Skáksögufélagið - síðustu forvöð að gerast stofnfélagar

Hið íslenska Skáksögufélag var stofnað 1. nóvember sl., við viðhöfn á veitingahúsinu Einar Ben, að forgöngu Hrafns Jökulssonar, skákforkólfs Friðriks Ólafssonar, fyrsta stórmeistara okkar og fleiri áhugamanna um skákarf Íslendinga.

Tilgangur þess er að stuðla að rannsóknum og fræðslu um skáksögu Íslands að fornu og nýju. Þá skal félagið beita sér fyrir varðveislu hvers konar skákminja og að gögn sem varða íslenskt skáklíf verði flokkuð og saga þess og mestu skákmeistara skráð. Félagið gengst fyrir og styður útgáfu, málþing og sýningar sem varða sögu manntaflsins á Íslandi og helstu skákviðburða. 

Allir áhugamenn um sögu skáklistarinnar á Íslandi geta gerst félagar í Skáksögufélaginu. Þeir sem ganga í það fyrir árslok 2014 teljast stofnfélagar. 

Stefnt var að því að skráðir stofnfélagar yrðu að lágmarki 64 eða jafnmargir reitunum á taflborðinu. Sá fjöldi hefur nú náðst og einum betur. Engu að síður munu þeir sem sem ganga í félagið í dag teljast í hópi stofnfélaga og fá nafn sitt skráð sem slíkir í sögu þess í fyllingu tímans.    

Allt sem þarf er að skrá sig í dálkinum hér að ofan eða senda nafn og kennitölu á: [e-mail]

Henrik og Hilmir enduðu báðir í verðlaunasætum

Stórmeistarinn Henrik Danielsen (2509) og Hilmir Freyr Heimisson (1856) enduðu báðir í verðlaunasæti á alþjóðlega mótinu í Øbro í Danmörku sem endaði í gær. Henrik hlaut 5,5 vinning í 7 skákum og varð í 1.-4. sæti. Hilmir Freyr hlaut 3,5 vinning eða 50% vinningshlutfall og varð í 1.-2 sæti í sínum stigaflokki. Hilmir tefldi við stigahærri andstæðinga í öllum skákunum nema einni.

Tvær umferðir voru tefldar í gær. Henrik tapaði fyrir Jonny Hector (2506) en vann Arne Matthiesen (2380) í lokaumferðinni. Hilmir tapaði báðum sínum skákum í gær fyrir mun stigahærri andstæðingum.

 

Báðir hækkar þeir á stigum. Henrik hækkar um 3 stig en Hilmir hækkar um heil 73 stig!

Alls tóku 64 skákmenn þátt í mótinu og þar af voru tveir stórmeistarar. Henrik var stigahæstur keppenda en Hilmir var nr. 43 í stigaröð keppenda.

• Heimasíða mótsins
• Mótstaflan

 

Oliver Aron jólasveinn TR

Það var góð stemming á Jólahraðskákmóti Taflfélags Reykjavíkur sem fram fór í gærkvöldi. Tæplega 30 keppendur voru mættir til leiks og allir í fínu formi eftir jólaát undanfarinna daga. Baráttan stóð framan af milli stigahæstu keppendanna, en þó vakti vaskleg framganga "Svíans" Guðmundar Sverris Þór (2051) og Kristófers Ómarssonar (1786) athygli.

Oliver Aron Jóhannesson var þó greinilega í bestu formi keppenda og sigraði að lokum með nokkrum yfirburðum, hlaut 12.5 vinninga úr fjórtán skákum. Í öðru til þriðja sæti með 10 vinninga komu svo Lenka Ptácniková og Örn Leó Jóhannsson sem átti góðan endasprett.

Ánægjulegt var að sjá árangur yngstu keppendanna, en TR-ingarnir Vignir Vatnar Stefánsson og Mikhailo Kravchuk sem báðir taka þátt í Norðurlandamótinu sem fram fer í Færeyjum í febrúar komu í mark í 7.-10. sæti með 8.5 vinninga ásamt Kristófer Ómarssyni og Bárði Birkissyni.

Freyja Birkisdóttir (8 ára) sýndi einnig enn á ný hversu efnileg hún er og hlaut 6.5 vinning og vann meðal annars örugglega Björgvin Krisbergsson 1.5-0.5.

Jón Kristinn jólasveinn SA

Þann 28. þessa mánaðar fór fram hið árlega Jólahraðskákmót félagsins. Það voru 10 manns sem mættu í þetta skiptið og tefldu tvöfalda umferð, fóru leikar þannig að Jón Kristinn vann með miklum yfirburðum, fékk 17,5 vinninga af 18 mögulegum og var 3 vinningum á undan næstu mönnum. Yngsti keppandinn, Ísak Orri sem er einungis 9 ára, stóð sig með mikilli prýði og fékk 2 vinninga. Annars var lokastaðan þessi:

1.Jón Kristinn Þorgeirsson     17,5 af 18

2-3. Sigurður Arnarson,        14,5

     Smári Ólafsson

4. Sigurður Eiríksson          11

5. Haki Jóhannesson            9

6. Andri Freyr Björgvinsson    8,5

7. Karl Steingrímsson          6,5

8. Einar Guðmundsson           4,5

9-10. Jón Magnússon,           2

      Ísak Orri  

Íslenska landsliðið í bréfskák í 3. - 4 sæti í úrslitakeppni Evrópumóts landsliða

Nú þegar úrslitakeppni Evrópumóts landsliða er komin vel af stað er íslenska landsliðið í 3. – 4. sæti, en 13 þjóðir taka þátt í mótinu. Stigahæta þjóðin er Þýskaland með 2588 meðalstig. Ísland er í 11. sæti með meðalstigin 2448. Mótið hófst í júní.

Litháar verma efsta sætið eins og sjá má hér að neðan:

1. Litháen 13 vinningar
2. Ísrael 11,5
3. Ísland                                11
4. Austurríki 11

Mótið er firnasterkt og þar má finna lið frá Þýskalandi, Rússlandi, Hollandi og Úkraínu svo einhver séu nefnd, sjá nánar undir slóðinni: https://www.iccf.com/event?id=44123

Íslenska liðið skipa eftirtaldir skákmenn:

1. Daði Örn Jónsson 2531
2. Árni Halldórsson 2482
3. Jón A. Pálsson 2459
4. Árni H. Kristjánsson 2451
5. Þorsteinn Þorsteinsson 2438
6. Eggert Ísólfsson 2416
7. Áskell Ö. Kárason 2410
8. Jónas Jónasson 2401

Skákþing Reykjavíkur hefst á sunnudaginn

Skákþing Reykjavíkur hefst sunnudaginn 4. janúar kl. 14. Tefldar verða níu umferðir eftir svissnesku kerfi og eru tímamörk 1½ klst. á 40 leiki auk 30 sek. á leik. 15 mínútur bætast við eftir 40 leiki auk 30 sek. á leik. Umferðir fara fram tvisvar í viku, á miðvikudögum kl. 19.30 og á sunnudögum kl. 14. Teflt er í húsnæði Taflfélags Reykjavíkur að Faxafeni 12.

Mótið í ár er haldið sérstaklega til heiðurs fyrsta stórmeistara þjóðarinnar, eðal TR-ingnum Friðriki Ólafssyni, sem verður áttræður meðan mótið stendur stendur yfir. Skákmenn eru hvattir til að heiðra meistarann með þátttöku sinni í aðalmóti vetrarins sem nú fer fram í 84. sinn!

Boðið er upp á tvær yfirsetur (bye) í umferðum 2-6. Keppandi skal leggja inn skriflega beiðni um yfirsetu til skákstjóra í síðasta lagi við upphaf umferðarinnar á undan. Hálfur vinningur fæst fyrir yfirsetu.

Dagskrá:

1. umferð sunnudag 4. janúar kl. 14
2. umferð miðvikudag 7. janúar kl. 19.30
3. umferð sunnudag 11. janúar kl. 14.00
4. umferð miðvikudag 14. janúar kl. 19.30
5. umferð sunnudag 18. janúar kl. 14.00
6. umferð miðvikudag 21. janúar kl. 19.30
7. umferð sunnudag 25. janúar kl. 14
8. umferð miðvikudag 28. janúar kl. 19.30
9. umferð sunnudag 1. febrúar kl. 14

Verðlaun:

1. sæti kr. 120.000
2. sæti kr. 60.000
3. sæti kr. 30.000

Besti árangur undir 2000 skákstigum kr. 10.000

Besti árangur undir 1800 skákstigum kr. 10.000

Besti árangur undir 1600 skákstigum - bókaverðlaun

Besti árangur undir 1400 skákstigum - bókaverðlaun

Besti árangur undir 1200 skákstigum - bókaverðlaun

Besti árangur stigalausra - bókaverðlaun

 

Fide stig gilda við úthlutun stigaverðlauna - annars íslensk stig.

Þátttökugjöld:

kr. 5.000 fyrir 16 ára og eldri
kr. 2.500 fyrir 15 ára og yngri

Keppt er um titilinn "Skákmeistari Reykjavíkur 2015" og hlýtur sá keppandi sem verður efstur þeirra sem eiga lögheimili í Reykjavík, eða eru félagsmenn í reykvísku skákfélagi, titilinn og farandbikar til varðveislu í eitt ár. Núverandi Skákmeistari Reykjavíkur er alþjóðlegi meistarinn Jón Viktor Gunnarsson.

Verði keppendur jafnir að vinningum í þremur efstu sætunum, verður verðlaunum skipt (Hort útreikningur), en stigaútreikningur látinn skera úr um verðlaunasæti. Í aukaverðlaunaflokkum ganga verðlaun óskipt til þess, sem hefur flest stig eftir stigaútreikning.

Skákþingið er reiknað til alþjóðlegra skákstiga.

Skráning fer fram á heimasíðu Taflfélags Reykjavíkur. Hægt er að fylgjast með skráningu hér.

Vinsamlegast mætið tímanlega á skákstað til að staðfesta skráningu og greiða þátttökugjald. Athugið að skráningu lýkur 15 mínútum fyrir auglýst upphaf móts, þ.e. kl. 13.45.

• Skákþing Reykjavíkur 2014
• Skákmeistarar Reykjavíkur
• Mótstöflur

Jólamót Víkingaklúbbsins fer fram í kvöld

Jólamót Víkingaklúbbsins verður haldið þriðjudaginn 30. des í húsnæði Skáksambands Íslands og hefst það kl 19.30. Teflt verður bæði skák og Víkingaskák. Fyrst 7. umf skákmót með 5 mínútna umhugsunartíma, en eftir það verða 7. umferðir í Víkingaskák, þs 7 umferðir 7. mínútur.  

Verðlaun í boði fyrir þrjú efstu sæti og ókeypis veitingar, m.a Víkingamjöður.  Ekki er nauðsynlegt að taka þátt í báðum mótunum og þeir sem ætla að tefla einungis Vîkingaskák mæta ekki seinna en kl 21.30.  Víkingaskákmótið er jafnframt Ìslandsmótið í Víkingahraðskák.  Einnig eru veitt sérstök verðlaun fyrir besta árangur í báðum mótunum, en sá sem er með besta árangurinn úr báðum mótunum er jafnframt Íslandsmeistari í tvískák.

Skráning á mótið fer m.a fram á netfangið: vikingaklubburinn(hjá)gmail.com

Mjög gott gengi Henriks og Hilmis

Stórmeistarinn Henrik Danielsen (2509) og Hilmir Freyr Heimisson (1856) byrja með miklum látum á alþjóðlega mótinu í Øbro í Danmörku. Henrik er í 1.-2. sæti með 4,5 vinning eftir 5 umferðir og Hilmir hefur 3,5 vinning eftir sigur á tveimur mun stigahærri andstæðingum.

Henrik gerði í gærkveldi jafntefli við danska alþjóðlega meistarann Jens Ove Fries Nielsen (2426) og vann FIDE-meistarann Niels Jørgen Fries Nielsen (2332) í kvöld. Ritstjóra er ekki kunnugt um hvort þeir kumpánar séu bræður, feðgar eða alls óskyldir.

Hilmir er efstur í sínum stigaflokki en í tveimur síðustu umferðum vann hann tvo Dani sem eru umtalsvert stigahærri en hann (1988-2145) og er í 8.-15. sæti.

Mótinu lýkur með tveimur umferðum á morgun.

Alls taka 64 skákmenn þátt í mótinu og þar af eru tveir stórmeistarar. Henrik er stigahæstur keppenda en Hilmir er nr. 43 í stigaröð keppenda.

• Heimasíða mótsins
• Mótstaflan

 

Guðmundur vann í fyrstu umferð í Hastings

Alþjóðlegi meistarinn Guðmundur Kjartansson (2451) vann enska skákmanninn og Íslandsvininn Alan Byron (2188) í fyrstu umferð alþjóðlega mótsins í Hastings. 

Guðmundur teflir við franska stórmeistarann Romain Edouard (2659) í annarri umferð sem fram fer á morgun en Frakkinn er næststigahæstur keppenda.

Alls taka 110 skákmenn þátt frá 29 löndum þátt í þessu fornfræga móti. Þar af eru 14 stórmeistarar og 9 alþjóðlegir meistarar. Guðmundur er nr. 15 í stigaröð keppenda.

• Heimasíða mótsins
• Chess-Results
• Beinar útstendingar (hefjast kl. 14:15)

Jólahraðskákmót TR fer fram í kvöld

Jólahraðskákmót Taflfélags Reykjavíkur verður haldiðmánudaginn 29. desember kl. 19.30. Tefldar verða 2x7 umferðir með 5 mínútna umhugsunartíma. Mótið fer fram í húsnæði T.R. að Faxafeni 12. Þátttökugjald er kr. 500 en frítt fyrir 15 ára og yngri. Verðlaun fyrir þrjú efstu sætin. Sigurvegari síðasta árs var Jóhann Örn Ingvason.

Hlökkum til að sjá ykkur!