Skákþáttur Morgunblaðsins: Jólaskákþrautir

Eins og stundum áður um jólin leggur skákpistlahöfundur blaðsins nokkrar skákþrautir fyrir lesendur sína, en lausnir munu birtast í blaðinu á gamlársdag. Þrautirnar eru fengnar úr efnivið sem enski stórmeistarinn og stærðfræðingurinn John Nunn hefur tekið saman og birt opinberlega. Varla hefur nokkur núlifandi skákmeistari ritað jafn mikið um skákþrautir og Nunn. Hann var um langt skeið einn fremsti skákmaður Englendinga og hefur þrisvar sigrað á heimsmeistaramótinu í skákdæmalausnum. Í þeim keppnum fá þátttakendur sex klukkustundir til að leysa geysilega erfið dæmi af margvíslegum toga. Þótt Íslendingar hafi eignast nokkra skákdæmahöfunda hefur enginn Íslendingur tekið þátt í alþjóðlegum mótum á þessum vettvangi.

 

 

Karjakin heimsmeistari - í hraðskák - Anna Muzychuk heimsmeistari kvenna

Sergei Karjakin varð í gær heimsmeistari í hraðskák eftir hörkukeppni við Magnus Carlsen. Þeir félagarnir komu jafnir í mark með 16,5 vinninga í 21 skák. Karjakin fékk heimsmeistaratitilinn eftir stigaútreikning. Sæt hefnd fyrir áskorandann sem lét ljós sitt skína á Twitter eftir mótið.

Not this time, Mr.Carlsen😎! pic.twitter.com/YTKpba3HRt

— Sergey Karjakin (@SergeyKaryakin) December 30, 2016

Carlsen var efstur fyrir lokaumferðina en það var enginn annar en Peter Leko sem gerði jafntefli við heimsmeistarann. Karjakin vann á sama tíma Baadur Jobava og náði þar sem Carlsen að vinningum og þar með titilinn.

Daniil Budov, Nakamura og Grischuk urðu í 3.-5. sæti með 14,5 vinninga. Valentina Gunina varð önnur og Kateryna Lagno þriðja.

Anna Muzychuk (2645) átti sviðið í kvennaflokknum en hann varð bæti heimsmeistari kvenna í at- og hraðskák. Hraðskákina vann hún með 13 vinningum í 17 skákum.

Ítarlega umfjöllun um mótið má finna á Chess.com.

 

• Heimasíða mótsins
• Beinar útsendingar
• Chess-Results

 

Páll Agnar sigurvegari á Jólahraðskákmóti TR

Í sannkölluðu hátíðarskapi lögðu tæplega 50 manns leið sína í Faxafenið í fyrrakvöld til að leiða saman hesta sína í Jólahraðskákmóti TR og að öllum líkindum er um að ræða fjölmennasta jólamótið í áraraðir. Tefldar voru níu umferðir með tímamörkunum 4 +2 en nokkur umræða hefur verið í gangi um hvaða tímamörk skuli almennt stuðst við í hraðskákmótum félaganna. Þykir mörgum hin opinberu Fide-tímamörk 3 +2 nokkuð knöpp þó öðrum finnist þau reyndar ósköp notaleg og vilja þá jafnvel hinn alræmda Fischer viðbótartíma burt. Líkast til er þó meirihluti skákmanna á því að viðbótartíminn sé af hinu góða og að gæði skákanna aukist. Útlit er fyrir að 4 +2 verði að mestu leyti ofan á í almennu mótahaldi hérlendis en þó má hafa í huga að lengri tímamörk þýða almennt færri umferðir.

En víkjum þá að gangi mála. Eftir örlitla tæknihnökra þar sem viðstaddir fengu aukið ráðrúm til að gæða sér á jólakræsingum (malt og appelsín er greinilega afar vinsæll drykkur hjá landanum) var parað í fyrstu umferð og ballið hófst. Töluvert var um óvænt úrslit fyrst um sinn og strax í fyrstu umferð sigraði Aron Þór Mai (1686) Fide-meistarann Davíð Kjartansson (2329) á fyrsta borði. Á öðru borði gerði Kristófer Ómarsson (1659) slíkt hið sama gegn Fide-meistaranum Don Roberto Lagerman (2250) og það með svörtu! Harla óvenjulegt að sjá slík úrslit á tveimur efstu borðunum í móti sem þessu.

Áfram gerðust óvæntir hlutir í annari umferð því á þremur efstu borðunum sigraði stigalægri keppandinn þann stigahærri; Arnaldur Loftsson (1927) vann Omar Salama (2234), Dawid Kolka (1903) lagði Pál Agnar Þórarinsson (2161) og Helgi Brynjarsson (1925) hafði betur gegn Þorvarði F. Ólafssyni (2140). Þegar á leið virtust þó hinir stigahæstu hrökkva í gírinn og um miðbik móts fór kunnugleg staða að sjást í toppbaráttunni. Að sex umferðum loknum leiddi hinn dularfulli og eitilharði Stefán Bergsson (2104) með fullu húsi vinninga sem verður að teljast ansi gott.

Síðustu þrjár umferðirnar skáru hinsvegar endanlega úr um lokaröð keppenda og eins og svo oft réðust úrslit ekki fyrr en í níundu og síðustu umferð. Svo fór að Páll Agnar kom á fljúgandi siglingu eftir tapið í annari umferð og gerði aðeins eitt jafntefli eftir það en vann allar aðrar viðureignir. Sigur gegn Omari í lokin tryggði honum efsta sætið með 7,5 vinning. Omar, Don Roberto og stórmeistari kvenna Lenka Ptacnikova (2031) komu næst með 7 vinninga en þeir tveir fyrrnefndu hlutu silfur og brons eftir stigaútreikning. Vel að verki staðið hjá Páli sem býr erlendis og sést því ekki mikið á mótum hérlendis. Omar og Don Roberto þarf ekki að kynna fyrir neinum enda þekktar hraðskákvélar.

Mótið verður reiknað til alþjóðlegra hraðskákstiga og eins og gengur hækka sumir meira en aðrir á meðan aðrir lækka meira en hinir. Vert er að benda á góðan árangur hins unga Stephan Briem (1479) sem lauk keppni í 5. sæti með 6,5 vinning og stigahækkun upp á 82 Elo-stig. Sannarlega áhugasamur og eljusamur Kópavogspiltur þar á ferð.

Við í Taflfélagi Reykjavíkur þökkum öllum fyrir þátttökuna og óskum skákiðkendum nær og fjær gleðilegs nýs skákárs. Hlökkum til að hitta ykkur á nýju ári!

Myndskreytta frásögn má finna á heimasíðu TR.

• Chess-Results

Guðmundur vann í þriðju umferð - efstur með fullt hús

Alþjóðlegi meistarinn Guðmundur Kjartansson (2468) vann enska FIDE-meistarann Ravi Haria (2382) í þriðju umferð alþjóðlega mótsins í Hastings í gær. Guðmundur er einn efstur með fullt hús. Fjórða umferð fer fram í dag og þá teflir Gummi við danska stórmeistarann Allan Stig Rasmussen(2502).

Umferð dagsins hefst kl. 14:15. 

Alls taka 97 skákmenn þátt í efsta flokknum og þar af eru 11 stórmeistarar.

• Heimasíða mótsins
• Chess-Results
• Beinar útsendingar - hefjast kl. 14:15.

Jólamót Riddarans - óvæntir jólagestir sigruðu

Það ríkti sannur Jóla- og keppnisandi þegar Riddarar reitaða borðsins elduðu sitt gráa silfur á Jólamótinu í Vonarhöfn í gær. Velskipað mót þar sem það gustaði vel af og um menn jafnt úti sem inni enda stormasamt veður í lofti og skákir á borði. 

Hinn hugumprúði piltur að norðan HARALDUR HARALDSSON kom eins og hvítur stormsveipur inn úr hríðinni og vann orrahríðina á skákborðinu eftir dágóðan barning bæði við menn og klukkur. Var einkar vel að sigri sínum kominn enda gamalreyndur kappskákmaður úr TR nú SA. Sama má segja um hinn tiginmannlega forystumann Hugins JÓN ÞORVALDSSON sem varð að láta sér linda annað sætið. Góðir gestir þar á ferð.

Heimamennirnir FRIÐGEIR K. HÓLM og hinn aldni höfðingi GUNNAR KR. GUNNARSSON báðir haldnir sterkum og einbeittum sigurvilja urðu að sætta sig við 3.- 4. sætið að þessu sinni. Annars var mótið nokkuð jafnt og allir höfðu eitthvað upp úr krafsinu og engin fór tómhentur heim því allir voru leystir út með smá jólaglaðningi handa sér og sínum, sumir sem sigurlaun en aðrir sem sárabót. 

Sigurvegari varpaði fram þessum kviðlingi að móti loknu út af samlíkingu við hvíta stormsveipinn um leið að hann kvaðst vera orðinn Riddari inn við beinið en ekki Hrókur. 

 "Norðan harðan gerði garð

 - gamni þarf að sinna.

 Hart ég barðist - víst ég varð

 Vini mína að vinna."

HH.

 

Gleðilegt nýtt skákár!

ESE erkiriddari

Vignir vann alþjóðlegan meistara í Stokkhólmi

FIDE-meistarinn Vignir Vatnar Stefánsson (2404) vann þýska alþjóðlega meistarann Dietmar Kolbus (2299) í 3. umferð Rilton-mótsins í gær. Vignir hefur 2 vinninga eftir þessa góðu byrjun á mótinu. 

Í fjórðu umferð sem fram fer í dag teflir Vignir við eistneska stórmeistarann Kaido Kulaots (2556). Umferðin hefst kl. 14. 

Alls taka 105 skákmenn þátt í efsta flokknum og þar af eru 24 stórmeistarar. Mótið er teflt 27. desember - 5. janúar.

• Heimasíða mótsins
• Chess-Results
• Beinar útsendingar (Chess24) hefjast kl. 14

Guðmundur vann Thybo í Hastings

Alþjóðlegi meistarinn Guðmundur Kjartansson (2468) vann danska FIDE-meistarann Jesper Sondergaard Thybo (2352) í 2. umferð alþjóðlega mótsins í Hastings sem fram fór í gær. Guðmundur er einn níu keppenda sem hefur fullt hús. 

Í þriðju umferð sem fram fer í dag teflir Gummi við enska FIDE-meistarann Ravi Haria (2382). Umferðin hefst kl. 14:15. 

Alls taka 97 skákmenn þátt í efsta flokknum og þar af eru 11 stórmeistarar.

• Heimasíða mótsins
• Chess-Results
• Beinar útsendingar - hefjast kl. 14:15.

Karjakin og Carlsen efstir á HM í hraðskák

Heimsmeistaramótið í hraðskák hófst í gær í Doha í Katar. Þegar tólf umferðum af 21 er lokið eru engir aðrir en Sergei Karjakin (2800) og Magnus Carlsen (2873) efstir með 10 vinninga . Þeir kumpánar hafa 1,5 vinninga á næstu menn. Í innbyrðisskák félaganna frá New York-einvíginu vann Karjakin sigur að þessu sinni.  Karjakin er taplaus á mótinu en hefur gert fjögur jafntefli.

Mótinu er framhaldið kl. 12 í dag með níu síðustu umferðunum. 

Nánar um gang mála í gær má lesa á Chess.com.

 

 

• Heimasíða mótsins
• Beinar útsendingar
• Chess-Results

 

Óvæntur sigur brekkusnigla

Í gærkvöldi fór fram hin árlega hverfakeppni Skákfélags Akureyrar. Tvö 10 manna lið mættu til keppni. Í öðru voru brekkusniglar og nágrannar en í hinu voru þorparar og eyrarpúkar. Keppendur voru á öllum aldri og báðum kynjum.

Fyrst var keppt í 15 mín skákum og eins og vænta mátti lögðu þorparar brekkusnigla nokkuð örugglega með 5,5 vinningi gegn 4,5 vinningum, enda eru þeir betri í atskákunum.

Síðan fór fram bændaglíma í hraðskák. Allir keppendur í hvoru liði öttu kappi við alla keppendur hins liðsins. Eins og vænta mátti var hart barist og flestar umferðirnar voru nokkuð jafnar. Svo fór að lokuð að brekkusniglarnir unnu nauman og óvæntan sigur. Þeir hlutu samtals 60 vinninga gegn 40.

Bestum árangri brekkusnigla náði Jón Kristinn Þorgeirsson. Sýndi hann af sér mikla ósvífni og lagði alla andstæðinga sína og hlaut 10 vinninga. Litlu ósvífnari voru þeir Rúnar Sigurpálsson og Andri Freyr Björgvinsson. Þeir fengu 9,5 vinninga.
Bestum árangri þorpara náði Smári Ólafsson. Hann hlaut 7 vinninga.

Nánar á vefsíðu SA.

Jón Kristinn jólaskákmeistari SA

Ungir sem aldnir fjölmenntu á Jólahraðskákmót Skákfélags Akureyrar sem fór fram 22. desember. Alls voru það 16 sem létu sjá sig að þessu sinni og er það með betra móti. Sigurvegari mótsins að þessu sinni var Jón Kristinn og þarf það ekki að koma mörgum á óvart. Baráttan var hinsvegar harðari um næstu sæti á eftir honum. Það fór svo að Elsa lauk keppni í 2. sæti og Sigurður Arnarson í því þriðja.  

• 1. Jón Krsitinn Þorgeirsson   14/15
• 2. Elsa María Kristínardóttir 12,5
• 3. Sigurður Arnarson          11,5
• 4-5. Andri Freyr Björgvinsson 10,5
• 4-5. Tómas Veigar Sigurðarson 10,5
• 6. Ingimar Jónsson            10
• 7-8. Haraldur Haraldsson      9,5
• 7-8. Sigurður Eiríksson       9,5
• 9-10. Smári Ólafsson          8
• 9-10. Karl Steingrímsson      8
• 11. Haki Jóhannesson          5
• 12.Heiðar Ólafsson            4,5
• 13. Ágúst Ívar Árnason        3
• 14. Alexander Arnar Þórisson  2
• 15. Hilmir Vilhjálmsson       1
• 16. Alexía                    0,5