Skák.is

Bloggfærslur mánaðarins, apríl 2014

30.4.2014 | 22:53

Bárður Örn og Vignir Vatnar kjördæmismeistarar Reykjaness

Kjördæmamót Reykjanes fór fram í dag. Í eldri flokki sigraði Bárður Örn Birkisson eftir spennandi keppni við tvíburabróður sinn Björn Hólm en það þurfti tvöfalt einvígi þeirra bræðra til að fá fram úrslit sem Bárður vann í bráðabanaskák (Armageddon) eftir að einvígi þeirra hafði endað 1 - 1. Í 3. sæti varð Sóley Lind Pálsdóttir. Frá Reykjanesi í eldri flokki kemur því Bárður Örn á Landsmótið sem fulltrúi kjördæmisins. Björn kemst svo reyndar einnig inn á Landsmótið sem varamaður á skákstigum.

Lokastöðu eldri flokksins má sjá á Chess-Results.

Í yngri flokki var keppni mjög spennandi og þurfti að tefla til úrslita um öll sæti. Svo fór að lokum að Vignir Vatnar vann einvígi við Felix 2-0 um 1. sætið og Bjarki vann úrslitamót við Brynjar og Þorstein um 3. sætið. Frá Reykjanesi í yngri flokki koma því Vignir Vatnar, Felix og Bjarki á Landsmótið sem fulltrúar kjördæmisins.

Einstök úrslit yngri flokksins má sjá á Chess-Results.

Landsmótið í skólaskák hefst á morgun kl. 15. Teflt er í húsnæði SÍ.

Spil og leikir | Slóð | Facebook | Athugasemdir (0)

30.4.2014 | 22:33

Carlsen sigraði á minningarmóti Gashimov

Magnus Carlsen (2881) vann Fabiano Caruana (2783) í tíundu og síðustu umferð minningarmóts um Gashimov sem lauk í dag í Shamkir í Aserbaídsjan. Carlsen hlaut 6,5 vinning í 10 umferðum og var vinningi fyrir ofan Caruana sem varð annar.

Lokastaðan:

1. Carlsen (2881) 6,5 v.
2. Caruana (2783) 5,5 v.
3.-5. Radjabov (2713), Karjakin (2772) og Nakamura (2772) 5 v.
6. Mamedyaraov (2760) 3 v.

Pavel Eljanov (2732) sigraði í b-flokki.

Heimasíða mótsins - beinar útsendingar hefjast kl. 10.

Spil og leikir | Slóð | Facebook | Athugasemdir (0)

30.4.2014 | 07:00

Skákmót Vals - Minningarmót um Hemma Gunn hefst kl. 18

Skákmót Vals, keppnin um VALS-Hrókinn fer fram í Valsheimilinu að Hlíðarenda miðvikudaginn 30. apríl og hefst kl. 18. Tefldar verða níu umferðir eftir svissneska kerfinu og verða tímamörkin 5 2, þ.e. 5 mínútur á alla skákina að viðbættum 2 sekúndum fyrir hvern leik. Keppt er um farandgripinn VALS-Hrókinn sem var gefinn af Jóhanni Eyjólfssyni fyrrverandi formanni Vals en gripurinn sem úr tré kom í leitirnar eigi alls fyrir löngu en fyrst var keppt um hann fyrir meira en 60 árum og meðal sigurvegara á þeim tíma voru Gunnar Gunnarsson og Björn Theódórsson.

Fjölmörg önnur verðlaun verða veitt m.a. varningur frá HENSON fyrirtæki formanns skákdeildar Vals, Halldórs Einarsson. Allir skákunnendur er hvattir til að taka þátt í mótinu og gamlir Valsmenn og konur eru alveg sérstaklega velkomin.

Mótið er helgað minningu Hermanns Gunnarssonar sem féll frá í júní á síðasta ári. Hermann var meðal þátttakenda í keppninni um VALS-Hrókinn á síðasta ári en þá bar Helgi Ólafsson sigur úr býtum. Hermann var sjálfur hörku skákmaður og var á sínum tíma heiðraður af Skáksambandi Íslands fyrir framlag sitt til eflingar skáklistarinnar en hann var stjórnandi fjölmargra skákmóta í sjónvarpi á árunum 1992- 2006.

Meðal þeirra sem hafa boðið komu sína nú eru stórmeistararnir Helgi Ólafsson og Jón L. Árnason.

Mótið nú er haldið af Skákdeild Vals í samvinnu við Skáksamband Íslands.

Skráning fer fram á Skák.is og eru allir velkomnir, ekki síst þeir sem vilja heiðra minningu Hemma Gunn.

Upplýsingar um þegar skráða keppendur má finna hér.

Spil og leikir | Breytt s.d. kl. 12:15 | Slóð | Facebook | Athugasemdir (0)

30.4.2014 | 06:00

Héraðsmót HSÞ fer fram í kvöld

Héraðsmót HSÞ í skák 2014 (fullorðinsflokkur) fer fram í Framsýnarsalnum á Húsavík nk. miðvikudagskvöld 30 apríl og hefst mótið kl 20:30. Þó svo að um sé að ræða fullorðinsmót mega börn og unglingar taka þátt líka en ekki verða veitt verðlaun fyrir U-16 ára þar sem héraðsmótið fyrir þann aldursflokk fór fram í nóvember sl.

Tímamörk 10 mín +5 sek á leik.Umferðafjöldi fer eftir þátttöku, en þó ekki fleiri en 7 umferðir.
Skráning í mótið er hjá formanni í síma 4643187 og 8213187 eða á lyngbrekku@simnet.is

Spil og leikir | Breytt 29.4.2014 kl. 13:41 | Slóð | Facebook | Athugasemdir (0)

29.4.2014 | 22:59

Hjörvar Steinn með vinningsforskot á WOW air mótinu

Stórmeistarinn Hjörvar Steinn Grétarsson sigraði kollega sinn, Hannes Hlífar Stefánsson, í fjórðu umferð Wow air mótsins - Vormóts Taflfélags Reykjavíkur sem fram fór á mánudagskvöld. Hjörvar leiðir því mótið enn með fullt hús vinninga en annar er alþjóðlegi meistarinn Dagur Arngrímsson sem hafði betur gegn Fide meistaranum Ingvari Þór Jóhannessyni. Sjö keppendur koma næstir með 2,5 vinning, þar á meðal stórmeistararnir Hannes Hlífar, Stefán Kristjánsson og Þröstur Þórhallsson.

Í B-flokki er Magnús Pálmi Örnólfsson efstur með 3,5 vinning en hann gerði jafntefli við Torfa Leósson sem kemur næstur með 3 vinninga ásamt Hrafni Loftssyni sem vann Jón Trausta Harðarson. Þrír keppendur fylgja í humátt með 2,5 vinning og er hinn ellefu ára Íslandsmeistari barna, Vignir Vatnar Stefánsson, þar á meðal. Þess má geta að Vignir Vatnar er enn taplaus í mótinu.

Fimmta umferð fer fram næskomandi mánudagskvöld og hefst kl. 19.30. Þá mætast m.a. Hjörvar Steinn og Dagur, Þröstur og Hannes sem og Ingvar Þór og Stefán. Þá glímir Fide meistarinn Sigurbjörn Björnsson við stórmeistarann Friðrik Ólafsson. Í B-flokki verður toppbarátta á milli Magnúsar og Hrafns og þá mætir Torfi liðsfélaga sínum úr TR, Kjartani Maack, sem er ríkjandi skákmeistari félagsins. Hinn ungi Vignir Vatnar spreytir sig gegn Arnaldi Loftssyni og verður fróðlegt að sjá hvort Vignir heldur áfram góðu gengi.

Skákir fimmtu fjórðu umferðar fylgja með sem viðhengi. Það gera einnig skákir fimmtu umferðar öðlingamótsins.

Veljið skák (16 alls):

Veljið skák (15 alls):

Spil og leikir | Breytt s.d. kl. 23:03 | Slóð | Facebook | Athugasemdir (0)

29.4.2014 | 22:51

Aðalfundur Skákdeildar Breiðabliks

Aðalfundur Skákdeildar Breiðabliks verður haldinn í Félagsheimili Breiðabliks í Íþróttahúsinu Smáranum (salur á 2.hæð) kl 21:00 miðvikudaginn 30.apríl (eftir að Minningamóti um Hermann Gunnarsson lýkur).

Dagskrá samkvæmt lögum Breiðabliks:

1. Kosning starfsmanna fundarins.
2. Skýrsla stjórnar
3. Umræður og afgreiðsla á skýrslu stjórnar og og ársreikningi deildarinnar.
4. Umræður um málefni deildarinnar.
5. Kosningar a) formaður, b) aðrir stjórnarmenn, c) varamenn.
6. Önnur mál.

Athygli er vakin á nýrri hugmynd sem rædd verður á fundinum:

"Rússneskur skákskóli í Kópavoginum. Æfingar daglega í Stúkunni milli kl 14:30 - 16:00."

Farið verður yfir nokkra punkta úr fyrirlestri GM Mikhail Kobalia skólastjóra rússneska skákskólans frá s.l. Reykjavíkurskákmóti. Rædd staðan á Íslandi í dag og hvort aðferðir í ætt við rússneska skákskólann henti í Kópavogi.

Aðalfundurinn er opinn og áhugasamir um þessi mál hvattir til að mæta.

Skákdeild Breiðabliks

Spil og leikir | Breytt s.d. kl. 22:54 | Slóð | Facebook | Athugasemdir (0)

29.4.2014 | 15:49

Námskeið fyrir skákstjóra verður haldið 8. og 9. maí

Skáksamband Íslands býður upp á námskeið fyrir íslenska skákstjóra og fyrir þá sem vilja kynna sér betur skákstjórn. Námskeiðið verður haldið fimmtudaginn 8. maí og verður framhaldið föstudaginn 9. maí. Tilvalið fyrir utanbæjarfólk sem gæti þá mögulega tengnt námskeiðið við aðalfund SÍ sem fram fer 10. maí. Kennarar verða Omar Salama, Páll Sigurðsson, Gunnar Björnsson og jafnvel fleiri.

Kennslulýsing (verður ítarlegri síðar)

Páll: Swiss Manager (Chess-Result) og svissneska kerfið.
Gunnar: Hlutverk skákstjóra
Omar: Skákklukkan, skáklögin, reglur um alþjóðlega skákstig og áfangareglur.

Námskeiðið verður opið öllum áhugasömum og verður ókeypis.

Áætlað er að námskeið verði u.þ.b. 19-22 báða dagana.

Skráning fer í tölvupósti í netfangið gunnar@skaksamband.is.

Spil og leikir | Slóð | Facebook | Athugasemdir (0)

29.4.2014 | 07:00

Firmamót Skákdeildar Hauka fer fram í kvöld

Firmamót Skákdeildar Hauka verður haldinn þriðjudaginn 29. apríl 2014 og hefst kl. 19:30. Mótið verður að þessu sinni sameiginlega páska- og sumarmót. Mótið er öllum opið og fyrirkomulag er þannig að þátttakendur sem ekki tilheyra sérstöku fyrirtæki draga það fyrirtæki sem þeir tefla fyrir í mótinu. Við hvetjum alla skákáhugamenn til að mæta á skemmtilegt skákmót.

Eftirtalin fyrirtæki taka þátt í Firmakeppni Skákfélags Hafnarfjarðar og Skákdeildar Hauka 2014:

Landsbankinn, Hvalur hf., Fjarðarkaup ehf., Blómabúðin Dögg ehf., Myndform ehf., Sjóvá, Fura ehf., Hress, Heilsurækt, Aðalskoðun hf., Hópbílar hf., Saltkaup hf., Verkalýðsfélagið Hlíf, Hafnarfjarðarbær, Sælgætisgerðin Góa/Linda, Kentucky Friend Chicken, Actavis hf., Blekhylki.is, Útfararstofa Hafnarfjarðar, Hlaðbær - Colas hf., Tannlæknastofan Flatahrauni 5A., Penninn/Eymundsson, Promens Tempra ehf., Vélaverkstæði Hjalta Einarssonar ehf., H.S. Orka hf., Stálsmiðjan/Framtak ehf., Útfararþjónusta Hafnarfjarðar, Samkaup, APÓTEKIÐ, Lyfja hf., Íslandsbanki hf., Arion-banki hf., Fínpússning ehf., A.H.- pípulagnir ehf., Verkfræðistofa VSB ehf., Fjarðarbakarí, Hraunhamar - fasteignasala, Ás-fasteignasala, Fiskvinnslan Kambur ehf., Páll G. Jónsson, Nonni Gull, úr- og skartgripir og Krónan - verslun

Ofangreindum fyrirtækjum er þakkað kærlega fyrir stuðninginn.

Spil og leikir | Breytt 23.4.2014 kl. 13:57 | Slóð | Facebook | Athugasemdir (0)

28.4.2014 | 17:46

Wow air Vormót TR: Fjórða umferð fer fram í kvöld

Fjórða umferð Wow air Vormóts TR fer fram í kvöld og hefst kl. 19:30. Sex skákir verða sýndar beint og þar á meðal skák Friðriks Ólafssonar sem mætir Þorsteini Þorsteinssyni.

Hjörvar Steinn Grétarsson (2511) er efstur með fullt hús en Hannes Hlífar Stefánsson (2541) og Ingvar Þór Jóhannesson (2377) koma næstir með 2½ vinning. Skák Hjörvars og Hannesar er lokið og verður greint frá úrslitunum íkvöld.

Þær skákir sem sýndar eru beint í kvöld eru: