Rammislagur: Riddarinn lagði Ása

Hin árlega viðureign klúbba eldri borgara á höfuðborgarsvæðinu ÆSA OG RIDDARA fór fram í ÁSGARÐI, félagsheimili FEB í Stangarhyl í gær, þriðjudaginn 22. mars. Þetta var í 11 sinn sem slík keppni er haldin og hefur Riddarinn oftast farið með sigur af hólmi.

Breiðfylkingar klúbbanna áttust nú við á 21 borði og var keppt í þremur 7 manna riðlum, allir við alla í hverjum riðli.  Alls tóku 50 öldungar þátt í þessum mikla darraðardansi og varð af mikið hark þegar fylkingunum laust saman og ekki laust við að nokkur ásmegin svifi á menn, einkum Æsi og loft varð læviblandið mjög.  Riddararnir náðu þó skjótt vopnum sínum og guldu þá heimamenn mikið afhroð  einkum í B- og C-riðli.. 

Úrslit þessa mikla Rammaslags urðu þau að Riddarinn fór með glæstan sigur af hólmi vann viðureigina í heild með 98 vinningum gegn 49.  Æsir sigruðu þó naumlega í A-riðli með 26 v. gegn 23, þar skiptu aðeins 2 skákir sköpum. Riddarinn vann B-riðilinn með fáheyrðum yfirburðum 41 vinningi gegn 8 og C-riðilinn sömuleiðis með 34 vinningum gegn 15. 

Borðaverðlaun í A-fl. Hlutu þeir Björn Þorsteinsson og Magnús Sólmundarson, Æsum, með 7v. af 7 og Egill Þórðarson úr röðum Riddarans með 5 v. af 7;  í B-fl. Gísli Sigurhansson, Æsum, með 3.5; og Friðgeir K. Hólm og Björn Víkingur Þórðarson úr hópi Riddara, með 6.5 af 7; I C-fl. þeir Kristinn Bjarnason og Jón Steinn Elíasson, Riddaranum, sömuleiðis með 6.5 v. af 7 og Hálfdán Hermannsson með 3.5 v af 5 úr röðum Æsa í Ásgarði.

A-lið ÆSA var þannig skipað: Björn Þorsteinsson; Jóhann Örn Sigurjónsson; Magnús Sólmundarson; Gunnar Kr. Gunnarsson; Þór Valtýsson; Valdimar Ásmundsson og Þorsteinn Guðlaugsson.  A-lið Riddarans skipuðu: Ingimar Jónsson; Sigurður A. Herlufsen; Jón Þ. Þór; Magnús Gíslason; Egill Þórðarson; Hilmar Viggósson og Guðfinnur R. Kjartansson.

Liðstjórar voru þeir, Birgir Sigurðsson, formaður Æsa og Einar S. Einarsson, formaður Riddarans að Strandbergi.  Finnur Kr. Finnsson var aðstoðar- og eftirlitsdómari.

Myndaalbúm

Athugasemdir

[Jón Þorvaldsson (IP-tala skráð) 23.3.2011 kl. 08:38]

Þakka mjög skemmtilega og litríka frásögn af harðri viðureign Ása og Riddara. Greinilega verið að vinna gott starf á þessum vígstöðvum!

Smáábending. Á fyrirsögnin ekki að vera: Riddarinn lagði Æsi. Ef ég man rétt, beygist orðið Ás(s) eitthvað á þessa leið:

nf.   áss
þf.   ás
þgf. ási
ef.   áss

nf.   æsir
þf.   æsi
þgf. ásum
ef.   ása

[Skák.is, 23.3.2011 kl. 09:31]

Hárrétt Jón og hefur verið leiðrétt. Þetta vefst mikið fyrir ritstjóranum.