Hádegisfyrirlestur Helga Ólafssonar kl. 11:30 í Bryggjunni brugghúsi

Helgi Ólafsson verður með hádegisfyrirlestur í dag kl. 11:30 í Bryggjunni brugghúsi. Fyrirlesturinn ber nafnið "Bobby Fischer Comes" og fjallar eins og nafnið ber með sér um heimkomu Fischers til Íslands. Helgi er afar góður sögumaður og óhætt er að mæla með fyrirlestrinum.

Tilvalið er að gæta sér á úrvalsmati á Bryggjunni úr tilboðsverði á meðan er hlustað er á Helga en Bryggjan er einn besti matsölustaður landsins samkvæmt TripAdvisor.

 

GAMMA Reykjavíkurskámótið 7.umferð - Rapport og Adhiban orðnir efstir

Richard Rapport og Baskaran Adhiban eru orðnir einir efstir á GAMMA Reykjavíkurskákmótinu en þeir unnu báðir góða sigra í 7. umferðinni sem lauk nú í kvöld.

 

Rapport, sem er stigahæsti skákmaður mótsins með 2715 elóstig, lagði að velli Alexander Lenderman á efsta borði. Rapport tefldi að vanda frumlega og blés til sóknar og yfirspilaði andstæðing sinn sem leyfði honum að máta sig á borðinu.

 

Baskaran Adhiban sem er með 2650 elóstig náði að fylgja Rapport eftir og vann sigur með svörtu mönnunum í Caro-Kann vörn. 

 

Sigurinn kemur Adhiban í góða stöðu þar sem hann mun stýra hvítu mönnunum gegn Rapport í 8. umferðinni. Þeir hafa báðir 6 vinninga eftir umferðinir 7.

 

Fjölmargir skákmenn hafa 5,5 vinning en efstir Íslendinga eru stórmeistararnir Hannes Hlífar Stefánsson, Jóhann Hjartarson og Þröstur Þórhallsson. Hannes gerði gott jafntefli við fyrrverandi heimsmeistarakandídatinn Gata Kamsky en Jóhann og Þröstur unnu stigalægri andstæðinga.

 

Áttunda umferðin hefst á morgun kl. 15:00 og augu flestra verða á viðureigninni á efsta borði á milli Adhiban og Rapport. Jóhann fært svart á Matthieu Cornette á meðan að Þröstur fært hvítt á Alejandro Ramirez og Hannes hvítt á Ravi Haria sem hefur átt gott mót.

 

Skákskýringar verða á sínum stað á mótsstað og einnig er hægt að fylgjast með beinum útsendingum á netinu á chess.com/tv undir stjórn stórmeistarans Simon Williams og alþjóðlega meistarans Fionu Steil-Antoni.

Mustafa Yilmaz sigurvegari á Harpa Blitz annað árið í röð!

Tyrkneski stórmeistarinn Mustafa Yilmaz kom sá og sigraði á hinu árlega Harpa Blitz hraðskákmóti sem fram fór laugardagskvöldið 10. mars.

Alls mættu um 60 keppendur til leiks og auk Yilmaz var hinn ungi Nodirbek Abdusattarov mættur til leiks ásamt fyrrverandi sigurvegara mótsins, Yaacov Norowitz.

Á daginn kom að þessir þrír báru höfuð og herðar yfir aðra keppendur og röðuðu sér í þrjú efstu sætin. Yilmaz og Abdusattarov gerðu innbyrðis jafntefli og var það eina skákin sem Yilmaz vann ekki.

Glæsilegur sigur með 8.5 vinning en Abdusattarov sýndi góða takta og leyfði aðeins eitt jafntefli til viðbótar við Konstantin Kavutsky og fékk 8 vinninga. Norowith var svo í þriðja sæti.

Þeir fengu allir peningaverðlaun fyrir sinn árangur. 

Efstur Íslendinga var Magnus Pálmi Örnólfsson með 6.5 en Róbert Lagerman kom næstur með 6 vinninga ásamt nokkrum öðrum.

Gaman hefði verið að fá fleiri sterka íslenska skákmenn í mótið enda góð verðlaun í boði fyrir stuttan "vinnutíma".

Skákstjórn var undir styrkri stoð Ingibjargar Eddu Birgisdóttur og Ingvars Þórs Jóhannessonar og gekk mótið eins og smurð vél!

 

Úrslit á Chess-results

Páskaeggjamót Víkingaklúbbsins fer fram á fimmtudaginn

Páskaeggjamót Víkingaklúbbsins fyrir börn og unglinga verður haldið í Víkinni Víkingsheimilinu fimmtudaginn 15. mars.  (ekki á miðvikudegi vegna Reykjavík Open) Tefldar verða 6. umferðir með 7 mínútna umhugsunartíma á mann og hefst mótið kl. 17.15. Allir krakkar eru velkomnir og þátttaka er ókeypis.  Veitt verða verðlaun fyrir þrjú efstu sætin, auk þess sem þrjár efstu stúlkur og þrír efstu Víkingar fá verðlaunapening.  Allir keppendur fá páskaegg, en hámarksfjöldi þátttakenda er 40.

Barna og unglingaæfingar Víkingaklúbbsins verða vikulega á miðvikudögum fram á sumar.

ATH:  Nauðsynlegt er að skrá sig (nafn og fæðingarár) til að tryggja þátttöku.

Skráning á mótið fer fram á Skák.is (guli kassinn efst)

Upplýsingar um þegar skráða keppendur má finna hér.

Heimilisfang hér:

Knattspyrnufélagið Víkingur
Traðarlandi 1, 108 Reykjavík

GAMMA Reykjavíkurskákmótið: Umferð dagsins kl. 15 - Kotra kl. 19

Sjöunda umferð GAMMA Reykjavíkurskákmótsins fer fram í dag og hefst kl. 15. Eins og fram kom í gær eru sex skákmenn efstir og jafnir með 5 vinninga og þar á meðal eru ungverski stórmeistarinn Richard Rapport (2715), stigahæsti keppandi mótsins, og indverski undrabarnið Nihal Sarin (2534).

Hannes Hlífar Stefánsson (2533) er efstur íslensku skákmannanna með 4½ vinning, hálfum vinningi á eftir efstu mönnum. Bárður Örn Birkisson (2212), Jóhann Hjartarson (2513) og Þröstur Þórhallsson (2419) koma næstir með 4 vinninga. 

Hannes teflir við sjálfan Gata Kamsky (2677), Jóhann mætir Frakkanum Sebastien Midoux (2319), Bárður Örn við indverska stórmeistarann Kidambi Sundaraajan (2427) og Þröstur við Vera Nebolsian (2211) unnustu Gata Kamsky.

RÚV fjallaði um gang mála í gær og talaði við Vigni Vatnar og Praggnanandhaa (2507) en sá síðarnefndi hafði sigur eftir heljulega vörn Vignis. Sjá nánar hér.

Í gær fór fram afar vel heppnaður hádegisfyrirlestur Guðmundar G. Þórarinssonar á Bryggjunni brugghúsi. Á morgun verður Helgi Ólafsson með slíkan fyrirlestur. Hefst kl. 11:30 og hægt að kaupa sér frábæran mat á góðu verði á meðan hlustað er á Helga. Fyrirlestur Helga ber nafnið Bobby Fischer Comes Home.

Skákskýringar Sigurbjörns Björnssonar hefjast kl. 17. 

Þeir sem vilja hvíla í skák geta spilað á Kotrumóti kl. 19.  Nánari upplýsingar á vefsíðu mótsins. 

Heimasíða mótsins

Úrslit á Chess-Results

Beinar útsendingar með skýringum GM Simon Williams og WIM Fional Steil-Antoni

Íslandsmót barnaskólasveita 2018 - 4.-7. bekkur fer fram næstu helgi

Íslandsmót barnaskólasveita, 4.-7. bekkur, fer fram helgina 17.-18. mars í Rimaskóla. Tefldar verða níu umferðir eftir svissneska kerfinu. Fimm á laugardegi og fjórar á sunnudegi Umhugsunartími verður 10+5 mínútur á skák fyrir hvern keppenda. Taflið hefst kl. 11 á laugardegi og sunnudegi.

Hver skóli getur sent fleiri en eina sveit. Í hverri sveit eru fjórir skákmenn. Keppendur skulu vera í 4.–7. bekk. Skákmenn úr í 1.–3. bekk er leyfilegt að tefla með sínum skóla en þá aðeins í a-sveit hans. Í hverri sveit mega vera allt að þrír varamenn.

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla.

Veitt verða verðlaun fyrir efstu b-e sveitir ásamt verðunum fyrir efstu sveitir af landsbyggðinni.

Veitt verða borðaverðlaun fyrir bestan árangur á 1.-4. borði.

Sigurvegari mótsins hlýtur rétt til þátttöku á Norðurlandamóti barnaskólasveita sem fram fer í september næstkomandi í Finnlandi.

Skráning fer fram á Skák.is. Upplýsingar um þegar skráðar sveitir má finna hér: https://docs.google.com/spreadsheets/d/11jT18zQdVVXTL8WTuNRaRVu5Dxia9H3DivXAb2La5Vc/

Skráningu skal lokið í í síðasta lagi á hádegi 16. mars.. Ekki er hægt að skrá sveitir á skákstað.

GAMMA Reykjavíkurskákmótið 6. umferð - Toppurinn þéttist

Efstu borð á GAMMA Reykjavíkurskákmótinu gerðu jafntefli og það opnaði möguleikann fyrir skákmenn hálfum vinningi á eftir efstu mönnum að ná þeim að vinningum með því að sigra í sínum skákum

Stigahæsti maður mótsins Richard Rapport gerði það og bættist í hópinn og sömu sögu er að segja af Baskaran Adhiban sem vann snaggaralegan sigur á Alejandro Ramirez. Frakkinn ungi Maxime Lagarde vann einnig góðan sigur í sinni skák.

 

Þessir þrír bætast því í hóp þeirra Alexander Lenderman, Nihal Sarin og Mustafa Yilmaz á toppnum sem er gríðarlega þéttur en allir hafa þeir 5 vinninga af 6 mögulegum.

Hannes Hlífar Stefánsson er orðinn efstur Íslendinga með 4,5 vinning og lúrir fyrir neðan efstu menn. Þrír Íslendingar hafa 4 vinninga, þeir eru Báður Örn Birkisson, Jóhann Hjartarson og Þröstur Þórhallsson.

 

7. umferð verður tefld á morgun klukkan 15:00 í Hörpu. Fjölmargar harðar viðureignir verða á toppnum. Rapport mætir Lenderman, Lagarde fær Adhiban á meðan að Yilmaz fær Sarin. Ungstirnið Abdusattarov mætir Eljanov og Hannes fær erfitt verkefni með svörtu mennina gegn Gata Kamsky.

 

Skákskýringar á sínum stað og allir velkomnir.

 

Heimasíða mótsins

Úrslit á Chess-Results

Beinar útsendingar með skýringum GM Simon Williams og WIM Fional Steil-Antoni

Peter og Arne sigurvegarar á Reykjavik Open Pub Quiz

Þrátt fyrir að við Íslendingar höfum leikið Hollendinga grátt á knattspyrnusviðinu þá náðu þeir fram hefndum á hinu árlega Reykjavik Open Pub Quiz. 

Peter Doggers og Arne Moll eru miklir Íslandsvinir en Doggers hefur séð um beinar útsendingar á Reykjavik Open í fjölda ára og Arne komið sem gestur í nokkur skipti.

Það er jafnframt gaman að segja frá því að þeir hafa báðir unnið Pub Quizzið áður en þó ekki saman í liði! Að því að höfundur best veit eru þeir þeir einu sem hafa unnið Quizzið tvisvar!

Sem fyrr voru lagðar fyrir gesti 30 spurningar um skákmálefni og skáksögu. Mesta áherslan var á spurningar tengdar Bobby Fischer enda mótið tileinkað minningu hans.

Fjölmörg lið voru mætt til leiks frá ýmsum þjóðlöndum. Á endanum höfðu Peter og Arne betur með 24,5 stig en í öðru sæti voru fróðir Íslendingar, Aðalsteinn Thorarensen og Ágúst Örn Gíslason en þeir voru grátlega nálægt sigri með 23,25 stig og voru jafnvel einni "last minute" breytingu og einum misskilningi frá naumum sigri.

Skrár tengdar þessari bloggfærslu:

• Reykjavik Open Pub Quiz 2018

Vatnsendaskóli Íslandsmeistari barnaskólasveita í flokki 1.-3. bekkjar

Íslandsmót barnaskólasveita í flokki 1.-3. bekkjar fór fram 24. febrúar síðastliðinn í Rimaskóla. Mjög góð þátttaka var á mótinu en 29 efnilegar skáksveitir mættu til leiks. Ein gestasveit var á mótinu en það var skáksveitin Rödvet Sjakk frá Noregi, undir stjórn Boga Pálssonar sem þar sinnir skákkennslu. Snemma var ljóst að Íslandsmeistararnir frá því í fyrra, hin öfluga skáksveit Vatnsendaskóla, hefði talsverða yfirburði á mótinu. Liðið lagði helsta keppinaut sinn, Háteigsskóla, í innbyrðis viðureign og þar skildi á milli liðanna. Vatnsendaskóli lauk keppni með 24,5 vinning í efsta sæti og var sigurinn nokkuð öruggur. Vatnsendaskóli átti jafnframt flestar sveitir á mótinu, eða alls fimm talsins. Í öðru sæti var a-sveit Háteigsskóla með 20,5 vinning og í þriðja sæti a-sveit Rimaskóla með 17,5 vinning.

Íslandsmeistararnir frá Vatnsendaskóla ásamt Einari Ólafssyni sem hefur unnið gott starf í skólanum. Sigursveit Vatnsendaskóla var skipuð Mikael Bjarka Heiðarssyni, Arnari Loga Kjartanssyni, Jóhanni Helga Hreinssyni og Guðmundi Orra Sveinbjörnssyni.

A-sveit Háteigsskóla sem var í 2. sæti. Á myndinni má sjá liðsmennina Jósef Omarsson, Markús Orra Jóhannsson, Antoni Pálsson Paszek og Óla Stein Thorsteinsson ásamt liðsstjóra sínum og þjálfara, Lenku Ptacnikovu.

A-sveit Rimaskóla varð í 3. sæti. Á myndinni má sjá liðsmennina Hinrik Leó Friðriksson, Inga Alexander Sveinbjarnarson, Sindra Snæ Hjaltason og Guðmund Reyni Magnússon ásamt Helga Árnasyni skólastjóra.

Rimaskóli átti jafnframt efstu b-sveitina og vakti athygli að hún var einungis skipuð stúlkum. Sveitin hlaut 16 vinninga. Skákáhugi meðal stúlkna er mikill í Rimaskóla enda bíður skólinn upp á sérstaka skáktíma fyrir stúlkur.

B-sveit Rimaskóla. Frá vinstri: Nikola Klimaszewska, María Lena Óskarsdóttir, Svandís María Gunnarsdóttir og Heiðdís Diljá Hjartardóttir.

Efsta c-sveitin kom frá Vatnsendaskóla og hlaut 15,5 vinning.

Liðsmenn c-sveitar Vatnsendaskóla voru Árni Kristinn Kristófersson, Alex Bjarki Þórisson, Friðbjörn Orri Friðbjörnsson og Steinar Logi Halldórsson.

D-sveit Vatnsendaskóla varð efst d-sveita og hlaut 13,5 vinning.

E-sveit Vatnsendaskóla varð efst e-sveita og hlaut 11 vinninga.

Skákstjórar og dómarar á mótinu voru Páll Sigurðsson, Siguringi Sigurjónsson og Björn Ívar Karlsson.

Lokastaðan

GAMMA Reykjavíkurskákmótið: Umferð kl. 15, hádegisfyrirlestur og fótbolti

Sjötta umferð GAMMA Reykjavíkurskákmótsins hefst í dag kl. 15. Fischer-slembikóngurinn, Alexander Lenderman (2600) er efstur áamt Tyrkjanum Mustafa Yilmaz (2619) og indverska undradrengnum Nihal Sarin (2534) sem er á góðri leið að hann ná í sinn annan áfanga að alþjóðlegum stórmeistaratitli. 

Björn Þorfinnsson (2399), Þorsteinn Þorsteinsson (2317), Hannes Hlífar Stefánsson (2533), Jóhann Hjartarson (2513) og Vignir Vatnar Stefánsson (2300) eru efstir íslensku keppendanna með 3,5 vinninga. 

Björn teflir við úkraínska ofurstórmeistarann Pavel Eljanov (2713), Þorsteinn við franska stórmeistarann Matthieu Cornette (2620), Hannes við þýska FIDE-meistarann Oliver Bewersdorff (2312), Jóhann við enska alþjóðlega meistarann David Cummings (2322). Sú viðureign sem gæti vakið mesta athygli er skák okkar efnilegasta skákmanns landsins Vignis Vatnars Stefánssonar við indverska undrabarnið Praggnanandhaa (2507).

Skákskýringar hefjast kl. 17 og verða í umsjón Helga Ólafssonar. 

Í dag kl. 11:30 fer fram hádegisfyrirlestur Guðmundar G. Þórarinssonar á Bryggjunni brugghúsi eins og sjá má nánar um hér. Allir velkomnir! Engin aðgangseyrir.

Í kvöld fer fram fótbolti í Fífunni. Mæting í Hörpu kl. 21:30 fyrir áhugasama. 

Heimasíða mótsins

Úrslit á Chess-Results

Beinar útsendingar með skýringum GM Simon Williams og WIM Fional Steil-Antoni.