Skák.is

Bloggfærslur mánaðarins, desember 2013

16.12.2013 | 07:00

Jólaskákmót vikunnar

Mikið er af jólamótum í vikunni. KR-ingar tefla í kvöld og hefst taflmennskan kl. 19:30. Annars er jóladagskrá vikunnar sem hér segir:

Jólamót KR - mánudaginn 16. desember í KR-heimilinu, kl. 19:30
Jólamót Riddarans - miðvikudaginn, 18. desember í Strandabergi kl. 13 (60+)
Hraðskákmóts SSON, miðvikudaginn, 18. desember í Fischer-setrinu kl. 20
Jólamót Gallerý Skák, fimmtudaginn, 19. dsember kl. 18 í Gallerý Skák
Jólapakkamót GM Hellis, laugardaginn, 21. desember kl. 13 í Ráðhúsinu

Spil og leikir | Breytt 15.12.2013 kl. 22:24 | Slóð | Facebook | Athugasemdir (0)

15.12.2013 | 21:45

Friðriksmót Landsbankans - í máli og myndum

Hilmar Þór Guðmundsson, ljósmyndari Landsbankans, kom á vettvang á Friðriksmóti Landsbankans - Íslandsmótinu í hraðskák og tók myndir. Bæði við upphaf mótsins og svo við lok mótsins. Hér má sjá nokkrar myndir hans.

Alls tóku 79 skákmenn þátt í mótinu. Þorsteinn Þorsteinsson, útibússtjóri í Austurstræti lék fyrsta leikinn í skák Helga Ólafssonar og Inga Tandra Traustasonar. Helgi vann þá skák og 3 næstu en tapaði fyrir Ingvari Þór Jóhannessyni í fjórðu umferð.

Kjartan Maack fór mikinn og vann fyrstu fimm skákirnar. Meðal fórnarlamba hans voru Hjörvar Steinn Grétarsson og Björn Þorfinnsson alþjóðlegur meistari. Ekki gekk vel hjá Hjörvari í fyrra hluta mótsins.

Það var svo Jón L. Árnason sem stöðvaði Kjartan í sjöttu umferð og leiddi í hléi. Jóni gekk hins vegar ekki vel eftir hlé og Þröstur Þórhallsson, Ingvar, Andri Áss og þá sérstaklega Helgi sem tóku við forystunni.

Helgi hafði svo vinningsforskot á Ingvar fyrir lokaumferðina. Helgi tapaði hins vegar fyrir Hjörvari en það koma ekki að sök því Ingvar gerði jafntefli við Lenku Ptácníková. Helgi sigraði því á mótinu, hlaut 9 vinninga en Ingvar og Hjörvar, sem átti sem átti frábæran endasprett komu næstir með 8½ vinning.

Í 4.-7. sæti með 8 vinninga urðu Þröstur, Andri Áss Grétarsson, Björn Þorfinnsson og Lenka.

Það sem gerir mótið jafn skemmtileg og raun ber vitni er frábær umgjörð í Landsbankanum, mikill fjöldi áhorfenda og afar fjölbreyttur keppendahópur.

Aukaverðlaunahafar urðu:

Kvennaverðlaun: Lenka Ptácníková 8 v.
U-2200: Tómas Björnsson 7,5 v.
U-2000: Lárus Knútsson 7,5 v.
U16-strákar: (grunnskólaaldur): Gauti Páll Jónsson 6 v.
U16-stúlkur: (grunnskólaaldur): Sóley Lind Pálsdóttir 4,5 v.
Útdreginn heppinn keppandi: Arnljótur Sigurðsson

Lokstöðu mótsins má finna á Chess-Results.

Myndaalbúm (Hilmar Þór Guðmundsson)

Spil og leikir | Breytt 16.12.2013 kl. 10:22 | Slóð | Facebook | Athugasemdir (0)

15.12.2013 | 21:17

Nakamura sigraði í London - Guðmundur og Oliver töpuðu í síðustu umferð

London Chess Classic-hátíðinni lauk í kvöld. Hikaru Nakamura sigraði á aðalmótinu eftir sigur á Boris Gelfand í úrslitaeinvígi. Nakamura vann Vladimir Kramnik í undanúrslitum en Gelfand lagði Mickey Adams að velli. Guðmundur Gíslason og Oliver Aron Jóhannesson töpuðu báðir í lokaumferðinni í FIDE Open. Norðmaðurinn Jon Ludvig Hammer (2612), sem verður meðal keppenda á N1 Reykjavíkurskákmótinu, sigraði á mótinu.

Guðmundur hlaut 5 vinninga og endaði í 51.-78. sæti en Oliver hlaut 4½ vinning og endaði í 79.-102. sæti.

Árangur Guðmundar samsvaraði 2294 skákstigum og lækkar hann um 2 stig fyrir hana. Frammistaða Olivers samsvaraði 2245 skákstigum og hækkar hann um 27 stig fyrir hana.

Alls tóku 90 skákmenn þátt í FIDE Open. Þar af voru 23 stórmeistarar. Guðmundur var nr. 56 í stigaröð keppenda en Oliver nr. 112.

Heimasíða mótsins
Beinar útsendingar - (hefjast ýmist 14:30 eða 16:30)

Spil og leikir | Slóð | Facebook | Athugasemdir (0)

15.12.2013 | 20:00

Skákþáttur Morgunblaðsins: Tinna Kristín og Lenka stóðu sig best í Varsjá

Judit Polgar var eina konan sem tefldi í Opnum flokki Evrópumóts landsliða í Varsjá á dögunum en 25 ár eru síðan hún tefldi með ungversku kvennasveitinni á Ólympíumótinu í Saloniki í Grikklandi og hreppti gullverðlaun. Síðan hefur hún ekki tekið þátt í „kvennamótum". Þær konur sem tóku sæti í bestu liðum kvennaflokksins í Varsjá á dögunum standa Judit ekki langt að baki. En Judit hefur samt algjöra sérstöðu meðal kvenna og er réttnefnd skákdrottning heimsins. Af henni má margt læra og það vita stúlkurnar í íslensku sveitinni sem voru þær sömu og tefldu á OL í Istanbul í fyrra. Lenka Ptacnikova, Hallgerður Helga Þorsteinsdóttir, Jóhanna Björg Jóhannsdóttir, Tinna Kristín Finnbogadóttir og Elsa María Kristínardóttir hafa ekki áður fengist við jafnerfitt verkefni og taka áreiðanlega ýmislegt með sér frá mótinu. Sveitin hafnaði í 31.

sæti af 32 þátttökuþjóðum en ekki var langt á milli sveitanna sem lentu í neðri helmingi mótsins. Þó liggur fyrir að einungis Lenka Ptacnikova sem hlaut 4½ vinning úr 9 skákum og Tinna Kristín Finnbogadóttir, með 4 vinninga af 7 mögulegum geta verið sáttar með frammistöðu sína. Þannig náði Tinna Kristín árangri upp á 2151 elo stig og hækkaði um 35 elo-stig. Skákir hennar taka oft óvænta stefnu og hún á það til að láta liðsafla af hendi fyrir óljósar bætur. Fleyg orð Jóhanns Þóris um þankagang sinn þegar hann tefldi við Norðmanninn Leif Ögaard á Norðurlandamótinu sumarið 1973: „Grugga, grugga", eiga vel við sumar ákvarðanir hennar við skákborðið. Í Póllandi var þó meira öryggi yfir stílnum sem kom vel fram í bestu skák hennar sem tefld var í 1. umferð:

EM 2013, Varsjá 2013:

Tinna Kristín Finnbogadóttir - Giedre Vanagaite (Litháen)

Sikileyjarvörn

1. e4 c5 2. Rc3 Rc6 3. g3 g6 4. d3 Bg7 5. Be3 d6 6. Bg2

Lokaða-afbrigði sikileyjarvarnarinnar stendur býsna traustum fótum. Tinna velur hér leið sem kom býsna oft upp skákum Nigel Short í byrjun aldarinnar.

6. ... Hb8 7. Dd2 b5 8. Rge2 Rd4 9. O-O Rxe2 10. Dxe2 b4 11. Rd1 Rf6 12. e5!?

Óvæntur leikur og ekki slæmur. Gott var einnig 12. a3 eða 12. f4.

12. ... Rg4 13. exd6 Dxd6 14. Bf4 e5 15. h3 O-O 16. Bc1 Rh6 17. Re3 Rf5 18. Rc4 Dc7 19. Hb1

Full hægfara. betra er 19. c3 má hvítur vel við sína stöðu una.

19. ...Rd4 20. Dd1 Bb7 21. Be3 Re6 22. Bxb7 Hxb7 23. Dd2 Hd8 24. f3 f5 25. Hbe1 f4 26. gxf4 exf4 27. Bf2 Rg5 28. Kg2 Dd7 29. Hh1 Dd5 30. De2 Bf6 31. h4

Það veitist létt verk að bægja atlögum svarts frá. Brátt nær hvítur yfirráðum eftir e-línunni.

31. ... He7 32. Dd1 Re6 33. He4 Df5 34. De2 Hdd7 35. Re5 Hc7 36. Rg4 Bg7 37. He1 Kf7

Litháíska stúlkan sem var í miklu tímahraki hefur stillt upp í vörn í kringum riddarann á e6.

- Sjá stöðumynd -

38. He5!

Óvæntur hnykkur. Er 38. ... Bxe5 þá 39. Rh6+ og drottningin fellur.

38. ... Rd4 39. Hxf5+

Einfaldara var 39. Hxe7+. Tinna var fegin a losna við svörtu drottninguna og valdi því þennan leik sem dugar auðveldlega til sigurs.

39. ... gxf5 40. Dd2 fxg4 41. Dxf4+ Kg8 42. fxg4 Hb7 43. Dd6 Hxe1 44. Bxe1 Rxc2 45. Dd8 Bf8 46. Bf2 Rd4 47. Bxd4 cxd4 48. Dxd4 h6 49. g5 Hg7 50. Dd5 Kh8 51. Df5 Be7 52. g6 Bxh4 53. Df8+

- og svartur gafst upp, 53. ... Hg8 er svarað með 54. Dxh6 mát.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 8. desember 2013

Skákþættir Morgunblaðsins

Spil og leikir | Breytt 8.12.2013 kl. 18:21 | Slóð | Facebook | Athugasemdir (0)

15.12.2013 | 12:00

Hannes með fullt hús vinninga í Kosta Ríka

Hannes Hlífar Stefánsson (2544) er í miklu stuði á alþjóðlegu skákmóti sem nú er í gangi í Kosta Ríka. Eftir sex umferðir hefur Hannes fullt hús vinninga.

Í fyrstu fjórum umferðunum lagði Hannes skákmenn á stigabilinu 1910-2257 í skáktig. Í fimmtu umferð vann hann danska stórmeistarann Allan Stig Rasmussen (2485) en í sjöttu umferð hafði hann betur gegn félaga sínum, Guðmundi Kjartanssyni (2453). Guðmundur hefur 4½ vinning og er í 3.-7. sæti.

Tvær síðustu umferðirnar fara fram í dag.

62 skákmenn taka þátt í mótinu. Þar af eru 2 stórmeistarar og 2 alþjóðlegir meistarar. Hannes er stigahæstur keppenda en Guðmundur er nr. 3 í stigaröð keppenda.

Spil og leikir | Breytt s.d. kl. 12:32 | Slóð | Facebook | Athugasemdir (0)

15.12.2013 | 09:57

Guðmundur og Oliver að standa sig vel í London

Guðmundur Gíslason (2318) og Oliver Aron Jóhannesson (2078) hafa báðir staðið sig prýðilega í FIDE Open-mótinu sem nú fer fram - samhliða London Chess Classic. Guðmundur hefur hlotið 5 vinninga en Oliver hefur hlotið 4½ vinning.

Guðmundur tapaði fyrir norska alþjóðlega meistaranum Frode Elsness (2482) í sjöundu umferð en vann Kai Jie Edward Lee (2145) frá Singapore í áttundu umferð.

Oliver enska skákmanninn David Coleman (2257) í sjöundu umferð en gerði jafntefli við Spánverjann Fernando Semprun Martinez (2213).

Í lokaumferðinni sem fram fer í dag teflir Guðmundur við indversku skákkonuna Harika Dronavalli (2487) en Oliver við Svíann Mats Persson (2250). Skák Guðmundar verður sýnd beint á vef mótsins og hefst kl. 14:30.

Efstir með 6½ vinning eru stórmeistararnir Jon Ludvig Hammer (2612), Noregi, Abhijeet Gupta (2608), Indlandi, og Vladislav Nevednichy (2604), Rúmeníu.

Í aðalmótinu fara undanúrslit og úrslit fram í dag. Í undanúrslitum mætast annars vegar Adams og Gelfand og hins vegar Kramnik og Nakamura. Kramnik sló út Anand. Undanúrslit hefjast kl. 13 en úrslitin kl. 17:30.

90 skákmenn taka þátt í FIDE Open. Þar af eru 23 stórmeistarar. Guðmundur er nr. 56 í stigaröð keppenda en Oliver nr. 112.

Heimasíða mótsins
Beinar útsendingar - (hefjast ýmist 14:30 eða 16:30)

Spil og leikir | Breytt s.d. kl. 11:46 | Slóð | Facebook | Athugasemdir (0)

14.12.2013 | 21:03

Helgi Íslandsmeistari í hraðskák eftir sigur á Friðriksmóti Landsbankans

Stórmeistarinn Helgi Ólafsson sigraði á Friðriksmóti Landsbankans sem fram fór í dag í útibúi bankans í Austurstræti. Helgi hlaut 9 vinninga í 11 skákum. Mótið var jafnframt Íslandsmótið í hraðskák þannig að Helgi telst því Íslandsmeistari í hraðskák. Í 2.-3. sæti með 8,5 vinning, urðu félagi hans úr Taflfélagi Vestmannaeyja, Ingvar Þór Jóhannesson, og nýjasti stórmeistari Íslendinga, Hjörvar Steinn Grétarsson.

Í 4.-7. sæti með 8 vinninga urðu Þröstur Þórhallson, Andri Áss Grétarsson, Björn Þorfinnsson og Lenka Ptácníková.

Aukaverðlaunahafar urðu:

Kvennaverðlaun: Lenka Ptácníková 8 v.
U-2200: Tómas Björnsson 7,5 v.
U-2000: Lárus Knútsson 7,5 v.
U16-strákar: (grunnskólaaldur): Gauti Páll Jónsson 6 v.
U16-stúlkur: (grunnskólaaldur): Sóley Lind Pálsdóttir 4,5 v.
Útdreginn heppinn keppandi: Arnljótur Sigurðsson

Lokstöðu mótsins má finna á Chess-Results.

Nánari frétt um mótið væntanleg á morgun eða á mánudag ásamt myndum frá myndismið bankans. 20 myndir fylgja með Einar S. Einarsson tók.

Meðfylgjandi eru þær skákir sem tefldar voru á fyrsta borði.

Myndaalbúm (ESE)

Spil og leikir | Breytt 15.12.2013 kl. 12:33 | Slóð | Facebook | Athugasemdir (0)

14.12.2013 | 11:46

Friðriksmótið hefst kl. 13 í dag

Friðriksmót Landsbankans Íslandsmótið í hraðskák hefst kl. 13 í dag. Um 100 keppendur taka þátt og þar á meðal fimm stórmeistarar en því miður forfallast Friðrik Ólafsson, sem hafði skráð sig til leiks, vegna veikinda.

Um 100 keppendur sem skráðir eru til leiks á Friðriksmóti Landsbankans sem fram fer á laugardag í útibúi bankans í Austurstræti. Upplýsingar um þegar skráða keppendur má finna hér og á Chess-Results.

Þetta er tíunda árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga. Margir af sterkustu stórmeisturum landsins hafa undanfarin ár teflt til heiðurs Friðriki.

Eftirtaldir stórmeistarar eru skráðir til leiks: Helgi Ólafsson (2546), Hjörvar Steinn Grétarsson (2511), Jón L. Árnason (2499), Stefán Kristjánsson (2491) og Þröstur Þórhallsson (2445). Auk þess tekur Lenka Ptáncníková (2245) stórmeistari kvenna þátt.

Alþjóðlegu meistararnir eru Bragi Þorfinnsson (2454) og Jón Gunnarsson (2412) eru meðal keppenda nú en þeir sigruðu á mótinu í fyrra ásamt Hjörvari Steini. Bragi hlaut Íslandsmeistaratitilinn eftir stigaútreikning.

Verðlaun fyrir efstu sæti eru eftirfarandi

100.000 kr.
60.000 kr.
50.000 kr.
30.000 kr.
20.000 kr.

Aðalverðlaun skiptast séu menn jafnir að vinningum.

Aukaverðlaun

Efsta konan: 10.000 kr.
Efsti maður með 2200 eða og minna: 10.000 kr.
Efsti maður með 2000 stig og minna: 10.000 kr.
Efsti strákur 16 ára og yngri (fæddur 1997 eða síðar): 10.000 kr.
Efsta stúlka 16 ára og yngri (fædd 1997 eða síðar): 10.000 kr.
Útdreginn heppinn keppandi: 10.000 kr.

Aukaverðlaun eru miðað við nýjustu útgefin íslensk skákstig. Reiknuð eru stig séu menn jafnir og efstir. Aðeins er hægt að fá ein aukaverðlaun og verða þau valin í ofangreindri röð.

Fyrri sigurvegarar

2012 - Bragi Þorfinnsson, Hjörvar Steinn Grétarsson og Jón Viktor Gunnarsson
2011 - Henrik Danielsen
2010 - Jón Viktor Gunnarsson og Þröstur Þórhallsson
2009 - Héðinn Steingrímsson
2008 - Helgi Ólafsson
2007 - Héðinn Steingrímsson
2006 - Helgi Áss Grétarsson
2005 - Jón Viktor Gunnarsson og Arnar E. Gunnarsson
2004 - Jóhann Hjartarson og Stefán Kristjánsson

Chess-Results

Spil og leikir | Breytt s.d. kl. 12:11 | Slóð | Facebook | Athugasemdir (0)

13.12.2013 | 17:31

Hilmir Freyr vann Jólamót Skákskólans/Skákakademíu Kópavogs þriðja árið í röð

Hilmir Freyr Heimisson vann öruggan sigur á Jólamóti Skákskóla Íslands og Skákakademíu Kópavogs sem fram fór í Stúkunni á Kópavogsvelli sl. fimmtudag. Alls tóku 32 ungir skákmenn úr Kópavogi þátt í mótinu, þar af allir bestu ungu skákmenn Kópavogs m.a. liðsmenn Norðurlandameistara Álfhólsskóla, Vignir Vatnar Stefánsson Norðurlandameistari í sínum aldursflokki í Bifröst í ársbyrjun en Íslendingar unnu þá keppni samanlagt og þeir Hilmir Freyr og Dawid Kolka voru báðir í sigursveit Íslands þá titilinn ásamt Vigni.

Keppnin i Stúkunni fór þannig fram að tefldar voru 9 umferðir eftir svissneska kerfinu allt í einum flokki en veitt voru verðlaun fyrir keppendur með 1400 elo stig og þar yfir og einnig þrenn verðlaun sem voru með minna en 1400 elo stig. Þá voru veitt sérstök stúlknaverðlaun. Tímamörk voru 5+3 (Bronstein). Keppnin um efsta sætið snerist strax upp í baráttu milli Hilmis og Vignis Vatnars sem höfðu unnið allar skákir sínar þegar þeir mættust í 5. umferð. Hilmir vann þá skák eftir mikla baráttu og náði þá forskoti sem dugði til sigurs. Hann gerði jafntefli í tveim síðustu skákum sínum.

Í mótslok afhenti Ármann Kr. Ólafsson bæjarstjóri í Kópavogi verðlaun. Við þá athöfn tók Helgi Ólafsson skólastjóri Skákskóla Íslands til máls, en hann var var mótsstjóri ásamt Gunnari Björnssyni forseta SÍ og Lenku Ptacnikovu stórmeistara kvenna. Helga kvað bæjarstjóranum væri ljóst að velgengni samfélaga, t.d. bæjarfélaga, stæði oft í beinu sambandi við styrk þeirra á skáksviðinu og samkvæmt því hlyti Kópavogur með alla sína ungu og glæsilegu skákmenn að standa vel um þessar mundir.

Í mótslok var öllum þátttakendum boðið uppá pizzur og gosdrykki.

Verðlaunahafar voru þessir:

1400 íslensk elo-stig og meira:

1. Hilmir Freyr Heimisson 8 v. (af 9)

2. Vignir Vatnar Stefánsson 7 ½ v.

3. Björn Hólm Birkisson 6 ½ v.

Í næst sætum komu:

4. - 6. Felix Steinþórsson, Dawid Kolka og Bárður Örn Birkisson allir með 6 vinninga.

Undir 1400 elo stigum:

1. Guðmundur Agnar Bragason 5 ½ v. ( 47,5)

2. Róvert Örn Vigfússon 5 ½ v. ( 46, 35,0 )

3. Aron Ingi Woodard 5 ½ v. ( 46, 34,5 )

Stúlknaverðlaun:

1. Móey María Sigþórsdóttir

Þá dró bæjarstjórinn að lokum út tvo þátttakendur sem fá ókeypis dvöl í fyrirhuguðu skákbúðum Fjölnis, Skákskóla Íslands og Skákakademíu Reykjavíkur sem fram eiga að fara um mánaðarmótin janúar/febrúar 2014. Ármann dró nöfn þeirra Kjartans Gauta Gíslasonar og Stephan Briem.

Úrslit mótsins má finna á Chess-Results.

Myndaalbúm (GB)

Spil og leikir | Breytt 16.12.2013 kl. 10:47 | Slóð | Facebook | Athugasemdir (0)

13.12.2013 | 15:27