Skákþáttur Morgunblaðsins: Mikið um óvænt úrslit í fyrstu umferðum Reykjavíkurskákmótsins

33. Reykjavíkurskákmótið tekur nafn frá aðalstyrktaraðila sínum, GAMMA, og er að þessu sinni helgað minningu Bobbys Fischers sem hefði orðið 75 ára á morgun, 9. mars. Bobby lést 17. janúar 2008, 64 ára að aldri. Á þessum rösku tíu árum sem liðin eru síðan hann lést er lífshlaup hans látlaust rifjað upp í blaða- og tímaritsgreinum, heimildarmyndum og kvikmyndum og er óhætt að fullyrða að arfleifð hans sé orðin svo stór í sniðum að hún geti eiginlega séð um sig sjálf, eins og Ronald Reagan sagði víst um fjárlagahallann í Bandaríkjunum. Guðmundur G. Þórarinsson, forseti SÍ einvígisárið 1972, mun halda fyrirlestur um „einvígi aldarinnar“ á Bryggjunni Brugghúsi nk. sunnudag, 11. mars, og hefst hann kl. 11.30. Þá mun greinarhöfundur lesa úr bók sinni „Bobby Fischer comes home“ á sama stað og sama tíma þriðjudaginn 13. mars.

Eitt meginþema Reykjavíkurskákmótsins er iðkun skákafbrigðisins Fischer random, einnig kallað Chess 960 eða slembiskák. Indverjinn Nihal Sarin reið á vaðið á mánudaginn með Fischer-random-fjöltefli í höfuðstöðvum GAMMA við Garðastræti og á morgun, 9. mars, verður haldið í Hörpu Fischer-random-hraðskákmót og má búast við að margir hinna 248 keppenda verði með.

Reykjavíkurskákmótið hefur undanfarin ár tekið á sig form skákhátíðar og fjölmargir hliðarviðburðir á borð við barna-blitz, stúlknafjöltefli Susan Polgar, pub-quiz og margt fleira viðhalda vinsældum mótsins og gera það að verkum að Reykjavík er vinsæll áfangastaður fjölmargra skákáhugamanna sem koma hingað ár eftir ár. Einn þeirra er faðir heimsmeistarans, Henriks Carlsens, sem aðeins teflir á einu móti á ári – Reykjavíkurskákmótinu!

Eftir fyrstu tvær umferðirnar var 22 skákmenn búnir að vinna báðar skákir sínar. Í þeim hópi voru Jóhann Ragnarsson, Gunnar Freyr Rúnarsson og hinn 15 ára gamli Kópavogsbúi Birkir Ísak Jóhannsson. Jóhann Hjartarson, Hannes Hlífar Stefánsson, Guðmundur Kjartansson, Björn Þorfinnsson og Vignir Vatnar Stefánsson voru meðal þeirra sem höfðu 1½ vinning.

Talsvert var um óvænt úrslit og í gær komust nokkrir af þeim stigahæstu í hann krappan:

L'Ami – Ravi Haria

Hollendingurinn Erwin L'ami, sem vann Reykjavíkurskákmótið 2015, fékk þægilega stöðu eftir byrjunina en gáði ekki að sér. Síðasti leikur svarts var 36.... g5. Nú kom:

37. Hg4?? Rc3!

Hótar hróknum og sennilega hefur L'Ami ætlað að leika 38. He1 en séð að eftir 38.... Re2+! missir hann drottninguna eða verður mát. Hann varð að gefa skiptamun og tapaði eftir 45 leiki.

Úkraínumaðurinn Pavel Eljanov hefur átt mikilli velgengni að fagna undanfarin ár þótt hann hafi eitthvað lækkað á heimlistanum, þar sem hann situr í 37. sæti. Hann missti af upplögðu tækifæri í gær gegn einum fulltrúa Indverja á mótinu:

 

Eljanov – Sundararajan

Hvítur getur unnið með 25. e7! Hf2 26. Be6! Þar sem fórnin á g2 gengur ekki upp, 26.... hxg2 27. Kxg2 Rxe3+ 28. Kg1 Dg5+ 29. Kf2 og allir reitir sem skipta máli eru valdaðir. Hann valdi hins vegar að leika 25. Bd5? og eftir 25.... Rf2 26. De5+ Hf6 27. Dh2 Dg5! var svartur sloppinn og þeir sömdu um jafntefli í 33. leik.

Þriðju umferð lauk seint í gærkvöldi en í næstu umferðum munu línur fara að skýrast. Alls verða tefldar tíu umferðir.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 8. mars 2018

Skákþættir Morgunblaðsins

Áskorendamótið í skák hafið í Berlín - Caruana efstur

Áskorendamótið í skák hófst 10. mars sl. í Berlín. Mótið hefur fallið í skuggann af GAMMA Reykjavíkurskákmótinu en frá og með deginum í dag má gera ráð fyrir að augu skákheimist beinist að Berlín. Á ýmsu hefur gengið á og sérstaka athygli vakti sigur Kramniks á Aronian í þriðju umferð þar sem hann yfirspilaði hann með svörtu.

Eftir fjórar umferðir er Caruana (2784) efstur með 3 vinninga. Kramnik (2800) og Mamedyarov (2809) koma næstir með 2,5 vinning.

Staðan

Fimmta umferð hefst kl. 16 í dag. Þá mætast: Aronian-Grischuk, Caruana-Karjakin, So-Kramnik and Ding- Mamedyarov.

Sjá nánar á Chess.com. 

Myndir: Maria Emelianova (Chess.com)

 

• Heimasíða mótsins
• Beinar útsendingar (Chess24)
• Beinar útsendingar (Chessbrah)

Rúnar Sigurpálsson skákmeistari Akureyrar

Þeir Rúnar og Andri Freyr Björgvinsson urðu efstir og jafnir á Skákþinginu og tefldu því til úrslita um titilinn. Báðar kappskákir þeirra enduðu með jafntefli þar sem báðir keppendur tefldu gætilega og héldu sér fast. Þá tóku við tvær atskákir og þar réði reynsla Rúnars úrslitum og hann vann báðar skákirnar nokkuð örugglega.

Þetta er þriðji Akureyrarmeistaratitill Rúnars, sem vann hann fyrst árið 1990 (þá 17 ára gamall) og aftur tuttugu árum síðar. Andri Freyr náði þarna sínum besta árangri til þessa og með sama áframhaldi verður þess skammt að bíða að hann hreppi einn af stóru titlunum. 

Íslandsmót barnaskólasveita 4.-7. bekkur hefst á laugardaginn - skráningarfrestur rennur út á morgun

Íslandsmót barnaskólasveita, 4.-7. bekkur, fer fram helgina 17.-18. mars í Rimaskóla. Tefldar verða níu umferðir eftir svissneska kerfinu. Fimm á laugardegi og fjórar á sunnudegi Umhugsunartími verður 10+5 mínútur á skák fyrir hvern keppenda. Taflið hefst kl. 11 á laugardegi og sunnudegi.

Hver skóli getur sent fleiri en eina sveit. Í hverri sveit eru fjórir skákmenn. Keppendur skulu vera í 4.–7. bekk. Skákmenn úr í 1.–3. bekk er leyfilegt að tefla með sínum skóla en þá aðeins í a-sveit hans. Í hverri sveit mega vera allt að þrír varamenn.

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla.

Veitt verða verðlaun fyrir efstu b-e sveitir ásamt verðunum fyrir efstu sveitir af landsbyggðinni.

Veitt verða borðaverðlaun fyrir bestan árangur á 1.-4. borði.

Sigurvegari mótsins hlýtur rétt til þátttöku á Norðurlandamóti barnaskólasveita sem fram fer í september næstkomandi í Finnlandi.

Skráning fer fram á Skák.is. Upplýsingar um þegar skráðar sveitir má finna hér.

Skráningu skal lokið í í síðasta lagi á hádegi 16. mars. Ekki er hægt að skrá sveitir á skákstað.

Adhiban sigurvegari á GAMMA Reykjavíkurskákmótinu

 

Indverski stórmeistarinn Baskaran Adhiban er sigurvegari á GAMMA Reykjavíkurskákmótinu 2018.

Adhiban var efstur fyrir lokaumferðina en mætti Mustafa Yilmaz í hreinni úrslitaskák í henni. Yilmaz hefði getað tekið titilinn með því að leggja Adhiban að velli en Adhiban nægði jafntefli til að verða einn í efsta sæti. Eftir sviptingar í miðtafli ákvað Yilmaz að hann hefði ekki stöðu til að tefla til vinnings og þrálék sem Adhiban þáði með þökkum enda titilinn þar með í húfi.

Glæsilegur sigur hjá Adhiban með 7.5 vinning af 9 á hans fyrsta Reykjavíkurmóti. Hann sagði fyrir mótið að hann vonaði að "andi Fischers" myndi fylgja honum á mótinu og hann taldi eftir á að hann hefði einmitt gert það! 

Sigur Adhiban er mjög sanngjarn en hann tefldi af miklum krafti og vann sérstaklega góða sigra í 7. og 8. umferð gegn sterkum andstæðingum sem hann hreinlega eyddi af borðinu!

Jafnteflið tryggði Yilmaz annað sætið á stigum en Frakkinn Maxime Lagarde læddist upp í þriðja sætið með því að vera sá eini með 6 vinninga af 8 til að vinna sína skák.

Mikill fjöldi skákmanna náði svo 6.5 vinningum en þeir skipta með sér verðlaunum eftir hinum svokallað Hort kerfi. Hannes Hlífar Stefánsson var einn þeirra en hann var jafnframt efstur Íslendinga eftir tvö mjög þétt jafntefli gegn svörtu mönnum gegn Kamsky í 8. umferð og svo Rapport núna í 9. umferðinni.

Næstir Íslendinga voru þeir Jóhann Hjartarson og Björn Þorfinnsson sem áttu báðir þokkalegt mót.

Nokkrir Íslendinga náðu að hækka all duglega á stigum. Björn Hólm Birkisson (2021) nældi sér í 65 stiga hækkun og Arnar Smári Signýjarson (1351) hækkaði um heil 90 elóstig og Birkir Ísak Jóhannsson nældi sér í 74 stig svo einhverjir séu nefndir.

Tveir áfangar náðust á mótinu en þau Nihal Sarin, þrátt fyrir tap í síðustu umferð, og Deimante Cornette náðu bæði stórmeistaraáfanga á mótinu. Reyndar náði Nodirbek Abdusattorov einnig stórmeistaraáfanga en hann var þegar búinn að ná tilskildum áföngum og verður útnefndur stórmeistari fljótlega.

Úrslit síðustu umferðar: 

 

Viðtal við sigurvegarann Adhiban: 

 

Watch Baskaran Adhiban Wins 33rd Reykjavik Open from Chess on www.twitch.tv

 

Útsending lokaumferðar

Watch Reykjavik Open, Final Round from Chess on www.twitch.tv

GAMMA Reykjavíkurskákmótið áfram í Hörpu til ársins 2021

GAMMA verður aðalstyrktaraðili Reykjavíkurskákmótsins í Hörpu árin 2019-21. Það var tilkynnt við upphaf áttundu og næstsíðustu umferð mótsins í gær. Það samkomulag staðfestu Gunnar Björnsson, forseti Skáksambands Íslands og Agnar Tómas Möller frá GAMMA. Að því loknu lék Agnar Tómas fyrsta leiknum í skák indverska stórmeistarans Baskaran Adhiban og ungverska stórmeistarans Richard Rapport.

Gunnar Björnsson segist fagna áframhaldandi samstarfi við GAMMA um alþjóðlegu Reykjavíkurskákmótin fram til ársins 2021.

„Við höfum starfað með GAMMA frá árinu 2014 og síðan þá hefur mótið í senn vaxið og dafnað. Áherslur GAMMA á fagmennsku og árangur falla vel að framtíðarsýn Skáksambandsins sem væntir góðs af áframhaldandi samstarfi við GAMMA.“

Agnar Tómas segir mjög jákvætt að GAMMA geti áfram stutt við Reykjavíkurskákmótið næstu árin.

„Það er mikilvægt að Reykjavíkurskákmótið haldi áfram að vaxa bæði að vegleika og styrkleika. Mótið er kjölfesta í íslensku skáklífi og ýtir undir grjósku í skákinni. Fyrirkomulag mótsins höfðar vel til almennings sem vill fylgjast með spennandi einvígum og fjölmargir íslenskir skákmenn fá að spreyta sig gegn sterkum erlendum keppendum. Það mun skila öflugra skáklífi þegar fram í sækir,“ segir Agnar Tómas.

Karitas Kjartansdóttir frá Hörpu segist fagna því mjög að hafa skákina áfram í Hörpu en um afar ánægjulegt og gott samstarf er að ræða. „Reykjavíkurskákmótið er einn elsti viðburðurinn í Hörpu og sýnir vel hve viðburðirnir hér eru fölbreyttir, ár eftir ár. Það hefur verið ánægjulegt að sjá hversu gott skákmönnunum finnst að tefla í Hörpu.“

GAMMA Reykjavíkurskákmótið er eitt vinsælasta alþjóðlega skákmót heims og hefur undanfarin ár iðulega verið í efstu sætum í kosningum á meðal atvinnuskákmanna um besta opna skákmót heims.  Nú er í gangi lokaumferð 33. Reykjavíkurskákmótsins.  

GAMMA Reykjavíkurskákmótið: Lokaumferðin hefst kl. 11

Lokaumferð GAMMA Reykjavíkurskákmótsins hefst fyrr en vanalega eða kl. 11. Dagur B. Eggertsson, borgarstjóri, setur umferðina og leikur fyrsta leik hennar. Eins og fram hefur komið hafa Indverjarnir slegið í gegn. Baskaran Adhiban er í vænlegri stöðu fyrir lokaumferðina og dugar jafnteflis til sigurs á mótinu. Indverska undrið, Nihal Sarin, 13 ára, hefur tryggt sér áfanga að stórmeistaratitli.

Hannes Hlífar Stefánsson, sem er efstur Íslendinga, teflir við ungverska ofurstórmeistarann Richard Rapport. 

Heimasíða Reykjavíkurskákmótsins

GAMMA Reykjavíkurskákmótið 8. umferð - Adhiban einn efstur!

Mikið var um að vera í áttundu og næstsíðustu umferð GAMMA Reykjavíkurskákmótsins. Fyrir umferðina voru Rapport og Adhiban efstir með 6 vinninga af 7 og menn spenntir fyrir baráttuskák á milli þessarar frumlegu og skemmtilegu skákmanna. Mjög óvænt þá lék Rapport skelfilega af sér snemma í skákinni og átti enga möguleika og varð þetta ein af fyrstu skákunum í umferðinni til að klárast!

 

Eina skákin sem kláraðist fyrr var þegar indverska ungstirnið Nihal Sarin þrálék gegn andstæðingi sínum til að þvinga fram jafntefli. Venjulegast myndi hann berjast fyrir sigrinum en jafnteflið tryggði honum sinn annan áfanga að stórmeistaratitli og því möguleiki á að hann skrái sig fljótlega á spjöld sögunnar sem einn af yngstu skákmönnum allra tíma til að ná stórmeistaratitlinum. 

 

Adhiban er í algjörri lykilstöðu fyrir lokaumferðina og ljóst að jafntefli mun nægja honum til að vinna GAMMA Reykjavíkurskákmótið í ár. Gríðarlega óvæntur lokahnykkur í skák Daniel Fernandez og Mustafa Yilmaz varð til þess að Yilmaz er einn í öðru sæti eftir sigur á Fernandez. Úrslitin höfðu svo slæm áhrif á Fernandez að hann dró sig úr mótinu sem er ekki til eftirbreytni!

 

Hannes Hlífar Stefánsson er efstur Íslendinga með 6 vinninga af 8 en getur best náð skiptu öðru sæti eftir úrslitin hjá Yilmaz. Hannes er í stórum hópi skákmanna vinningi á eftir Adhiban í þriðja sæti.  Jóhann Hjartarson og Þröstur Þórhallsson hefðu mögulega getað náð Hannesi að vinningum en töpuðu sínum skákum gegn sterkum stórmeisturum.

 

Mikil gleðitíðindi voru tilkynnt í dag þegar GAMMA framlengdi styrktarsamning sinn við mótið til þriggja ára en GAMMA Reykjavíkurskákmótið hefur verið haldið undanfarin fimm ár með GAMMA sem aðalstyrktaraðila og glæsilegan mótsstað í Hörpu. Samningar hafa einnig náðst við Hörpu um að mótið verði næstu þrjú ár í Hörpu.  Þetta eru stórgóðar fréttir fyrir skákhreyfinguna en Reykjavíkurskákmótið er flaggskip hreyfingarinnar og hefur róður þess vaxið mikið í skákheiminum og iðullega hefur mótið verið kosið eitt af þremur bestu opnum mótum heims ár hvert.

 

Níunda og síðasta umferðin á GAMMA Reykjavíkurskákmótinu í ár hefst klukkan 11:00 á morgun, miðvikudag. Yilmaz fær hvítt á Adhiban í síðustu umferðinni í hreinni úrslitaskák!

Hannes fær svart á Richard Rapport en margar athyglisverðar skákir verða á morgun með mikið undir! Hart verður barist um verðlaunasæti og áfanga að titlum og áhorfendur velkomnir á skákstað.

 

Úrslit 8. umferðar

 

Heimasíða mótsins

Úrslit á Chess-Results

Beinar útsendingar með skýringum GM Simon Williams og WIM Fiona Steil-Antoni

 

Útsending 8. umferðar:

Watch Reykjavik Open, Round 8 from Chess on www.twitch.tv

GAMMA Reykjavíkurskákmótið áfram í Hörpu 2019-21

GAMMA verður aðalstyrktaraðili Reykjavíkurskákmótsins í Hörpu árin 2019-21. Það var tilkynnt við upphaf áttundu og næstsíðustu umferð mótsins í dag. Að lokinni tilkynningu þess efnis lék Agnar Tómas Möller, einn eigenda GAMMA, fyrsta leikinn fyrir indverska stórmeistarann Baskaran Adhiban gegn hinum ungverska Richard Rapport en þeir tveir voru efstir fyrir umferðina með 6 vinninga. Agnar lék 1. d2-d4 og það reyndist Indverjanum vel því hann sannfærandi sigur á Ungverjanum í 27 leikjum. 

Viðtal við Agnar á Chess.com má finna að neðan.

 

 

GAMMA Reykjavíkurskákmótið: Umferð kl. 15, skákskýringar og hádegisfyrirlestur

Áttunda og næstsíðasta umferð GAMMA Reykjavíkurskákmótsins hefst kl. 15 í dag. Skákskýringar Helga Áss Grétarssonar hefjast kl. 17:00. Rétt er að minna á hádegisfyrirlestur Helga Ólafssonar, Bobby Fischer Comes Home, kl. 11:30 á Bryggjunni Brugghúsi.

Á efsta borði mætast Adhiban og Richard Rapport en þeir eru efstir með 6 vinninga. Fimm skákmenn hafa 5,5 vinninga. Indverski undradrengurinn Nihal Sarin teflir við landa sinn Suri Vaibhav. Jafnteflir tryggir Sarin áfanga að alþjóðlegum stórmeistaratitli þótt að enn verði einni umferð ólokið.

Þrír Íslendinga hafa 5 vinninga og verða allir í beinni útsendingu í dag. Það eru Jóhann Hjartarson, Þröstur Þórhallsson og Hannes Hlífar Stefánsson. Sigur í dag þýðir möguleika á einu af efstu sætum mótsins. Vignir Vatnar Stefánsson, sem hefur 4,5 vinninga, verður einnig í beinni en hann teflir við hollenska stórmeistarann Erwin L´Ami sigurvegara mótsins frá 2015.

Lokaumferðin er á morgun og hefst kl. 11.

Heimasíða mótsins