70% nemenda í Flúðaskóla tók þátt í skákmóti

Mikil þátttaka var í Halldórsmótinu í skák sem fram fór í Flúðaskóla 22. mars.  Um 70% nemenda úr 3 - 10. bekk tóku þátt. Úrslitin voru mjög spennandi í yngri flokki þar sem þrír efstu keppendurnir voru með jafn marga vinninga, grípa þurfti til sérstakra útreikninga til þess að skera úr um 1. - 3. sæti.

Verðlaunahafar:

Úrslit í 3. - 7. bekk

• 1. Einar Trausti Svansson 7. bekk

• 2. Filip Jan Jozefic 5. bekk
• 3. Halldór Fjalar Helgason 5. bekk

Úrslit í 8. - 10. bekk

• 1. Þórmundur Smári Hilmarsson 10. bekk
• 2. Alex Þór Flosason 9. bekk
• 3. Björgvin Viðar Jónsson 9.bekk

Sjá nánar á heimasíðu Flúðaskóla

Stórmót í Lautinni í gær

Tuttugu þátttakendur skráðu sig til leiks á hraðskákmóti í Laut, athvarfi fyrir fólk með geðraskanir á Akureyri, þar sem Rauði kross Íslands kemur m.a. að rekstrinum. Mótið var haldið kl. 17:30 í gær enda hafði Goðamaðurinn og prestur þeirra Húsvíkinga, Sighvatur Karlsson, boðað komu sína og efnilegra pilta um það leytið.

Lautargengið hafði fengið þá Smára Ólafsson frá Skákfélagi Akureyrar og Arnar Valgeirsson frá Skákfélagi Vinjar til samstarfs og úr varð stórskemmtilegt mót sem var öllum sem að því komu til háborinnar fyrirmyndar!

Hópur frá unglingaherdeild Skákfélags Akureyrar mætti og áhugamenn í Laut - sem ekki eru vanir klukkustressi - tóku alls ósmeykir þátt og stóðu sig frábærlega. Tefldar voru sex umferðir með sjö mínútna umhugsunartíma.

Smári stjórnaði mótinu af mikilli fagmennsku. Fagmennskan réð einning ríkjum í eldhúsinu þar sem nýbakað - a la Helga og Fanney Dóra - var framborið í pásunni og orkuþörfinni svarað.

Skáksamband Íslands og Eymundsson á Akureyri sáu til þess að allir þátttakendur fengju vinninga.

Tveir allra efnilegustu Akureyringarnir, Mikael Jóhann Karlsson og Jón Kristinn Þorgeirsson börðust um sigurinn þar sem Mikael vann með fullu húsi. Jón var með fimm og Smári, Logi Jónsson og Hjörtur Snær Jónsson komu með fjóra. Skákstjórinn dæmdi sjálfan sig umsvifalaust í fimmta sæti og Logi tók þriðja sætið eftir stigaútreikning.

Nokkrir áhugamenn úr Lautinni ætla að mæta galvaskir á mót hjá Skákfélagi Akureyrar á morgun, fimmtudag, gera sitt besta og læra af meistunum. Skákvikan endar svo með litlu "innanfélagsmóti" á föstudag.

Úrslit:

• 6 v.   Mikael Jóhann Karlsson
• 5.      Jón Kristinn Þorgeirsson
• 4.      Logi Jónsson
• 4.      Hjörtur Snær Jónsson
• 4.      Smári Ólafsson
• 3,5.   Páll Jónsson, Arnar Valgeirsson og Snorri Hallgrímsson
• 3 v.   Hlynur Viðarsson, Stefán Júlíusson og Valur Einarsson.

         Aðrir komu svo í humátt þar á eftir.

 

Myndaalbúm

 

Elsa, Jón og Vigfús efst á hraðkvöldi

Elsa María Kristínardóttir, Jón Úlfljótsson og Vigfús Ó. Vigfússon urðu efst og jöfn með 6 vinninga á hraðkvöldi Hellis sem fram fór 21. mars sl. Þau fengu öll 6 vinninga í sjö skákum og voru einnig jöfn á stigum. Þá var Björgvin Kristbergsson fengin til að draga út sigurvegarann og hann dró Vigfús sem dró svo Jón Úlfljótsson út í happdrættinu, þannig að það náðist svona 2/3 af réttlæti sigurvegaranna.

Lokastaðan á hraðkvöldinu:

• 1.   Vigfús Ó. Vigfússon                  6v
• 2.   Elsa María Kristínardóttir           6v
• 3.   Jón Úlfljótsson                          6v
• 4.   Dawid Kolka                             4v
• 5.   Björgvin Kristbergsson             3v
• 6.   Jóhann Bernhard Jóhannsson  2v
• 7.   Pétur Jóhannesson                  1v
• 8.    Ástþór Árni Ingólfsson             1v

Rammislagur: Riddarinn lagði Ása

Hin árlega viðureign klúbba eldri borgara á höfuðborgarsvæðinu ÆSA OG RIDDARA fór fram í ÁSGARÐI, félagsheimili FEB í Stangarhyl í gær, þriðjudaginn 22. mars. Þetta var í 11 sinn sem slík keppni er haldin og hefur Riddarinn oftast farið með sigur af hólmi.

Breiðfylkingar klúbbanna áttust nú við á 21 borði og var keppt í þremur 7 manna riðlum, allir við alla í hverjum riðli.  Alls tóku 50 öldungar þátt í þessum mikla darraðardansi og varð af mikið hark þegar fylkingunum laust saman og ekki laust við að nokkur ásmegin svifi á menn, einkum Æsi og loft varð læviblandið mjög.  Riddararnir náðu þó skjótt vopnum sínum og guldu þá heimamenn mikið afhroð  einkum í B- og C-riðli.. 

Úrslit þessa mikla Rammaslags urðu þau að Riddarinn fór með glæstan sigur af hólmi vann viðureigina í heild með 98 vinningum gegn 49.  Æsir sigruðu þó naumlega í A-riðli með 26 v. gegn 23, þar skiptu aðeins 2 skákir sköpum. Riddarinn vann B-riðilinn með fáheyrðum yfirburðum 41 vinningi gegn 8 og C-riðilinn sömuleiðis með 34 vinningum gegn 15. 

Borðaverðlaun í A-fl. Hlutu þeir Björn Þorsteinsson og Magnús Sólmundarson, Æsum, með 7v. af 7 og Egill Þórðarson úr röðum Riddarans með 5 v. af 7;  í B-fl. Gísli Sigurhansson, Æsum, með 3.5; og Friðgeir K. Hólm og Björn Víkingur Þórðarson úr hópi Riddara, með 6.5 af 7; I C-fl. þeir Kristinn Bjarnason og Jón Steinn Elíasson, Riddaranum, sömuleiðis með 6.5 v. af 7 og Hálfdán Hermannsson með 3.5 v af 5 úr röðum Æsa í Ásgarði.

A-lið ÆSA var þannig skipað: Björn Þorsteinsson; Jóhann Örn Sigurjónsson; Magnús Sólmundarson; Gunnar Kr. Gunnarsson; Þór Valtýsson; Valdimar Ásmundsson og Þorsteinn Guðlaugsson.  A-lið Riddarans skipuðu: Ingimar Jónsson; Sigurður A. Herlufsen; Jón Þ. Þór; Magnús Gíslason; Egill Þórðarson; Hilmar Viggósson og Guðfinnur R. Kjartansson.

Liðstjórar voru þeir, Birgir Sigurðsson, formaður Æsa og Einar S. Einarsson, formaður Riddarans að Strandbergi.  Finnur Kr. Finnsson var aðstoðar- og eftirlitsdómari.

Myndaalbúm

Skákmót öðlinga hefst í kvöld

Skákmót öðlinga 40 ára og eldri hefst miðvikudaginn 23. mars kl. 19.30 í félagsheimili T.R. að Faxafeni 12.  Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina + 30 sekúndna viðbótartími á hvern leik.  Skráning fer fram á heimasíðu TR.

Núverandi öðlingameistari er Bragi Halldórsson.

Dagskrá:

• 1. umferð miðvikudag 23. mars kl. 19.30
• 2. umferð miðvikudag 30. mars kl. 19.30
• 3. umferð miðvikudag 6. apríl kl. 19.30
• 4. umferð miðvikudag 13. apríl kl. 19.30
• 5. umferð miðvikudag 27. apríl kl. 19.30
• 6. umferð miðvikudag 4. maí kl. 19.30
• 7. umferð miðvikudag 11. maí kl. 19.30

Mótinu lýkur miðvikudaginn 18. maí kl. 19:30 með hraðskákmóti og verðlaunaafhendingu.  Keppt er um veglegan farandbikar,en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Þátttökugjald er kr. 4.000 fyrir aðalmótið og kr 500 fyrir hraðskákmótið.  Innifalið er frítt kaffi allt mótið ásamt rjómavöfflum og öðru góðgæti á lokakvöldi.

Skráning fer fram á heimasíðu TR.  Upplýsingar um skráða keppendur má nálgast hér. 

Að loknu afar vel heppnuðu MP Reykjavíkurskákmóti

Það var ýmislegt sérstakt við MP Reykjavíkurskákmótið í ár.   Keppendur hafa aldrei verið fleiri, stórmeistarar hafa aldrei verið fleiri og erlendir gestir hafa aldrei verið fleiri.   Lykilorðið er fleiri!  Fjöldi vel heppnaða hliðarviðburða setti svo svip á mótið.   Af 166 keppendum voru 67 innlendir og 99 erlendir.   Og stigahækkun íslenskra skákmanna var umtalsvert en íslenskir keppendur hækkuðu um alls 300 skákstig!   Íslendingar náðu hins vegar aldrei að blanda sér í toppbaráttuna.  Hannes var þó í lok mótsins aðeins ½ vinningi á eftir efstu mönnum.   Guðmundur Gíslason krækti sér í sinn þriðja áfanga að alþjóðlegum meistaratitli.   Og mótið fékk mikla fjölmiðlaumfjöllun og má þar nefna RÚV, Kastljósið, Morgunblaðið, Fréttablaðið og Viðskiptablaðið.  

Fyrirkomulag

Sumir eru þeirrar skoðunar að mótið sé of opið.  Þrátt fyrir opnun mótsins frá í fyrra er fjölgun íslenskra skákmanna aðeins  um 16, þ.e. úr 51 í 67.  Erlendu keppendunum fjölgaði hins vegar úr 53 í 99!   Og keppendurnir komu frá 30 löndum í staðinn fyrir 22.   Að mínu mati tókst því opnum mótsins fullkomlega og úr varð mikil hátíð.  Að loka mótinu aftur væru því mistök.  Fjölgun erlendra gesta þýðir það að íslenskir skákmenn, hvar sem er í mótinu fá að tefla mun við mun fleiri erlenda andstæðinga en ella.  Auk þess fylgja fleiri erlendum skákmönnum auknar tekjur sem er ákaflega mikilvægt eigi mótið að verða sjálfbært sem hlýtur að vera stefnan.        

Hins vegar gætu verið ýmsir kostir í stöðinni.  Sú hugmynd hefur komið fram að stofna t.d. b-flokk.  Í a-flokki fengu íslenskir skákmenn með t.d. 2300 eða 2350 skákstig eða meira að taka þátt, erlendir skákmenn með 2400 eða meira og svo yrðu gerðar undanþágur fyrir konur og/eða unglinga.   Þessu fylgja kostir, þ.e. mótið verður áfangahæfara en líka ókostir.   Mótið verður e.t.v. ekki jafnspennandi fyrir stigalægri  íslenska skákmenn sem og erlenda gesti sem vilja tefla í sama móti og Luke McShane og Ivan Sokolov. 

Einnig hefur það verið nefnt við mig að mótið sé of stutt til að fá hrein úrslit.  Það er rétt.  Það gæti verið möguleiki að lengja mótið í t.d. 10 eða 11 umferðir.   Þá yrði úrslitin hreinni en því fylgja einnig ókostir.  Mótið tekur lengri tíma og gæti orðið minna aðlaðandi fyrir innlenda og sérstaklega erlenda gesti.  

3ja stiga reglan er annar kostur.  Það fækkar jafnteflum og eykur baráttu.   En þetta væri róttæk breyting og þurfti að hugsa gaumgæfilega.

Skákstaðurinn í Ráðhúsinu er virkilega góður og erlendu gestirnir mjög ánægður með hann.  Auðvitað fylgja honum vissir ókostir enda um að ræða opinberan stað og vinnustað að auki.  En heilt yfir er þessi skákstaður til mikillar fyrirmyndar og t.d. hælir Ivan Sokolov honum mikið.  Ef hins vegar fjölgar enn gæti Ráðhúsið lent á endastöð.  E.t.v. mætti koma allt að 200 keppendum þarna fyrir með því t.d. að loka öðrum innganginum í salnum en lengra verður ekki gengið.    Harpan gæti auðvitað verið kostur. 

Hliðarviðburðir

Fjöldi hliðarviðburða einkenndu mótið.  Hliðarviðburðir voru að mestu leyti í umsjón Skákakademíu Reykjavíkur og Stefán Bergsson framkvæmdastjóra hennar.  

Þar bar  einna hæst Deloitte Barna Blitz þar sem áttust við átta af sterkustu krökkum Reykjavíkur.  Oliver Aron Jóhannesson kom sá og sigraði.   Nánar um mótið hér. 

Deloitte stóð einnig fyrir í samstarfi við SÍ einvígi á milli Sokolov og Helga Ólafssonar.  Sokolov sigraði í afar skemmtilegu einvígi 3-1.  Nánar um einvígið hér.

Akademían stóð fyrir Stelpuskákmóti.  Þar kom Jóhanna Björg Jóhannsdóttir og sigraði með glans og sló meðal annars við Norðurlandameistaranum Christin Andersen.  Nánar um mótið hér. 

Arnar Valgeirsson og félagar í Vin Open stóðu fyrir Vin Open.    Stefán Bergsson og Róbert Lagerman sigruðu á mótinu.  Nánar um mótið hér.

Sigurbjörn Björnsson stóð fyrir Pöbb-kvissi í Hressingarskálanum.  Björn Þorfinnsson og Stefán Bergsson unnu þar en Þjóðverjinn Jan Gustafsson þótt býsna grunsamlega kumpánlegur við þá félaga í miðri keppni.    Spurningar og svör má finna hér. 

Og blindskákarfjöltefli Miroshnichenko  við 10 skákmenn sem haldið var í samstarfi við MP banka gekk glimrandi vel.  Guðfríður Lilja sigraði meistarann en Hemmi Gunn tapaði.  Nánar um fjölteflið hér

Og svo var það fótboltinn.  Íslendingar mættu erlendu skákmönnum og höfðu sigur 6-4 í hörkuspennandi bolta þar sem sumir æstu sig meira en aðrir.  Í liði erlendu skákmannanna voru Norðmenn og Þjóðverjar fjölmennastir.  Nicolaj Getz reyndist þar fremstur meðal jafningja.

En skoðum nú mótið sjálft.

Reykjavíkurskákmótið

Reykjavíkurskákmótið í ár var í raun og veru fjórfalt.   Mótið var minningarmót um Inga R. Jóhannsson.  Var í því tilefni veitt sérstök verðlaun fyrir þann skákmenn sem best stóð sig í samanburði við skákstig.  Áðurnefndur Oliver krækti í þau verðlaun sem dóttir Inga, Sigríður Ingibjörg, veitti.   Mótið var svo Norðurlandamót í bæði í opnum- og kvennaflokki.  Svo var mótið XXVI. Reykjavíkurskákmótið!

Sigurvegarar

Sex sigurvegarar urðu á mótinu.  Úkraínumennirnir Yuriy Kuzubov, Vladimir Baklan og Illya Nyzhnik, Bosníumaðurinn Ivan Sokolov, Pólverjinn Kamil Miton og Norðmaðurinn Jon Ludvig Hammer.   Kuzubov var hæstur á stigum (tie break) enda á toppnum allan tímann.   Nyznhik er að sjálfsögðu langyngsti sigurvegari Reykjavíkurmótanna frá upphafi.  Upplýsingar um svo alla aukaverðlaunahafa má finna hér.

Norðurlandameistarar

Jon Ludvig Hammer varð Norðurlandameistari.  Fyrsti Norðurlandameistari Norðmanna í heil 19 ár.  Sigur hans var fremur öruggur og aldrei í hættu.  Um tíma voru jafnvel líkur á því að Hammer-inn yrði einn efstur á mótinu en Miton hélt lakari stöðu í lokaumferðinni.  

Christin Andersen varð Norðurlandameistari kvenna eftir harða baráttu.  Lenka Ptácníková og Hallgerður Helga Þorsteinsdóttir máttu sætta sig við skipt 3ja sæti en baráttan um NM-titil kvenna ræðst að mestu leyti hvernig Norðurlandakonunum gengur gekk körlum og þar hafði Christin best að sinni.  

Íslendingar

Eins og áður hefur komið fram tóku 67 íslenskir skákmenn í mótinu.  Þeir hækkuðu  um alls 301 skákstig eða um 4,5 skákstig á mann.  Þar fór Oliver Aron mikinn og hækkaði um 81 stig!  Næstir voru Dagur Ragnarsson (45), Nökkvi Sverrisson (39), Örn Leó Jóhannsson (35), Hrund Hauksdóttir (32), Birkir Karl Sigurðsson (29), Jón Árni Halldórsson og Guðmundur Gíslason (28), Bjarni Sæmundsson (26), Kristján Hreinsson (23), Daði Ómarsson (22) og Kristófer Jóel Jóhannesson (21).  

Og hvaðan kemur þetta 301 stig?  18 þýskir skákmenn töpuðu 244 skákstigum, 8 hollenskir skákmenn töpuðu 192 skákstigum, 2 Kanadamenn töpuðu 52 skákstigum og 3 Finnar töpuðu 41 stigi.

Norðmönnum gekk einnig vel og 14 Norðmenn hækkuðu um alls 73 stig og 4 Svíar hækkaðu um 46 stig.  Úkraínumönnum gekk einnig vel og hækkuðu um 31 stig enda áttu þeir 3 menn í efsta sæti. 

Hannes Hlífar Stefánsson fékk flesta vinninga íslensku skákmannanna eða 6½ vinning.    Bragi Þorfinnsson og Guðmundur Gíslason fengu 6 vinninga.

Henrik Danielsen var hins vegar með bestan árangur stigalega séð, þrátt fyrir 5½ vinning, en árangur hans samsvaraði 2488 skákstigum.  Næstir voru Hannes (2441), Bragi (2431), Guðmundur (2415), Björn Þorfinnsson (2396), Jón Viktor (2381), Þröstur Þórhallsson (2347) og Sigurður Daði Sigfússon (2317).

Guðmundur Gíslason varð efstur skákmanna með minna en 2400 skákstig og Jón Árni Halldórsson fékk sömu verðlaun fyrir skákmenn með minna en 2200 skákstig.  Báðir fengu þeir 500$ í verðlaun.

Af þeim fimm íslensku skákmönnum sem þiggja stórmeistaralaun tóku fjórir þátt í mótinu.  Þrír stórmeistarar og eini íslenski kvennastórmeistarinn.  Allir lækkuðu þeir lítilsháttar á stigum.  Hannes um 6 stig en Henrik, Þröstur og Lenka um 3 stig.   Héðinn Steingrímsson hætti við þátttöku í mótinu með eins dags fyrirvara.

Fimm íslenskir alþjóðlegir meistarar tóku þátt.   Fjórir þeirra lækkuðu á stigum.  Bragi var sá eini sem kom með stigagróða út úr mótinu en hann hækkaði um 5 stig.  Björn tapaði 1 stigi, Guðmundur Kjartansson 2 stigum, Jón Viktor 4 stigum og Dagur Arngrímsson 17 stigum.  Hjörvar Steinn Grétarsson, sem hefur styrkleika alþjóðlegs meistara, lækkaði um 20 skákstig.  

Það er því ljóst að okkar sterkustu skákmönnum gekk ekkert sérstaklega vel en minni spámönnunum gekk hins vegar vel.   Það virðist líka vera þannig að þegar Hannes dregur ekki vagninn fyrir okkur þá vantar að einhver annar taki það að sér.

Og það var gaman að gefa ungum og efnilegum skákmönnum eins og t.d. Vigni Vatnari og Nansý, sem eru aðeins 8 ára, sín fyrstu tækifæri á móti mótanna.  

Áfangar

Fjórir áfangar náðust í hús.  Guðmundur Gíslason náði áfanga að alþjóðlegum meistaratitli.  Það gerðu einnig hin hvít-rússneska Anna Sharevich og Daninn Jacob Carstensen.   Emila Horn náði alþjóðlegum áfanga kvenna.  Enginn annar íslenskur skákma´ður en Guðmundur var í raunhæfum áfangasénsum á mótinu. 

Erlendir gestir

Ýmsir eftirtektarverðir gestir tóku þátt og ætla ég að leyfa mér að nefna nokkra þeirra sérstaklega.  Frá Kanada komu tveir gestir.  Alþjóðlegi meistarinn Leon Piatsetski sem var afar þakklátur fyrir gott mótshald og sendi mér eftirfarandi póst að loknu móti:

Sorry I didn't get to say goodbye after the closing ceremony. I just wanted to let you know that I enjoyed the tournament. Your group did a great job ! I liked the playing hall, the top board display and the site overlooking the pond. Perhaps we could have had a bit more space but then where would you fit in all the players !

I enjoyed the local smoked salmon and ate a few nice restaurants. My only complaint was the weather - next time please consult with higher authorities to moderate the temperatures :-)

Hinn Kanadamaðurinn var Brad Willis en sá var af íslenskum ættum og brá fyrir íslenskunni þegar hann ræddi við mig!

Frá „Spáni" kom Jordi Agullo Herms.   Sá kom að tali við mig og Ríkharð og sagðist vera Katalóni en ekki Spánverji.  Honum var útvegað nýtt nafnspjald með katalónska fánanum og var afar þakklátur og lét taka af sér myndir með réttu flaggi!

Frá Danmörku komu tveir skemmtilegir keppendur og vinir.  Jes Knudsen og Daniel Andersen.   Knudsen, sem ávallt var klæddur í rauðar buxur.  Þeir voru „ligeglad" en sá fyrrnefndi er safnari og átti t.d. flestar íslenskar skákbækur sem komið hafa út. 

Sá keppandi sem kom lengst að var Kai Jie Edward Lee frá Singapore.  13 strákur sem kom hingað með mömmu sinni.  Sá hafði aldrei séð snjó áður og var ákaflegur þakklátur fyrir veðrið.   Mamma hans var himinlifandi með mótið og í samtali við mig sagði hún þau stefna að því að koma aftur og vonandi með fleiri keppendur frá Singapore.

Mér barst einnig bréf frá Luke McShane en þar segir hann meðal annars:

Thanks again for a very enjoyable tournament in Reykjavik. Personally, I'm really glad I got another opportunity to visit Iceland after so many years, and it's great to see the tournament getting tougher every year!

Þakkir

Ég vil þakka öllum þeim sem komu að mótinu.  Reykjavíkurborg fyrir að hafa verið bakhjarl mótsins frá 1964 og án stuðnings frá borginni í gegnum tíðina, væri ekkert Reykjavíkurmóti.  Bakhjarlar mótsins í ár MP banka og Deloitte gerðu svo gott mót enn betra.  

Og allir starfsmennirnir fá sérstakar þakkir.  Skákstjórarnir Ríkharður Sveinsson, Páll Sigurðsson, Ólafur S. Ásgrímsson, Rúnar Berg, Omar Salama og Haraldur Baldursson.

Kristján Örn Elíasson sem sá um tæknimál auk reyndar skákstjórnar og Halldór Grétar Einarsson sem einnig kom að tæknimálum sá um heimasíðuna og tefldi auk þess á mótinu!

Helgi Ólafsson fyrir góða grein um Inga R. Í mótsblaðinu.

Mótsstjórnin, Halldór Grétar Einarsson, Magnús Pálmi Örnólfsson, Róbert Lagerman, Björn Þorfinnsson, Stefán Bergsson, Kristján Örn Elíasson, Helgi Árnason, Vigfús Ó. Vigfússon, Eiríkur Björnsson og Omar Salama.

„Fjórmenningarklíkan", Helgi Ólafsson, Jóhann Hjartarson, Jón L. Árnason og Margeir Pétursson sáu um skákskýringar. 

Ljósmyndararnir Calle Erlendson, Einar E. Einarsson, Helgi Árnason, Þórir Benediktsson og Kristján Örn fá og sérstakar þakkir.    Myndir frá mótinu voru víða birtar og þá sérstaklega í ChessBase.  Jón Gunnar Jónsson þýddi svo fréttir af Skák.is og staðfærði og voru þær sendar víða um heim. 

Paul Frigge og Patrekur Maron Magnússon slógu inn skákirnar og voru afskaplega snöggir að koma þeim á vefinn. 

Hrafn Jökulsson reyndist ákaflega hugmyndaríkur og gott að leita til þegar vantaði góð ráð og fær sérstakar þakkir.  

Ásdís Bragadóttir var sem klettur á skrifstofunni og ákaflega gott að leita til hennar.  

Ég hef örugglega gleymt einhverjum í þessari upptalningu og biðst hér með afsökunar á því.

Svo er bara að einhenta sér í undirbúa XXVII Reykjavíkurskákmótið 2012!

Gunnar Björnsson

EM: Bragi með jafntefli við Fressinet

Alþjóðlegi meistarinn Bragi Þorfinnsson byrjar vel á EM einstaklinga sem hófst í dag í Aix les Bains í Frakklandi.  Bragi gerði jafntefli við franska stórmeistarann Laurent Fressinet (2693), sem er 11. stigahæsti keppandi mótsins.   Hannes Hlífar Stefánsson (2557) vann Ítalann Corrado Astengo (2119) en Lenka Ptácníková (2307) tapaði fyrir armenska stórmeistaranum Arman Pashikian (2642).  

Meðal eftirtektarverða úrslita má nefna að Færeyingurinn Helgi Dam Ziska (2432) gerði jafntefli við stigahæsta keppandann Peter Svidler (2730).

Í 2. umferð, sem fram fer á morgun, teflir Hannes við ísraelska stórmeistarann Emil Sutovsky (2692), Bragi við tékkneska stórmeistarann Viktor Laznicka (2688) og Lenka við Frakkann Alain Koch (1985).  Skák Hannesar og Sutovsky verður sýnd beint á vefsíðu mótsins og hefst kl. 14.

Mótið er ægisterkt.  Alls taka 400 skákmenn þátt og þar af 164 stórmeistarar, 65 alþjóðlegir meistarar og 4 stórmeistarar kvenna.  Íslendingar eiga þarna flesta fulltrúa Norðurlandaþjóða eða 3 talsins en Danir og Norðmenn eiga 2 keppendur hvor þjóð og Svíar, Finnar og Færeyingar einn hver þjóð.  Hannes er nr. 117 í stigaröð keppenda, Bragi er nr. 209 og Lenka er nr. 249.

 

• Heimasíða mótsins
• Beinar útsendingar
• Chess-Results

Amber: Aronian með vinningsforskot á Carlsen

Aronian og Carlsen eru sem fyrr á allt öðru leveli en aðrir keppendur í Amber-mótinu.  Í dag vann Aronian Kramnik 1½-½ á meðan Carlsen þurfti að sætta sig við 1-1 jafntefli gegn heimsmeistaranum, Anand.  Aronian hefur því vinnings forskot á Carlsen sem svo hefur 2½ vinning á næstu menn.  Tíunda og næstsíðasta umferð fer fram á morgun.

Staða efstu manna (heild):

• 1. Aronian 13 v.
• 2. Carlsen 12 v.
• 3.-5. Anand, Grischuk og Ivanchuk 9½ v.
• 6. Gashimov 9 v.

Efstu menn í blindskákinni:

• 1. Aronian 7 v.
• 2. Anand 5½ v.
• 3.-4.  Gashimov og Grischuk 5 v.

Efstu menn í atskákinni:

• 1. Carlsen 7½ v.
• 2. Aronian 6 v.
• 3. Ivanchuk 5½ v.

Bent er á heimasíðu mótsins þar sem skákirnar eru sýndar og skýrðar beint.  Taflfmennskan hefst kl. 13:30 á daginn. 

Þetta er síðasta Amber-mótið og er einkar glæsilegt og sterkt að þessu sinni en þarna tefla menn atskákir og blindskákir.  Mótið er það 20. í röðinni og sennilega það sterkasta frá upphafi.  

Heimasíða mótsins

Reykjavíkurmót grunnskólasveita

 

Reykjavíkurmót grunnskólanna í skák 2011 fer fram mánudaginn 4. apríl n.k. og hefst kl.17. Tefldar verða 7 umferðir með 10 mín. umhugsunartíma á skák.  Allar sveitirnar keppa í einum opnum flokki, og veitt verða verðlaun fyrir þrjár efstu sveitirnar sem og þrjár efstu stúlknasveitirnar.  Hver sveit skal skipuð fjórum nemendum frá hverjum skóla auk 1-4 varamanna. Hverjum skóla er heimilt að senda fleiri en eina sveit til þátttöku og skal þá sterkasta sveitin nefnd A, sú næststerkasta B, o.s.frv. Sigursveitin verður Reykjavíkurmeistari grunnskólasveita 2011 og hlýtur farandbikar til vörslu í eitt ár. Mótið hefst, sem áður segir, kl.17 og lýkur um kl.20.   Verðlaunaafhending verður strax að móti loknu.

Sveitakeppni grunnskóla í Reykjavík er haldin í samvinnu Taflfélags Reykjavíkur og Íþrótta- og tómstundasviðs Reykjavíkur og fer keppnin fram í félagsheimili T.R., Faxafeni 12, Reykjavík.

Mikilvægt er að skólarnir sendi fylgdarmann með sínu liði, keppendum til halds og trausts. Þátttaka tilkynnist til skrifstofu Íþrótta- og tómstundasviðs eða á netfang: [e-mail] einnig er hægt að senda skráningu á [e-mail]  eigi síðar en kl 14 mánudaginn 4. apríl. Skráning í síma 411-5000.  Þátttökurétt hafa eingöngu nemendur í grunnskólum Reykjavíkur.

EM einstaklinga hafið - 3 íslenskir keppendur

EM einstaklinga hófst í dag í Aix les Bains í Frakklandi.  Þrír Íslendingar taka þátt, stórmeistarinn Hannes Hlífar Stefánsson (2557), alþjóðlegi meistarinn Bragi Þorfinnsson (2417) og Lenka Ptácníková (2307), stórmeistari kvenna.  Í fyrstu umferð, sem hófst í dag, teflir Bragi við franska stórmeistarann Laurent Fressinet (2693), Lenka við armenska stórmeistarann Arman Pashikian (2642) og Hannes við Ítalann Corrado Astengo (2119).  Skák Braga er sýnd beint hér. 

Mótið er ægisterkt.  Alls taka 400 skákmenn þátt og þar af 164 stórmeistarar, 65 alþjóðlegir meistarar og 4 stórmeistarar kvenna.  Íslendingar eiga þarna flesta fulltrúa Norðurlandaþjóða eða 3 talsins en Danir og Norðmenn hafa 2 keppendur hvor þjóð og Svíar, Finnar og Færeyingar einn hver þjóð.  Hannes er nr. 117 í stigaröð keppenda, Bragi er nr. 209 og Lenka er nr. 249.

 

• Heimasíða mótsins
• Beinar útsendingar
• Chess-Results