EM kvenna: Lenka tapaði í sjöttu umferð

Stórmeistari kvenna, Lenka Ptácníková (2198), tapaði í gær fyrir skoska stórmeistaranum Ketevan Arakhamia-Grant (2347) í sjöttu umferð EM kvenna í Slóvakíu. Lenka hefur 2 vinninga.  

Sjöunda umferð fer fram í dag. Þá teflir Lenka við portúgölsku skákkonuna Cararina Leite Oralova (2134). Loks fær Lenka stiglægri andstæðing.

Fjórir skákkonur eru efstar og jafnar með 5 vinninga. Það eru Valentina Gunina (2507), Rússlandi, Mariya Muzychuk (2540) og Anna Ushenina (2422), Úkraínu, og Nana Dzagnidze (2507), Georgíu.  

Alls taka 144 skákkonur þátt frá 30 löndum. Þar af eru 13 stórmeistarar, 29 alþjóðlegir meistarar og 35 sem eru stórmeistarar kvenna. Lenka er annar tveggja fulltrúa Norðurlandanna. Hin er Pia Cramling. 

• Heimasíða mótsins
• Beinar útsendingar(Chess24) - hefjast kl. 13:15. 
• Chess-Results

100 keppendur tóku þátt í Meistaramóti Kópavogs í 1.-4. bekk

Líf og fjör var í Kópavogsstúkunni í dag þegar fjöldi krakka á aldrinum 7-10 ára tóku þátt í Meistaramóti Kópavogs í skólaskák. Mótinu var skipt í 3 hluta, 3.-4. bekkur, 2. bekkur og síðan 1. bekkur. Klukkan 8:30-11:30 var keppt í flokki 3.-4. bekkjar þar sem 50 galvaskir krakkar tóku þátt. Tefldar voru 8 skákir með 7 mínútna umhugsunartíma. Margir börðust um efstu sætin og voru allir hnífjafnir í efstu sætum nema Tómas Möller sem vann allar sínar skákir. Í öðru sæti lenti Katrín María Jónsdóttir með 6 vinninga, í þriðja sæti lenti Jóhann Helgi Hreinsson, en alls voru fimm keppendur með 6 vinninga þar sem stigaútreikningur réði úrslitum.

Efstu þrír strákar (3.-4. bekkur)                                                       

1. Tómas Möller  8.v.
2. Jóhann Helgi Hreinsson 6.v.
3. Andri Hrannar Elvarsson 6.v.

Efstu þrjár stelpur (3.-4. bekkur) 

1. Katrín María Jónsdóttir 6.v.
2. Sesselja Kjartansdóttir 5.v.
3. Halla Marín Sigurjónsdóttir 5.v.

Nánar á Chess-Results.

Um hádegi streymdu inn krakkar úr 1. og 2. bekk. Tefldu þessir bekkir á sama tíma í tvískiptu móti. Í 2. bekk voru 39 krakkar skráðir til leiks. Teknar voru 6 umferðir og fljótt fóru stelpurnar að keppast um efstu sætin. Guðrún Fanney Briem vann allar sínar skákir. Í öðru sæti lenti Elín Lára Jónsdóttir og í því þriðja lenti Stefán Logi Svansson bæði með 5 vinninga, en Elín Lára vann á stigaútreikningi. 

Efstu þrír strákar (2. bekkur)                                                            

1. Stefán Logi Svansson 5.v.
2. Hrannar Már Másson 4,5.v.
3. Kári Finnur Auðunsson 4,5.v.

Efstu þrjár stelpur (2. bekkur)

 

1. Guðrún Fanney Briem 6.v.
2. Elín Lára Jónsdóttir 5.v.
3. Þórhildur Helgadóttir 5.v.

Sjá nánar á Chess-Results.

Í 1. bekk tóku 8 sprækir krakkar þátt og sigraði þar Dagur Andri Svansson með fullt hús stiga. Í öðru sæti varð Óðinn Ben Harðarson og Mikael Nökkvi Rafnsson í því þriðja. 

Efstu þrír strákar (1. bekkur)                                                            

1. Dagur Andri Svansson
2. Óðinn Ben Harðarson
3. Mikael Nökkvi Rafnsson

Sjá nánar á Chess-Results.

Skákstjóri var Kristófer Gautason. Vill hann þakka skákkennurum í Kópavogi fyrir gott mót og frábært starf í sínum skólum.  Það er greinilegt að skáklífið í Kópavogi blómstrar um þessar mundir þegar vorið er gengið í garð. 

EM kvenna: Lenka tapaði í fimmtu umferð

Stórmeistari kvenna, Lenka Ptácníková (2198), tapaði í gær fyrir slóvakísku skákkonunni Zuzana Cibickova (2327), sem er stórmeistari kvenna, í fimmtu umferð EM kvenna. Fyrsta tapskák Lenku sem hefur ávallt teflt við stigahærri skákkonur. 

Sjötta umferð fer fram í dag. Þá teflir Lenka við skosku skákkonuna Ketevan Arakhamia-Grant (2347). Sú er stórmeistari í skák. Lenka teflir því sem fyrr við stigahærri andstæðing. 

Sviptingar urðu í toppbaráttunni í gær. Efstar eru hin rússneska Valentina Gunina (2507) og hin úkraínska Anna Ushenina (2422), fyrrum heimsmeistari kvenna. Anna vann hina georgísku Nana Dzagnidze (2507) sem hafði fyrir gærdaginn unnið allar sínar skákir. 

Alls taka 144 skákkonur þátt frá 30 löndum. Þar af eru 13 stórmeistarar, 29 alþjóðlegir meistarar og 35 sem eru stórmeistarar kvenna. Lenka er annar tveggja fulltrúa Norðurlandanna. Hin er Pia Cramling. 

• Heimasíða mótsins
• Beinar útsendingar(Chess24) - hefjast kl. 13:15. 
• Chess-Results

Íslandsmót grunnskólasveita fer fram á sunnudaginn - skráningarfrestur rennur út á hádegi

Íslandsmót grunnskóla 8.–10. bekkur 2018 fer fram í Taflfélagi Reykjavíkur, Faxafeni 12, sunnudaginn 15. apríl. Tefldar verða 7 umferðir með umhugsunartímanum 10+5. Teflt verður eftir svissneska kerfinu. Taflmennskan hefst kl. 13 og lýkur mótinu um kl. 17.  

Hver skóli getur sent fleiri en eina sveit. Í hverri sveit eru fjórir skákmenn. Keppendur skulu vera í 8.–10. bekk. Ef sérstaklega efnilegir skákmenn finnast í 1.–7. bekk er þeim leyfilegt að tefla með sínum skóla en þá aðeins í a- og b-sveit. Í hverri sveit mega vera allt að þrír varamenn. 

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla. 

Veitt verða verðlaun fyrir efstu b-c sveitir ásamt verðunum fyrir efstu sveitir af landsbyggðinni. 

Veitt verða borðaverðlaun fyrir bestan árangur á 1.-4. borði.  

Íslandsmeistarinn fær  keppnisrétt til þátttöku á Norðurlandamóti grunnskólasveita sem fram fer í Finnlandi í september.  

Skráning fer fram á Skák.is. Skráningu skal lokið í í síðasta lagi á hádegi 13. apríl nk. 

Ath. Áríðandi er að sveitirnar séu skráðar fyrirfram. 

Upplýsingar um þegar skráðar sveitir má finna hér.

Öðlingamótið: Hörð barátta framundan – þrír efstir og jafnir

Fide-meistarinn Sigurbjörn Björnsson (2278), Þorvarður F. Ólafsson (2176) og stórmeistari kvenna Lenka Ptacnikova (2200) eru efst og jöfn með 3,5 vinning þegar fjórum umferðum af sjö er lokið í Skákmóti öðlinga. Í fjórðu umferð lagði Sigurbjörn Ögmund Kristinsson (2010) nokkuð örugglega og þá hafði Þorvarður betur gegn Kristni J. Sigurþórssyni (1744) eftir laglega fléttu. Lenka tók yfirsetu og mun gera slíkt hið sama í næstu umferð þar sem hún situr nú að tafli á Evrópumóti kvenna sem fer fram í Slóvakíu. Þrír keppendur koma næstir með 3 vinninga og spennan því mikil fyrir seinni hlutann.

Á þriðja borði vann Haraldur Baldursson (1949) góðan sigur á Kristjáni Guðmundssyni (2289) þar sem sá síðarnefndi missti illa niður mjög vænlega stöðu í endatafli og þá hafði hinn margreyndi Björgvin Kristbergsson (1063) betur gegn Lárusi H. Bjarnasyni (1563) þrátt fyrir mikinn stigamun.

Fimmta umferð fer fram næstkomandi miðvikudagskvöld og hefst venju samkvæmt á slaginu 19.30. Öll úrslit ásamt skákum mótsins má finna á Chess-Results.

Nánar á heimasíðu TR.

 

Lenka með stutt jafntefli í gær

Stórmeistari kvenna, Lenka Ptácníková (2198), gerði sitt fjórða jafntefli í jafnmörgum umferðum EM kvenna í Slóvakíu í gær. Andstæðingur gærdagsins var aserska landsliðskonan Gulnar Mammadova (2360). Skákin var stutt eða aðeins 14 leikir. Prýðisbyrjun hjá Lenku sem hefur teflt við mun stigahærri skákkonur í öllum umferðunum fjórum.

Georgíska skákkonan, Nana Dzagnidze (2507), er efst með fullt hús. 

Fimmta umferð fer fram í dag og hefst kl. 13:15.  Þá mætir Lenka slóvakísku skákkonunni Zuzana Cibickova (2327), sem er stórmeistari kvenna.  Hægt er að fylgjast með skákinni hér.

Alls taka 144 skákkonur þátt frá 30 löndum. Þar af eru 13 konur sem bera stórmeistaratitil, 29 sem eru alþjóðlegir meistarar og 35 sem eru stórmeistarar kvenna. 

• Heimasíða mótsins
• Beinar útsendingar(Chess24) - hefjast kl. 13:15. 
• Chess-Results

Skólameistaramót Kópavogs hefst á morgun

Skólameistaramót Kópavogs fara fram í stúkunni við Kópavogsvöll á næstu vikum: 

Föstudaginn 13.apríl fyrir hádegi 8:30 - 11:30: Meistaramót Kópavogs í skólaskák: 3.-4.bekkur – opið öllum.

Föstudaginn 13.apríl eftir hádegi 12:00 - 13:45: Meistaramót Kópavogs í skólaskák: 2. bekkur – opið öllum.

Föstudaginn 13.apríl eftir hádegi 14:00 - 15:45: Meistaramót Kópavogs í skólaskák: 1. bekkur – opið öllum.

Miðvikudaginn 18.apríl fyrir hádegi 8:30 - 11:30: Meistaramót Kópavogs í skólaskák og Kjördæmamót Reykjaness: 8.-10.bekkur (þeir sem eru með skákstig og 3 stigalausir frá hverjum skóla)

Miðvikudaginn 18.apríl eftir hádegi 12:00-15:00: Meistaramót Kópavogs í skólaskák og Kjördæmamót Reykjaness : 1.-7.bekkur (þeir sem eru með skákstig og 3 stigalausir frá hverjum skóla)

Miðvikudaginn 9. maí fyrir hádegi 8:30 - 11:30: Meistaramót Kópavogs í skólaskák: stúlkur 5.-10.bekkur – opið öllum.

Upplýsingar um þegar skráða keppendur má finna hér.

Mæting í öll mót er 15 mínútum fyrir upphaf þeirra.
Það er Skákdeild Breiðabliks í samvinnu við skákkennara í Kópavogi sem sér um skólamótin.

Pistill Benedikts Þórissonar: Góð ferð til Svíaríkis á Rilton Cup

Um áramótin fór ég á skemmtilegt skákmót sem nefnist Rilton Cup og fer fram árlega í Stokkhólmi. Þetta var mjög skemmtilegt mót og svo er Stokkhólmur falleg borg þar sem margt er hægt að skoða og nýttum við pabbi okkur það en ég leyfði honum að koma með mér í ferðina. 

Ég tefldi í flokki skákmanna með minna en 1800 Elo-stig en síðan voru líka undir og yfir 2200 flokkar. Alls tóku næstum því 400 keppendur þátt í öllu mótinu en í mínum flokki voru þeir 86. Ég var fimmti stigalægsti skákmaðurinn (og svo voru nokkrir stigalausir) en ég hækkaði samt um meira en 90 Elo-stig og fékk 3 vinninga. Það voru tefldar sjö umferðir og tvisvar voru tvær umferðir sama daginn sem mér finnst bara fínt. Ég var líka vanur tímamörkunum sem voru 90+30. Ég byrjaði mjög vel og náði þannig að halda mig frá stigalægstu andstæðingunum en allir sem ég tefldi við voru miklu stigahærri en ég, minnst 300 stigum og mest 600 stigum. 

(Dómararnir voru mjög strangir varðandi allan rafeindabúnað svo það var ekki séns að taka mynd eftir að umferðir voru byrjaðar!) 

Ég ætla aðeins að fara yfir umferðirnar en ég mæli með þessu móti fyrir alla, sérstaklega krakka sem langar að prófa að tefla við nýja andstæðinga og bæta sig ennþá meira. Þetta er líka stutt ferðalag og það kostar ekki mikið að fljúga til Svíþjóðar. Svo er líka gott að á þessum tíma þarf ekki að taka mikið frí úr skóla (auðvitað er samt alltaf gaman að fá frí!). 

1. umferð: Hvítt gegn Svía með 1562 Elo-stig - Jafntefli

Eins og alltaf í fyrstu umferð er erfitt að vita hvern maður fær en ég og pabbi vorum búnir að reikna út að þessi miðaldra Svíi væri líklegur. Það stóðst og ég fann nokkrar skákir með honum og sá að hann var e5 gaur. Ég ákvað því að henda á hann skoska gambítnum sem ég hef soldið notað.

Svíinn lék snemma h6 og var mjög passívur. Ég fékk miklu betri stöðu og eftir 28 leiki var ég eiginlega bara með unnið

Eftir að ég lék Rxd6 lítur svarta staðan alls ekki vel út. Ég tefldi samt ekki nógu vel í framhaldinu og lék af mér manni en var með bætur fyrir hann og á endanum sömdum við jafntefli.

2. umferð: Svart gegn Svía með 1645 Elo-stig – Jafntefli

Annar miðaldra heimamaður var andstæðingurinn í annari umferð. Ég fann engar skákir með honum þannig að ég rifjaði bara upp mínar helstu byrjanir. Skákin byrjaði á d4, d5 og síðan Bf4 en mér finnst þessi biskupsleikur frekar algengur í dag hjá hvítum. Líklega er það útaf London-system sem er vinsælt en hann stillti því einmitt upp gegn mér. Ég stillti bara upp í rólegheitum og eftir 18 leiki var staðan hnífjöfn

Hér lék ég Hc7 en kannski er t.d. Dh6 betri áætlun. Ég lenti síðan í pínu vandræðum sem ég náði að bjarga mér úr og við sömdum jafntefli eftir 43 leiki eftir að hann leyfði mér að þráskáka.

3. umferð: Hvítt gegn Svía með 1494 Elo-stig – Sigur

Enn einn heimamaðurinn en þessi var miklu yngri, fæddur árið 2000. Aftur átti ég erfitt með að finna skákir með andstæðingnum þannig að ég tefldi bara eitthvað í tölvunni og leysti taktík og svona. Aftur fékk ég á mig e5 og aftur beitti ég skoska gambítnum en mér finnast taktískar stöður skemmtilegar. Hann stillti pínu óvenjulega upp og lék m.a. g6 snemma sem ég hef ekki fengið á mig. Staðan var jöfn en í 15. leik lék hann af sér og gaf mér færi á að ná góðri sókn

Hann var að leika Ra5 sem er ekki góður leikur. Ég lék Bg5 og síðan Rf6+. Hann tók riddarann með biskupnum og ég til baka með mínum biskup og þess vegna eru svörtu reitirnir í kringum kónginn orðnir mjög veikir. Hér er ég með unnið en hann gerði mér mjög auðvelt fyrir og leyfði mér að planta drottningunni á h6. Þá var hann óverjandi mát og gafst upp eftir bara 19 leiki.

4. umferð: Svart gegn Svía með 1720 Elo-stig – Tap

Ég var sem sagt með 2 vinninga eftir 3 umferðir og hafði enn ekki tapað skák. Ég var ánægður með svona góða byrjun og vissi að mótið gæti bara verið gott úr þessu. Aftur fékk ég Svía og var þessi einu ári yngri en pabbi sem skildi mig ekki þegar ég sagði að ég tefldi bara við einhverja gamla karla. Ég fann nokkrar skákir með honum og vissi því að hann tefldi d4. Við tefldum drottningarpeðsbyrjun og ég var ekki í neinum vandræðum í byrjuninni en í 16. leik lék ég af mér þegar ég gerðist of bráður á miðborðinu. Ég lék d-peðinu frá d5 til d4 til að opna línur en gaf honum þá færi á fléttum á kóngsvæng. Ég tapaði í 20 leikjum en lærði mikið af skákinni, aðallega að halda áfram að laga hjá mér tímasetninguna á sóknaraðgerðum, en ég er stundum soldið óþolinmóður og vil bara komast sem fyrst í sóknina.

5. umferð: Hvítt gegn sænska jólasveininum með 1449 Elo-stig – Tap

Okkur fannst mjög fyndið að ég skildi tefla við jólasveininn. Þið getið séð mynd af honum hérna https://chess-db.com/public/pinfo.jsp?id=1709330. Reyndar kom svo í ljós að hann var búinn að raka af sér skeggið enda jólin alveg að verða búin. Enn á ný var það skoski gambíturinn og aftur lék svartur h6 snemma. Aftur tókst mér að fá unna stöðu út úr byrjuninni og í 21. leik átti ég algjöra bombu

Hér er f5 svakalega sterkur leikur. Ég lék í staðinn e6 sem er líka góður leikur en ekki eins sterkur og f5 sem opnar allar leiðir að svarta kónginum. Skömmu seinna missti ég svo aftur af leið sem hefði gefið mér gjörunna stöðu

Ég skil ekki ennþá hvernig ég missti af Hg6 en kannski sá ég líka ekki alveg framhaldið nógu marga leiki á eftir. Í staðinn fór ég með hrókinn til baka á e5 en var samt með mun betra alla skákina, alveg þangað til síðustu leikina þegar ég lék henni klaufalega niður. Svekkjandi tap en lærdómsríkt.

6. umferð: Svart gegn Svía með 1522 Elo-stig – Sigur

Þarna var ég búinn að tapa tveimur í röð en ég var alveg rólegur því ég vissi að ég hafði teflt skákirnar vel þrátt fyrir það. Það þýddi ekkert annað en að mæta ákveðinn til leiks gegn þessum Svía sem var meira en 80 ára gamall en það finnst mér frekar rosalegt. Ég vann hann í 30 leikjum en hann tefldi e4 sem ég mætti með Sikileyjarvörn. Hann tefldi Alapin (c3) afbrigðið gegn henni sem ég hef skoðað soldið og ég átti ekki í neinum vandræðum í byrjuninni. Hann lék svo af sér peði þannig að ég fékk mun betra en lokin á skákinni voru frekar furðuleg

Hér var hvítur að leika Bd3 og þá á svartur hinn lævísa Rc5 sem vinnur allavega skiptamun. Í staðinn lék ég Ha1+ sem gefur hvítum betri stöðu því þá getur hann skákað á b8 með hróknum. Þá lék sá gamli hinsvegar Kg2 (í staðinn fyrir Kh2) sem er hrikalegur afleikur því þá skáka ég biskupinn á d3 af með Re1+. Hann gafst strax upp og mikilvægur sigur hjá mér í höfn eftir tvær tapskákir í röð.

7. umferð: Hvítt gegn Svía með 1492 Elo-stig – Tap

Enn á ný mætti ég heimamanni “á miðjum aldri” eins og pabbi segir. Ég gat lítið undirbúið mig því ég fann engar skákir með honum. Upp kom Sikileyjarvörn og stillti ég upp ensku árásinni sem ég hef verið að skoða og fengið góða leiðsögn í. Strax í 10. leik fannst mér hann leika furðulega þegar hann fórnað skyndilega biskup á g4 peðið mitt. Ég hef aldrei séð þetta og þetta er alls ekki gott fyrir svartan

Hér er ég einfaldlega manni yfir og eiginlega með unna stöðu. Því miður langhrókaði ég eftir uppskiptin á g4 í staðinn fyrir að leika bara Hg1 sem ég reyndar skoðaði en ég var eitthvað smeykur við Bh4+. Eftir að ég tók svo riddarann til baka með drottningu á e3 varð hún leppur eftir Bg5. Mér fannst þetta rosa klaufalegt og ég var svekktur eftir skákina sem ég tefldi í smá tíma í viðbót. Þetta voru stærstu mistökin hjá mér í öllu mótinu en ég get samt verið ánægður því ég held að ég hafi bara staðið mig mjög vel og þetta var skemmtileg ferð. Ég tefldi heilt yfir vel og bætti heilmikilli reynslu við hjá mér.

(Hér er ég að skoða frægt skip sem heitir Vasa-skipið. Það sökk bara strax í höfninni fyrir 350 árum af því að það var kolvitlaust byggt!)

Skrár tengdar þessari bloggfærslu:

• Pistill Benedikts í PDF

Lenka með þriðja jafnteflið í röð í Slóvakíu

Stórmeistari kvenna, Lenka Ptácníková (2198), sótt hart að hinni pólsku Alicja Sliwicka (2329) í fjörlegri skák í þriðju umferð EM kvenna í gær í Slóvakíu. Sá pólska var klók og fórnaði drottningunni fyrir hrók en tókst þess að stað að stilla upp í óvinnandi virki. Þriðja jafntefli Lenku í jafnmörgum gegn mun stigahærri skákkonu. 

Fjórða umferð fer fram í dag og hefst kl. 13:15. Þá teflir Lenka við asersku landsliðskonuna Gulnar Mammadova (2360) sem er þrátt fyrir nafnið mun ekki vera ekki skyld Skakhryar Mamedyarov. 

Nana Dzagnidze (2507), Georgíu, og Demainte Cornettte (2467), Litháen, sem sló í gegn á GAMMA Reykjavíkurskákmótinu eru efstar með fullt hús eftir 3 umferðir. 

Alls taka 144 skákkonur þátt frá 144 löndum. Þar af eru 13 konur sem bera stórmeistaratitil, 29 sem er alþjóðlegir meistarar og 35 sem eru stórmeistarar kvenna. 

• Heimasíða mótsins
• Beinar útsendingar(Chess24)
• Chess-Results

Skólaskákmót Reykjavíkur fer fram 17. apríl

Skólaskákmót Reykjavíkur fer fram þriðjudaginn 17. apríl í Laugalækjarskóla.

Tefldar verða 6-7 umferðir með 10 mínútna umhugsunartíma. 

 

Teflt er í yngri flokki 1.-7. bekkur og eldri flokki 8.-10. bekkur. Sigurvegari hvors flokks fær sæti á Landsmótinu í skólaskák.

 

Mótið hefst klukkan 16:00.

 

Hver skóli má senda til leiks sína skólameistara eða sterkustu skákmenn.

 

Skráning á [e-mail]