Topalov vann í Shamkir - Kanarnir fóru í jafnteflis-Gírí

Óvæntir hlutir gerðust í 4. umferð minningarmótsins um Gashimov í gær í Shamkir í Aserbaísjan . Topalov (2749) vann Mamedayarov (2814). Fyrsta og eina vinningsskák mótsins tefldar hafa verið fjórar umferðir - alls 20 skákir. Bandaríkjamenn fóru hins vegar hina leiðina og öllum skákum fimmtu umferðar lauk með jafntefli. 

Fimmta umferð Shamkir-mótsins fer fram í dag. Þá teflir heimsmeistarinn Magnus Carlsen (2843) við Pólverjann Wojtaszek (2744).

Nánar um gang mála í Shamkir á Chess.com. 

• Heimasíða mótsins
• Beinar útsendingar (hefjast kl. 11)

Öllum skákum fimmtu umferðar bandaríska meistaramótsins lauk hins vegar með jafntefli. Wesley So (2786), Samuel Shankland (2671) og Varuzhan Bkobian (2647) eru því sem fyrr efstir en þeir hafa 3,5 vinninga. Caruana (2804)hefur 3 vinninga og Nakamura (2787) hefur 2,5 vinninga.

Í kvennaflokki eru þær Nazi Paikidze (2352) og hin kornunga Annie Wang (2321) efstar með 4 vinninga. Annie er fædd árið 2002 og lærir heima að lokinni hverri umferð! 

Sjötta umferð fer fram í kvöld og hefst kl. 18. 

Nánar má lesa um gang mála á Chess.com. 

• Heimasíða mótsins
• Beinar útsendingar (hefjast kl. 18) 

Skákþáttur Morgunblaðsins: Vinsælt öðlingamót – Atli Freyr hækkaði mest

Það er dálítil karlaslagsíða á Öðlingamótinu sem nú stendur yfir í húsakynnum Taflfélags Reykjavíkur og eru samankomnir 37 karlkyns keppendur og ein kona. Lenka Ptacnikova, stórmeistari kvenna, vann þrjár fyrstu skákir sínar og nýtti sér yfirseturétt í tveimur næstu umferðum því að hún er meðal þátttakenda á Evrópumóti kvenna í Slóvakíu og stendur sig þar vel. Margir á keppendalistanum settu svip á Reykjavíkurskákmótið á dögunum. Nokkrir þurfa að aka dágóðan spöl til að komast á skákstað og má þar nefna Flóamennina Þórð Guðmundsson lækni og Úlfhéðin Sigurmundsson bónda. Þarna eru líka Lárus H. Bjarnason, rektor MH, en stigahæsti keppandinn er Kristján Guðmundsson, kennari við Kvennaskólann og liðsstjóri íslenska ólympíuliðsins á árunum 1984-'92.

Upphafsmaður öðlingamótanna er hinn kunni skákdómari Ólafur Ásgrímsson sem ekki alls fyrir löngu fagnaði 70 ára afmæli sínu og 40 ára skákdómaraafmæli en ferill hans sem slíkur hófst á Skákþingi Reykjavíkur árið 1976 með frægu deilu-, kæru- og áfrýjunarmáli sem varðaði gallaða sovéska skákklukku. Síðan þá hefur verið fremur kyrrt í kringum Ólaf enda annálað prúðmenni.

Teflt er einu sinni í viku og eftir fjórar umferðir er staða efstu manna þessi: 1.-3. Lenka Ptacnikova, Sigurbjörn Björnsson og Þorvarður Ólafsson 3½ v. (af 4) 4.-7. Jóhann H. Sigurðsson, Halldór Pálsson, Jóhann Ragnarsson og Haraldur Baldursson 3 v.

Það er alltaf vel þegið þegar skákir slíkra móta eru slegnar inn en nokkur bið hefur orðið á því verklagi hjá SÍ hvað varðar seinni hluta Íslandsmóts skákfélaga. Á því móti og á Reykjavíkurskákmótinu voru margir að tefla athyglisverðar skákir, t.d. vann Hallgerður Helga Þorsteinsdóttir hinn öfluga alþjóðlega meistara Björgvin Jónsson og athygli vakti Atli Freyr Kristjánsson sem sneri aftur eftir nokkurra ára hlé og á Reykjavíkurskákmótinu hækkaði hann mest íslenskra skákmanna sem voru yfir 2.000 elo-stigum. Skákir hans urðu oft langar og strangar og sennilega gat hann þakkað útsjónarsemi í erfiðum stöðum gott gengi sbr. eftirfarandi dæmi:

Reykjavíkurskákmótið 2018; 6. umferð:

Opasiak – Atli Freyr Kristjánsson

Staðan er tvísýn og hvítur lék lævísum leik....

38. Dh4!

Með hugmyndinni 38.... Dxe6 39. Dh6+ og 40. Hf8+.

38.... Hc1?!

Öruggara var 38.... Kh8!

39. Hxc1 Dxe6

Þvingað þar sem 39.... Bxc1 er svarað með 40. Dd4+! og mát í næsta leik.

40. Hc7+ Kg8 41. Dxh7+ Kf8

 

Svartur hefur varla látið sig dreyma um að vinna þessa stöðu því kóngurinn er ansi berskjaldaður.

42. Dh4 Dd5+ 43. Kg1 Bd4+ 44. Kf1 Df3+ 45. Ke1 Bc3+ 46. Hxc3 Dxc3+ 47. Kd1 Dd3+ 48. Ke1 Ke7

Drottningarendataflið er líklega jafntefli með bestu taflmennsku en betri kóngsstaða svarts gefur þó vinningsmöguleika.

49. Df4 Dd6 50. Dh4 De5+ 51. Kd1 Ke6 52. Dg4+ Kd5 53. Dd7+ Dd6 54. Df7+ Ke4+ 55. Ke1 Dc6 56. De7+ Kf5 57. Kf2 Dc2+ 58. Kf3 Dd3+ 59. Kf2 Dd4+ 60. Kf3 Df4+ 61. Ke2 De4+?!

Slakur leikur sem vinnur strax! Betra var 61.... Dxh2+.

62. Dxe4+ Kxe4

 

63. h4??

Hann gat haldi jöfnu með 63. Kd2! þó langsótt sé: 63.... a5 64. Kc3 Kf5 65. Kd4 Kxg5 66. Kc5 b4 67. axb4 axb4 68. Kxb4 Kh4 69. Kc5 Kh3 70. Kd4 o.s.frv.

63.... Kf5

– og hvítur gafst upp, 64. Kf3 er svarað með 64.... a5 o.s.frv.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 14. apríl 2018

Skákþættir Morgunblaðsins

Áskorandinn á toppinn - jafnteflin alls ráðandi í Shamkir

Fjörlega er teflt á bandaríska meistaramótinu í skák og lauk þremur skákum af sex með hreinum úrslitum í gær. Áskorandinn Fabiano Caruana (2804) vann sína aðra skák í röð þegar hann lagði undrabarnið Jeffrey Xiong (2665) að velli.  Caruana er nú efstur ásamt Wesley So (2786) og CAkobian (2647) með 2,5 vinning eftir 3 umferðir.

Fjórða umferð fer fram í kvöld. Nánari umfjöllun um þriðju umferð má finna á Chess.com. 

• Heimasíða mótsins
• Beinar útsendingar (hefjast kl. 18) 

Jafnteflin eru allsráðandi á Shamkir-mótinu. Öllum skákum 1. og 2. umferðar hefur því lokið með jafntefli. Þriðja umferð hófst kl. 11 í morgun. Þegar hefur einni skák lokið með jafntefli. Nánari umfjöllun um Shamkir-mótið má finna á Chess.com.

• Heimasíða mótsins
• Beinar útsendingar (hefjast kl. 11)

Jón Kristinn TM-mótaraðameistari

 

Fimmtudaginn 19. apríl fór lokaumferð TM-mótaraðarinnar fram. Tíu vaskir skákmenn mættu til leiks. Þar af var helmingur sem ekki hafa teflt áður á mótaröðinni á þessu ári.
Fyrir lokaumferðina leiddi Jón Kristinn Þorgeirsson í keppninni í heild en Símon Þórhallsson var skammt á eftir. Jón gaf engin grið og lagði Símon og tryggði sér þar með sigur í heildarkeppninni. Jón hlaut 8 vinninga af 9 mögulegum í lokaumferðinni og deildi efsta sætinu með Sigurði Arnarsyni. Í þriðja sæti varð hinn ungi og bráðefnilegi Stefan Briem. Hlaut hann 7 vinninga. Hann var sá eini í þessari umferð sem lagði meistara Jón. Þeir Briem-bræður eru sérstakir vinir Skákfélags Akureyrar og tefla ætið vel hér í bæ.
Heildarstaðan varð þessi:

Jón Kristinn Þorgeirsson	8
Sigurður Arnarson	8
Stefan Briem	7
Símon Þórhallsson	6
Tómas Veigar Sigurðarson	4
Haki Jóhannesson	3,5
Benedikt Briem	3
Alex Orrason	2,5
Ólafur Evert Úlfsson	2
Hjörtur Steinbergsson	1

 

Í heildarkeppninni teljast fimm bestu umferðirnar af þeim sjö sem tefldar voru. Því dugði það ekki Símoni Þórhallssyni til sigurs að hafa flesta vinninga í heildina og flesta sigra í mótaröðinni að auki. Hann varð samt vinningi á eftir Jóni Kristni. Í þriðja sæti endaði Sigurður Arnarson. Alls tóku 24 skákmenn þátt í mótaröðinni í heild sinni en flestir urður þeir 13 í einni umferð.

Lokastaðan

 

 

Öðlingamótið: Sigurbjörn og Þorvarður efstir

 

Fide-meistarinn Sigurbjörn Björnsson (2278) er efstur ásamt Þorvarði F. Ólafssyni (2176) með 4,5 vinning þegar fimm umferðum er lokið á Skákmóti öðlinga. Stórmeistari kvenna, Lenka Ptacnikova (2200), kemur næst með 4 vinninga líkt og Haraldur Baldursson (1949). Í fimmtu umferð, sem fór fram síðastliðið miðvikudagskvöld, lagði Sigurbjörn Jóhann H. Ragnarsson (1985) nokkuð örugglega í vel útfærðri sóknarskák. Þorvarður hafði betur gegn Halldóri Pálssyni (2056) eftir að hafa þjarmað duglega að honum í vanalegu tímahraki þess síðarnefnda. Þá sigraði Haraldur Jóhann H. Sigurðsson (1988) í mikilli baráttuskák.

Ekki var mikið um óvænt úrslit en þó litu jafntefli dagsins ljós í viðureign Sverris A. Björnssonar (2135) og Kristins J. Sigurþórssonar (1744), sem og Halldórs Garðarssonar (1793) og Björgvins Víglundssonar (2147). Þá vakti athygli viðureign feðganna Þórs Valtýssonar (1922) og Páls Þórssonar (1693) þar sem fljótlega var samið jafntefli en hvorugur kunni við að fara illa með hinn.

 

Sjötta og næstsíðasta umferð fer fram næstkomandi miðvikudagskvöld en þá verður hörkuviðureign á fyrsta borði þar sem Sigurbjörn hefur hvítt gegn Lenku. Á öðru borði mætast Stefán Arnalds (1999) og Þorvarður en á því þriðja berjast Kristján Guðmundsson (2289) og Ögmundur Kristinsson (2010). Orrusturnar hefjast á slaginu 19:30 og að sjálfsögðu verður heitt á könnunni fyrir keppendur og áhorfendur!

Úrslit ásamt skákum á Chess-Results.

Nánar á heimasíðu TR.

 

Guðmundur tapaði í lokaumferðinni

Alþjóðlegi meistarinn, Guðmundur Kjartansson (2430), tapaði fyrir úkraínska stórmeistranum Valeriy Neverov (2484) í níundu og síðustu umferð Rector Cup í Úkraínu. Guðmundur hlaut 5 vinninga og endaði í sjötta sæti.

Frammistaða Guðmundar samsvaraði 2466 skákstigum og hækkar hann um 4 stig fyrir hana. 

Um var að ræða manna 10 manna lokað skákmót. Guðmundur var fimmti í stigaröð keppenda. Meðalstigin eru 2424 skákstig. 

Mótið á Chess-Results.

Sumarskák í Hofi

 

Í tengslum við Barnamenningarhátíðina á Akureyri gekkst Skákfélag Akureyrar, í samstarfi við Menningarfélag Akureyrar, fyrir viðburði í Menningarhúsinu Hofi. Öllum áhugasömum var boðið að mæta og taka með sér gesti Hægt var að læra mannganginn, taka þátt í spurningaleik, leysa skákþrautir og lita skákmyndir. Að auki var hægt að tefla við bæði byrjendur og lengra komna, hvort heldur sem var á hefðbundnu skákborði eða á risataflborði. Hægt var að fá tilsögn á meðan teflt var.

 

 

Reykjavíkurmeistarinn í skák, Stefán Bergsson, sem jafnframt er meðlimur í Skákfélagi Akureyrarmætti fyrir hönd Skákskóla Íslands og bauð upp á kennslu fyrir gesti. Stefán var einnig fenginn í viðtal fyrir sjónvarpsþáttinn Landann og fékk margar óvenjulegar spurningar. Var hann meðal annars spurður af hverju taflmenn væru ekki sægrænir í stað þess að vera bara svartir og hvítir.

Fjölmargir litu við og skemmtu sér hið besta enda er skák skemmtileg. Hana er hægt að stunda óháð kyni eða aldri og hún bætir einbeitingu og rökhugsun.

Sumarskák er partur af viðburðaröð í tengslum við Barnamenningarhátíð á Akureyri sem haldin er í fyrsta sinn nú í ár. Hátíðin stendur yfir til 22. apríl. Viðburðurinn var styrktur af Menningarsjóði Akureyrar.

Shamkir-mótið hófst með fimm jafnteflum - meira fjör í Saint Louis

Shamkir-mótið. þar sem teflt er til minningar um Vugar Gashimov, hófst í Aserbaídsjan í gær. Mótið hófst á rólegu nótunum en öllum fimm skákum umferðarinnar lauk með jafntefli. Þar með talið skák, tveggja stigahæstu skákmanna heims, Magnúsar Carlsen (2843) og Shakhryar Mamedyarov (2814).  Önnur umferð hefst kl. 11 í dag og þá teflir heimsmeistarinn við David Navara (2745). 

Nánari umfjöllun á Chess.com. 

• Heimasíða mótsins
• Beinar útsendingar (hefjast kl. 11)

d

Öllu meira fjör var í Saint Louis í gær þar önnur umferð bandaríska meistaramótsins fór fram. Wesley So (2786) og Akobian (2647) eru efstir með fullt hús. Áskorandinn Fabiano Caruana (2804) yfirspilaði KR-inginn Alexandr Lendermann (2599) og er í 3.-4. sæti með 1,5 vinninga. Lendermann er ekki áskrifandi af New in Chess og fékk heldur betur á kenna á því að það getur verið dýrt að spara. Sjá nánar Chess.com þar sem finna má ítarlega frásögn frá gærdeginum. 

Þriðja umferð hefst kl. 18 í dag. Þá teflir Caruana við undradrenginn Jeffery Xiong (2665). 

 

• Heimasíða mótsins
• Beinar útsendingar (hefjast kl. 18) 

 

Hraðskákmótaröð TR – Mót 4 fer fram eftir viku

Fjórða mót Hraðskákmótaraðar Taflfélags Reykjavíkur fer fram föstudagskvöldið 27. apríl í skáksal TR að Faxafeni 12. Taflið hefst stundvíslega klukkan 19:30. Mótið er opið öllum skákmönnum með yfir 2000 skákstig, eða þeim sem hafa einhverntíman á ferlinum rofið 2000 stiga múrinn. Mótsnefnd áskilur sér rétt til þess að bjóða völdum gestum undir 2000 stigum að tefla með.

Tefldar verða 11 umferðir með tímamörkunum 3+2 og verður mótið reiknað til alþjóðlegra hraðskákstiga. Frítt inn!

Dagskrá mótaraðarinnar:

• Mót 1: 26.janúar
• Mót 2: 23.febrúar
• Mót 3: 23.mars
• Mót 4: 27.apríl

Mælst er til þess að skákmenn skrái sig í gegnum skráningarformið til þess að auðvelda skipulagningu mótsins. Einnig verður hægt að skrá sig til leiks á skákstað á mótsdegi en skráningu lýkur kl.19:20.

SKRÁNINGARFORM

SKRÁÐIR KEPPENDUR

Skákþing Norðlendinga hefst eftir viku á Húsavík

Skákþing Norðlendinga 2018 verður haldið 27. – 29. apríl á Húsavík. Telfdar verða sjö umferðir. Fyrstu fjórar umferðirnar verða atskákir (25 mín) en lokaumferðirnar þrjár verða kappskákir (90 mín + 30 sek fyrir hvern leik). Mótið verður reiknað til íslenskra og alþjóðlegra stiga.

Skákmeistari Norðlendinga getur aðeins orðið sá sem á lögheimili á Norðurlandi, en mótið er öllum opið.

Skákstjóri verður Ingibjörg Edda Birgisdóttir.

Núverandi Skákmeistari Norðlendinga er Haraldur Haraldsson frá Akureyri.

Mótsstaður: Framsýn, Garðarsbraut 26.

Dagskrá

• Mótið hefst kl. 20.00 á föstudagskvöldið 27. apríl, en þá verða telfdar 4 umferðir af 25 mínútna atskákum.
• 5. umferð kl. 11.00 laugardaginn 28. apríl (kappskák 90 + 30 sekúndur á leik)
• 6 umferð kl. 17.00 laugardaginn 28. apríl (kappskák 90 + 30 sekúndur á leik)
• 7. umferð kl. 11.00 sunnudaginn 29. apríl (kappskák 90 + 30 sekúndur á leik)

Verðlaun

1. sæti 45.000 kr.
2. sæti 30.000
3. sæti 20.00
4. sæti 15.000
5. sæti 10.000

Aukaverðlaun fær efsti skákmaður með minna en 1800 stig, 10.000 kr.. Verði menn jafnir að vinningum skiptast verðlaun jafnt milli þeirra.

Verðlaun verða einnig veitt fyrir þrú efstu sætin í flokkin skákmanna 16 ára og yngi.

Þátttökugjöld

Þátttökugjöld fullorðnir : 4000 kr.
Unglingar 16 ára og yngri : 2000 kr.

Yfirseta

Heimilt verður hverjum keppanda að taka sjálfvalda yfirsetu (bye) tvisvar í mótinu og fæst hálfur vinningur fyrir hvert bye.

Ekki verður þó hægt að taka bye í 1. eða 7. umferð.

Tilkynna þarf til skákstjóra hvenær keppandi ætlar að taka sjálfvalda yfirsetu áður en parað er í viðkomandi umferð.

Skráning

• Skráningarform
• Skráðir keppendur

 

Stigaútreikningur

Verði fleiri en einn jafn í keppni um titilinn „Skákmeistari Norðlendinga“ munu stig ráða, en notast verður við leiðbeinandi fyrirmæli frá Alþjóðaskáksambandinu FIDE.

• Direct encounter
• The greater number of wins
• The greater number of games with Black (unplayed games shall be counted as played with White)
• AROC
• Buchholz Cut 1

Hraðskákmót Norðlendinga

Hraðskákmót Norðlendinga 2018 verður haldið að aðalmótinu loknu, sunnudaginn 29. apríl og hefst kl. 14.30 eða síðar.

Ekkert þáttökugjald er í það mót og í verðlaun eru hefðbundnir verðlaunagripir.

Upplýsingar

Hermann Aðalsteinsson veitir allar frekari upplýsingar – [e-mail]