Skemmtileg glíma við Austurvöll: Krakkarnir skelltu skáksveit Alþingis

Úrvalslið Skákakademíu Reykjavíkur lagði harðsnúna sveit Alþingis í einvígi í dag. Fimm skipuðu hvort lið og fyrir Alþingi tefldu Guðfríður Lilja Grétarsdóttir, Guðlaugur Þór Þórðarson, Vigdís Hauksdóttir, Helgi Hjörvar og Halldór Blöndal. Halldór, sem er fv. forseti Alþingis, er formaður í skákfélagi núverandi og fyrrverandi þingmanna.

Tefldar voru tvær umferðir. Úrvalslið krakkanna sigraði í fyrri umferð með 3 vinningum gegn tveimur. Guðlaugur Þór sigraði í viðureign sinni við Doniku Kolica, Hilmir Freyr Heimisson og Halldór Blöndal gerðu jafntefli í hörkuskák, sömuleiðis Nansý Davíðsdóttir og Guðfríður Lilja.

Í seinni umferðinni settu krakkarnir í fluggír, og sigruðu með 4,5 vinningi gegn hálfum. Halldór bjargaði eina jafntefli sveitarinnar, gegn Hilmi Frey, en Nansý, Óliver Aron Jóhannesson, Vignir Vatnar Stefánsson og Felix Steinþórsson sigruðu. Lokaúrslit urðu því öruggur sigur krakkanna, sem fengu 7,5 vinning gegn 2,5 vinningi þingmanna.

Við upphaf þessa skemmtilega viðburðar færði Skákakademían forseta Alþingis, Ástu Ragnheiði Jóhannesdóttur, taflsett til afnota fyrir þingmenn.

Stefán Bergsson framkvæmdastjóri SR sagði af því tilefni að rík skákhefð væri á Alþingi og þakkaði velvilja í garð skákíþróttarinnar að fornu og nýju.

Donika Kolica afhenti Ástu Ragnheiði gjöfina, og kvaðst forseti Alþingis vona að taflsettið yrði notað sem mest, og að þingmenn hefðu margt af skákkrökkunum að læra.

Myndaalbúm (HJ)

Krakkarnir sigruðu Kálhausana í spennandi viðureign

Skákklúbbur sem ber nafnið Kálhausarnir virðist auðveld bráð, en því var ekki að heilsa þegar Úrvalslið SR kom í heimsókn í höfuðstöðvar Sölufélags garðyrkjumanna. Kálhausarnir hafa innan sinna raða grjótharða skákáhugamenn, sem jafnvel hafa teflt á alþjóðlegum mótum í útlöndum.

Guðlaugur Gauti Þorgilsson rekstrarstjóri Bónus fór fyrir sveitinni, og hann hlaut 2,5 vinning af 3 í viðureignum sínum. Aðrir liðsmenn Kálhausanna að þessu sinni voru Örvar Karlsson sölu- og markaðsstjóri hjá Banönum, feðgarnir Gunnlaugur Karlsson og Mikael Luis Gunnlaugsson, og loks Hrafn Jökulsson sem tefldi sem gestakálhaus.

Gunnlaugur, sem er framkvæmdastjóri Sölufélags garðyrkjumanna, tók höfðinglega á móti krökkunum og bauð uppá gómsætt grænmeti og ljúffenga osta og brauð sem krakkarnir kunnu vel að meta.

Úrvalssveitin vann stórsigur í 1. umferð, 4-1, en í annarri umferð bitu Kálhausar í skjaldarrendur og unnu 3-2. Lokaumferðin var æsispennandi og lauk með jafntefli, 2,5-2,5.

Lokatölur voru því 8,5 vinningur Úrvalsliðsins gegn 6,5 vinningi Kálhausanna

Úrvalssveitina skipuðu að þessu sinni Dagur Kjartansson, Donika Kolica, Hilmir Freyr Heimisson, Vignir Vatnar Stefánsson, Nansý Davíðsdóttir, Dagur Ragnarsson og Oliver Aron Jóhannesson.

Kálhausarnir voru glaðbeittir í lokin og tilkynntu að þeir ætli innan tíðar að skora á Úrvalsliðið í aðra viðureign.

 

Krakkarnir skelltu skáksveit Morgunblaðsins: Skemmtileg heimsókn í Hádegismóa

Vel var tekið á móti Úrvalsliði Skákakademíunnar á Morgunblaðinu í hádeginu á fimmtudag, enda mikil skákhefð þar á bæ. 

Helgi Áss Grétarsson sér um daglegar skákþrautir og Helgi Ólafsson skrifar vikulega pistla í Moggann, sem þar að auki fylgist mjög vel með skáklífinu, jafnt innan lands sem utan.

Morgunblaðið tefldi fram 10 manna sveit, og voru margir kunnir kappar í þeim hópi. Úrvalsliðið sýndi hinsvegar mátt sinn, og sigraði með nokkrum yfirburðum.

Tefldar voru tvær umferðir með 10 mínútna umhugsunartíma. Í fyrri umferðinni fór Akademían með sigur af hólmi, hlaut 8 vinninga gegn 2. Sú seinni endaði líka með sigri krakkanna, sem fengu 7,5 vinning gegn 2,5.

Stefán Bergsson, sem velur Úrvalsliðið hverju sinni, kallaði til marga efnilegustu krakka landsins í einvígið við Morgunblaðið. Í liðinu voru Dagur Ragnarsson, Oliver Aron Jóhannesson, Dagur Kjartansson, Nansý Davíðsdóttir, Felix Steinþórsson, Hilmir Freyr Heimisson, Vignir Vatnar Stefánsson og Donika Kolica. Vegna mikils áhuga Morgunblaðsmanna tefldu Stefán Bergsson og Hrafn Jökulsson einnig fyrir hönd Skákakademíunnar.

Fyrir Morgunblaðið tefldu Jón Árni Jónsson, Pétur Atli Lárusson, Jon Olav Fivelstad, Viðar Guðjónsson, Elín Esther Magnúsdóttir, Ómar Óskarsson, Baldur A. Kristinsson, Kjartan G. Kjartansson og Pétur Blöndal.

Morgunblaðsmenn tóku ósigrinum með brosi á vör, og skoruðu jafnframt á Úrvalsliðið í annað einvígi á næstunni. Og þá er aldrei að vita nema stórveldið í Hádegismóum kalli til stórmeistarana tvo, sem skrifa að staðaldri í blaðið!

Myndaalbúm (HJ)

Krakkarnir skora á fyrirtæki og stofnanir: Teflt á Alþingi í dag

Úrvalssveit Skákakademíu Reykjavíkur mun á næstu dögum og vikum heimsækja fyrirtæki, stofnanir og félagasamtök, tefla einvígi við starfsfólk, jafnframt því sem starf SR er kynnt. Sunnudaginn 10. júní verður Uppskeruhátíð Skákakademíunnar 2012 haldin í Ráðhúsinu, og þar munu krakkarnir skora almenning á hólm.

Í dag, fimmtudag dag, munu krakkarnir tefla við Morgunblaðsmenn í Hádegismóum, en rík skákhefð er á blaðinu. Strax í kjölfarið verður farið í höfuðstöðvar Sölufélags garðyrkjumanna, og teflt við fulltrúa frá Íslensku grænmeti, Banönum og Bónus.

Klukkan 15 á fimmtudag liggur leið skákkrakkanna á Alþingi, þar sem þau munu tefla við skáksveit þingmanna, sem skipuð er Guðfríði Lilju Grétarsdóttur, Guðlaugi Þór Þórðarsyni, Helga Hjörvar og Vigdísi Hauksdóttur.

Friðrik Ólafsson, fyrsti stórmeistari Íslendinga og fv. skrifstofustjóri Alþingis, og Halldór Blöndal fv. forseti Alþingis verða heiðursgestir á einvígi krakkanna og þingmannanna.

FALL ER FARARHEILL

Fyrsta viðureign krakkanna var gegn harðsnúinni sveit Alþýðusambands Íslands. Aðildarfélög ASÍ eru á sjötta tuginn og félagar alls um 100 þúsund, svo ekki vantar mannskap að velja úr! Sveit ASÍ skipuðu Eggert Ísólfsson, Georg Páll Skúlason, Tryggvi Marteinsson og Jón Úlfljótsson, sem allir eru þrautreyndir skákmenn.

Akademían tefldi að þessu sinni fram Hilmi Frey Heimissyni, Nansý Davíðsdóttur, Felix Steinþórssyni og Heimi Páli Ragnarssyni. ASÍ hafði betur og sigraði með 10 vinningum gegn 6. Hilmir Freyr fór á kostum í liði SR og fékk 3,5 vinning af 4 mögulegum.

Vel var tekið á móti krökkunum í höfuðstöðvum ASÍ við Sætún, enda löngum sterk skákmenning innan verkalýðshreyfingarinnar. Krakkarnir hafa þegar skorað á skáksveit ASÍ í aðra viðureign, til að freista þess að jafna metin!

Fyrirtæki, stofnanir eða félög sem vilja fá skákkrakkana í heimsókn eru hvött til að hafa samband við Stefán Bergsson, framkvæmdastjóra Skákakademíunnar í [e-mail].

Myndir frá viðureign ASÍ og úrvalsliðsins (HJ og Snorri Már Skúlason)

Þröstur Íslandsmeistari eftir sigur í mjög æsilegu einvígi - endaði með Armageddon-skák

 

 

Þröstur Þórhallsson vann Braga Þorfinnsson í afar æsilegu úrslitaeinvígi um Íslandsmeistaratitilinn sem lauk í kvöld.    Afar hressilega var teflt og hver skák teflt í botn.  

Þröstur og Bragi komu jafnir í mark á Íslandsmótinu sjálfu sem fram fór í apríl, sem var það sterkasta á þessari öld.  Þeir þurftu því að há fjögurra skáka einvígi um titilinn með hefðbundnum umhugsunartíma.  Því lauk með jafntefli 2-2 á mánudag.  Teflt var til þrautar í kvöld og þar tefldu þeir eins margar skákir og mögulegt var samkvæmt reglum þar um.

Fyrst tefldu þeir 2 atskákir (25 mínútur + 10 sekúndur á leik) og lauk þeim báðum með jafntefli.  Að því loknu var tíminn styttur (10+10).  Þröstur vann fyrri skákina en Bragi jafnaði metin í þeirri síðari.  Þá voru tefldar 2 hraðskákir (5+3).  Bragi vann þá fyrri og en Þröstur jafnaði metin í síðari skákinni. 

Þá var komið að bráðabanaskák (Armageddon).   Þar hefur hvítur 5 mínútur og svartur 4 mínútur.  Svörtum dugar hins vegar jafntefli til sigurs.  Þröstur dró svart og hafði sigur í skákinni og þar með sigur í einvíginu sem endaði samtals 6-5 fyrir Þresti.

Dyggilega var klappað fyrir skákmönnunum fyrir bráðabanaskákina enda var það skoðun fjölmargra áhorfenda að einvígið væri í senn mjög skemmtilegt og einkar vel teflt í ljósi lítins tíma í hverri skák. Einhverjum varð það að orði að hér væri á ferðinni einvígi aldarinnar, þ.e. þeirrar sem nú er!

Þetta er í fyrsta skipti sem Þröstur verður Íslandsmeistari í skák en hann tók fyrst þátt árið 1985.   Titillinn tryggir Þrestir keppnisrétt í landsliði Íslands í Ólympíuskákmótinu sem fram fer í Istanbul í haust og jafnframt keppnisrétt fyrir Íslands hönd á EM einstaklinga sem fram fer í Póllandi í apríl 2013.

Myndaalbúm (HJ og IÞJ)

Anand áfram heimsmeistari í skák - Bragi og Þröstur mætast kl. 16

 

Anand hélt heimsmeistaratitlinum í skák.  Það er ljóst eftir atskákeinvígi hans við Gelfand sem haldið var í dag framhaldi af því að jafnt varð í aðaleinvíginu 6-6.   Anand vann atskákeinvígið 2½-1½ og heldur því heimsmeistaratitlinum.  Einvígið þótt fremur litlaust.  Sjá nánar á heimasíðu mótsins.

Úrslitaeinvígið um Íslandsmeistaratitilinn var miklu mun fjörlegra heldur en heimsmeistaraeinvígið.  Þar urðu úrslitin 2-2.  Þar verður einnig teflt til þrautar á dag með styttum umhugsunartíma.   Fyrst eru tefldar 2 atskákir (25 mínútur + 10 sekúndur á hvern leik).  Verði jafnt þá verða tvær skákir tefldar með styttri umhugsunaríma (10+10).  Verði enn jafnt verða tefldar 2 hraðskákir með enn styttri umhugsunartíma (5+3).   Verði enn jafnt verður tefld bráðabanaskák (armageddon).  Þar hefur hvítur 5 mínutur en svartur 4 mínútur.  Eftir 60 leiki bætast við 3 sekúndur á hvern leik.   Hvítur þarf að sigra en svörtum dugar jafntefli til að tryggja sér sigur.

Lokahluti úrslitaeinvígisins um Íslandsmeistaratitilinn hefst kl. 16 í Stúkunni við Kópavogsvelli.  Tjald verður sett upp á skákstað til að áhorfendur geti fylgst með skákmönnunum og skákinni á sama tíma.  Þeir sem ekki eiga heimangengt á skákstað verða að láta sér duga að fylgjast með lokahlutanum á heimasíðu Íslandsmótsins.

Sigurbjörn Björnsson verður með bóksölu á staðnum þar sem meðal annars verður hægt að kaupa Bobby Fischer Comes eftir Helga Ólafsson og nýjasta tölublað New in Chess þar sem fjallað er um N1 Reykjavíkurskákmótið á 20 blaðsíðu.  

Þrír stórmeistarar skráðir til leiks á Skákhátíð á Ströndum 2012

Að minnsta kosti þrír stórmeistarar munu leika listir sínar á Skákhátíð á Ströndum 2012. Helgi Ólafsson, Djúpavíkurmeistari 2008 og 2009, Jóhann Hjartarson Djúpavíkurmeistari 2010 og Stefán Kristjánsson, yngsti stórmeistari okkar, sem nú kemur á Strandir í fyrsta sinn.

Af öðrum kunnum köppum má nefna Róbert Lagerman, Sævar Bjarnason, Davíð Kjartansson, Stefán Bergsson, Hrannar Jónsson, Magnús Matthíasson, Heimi Páll Ragnarsson, Hilmi Frey, Heimisson, Snorra Bergsson, Ingibjörgu Eddu Birgisdóttur og Gunnar Björnsson.

Þá er von á góðum hópi úr Skákfélagi Vinjar, auk þess sem vonast er til að hinir öflugu skákmenn Akureyrar og nærsveita fjölmenni. Þá tefla Strandamenn að vanda fram öflugum fulltrúum.

Fjölbreytt dagskrá

Hátíðin hefst á Hólmavík föstudaginn 22. júní, þegar Róbert Lagerman skákmeistari teflir fjöltefli við heimamenn. Um kvöldið er svo hið vinsæla tvískákarmót á Hótel Djúpavík.

Laugardaginn 23. júní er komið að stórmóti í samkomuhúsi Trékyllisvíkur: Afmælismóti Róberts Lagerman, en hann verður fimmtugur síðar í sumar. Ljóst er að þar verður hörð barátta um titilinn, og skemmtilegt mót í uppsiglingu.

Sunnudaginn 24. júní verður svo að vanda keppt um titil Norðurfjarðarmeistara í Kaffi Norðurfirði, sem tvímælalaust er með notalegustu kaffihúsum landsins.

Auk taflmennskunnar verður efnt til fótboltaleiks gesta og heimamanna úr UMF Leifi heppna, efnt til brennu í fjörunni, svo nokkuð sé nefnt. Síðast en ekki síst gefst gestum hátíðarinnar kostur á að skoða landsins fegurstu og afskekktustu sveit.

Víða hægt að gista

Margir gistimöguleikar eru í Árnheshreppi og skal sérstaklega vekja athygli á góðu tilboði sem Hótel Djúpavík gerir gestum skákhátíðarinnar.

Hótel Djúpavík gerir gestum Skákhátíðar á Ströndum gott boð: Gisting í 2 nætur í tveggja manna herbergi, tveir kvöldverðir og tveir morgunverðir fyrir 16.000 krónur. Netfang: [e-mail] Sími: 451 4037.

Gistiheimilið í Norðurfirði býður uppá svefnpokapláss eða uppábúin rúm í vistlegum húsakynnum. Netfang: [e-mail] Sími: 554 4089.

Gistiheimilið Bergistanga býður upp á svefnpokapláss fyrir einstaklinga og hópa, með eldunaraðstöðu. Einnig notaleg herbergi með uppábúnum rúmum. Sími: 451 4003

Finnbogastaðaskóli. Svefnpokapláss fyrir einstaklinga og fjölskyldufólk. Mjög góð hreinlætis- og eldunaraðstaða. Fín aðstaða á tjaldstæðum við skólann.

Skákhátíð á Ströndum hefur stofnað Facebook-síðu, en einnig er hægt að skrá sig hjá Hrafni [e-mail] , Róbert í [e-mail] Andreu [e-mail], sem einnig veita frekari upplýsingar um ævintýraferð á Strandir.

Teflt til þrautar um Íslandsmeistara- og heimsmeistaratitil á morgun.

 

 

Það er óvenju mikilvægur dagur á morgun í skákheiminum.  Þá ráðast bæði úrslitin hvor þeirra Anand eða Gelfand verður heimsmeistari í skák sem og hvort Bragi Þorfinnsson eða Þröstur Þórhallsson verður Íslandsmeistari í skák.  Jafnt var í báðum einvíginum og verður teflt til þrautar með styttum umhugsunartíma á morgun bæði í Moskvu og Kópavogi.  

Byrjum á heimsmeistaraeinvíginu í Moskvu.  Þar varð jafnt 6-6 í afar andlausu og litlausu einvígi þar sem meðal leikjafjöldi var aðeins 29 leikir.  Fyrst tefla þeir 4 atskákir á morgun.  Verði jafnt að þeim loknum tefla þeir 2ja skáka hraðskákeinvígi þar til úrslitin ráðast.  Sé enn jafnt eftir 5 hraðskákeinvígi (10 hraðskákir) verður tefld bráðabanaskák (armageddon).  Taflmennskan í heimsmeistaraeinvíginu byrjar kl. 8 í fyrramálið.  Best er að fylgjast með því á heimasíðu mótsins og Chessbomb.

Úrslitaeinvígið um Íslandsmeistaratitilinn var miklu mun fjörlegra heldur en heimsmeistaraeinvígið.  Þar urðu úrslitin 2-2.  Þar verður einnig teflt til þrautar á morgun með styttum umhugsunartíma.   Fyrst eru tefldar 2 atskákir (25 mínútur + 10 sekúndur á hvern leik).  Verði jafnt þá verða tvær skákir tefldar með styttri umhugsunaríma (10+10).  Verði enn jafnt verða tefldar 2 hraðskákir með enn styttri umhugsunartíma (5+3).   Verði enn jafnt verður tefld bráðabanaskák (armageddon).  Þar hefur hvítur 5 mínutur en svartur 4 mínútur.  Eftir 60 leiki bætast við 3 sekúndur á hvern leik.   Hvítur þarf að sigra en svörtum dugar jafntefli til að tryggja sér sigur.

Lokahluti úrslitaeinvígisins um Íslandsmeistaratitilinn hefst kl. 16 í Stúkunni við Kópavogsvelli.  Tjald verður sett upp á skákstað til að áhorfendur geti fylgst með skákmönnunum og skákinni á sama tíma.  Þeir sem ekki eiga heimangengt á skákstað verða að láta sér duga að fylgjast með lokahlutanum á heimasíðu Íslandsmótsins.

Seinasti skákdagur hjá Ásum í dag

Æsir héldu sitt Vorhraðskákmót í dag og þetta var jafnframt seinasti skákdagurinn á þessari vetrarvertíð. Sæbjörn Larsen varð efstur í dag með 8 vinninga af 9 mögulegum. Í öðru sæti varð Jóhann Örn með 7½ vinning og Össur Kristinsson í því þriðja með 6½.

Átján skákmenn tóku þátt í hraðskákinni í dag.

Eftir mótið settust menn niður í rólegheitum og fengu  sér kaffi og tertu hjá Jóhönnu ráðskonu og  að því loknu fór fram verðlaunaafhending. Þrír efstu í hraðskákinni fengu verðlaunapeninga.

Þá voru veitt verðlaun fyrir samanlagðan árangur á skákdögum vetrarins.

Haraldur Axel Sveinbjörnsson varð vetrarhrókur nr. 1 og fékk afhentan bikar til eignar, hefur unnið hann þrjú ár í röð. Vetrarhrókur nr 2. varð Valdimar Ásmundsson og vetrarhrókur nr. 3 varð Þorsteinn Guðlaugsson.

Það er vert að geta þess að Haraldur Axel mætti á alla skákdaga vetrarins sá eini sem náði því en hann er nú ekki nema 82 ára gamall strákurinn.

Næsta haust vertíð byrjar svo aftur fyrsta þriðjudag í september eða þann 4. september.  

Nánari úrslit dagsins:

• 1        Sæbjörn Larsen                       8 v
• 2        Jóhann Örn                             7.5
• 3        Össur Kristinsson                             6.5
• 4        Þorsteinn Guðlaugsson           6
• 5        Egill Sigurðsson                      5.5
• 6-9    Jón Steinþórsson                     5
•           Haraldur Axel                         5
•           Baldur Garðarsson                           5
•           Kristján Guðmundsson           5
• 10      Jón Víglundsson                      4.5
• 11-12 Valdimar Ásmundsson            4
•           Eiður Á Gunnarsson               4
• 13-14 Magnús V Pétursson               3.5
•           Jónas Ástráðsson                    3.5
• 15      Óli Árni Vilhjálmsson             3
• 16-17 Friðrik Sófusson                     2
•           Grímur Jónsson                       2
• 18      Ingi E Árnason                        1

Skákstjórn annaðist Finnur Kr

Myndaalbúm (FKF)

Albena: Dagur tapaði í 4. umferð

Alþjóðlegi meistarinn Dagur Arngrímsson (2381) tapaði fyrir svissnesku skákkonunni Camille De Seroux (2128), sem er FIDE-meistari kvenna, í 4. umferð Albena Open sem fram fór í dag í Búlgaríu.  Dagur hefur 1,5 vinning.

Í 5. umferð, sem fram fer á morgun, teflir Dagur við Tékkann Michael Tscharotschkin (2192).

Stórmeistararnir Hrant Melkumyan (2642), Armeníu, og Ivan Cheparinov (2673), Búlgaríu, eru efstir með fullt hús.

Alls taka 123 skákmenn frá 23 löndum þátt í mótinu.  Þar af eru 20 stórmeistarar og 20 alþjóðlegir meistarar.  Dagur er nr. 37 í stigaröð keppenda.

• Heimasíða mótsins
• Chess-Results