GAMMA Reykjavíkurskákmótið 6. umferð - Toppurinn þéttist

Efstu borð á GAMMA Reykjavíkurskákmótinu gerðu jafntefli og það opnaði möguleikann fyrir skákmenn hálfum vinningi á eftir efstu mönnum að ná þeim að vinningum með því að sigra í sínum skákum

Stigahæsti maður mótsins Richard Rapport gerði það og bættist í hópinn og sömu sögu er að segja af Baskaran Adhiban sem vann snaggaralegan sigur á Alejandro Ramirez. Frakkinn ungi Maxime Lagarde vann einnig góðan sigur í sinni skák.

 

Þessir þrír bætast því í hóp þeirra Alexander Lenderman, Nihal Sarin og Mustafa Yilmaz á toppnum sem er gríðarlega þéttur en allir hafa þeir 5 vinninga af 6 mögulegum.

Hannes Hlífar Stefánsson er orðinn efstur Íslendinga með 4,5 vinning og lúrir fyrir neðan efstu menn. Þrír Íslendingar hafa 4 vinninga, þeir eru Báður Örn Birkisson, Jóhann Hjartarson og Þröstur Þórhallsson.

 

7. umferð verður tefld á morgun klukkan 15:00 í Hörpu. Fjölmargar harðar viðureignir verða á toppnum. Rapport mætir Lenderman, Lagarde fær Adhiban á meðan að Yilmaz fær Sarin. Ungstirnið Abdusattarov mætir Eljanov og Hannes fær erfitt verkefni með svörtu mennina gegn Gata Kamsky.

 

Skákskýringar á sínum stað og allir velkomnir.

 

Heimasíða mótsins

Úrslit á Chess-Results

Beinar útsendingar með skýringum GM Simon Williams og WIM Fional Steil-Antoni

Peter og Arne sigurvegarar á Reykjavik Open Pub Quiz

Þrátt fyrir að við Íslendingar höfum leikið Hollendinga grátt á knattspyrnusviðinu þá náðu þeir fram hefndum á hinu árlega Reykjavik Open Pub Quiz. 

Peter Doggers og Arne Moll eru miklir Íslandsvinir en Doggers hefur séð um beinar útsendingar á Reykjavik Open í fjölda ára og Arne komið sem gestur í nokkur skipti.

Það er jafnframt gaman að segja frá því að þeir hafa báðir unnið Pub Quizzið áður en þó ekki saman í liði! Að því að höfundur best veit eru þeir þeir einu sem hafa unnið Quizzið tvisvar!

Sem fyrr voru lagðar fyrir gesti 30 spurningar um skákmálefni og skáksögu. Mesta áherslan var á spurningar tengdar Bobby Fischer enda mótið tileinkað minningu hans.

Fjölmörg lið voru mætt til leiks frá ýmsum þjóðlöndum. Á endanum höfðu Peter og Arne betur með 24,5 stig en í öðru sæti voru fróðir Íslendingar, Aðalsteinn Thorarensen og Ágúst Örn Gíslason en þeir voru grátlega nálægt sigri með 23,25 stig og voru jafnvel einni "last minute" breytingu og einum misskilningi frá naumum sigri.

Skrár tengdar þessari bloggfærslu:

• Reykjavik Open Pub Quiz 2018

Vatnsendaskóli Íslandsmeistari barnaskólasveita í flokki 1.-3. bekkjar

Íslandsmót barnaskólasveita í flokki 1.-3. bekkjar fór fram 24. febrúar síðastliðinn í Rimaskóla. Mjög góð þátttaka var á mótinu en 29 efnilegar skáksveitir mættu til leiks. Ein gestasveit var á mótinu en það var skáksveitin Rödvet Sjakk frá Noregi, undir stjórn Boga Pálssonar sem þar sinnir skákkennslu. Snemma var ljóst að Íslandsmeistararnir frá því í fyrra, hin öfluga skáksveit Vatnsendaskóla, hefði talsverða yfirburði á mótinu. Liðið lagði helsta keppinaut sinn, Háteigsskóla, í innbyrðis viðureign og þar skildi á milli liðanna. Vatnsendaskóli lauk keppni með 24,5 vinning í efsta sæti og var sigurinn nokkuð öruggur. Vatnsendaskóli átti jafnframt flestar sveitir á mótinu, eða alls fimm talsins. Í öðru sæti var a-sveit Háteigsskóla með 20,5 vinning og í þriðja sæti a-sveit Rimaskóla með 17,5 vinning.

Íslandsmeistararnir frá Vatnsendaskóla ásamt Einari Ólafssyni sem hefur unnið gott starf í skólanum. Sigursveit Vatnsendaskóla var skipuð Mikael Bjarka Heiðarssyni, Arnari Loga Kjartanssyni, Jóhanni Helga Hreinssyni og Guðmundi Orra Sveinbjörnssyni.

A-sveit Háteigsskóla sem var í 2. sæti. Á myndinni má sjá liðsmennina Jósef Omarsson, Markús Orra Jóhannsson, Antoni Pálsson Paszek og Óla Stein Thorsteinsson ásamt liðsstjóra sínum og þjálfara, Lenku Ptacnikovu.

A-sveit Rimaskóla varð í 3. sæti. Á myndinni má sjá liðsmennina Hinrik Leó Friðriksson, Inga Alexander Sveinbjarnarson, Sindra Snæ Hjaltason og Guðmund Reyni Magnússon ásamt Helga Árnasyni skólastjóra.

Rimaskóli átti jafnframt efstu b-sveitina og vakti athygli að hún var einungis skipuð stúlkum. Sveitin hlaut 16 vinninga. Skákáhugi meðal stúlkna er mikill í Rimaskóla enda bíður skólinn upp á sérstaka skáktíma fyrir stúlkur.

B-sveit Rimaskóla. Frá vinstri: Nikola Klimaszewska, María Lena Óskarsdóttir, Svandís María Gunnarsdóttir og Heiðdís Diljá Hjartardóttir.

Efsta c-sveitin kom frá Vatnsendaskóla og hlaut 15,5 vinning.

Liðsmenn c-sveitar Vatnsendaskóla voru Árni Kristinn Kristófersson, Alex Bjarki Þórisson, Friðbjörn Orri Friðbjörnsson og Steinar Logi Halldórsson.

D-sveit Vatnsendaskóla varð efst d-sveita og hlaut 13,5 vinning.

E-sveit Vatnsendaskóla varð efst e-sveita og hlaut 11 vinninga.

Skákstjórar og dómarar á mótinu voru Páll Sigurðsson, Siguringi Sigurjónsson og Björn Ívar Karlsson.

Lokastaðan

GAMMA Reykjavíkurskákmótið: Umferð kl. 15, hádegisfyrirlestur og fótbolti

Sjötta umferð GAMMA Reykjavíkurskákmótsins hefst í dag kl. 15. Fischer-slembikóngurinn, Alexander Lenderman (2600) er efstur áamt Tyrkjanum Mustafa Yilmaz (2619) og indverska undradrengnum Nihal Sarin (2534) sem er á góðri leið að hann ná í sinn annan áfanga að alþjóðlegum stórmeistaratitli. 

Björn Þorfinnsson (2399), Þorsteinn Þorsteinsson (2317), Hannes Hlífar Stefánsson (2533), Jóhann Hjartarson (2513) og Vignir Vatnar Stefánsson (2300) eru efstir íslensku keppendanna með 3,5 vinninga. 

Björn teflir við úkraínska ofurstórmeistarann Pavel Eljanov (2713), Þorsteinn við franska stórmeistarann Matthieu Cornette (2620), Hannes við þýska FIDE-meistarann Oliver Bewersdorff (2312), Jóhann við enska alþjóðlega meistarann David Cummings (2322). Sú viðureign sem gæti vakið mesta athygli er skák okkar efnilegasta skákmanns landsins Vignis Vatnars Stefánssonar við indverska undrabarnið Praggnanandhaa (2507).

Skákskýringar hefjast kl. 17 og verða í umsjón Helga Ólafssonar. 

Í dag kl. 11:30 fer fram hádegisfyrirlestur Guðmundar G. Þórarinssonar á Bryggjunni brugghúsi eins og sjá má nánar um hér. Allir velkomnir! Engin aðgangseyrir.

Í kvöld fer fram fótbolti í Fífunni. Mæting í Hörpu kl. 21:30 fyrir áhugasama. 

Heimasíða mótsins

Úrslit á Chess-Results

Beinar útsendingar með skýringum GM Simon Williams og WIM Fional Steil-Antoni.

Hádegisfyrirlestur Guðmundar G. Þórarinssonar á Bryggjunni

Guðmundur G. Þórarinsson, forseti SÍ í kringum einvígi aldarinnar, verður með hádegisfyrirlestur á Bryggjunni brugghúsi, Grandagarði 8, í dag. Fyrirlesturinn hefst kl. 11:30 og verður í 45-60 mínútur. Á meðan fyrirlestrinum stendur er hægt að kaupa mat í Bryggjunni frábæran mat á frábæru verði.

Skákákhugamenn eru hvattir til að fjölmenna til að hlusta á Guðmund. Hann er hafsjór um fróðleik um einvígið og hvað gerðist á bakvið tjöldin. 

Minnt er á hægt er að skoða upprunalega einvígisborðið í Þjóðminjasafninu á meðan Reykjavíkurskákmótinu stendur. Opið er alla daga nema mánudaga á milli 10 og 17.

Aðgangur er ókeypis.

Vinaskákfélagið: Pistil um Íslandsmót skákfélaga

Íslandsmót skákfélaga fyrri hluti var haldin dagana 19 Október 2017 til 22 Október.

Vinaskákfélagið byrjaði þó ekki fyrr en á föstudeginum 20 okt. Félagið tefldi fram 3 sveitum þ.e. A sveit í 2 deild, B sveit í 3 deild og C sveit í 4 deild.

Liðstjórar voru Róbert Lagerman fyrir A sveitina, Hörður Jónasson fyrir B sveitina og Héðinn Briem fyrir C sveitina.

A sveitin náði að styrkja sig fyrir rimmuna í vetur og fengu til liðs við sig Þorvarð Fannar Ólafsson með rúmlega 2100 stig. Ennfremur var ætlunin að fá Þjóðverja hann Patrick Karcher líka með um 2100 stig til að keppa, en við vorum aðeins of seinir að skrá hann og eða hann kom til okkar aðeins örfáum dögum fyrir keppnina. Þá var ætlunin að láta hann keppa í seinni hluta ef hann yrði enn á landinu, en því miður var hann farinn heim viku fyrir seinni hluta. En aftur að keppninni.

Í fyrstu umferð tefldi A sveitin við Skákdeild Hauka og unnu þá með 3,5 – 2,5 vinningum. 2 umferð tefldi A sveitin við Skákfélag Reykjanesbæjar og töpuðu naumt eða 2,5 – 3,5 vinningum. Í 3 umferð þá lentum við á móti TR – C og unnum þá stórt eða 4,5 -1,5. Í 4 umferð tefldum við Skákfélag Huginn C sveit og úr varð jafntefli eða 3 – 3. A liðið var þá komin með 13,5 vinning eftir fyrri hlutann.

Þá er komið að B sveitinni sem keppti í 3 deild.

Í fyrstu umferð tefldum við Skákfélag Sauðárkrók og úr varð hörku viðureign sem endaði með jafntefli eða 3 – 3. Í 2 umferð tefldum við SR – b og fórum ílla að ráði okkar og töpuðum 2 – 4. Þess má geta að SR b lenti í 12 sæti (eða 3 neðsta sæti) og féll í 4 deild. Í 3 umferð lentum við á móti Skákfélag Siglufjarðar þannig að við vorum mikið að tefla við skákfélög norðan heiða. Þetta er hörku félag með Torfi Kristján Stefánsson á 1 borði með 2030 stig og varð það Héðinn Briem 1623 sem þurfti að kljást við hann og náði að vinna hann. Undirritaður (Hörður) var á 6 borði  og tefldi við Skarphéðinn Guðmundsson og náði ég að vinna hann. 2 jafntefli gerðum við líka, þannig að lokum varð jafn eða 3 – 3.

Í 4 umferð tefldum við Skáksamband Austurlands og náðum að merja vinning eða 3,5 – 2,5 vinninga. Þannig að eftir fyrri hluta vorum við í 9 sæti með 4 stig og 11,5 vinninga.

C sveitin okkar var í 4 deild og í fyrstu umferð tefldum við Taflfélag Garðabæjar b sveit og töpuðum 2 – 4. Þess má geta að Taflfélag Garðabær b sveit varð í 3 sæti og fór upp í 3 deild. Í 2 umferð lentum við á móti Taflfélag Vestmannaeyjar b sveit og töpuðum við 1,5 – 4,5. Í 3 umferð tefldum við Skákdeild Fjölnis unglingalið a sveit og þá kom að því að við sigruðum 4,5 – 1,5. Í 4 umferð tefldum við Skákfélag vina Laugarlæjarskóla og var það auðveldur sigur, þar sem vantaði 3 liðsmenn hjá þeim. Við unnum þessa viðureign með 5 – 1. Eftir fyrri hlutann vorum við í 9 sæti með 4 stig og 13 vinninga. 

Seinni hluti mótsins var haldið helgina 1-3 mars 2018 í Rimaskóla eins og síðast. Á liðsfundi sem var haldin miðvikudaginn 27 febrúar, sagði Forseti félagsins Róbert Lagerman að nú væri markmiðið hjá A sveitinni að ná 3 sætinu í 2 deild. Voru menn sammála að það væri gott markmið.

Vinaskákfélagið byrjaði keppnina föstudaginn 2 mars og byrjaði A sveitin á að keppa við Skákfélag Selfoss og nágrennis og úr varð jafntefli 3 – 3. Sérstaklega skal tekið fram hinu frábæra árangri sem Róbert Lagerman (1.borðs maður) náði á móti IM Yaacov Norowits (2425) en hann gerði jafntefli við hann.

Sján nánar á heimasíðu Vinaskákfélagsins.

Skákþáttur Morgunblaðsins: Bragi náði lokaáfanganum að stórmeistaratitli

Með því að vinna síðustu skák sína á opna alþjóðlega mótinu í Kragareyju í Noregi náði Bragi Þorfinnsson þriðja og síðasta áfanga sínum að stórmeistaratitli. Þá liggur fyrir að önnur skilyrði eru uppfyllt, t.d. það að hafa á einhverjum tímapunkti náð yfir 2500 alþjóðleg elo-stigum. Hann hlaut 7 vinninga af níu mögulegum, varð einn í 2. sæti á eftir norska stórmeistaranum John Ludwig Hammer sem kom í mark með 7 ½ vinning. Lykilsigrar Braga komu í fjórðu og fimmtu umferð þegar hann vann sænska stórmeistarann Tiger Hillarp Persson og þann norska, Espen Lie. Bragi lenti í krappri vörn gegn Tiger Hillarp og var með tapað tafl um tíma en það reyndist Svíanum erfitt að finna lokahnykkinn og Braga tókst með mikilli útsjónarsemi að sleppa með kónginn inn fyrir víglínu Svíans:

Kragareyja 2018, 4. umferð:

Tiger Hillarp Persson – Bragi Þorfinnsson

Þegar hér er komið sögu er leið kóngsins til d5 alls ekki greið og eftir 56. d5! er svartur í mikilli máthættu en getur samt varist með 56... cxd5 57. c6! De8! Tiger sá mest af þessu en valdi samt aðra útfærslu:

56. Dh7+? Ke6 57. d5+ cxd5 58. Dxh5

Nú á hann ekki kost á að leika c-peðinu og Bragi opnar leið fyrir kónginn:

58. ... d4!

Gott var einnig 58. .. Hg8.

59. Dg6 De8 60. Dg7 Kd5!

Kóngurinn tekur á rás inn fyrir varnargirðinguna.

61. Db7 Kc4 62. Df3 Kxb4 63. h5 Dg8! 64. h6

Svíinn er búinn að missa þráðinn. Eina vonin lá í að leika 64. e6!

64. ... Dc4+ 65. De2 Dc1+ 66. De1 Dxe1 67. Kxe1 Kc3 68. h7 Kc2 69. c6 d3 70. Bg5 b4!

Frípeð hvíts mega sín lítils gegn peðum svarts, gegn hótuninni 71. ... b3 er engin vörn. Hvítur gafst upp.

 

Seinni hluti Íslandsmóts skákfélaga hófst á fimmtudaginn

Seinni hluti Íslandsmóts skákfélaga hófst í Rimaskóla sl. fimmtudagskvöld með keppni í efstu deild. Eftir fyrri hlutann náði Víkingaklúbburinn sex vinninga á Íslandsmeistara Hugins og er fátt sem bendir til þess sigri sveitarinnar verði ógnað þar sem Víkingasveitin jók forskot sitt með 6:2 sigri yfir Fjölni en á sama tíma gerði Huginn jafntefli við TR, 4:4. Staðan þegar þrjár umferðir eru eftir: 1. Víkingaklúbburinn 43 v. (af 48) 2. Huginn 35 v. 3. Fjölnir 26 v. 4. SA 25 ½ v. 5. TR 25 v. 6. TG 20 ½ v. 7. Huginn (b-sveit) 20 v. 8. SA (b-sveit) 17 ½ v. 9. KR 15 v. 10. Skákdeild Breiðabliks og Bolungarvíkur 12 ½ v.

 

 

Fjórir efstir á skákhátíð MótX

Fjórir skákmenn urðu jafnir og efstir á Skákhátíð MótX sem lauk í Stúkunni á Kópavogsvelli sl. þriðjudagskvöld. Jóhann Hjartarson, Helgi Áss Grétarsson, Hannes Hlífar Stefánsson og Jón Viktor Gunnarsson hlutu allir 5 vinninga af sjö mögulegum. Alls hófu 27 skákmeistarar keppni í A-flokknum og var teflt einu sinni í viku, alls sjö umferðir. Leyfðar voru þrjár ½ vinnings yfirsetur en þess má geta að elstu keppendur mótsins Jóhann, Jón L. og Benedikt Jónasson nýttu sér aldrei þann rétt.

 

Í B-flokki urðu jafnir og efstir þeir Siguringi Sigurjónsson og Hilmir Freyr Heimisson með 5 ½ vinning af sjö mögulegum. Þeir tryggja sér þátttökurétt í A-flokki á næsta ári. Í 3. sæti varð Aron Thor Mai með 5 vinninga.

Í flokki hvítra hrafna þar sem keppendur voru sex talsins sigraði Júlíus Friðjónsson, hlaut 3 ½ vinning úr fimm skákum.

 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 3. mars 2018

Skákþættir Morgunblaðsins

GAMMA Reykjavíkurskákmótið 5. umferð - Sarin slæst í hópinn!

Fimmta umferð á GAMMA Reykjavíkurskákmótinu lauk nú í kvöld. Fyrir umferðina var Tyrkinn Mustafa Yilmaz einn efstu með fullt hús 4 vinninga af 4. Hann gerði hinsvegar tiltölulega stutt jafntefli við landa sinn Emre Can.

 

Jafnteflið hjá Yilmaz þýddi að þrír skákmenn gátu náð honum að vinningum, þar á meðal Jóhann Hjartarson.  Jóhann lenti í erfiðri vörn og andstæðingur hans, Alexander Lenderman, tefldi endataflið mjög vel og náði að snúa á Jóhann. Góðæri hjá Lenderman sem vann einmitt Fischer Random (Slembiskákmótið) í gær!

 

Sá þriðji til að komast í hóp þeirra sem leiða mótið með 4,5 vinning var ungstirnið Nihal Sarin frá Indlandi. Sarin er aðeins 13 ára en verður mjög fljótlega stórmeistari og er mjög líklegur til að komast í hóp allra bestu skákmanna heims eins og ferill hans virðist vera að þróast.

Þrátt fyrir tapið er Jóhann enn efstur Íslendinga með 3,5 vinning en jafn nokkrum öðrum, þeirra á meðal Hannes H. Stefánssyni sem gerði jafntefli við Alinu l'Ami í mjög flókinni og spennandi skák.

Við minnum á Harpa Blitz sem fram fer í Hörpu klukkan 20:30. Þátttökugjöld 2.000 kr.

 

Sjötta umferð hefst klukkan 15:00 á morgun sunnudag og skákskýringar verða á sínum stað í Hörpunni og allir velkomnir!

 

Heimasíða mótsins

Úrslit á Chess-Results

Beinar útsendingar með skýringum GM Simon Williams og WIM Fional Steil-Antoni

 

 

 

 

GAMMA Reykjavíkurskákmótið: Fimmta umferðin hefst kl. 13 - Harpa Blitz í kvöld

Fimmta umferð GAMMA Reykjavíkurskákmótsins hefst í dag kl. 13. Margar athyglisverðar viðureignir en án efa mun mesta athyglin var á skák Jóhanns Hjartarsonar og Aleksandr Lenderman sigurvegara Fischer-Slembiskákarmótsins í gær. Jóhann er í 2.-7. sæti á mótinu með 3,5 vinninga. Þröstur Þórhallsson teflir við sigurvegaranna frá 2015, Erwin L´ami, Hannes Hlífar Stefánsson mætir eiginkonun Erwins, Alina L´Ami, og Dagur Ragnarsson mætir ofurstórmeistaranum Pavel Eljanvov. 

Skákskýringar hefjast kl. 15 og verða í umsjón Jóns L. Árnasonar. 

Í kvöld fer fram Harpa Blitz. Mótið hefst kl. 20:30 og verður teflt í Flóanum í Hörpu, þ.e. sama svæði og mótið sjálft fram. Harpa Blitz er opið öllum. Þátttökugjöld eru 2.000 kr. og renna 80% þeirra í verðlaunasjóð. Þátttökugjöld þarf að greiða á staðnum í formi reiðufés en hægt er að greiða með korti ef greitt er á skákstað meðan 5. umferð GAMMA Reykjavíkurskákmótsins stendur yfir og skrá sig um leið hjá Höllu!

Allir velkomnir!

Nánar hér: https://www.reykjavikopen.com/events/harpa-blitz-2018/

 

Í gær var frídagur á mótinu og þá teflt Fischer-slembiskákmótið. Eins og áður hefur komið fram vann Lenderman mótið. Evrópumeistari varð Richard Rapport.

Heimir Már Pétusson, fréttamaður Stöðvar 2, mætti á svæðið í gær og tók viðtal við Susan Polgar. Þá má finna hér sem og vandaða umfjöllun stöðvarinnar um mótið. 

Heimasíða mótsins

 

 

 

Einvígisborðið og stólarnir sýndir í Þjóðminjasafninu á meðan Reykjavíkurmótinu stendur

Um þessar mundir er haldið Reykjavíkurskákmót til minningar um Bobby Fischer og er skákborð sem notað var í einvígi aldarinnar til sýnis í Þjóðminjasafni Íslands. Í einvíginu árið 1972 tókust á fulltrúar risaveldanna á tímum kalda stríðsins, Bobby Fischer frá Bandaríkjunum og frá Sovétríkjunum heimsmeistarinn Boris Spassky. Borðið var sérsmíðað og hönnuður þess er Gunnar Magnússon.

Skákáhugamenn eru hvattir til að nota tækifærið núna!