Bloggfærslur mánaðarins, júlí 2010

31.7.2010 | 20:00

Henrik, Bragi og Bjarni Jens unnu í fyrstu umferð

Stórmeistarinn Henrik Danielsen (2512), Bragi Halldórsson (2253) og Bjarni Jens Kristinsson (2044) sigruðu allir í sínum skákum í fyrstu umferð Politiken Cup sem fram fór í dag í Kaupmannahöfn. Guðmundur Gíslason (2351) gerði jafntelfi en allir tefldu þeir við mun stigalægri andstæðinga.

Önnur umferð fer fram í fyrramálið. Skák Henriks gegn gegn Dananum Klaus Nielsen (2095) verður sýnd beint á vefsíðu mótsins en áhugasamir verða að vera árrisulir þar sem umferðin hefst kl. 7. Tvær umferðir fara fram á morgun.

Hægt er að skoða skák Henriks á Skákhorninu.

Alls taka 292 skákmenn þátt í Politiken Cup í ár, þar af 21 stórmeistari og 4 alþjóðlegir meistarar. Henrik er nr. 18 í stigaröð, keppenda, Guðmundur nr. 29, Bragi nr. 45 og Bjarni Jens nr. 113. Stigahæstur keppenda er úkraínski stórmeistarinn Pavel Eljanov (2755).

Heimasíða mótsins
Beinar útsendingar (2. umf. kl. 7, 3. umf. kl. 14, 4.-9. umf. kl. 12 og 10. umf. kl. 8)

Spil og leikir | Breytt 1.8.2010 kl. 10:32 | Slóð | Facebook | Athugasemdir (0)

31.7.2010 | 19:44

Guðmundur vann í lokaumferðinni

Alþjóðlegi meistarinn, Guðmundur Kjartansson (2384), vann lettnesku skákkonuna Ilze Berzina (2267), sem er stórmeistari kvenna í níundu og síðustu umferð Czech Open sem fram fór í dag. Guðmundur hlaut 5 vinninga og endaði í 88.-135. sæti.

Sigurvegari mótsins varð úkraínski stórmeistarinn Anton Korobov (2657) en hann hlaut 8 vinninga. Í 2.-5. sæti með 7 vinninga urðu alþjóðlegu meistararnir Hans Tikkanen (2469), Svíþjóð, og S.P. Sethuraman (2513), Indlandi, og stórmeistararnir Martin Kravtsiv (2559), Úkraínu, og Sergey Grigoriants (2566) og Artur Gabrielian (2559), Rússlandi.

Árangur Guðmundar samsvaraði 2344 skákstigum og lækkar hann um 5 stig fyrir frammistöðu sína.

Sex skákir Guðmundar eru aðgengilegar á vef mótsins og fylgja þær með fréttinni.

Alls taka 308 skákmenn þátt í efsta flokki Czech Open sem fram fer 23.-31. júlí í Pardubice í Tékklandi, þar á meðal 42 stórmeistarar, 10 stórmeistarar kvenna og 65 alþjóðlegir meistarar. Guðmundur er númer 100 í stigaröð keppenda.

Spil og leikir | Slóð | Facebook | Athugasemdir (0)

31.7.2010 | 12:01

Politiken Cup hefst í dag

Politiken Cup hefst í dag í Helsingör nærri Kaupmannahöfn. Fjórir íslenskir skákmenn taka þátt. Það eru, stórmeistarinn Henrik Danielsen (2512), Guðmundur Gíslason (2351), Bragi Halldórsson (2253) og Bjarni Jens Kristinsson (2044). Allir teflir þeir við mun stigalægri andstæðinga í fyrstu umferð og enginn þeirra verður í beinni útsendingu.

Alls taka 292 skákmenn þátt í Politiken Cup í ár, þar af 21 stórmeistari og 4 alþjóðlegir meistarar. Henrik er nr. 18 í stigarö, keppenda, Guðmundur nr. 29, Bragi nr. 45 og Bjarni Jens nr. 113. Stigahæstur keppenda er úkraínski stórmeistarinn Pavel Eljanov (2755).

Heimasíða mótsins
Beinar útsendingar (1. umf., kl. 12, 2. umf. kl. 7, 3. umf. kl. 14, 4.-9. umf. kl. 12 og 10. umf. kl. 8)

Spil og leikir | Slóð | Facebook | Athugasemdir (0)

30.7.2010 | 20:21

Guðmundur með jafntefli í áttundu umferð

Alþjóðlegi meistarinn, Guðmundur Kjartansson (2384), gerði jafntefli við þýska FIDE-meistarann Juergen Kaufeld (2270) í áttundu og næstsíðustu umferð Czech Open sem fram fór í dag. Guðmundur hefur 4 vinninga og er í 128.-186. sæti.

Í níundu og síðustu umferð, sem fram fer á morgun, teflir Guðmundur við lettnesku skákkonuna Ilze Berzina (2267), sem er stórmeistari kvenna.

Efstur með 7,5 vinning, sem verður að teljast ótrúlegt skor í svo sterku móti, er úkraínski stórmeistarinn Anton Korobov (2657). Í 2.-3. sæti eru alþjóðlegu meistararnir Hans Tikkanen (2469), Svíþjóð, og S.P. Sethuraman (2513)

Fimm skákir Guðmundar eru aðgengilegar á vef mótsins og fylgja þær með fréttinni.

Alls taka 308 skákmenn þátt í efsta flokki Czech Open sem fram fer 23.-31. júlí í Pardubice í Tékklandi, þar á meðal 42 stórmeistarar, 10 stórmeistarar kvenna og 65 alþjóðlegir meistarar. Guðmundur er númer 100 í stigaröð keppenda.

Spil og leikir | Breytt s.d. kl. 20:24 | Slóð | Facebook | Athugasemdir (0)

29.7.2010 | 23:06

Guðmundur tapaði í sjöundu umferð í Pardubice

Alþjóðlegi meistarinn, Guðmundur Kjartansson (2384), tapaði fyrir rússneska skákmeistaranum (CM), Mikhail Antipov (2238) í sjöundu umferð Czech Open sem fram fór í dag. Guðmundur hefur 3,5 vinning og er í 129.-183. sæti.

Í áttundu og næstsíðustu umferð, sem fram fer á morgun, teflir Guðmundur við, þýska FIDE-meistarann Juergen Kaufeld (2270).

Efstur með 6,5 vinning er úkraínski stórmeistarinn Anton Korobov (2657) en annar með 6 vinninga er sænski alþjóðlegi meistarinn Hans Tikkanen (2469).

Fjórar skákir Guðmundar eru aðgengilegar á vef mótsins og fylgja þær með fréttinni.

Alls taka 308 skákmenn þátt í efsta flokki Czech Open sem fram fer 23.-31. júlí í Pardubice í Tékklandi, þar á meðal 42 stórmeistarar, 10 stórmeistarar kvenna og 65 alþjóðlegir meistarar. Guðmundur er númer 100 í stigaröð keppenda.

Spil og leikir | Breytt s.d. kl. 23:11 | Slóð | Facebook | Athugasemdir (0)

28.7.2010 | 21:47

Guðmundur með jafntefli í dag í Pardubice

Alþjóðlegi meistarinn, Guðmundur Kjartansson (2384), gerði jafntefli við króatísku skákkonuna Borka Franciskovic (2253) í sjöttu umferð Czech Open sem fram fór í Pardubice í Tékklandi í dag. Guðmundur hefur 3,5 vinning og er í 72.-127. sæti.

Í 6. umferð, sem fram fer á morgun, teflir Guðmundur við, rússneska skákmeistarann (CM), Mikhail Antipov (2238).

Efstir með 5,5 vinning eru úkraínski stórmeistarinn Anton Korobov (2657) og ísraelski alþjóðlegi meistarinn Mikhail Zaslavsky (2413).

Alls taka 308 skákmenn þátt í efsta flokki Czech Open sem fram fer 23.-31. júlí í Pardubice í Tékklandi, þar á meðal 42 stórmeistarar, 10 stórmeistarar kvenna og 65 alþjóðlegir meistarar. Guðmundur er númer 100 í stigaröð keppenda.

Spil og leikir | Slóð | Facebook | Athugasemdir (0)

27.7.2010 | 20:36

Guðmundur tapaði í fimmtu umferð í Pardubice

Alþjóðlegi meistarinn, Guðmundur Kjartansson (2384), tapaði fyrir indverska alþjóðlega meistarann Santosh Gujrathi Vidit (2492) í fimmtu umferð Czech Open sem fram fór í Pardubice í Tékklandi í dag. Guðmundur hefur 3 vinninga og er í 67.-124. sæti.

Í 6. umferð, sem fram fer á morgun, teflir Guðmundur við króatísku skákkonuna Borka Franciskovic (2253).

Efstir með 4,5 vinning eru stórmeistararnir Anton Korobov (2657), Úkraínu, og Alexandr Rakhmanov (2590) og Artur Gabrielian (2559), Rússlandi, og alþjóðlegu meistararnir Hans Tikkanen (2469) og Axel Smith (2416), Svíþjóð, og Mikhail Zaslavsky (2413), Ísrael.

Tvær skákir Guðmundar eru aðgengilegar á vef mótsins og fylgja hér með.

Alls taka 308 skákmenn þátt í efsta flokki Czech Open sem fram fer 23.-31. júlí í Pardubice í Tékklandi, þar á meðal 42 stórmeistarar, 10 stórmeistarar kvenna og 65 alþjóðlegir meistarar. Guðmundur er númer 100 í stigaröð keppenda.

Spil og leikir | Breytt s.d. kl. 20:38 | Slóð | Facebook | Athugasemdir (0)

26.7.2010 | 22:07

Guðmundur vann í fjórðu umferð

Alþjóðlegi meistarinn, Guðmundur Kjartansson (2384), vann Þjóðverjann Þjóðverjann Jens Schulz (2156) í fjórðu umferð Czech Open sem fram fór í dag. Guðmundur hefur 3 vinninga og er í 19.-62. sæti.

Í 5. umferð, sem fram fer á morgun, teflir Guðmundur við indverska alþjóðlega meistarann Santosh Gujrathi Vidit (2492).

Efstir með fullt hús eru stórmeistararnir Anton Korobov (2657), Úkraínu, og Alexandr Rakhmanov (2590), Rússlandi, og sænski alþjóðlegi meistarinn Hans Tikkanen (2469).

Alls taka 308 skákmenn þátt í efsta flokki Czech Open sem fram fer 23.-31. júlí í Pardubice í Tékklandi, þar á meðal 42 stórmeistarar, 10 stórmeistarar kvenna og 65 alþjóðlegir meistarar. Guðmundur er númer 100 í stigaröð keppenda.

Spil og leikir | Slóð | Facebook | Athugasemdir (0)

26.7.2010 | 13:10

Henrik sigraði á minningarmóti Heini Olsen

Stórmeistarinn Henrik Danielsen (2512) sigraði danska alþjóðlega meistarann Silas Lund (2408) í lokaumferð minningarmótsins um Heini Olsen sem lauk í Klaksvík í Færeyjum í dag. Henrik varð efstur ásamt enska stórmeistaranum Gawain Jones (2568) með 7 vinninga og er auk þess hærri á stigum og telst því sigurvegari mótsins. Árangur Henrik samsvarar 2595 skákstigum og hækkar hann um 11 skákstig fyrir frammistöðu sína.

Þriðji á mótinu varð besti skákmaður Færeyinga, alþjóðlegi meistarinn, Helgi Dam Ziska (2426), en hann hlaut 6 vinninga.

Á Klaksvík Open, sem er opinn flokkur, sem tefldur var samhliða endaði Róbert Lagerman (2282) í 3.-4. sæti með 7 vinninga. Saga Kjartansdóttir stóð sig best ÓSK-anna en hún hlaut 5 vinninga. Ásrún Bjarnadóttir, Þorbjörg Sigfúsdóttir og Guðný Erla Guðnadóttir hlutu 4 vinninga, Stefanía R. Ragnarsdóttir 3 vinninga, Eyrún Bjarnadóttir 2 vinninga og Þrúða Sif Einarsdóttir og Halla Norðfjörð Guðmundsdóttir ½ vinning hvor.

Á minningarmótinu tefldu 10 skákmenn og voru meðalstig 2389 skákstig. Henrik var næststigahæstur keppenda en stigahæstur var enski stórmeistarinn Gawain Jones (2568). Róbert er næststigahæstur í Klaksvík Open en auk hans tefla þar átta stúlkur frá Ó.S.K.

Spil og leikir | Breytt s.d. kl. 13:13 | Slóð | Facebook | Athugasemdir (0)

25.7.2010 | 20:13

Skákþáttur Morgunblaðsins: Sá besti sem aldrei varð heimsmeistari

Þegar spurt er að því hvaða skákmaður hafi verið bestur þeirra sem aldrei hrepptu heimsmeistaratitilinn koma nöfn Kortsnoj og Keres upp í hugann. Saga þess síðarnefnda, Eistlendingsins Paul Keres (1916-1975) er áhugaverð. Á árunum 1954-1962 tók hann þátt í fjórum áskorendamótum og varð alltaf í 2. sæti. Á AVRO-skákmótinu í Hollandi 1938 bar hann sigur úr býtum og skaut aftur fyrir sig öllum helstu meisturum þess tíma.

Viðræður um heimsmeistaraeinvígi við Aljékín voru hafnar þegar seinni heimsstyrjöldin greip inn í. Keres var í Buenos Aires vegna Ólympíumótsins en þegar hann sneri aftur höfðu Eystrasaltslöndin verið innlimuð í Sovétríkin. Stuttu síðar hernámu nasistar Eistland og Keres tók þátt í nokkrum mótum á þeirra yfirráðasvæði. Í stríðslok reyndi Keres að flýja hina nýju og gömlu herra, var handtekinn og yfirheyrður í nokkra daga. Honum var m.a. gefið „að sök“ að hafa búið í sama húsi og þekktur andspyrnumaður. Það mál var tekið fyrir á ráðstefnu sem haldin var um arfleifð Keres í Tallinn árið 2006 en meðal gesta var Friðrik Ólafsson. Því hefur verið haldið fram að skáksnilld Keresar hafi forðað honum frá aftökusveitum Stalíns. Hann var „endurreistur“ og fékk að tefla á fimm manna heimsmeistaramóti sem fram fór í Haag og Moskvu árið 1948. Aðrir keppendur voru Botvinnik, Smyslov, Reshevsky og Euwe en tefld var fimmföld umferð. Sjötti maður, Ruben Fine, hafnaði þátttöku en að Miguel Najdorf skyldi ekki vera með mun eiga sér þá undarlegu skýringu að í Groningen tveim árum fyrr hafi Najdorf stofnað til veðmála um að hann myndi sigra Botvinnik í því móti – og það gekk eftir! Keres tapaði fjórum fyrstu skákum sínum fyrir Botvinnik. Fullvíst er talið að haft hafi verið í hótunum við hann. Til að sanna styrk sinn vann Keres Sovétmeistaramótið þrisvar með stuttu millibili: 1947, 1950 og 1951.

Annálað prúðmenni en keppnismaður; hann lét svo ummælt að nauðsynlegt væri þeim reyndari að temja og vinna unga og upprennandi skákmenn, þeir gætu annars orðið vandmál síðar. Friðrik Ólafssyni gekk illa gegn Keres sem vann Bobby Fischer þrívegis með svörtu. Fyrir löngu gekk ég fram á gamlan Íslandsmeistara sem tjáði viðstöddum að hann hefði skoðað allar skákir sem Keres hafði teflt á ferlinum og þær höfðu reynst honum mikill bálkur fróðleiks.

Keres var mikill meistari í Tsjígorín-afbrigði spænska leiksins. Vann þar marga sigra eins og þennan gegn hinum harðvítuga Efim Geller:

Moskva 1951:

Efim Geller – Paul Keres

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O Be7 6. He1 b5 7. Bb3 d6 8. c3 O-O 9. h3 Ra5 10. Bc2 c5 11. d4 Dc7 12. Rbd2 cxd4 13. cxd4 Bb7 14. Rf1 Hac8 15. Bg5 d5 16. exd5 exd4 17. Bg5 h6 18. Bh4?

Geller brast kjark til að leika 18. Bxh6! gxh6 19. Dd2 með óstöðvandi sókn. Svartur leikur betur, 18. .. Hfd8 og svartur heldur í horfinu.

18. ... Rxd5 19. Dd3 g6 20. Bg3 Bd6 21. Bxd6 Dxd6 22. Dd2

22. ... Rf4! 23. Dxa5

Betra var 23. Be4.

23. ... Bxf3 24. gxf3 Rxh3+ 25. Kg2 Rf4+ 26. Kg1 Rh3+ 27. Kg2 Rf4+ 28. Kg1 Dd5! 29. Rg3 d3! 30. Re4 Df5 31. Db4 Hfe8!

- Þögull leikur og afgerandi. Geller gafst upp því hann átti enga vörn við hótuninni 32. ... Hxe4 ásamt 33. ... Dg5+ og mátar.

Helgi Ólafsson | helol@simnet.is

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.

Grein þessi birtist í sunnudagsmogganum, 18. júlí 2010.

Skákþættir Morgunblaðsins

Spil og leikir | Slóð | Facebook | Athugasemdir (0)

Bloggfærslur mánaðarins, júlí 2010

RSS-straumar

Erlendar vefsíður

Tenglar

Mót í gangi

Lykilvefir

Kennsluvefir

Íslensk taflfélög

Erlendir skákvefir

Almanök

Teflt á netinu

Færsluflokkar

Heimsóknir

Flettingar

Annað

Efni

Leita í þessu bloggi

Skákmót

Mótaáætlun SA (Prufa)

Mótaskráning

Fréttabréf SÍ

Fischer-setur

Auglýsing

Myndaalbúm

Eldri færslur

2018

2017

2016

2015

2014

2013

2012

2011

2010

2009

2008

2007

Innskráning

Innskráning: