Fall er fararheill – komið heilu og höldnu til Bakú – og þó!

Langt ferðalag beið Bakú-faranna í gærdag. Mæting var uppá BSÍ kl. 21:45 í gær og uppá hótel var mætt um kl. 23:00 í kvöld að staðartíma eða tæpum sólarhring síðar.

Á ýmsu gekk á í ferðalaginu. Sumir tóku vart eftir ferðalaginu því þeir sváfu allan tímann. Kannski rétt vaknað til að næra sig. Aðrir geta ekki sofið í flugvélum og voru með stjarfa við komuna til Bakú.

Bragi Þorfinnsson virðist hafa tekið að sér trúðshlutverk bróður síns. Hann gleymdi passanum í flugvélinni og eftir nokkuð jabl, jamm og fuður kom hann í leitirnar eftir að helmingur starfsmanna flugvallarins í Bakú hafði verið kallaður út. Á myndinni má sjá Braga leita af passanum.

Þegar loks var búið að leysa vandamál Braga kom í ljós að farangurinn Íslendinganna 13 skilaði sér ekki. Seinkun var á fluginu frá Kaupamannahöfn til Istanbúl sem varð til þess að töskurnar komust ekki í flugið til Bakú. Þurfti þar hópurinn að fylla út alls konar pappíra sem tók sinn tíma.

Ef ekki úr rætist verða íslensku keppendurnir með óburstaðar tennur í fyrramálið í illa lyktandi fötum! Reyndar er næsta flug með Turkish Airlines í nótt og vonandi verða töskurnar mættar í lobbýið í fyrramálið. Ef ekki verður haldið í næsta stórmarkað til að kaupa tannbursta, tannkrem, nærbuxur og aðrar nauðsynjar.

Vel var tekið á móti okkur í flugvellinum og aragrúi starfsmanna mótshaldara á þönum. Fyrsta tilfinning fyrir mótshaldinu er því góð.

Guðmundur Kjartansson kom í gær en hann kom beint frá Abu Dhabi. Hann var vel útsofinn.

Á morgun fer fram setning mótsins. Hún hefst kl. 18:30 að staðartíma eða 14:30 að íslenskum tíma. Slóð verður á Skák.is fyrir þá sem vilja fylgjast með setningu mótsins sem örugglega verður mikið sjónarspil.

Fyrsta umferð fer fram á föstudaginn. Umferðir hefjast kl. 11 að íslenskum tíma.

Kveðja frá Bakú,

Gunnar Björnsson

Ólympíufarinn: Hallgerður Helga Þorsteinsdóttir

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til leiks Hallgerði Helgu Þorsteinsdóttur, sem teflir á þriðja borði með kvennaliðinu.

Nafn?

Hallgerður Helga Þorsteinsdóttir

Aldur?

23 ára

Hlutverk?

Liðsmaður í kvennalandsliðinu 

Uppáhalds íþróttafélag?

KR og Huginn!

Hvernig er undirbúningi þínum fyrir mótið háttað?

Góður tími í stúderingar í sumar ásamt því að taka þátt í sem flestum mótum á landinu í sumar.

Hvenær tókstu fyrst þátt á Ólympíuskákmóti og hversu oft hefur þú tekið þátt?

Ég tók fyrst þátt 2008 í Dresden – svo þetta verður mitt fimmta Ólympíuskákmót.

Getur þú nefnt frægan skákmann fæddan í Bakú?

Tjah, aðeins einn sem kemur upp í hugann…. - Kasparov. 

Minnisstæðasta atvik á Ólympíuskákmóti?

Mjög minnisstæð ferðin til Khanty-Mansyisk í Síberíu 2010. Borgin er miðstöð olíuvinnslu austan Úralfjalla og mikið ríkidæmi. Aðstæður fyrir keppendur voru ótrúlega góðar, þó íslenski keppendahópurinn hafi verið stressaður áður en farið var af stað þar sem litlar sem engar upplýsingar voru um að flugvöllurinn í borginni væri til og nýjustu upplýsingar gáfu sterklega til kynna að hótelið okkar væri enn í byggingu. Allt var þó klárt þegar við mættum á staðinn og ótrúlegur fjöldi vopnaðra her-/lögreglumanna gættu keppenda á meðan mótið fór fram. Rússarnir ráðlögðu að við mættum ekkert fara í borginni nema í fylgd með fararstjóra frá þeim, henni Nataliyu (íslenski hópurinn fór svona mátulega eftir því  – en gættum þó ávallt að vera ekki fá á ferli). Auðurinn í borginni var mjög misskiptur, og þétt, niðurdrepandi kofahverfi mátti finna nálægt glæsilegum nýjum byggingum. Frostið á veturna fer auðveldlega undir -40°C og minnisstæðast var þegar við heyrðum að fólk byggi enn í tjöldum í fjöllunum/sléttunum í kring.  

Er Kaspíahafið haf eða stöðuvatn?

Grunsamleg spurning sem hlýtur að gefa til kynna að Kaspíahafið sé stöðuvatn. 

Minnisstæða skák á Ólympíuskákmóti og af hverju?

Minnisstæð skákin mín á móti Stolarczyk í Tromsö. Fyrsta skipti sem við lentum á móti sveit blindra og sjóndapra sem er sérstök sveit til að lenda á móti (sér í lagi tekið eftir að í karlaflokki eru blindir menn sem hafa þá aðstoðarmanneskju sem segir þeim hverju var leikið og hafa þeir lítið aukataflborð nær sér sem þeir geta komið við). Andstæðingur minn í þessu tilviki hafði þó reyndar bara þykk gleraugu – en vel tefld skák og unnum við stórsigur á sveitinni sem þó var mjög nálægt okkur á styrkleika.  

Hverjar eru þínar væntingar/vonir um gengi íslensku liðanna?

Hækka okkur um nokkur sæti frá byrjunarröðuninni og tefla vel

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Automatískt Gunnar Björnsson.

Eitthvað að lokum?

Áfram Ísland!

Meistaramót Hugins hefst í kvöld

Meistaramót Hugins (suðursvæði) 2016 hefst miðvikudaginn 31. ágúst klukkan 19:30. Mótið er 7 umferða opið kappskákmót sem lýkur 19. september. Leyft verður að taka 2 yfirsetur í 1.-5. umferð sem tilkynna þarf um fyrir lok næstu umferðar á undan. Vegleg og fjölbreytt verðlaun eru í boði. Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra og íslenskra skákstiga. Skráning í mótið fer fljótlega af stað á skák.is en einnig er hægt að skrá sig með því að hringja í skákstjóra s-866-0116 (Vigfús).

Skákdagar eru mánudagar, miðvikudagar og fimmtudagar en aldrei eru meira en tvær umferðir í viku.

• Skráningarform

Aðalverðlaun:

1. 50.000
2. 40.000
3. 30.000

Aukaverðlaun (miðað er við alþjóðleg skákstig)

• Skákmeistari Hugins (suðursvæði): Kr. 10.000.
• Besti árangur undir  2000 skákstigum:  Skákbók hjá skákbóksölunni að verðmæti kr. 5.000.
• Besti árangur undir 1800 skákstigum:  Skákbók hjá skákbóksölunni að verðmæti kr. 5.000.
• Besti árangur undir 1600 skákstigum: Skákbók hjá skákbóksölunni að verðmæti kr. 5.000.
• Besti árangur stigalausra: Skákbók hjá skákbóksölunni að verðmæti kr. 5.000.
• Unglingaverðlaun (15 ára og yngri), skákbækur hjá skákbóksölunni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

Félagsmenn kr. 3.500; aðrir 4.500-
Unglingar 15 ára og yngri: Félagsmenn: 2.000; Aðrir 3.000.
Allir titilhafar fá frítt í mótið

Umferðartafla:

• 1. umferð, miðvikudaginn, 31. ágúst, kl. 19:30
• 2. umferð, fimmtudaginn, 1. september, kl. 19:30
• 3. umferð, mánudaginn, 5. september, kl. 19:30
• 4. umferð, miðvikudaginn, 7. september, kl. 19:30
• 5. umferð, mánudaginn, 12. september, kl. 19:30
• 6. umferð, fimmtudaginn, 15. september, kl. 19:30
• 7. umferð, mánudaginn, 19. september, kl. 19:30

SA unnu TRuxva nokkuð örugglega

Á sama tíma og viðureign TR og TG fór fram tefldu saman lið Skákfélags Akureyrar og unglingaliðs TR, TRuxva. Stór hluti liðsmanna TR voru nýkomnir frá EM í Prag og voru því heitir, en á sama tíma líklega svolítið þreyttir. Lið SA var frekar undirmannað en það liggur við að lið TR hafi verið yfirmannað.

Á fyrsta borði var Vignir Vatnar Stefánsson. Vignir stóð fyrir sínu og halaði inn 9 1/2 vinningum. Það er ekki hægt að taka það af honum Vigni að hann er mjög sterkur í hraðskák og er fljótur að finna góða leiki. Á öðru borði var undirritaður, Gauti Páll Jónsson, sem stóð sig mjög illa. Hann smalaði saman einhverjum fjórum og hálfum vinningi í frekar illa tefldum skákum en var hreinsaður á efri borðum eftir að hafa teflt þar nokkrar mjög góðar skákir. Reyndar fyrir utan skákina með svart á móti Mikka. Hún var glötuð. Hraðskákin er svo yndislega brútal, maður er aldrei búinn að vinna fyrr en kóngurinn er mát. Það þyrfti að vísu nokkuð öflugar sjálfseyðingartölvur til að finna tapleiðina í nokkrum stöðum þar sem menn geta fallið á tíma og tapað en það er annað mál. Á þriðja borði var Bárður Örn Birkisson og á því fjórða var Björn Hólm Birkisson. Þeir fengu um 50% vinningshlutfall hvor og hefðu líklegast náð fleiri vinningum á aðeins betri degi. Á neðri borðum tefldu Aron Þór Mai, Róbert Luu og Alexander Oliver Mai en þeir náðu í nokkra vinninga. Heilt yfir frekar slakur árangur hjá okkar mönnum, nema þá helst hjá Vigni sem hefði þó ef til vill verið til í aðeins meira. Lokaniðurstaðan var 39.5 – 32.5 SA í vil.

Það er nokkuð ljóst að Stórveldi Norðurlands er enn sterkara en ungu mennirnir í TR. Hver veit hversu stór sigur SA manna hefði verið hefðu þeir haft með menn á borð við Fide meistarana Björn Ívar Karlsson, Rúnar Sigurpálsson og Áskell Örn Kárason? Svo maður nefni ekki EM-farana Jón Kristinn Þorgeirsson og Símon Þórhallsson.

En auðvitað er hraðskák fyrst og fremst upp á gamanið og þetta kvöld voru óneitanlega tefldar margar skemmtilegar skákir. Lið TRuxva heldur áfram sömu stefnu og síðustu ár – að mæta miklu sterkara til leiks að ári. TRuxvi þakkar fyrir sig og óskar SA til hamingju með sigurinn!

Gauti Páll Jónsson

Steinþór Baldursson látinn

Steinþór Baldursson er látinn fimmtugur að aldri. Hann lést aðfararnótt sunnudagsins. Steinþór var í stjórn til Skáksambands Íslands frá árinu 2011 til dauðadags og í stjórn Skákfélagsins Hugins (og þar áður Taflfélagsins Hellis) um langt árabil.

Steinþór var einn allra öflugasti skákdómari landsins og hafði alþjóðleg dómararéttindi. Hann var einn skákdómara á Ólympíuskákmótinu í Tromsö 2014 og á Evrópumóti landsliða í Laugardalshöllinni 2015. Steinþór var þrautseigur með afbrigðum og lét veikindin lítt stöðva sig. Hans síðasta skákstjóraverkefni var dómgæsla á Íslandsmótinu á Seltjarnarnesi í maí sl.

Steinþór lætur eftir sig eiginkonu og þrjú börn. Claire og börnum vil ég votta mína dýpstu samúð. 

Steinþórs verður sárt saknað í Bakú þar sem hann hefði án efa notið sín mjög vel.

Frasi Steinþórs, "gríðarlega vandað", mun hins vegar lifa með íslenskri skákhreyfingu um ókomna tíð.

Gunnar Björnsson,
Forseti Skáksambands Íslands

Taflfélag Reykjavíkur vann Taflfélag Garðabæjar

Lið TR og TG mættust í hraðskákkeppni taflfélaga í gær og var glatt á hjalla. Fyrsta umferð fór 4-2 fyrir TR og bar þar hæst að TG-ingurinn Valgarð Ingibergsson hafði sigur á Þorvarði Fannari Ólafssyni og skríkti af gleði í kjölfarið. Hefur annað eins gleðikvak úr barka Valgarðs ekki ómað um sali Faxafensins síðan hann bauð upp á tilboðið „Eitt snickers á 50 krónur, tvö á 100 krónur“ í TR-sjoppunni í gamla daga sem varð til þess að fjölmargir fjárfestu í þessu kosta boði, þar á meðal undirritaður.

Valgarð átti eftir að fara illa með Þorvarð þetta kvöld en í síðari skák þeirra var TR-ingurinn aðeins með 2 sekúndur eftir í steindauðu hróksendatafli þegar Valgarð rétti honum þá ölmusu að bjóða honum jafntefli. Þáði Þorvarður boðið en sá síðar eftir því. „Þetta var verra en tap,“ sagði Varði, beygður en hvergi nærri brotinn. Þetta voru einu punktarnir sem hann missti niður þetta kvöld.

Önnur umferð fór 3½-2½ fyrir TR og var allt útlit fyrir spennandi viðureign þegar að ósköpin dundu yfir og TR vann 6-0 sigur í þriðju umferð. Eftir þetta jókst aðeins forystan jafnt og þétt og urðu lokaúrslitin 52½-19½ fyrir Taflfélag Reykjavíkur. 

Bestum árangri TR-inga náði sá sem þessi orð ritar, Björn Þorfinnsson, með fullt hús, 12 vinninga af 12. Magnus Carlsen hefði vissulega ekki náð fleiri vinningum en taflmennskan var ekkert sérstaklega sannfærandi á köflum. Yfirleitt var það klukkan sem að tryggði að vinningurinn féll mér í skaut. Þorvarður Fannar fékk 10½ vinning af 12 og formaðurinn Kjartan Maack 9½ af 12. Þá er rétt að minnast á ólseiga frammistöðu Torfa Leóssonar sem tefldi fimm skákir og hlaut 4½ vinning.

Hjá TG-ingum var formaðurinn Páll Sigurðsson með bestan árangurinn eða 50% vinninga. Næstir voru Páll Snædal Andrason og Sigurjón Haraldsson með 4½ vinning af 12. 

Vinningar TR:

• Björn Þorfinnsson – 12 af 12
• Þorvarður Fannar Ólafsson - 10½ af 12
• Kjartan Maack - 9½ af 12
• Eiríkur Björnsson – 8 af 12
• Torfi Leósson - 4½ af 5
• Jon Olav Fivelstad – 4 af 7
• Ólafur Kjartansson – 4 af 12  

Vinningar TG:

• Páll Snædal Andrason - 4½ af 12
• Sigurjón Haraldsson - 4½ af 12
• Valgarð Ingibergsson - 2½ af 10
• Þorlákur Magnússon - 2½ af 12
• Baldur Möller - 2½ af 12
• Svanberg Pálsson – 2 af 12
• Páll Sigurðsson – 1 af 2

Ólympíufarinn: Gunnar Björnsson

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til leiks Gunnar Björnsson, sem verður fulltrúi Íslands á þingi alþjóða skáksambandsins.

Nafn?

Gunnar Björnsson

Aldur?

48

Hlutverk?

FIDE-fulltrúi. Ég mun svo vera í alls konar öðrum hlutverkum eins og t.d. að koma fréttum á framfæri auk þess sem reynslan kennir mér frá fyrri Ólympíuskákmótum að alls konar verkefni þarf að leysa þegar komið er á skákstað. 

Uppáhalds íþróttafélag?

Valur, Liverpool og Huginn. Svo hef ég miklar taugar til Þróttar og hverfisfélagsins Leiknis.

Hvernig er undirbúningi þínum fyrir mótið háttað?

Það er mikil törn að undirbúa þátttöku á Ólympíuskákmóti og mjög stór hluti vinnutíma míns síðustu vikur hefur farið í það. Ekki síst í fjáröflun en þátttaka á Ólympíuskákmóti er mjög kostnaðarsöm. 

Hvenær tókstu fyrst þátt á Ólympíuskákmóti og hversu oft hefur þú tekið þátt?

Þetta er mitt fjórða Ólympíuskákmót. Ég fór sem liðsstjóri í opnum flokki í Mallorca 2004. Síðan 2010 hef ég farið á öll Ólympíuskákmót og þá sem FIDE-fulltrúi og í öðrum tilfallandi hlutverkum. T.a.m. varð ég liðsstjóri kvennaliðsins 2010 með eins dags fyrirvara vegna veikinda þess sem átti að fara. 

Getur þú nefnt frægan skákmann fæddan í Bakú?

Emil Sutovsky. 

Minnisstæðasta atvik á Ólympíuskákmóti?

Ólympíuskákmót eru veisla frá upphafi til enda. Ætli FIDE-kosningarnar í Khanty Manskiesk árið 2010 séu mér ekki minnisstæðastar og öll baráttan í kringum þær.

Er Kaspíahafið haf eða stöðuvatn?

Hlýtur að vera haf. Annars héti það ekki haf.Skólabækur segja ekki alltaf satt.

Minnisstæða skák á Ólympíuskákmóti og af hverju?

Sennilega skák Lenku í lokaumferðinni í Khanty 2010. Íslenska liðið tefldi þá á móti liði Jamaíka. Lenka féll næstum því á tíma (átti eina sekúndu eftir) en vann gríðargóðan mikilvægan sigur. Sigurinn tryggði gott sæti Íslands og Lenku áfanga að alþjóðlegum meistaratitli. Allir keppendur Jamaíka fylgdust með skákinni og andvarpið sem kom frá hópnum þegar Lenka lék með 1 eina sekúndu eftir fór ekki framhjá manni!

Hverjar eru þínar væntingar/vonir um gengi íslensku liðanna?

Ég er bjartsýnn. Tíu sæti upp miðað við röðun fyrir mót væri mjög gott.

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Kiddi Vidjó (Kristján Örn Elíasson). Engin spurning. 

Eitthvað að lokum?

Hvet alla til að fylgjast vel með hópnum og hvetja hann áfram. Áfram Ísland!

Ljósanæturmót HS orku fer fram á laugardaginn

Skákfélag Reykjanesbæjar í samstarfi við HS Orku halda Ljósanæturmót laugardaginn 3.sept kl.13:00. Tefldar verða 11 umferðir með 7 mínútna umhugsunartíma og í einum opnum flokki. Staðsetning í Njarðvíkurskóla og skráning hér að ofan í gula kassanum. Lokað verður fyrir skráningu ef fjöldi fer yfir 80 keppendur. 

Verðlaunarfé frá HS Orku er 100.000 kr. og mun deilast. 

• 1.verðlaun 40.000 kr.
• 2.verðlaun 25.000 kr.
• 3.verðlaun 15.000 k.r

Sérstök unglingarveðlaun fyrir 14 ára og yngri 10.000 kr. og fyrir óvæntustu úrstlitin 10.000 kr.

Mæting 12:45 og staðfesta skráningu hjá Palla

Upplýsingar um þegar skráða keppendur má finna hér.

Mótstjóri verður Páll Sigurðsson

Skákæfingar TR hefjast á laugardaginn

Skákæfingar Taflfélags Reykjavíkur hefjast á ný laugardaginn 3.september. Æfingarnar eru fjölbreyttar sem fyrr og hannaðar til þess að mæta þörfum sem flestra áhugasamra skákbarna. Á æfingum félagsins munu börnin fá markvissa kennslu og persónulega leiðsögn sem mun nýtast þeim sem grunnur að framförum í skáklistinni.

Æfingagjöldum fyrir haustmisseri hefur verið stillt í hóf og eru þau 8.000kr fyrir þá æfingahópa sem eru einu sinni í viku. Fyrir þá sem æfa tvisvar í viku eru æfingagjöldin 14.000kr fyrir haustmisserið. Veittur verður systkinaafsláttur í formi 50% afsláttar. Öllum er frjálst að koma í prufutíma án endurgjalds.

Börn geta sem fyrr tekið þátt í Laugardagsæfingunni (kl.14-16) án endurgjalds. Laugardagsæfingarnar, sem hafa verið flaggskip TR um áratugaskeið, verða með örlítið breyttu sniði frá því sem verið hefur, því til stendur að tefla eingöngu á æfingunni. 

Taflfélag Reykjavíkur býður upp á sex mismunandi skákæfingar veturinn 2016-2017: 

Byrjendaæfing I: Lau kl.10:40-11:00 (frítt)

Á þessari æfingu verður eingöngu manngangurinn kenndur. Þessi æfing er því kjörin fyrir þau börn af báðum kynjum sem vilja læra mannganginn frá grunni eða vilja læra tiltekna þætti manngangsins betur. Umsjón með æfingunum hefur Torfi Leósson. 

Byrjendaæfing II: Lau kl.11:15-12:15 (8.000kr)

Þessi æfing er hugsuð fyrir börn af báðum kynjum sem kunna allan mannganginn og eru þyrst í að læra meira og ná betri tökum á skáklistinni. Umsjón með æfingunum hefur Torfi Leósson.

Stúlknaæfing: Lau kl.12:30-13:45 (8.000kr)

Þessi æfing hefur fest sig í sessi sem ein fjölmennasta skákæfing TR. Fyrirkomulag æfingarinnar er óbreytt frá því sem verið hefur síðustu misseri og eru allar stúlkur á grunnskólaaldri velkomnar að slást í hópinn. Umsjón með æfingunum hefur Sigurlaug R. Friðþjófsdóttir. 

Laugardagsæfing: Lau kl.14:00-15:55 (frítt)

Laugardagsæfingarnar verða með eilítið breyttu sniði þetta starfsárið. Til stendur að tefla allan tímann og verður blásið til Stigakeppni sem verður með keimlíku sniði og stigakeppnin sem sló svo eftirminnilega í gegn á síðasta vormisseri. Æfingin er fyrir bæði stráka og stelpur og er án endurgjalds. Umsjón með æfingunum hefur Veronika Steinunn Magnúsdóttir.

Afreksæfing A: Lau kl.16:05-17:35 & Fim kl.16:00-17:30 (14.000kr)

Afreksæfing A verður með hefðbundnu sniði frá því sem verið hefur og er æfingin hugsuð fyrir sterkustu skákbörn og unglinga TR af báðum kynjum. Æft verður tvisvar í viku, á fimmtudögum og laugardögum. Umsjón með æfingunum hefur Daði Ómarsson. 

Afreksæfing B: Sun kl.10:45-12:15 (8.000kr)

Afreksæfing B er ný af nálinni og er henni ætlað að koma til móts við þau skákbörn TR, af báðum kynjum, sem hafa mikinn áhuga á að taka framförum í skáklistinni. Þessar æfingar eru hugsaðar fyrir þau sem vilja ná langt í skák en eru komin styttra á veg en þau sem eru í Afrekshópi A. Umsjón með æfingunum hefur Kjartan Maack.

 

Afmælismót TV fer fram 10. og 11. september

Helgina 10.-11. september 2016 fer fram atskákmót í Eyjum í tilefni af  90 ára  afmæli Taflfélags Vestmannaeyja.

Keppendur verða úr Eyjum og á fastalandinu. Reiknað er með flestir keppendur ofan af landi komi með Herjólfi laugardaginn 10. september. frá Landeyjahöfn kl. 09.45 og til Eyja um kl. 10.30.  Akstur frá Reykjavík til Landeyjahafnar tekur tæplega  2 klst. og þurfa farþegar og ökutæki að vera mætt 30 mín. fyrir brottför Herjólfs frá Landeyjahöfn.  Algengt er  að farþegar geymi ökutæki sín á bílastæðum í Landeyjahöfn meðan á dvöl þeirra í Eyjum stendur.

Næsta  ferð til Landeyjahafnar frá Eyjum að loknu skákmótinu  er kl. 18.30  sunnudaginn 11. sept og nú síðasta þann dag  kl. 21.00 um kvöldið. Mæting um borð  30 mín. fyrir brottför.

Tefldar verða níu umferðir, umhugsun 20 mín.  á  skák  auk 5 sek. á hvern leik.  Reiknað er með að umferðin taki um 60 mín. Skákstjóri verður  Stefán Bergsson.

Laugardagur 10. sept. 2016

Kl. 12.00 – 17.00  Tefldar verða fimm umferðir fyrri daginn.

Kl. 17.00 – 18.00   Skoðunarferð með rútu um Heimaey.

Sunnudagur 11. sept. 2016

Kl. 12.00 - 16.00   Tefldar verða fjórar umferðir seinni daginn.

Kl. 16.30 – 17.00   Mótsslit og verðlaunahending.

Ekkert þátttökugjald á  atskákmótið og í  skoðunarferðina.

Fyrstu verðlaun  verða 75 þús. kr., önnur verðlaun  kr. 50 þús. kr. og þriðju verðlaun  kr. 25 þús. kr. Landsbankinn er helsti stuðningsaðili mótsins.

Nánari upplýsingar um ferðir til  og frá Eyjum á  herjolfur.is og gistingu í Eyjum  á visitvestmannaeyjar.is   

Skráning þátttakenda á 90 ára afmælismótið  fer fram á Skák.is.

Upplýsingar um þegar skráða keppendur má finna hér. 

Afmælisnefnd Taflfélags Vestmannaeyja.