Skákþáttur Morgunblaðsins: Stefán Bergsson er skákmeistari Reykjavíkur 2018

Stefán Bergsson er skákmeistari Reykjavíkur 2018 eftir sigur í lokaumferð mótsins sem fram fór sl. miðvikudagskvöld þegar hann tefldi við Dag Ragnarsson. Stefán hlaut átta vinninga af níu mögulegum, náði snemma forystunni með hverjum sigrinum á fætur öðrum, og það var ekki fyrr en í áttundu umferð að stigahæsti keppandi mótsins, Bragi Þorfinnsson, stöðvaði sigurgönguna en í lokaumferðinni var Stefán aftur kominn á ferð og vann örugglega.

Stefán er frá Akureyri og fékk sitt skákuppeldi nyrðra í góðum félagsskap Skákfélags Akureyrar ásamt jafnaldra sínum Halldóri Brynjari Halldórssyni. Hann á lögheimili í Reykjavík og þarf því ekki að sækja handhafa hinnar virðulega nafnbótar neðar í töfluna eins og stundum áður þegar „utanbæjarmenn“ hafa sigrað á þinginu. Stefán er ötull stjórnarmaður hjá Skáksambandi Íslands og veitti Skákakademíu Reykjavíkur forstöðu um margra ára skeið. Frammistaða hans undanfarin ár hefur verið nokkuð sveiflukennd en þetta er langbesti árangur hans á ferlinum.

Í 2. sæti varð Bragi Þorfinnsson með sjö vinninga eftir sigur á Hilmi Frey í lokaumferðinni. Í 3.-4. sæti urðu Sigurbjörn Björnsson og Einar Hjalti Jensson með 6½ vinning og þar á eftir í 5.-10. sæti Bragi Halldórsson, Dagur Ragnarsson, Hilmir Freyr Heimisson, Hrafn Loftsson, Lenka Ptacnikova og Júlíus Friðjónsson, öll með sex vinninga.

Í lokaumferðinni var mikið undir þegar Stefán settist við taflið andspænis Degi Ragnarssyni, sem með sigri gat náð honum að vinningum. Dagur varð í 3. sæti í keppni landsliðsflokks í fyrra og var til alls vís en brást þó bogalistin eftir lélega byrjunartaflmennsku:

Skákþing Reykjavíkur 2018; 9. umferð:

Stefán Bergsson – Dagur Ragnarsson

Frönsk vörn

1. e4 e6 2. d4 d5 3. Rd2 h6?!

Sjaldséður leikur. Dagur var greinilega staðráðinn í að sneiða hjá troðnum slóðum.

4. Rgf3 Rf6 5. e5 Rfd7 6. Bd3 c5 7. c3 Rc6 8. a3 a5 9. Rf1 a4 10. h4 Da5 11. Bd2 Da7 12. Be3 Rb6 13. Rg3 Rc4?

Afleitur leikur sem leiðir til óteflandi stöðu. Betra var 13.... cxd4 þótt hvíta staðan sé alltaf vænleg eftir mislukkaða byrjun Dags.

14. Bxc4 dxc4 15. dxc5! Db8

Vandinn er sá að eftir 15.... bxc5 kemur 16. Bxc5 dxc5 17,. Re4 og síðan – Rd6+ með vinningsstöðu.

16. Bd4 Be7 17. Re4 0-0 18. Dd2 Ra5 19. Hd1 Bd7

Stefán var að bíða eftir þessum leik...

20. Rf6+!

Og nú er svartur algerlega varnarlaus.

20.... Bxf6 21. exf6 Rb3 22. De3 Rxd4 23. Hxd4 Bc6 24. Hg4

– og svartur gafst upp.

 

Jóhann og Björgvin efstir á skákhátíð MótX

Jóhann Hjartarson vann stigahæsta keppanda í fimmtu umferð skákhátíðar MótX, Hjörvar Stein Grétarsson, og komst við það í efsta sætið þegar tefldar hafa verið fimm umferðir af sjö. Hann deilir því með Björgvini Jónssyni sem tók sér ½ vinnings yfirsetu í fimmtu umferð.

 

Í næstu sætum koma svo Hannes Hlífar Stefánsson, Jón Viktor Gunnarsson og Helgi Áss Grétarsson, allir með 3½ vinning. Í næstu umferð tefla saman Hannes Hlífar og Jóhann Hjartarson og Björgvin mætir Helga Ás. Í B-flokki eru fjórir skákmenn efstir, Gauti Pall Jónsson, Birkir Ísak Jóhannsson, Agnar T. Möller og Siguringi Sigurjónsson. Bragi Halldórsson er efstur meðal Hvítra hrafna, með 2½ vinning af þremur mögulegu 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 10. febrúar 2018

Skákþættir Morgunblaðsins