settum við takmarkið á besta árangur á þessari öld með því að ná í topp 50. Ég taldi fyrirfram að það hefði verið vel gerlegt. Að mínu mati býr mun meira í stelpunum en stigin segja til um. Þær þurfa allar að vinna í sínum veikleikum og geri þær það tel ég þær allar eiga heima yfir 2000 stigum og þarf ekki mikið til! 
 
Fyrir mig var þetta mikil reynsla og ef ég fengi að fara til baka myndi ég gera eitthvað öðruvísi en það á við okkur öll og er hluti af því að læra. 
 
Ég vil að lokum þakka öllum fyrir frábæra ferð og skemmtun. Bæði keppendum, Jóni L, Gunnari og skákstjórum. Reynslan var bæði skemmtileg og vonandi dýrmæt og ég tók mikið út úr þessu. 
 
P1020486 

Hálfleikspistill liðsstjóra kvennaliðsins á ÓL 2014

Nú þegar Ólympíumótið er um það bil hálfnað og menn farnir að pressa á gamla að henda inn öðrum pistli er tilvalið að taka aðeins stöðuna og fara yfir gang mála. Í gær kláraðist 6. umferð og er árangurinn hingað til aðeins undir væntingum en þó auðvitað mikið eftir til að hreinsa það upp.

Karlaliðið var frekar óheppið á móti sterki sveit Serba þar sem leit út fyrir jafnvel stóran sigur á tímapunkti en þess í stað endaði viðureignin með tapi. Í kjölfarið hafa komið slakir matchar á móti Svíum og Færeyjum á milli þess sem góður skyldusigur vannst á blindum.

Kvennasveitin hefur verið að vinna lakari sveitirnar en tapa stórt á móti þeim sterkari. Undirritaður hefði viljað sjá meiri baráttu gegn þeim sterkari en gegn Ísrael í gær leit út fyrir það á kafla en hlutirnir duttu ekki fyrir okkur.

 Ég ætla nú aðeins að "úða" eins og við köllum það stundum og fara svona yfir ýmsa hluti og atvik eins og ég man...

Allur skalinn!

 Eins og komið hefur fram eru hér "allra þjóða kvikindi" á svæðinu. Virkilega gaman að sjá og spjalla við fólk frá löndum sem maður fær líklegast aldrei tækifæri á að heimsækja.

Jamaíku stelpur

Liðsmaður Oman

 Hef ég t.a.m. spjallaði við liðsstjóra frá Guyana, Lesotho, Palau o.fl. auk þess að spila fótbolta við Sómali og mann frá Sameinuðu Arabísku Furstadæmunum. Spjallaði auk þess lengi við fulltrúa Nígeríumanna á þinginu og spjölluðum við um kosningarnar (þeir kjósa Kasparov) auk þess sem ég  lýsti yfir hrifningu minni á knattsprynuliði Nígeríu sérstaklega 1998. Hann lýsti því yfir að nú væri að koma upp sterk kynslóð knattspyrnumanna í Nígeríu og hlutirnir myndu verða flottir þar fljótlega.

 

FIDE Trainer námskeið

Umferðirnar frá síðastliðnum sunnudegi voru nokkuð strembnar. Þá þurftum við Jón L. Árnason að sitja svokallað FIDE Trainer námskeið en ekki er heimilt að vera liðsstjóri nema að hafa sótt slíkt námskeið. FIDE vill hafa þetta líkt og í fótboltanum að menn hafi réttindi til að þjálfa.

Þar sem enn er verið að innleiða þetta hafa þeir verið og munu á næstunni bjóða upp á þennan kost, þ.e. að menn geti sótt námskeið meðan á mótinu stendur. Um var að ræða á milli 3-4 klukkutíma hvern dag og meðan á umferð stóð.  Af þeim orsökum var viðvera í þessum umferðum í lágmarki en þó kíktum við yfir í skáksalinn í hléum eins og kostur var og ef tími gafst til. Við gátum fylgst með skákum í beinni á netinu á námskeiðinu og því hlaupið yfir ef tilefni þótti til.

 Security

Að ofan má sjá inngang á skákstaðinn. Hér eru öryggisleitarhlið líkt og notuð eru á flugvöllum og fólk í fullu starfi hér að sjá til þess að enginn fari með síma inn á skákstað. Hvort sem það var brandari eða gríðarlegur einfeldningsháttur þökkum við samt Facebook skríbentum fyrir hláturskrampann sem við fengum þegar undirritaður var "skammaður" fyrir að vera á "feisbúkk í símanum" á skákstað.

En aftur að námskeiðinu. Fyrirlesari var Efstratios Grivas, grískur stórmeistari og hafði hann margt mjög merkilegt fram að færa að mínu mati og held ég að Jón L hafi verið sammála mér. Eða "Mr. Arrnasan" eins og Grivas kallaði hann :-)

Farið var um víðan völl í námsefninu og skáklega fékk ég gríðarlega margar hugmyndir að uppbyggingu á ýmsu kennsluefni og meiri skilning á mörgu. Grivas þessi heldur því fram að "talent" sé mjög ofmetið fyrirbæri og sé í raun ekki til. Það sé alltaf gríðarleg vinna sem liggi að baki. Uppruni orðsins sjálfs er í raun grískur og merkir  í raun að eiga næga pening eða auð til að sækja sér þekkingu þannig að segja má að skilningur á orðinu hafi skolast til í tímanna rás.

Á námskeðinu situr fólk með ýmsan styrkleika og það kannski eina gagnrýnin á það sem slíkt. Af námskeiðnu er hægt að útskrifast með fimm mismunandi gráður þar sem FIDE Senior Trainer er hæsta gráðann. Næst á eftir kemur FIDE Trainer en við Íslendingarnir ásamt IM Jonathan Grant fengum þá gráðu á meðan aðrir sem sátu það fengu hinar sem eru t.d. FIDE Instructor og National Instructor.

FIDE Trainer Seminar

Í lok námskeiðsins var svo próf þar sem spurt var úr námsefninu en einnig ýmsar sögulegar spurningar svosem hver er núverandi forseti FIDE og hversu margir forsetar hafa verið IGM's....það var nú hálfgerð svindlspurning fyrir okkur Íslendingana enda F.Olafsson frekar auðvelt svar og þurftum svo að bæta Euwe við.

Fyrir prófið hafði ég haft spurnir af því að hann spyr stundum um Heimsmeistarana og sem betur fer er ég nú með röðina á þeim á hreinu og hefði ekki átt í vandræðum með það. Hinsvegar náði ég að hjálpa kollega mínum frá Lesotho. Þannig vildi til að síðasta hléinu á námskeiðinu áður en prófaði byrjaði spurði ég hann hvort hann þekkti röðina á Heimsmeisturunum. Hann var ekki með það allt á hreinu þannig að ég sagði honum að Petrosian væri í uppáhaldi hjá Grivas (sko...maður náði eitthvað að fylgjast með!) og tilkynnti ég honum að hann væri níundi Heimsmeistarinn og hann skildi nú reyna að muna það.

Ég átti svo erfitt með að þurrka af mér skítaglottið þegar ég leit á 13. spurning prófsins sem var einmitt "Who was the 9th World Champion". Aðrar almennar spurningar voru t.d. hvaða frægu bók skrifaði Bronstein, hvað sagði Anand um innsæi (e. intuition) og hvaða klassísku hugmynd gaf Lasker skákheiminum.

Við fengum reyndar ekki að sjá svörin við öllu en ég vildi ná FIDE Trainer gráðunni og tókst það og því mjög sáttur.

 

Knattspyrna


 Eins og kom fram í síðasta pistli hefur verið spilaður fótbolti hér nánast öll kvöld. Undirritaður hefur nokkurn veginn verið fastagestur ásamt Hjörvari Steini og Guðmundi Kjartanssyni. Þeir sem mæta oftast af útlendingunum eru Alexander Ipatov, nokkrir franskir með Maze í fararbroddi, Pólverjar, Kólumbíumenn og svo nokkrir Norsarar með Magnus Carlsen í fararbroddi.

Fótbolti í Tromsö

 Á myndinni að ofan má sjá stórmeistarann Denis (Kadrec held ég) frá Bosníu kljást við GM Sebastien Maze. Á miðri mynd er Hjörvar Steinn í United búning og svo Magnus í hvítum bol. Undirritaður er svo í einhverjum furðulegum aðgerðum í gulum skóm, líklegast að reima!

Það hefur verið gaman að fylgjast með Magnusi en hann sýnir ekki af sér mikinn hroka og hefur gaman af boltanum og er nokk sama um úrslit. Hann er greinilega í mjög góðu líkamlegu formi og ásamt öðru greinilega lykilinn að árangri hans.

Það hefur á köflum komið upp smá krakki í manni og t.a.m. hef ég aldrei einsett mér jafnmikið að vinna tæklingu/baráttu um boltann og þegar ég lenti í slíkri baráttu við Magnus upp við battann í einum leiknum. Boltinn vannst og söng skömmu síðar í netinu. Litli "fanboy-inn" inn í mér rifnaði svo úr stolti þegar við Magnus vorum saman í liði daginn eftir og Magnus hrópaði tvisvar á nafn hins vörpulega Ingvars til að fá sendingu.

Veðrið hér hefur verið almennt gott fyrir utan mikla rigninu í tvö skipti. Menn létu sig þó hafa það og þrátt fyrir rigningu og þrumur og eldingar var spilað! Undirritaður var ræstur í boltann snemma á frídeginum þegar ég var að versla mér Burger King (fyrsti og eini skyndibiti ferðarinnar!) og hélt ég á fóboltavöllinn þegar þvílíka rigningin byrjaði. Enginn virtist ætla að mæta og þegar ég hafði lokið "máltíðinni" í einhverskonar skjóli fyrir rigningunni þá tæmdi ég pokann og sat eftir með risastóran bréfapoka frá BK sem ég byrjaði að hlaupa niður brekkuna með og notaði sem regnhlíf. Mætti ég þá Hjörvar og Gumma sem löbbuðu á móti mér ásamt Magnusi Carlsen í mestu makindum og hlógu að þessari "improvised" regnhlíf undirritaðs. Úr varð svo um 2ja tíma bolti í hellirigningu og pollum en skemmtilegur var hann!

Bermuda Partý

Hefð hefur skapast fyrir því að kvöldið fyrir fyrri frídag Ólympíumótsins haldi lið Bermuda hið svokallaða Bermudapartý þar sem öllum keppendum er boðið að stinga saman nefjum og kynnast.

Flestir okkar Íslendinganna kíktum við og áttum skemmtilega kvöldstund. Partýið var á allavega þrem ef ekki fjórum hæðum í nokkuð stóru húsnæði með DJ, dansgólfi og tilheyrandi. Mætingin var hreint gríðarlega góð hjá keppendum og allir spakir.

Fiona og Larry Bermuda

Undirritaður ásamt Larry frá Bermuda og Fionu sem er orðinn góður Íslandsvinur. 

Helv#$& verðlagið

Pizza Dinner

Í fyrradag var ákveðið hjá kvennaliðinu (ásamt Hjörvari) að brjóta aðeins upp kvöldmatinn á hótelinu og kíkt út að borða á pizzastað. Það var í stuttu máli dýrt þó maturinn hafi verið fínn. Guði sé lof að eingöngu var um að ræða pizzur! Ef farið hefði verið á almennilegan stað hefði þurft að greiða með einhversskonar raðgreiðslum!

Eins og margt er skemmtileg hér er verðlagið algjörlega út í hött og örugglega að gera út um budduna hjá mörgum!

Í stuttu máli er miðstærð af pizzu norðanmegin við 4.000 kall og mun sunnar við 5.000 kallinn. Kók með mat 1.000. Bjórinn er líka rándýr hér hef ég heyrt!!

 

Klósettin

Nakamura tweetaði um daginn að klósett-aðstaðan á skákstað væri óviðunandi og "absolutely disgusting". Hann hafði að einhverju leiti eitthvað til síns mál því þó að um góð ferðaklósett sé að ræða eru þetta samt ferðaklósett og það er ekkert rosalega spennandi að sjá botnfylli af saur úr 3-4 heimsálfum undir manni.

Ferðaklósettin

Norðmennirnir mega þó eiga það að flest hefur verið í mjög góðu standi hér og menn almennt ánægðir með mótshaldið. Varðandi klósettinn bættu þeir í fólkið sem er að þrífa þau og nú er mikið um að þau séu skoluð og hreinsuð og í gær var komin mjög góð lykt inn á þau öll og einhverskonar ilmsölt eða hvað það nú heitir komið fyrir þannig að lyktin inni á þeim er mjög góð.

Árangurinn

 Hingað til má eins og áður sagði segja að staðan hjá liðunum sé eilítið undir væntingum. Ef einstaklingsárangur er skoðaður sést að flestir eru að tefla í kringum stigin sín og flestir í raun að hækka. Hjá karlalðinu eru flestir í smá plús en Gummi í smá mínus sökum klaufaskaps í gær. Hefði sú skák dottið væri árangurinn í raun bara nokkuð góður. Það skilur lítið á milli. 

Hjá kvennaliðinu er það sama sagan, þrjár eru í plús en tvær í mínus. Lenka mun klára vel og verið óheppin ef eitthvað er. Eina sem ég hef verið óánægður með voru 2-3 skákir sem töpuðust of auðveldlega vegna einbeitingaskorts og fljótfærni. Að öðru leiti hafa stelpurnar staðið sig vel og á köflum verið að gera mjög fína hluti.

Kosningabaráttan

 Það styttist í kosningarnar sem verða vægast sagt fróðlegar. Verður loksins hægt að losna við spillingarvélina hans Kirsan?

Bæði Kasparov og Kirsan hafa gefið keppendum veglegar gjafir. Allir keppendur eiga bol frá báðum og geta því sýnt stuðning og hefur undirritaður um 80%+ séð fólk í Kasparov bolum. Kasparov er klárlega vilji meirahluta fólks en því miður snýst þetta ekki um það.

Bæði Kirsan og Kasparov gefa daglega út "bulletin" en reyndar byrjaði lið Kasparov á því og Kirsan hermdi fljótlega eftir því. Kosningabarátta Kirsan snýst að mestu um að skíta menn Kasparov út en minna um málefni. Held að flestir séu að fara að skipta yfir í að kjósa Kirstan útaf meintum skandölum varðandi fulltrúa í Afghanistan!

Friðrik Ólafsson skrifaði nýverið stuðningsbréf sem birt var á heimasíðu framboðs Kasparovs. Vonandi hefur skoðun þess mikla heiðursmanns einhver áhrif.

Því miður er raunin þó sú að eins og ég sagði áðan snýst þetta ekki um það sem fólkið vill. Það eru fulltrúarnir sem ráða og í gangi eru allskonar beinar og óbeinar mútur. T.d. var einn úr liði Kirsan sem boraði ógreidd mótsgjöld fyrir einhver Afríkuliðin með beinhörðum peningum (cash money!). Liðin skulda ekki peninga til baka....en augljóslega er gert ráð fyrir að þau séu skuldbundin á einhvern hátt til baka.

Einhver sagði um lið Kirsan eftir að annar hafði sagt..:"they know all the tricks in the book".....þá var svarað "no.....they wrote the book!"

 Atvik í viðureign við Ísrael

 Í gær átti sér stak örlítið leiðindaatvik í viðureigninni við Ísrael. Liðsstjóri Ísrael...sem lítur einhverveginn svona út:

arielsharon

 ....virtist hafa áhyggur af öryggi sigurs í viðureigninni í stöðunni 2-0 fyrir Ísrael. Lenka var að hrifsa til sín frumkvæðið meðan skák Elsu var reyndar lok lok og læs eins og menn segja. Allavega, Lenka var nýbúin að hafna jafntefli þegar hann gengur að borðinu og segir á ensku við sinn liðsmann að hún megi bjóða jafntefli. Þetta var sagt það hátt að það er truflandi og auk þess á tíma andstæðingsins. Í þriðja lagi var þetta gert án þess að kalla til skákdómara sem eru reglurnar.

Eftir þetta fór hann svo á fjórða borð þar sem Elsa sat að tafli og fór að spjalla á hebresku við hana sem endaði með því að hún bauð jafntefli þó líklegast gegn betri vilja. Aftur hefði hann átt að tala á ensku og líka kalla til skákstjóra.

Liðsstjóri þessi hefur áður valdið Íslendingum hugarangri en það var á EM Taflfélaga 2001. Það er því ljóst að hann vissi alveg hvað hann varð að gera og beitti þarna sálfræðihernaði til að gulltryggja sigurinn þó þessi hafi varla verið þörf.

Hann passaði svo að sjálfsögðu að nýta sér að skákdómarinn var óreynd stúlka frá Kenýa og hann passaði auk þessi að leika þennan leik ekki fyrr en ég brá mér frá að fá mér að borða.

Við höfum ritað smá kvörtun til yfirskákstjóra þar sem við tökum fram að þetta sé ekki í anda leiksins en förum að sjáflsögðu ekki fram á neinar refsingar eða neitt slíkt en þó er rétt að benda á svona framkomu!

Sviðssetning

Fyrir flestum er væntanlega augljóst að við Gunnar brugðum á leik hér þegar liðsstjóri Ísrael svaf á vaktinni (að safna kröftum fyrir voðaverk síðar?) og við þóttumst vera að gera slíkt hið sama....."Vakið yfir liðunum" ....hinsvegar hefur sýnt sig að örfáir virðast annaðhvort ekki hafa tekist að þróa með sér húmor eða hafa furðulegar hvatir að baki ýmsum fáranlegum fullyrðingum.

10298885_10152628495458291_4066344592399255993_n


Respect

Lítið atvik en mikið hægt að lesa úr því. Kasparov var gangandi um skáksalinn en eins og menn vita þá nýtur hann mikillar virðingar og yfirleitt menn sem beygja sig fyrir honum. Mér fannst það bera vott um mikla virðingu þegar Kasparov gekk að "Mr. Arnasan" með útréttan spaðann og tók þéttingsfast í hönd Jóns L. sem hafði ekki séð Kasparov koma fyrr en útréttur spaðinn var kominn í átt að honum.

 

Segi þetta gott að þessu sinni. Í dag er það Mexíkó í kvennaflokki og Pakistan í karlaflokki. Pakistan komið á óvart með þrjá stigalausa og annað borðið þeirra er með 4 af 6 og taplaus. Við erum vongóð um tvöfaldan sigur í dag.

mbk,

Ingvar Þór Jóhannesson

Liðsstjóri kvennaliðs Íslands og nýbakaður FIDE Trainer

 

p.s. allar skoðanir og skot í pistlinum eru mínar. Þeim sem líkar það ekki er sem fyrr bent á að troða sokk í holu eða gat að eigin vali.

 


Ólympíumótið í Tromsö - Fyrstu umferðir

Undirritaður var spenntari við brottför til Tromsö aðfararnótt föstudagsins heldur en 21 árs stelpa í H&M með platinum kreditkort. Stefnan semsagt á Ólympíumótið í skák og verður að viðurkennast að það hefur alltaf verið draumur að komast á þetta mót. Það eru allir sammála um að þetta er toppurinn, hér mæta bestu skákmenn heims í slagtogi við skákmenn af öllum getustigum frá löndum sem sumir hafa ekki einu sinni heyrt um!

Ferðalagið til Tromsö gekk nokkuð snuðrulaust fyrir sig og þurftu nokkrir flughræddir liðsmenn ekki að sprauta sig með hestadeyfilyfinu sem var tiltækt. Flugin voru reyndar tvö þar sem Tromsö er í töluverðri fjarlægð frá Osló og þaðan þurfi að taka um 2ja tíma flug einnig. Biðin á milli var um 1,5 tími en allt gekk vel og án áfalla.

Þegar komið var til Tromsö var tekið vel á móti okkur og fyrstu vísbendingar um nokkuð gott skipulag mótsins. Á flugvellinum biðu sjálfboðaliðar til að taka við liðsmönnum þess lands sem þeim hafði verið úthlutað og tók hin fagra snót Lin við okkur og fylgdi okkur út í rútu og gaf okkur góðar leiðbeiningar um hvert skyldi fara, hvar borða o.s.frv.

Ekki er hægt að fara lengra án þess að minnast á 5-aur ferðinnar (so far) en hann kom í rútunni og Tinna Kristín átti heiðurinn af honum!

 


 Allt gekk þetta mjög hratt og þegar komið var á hótelið fengum við herbergin nánast á nóinu og hægt var að kíkja umsvifalaust á Radisson Blu hótelið þar sem liðin voru staðfest og við fengum afhent auðkenniskortin okkar auk gjafapoka þar sem ýmislegt var að finna svosem forláta vatnsflösku (munaðarvara víðsvegar í heiminum!), kort af bænum, gríðarlega glæsilegan mótsbækling/blað og forláta nælu mótsins.

 

20140803_203148.jpg

 

Hlaðborð var tekið fyrsta kvöldið áður en setningarathöfnin fór fram og maturinn lofar mjög góðu og ljóst að undirritaður mun svoleiðis úða í sig laxi alla helgina en hann er gríðarlega gómsætur hjá þeim norsku. Eini gallinn við matinn er eins og annarsstaðar hið stórkostlega verðlag en reiða þarf fram rétt tæpar eitt þúsund krónur til að fá sér Pepsi flösku með matnum!!

Hjörvar og Ingvar á leið á setningu Margir í hópnum fóru svo á setningarathöfn mótsins en hún var vel heppnuð og að mörgu leiti skemmtilegri en margir þorðu að vona. Auðvitað er alltaf þvingað að koma með klisjukennd þjóðleg atriði en aldrei er hægt að segja að manni hafi leiðst. Annars gat tónlist spiluð af Hekla Stålstrenger náttúrulega aldrei klikkað!

Setningarathöfnin var öll sýnd í norska sjónvarpinu og meira að segja endurtekin síðar um kvöldið. Mótinu er gerð gríðarlega góð skil í norskum fjölmiðlum og engu um það logið að Norðmenn eru gríðarlega spenntir fyrir mótinu og algjör skáksprengja að eiga sér stað hér í Noregi.

Jens Hjorth borgarstjóri sá að mestu um setningarathöfnina en ásamt tónlistaratriðum kom norska liðið upp á sviðið þar sem mest var talað við Magnus Carlsen en einnig tók Kjetil Lie að sé að "jinxa" all hressilega skák sína sem fram fór daginn eftir. Einnig flutti Kirsan ávarp ehn það verður að teljast hinn furðulegasti fýr og óskiljanlegt hvað hann hefur hangið lengi við völd. Vonandi nær Kasparov að skáka honum í kosningunum....talandi um það. Bærinn er nánast undirlagðu af auglýsingaspjöldum, skiltum og fánum þar sem framboð Kasparovs er auglýst. Það er greinilega öllu tjaldað til!

 

Magnus Carlsen á sviðinu
 
Einnig voru á opnunarhátíðinni öll liðin lesin upp og keppendur/forráðamenn þess lands beðnir um að standa upp og fagna. Við Hjörvar sátum saman tvær öðrum megin í salnum  Ég tók nú eitthvað af þessu upp á myndband þó gæðin séu ekkert til að hrópa húrra fyrir:
 

 
Þegar við Hjörvar vorum að labba út af setningarathöfninni horfði einn keppenda á mig af forvitni og kom svo og spurði hvort ég væri Ingvar Johannesson! Sá var frá Saudi-Arabíu og ber nafnið Hassan Al Mutairi. Hann sagðist mikill aðdáandi myndbanda undirritaðs á netinu og eftir að hafa kynnt sig fyrir mér hvíslaði vinur hans að honum "Zibbit??".  Tóku þeir svo báðir "selfie" með skák-celebinu sjálfu :-)  Helvíti gaman að þessu og ekki eitthvað sem ég átti von á frá Saudi-Arabíu! Mutairi sagðist einmitt tefla London systemið út af myndböndum undiritaðs á netinu og að sjálfsögðu var það mætt á borðið þegar ég labbaði framhjá Saudunumí fyrstu umferð daginn eftir!
 
Þegar á hótelið var komið tók við stutt skoðunarferð hjá undirrituðum þar sem m.a. var rekist á eftirfarandi:
 
20140801_213104.jpg

 

Búð fyrir dónakalla...fyrir þá sem ekki vita hvað dónakall er þá bendi ég á eftirfarandi myndband til skýringar:

 Liðsmenn Tanzaníu að tefla á útitaflinu. Það mátti eitthvað bæta tæknina i hróksendataflinu en innlifunin og einbeitingin var gríðarlega einlæg!

 

20140801_214532.jpg

 


 Búinn að finna hárgreiðslustofu hárgreiðslustofanna hér í Tromsö!

20140801_215627.jpg


 Í fyrstu umferð á laugardeginum áttu bæði lið nokkuð náðugan dag. Við í kvennaliðinu áttum "rematch" frá því í Istanbul gegn Namibíu en þær voru með tvæ í liðinu sem voru einnig síðast. Þær eru ennþá allar stigalausar og töpuðu allar mjög auðveldlega nema fyrsta borðið sem náði að láta Hallgerði aðeins hafa fyrir hlutunum á fyrsta borði þó úrslitin hafi alltaf verið nokkuð ljós. Ótrúlegt reyndar að fá sömu pörun tvö mót í röð og í bæði skiptin klúðrast beina útsendingin þannig að nöfnin víxluðust!

Karlaliðið átti einnig góðan og slysalausan dag gegn Eþíópíu og því tveir 4-0 sigrar í hús.

 

20140802_130952.jpg

 

Þar sem fyrsta umferðin var frekar náðug notaði undirritaður tímann til að skoða sig vel um í salnum. Virkilega gaman að sjá öll þessi þjóðlönd samankomin og fólk frá löndum sem maður mun aldrei heimsækja og því alveg hreint mögnuð lifsreynsla. Ekki skemmir fyrir að geta labbað um skáksalinn og séð kunnugleg andlit nánast allsstaðar. Á staðnum eru skákdómararnir Don Robert Lagerman, Steinþór Baldursson, Ingibjörg Edda Birgisdóttir, Guðmundur Sverrir Þór og Omar Salama.

Sem fyrr rekst maður á kunnuleg andlit út um allt og ekki laust við að það sé kominn verkur í "spaðann" af öllum handaböndunum. Meistarar eins og Predrag Nikolic, Ivan Sokolov, Lorin D'Costa, Robin Van Kampen, Eric Hansen, Kveinys, Doggers, Fiona...semagt endalaust af Íslandsvinum enda ekki liítið af fólki sem hefur komið á Reykjavik Open og fleiri mót í gegnum tíðina.

Í annarri umferð sem fram fór í dag (þegar þessi orð eru rituð) gátum við Jón L minna fylgst með liðinu þar sem við erum á svokölluðu FIDE Trainer námskeiði en slíkt er skylda. Líkt og í öðrum íþróttagreinum er ekki lengur leyfilegt að vera þjálfari nema hafa tilskilin réttindi. Meðan því er komið í gagnið er boðið upp á námskeið meðan á mótinu stendur til að ganga frá því.

Námskeiðið verður einnig næstu þrjá daga og því eitthvað minna sem hægt verður að fylgjast með liðunum. Við Jón vorum þó með tölvu og gátum fylgast með gengi okkar fólks í beinni útsendingu á netinu. Við fengum fínar kennslubækur (ekki hægt að kaupa neinsstaðar) og þeir sem þekkja mig vita að mér leiðast ekkert bækurnar!

 

20140804_010239.jpg

 

Jæja...klukkan orðin margt hér og svosem litlu við þetta að bæta.....en ég ætla nú samt að gera það. Við semsagt töpuðum í dag í kvennaliðinu 3,5-0,5 og mótið að byrja nánast nákvæmlega eins og ÓL 2012 í Istanbul. Við fáum einnig svipaðan andstæing og þá nú í 3. umferð og vonandi verði úrslitin svipuð en við unnum 3-1 gegn Wales 2012. Við fáum lið IPCA sem er lið fatlaðra skákmanna "héðan og þaðan"

Of snemmt er að dæma um formið á liðinu en heilt yfir hefur taflmennskan verið nokkuð góð og kannski hægt að lesa aðeins meira í hvað stelpurnar ætla sér í næstu 2-3 umferðum.

Karlaliðið vann góðan sigur á Írlandi sem er líklegast með sitt sterkasta lið frá upphafi. Á morgun eru það sterkir Serbar.  Jón Loftur er með nokkuð þægilegt vandamál að þurfa að velja á milli manna sem allir hafa byrjað nokkuð vel og mórallinn í liðinu flottur.

Framboð Kasparovs gaf í dag (og á morgun) nokkuð veglega gjöf til allra keppenda en allir keppendur fá bók eftir Kasparov og bol með "The Boss" framaná.

20140804_010329.jpg

 
Jæja....gamli ætlaði í háttinn en verð að ljúka þessu með því að minnast á fótboltann. Ipatov minntist á það við mig og Hjörvar að spilaður hafi verið fótbolti hér á hverju kvöldi af skákmönnum (margir komu nokkrum dögum á undan okkur). Við höfum síðustu tvö kvöld slegist í hópinn og tekið þátt í bolta. Í honum hafa verið margir sterkir skákmenn eins og Carlsen, Vachier-Lagrave, Salgado Lopez, Cheaprinov og auðtivað Alexander "Beefcake" Ipatov.

 

Á leið í bolta með MVL og fleirum

 

 

Laumumydataka af MC

 


 Lofa ekki alveg þessari lengd á öllum pistlum en reyni að skrifa þegar tími gefst en hann er því miður alltof lítill ;-)

 Góðar stundir,

 Ingvar Þór Jóhannesson

P.S. Allar skoðanir og einkahúmor endurspegla ekki á nokkurn hátt ritstjórastefnu Skak.is og þeir sem hafa kvartanir geta sent þær til gleymdu@hugmyndinni.is


Pistill Braga um Copenhagen Chess Challange

Bragi ÞorfinnssonDagana 14.-18. maí s.l. tefldi ég á alþjóðlegu skákmóti í Danmörku. Mótið bar nafnið Copenhagen Chess Challenge og fór fram í húsakynnum BMS SKAK skákklúbbsins í Ballerup, sem er skammt frá Kaupmannahöfn. Ég hef heimsótt marga áhugaverða staði á lífsleiðinni, en Ballerup er ekki einn af þeim. Það var vægast sagt lítið um að vera og fáir á ferli á götunum. Öllum veitingastöðum var til að mynda snarlega lokað kl. 10 á kvöldin, og hvergi bita að fá eftir það nema í 7-Eleven sjoppunum góðu.

Það var svolítið annað fyrirkomulag á þessu móti en venjan er. Tefldar voru hefðbundnar níu umferðir en dagskráin var mjög stíf, því að mótið tók aðeins fimm daga. Fyrsta umferðin fór fram 14. maí, en síðan voru tefldar tvær umferðir daglega þar til mótinu lauk 18. maí. Óhætt er að fullyrða að strembin dagskrá mótsins hafi bitnað eitthvað á gæðum taflmennskunnar. Í það minnsta litu mörg óvænt úrslit dagsins ljós. En víkjum þá að gengi mínu í mótinu. Ég hóf mótið með tveimur nokkuð öruggum sigrum gegn stigalægri andstæðingum. Í þriðju umferð tapaði ég í slakri skák (góðri af hálfu andstæðingsins!) gegn ungum dönskum skákmanni af amerískum uppruna. Eftir það átti ég nokkuð erfitt uppdráttar í mótinu og gerði jafntefli við nokkra stigalægri andstæðinga. Þeir voru flestir sýnd veiði en ekki gefin, s.s. eins og finnska goðsögnin Heikki Westerinen, sem alltaf getur verið skeinuhættur. Sum þessara jafntefla voru líka nokkuð ævintýraleg, m.a. ein skák sem ég tefldi í 6. umferð þar sem ég vakti tvisvar upp drottningu, fyrst á b8, og síðan seinna á d8. Þá skák skýri ég hér rétt á eftir.  Ég lauk mótinu með 5,5 v. af 9, tapaði 12 stigum og mikið meira er ekki um þetta ágæta mót að segja. Skandínavarnir eiga þó mikið hrós skilið, fyrir að vera ötulir við að halda skákmót af margvíslegum toga, sem hafa skilað sér í ótal áföngum, og loks GM-titlum fyrir þeirra menn. Þeir eru með þessar nauðsynlegu aðstæður til að menn geti byggt upp farsælan skákferil. Tækifærin til taflmennsku á ákveðnu ,leveli‘ eru stöðugt til staðar, beint fyrir framan nefið á mönnum. Eina sem menn þurfa að gera er að tefla, tefla og tefla meira.  Það er næsta víst að maður taki þátt á svipuðum mótum og Copenhagen Chess Challenge hjá frændum vorum í nánustu framtíð. Þá er vonandi að stríðsgæfan verði mér hliðhollari.

Bragi Þorfinnsson


Næsta síða »

Síðan

Skák.is
Skák.is

Skák.is, skákfréttavefur Íslands. Gunnar Björnsson er ritsjóri vefsins.

 

RSS-straumar

Erlendar vefsíður

Helstu erlendu fréttasíðurnar

Chessdom

  • Augnablik... Augnablik - sæki gögn...

Chess24

  • Augnablik... Augnablik - sæki gögn...

FIDE

  • Augnablik... Augnablik - sæki gögn...

Heimsóknir

Flettingar

  • Í dag (19.3.): 26
  • Sl. sólarhring: 63
  • Sl. viku: 340
  • Frá upphafi: 8763730

Annað

  • Innlit í dag: 22
  • Innlit sl. viku: 172
  • Gestir í dag: 21
  • IP-tölur í dag: 10

Uppfært á 3 mín. fresti.
Skýringar

Innskráning

Ath. Vinsamlegast kveikið á Javascript til að hefja innskráningu.

Hafðu samband