MVL sigurvegari Biel-mótsins

Hinn mjög svo viðkunnanlegi franski stórmeistari Maxime Vachier-Lagrave (2731) sigraði á ofurmótinu í Biel sem lauk í gær. MVL hlaut 6½ vinning í 10 skákum. Það var frábær endasprettur sem skóp sigur Frakkans en hann þrjár síðustu skákirnar. Pólski stórmeistarinn Radoslaw Wojaszek (2733) varð annar með 6 vinninga og Englendingurinn Mickey Adams (2740) varð þriðji með 5½ vinning. Þeir munu allir tefla á fyrsta borði fyrir sín lönd á EM landsliða sem fram fer í Höllinni í nóvember nk.

Frammistaða Richard Rapport (2671) vakti athygli en hann tapaði fimm síðustu skákunum og hlaut 2 vinninga. Rapport hefur engan veginn náð sér á strik í síðustu mótum. Hinn hvassi skákstíll hans virðist ekki henta vel á ofurmótum.

Vandaða umfjöllun um mótið má finna á Chess24.

Heimasíða mótsins

Fundargerð fyrsta fundar

Fyrsti stjórnarfundur nýrrar stjórnar SÍ var haldinn 2. júlí sl. Fundagerð fundarins er sem hér segir:

Fyrsti stjórnarfundur SÍ starfsárið 2015-2016 var haldinn 2.júlí 2015, kl.17:15.

Mættir: Gunnar Björnsson, Stefán Bergsson, Óskar Long Einarsson, Omar Salama og Kjartan Maack.

1. Skipting embætta. Forseti SÍ, Gunnar Björnsson, gerði tillögu að skiptingu embætta fyrir starfsárið 2015-2016 sem var samþykkt. Tillagan var svohljóðandi:
   1. Varaforseti: Kjartan Maack.
   2. Gjaldkeri: Óskar Long Einarsson.
   3. Ritari: Róbert Lagerman.
   4. Vararitari: Ingibjörg Edda Birgisdóttir.
   5. Æskulýðsfulltrúi: Stefán Bergsson.
   6. Meðstjórnandi: Steinþór Baldursson.
2. Ákveðið var að skipa aðeins formann hverrar nefndar að svo stöddu og þeim falið að velja aðra nefndarmenn. Formönnum gert að skila inn nefndarskipan eigi síðar en 1.september næstkomandi. Einnig óskað eftir því að formenn nefnda skili inn stuttri en greinargóðri lýsingu á verkefnum viðkomandi nefndar og skili henni eigi síðar en 1.september. SÍ gerir tillögu að formönnum í eftirfarandi nefndir:
   1. Skákmótanefnd: Gunnar Björnsson.
   2. Æskulýðsnefnd: Stefán Bergsson.
   3. Skákstiganefnd: Ríkharður Sveinsson.
   4. Skákminjanefnd: Stefán Bergsson.
   5. Landsliðs- og afreksnefnd: Jón Gunnar Jónsson.
   6. Kvennaskáknefnd: Lenka Ptacnikova.
   7. Landsbyggðarnefnd: Hermann Aðalsteinsson.
   8. Styrkjanefnd: Gunnar Björnsson.
   9. Öðlinganefnd: Einar S. Einarsson.
   10. Fjárhagsnefnd: Óskar Long Einarsson.
   11. Laganefnd: Tómas Veigar Sigurðarson.
   12. Framtíðarnefnd: Kjartan Maack.
   13. Dómaranefnd: Omar Salama.
   14. Þjálfaranefnd: Helgi Ólafsson.
   15. Nefnd um framtíðarskipulag Íslandsmóts skákfélaga: Halldór Grétar Einarsson.
3. Mótaáætlun: Gunnar kynnti mótaáætlun SÍ fyrir komandi starfsár. Vakin var sérstök athygli á því að Unglingameistaramót Íslands er sett örfáum dögum eftir að EM landsliða lýkur. Stefán benti á að með því að vinna nauðsynlega undirbúningsvinnu fyrir UMÍ með góðum fyrirvara þá eigi þessi knappi tími ekki að skapa vandræði. Íslandsmót skákfélaga verður teflt á tveimur helgum líkt og áður. Rætt var um að innleiða 30 leikja regluna í efstu deild, en ekki öðrum deildum. Athygli var vakin á því að reglugerð um Íslandsmót barnaskólasveita þarfnast endurskoðunar. Gunnar ætlar jafnframt að gera tillögu að breyttri reglugerð vegna Íslandsmóts skákfélaga.
4. Norðurlandamót: Gunnar sagði frá tillögu þess efnis að næsta Reykjavíkurskákmót verði jafnframt Norðurlandamót. Fundarmenn tóku almennt vel í þá tillögu.
5. HM ungmenna 2015: Samkvæmt reglugerð SÍ um HM ungmenna skal miða við íslensk skákstig þegar valið er á mótið. Ákveðið var á fundinum að horfa jafnframt til FIDE stiga, enda þykir ljóst að reglugerð verði breytt á næstunni og FIDE stig verði látin gilda í framtíðinni. Rætt var um að uppfæra reglugerðina fyrir 1.janúar 2016. Þessi ákvörðun opnar leið fyrir fleiri ungmenni til þess að taka þátt í mótinu. Þau sem koma inn á FIDE stigum fá þó ekki fullan styrk til þátttöku.
6. Dregið um töfluröð fyrir Íslandsmót skákfélaga 2015-2016: Dregið var um töfluröð efstu deildar með hliðsjón af þeirri ákvörðun að A og B lið sama félags skuli mætast í 2.umferð. Niðurstaðan varð svohljóðandi:
   1. Taflfélag Reykjavíkur A.
   2. Taflfélag Reykjavíkur B.
   3. Skákfélag Akureyrar A.
   4. Skákfélagið Huginn B.
   5. Skákdeild Fjölnis.
   6. Víkingaklúbburinn.
   7. Taflfélag Bolungarvíkur.
   8. Skákfélagið Huginn A.
   9. Skákfélag Akureyrar B.
   10. Skákdeild KR

Fundi slitið kl.18:55. Fundarritari var Kjartan Maack.

Fundargerðir SÍ má nálgast hér.

Sumarsyrpa Breiðabliks fer fram 7.-9. ágúst

Sumarsyrpa Breiðabliks er með samskonar fyrirkomulagi og hin vinsæla Bikarsyrpa TR.
Tvö mót verða haldin í sumar. Það seinna fer fram helgina 7.-9.ágúst. Mótin eru ætluð börnum á grunnskólaaldri (fæddum 1999 og síðar) sem ekki hafa náð 1600 skákstigum. Þau eru reiknuð til íslenskra og alþjóðlegra skákstiga.

Tefldar eru 5 umferðir eftir svissneska kerfinu. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Það margborgar sig að vanda sig og nota tímann, en samt má búast við því að margar skákir klárist á styttri tíma.

Dagskrá:

1. umferð kl 17:30 á föstudegi
2. umferð kl 10:30 á laugardegi
3. umferð kl 14:00 á laugardegi
4. umferð kl 10:30 á sunnudegi
5. umferð kl 14:00 á sunnudegi

Teflt er í Glersalnum í Stúkunni við Kópavogsvöll.

Verðlaun:

• 1. sæti: fyrsta val
• efstur 10 ára og yngri: annað val
• 2. sæti: þriðja val
• 3.sæti: fjórða val
• nr 2 10 ára og yngri: fimmta val
• nr 3 10 ára og yngri: sjötta val

Verðlaunapakkar: Pizza frá Íslensku Flatbökunni Bæjarlind, Stór bragðarrefur frá Vesturbæjarís, 4 bíómiðar í boði Vitakletts og Sambíóanna, 2 bíómiðar (3 pör af þeim).

Skráning í mótið  7.-9.ágúst: https://docs.google.com/forms/d/1rsyp1VnMmVd2Xx2C1UqPVpGvY6p7sngkJOjawyGihZA/viewform?usp=send_form

Skráðir keppendur: https://docs.google.com/spreadsheets/d/1baghnMaXs2DH85jja-DwZ_b9eSeL2uLd6orNtrIAwsI/edit#gid=975323026

Úrslit mótsins 3.-5.júlí: http://chess-results.com/tnr179648.aspx?lan=1

Heimasíða Skákdeildar Breiðabliks: http://www.breidablik.is/skak

Alþjóðlegt skákmót í Köge í Danaveldi í október

Opið alþjóðlegt mót, Xtraton Grand Master, fer fram í Köge (rétt fyrir utan við Kaupmannahöfn) dagana 12.-18. október. Óhætt er að mæla með mótahaldi í Köge en mót þar eru afar fagmannalaga haldin af skákklúbbnum þar undir forystu Finn Sthur. Klúbburinn hélt meðal ananrs Norðurlandamótið í skák 2013 og þótti takast vel upp.

Meðal keppenda í ár verður Henrik Danielsen.

Nánari upplýsingar má nálgast í meðfylgjandi PDF-viðhengi.

 

Skrár tengdar þessari bloggfærslu:

• Xtraton skákmótið 2015

Hraðskákkeppni taflfélaga - skráningarfrestur rennur út um mánaðarmótin

Hraðskákkeppni taflfélaga, hefst venju samkvæmt nú eftir verslunarmannahelgi. Þetta er í 21. skipti sem keppnin fer fram en Taflfélag Reykjavíkur er núverandi meistari. Í fyrra tóku 16 lið þátt keppninni. Nú þegar eru 11 lið skráð til leiks en skráð lið má finna hér. 

Teflt er eftir útsláttarfyrirkomulagi.

Dagskrá mótsins er sem hér segir:

1. umferð (16 liða úrslit): Skuli vera lokið eigi síðar en 15. ágúst
2. umferð (8 liða úrslit): Skuli vera lokið eigi síðar en 30. ágúst
3. umferð (undanúrslit): Skulu fara fram laugardaginn, 5. september
4. umferð (úrslit): Skulu fara fram fram laugardaginn, 12. september

Þátttökugjöld eru kr. 4.000 kr. á hverja sveit sem greiðist inn á reikning 327-26-6514, kt. 650214-0640.

Umsjónaraðili getur heimilað breytingar við sérstakar aðstæður. Breyta má dagsetningum á úrslitum og/eða undanúrslitum með samþykki allra viðkomandi taflfélaga.

Skráning til þátttöku rennur út 31. júlí nk. Skráning fer fram á www.skak.is (guli kassinn efst). Hægt er að skrá b-sveitir til leiks en a-sveitir njóta forgangs varðandi þátttöku komi til þess að fleiri en 16 lið skrái sig til leiks.

1. Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.
2. Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar. Mótshaldari leggur fram dómara í undanúrslit og úrslit.
3. Undanúrslit og úrslit keppninnar verða reiknuð til alþjóðlegra hraðskákstiga.
4. Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.
5. Ætlast er til þess að þeir sem tefli séu fullgildir meðlimir síns félags (á Keppendaskrá SÍ). Aðeins má tefla með einu taflfélagi í keppninni.
6. Liðsstjórar koma sér saman um hvenær er teflt og innan tímaáætlunar. Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.
7. Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást. 
8. Heimalið bjóði upp á léttar veitingar, t.d. kaffi, gos, kökur. Mótshaldari sér um veitingar í undanúrslitum og úrslitum.
9. Meðlimir b-sveita skula ávallt vera stigalægri en meðlimir a-sveitar (FIDE-stig) sömu umferðar. Skákmaður sem hefur teflt með a-sveit getur ekki teflt með b-sveit síðar í keppninni.
10. Viðureignirnar skulu fara fram innan 100 km. radíus (max 1-1,5 klst.ferðalag) frá Reykjavík nema að félög komi sér saman um annað.
11. Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.
12. Úrslit keppninnar verða ávallt aðgengileg á heimasíðu Hugins, www.skakhuginn.is sem er heimasíða keppninnar, og á www.skak.is.
13. Mótshaldið er í höndum Skákfélagsins Hugins sem sér um framkvæmd mótsins og mun útvega verðlaunagripi.

Upplýsingar um þegar skráðar sveitir má finna hér. 

Heimasíða mótsins

Wojtaszek efstur í Biel

Pólski stórmeistarinn Radoslaw Wojtaszek (2733) er efstur með 4½ vinning að lokinni sjöundu umferð ofurmótsins í Biel í Sviss í dag. Michael Adams (2740) og David Navara (2724) koma næstir með 4 vinninga.

Sex skákmenn taka þátt í Biel og tefla tvöfalda umferð.

Heimasíða mótsins

Helgi Ólafsson til liðs við Hugin!

Hinn kunni stórmeistari og skákfræðimaður, Helgi Ólafsson, er genginn til liðs við Skákfélagið Hugin. Ljóst er að félaginu er gríðarlegur styrkur að komu Helga enda um að ræða einn allra öflugasta og reyndasta skákmann þjóðarinnar.

Ferill Helga er einkar glæsilegur. Árið 1970 varð hann unglingameistari Íslands með 100% árangri. Næstu ár varð Helgi tvívegis skákmeistari Vestmannaeyja  og leiktíðina 1973 -´74 vann hann flest skákmót sem hann tók þátt í. Á alþjóðavettvangi tefldi hann fyrst 1973 þegar sveit Menntaskólans við Hamarhlíð varð fyrst íslenskra skólasveita til að verða Norðurlandameistari.

Helgi varð alþjóðlegur meistari eftir góða frammistöðu á alþjóðlegu móti í New York sumarið 1976 og Lone Pine 1978. Í ársbyrjun 1984 gerðist hann atvinnumaður í skák og varð fljótlega stórmeistari eftir sigur á alþjóðalega  Reykjavíkurmótinu 1984 og sigur á alþjóðega  mótinu í Neskaupsstað sama ár en lokaáfanginn kom í Kaupmannahöfn 1985 þegar hann varð í 2. – 4. sæti ásamt Bent Larsen og Curt Hansen á afmælismóti Bronshoj skákkúbbsins. Helgi varð efstur ásamt Simen Agdestein og Jóhanni Hjartarsyni á Skákþingi Norðurlanda 1985.

Helgi tefldi á árunum 1975 – 1996 12 sinnum í landsliðsfokki á Skákþingi  Íslands. Hann varð á þessum tíma skákmeistari Íslands sex sinnum og í 2. sæti fimm sinnum. Helgi hefur orðið Íslandsmeistari í atskák oftar en nokkur annar eða fjórum sinnum og hraðskákmeistari Íslands sex sinnum. Helgi sigraði á 23 helgarmótum tímaritsins Skákar á árunum 1980  – 1997. Auk þess hefur hann unnið aragrúa annarra innlendra móta.

Eins og áður sagði varð Helgi hlutskarpastur á Reykjavíkurmótinu 1984, ásamt Jóhanni Hjartarsyni og Samuel Reshevsky, og varð efstur með níu öðrum á Reykjavíkumótinu 1990. Hann tefldi síðast á Reykjavíkurskákmótinu 2014 og varð í 2. – 5. sæti, hlaut 8 vinninga af 10 mögulegum. Hann varð í 2. sæti með öðrum á einu sterkasta opna móti ársins í New York 1986 og náði sama árangri aftur í sama móti 1989 og 1990. Um þetta leyti var Helgi í kringum 30. sæti á heimslista FIDE. Helgi sigraði á alþjóðlegu móti tímaritins Skákar við Djúp sumarið 1988 og nokkrum vikum síðar fór hann hann taplaus í gegnum 13 umferða minningarmót um Tschigorin í Sochi við Svartahaf.  Ekki er þekkt dæmi um annan Vesturlandabúa sem komist hefur taplaus í gegnum slíkt mót í gömlu Sovétríkjunum.

Helgi hefur teflt 16 sinnum fyrir hönd þjóðar sinnar á Ólympíumótum, oftar en nokkur annar Íslendingur. Hann tefldi  á 1. borði í Saloniki 1984, Dubai 1986 og Novi Sad 1990 og flestar skákirnar á Möltu 1980. Helgi var þjálfari og liðsstjóri íslenska Ólymíuliðsins 2010 og 2012 og einnig liðsstjóri og þjálfari íslenska liðsins á Evrópumótum landsliða 2011, og 2013. Í  fyrra skipti í Porto Carras tók hann sæti í liðinu vegna forfalla, hlaut 4 ½ vinning af 5 mögulegum og fékk silfurverðlaun fyrir frammistöðu sína. Helgi hyggur á þátttöku í gullaldarliði Íslands sem teflir á EM í Reykjavík í haust.

Helgi hefur verið atkvæðamikill skákpistlahöfndur og blaðamaður á ýmsum miðlum og hefur ritað reglulega skákpistla í Morgunblaðið frá árinu 2006. Helgi hefur einnig skrifað ótal greinar í blöð og tímarit hér á landi og erlendis. Hann hefur ritað og þýtt nokkrar bækur þ. á m. bókina Benóný með Braga Halldórssyni og Jóni Torfasyni, bókina „Bobby Fischer comes home“ sem kom út í Hollandi vorið 2012 og skrifað fyrra bindið af tveimur um Reykjavíkurskákmót í 50 ár. Þá hefur hann m.a. snarað kennslubókinni Skák og mát sem Hrókurinn dreifði í grunnskóla landsins í um 25 þús. eintökum og einnig þýtt FIDE-kennslubókina Skákþjálfun sem FIDE gaf út. Helgi gerðist skólastjóri  Skákskóla Íslands árið 1996 og dró þá mjög úr taflmennsku en hefur þó alltaf haldið sér við með þátttöku í kappskákmótum eftir því sem tími hefur unnist til.

Helgi Ólafsson, stórmeistari:   

Ég hef notið þess að keppa fyrir hönd Taflfélags Vestmannaeyja um árabil og þakka félögum mínum þar góð kynni. Nú geng ég til liðs við annað skemmtilegt og vel mannað félag. Sérstaklega líst mér vel á áherslu Huginsmanna á skákmenningu og metnað þeirra til þess að félagsmenn eflist að styrk samhliða vexti og viðgangi félagsins. Þar er auðvitað lykilatriði að líta svo á að allir skákmenn geti bætt sig fram eftir öllum aldri.

Hermann Aðalsteinsson, formaður Hugins:

Þetta eru stór tíðindi. Við Huginsmenn erum auðvitað stoltir af því að þessi öflugi stórmeistari laðist að okkar félagi. Ljóst er að með Helga er nýrri og sterkri stoð rennt undir framtíð Hugins meðal fremstu skákfélaga landsins. Við hlökkum til að njóta visku hans og atfylgis og gerumst nú enn upplitsfjarfi fyrir komandi leiktíð. Þar er eitt af markmiðum okkar að verja Íslandsmeistaratilil félagsins.

Heimasíða Hugins

Skákþáttur Morgunblaðsins: Magnús Carlsen teflir á EM í Reykjavík

Þá liggur það fyrir að heimsmeistarinn Magnús Carlsen mun tefla fyrir Noreg á Evrópumóti landsliða sem fram fer í Reykjavík í nóvember nk. Aðrir í norska liðinu eru Ludwig Hammer, Simen Agdestein, Aryan Tari og Frode Urkedahl. Þetta verður í fyrsta sinn síðan 1988, er Garrí Kasparov tók þátt í heimsbikarmóti Stöðvar 2, sem ótvíræður heimsmeistari teflir hér á landi. Búast má við að 30-40 lið tefli í opna flokki mótsins og 25-30 lið í kvennaflokknum. Ljóst er að Íslendingar munu tefla fram tveimur liðum í opna flokknum en aðallið Íslands hefur enn ekki verið tilkynnt, en fyrstu menn inn þar verða Hannes Hlífar Stefánsson, Héðinn Steingrímsson og Hjörvar Stefánsson. Hið svonefna gullaldarlið Íslands verður skipað Friðriki Ólafssyni, Jóhanni Hjartarsyni, Jóni L. Árnasyni, Margeiri Péturssyni og undirrituðum. Ekkert liggur fyrir um það hvernig íslenska kvennaliðið verður skipað en Lenka Ptacnikova mun án efa tefla á 1. borði. Mótið fer fram í Laugardalshöll.

Eitt sigurstranglegasta lið þessarar keppni hlýtur að vera lið Armena sem teflir fram Levon Aronjan á fyrsta borði. Aserbaídsjan hefur unnið keppnina tvisvar og þá koma Rússar alltaf sterklega til greina sem sigurvegarar þó frammistaða þeirra eftir að Kasparov hætti hafi verið allt annað en viðunandi frá sögulegum sjónarhóli séð. Vladimir Kramnik mun samkvæmt áreiðanlegum heimildum leiða sveit þeirra að þessu sinni. Þá má nefna Úkraínumenn með Vasilí Ivantsjúk fremstan í flokki. Af þekktum keppendum má nefna Anish Giri sem teflir á 1. borði fyrir Hollendinga og Michael Adams sem teflir á 1. borði fyrir Englendinga.

Þó að Evrópumótin séu aðeins styttri en Ólympíumótin, níu umferðir á móti ellefu, eru þau að sumu leyti erfiðari þar sem flestar sveitirnar eru þéttar fyrir. Stig eru látin ráða en ekki vinningar, 2 ½ vinningur gefur jafn mörg stig og fjórir vinningar og ákveðin taktík ræður stundum ferðinni í innbyrðis viðureignum. Íslendingar hafa oft náð góðum árangri á Evrópumótinu, 13. sæti í Debrecen 1992 er besta lokaniðurstaðan og þar fékk Jóhann Hjartarson silfurverðlaun fyrir bestan árangur á 1. borði. Þá náðist góður árangur í Heraklion í Grikklandi 2007.

Evrópumót landsliða fór fyrst fram í Vín í Austurríki árið 1957 og þá var teflt á tíu borðum. Meðal liðsmanna sigursveitar Sovétmanna var Mikhael Tal sem þá var að hefja einhverja mögnuðustu sigurgöngu sem skáksagan kann frá að greina. Leiftrandi leikfléttustíll hans skein skært á þessu móti.

Evrópumót landsliða í Vín 1957:

Mikhael Tal – Rudolph Teschner (V-Þýskaland )

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O d6 6. c3 Be7 7. d4 b5 8. Bb3 Bg4 9. h3 Bxf3 10. Dxf3!?

Fyrsta fórnin, hvítur fær gott spil fyrir peðið.

10. ... exd4 11. Dg3 g6 12. Bd5 Dd7 13. Bh6!

Almenn óþægindi fylgja þessum langa biskupsleik, svartur getur ekki komið kónginum í skjól.

13. ... Hb8 14. f4 Rd8 15. Rd2 c6 16. Bb3 dxc3 17. Dxc3 Da7 18. Kh1 Dc5 19. Dd3 Rd7 20. e5!

Gegnumbrot sem hefur það að markmiði að rýma e4-reitinn fyrir riddarann.

20. ... d5 21. f5 gxf5 22. Dxf5 Rf8

Reynir að verja veikleikana. 

23. Re4! dxe4 24. Hac1 Db6 25. Hcd1!

- Við hótuninni 26. Bxf7+ er engin haldgóð vörn og svartur gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 18. júlí 2015

Skákþættir Morgunblaðsins

Henrik Danielsen genginn í T.R.

Stórmeistarinn Henrik Danielsen (2510) er genginn í Taflfélag Reykjavíkur. Henrik þarf vart að kynna, en hann hefur verið einn sterkasti og virkasti meistari landsins í mörg ár. Árið 1991 varð hann alþjóðlegur meistari og stórmeistari fimm árum síðar 1996.

Henrik hefur í fjölmörg skipti keppt fyrir Íslands hönd síðan hann varð íslenskur ríkisborgari árið 2005 og árið 2009 varð hann íslandsmeistari í skák, en mótið var þá haldið í Bolungarvík. Henrik keppti einnig þrisvar sinnum á ólympíumótum fyrir hönd Danmerkur, eða árin 1992, 1994 og 1996.

Henrik hefur ritað mikið um skák, og er þar þekktastur fyrir “Ísbjarnar-kerfið” í Birds byrjuninni sem hann hefur oft beitt með góðum árangri.

Henrik mun styrkja starf Taflfélags Reykjavíkur mikið og bjóðum við hann hjartanlega velkominn í félagið!

Heimasíða TR

Kóngurinn David Navara fer á kostum í Biel

Tékkinn David Navara (2724) er efstur á ofurmótinu í Biel. Hann hefur hlotið 3 vinninga í 4 skákum. Skák hans gegn Radoslaw Wojtaszek (2733) frá í gær hefur vakið gríðarlega athygli um skákheim allan. Kóngur Tékkans fór á ferðlag þvert yfir borðið frá g1-h8.

Ítarlega og góða umfjöllun um skákina í gær má finna á Chess.com. Sjón er sögu ríkari og eru skákáhugamenn hvattir til að skoða snilldina. 

Nigel Short tístaði um skákina að henni lokinni:

I have no idea what David Navara is smoking, but I would like some too. #crazykingmarch

— Nigel Short (@nigelshortchess) July 23, 2015

Pavel Eljanov, einn keppenda mótsins, lék hafa eftir sér eftir skákina:

It was just incredible, probably one of the most amazing games I've ever seen.

Þess má geta að Navarra, Wojtaszek, Nigel Short og væntanlega einnig Eljanov einnig munu allir tefla á EM landsliða í höllinni í haust.  

Staðan:

 Elo Points

1.	David Navara	2724	CZE	3
2.	Maxime Vachier-Lagrave	2731	FRA	2.5
3.	Radoslaw Wojtaszek	2733	POL	2
4.	Pavel Eljanov	2723	UKR	1.5
	Michael Adams	2740	ENG	1.5
	Richard Rapport	2671	HUN	1.5

 

Heimasíða mótsins