Carlsen teflir í Zurich - vann Gelfand í fyrstu umferð

Magnus Carlsen (2872) tekur þessa dagana þátt í sínu fyrsta skákmóti síðan hann vann heimsmeistaratitilinn af Anand í Chennai í nóvember. Nú fer fram mót í Zurich þar sem meðalstigin eru 2801 skákstig (!!) sem er heimsmet. Anand (2773) er stigalægstur sex keppenda.

Í fyrstu umferð vann Carlsen Gelfand (2777) og Aronian (2812) næststigahæsti keppandi heims hafði betur gegn Anand (2773). Nakamura (2789), sem lítur á sig sem helstu ógnina við Carlsen, og Caruana (2782) gerðu jafntefli.

Nú er í gangi önnur umferð og þá mætast m.a. Carlsen og Aronian.

• Heimasíða mótsins
• Beinar útsendingar (hefjast kl. 14)

Gallerý Skák - kappteflið um Friðrikskónginn - Gunnar vann aftur og leiðir

Gunnar Gunnarsson og Björgvin Víglundsson urðu aftur efstir og jafnir en nú með 9.5 vinning en voru með 8 síðast af ellefu. Gerður innbyrðis jafntefli. Þrjú bestu mót hvers keppanda af fjórum telja svo allt getur gerst ennþá, þó gamli maðurinn eigi góða sigurmöguleika með því að vinna eitt mót í viðbót eða verða öðru sæti.

Að öðru leyti var þetta býsna fjörugt mót og nokkuð um óvænt úrslit en eins og ævinlega geta allir unnið alla á góðum degi eða ef heppnin er með. Hinn ungi og efnilegi Gauti Páll velgdi ýmsum gamlingum undir uggum og var öllum skeinuhættur.

Næsta mót er að viku liðinni en hér að neðan má úrslit mótsins í dag og skortöflu kvöldsins ásamt stigastöðunni ef vel er að gáð.

 

 

 

Hannes með 3½ vinning eftir 5 umferðir í Kosta Ríka

Stórmeistarinn Hannes Hlífar Stefánsson (2560) situr þessa dagana að tafli á alþjóðlegu móti í Kosta Ríka. Eftir 5 umferðir hefur Hannes 3½ vinning og er í 3.-4. sæti.

Úrslit Hannesar má nálgast á Chess-Results.

Efstur með fullt hús er hollenski stórmeistarinn Sipke Ernst (2573).

Tíu skákmenn taka þátt í mótinu og er Hannes næststigahæstur keppenda. Meðalstig í flokknum eru 2381 skákstig.

Chess-Results

 

 

Íslensk fegðin tefla í Gíbraltar

Feðginin Magnús Kristinsson (1741) og Veronika Steinunn Magnúsdóttir (1561) eru meðal keppenda á opna mótinu í Gíbraltar sem fram 28. janúar - 6. febrúar. Nú þegar þremur umferðum er lokið hafa þau bæði 1 vinning en þau unnu bæði í þriðju umferð töluvert stigahærri andstæðinga (1995-1999). Þeim eru raðað nr. 244 og 248 af 255 keppendum svo búast má við róðurinn kunni að vera erfiður hjá þeim.

Úrslit í skákum feðgina má nálgast á Chess-Results.

Tíu skákmenn eru efstir með fullt hús. Þeirra á meðal er kínverski stórmeistarinn Chao B Li (2680) sem verður meðal keppenda á N1 Reykjavíkurskákmótinu.

• Heimasíða mótsins
• Chess-Results
• Beinar útsendingar (hefjast kl. 14)

Toyota skákmót eldri borgara hefst kl. 13

Íslenska skákvikan er hafin, þá teflum við öll til heiðurs okkar fyrsta stórmeistara Friðriki Ólafssyni. Eldri borgarar ætla að tefla mikið þessa viku eins og þeir gera yfirleitt. Föstudaginn 31. janúar býður Toyota á Íslandi eldri borgurum til skákmóts í höfuðstöðvun sínum í Kauptúni 6 Garðabæ þ.e. við hliðina á IKEA. Toyota gefur öll verðlaun sem eru vegleg, þetta er sjöunda Toyotaskákmótið sem haldið er.

Sigurvegari á síðasta Toyotamóti var Bragi Halldórsson. Æsir skákfélag F E B í Reykjavík og Riddarar úr Hafnarfirði hjálpast að við framkvæmd mótsins. Skákmótið hefst stundvíslega kl. 13.00

Þátttakendur eru vinsamlega beðnir að mæta vel tímanlega fyrir kl. 13.00

Það er best að forskrá sig hjá Garðari Guðmundssyni í síma 8984805 og í netfangið [e-mail] hjá Finni Kr. Finnssyni í síma 8931238 og netfangið [e-mail]

Það verða tefldar níu umferðir með 10 mínútna umhugsun. Allir skákmenn 60+  og þeir sem verða 60 ára á árinu velkomnir.

Tálknafjarðarskóli Suðurfjarðameistari í skák!

Á sunnanverðum vestfjörðum var í morgun haldið skákmót um Suðurfjarðameistara í skák 2014. Mótið var haldið á Fosshóteli á Patreksfirði og voru það nemendur í Patreksskóla og Tálknafjarðarskóla sem tefldu um titilinn. Mótið var haldið í tilefni Skákdags Íslands sem er tileinkaður okkar fyrsta stórmeistara í skák en GM Friðrik Ólafsson fagnaði sínu 79. aldursári 26. janúar sl.

Með þessu móti varð draumur að veruleika en 48 nemendur mættu til tafls, 24 úr hvorum skóla. Jú því skák er skemmtileg og eflir námsgetu. Svona mót eru svo sannarlega ekki haldin á þátttöku samfélagsins en margir lögðu hönd á plóg og var teflt á frábærum stað Fosshóteli á Patreksfirði, einnig gáfu fyrirtæki á svæðinu vinninga en það voru Verslunin Fjölval, Landsbankinn, útgerðin Oddi, Hópið veitingastaður á Tálknafirði og Verslunin Albína.

Einnig hafa Héraðssambandið Hrafna -Flóki, Vesturbyggð, Tálknafjarðarhreppur og Skáksamband Íslands lagt til skáklukkur til að efla skáklíf á Suðurfjörðunum. Mótið tókst einstaklega vel og mættu Ásthildur Sturludóttir bæjarstjóri Vesturbyggðar og Lilja Sigurðardóttir formaður Hrafna-Flóka og léku fyrsta leik á tveimur borðum með nýju klukkunum. Indriði Indriðason sveitarstjóri Tálknafjarðarhrepps afhenti farandbikar Suðurfjarðameistara. Séra Leifur Ragnarsson sá svo um að draga út vinningsnúmer þeirra sem duttu í lukkupottinn. Mótstjóri var GM Henrik Danielsen sem einnig sá um skipulagningu ásamt Áróru H Skúladóttur, skólastjórum grunnskólanna og hótelstjóra Fosshótels Jimmy Wallster.

Myndaalbúm (ÁHS)

Skrár tengdar þessari bloggfærslu:

• talknafjar_arskoli_su_urfjar_ameistari_i_skak.pdf

Jón Viktor og Einar Hjalti efstir fyrir lokaumferð Skákþings Reykjavíkur

Jón Viktor Gunnarsson (2412) og Einar Hjalti Jensson (2347) eru efstir með 7 vinninga að lokinni áttundu og næstsíðustu umferð Skákþings Reykjavíkur sem fram fór í kvöld. Einar gerði jafntefli við Davíð Kjartansson (2336) sem er núverandi Reykjavíkurmeistari en Jón Viktor við Harald Baldursson (2013). Þeir kumpánar hafa vinnings forskot á næstu menn og því langlíklegast að annar hvor þeirra verði skákmeistari Reykjavíkur 2014.

Fimm skákmenn hafa 6 vinninga og hafa því tölfræðilegan möguleika á titlinum. Það eru auk Davíðs þeir Þorvarður F. Ólafsson (2256), Lenka Ptácníková (2245), Jón Trausti Harðarson (2003) og Oliver Aron Jóhannesson (2104). Jón Trausti heldur áfram að ná góðum úrslitum en hann vann Júlíus Friðjónsson (2175) í kvöld. 

Níunda og síðasta umferð fer fram á sunnudag og hefst kl. 14. Pörun er væntanleg í fyrramálið.

• Heimasíða TR
• Chess Results
• Myndir (GB)

Reykjavíkurmót grunnskólasveita í skák fer fram 10. febrúar

Reykjavíkurmót grunnskólasveita í skák 2014 fer fram mánudaginn 10. febrúar n.k. og hefst kl.17.

Tefldar verða 7 umferðir með 10 mín. umhugsunartíma á skák.  Allar sveitirnar keppa í einum opnum flokki, og veitt verða verðlaun fyrir þrjár efstu sveitirnar sem og þrjár efstu stúlknasveitirnar.  Hver sveit skal skipuð fjórum nemendum frá hverjum skóla auk 1-4 varamanna.

Hverjum skóla er heimilt að senda fleiri en eina sveit til þátttöku og skal þá sterkasta sveitin nefnd A, sú næststerkasta B, o.s.frv. Sigursveitin verður Reykjavíkurmeistari grunnskólasveita 2014 og hlýtur farandbikar til vörslu í eitt ár. Mótið hefst, sem áður segir, kl. 17 og lýkur um kl. 20.  Verðlaunaafhending verður strax að móti loknu.

Sveitakeppni grunnskóla í Reykjavík er haldin í samvinnu Taflfélags Reykjavíkur og Skóla-og frístundasviðs Reykjavíkur og fer keppnin fram í félagsheimili Taflfélags Reykjavíkur, Faxafeni 12, Reykjavík.

Mikilvægt er að skólarnir sendi fylgdarmann með sínu liði, keppendum til halds og trausts.

Þátttaka tilkynnist til skrifstofu Skóla og frístundasviðs eða á netfang: [e-mail] Einnig er hægt að senda skráningu á [e-mail]  eigi síðar en föstudaginn 7. febrúar. 

Ekki verður hægt að skrá lið á mótsstað.

Þátttökurétt hafa eingöngu nemendur í grunnskólum Reykjavíkur.

Skákfréttir frá skákbænum Bolungarvík!

Það var gaman í Grunnskóla Bolungarvíkur í morgun. Guðmundur Gíslason skákmaður var svo elskulegur að koma og taka fjöltefli við nemendur skólans allt frá 1. - 10. bekk. Það var Björgvin Bjarnason kennari sem hafði frumkvæði að fjölteflinu og tilefnið var íslenski skákdagurinn  26. janúar sem er afmælisdagur fyrsta íslenska stórmeistarans, Friðriks Ólafssonar. Skemmst er frá því að segja að það hefði mátt heyra saumnál detta í allan morgun á efstu hæð í gamla skólanum þar sem mótið fór fram. 43 nemendur á öllum aldri öttu kappi við Guðmund og var mjög gaman að sjá hversu langt margir komust. Guðmundur hafði þó alla og vann 43-0!

En það er líka von á fleiri góðum gestum á næstunni í tilefni dagsins, en mikill skákáhugi er í skólanum og hefur Björgvin gefið nemendum á unglingastigi kost á að tefla af og til í haust auk þess sem unglingarnir hafa líka verið að kenna nemendum í 1. bekk mannganginn og þjálfa þá í skákíþróttinni.

Skólinn á nokkur töfl en nú erum við að fjárfesta í öðru fallegu skákborði til að hafa á ganginum en við eigum eitt veglegt borð fyrir sem keppst er um að ná í öllum frímínútum. Borðin eru keypt fyrir fjármuni sem skólanum voru gefnir, en eins og flestir vita eiga Bolvíkingar marga frábæra skákmenn sem hugsa hlýlega til síns gamla skóla.

Meistaramót Skákfélags Sauðárkróks hófst í gær

Fyrsta umferð meistaramóts Skákfélags Sauðárkróks fór fram í gærkvöldi. Alls eru 9 skákmenn skráðir til leiks, þar af 2 fulltrúar Siglfirðinga, þeir Sigurður Ægisson og Jakob Sævar Sigurðsson, sem fer mikinn í skákmótum Norðanlands nú um stundir.

Það hefur lengi háð skákmönnum á landsbyggðinni hversu fáar kappskákir þeir tefla á ári. Algengasta talan er 7, þ.e. þær skákir sem tefldar eru á Íslandsmóti Skákfélaga. Meistaramót Skákfélags Sauðárkróks í kappskákum hefur ekki verið haldið um áratuga skeið. Eins og gefur að skilja þá er lítið að marka skákstig manna sem tefla svo lítið, og úrslitin úr fyrstu umferðinni bera með sér að mótið verði mjög jafnt. Hart var barist í fyrstu umferðinni og komið vel framyfir miðnætti þegar flestir stóðu upp frá tafli. 

Í fyrstu umferð sigraði Hörður Ingimarsson, Jón Arnljótsson. Guðmundur Gunnarsson sigraði Unnar Ingvarsson.  Jakob Sævar Sigurðsson sigraði Þór Hjaltalín og Sigurður Ægisson sigraði Birki Má Magnússon. Einar Örn Hreinsson sat hjá í fyrstu umferð.  

Önnur umferð verður tefld að viku liðinni

• Heimasíða Skákfélags Sauðárkróks
• Chess-Results