London: Guðmundur með jafntefli í dag

Guðmundur Gíslason (2318) gerði jafntefli við bandaríska alþjóðlega meistarann Justin Sarkar (2425) í sjöttu umferð FIDE Open, sem er hluti af London Chess Classic hátíðinni. Oliver Aron Jóhannesson tapaði hins vegar fyrir Englendingnum Peter Taylor (2222). Guðmundur hefur4 vinninga en Oliver hefur 3 vinninga. Sjö skákmenn eru efstir og jafnir með 5 vinninga.

Í aðalmótinu eru fjórar umferðir af sex í undanrásum lokið. Þar kemur ekkert á óvart, þ.e. stigahæstu keppendurnir raða sér í efstu tvö sætin í öllum flokkum. Undanrásunum lýkur á morgun og svo tefla átta keppendur áfram með útsláttarfyrirkomulagi. Hægt er að skoða mótstöflu hér. Taflmennska hefst kl. 14 á morgun og þaðan er að finna afar góðar beinar útsendingar.

90 skákmenn taka þátt í FIDE Open. Þar af eru 23 stórmeistarar. Guðmundur er nr. 56 í stigaröð keppenda en Oliver nr. 112.

 

• Heimasíða mótsins
• Beinar útsendingar - (hefjast ýmist 14:30 eða 16:30)

100 keppendur - 6 stórmeistarar - þar á meðal Friðrik - taka þátt í Friðriksmóti Landsbankans

Sex stórmeistarar - þar á meðal Friðrik Ólafsson eru meðal ríflega 100 keppenda sem skráðir eru til leiks á Friðriksmóti Landsbankans sem fram fer á laugardag í útibúi bankans í Austurstræti. Mótið er nú fullt en hægt er að skrá sig á biðlista hér. Upplýsingar um þegar skráða keppendur má finna hér og á Chess-Results.

Þetta er tíunda árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga. Margir af sterkustu stórmeisturum landsins hafa undanfarin ár teflt til heiðurs Friðriki.

Eftirtaldir stórmeistarar eru skráðir til leiks: Friðrik Ólafsson (2406), Helgi Ólafsson (2546), Hjörvar Steinn Grétarsson (2511), Jón L. Árnason (2499), Stefán Kristjánsson (2491) og Þröstur Þórhallsson (2445). Auk þess tekur Lenka Ptáncníková (2245) stórmeistari kvenna þátt.

Alþjóðlegu meistararnir eru Bragi Þorfinnsson (2454) og Jón Gunnarsson (2412) eru meðal keppenda nú en þeir sigruðu á mótinu í fyrra ásamt Hjörvari Steini. Bragi hlaut Íslandsmeistaratitilinn eftir stigaútreikning.

Verðlaun fyrir efstu sæti eru eftirfarandi

1. 100.000 kr.
2.   60.000 kr.
3.   50.000 kr.
4.   30.000 kr.
5.   20.000 kr.

Aðalverðlaun skiptast séu menn jafnir að vinningum.  

Aukaverðlaun

• Efsta konan: 10.000 kr.
• Efsti maður með 2200 eða og minna: 10.000 kr.
• Efsti maður með 2000 stig og minna: 10.000 kr.
• Efsti strákur 16 ára og yngri (fæddur 1997 eða síðar): 10.000 kr.
• Efsta stúlka 16 ára og yngri (fædd 1997 eða síðar): 10.000 kr.
• Útdreginn heppinn keppandi: 10.000 kr.

Aukaverðlaun eru miðað við nýjustu útgefin íslensk skákstig. Reiknuð eru stig séu menn jafnir og efstir. Aðeins er hægt að fá ein aukaverðlaun og verða þau valin í ofangreindri röð.

Fyrri sigurvegarar

• 2012 - Bragi Þorfinnsson, Hjörvar Steinn Grétarsson og Jón Viktor Gunnarsson
• 2011 - Henrik Danielsen
• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson

Chess-Results

Vignir Vatnar og Óskar Víkingur sigurvegar Jólamóts Víkingaklúbbsins

Jólamót Víkingaklúbbsins sem lauk í miðvikudaginn 11. desember var stærsta mót í sögu Víkingaklúbbsins. 53 krakkar hófu keppni í tveim flokkum. Krakkar fæddir 2005 og yngri kepptu í einum flokki, en í eldri flokki voru krakkar fæddir 2004 og eldri. Tefldar voru 5. umferðir með 7. mínútna umhugsunartíma. 

Sigurvegari yngri flokks var hinn bráðefnilegi Óskar Víkingur Davíðsson en hann vann allar skákir sínar. Annar varð Baltasar Gunnarsson með 4. vinninga, en jafn honum en lægri á stigum varð Jón Hreiðar Rúnarsson, sem jafnframt varð efstur félagsmanna Víkingaklúbbsins.  Í næstu sætum komu nokkrir bráðefnilegir krakkar með sömu vinninga en lægri á stigum.  Karitas Jónsdóttir varð efst stúlkna í yngri flokki.

Í eldri flokki sigraði undrabarnið Vignir Vatnar Stefánsson eftir hörku bráðabanaskák við Guðmund Bragason. Vignir Vatnar og Guðmundur voru jafnir með 5. vinninga í mótslok og tefldu svokallaða bráðabanaskák (Harmagedón).  Í miklu tímahraki þar sem Vignir átti 30 sekúndu eftir, en Guðmundur eina mínútu, þá varð Guðmundi það á að leika ólöglegum leik og skákin dæmist því töpuð.   Mikael Kravchuk náði 3. sætinu, en hann er mikið efni.  Jón William Snider varð efstur félagsmanna eldri flokki og efst stúlkna varð Fanney Lind Jónsdóttir.

Stefán Bergsson skákstjóri stjórnaði mótinu af miklu öryggi og vann mikið þrekvirki. Lenka Placnikova mætti með marga nemendur sína á svæðið og hjálpaði mikið til, sem og Siguringi Sigurjónsson.  Sigurður Ingason var einnig mættur til að hjálpa til.  Foreldrar krakkana tóku ríkan þátt og hjálpuðu til við mótahaldið.  

Knattspyrnufélagið Víkingur veitti öllum krökkunum viðurkenningu og krakkarnir fengu einnig kennsluhefti frá Siguringa skákkennara.  Barnaæfingar Víkingaklúbbsins eru nú komnar í jólafrí, en hefjast aftur 15. janúar og verða vikulega fram á vor.  M.a er stefnt að tveim stórum mótum, páskamóti og vormóti.

Eldri flokkur úrslit:

* 1 Vignir Vatnar Stefánsson 5.o
* 2 Guðmundur Bragason  5.0
* 3 Mikael Kravchuk 4.0
* 4 'Jóhann Vilhjálmsson 4.0
* 5 Tómas Eiríksson 2.5
* 6 Matthías Ævar Magnússon 3.0
* 7 Daníel Ernir Njarðarson 3.0
* 8 Arnór Tjörvi 3.0
* 9.Ásvaldur Sigþórsson 3.0
* 10 Brynjar Haraldsson   3.0
* 11 Aron Þór 3.0
* 12 Fanney Lind Jónsdóttir 2.0

aðrir minna, en alls tóku 21. keppandi þátt í eldri flokki

Yngri flokkur úrslit:

* 1 Óskar Víkingur Davíðsson 5.0
* 2 Baltasar Gunnarsson 4.0
* 3 Jón Hreiðar Rúnarsson 4.0
* 4 Sólon  Siguringason 4.0
* 5 Adam Ómarsson 4.0
* 6 Stefán Orri Davíðsson 4.0
* 7 Birgir Logi 4.0
* 8 Robert Luu 3.5
* 9 Ingibert Erlingsson 3.5
* 10 Alexander Már 3.5
* 11 Óttar  B. Sigfússon 3.5
* 12 Daníel Sveinsson 3.5

Aðrir minna, en alls tóku 32. keppendur þátt í yngri flokki.  Smá villa í tölvukerfi orsakaði það að úrslitin í yngri flokki eru enn ekki nógu nákvæm. 

Frétt Víkingaklúbbsins (fullt af myndum)

Halldór, Gylfi og Magnús Pálmi sigurvegarar öðlingamóts - Halldór öðlingameistari

Halldór Pálsson (2051), Gylfi Þór Þórhallsson (2154) og Magnús Pálmi Örnólfsson (2169) urðu þrír efstir og jafnir á Vetrarmóti öðlinga sem lauk í gær. Þeir hlutu allir 5½ vinning í 7 skákum. Halldór og Gylfi gerðu jafntefli í lokaumferðinni en Magnús vann Harald Baldursson (1980). Halldór telst hins vegar vetrarmeistari öðlinga eftir stigaútreikning.

Skákstjóri mótsins var Ólafur S. Ásgrímsson sem hefur haldið utan um öðlingaskák af miklum myndarskap í mörg herrans ár.

Mótstöflu má nálgast á Chess-Results.

• Heimasíða TR
• Chess-Results 
• Myndaalbúm (GB)

Róbert Lagerman er Skákjólasveinninn 2013!

Vinaskákfélagið hringdi jólabjöllunum hressilega á mánudaginn. Tilefnið var árlegt jólaskákmót Vinaskákfélagsins. Fjórtán skákjólasveinar og ein jólastelpa tóku þátt í mótinu í ár. Ákaflega notaleg jólastemmning er ávallt í Vinjarhúsinu í kringum jólin. Og ekki er síðri ilmurinn frá jólaeldhúsinu, en í hálfleik skákmótsins reiddi yfirkokkurinn Ingi Hans, fram ekta jólavöfflur með alvörurjóma.

Róbert Lagerman forseti Vinaskákfélagsins gaf engar jólagjafir í sjálfu skákmótinu, og kom í mark með fullt hús vinninga, annað sætið tók Ingi Tandri Traustason, og Stefán Bergsson hafnaði í þriðja sæti. Arnaldur Sigurðsson var jafn þeim Inga Tandra og Stefáni, en næstir komu Magnús Magnússon og Hrafn Jökulsson.

Vinningarnir voru ákaflega ljúffengir og glæsilegir, m.a. málsverður fyrir tvo á Argentínu steikhús, borð fyrir tvo á Lækjarbrekku og jólakonfekt frá Nóa Sírius.

Hið öfluga skákstarf Vinaskákfélagsins er í miklum blóma. Stórmót eru haldin reglulega einu sinni í mánuði, skákæfingar vikulega, og teflt er alla daga í Vin. Einnig eru óvæntar og skemmtilegar uppákomur ávallt á dagskrá.

Allir skákunnendur eru hjartanlega velkomnir, enda eru einkunarorð Vinaskákfélagsins: Við erum ein fjölskylda.

Myndaalbúm 

London: Guðmundur vann í fimmtu umferð

Guðmundur Gíslason (2318) vann enska skákmanninn Roger Williamson (2150) í fimmtu umferð FIDE Open, sem fram fór í gærkveldi, og er hluti af London Chess Classic hátíðinni. Oliver Aron Jóhannesson (2078) tapaði hins vegar fyrir enska stórmeistaranum Keith Arkell (2438). Guðmundur hefur 3½ vinning en Oliver hefur 3 vinninga.

Stórmeistararnir Jon Ludvig Hammer (2612), Noregi, og Sabino Brunello (2603), Ítalíu, eru efstir með 4½ vinning.

Sjötta umferð fer fram í dag. Þá teflir Guðmundur við bandaríska alþjóðlega meistarann Justin Sarkar (2425) en Oliver við Englendinginn Peter Taylor (2222).

Aðalmótið, sem er að þessu sinni atskákmót og kallast "Super Sixteen" hófst í gær. Þar er 16 skákmönnum skipt í fjóra riðla og tefla tvöfalda umferð. Tveir efstu komast áfram úr hverjum riðli. Tvær umferðir voru tefldar í gær Þar byrjuðu stigahæstu menn almennt vel að Peter Svidler (2789) undanskyldum sem hefur aðeins 1 stig.  Hægt er að skoða mótstöflu hér. Taflmennska hefst kl. 14 í dag og þaðan er að finna afar góðar beinar útsendingar.

90 skákmenn taka þátt í FIDE Open. Þar af eru 23 stórmeistarar. Guðmundur er nr. 56 í stigaröð keppenda en Oliver nr. 112.

 

• Heimasíða mótsins
• Beinar útsendingar - (hefjast ýmist 14:30 eða 16:30)

Hraðskákmót Garðabæjar fer fram í kvöld

Hraðskákmót Garðabæjar verður haldið frá kl. 19:30 næstkomandi fimmtudag 12. desember í Betrunarhúsinu, Garðatorgi 1. 2. hæð.
 
Skráning í hraðskákmótið er á þessum hlekk. 

Hægt er að sjá hverjir eru skráðir með því að smella hér.
 
Umhugsunartími er 5 mínútur á mann og er teflt í einum flokki. Reikna má með að mótið verði búið um kl. 22.
 
1. verðlaun í Hraðskákmóti Garðabæjar eru 15.000 kr. auk verðlaunagrips. Medalíur fyrir 2 og 3 sæti. Efsti TG ingur hlýtur 5000 kr. Verðlaunafé skiptist milli manna ef fleiri en einn hljóta jafn marga vinninga.
 
Frítt er í hraðskákmótið fyrir þátttakendur skákþingsins og félagsmenn TG en aðrir gestir borga 1000 kr.
 
Hraðskákmeistari 2012 var Pálmi Ragnar Pétursson GM Helli sem vann mótið í fyrra með fullu húsi.
 
Eftir hraðskákmótið er verðlaunahending fyrir bæði mótin.

Verðlaunahafar Skákþings Garðabæjar 2013 eru:
 
Jón Árni Halldórsson
Loftur Baldvinsson
Gauti Páll Jónsson
Bjarnsteinn Þórsson
 
Brynjar Bjarkason
Þorsteinn Magnússon
Mikael Kravchuk
Bjarki Arnaldarson
 

Jólahraðskákmót Skákskólans og Skákakademíu Kópavogs í Stúkunni í dag

Jólahraðskákmót Skákskóla Íslands verður haldið í Stúkunni á fimmtudaginn og hefst stundvíslega kl. 14.30. Þátttökurétt hafa allir krakkar í  grunnskólum Kópavogs. Tefldar verða níu umferðir eftir svissneska kerfinu  allt í einum flokki. Verðlaun verða tvískipt, þrenn verðlaun fyrir þá sem eru stigalausir eða undir 1400 elo stigum og einnig verða veitt verðlaun fyrir þá sem eru með 1400 elo stig og meira.

Meðal verðlauna eru bikarar, verðlaunapeningar og þátttaka í fyrirhuguðu tveggja daga skák-námskeið í Vatnaskógi síðustu helgina í janúar á ári. Í mótslok verður boðið uppá pizzur og gosdrykki. 

Dagur með 3 vinninga eftir 5 umferðir

Alþjóðlegi meistarinn Dagur Arngrímsson (2378) hefur 3 vinninga að loknum fimm umferðum á First Saturday-móti sem nú er í gangi í Búdapest.

Dagur gerði jafntefli í 4. og 5. umferð. Í fjórðu umferð við ungverska alþjóðlega meistarann Florian Hujbert (2454) og í fimmtu umferð við indónesíska FIDE-meistarann Cuhendi Sean Winshand (2344).

Dagur hefur 3 vinninga og er í 2.-4. sæti.

Tíu skákmenn tefla í efsta flokki og eru meðalstigin 2402. Dagur er nr. 6 í stigaröð keppenda.

• Heimasíða First Saturday
• Chess-Results

Jólapakkamót GM Hellis fer fram 21. desember

Jólapakkaskákmót GM Hellis verður haldið laugardaginn 21. desember nk. í Ráðhúsi Reykjavíkur. Mótið hefst kl. 13 og er ókeypis á mótið. Mótið er fyrir börn og unglinga og fer nú fram í 16. skipti en það var fyrst haldið fyrir jólin 1996. Síðan hefur það verið haldið nánast á hverju ári og hefur alltaf verið eitt fjölmennasta skákmót ársins.
 
Keppt verður í allt að 5 flokkum: Flokki fæddra 1998-2000, flokki fæddra 2001-2002, flokki fæddra 2003-2004 og flokki fæddra 2005 og síðar og peðaskák fyrir þau yngstu. Tefldar verða 5 umferðir með 10 mínútna umhugsunartíma á mann. Jólapakkar eru í verðlaun fyrir 3 efstu sætin í hverjum aldursflokki fyrir sig fyrir bæði drengi og stúlkur. Auk þess verður happdrætti um 3 jólapakka í hverjum aldursflokki fyrir sig.  Skráning á mótið fer fram hér á heimasíðu GM Hellis og hér á Skák.is.