Lundarnir fá Slóvenska sveit í þriðju umferð PRO Chess League

Í kvöld klukkan 19:25 hefst 3. umferð í PRO Chess League. Umferðin sjálf hefst í raun fyrr um daginn en viðureign Reykjavik Puffins og Ljubljana Turtles hefst á slaginu 19:25 á Chess.com.

Í síðustu viku unnu Lundarnir feykisterkan sigur á sveit frá London en vikuna þar áður gerðu Lundarnir jafntefli við Marseille Migraines með Maxime Vachier-Lagrave í broddy fylkingar.

Ljublana Turtles liðið er leitt af enska stórmeistaranum Luca Lenic sem er 1. borðsmaður Slóvena. Í raun er kjarninn í liðinu í landsliði Slóvena og því við ramman reip að draga. Sveitin er frekar stigahá en ungur drengur með 2114 stig er á síðasta borði. Sá hefur hinsvegar halað inn vinningum og því ljóst að verkefni er ærið!

Lið Lundana að þessu sinni skipa:

GM Hjörvar Steinn Grétarsson (2567), GM Jóhann Hjartarson (2539), GM Þröstur Þórhallsson (2420) og IM Björn Þorfinnsson (2398).

Allir tefla við alla á fjórum borðum og því 16 vinningar í boði. Búast má við jöfnum og spennandi match.

Hægt verður að fylgjast með skákunum og Chess.com en við mælum með því að kíkja á beina útsendingu Puffins í umsjón FM Ingvars Þórs Jóhannessonar sem verður hér: http://www.twitch.tv/reykjavikpuffins

Heimasíða PRO Chess League

Útsending Chess.com

Ný alþjóðleg skákstig

Ný alþjóðleg skákstig eru komin út og taka þau gildi á morgun, 1. febrúar. Héðinn Steingrímsson (2574) er sem fyrr stigahæsti skákmaður landsins. Stefán Már Pétursson er stigahæsti nýliðinn og reyndar sá eini. Benedikt Þórisson hækkar langmest frá janúar-listanum á stigum.

Topp 20

Litlar breytingar eru á stigalistanum nú enda skiluðu aðeins eitt innlent kappskákmót reiknað til stiga að þessu sinni. Miklu meira fjór verður á mars-listanum þegar Skákhátíð MótX, Skákþing Reykjavíkur, Skákþing Akureyrar og Meistarmót Hugins (N) verða öll reiknuð. Aðeins þrír skákmenn á topp 20 átta reiknaða skák í janúar og er röð efstu manna óbreytt frá því sem verið hefur. Héðinn Steingrímsson (2574), Hjörvar Steinn Grétarsson (2565) og Jóhann Hjartarson (2536) eru í efstu sætunum. 

No.	Name	Tit	feb.18	Diff	Gms
1	Steingrimsson, Hedinn	GM	2574	0	0
2	Gretarsson, Hjorvar Steinn	GM	2565	0	0
3	Hjartarson, Johann	GM	2536	0	0
4	Stefansson, Hannes	GM	2525	2	17
5	Olafsson, Helgi	GM	2508	0	0
6	Petursson, Margeir	GM	2499	0	0
7	Danielsen, Henrik	GM	2497	1	3
8	Gunnarsson, Jon Viktor	IM	2466	0	0
9	Arnason, Jon L	GM	2457	0	0
10	Kristjansson, Stefan	GM	2447	0	0
11	Kjartansson, Gudmundur	IM	2441	3	9
12	Gretarsson, Helgi Ass	GM	2441	0	0
13	Gunnarsson, Arnar	IM	2428	0	0
14	Thorfinnsson, Bragi	IM	2426	0	0
15	Thorsteins, Karl	IM	2426	0	0
16	Thorhallsson, Throstur	GM	2418	0	0
17	Kjartansson, David	FM	2409	0	0
18	Thorfinnsson, Bjorn	IM	2400	0	0
19	Ulfarsson, Magnus Orn	FM	2371	0	0
20	Arngrimsson, Dagur	IM	2370	0	0

Nýliðinn

Aðeins einn nýliði er á listanum að þessu sinni. Þar er á ferðinni enginn annar en Stefán Már Pétursson (1698), faðir Vignirs Vatnars. 

No.	Name	Tit	feb.18	Diff	Gms
1	Petursson, Stefan Mar		1698	1698	13

Mestu hækkanir

Benedikt Þórisson (+92) hækkaði langmest á milli janúar og febrúar listans eftir frábæra frammistöðu á Rilton Cup eins og lesa má um á heimasíðu TR. Í næstu sætum eru Birkir Ísak Jóhannsson (+37) og Bárður Örn Birkisson (+36) sem báðir stóðu sig afskaplega vel á minningarmótinu um Steinþór Baldursson. 

No.	Name	Tit	feb.18	Diff	Gms
1	Thorisson, Benedikt		1235	92	7
2	Johannsson, Birkir Isak		1797	37	7
3	Birkisson, Bardur Orn	CM	2226	36	7
4	Thorhallsson, Simon		2064	24	7
5	Davidsson, Oskar Vikingur		1871	17	7
6	Ottarsson, Tryggvi		1600	17	1
7	Briem, Benedikt		1481	17	6
8	Stefansson, Vignir Vatnar	FM	2320	16	9
9	Thor, Gudmundur Sverrir		2041	13	1
10	Thorarinsson, Pall A.	FM	2287	12	2

Stigahæstu ungmenni landsins (u20)

Vignir Vatnar Stefánsson (2320) endurheimti toppsætið á ungmennalistanum eftir smáfjarveru af toppnum. Jón Kristinn Þorgeirsson (23199 hefur aðeins einu stigi minna. Þriðji er Oliver Aron Jóhannesson (2263). Alexander Oliver Mai (1981) kemst í fyrsta skipti inn á topp 10.

No.	Name	Tit	feb.18	Diff	Gms	B-day
1	Stefansson, Vignir Vatnar	FM	2320	16	9	2003
2	Thorgeirsson, Jon Kristinn	FM	2319	0	0	1999
3	Johannesson, Oliver	FM	2263	-14	6	1998
4	Birkisson, Bardur Orn	CM	2226	36	7	2000
5	Jonsson, Gauti Pall		2160	-1	6	1999
6	Heimisson, Hilmir Freyr	CM	2136	0	0	2001
7	Thorhallsson, Simon		2064	24	7	1999
8	Birkisson, Bjorn Holm		2046	-38	7	2000
9	Mai, Alexander Oliver		1981	11	7	2003
10	Davidsdottir, Nansy		1975	0	0	2002

Reiknuð skákmót

Aðeins eitt innlent kappskákmót var reikað til stiga nú. Hraðskámótin voru hins vegar allnokkur. Það er ánægjulegt að sjá hversu dugleg íslensku félögin eru að senda mót inn til stiga. 

• Minningarmót um Steinþór Baldursson (kappskák)
• Hraðskákmótaröð TR I (hraðskák)
• Nýársmót Vinaskákfélagsins (hraðskák)
• Atkvöld Hugins (at- og hraðskák)
• Hraðkvöld Hugins (hraðskák)
• TR laugardagsmót I, II og III (hraðskák)
• Friðriksmót Vinaskákfélagsins (hraðskák)

Heimslistinn

Magnus Carlsen (2843) er venju samkvæmt stigahæsti skákmaður heims. Í næstu sætum er Shakhriyar Mamedyarov (2814) og Vladimir Kramnik (2800).

Topp 100 má nálgast hér. 

Meðfylgjandi er listinn yfir virka íslenska skákmenn í heild sinni. 

Skrár tengdar þessari bloggfærslu:

• Alþjóðleg skákstig, 1.febrúar 2018

Íslandsmót barnaskólasveita (1.-3. bekkur) fer fram 24. febrúar

Íslandsmót barnaskólasveita 1.-3. bekk 2018 fer fram í Rimaskóla, laugardaginn 24. febrúar nk.  

Tefldar verða sjö umferðir eftir svissneska kerfinu. Umhugsunartími 8+2 á hvern keppenda. Mótið hefst kl. 11 og áætlað er að því ljúki með verðlaunaafhendingu um kl. 14. Stutt hlé verður tekið um 12:30 til að keppendur geti fengið sér næringu.  

Hver skóli getur sent fleiri en eina sveit - en hver sveit er skipuð fjórum nemendum 1.-3. bekkjar (auk allt að fjögurra varamanna). 

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla. 

Veitt verða verðlaun fyrir efstu þrjár sveitirnar og einnig efstu b-e sveitir. Einnig borðaverðlaun fyrir bestan árangur á 1.-4. borði. 

Núverandi Íslandsmeistari barnaskólasveita (1.-3. bekkur) er Vatnsendaskóli. Nánar um mótið í fyrra hér.

Skráning fer fram á Skák.is (guli kassinn efst). Skráningu lýkur á hádegi (12:00), föstudaginn 23. febrúar.

Upplýsingar um þegar skráðar sveitir má finna hér.

Líf og fjör á Friðriksmóti Vinaskákfélagsins

Það var líf og fjör þegar skákmenn komu til leiks á Friðriksmót Vinaskákfélagsins sem var haldið mánudaginn 29 janúar kl: 13, í Vin að Hverfisgötu 47.

Mótið er haldið vegna afmæli Friðriks Ólafsson fyrsta stórmeistara Íslands, en hann átti afmæli 26 janúar og var 83 ára þá.

Tefldar voru 6 umferðir með 7 mínútur á skák. Skákstjóri var Hörður Jónasson og var mótið reiknað til hraðskákstiga.

Meðal skákmanna var afmælisbarnið Björgvin Kristbergsson sem varð 55 ára þennan dag. Ennfremur var gaman að geta þess að skákmaðurinn og skákrithöfundurinn Gunnar Örn Haraldsson sem skrifaði skákbókina um Karpov, tefldi á mótinu.

Í tilefni dagsins þá gaf Bókasafn Vinaskákfélagsins Björvini bókina um Karpov sem höfundurinn áritaði hana með gleði.

En aftur að mótinu. Róbert Lagerman sigraði mótið með fullu húsi eða 6 vinningum, en hann gaf svo afmælisbarninu Björgvini bikarinn og fór hann glaður heim á leið með skákbók og bikar.

Í öðru sæti varð Arnljótur Sigurðsson með 4,5 vinninga og í þriðja sæti var Jóhann Valdimarsson með 4 vinninga. Eftir mótið var boðið upp á kaffi og vöfflur að hætti Inga Hans og var góður rómur gerður að veitingunum. Héldu allir heim á leið mettir og glaðir, þrátt fyrir misjafnt gengi.

Sjá úrslit hér: Chess-Results

Nánar á heimasíðu Vinaskákfélagsins

Vesturbæjarbiskupinn fer fram á þriðjudaginn

Vesturbæjarbiskupinn fer fram 6. febrúar í Hagaskóla og hefst mótið 16:00. Mótið er ætlað nemendum á grunnskólaaldri. Tefldar verða sex umferðir með sjö mínútna umhugsunartíma. Veitt verða verðlaun í þremur flokkum sem sjá má með því að klikka á myndina á viðhengi sem fylgir. 

Mótið er haldið af Skákakademíu Reykjavíkur og Þjónustumiðstöð Vesturbæjar, Miðborgar og Hlíða með stuðningi frá Melabúðinni og Hagaskóla.  

Skráning er á skak.is og er skráningarfrestur til miðnættis 4. febrúar. 

Upplýsingar um þegar skráða keppendur má finna hér.

Skrár tengdar þessari bloggfærslu:

• biskup_2018.pdf

160 krakkar tóku þátt í fjöltefli í Vatnsendaskóla

Föstudaginn 26. janúar var skákdagurinn í tilefni af afmæli Friðriks Ólafssonar fyrsta stórmeistara í skák hadlinn. Í tengslum við það var fjöltefli í Vatnsendaskóla. Metþátttaka var hjá nemendum og fengum við Birkir Karl Sigurðsson skákmeistara til að tefla fjöltefli við nemendur. Birkir Karl telfdi við 160 nemendur og stóð hann vaktina í 4 klukkutíma.

Við þökkum Birki kærlega fyrir skemmtilega heimsókn í Vatnsendaskóla.

Myndir á Facebook-síðu skólans. 

Vignir Vatnar sigurvegari á fyrsta móti Hraðskákmótaraðar TR

Á sjálfum skákdeginum, afmælisdegi Friðriks Ólafssonar, fór fram fyrsta mótið í Hraðskákmótaröð TR sem er nýtt mót í fjölbreyttri mótaflóru Taflfélagsins. 15 vaskir skákgarpar mættu, sumir að tefla fjórða daginn í röð, enda eru Skákþing Reykjavíkur og MótX mótið í gangi, auk þess sem Íslandsmótið í Fischer random fór fram daginn áður. Þetta eru sterk mót, 2000+, en það er líka nóg að hafa einhvern tíman á ferlinum rofið téðan 2000 stiga múr. Auk þess fá nokkrir gestir með minna en 2000 stig að taka þátt, en í þetta sinn voru það Páll Andrason, Róbert Luu, Arnljótur Sigurðsson og Óskar Long Einarsson.

Vignir Vatnar Stefánsson fékk 12,5 vinning af 14 en það þykir ansi gott í þetta sterku hraðskákmóti. Stórmeistarinn Helgi Áss Grétarsson, sem lagði svo skemmtilega til að fjölga umferðum svo allir tefldu við alla, var í öðru sæti með 10,5 vinning. Þriðji varð Dagur Ragnarsson með 10 vinninga.

Kjartan Maack sá um skákstjórn og gekk mótið hratt og snurðulaust fyrir sig. Næsta mót fer fram föstudaginn 23. febrúar en teflt verður síðasta föstudag hvers mánaðar fram að vori.

Nánari upplýsingar um úrslit og lokastöðu má finna á Chess-Results.

Sjá nánar á heimasíðu TR.

Rimaskóli og Grunnskóli Grindavíkur Íslandsmeistarar stúlknasveita

Laugardaginn, 27. janúar sl., fór fram Íslandsmót grunnskólasveita, stúlknaflokkur, í Rimaskóla. Sextán sveitir tóku þátt en teflt var í þremur flokkum. Rimaskóli sigraði í elsta (6.-10. bekkur) og yngsta flokki (1.-2. bekkur) en Grunnskóli Grindavíkur hafði sigur í miðflokknum (3.-5. bekkur). 

Yngsti flokkur (1.-2. bekkur)

Rimaskóli hafði mikla yfirburði í flokknum. Stelpurnar hlutu 18½ vinning í 20 skákum og urðu 1½ vinningi fyrir ofan næstu sveit.

Mikil spenna var um önnur sæti og aðeins munaði 1½ vinning á silfursveitinni og sveitinni í fjórða sæti. Svo fór að Salaskóli tók silfrið og Hörðuvallaskóli bronsið.Sveit Íslandsmeistara Rimaskóla skipuðu:

1. Svandís María Gunnarsdóttir
2. Nikola Klimaszweska
3. Vigdís Lilja Þórólfsdóttir
4. Adda Sif Snorradóttir

Liðsstjóri var Helgi Árnason. 

Silfursveit Salaskóla

Bronssveit Hörðuvallaskóla

 

Lokastaðan

Miðflokkur (3.-5. bekkur)

Grunnskóli Grindavíkur fór með himinskautum í miðflokknum og var þar yfirburðarsigur. Sveitin hlaut 18 vinninga af 20 mögulegum. Spennan um hin verðlaunasætin var hins vegar jafnari og svo fór að sveitir Háteigsskóla og Salaskóla komu hnífjafnar í mark. Var þá gripið til hlutkestis og kom silfrið í hlut Salaskóla en bronsið varð stelpnanna í Háteigsskóla

Sveit Íslandsmeistara Grunnskóla Grindavíkur skipuðu:

1. Svanhildur Röfn Róbertsdóttir 
2. Birta Eiríksdóttir
3. Ólöf María Bergvinsdóttir
4. Helga Rut Einarsdóttir

Liðsstjóri var Siguringi Sigurjónsson

Silfursveit Salaskóla

Bronssveit Háteigsskóla

 

 

Lokastaðan

 

Elsti flokkur (6.-10. bekkur)

Fjórar sveitir tóku þátt í elsta flokki og þar var tefld tvöföld umferð. Rétt eins og í hinum flokkum tveimur lá engin vafi á því hver myndi vinna mótið. Stelpurnar í Rimaskóla höfðu mikla yfirburði og hlutu 20 vinninga í 24 skákum. Samhverfan í úrslitum var reyndar algjör eins og sjá í töflu hér að neðan og koma Foldaskóli og Landakotsskóli hnífjafnir í mark. Var aftur gripið til hlutkestis, en það er mjög sjaldgæft að þess þurfi, hvað þá tvisvar í sama móti, og fékk Foldaskóli silfrið.

Sveit Íslandsmeistara Rimaskóla skipuðu:

1. Nansý Davíðsdóttir
2. Sara Sólvegi Ris
3. Ásdís Birna Þórarinsdóttir
4. Tinna Sif Aðalsteinsdóttir

Liðsstjóri var Helgi Árnason.

Silfursveit Foldaskóla

 

Bronssveit Landaskotsskóla

 

 

Lokastaðan:

Mótshaldið gekk afar vel fyrir sig. Skáksambandið þakkar liðsstjórum fyrir frábært samstarf. Helgi Árnason fær þakkir fyrir lán á skákstað. Skákstjórar voru Ingibjörg Edda Birgisdóttir og Gunnar Björnsson.

Nánari úrslit má finna á Chess-Results.

SÞR #6: Stefán Bergsson óstöðvandi

Við upphaf sjöttu umferðar þurfti að taka upp sögubækurnar og fletta aftur á síðustu öld til að finna skákmann með 6 vinninga eftir 6 umferðir í Skákþingi Reykjavíkur. Þess þarf ekki lengur því þeim áfanga náði hinn grjótharði Stefán Bergsson (2093) síðdegis á sunnudag þegar hann landaði sigri gegn Hrafni Loftssyni (2163). Sú staðreynd að Stefán hafi fullt hús vinninga þegar þrjár umferðir lifa af móti er í senn stórmerkileg en umfram allt stórglæsileg. Gárungarnir velta fyrir sér hverskonar kraftur sé kominn yfir kappann en einhverjir hafa fleygt því fram að þeim finnist sem Stefán hafi allur eflst við hetjusögur af sérsveitarmönnum. Hvað sem því líður þá er ljóst að hann er í lykilstöðu fyrir síðasta þriðjung mótsins enda með 1,5 vinnings forskot.

Stefán sér þó ekki alveg strax til hafnar því fimm vígreifir skákmenn koma næstir með 4,5 vinning, hver og einn fær um að mjaka sér á hinn kalda en eftirsótta topp. Þetta eru þeir Hilmir Freyr Heimisson (2136), Björn Hólm Birkisson (2084), Bragi Halldórsson (2082), Júlíus Friðjónsson (2137) og Sigurbjörn Björnsson (2288). Níu keppendur fylgja með 4 vinninga en athygli vekur að stigahæstu keppendur mótsins eru ekki í efstu sætunum…enn sem komið er.

Á öðru borði gerðu Björn Hólm og Hilmir Freyr meinlaust jafntefli og á því þriðja lagði Júlíus Gauta Pál Jónsson (2161). Nokkuð hefur dregið úr óvæntum úrslitum en þó gerðu Jón Úlfljótsson (1687) og Vignir Vatnar Stefánsson (2304) jafntefli og þá sigraði Örn Alexandersson (1366) Arnar Heiðarsson (1592).

Það er ljóst að síðasti þriðjungur mótsins verður æsispennandi og spurningin sem brennur mest á skákheimi er þessi: Nær einhver að stöðva Stefán Bergsson? Það verður Fide-meistarinn Sigurbjörn Björnsson sem situr fyrst fyrir svörum þegar hann stýrir svörtu mönnunum gegn þeim fyrrnefnda í sjöundu umferð sem fer fram næstkomandi miðvikudagskvöld. Á næstu borðum mætast Júlíus og Björn, sem og Bragi og Hilmir.

Það er eins gott að Birnu-vöfflurnar verði orkumiklar og Birnu-kaffið koffeinríkt til að viðstaddir höndli spennuna sem mun ríkja í Skákhöllinni en flautað verður til leiks á slaginu 19.30. Áhorfendur eru sem fyrr velkomnir. Stöðuna, einstök úrslit ásamt skákum mótsins er að finna á Chess-Results.

Sjá nánar á heimasíðu TR.

 

• Heimasíða TR
• Chess-Results
• Beinar útsendingar (Chess24)

Skákþing Akureyrar: Meistarar í kröppum dansi

Síðastliðinn sunnudag var tefld fjórða umferð á Skákþingi Akureyrar (sem skv. nýjustu útreikningum er hið 81. í röðinni!). Þrjár baráttuskákir voru á dagskrá. Fyrsta skal nefna viðureign bekkjarbræðranna Símonar Þórhallssonar og Benedikts Stefánssonar úr Hörgárdal. Þrátt fyrir lipurlega taflmennsku Bensa framan af skákinni sá hann ekki við brögðum Símonar og mátti játa sig sigraðan. Þá er komið að meisturunum. Rúnar Sigurpálsson, Akureyrarmeistari 2010, lenti í mikilli nauðvörn gegn fulltrúa sýslumanns í mótinu, Sigurði Eiríkssyni. Þrátt fyrir alldrjúgan stigamun, Rúnari í hag, náði Sigurður grimmilegu steinbítstaki á stöðunni og virtist ætla að sigla heilum vinningi í höfn. Honum fataðist þó málsmeðferðin á síðustu metrunum og lék sig í mát. Þá er ógetið viðureignar Akureyrarmeistara síðustu tveggja ára, Jóns Kristins og meistarans frá 2013, Haraldar nokkurs stýrimanns.

Þar mátti búast við sigri stigahæsta keppendans, sem reyndar hafði unnið allar skákir sínar til þessa, en Haraldur tapað sínum. Nú brá hinsvegar svo við að Haraldur náði undirtökum og hélt þeim fast. Jokko reyndi allt hvað hann gat til að grugga vatnið - reyndar mjög tímanaumur - og á endanum féll ungi maðurinn á tíma, en þá var staða hans eiginlega orðin óverjandi. Óvæntustu úrslit mótsins til þessa. 

Nú eru þeir enn efstir, Jón Kristinn og Andri Freyr og á sá síðarnefndi skák til góða. Rúnar nálgast þá félaga, sem hafa þrjá vinninga, en hann hálfum minna.

• Heimasíða Skákfélags Akureyrar
• Chess-Results