Vignir Vatnar, Gunnar Erik og Sara Sólveig unnu Rótarý-bikarana á Sumarskákmóti Fjölnis

Sumarskákmót Fjölnis var haldið með glæsibrag og 44 flottum þátttakendum á öllum grunnskólaaldri. Helmingur skákkrakkanna voru æfingafélagar í Fjölni en margir af sterkustu skákkrökkum landsins á grunnskólaaldri mættu í Grafarvoginn til að vera með á skemmtilegu skákmóti og til að næla sér í glæsileg verðlaun. Mótið gekk afar vel fyrir sig undir stjórn þeirra félaga Helga formanns skákdeildar Fjölnis og Kristjáns Arnar skákfrömuðar. Tefldar voru sex umferðir og mótið var því jafnt og spennandi allan tímann. Rótarýklúbbur Grafarvogs er að vanda góður stuðningsaðili Sumarskákmótsins og það var formaður klúbbsins, Theodór Blöndal, sem afhenti verðlaunagripina og ávarpaði þátttakendur með skemmtilegri tölu. 

Vignir Vatnar Stefánsson er einn af þeim sem nær alltaf mætir á skákmót Fjölnis, eða allt frá því að hann sex ára gamall tók þátt í sínu fyrsta skákmóti, Torgmóti Fjölnis, og vakti þá gífurlega athygli fyrir góða taflmennsku og ungan aldur. Eftir mótið varð ekki aftur snúið hjá Vignir Vatnari og hann er okkar efnilegasti íslenski skákmaður í dag. Vignir Vatnar mætti galvaskur til leiks og kom efstur í mark með 5,5 vinninga af 6 mögulegum. Næstir á eftir honum með 5 vinninga komu bekkjarbræður Vignis þeir Arnar Heiðarsson og Sverrir Hákonarson Hörðuvallaskóla og Árni Ólafsson Hlíðaskóla. Sigurvegari yngri flokks varð Gunnar Erik Guðmundsson 5. bekk Salaskóla með 4,5 vinninga, jafn Daníel Tal 4. bekk Rimaskóla en hærri á stigum. Arnar Gauti bekkjarfélagi Daníels í Rimaskóla varð þriðji.
Sigurvegari í stúlknaflokki reyndist Sara Sólveig Lis 5. bekk Rimaskóla, Elín Lára Jónsdóttir Salaskóla í 2. sæti og Karen Ólöf Gísladóttir í 3. sæti.

Á verðlaunahátíð í lok mótsins voru afhent 20 áhugaverð verðlaun, pítsur, bíómiðar og fottustu húfurnar frá 66°N auk þess sem bíómiðar voru dregnir út í happadrætti. Fjöldi foreldra og annarra aðstandenda fylgdust með mótinu sem var lokahnykkur á vetrarstarfi Skákdeildar Fjölnis 2017 - 2018.

Lokastaðan á Chess-Results. 

Carlsen sigurvegari í Shamkir - Shankland og Wang efst fyrir lokaumferðina í St. Louis

Magnus Carlsen (2843) stýrði skákinni gegn Ding Liren (2778) í jafnteflishöfn fljótt og vel í gær á minningarmótinu um Gashmimov. Þar með tryggði hann sér sigur á mótinu. Hann hlaut 6 vinninga í 9 skákum. Ding varð annar með 5,5 vinninga og Karjakin (2778) þriðji með 5 vinninga.

Frá lokaathöfninni

Lokastaðan

Sjá nánari umfjöllun á Chess.com. 

• Heimasíða mótsins
• Beinar útsendingar 

Sam Shankland (2671) heldur áfram frábærri frammistöðu á bandaríska meistaramótinu í St. Louis. Í gær lagði hann Alexander Onichuk (2672) að velli. Caruana (2804) fylgir honum eins og skugginn því hann vann Zherebhukh (2640). Aðeins munar á þeim hálfum vinningi. 

Lokaumferðin fer fram í kvöld. Þá teflir Shankland við Awonder Liang (2552) en Caruana við Onichuk (2672). Verði þeir jafnir verður tefldur bráðabani. 

Spennan er ekki minni í kvennaflokki. Þar er hin 15 ára, Annie Wange (2321) með hálfs vinnings forskot á Nazi Paikidze (2352). Wang mætir Sabinu Foisor (2306) en Piaikidze mætir Goletiani (2306). Tefld verður til þrautar á morgun verði þær jafnar.  

Lokaumferðin í dag hefst klukkutíma fyrr en vanalega eða kl. 17.

Sjá nánari umfjöllun á Chess.com.  

Sjá nánar á Chess.com.

• Heimasíða mótsins
• Beinar útsendingar (hefjast kl. 18) 

NM stúlkna: Gekk á ýmsu í þriðju umferð!

Það gekk á ýmsu hjá íslensku keppendum í 3. umferð NM stúlkna sem er nýlokið. Alls komu fimm vinningar í hús af níu mögulegum. Veronika Steinunn Magnúsdóttir og Nansý Davíðsdóttir unnu báðar sínar skákir og tefla báðar á fyrsta borði í fyrramálið í sínum flokkum. Ylfa Ýr Welding Hákonardóttir, Anna Katarina Thoroddsen og Iðunn Helgadóttir unnu í c-flokki. Stúlkurnar eru hvergi efstar en góð úrslit í fyrri skák morgundagsins gætti opnað á ýmsa möguleika fyrir lokaumferðina í öllum flokkum.

A-flokkur

Verónika Steinunn Magnúsdóttir vann sænsku stúlkuna Brandy Paltzer. Verónika er í 3.-4. sæti með 1,5 vinning. Norsku Kyrkbjo-tvíburarnir eru efstar með 2,5 vinning og teflir Veró við Marte í fyrramálið.

B-flokkur

Nansý Davíðsdóttir vann öruggan sigur á hinni sænsku Margaritu Aaritovskaja. Nansý er í 2.-4. sæti með 2 vinninga og tefli við Nielnke Van Den Brink í fyrramálið en sú er efst með fullt hús.

C-flokkur

 

Staða íslensku keppendanna jafnaðist nokkuð í flokknum. Freyja Birkisdóttir og Batel Gotiom Haile sem báðar voru efstar með fullt hús töpuðu. Á sama tíma unnu Ylfa Ýr Welding Hákonardóttir og Anna Katarina Thoroddsen sínar skákir. Þær eru allar í 3.-8. sæti með 2 vinninga. Þær tefla innbyrðis á morgun. Batel og Ylfa annars vegar og Freyja og Anna hins vegar. Iðunn Helgadóttir vann sína skák og hefur 1 vinning. 

 

Fjórða umferð hefst kl. 10 í fyrramálið. Allar skákar sýndar beint!  

• Heimasíða mótsins
• Chess-Results
• Beinar útsendingar (kl. 10 og 16)

 

Freyja og Batel á toppnum í NM stúlkna

Freyja Birkisdóttir og Batel Goitom Haile byrja best íslensku stúlknanna á Norðurlandamóti stúlkna sem fram fer um helgina á Hótel Borgarnesi. Þær eru í 1.-3. sæti í c-flokki (u13) með fullt hús eftir 2 umferðir. Batel vann stigahæsta keppenda flokksins Ameliu Nordquelle í vel tefldri skák. Freyja vann hins vegar seiglusigur á Ylfu Ýr Welding Hákonardóttir. Veronika Steinunn Magnúsdóttir gerði jafntefli í sinni skák í a-flokki en Nansý Davíðsdóttir tapaði í hörkuská í b-flokki.

A-flokkur (u20)

Veronika Steinunn Magnúsdóttir gerði jafntefli við hina finnsku Mikaaleu Ebeling. Verónika hefur hálfan vinning.

B-flokkur (u16)

Nansý Davíðsdóttir tapaði fyrir hinni finnsku Sarabellu Norlamo í hörkuskák sem var lengsta skák umferðinnar. Nansý hefur 1 vinning.

C-flokkur (u13)

"Reynsluboltarnir" Freyja Birkisdóttir og Batel Goitom Haile hafa byrjað afar vel og hafa báðar fullt hús. Þrátt fyrir ungan aldur hafa þær báðar margoft teflt á slíkum mótum. 

Hinar íslensku stúlkurnar fimm töpuðu allar í dag - flestar í spennandi skákum. 

Ylfa Ýr og Anna Katarina Thoroddsen hafa 1 vinning en Guðrún Fanney Briem, Soffía Arndís Berndsen og Iðunn Helgadóttir eru ekki komnir á blað.

Þriðja umferð hefst núna kl. 16. Allar skákir mótsins eru sýndar beint.  

• Heimasíða mótsins
• Chess-Results
• Beinar útsendingar (kl. 10 og 16)

 

Helgi Áss sigraði á fjórða móti Hraðskákmótaraðar TR

Það var fámennt en góðmennt á fjórða og síðasta móti Hraðskákmótaraðar TR sem fram fór föstudagskvöldið 28. apríl síðastliðinn. Eftir snarpa taflmennsku stóð stórmeistarinn Helgi Áss Grétarsson uppi sem sigurvegari með sex vinninga af sjö, en hann þurfti að sætta sig við tap gegn Fide-meistaranum knáa Vigni Vatnari Stefánssyni. Vignir átti reyndar möguleika á að vinna mótið fyrir síðustu umferð en þá tapaði hann fyrir Daða Ómarssyni. Þess má geta að Vignir Vatnar sigraði á fyrsta mótinu og Daði vann mót númer tvö með gríðarmiklum yfirburðum. Jon Olav Fivelstad stýrði mótinu af kostgæfni og tefldi líka.

Mótstöfluna má sjá hér:

 

NM stúlkna: Önnur umferð nýhafin - allar skákirnar sýndar beint!

Önnur umferð Norðurlandamóts stúlkna í skólaskák er nýhafin. Vert er að vekja athygli á því að allir skákir mótsins eru sýndar beint!

Prýðilega gekk í gærkveldi og komu 5 vinningar af 9 mögulegum í hús. Síðari umferð dagsins hefst kl. 16.

Alls taka 33 stúlkur þátt í mótinu og þar af níu íslenskar. 

Beinar útsendingar má nálgast hér. 

 

• Heimasíða mótsins
• Chess-Results
• Beinar útsendingar (kl. 10 og 16)

 

Carlsen og Ding Liren tefla úrslitaskák í Shamkir - Shankland og Wang efst í St. Louis

Fjórum skákum af fimm lauk með hreinum úrslitum í áttundu og næstsíðustu umferð minningarmótsins um Gashimov í Shamkir í Aserbaísjan. Staðan hefur nú skýrst og aðeins tveir keppendur geta unnið mótið. Magnús Carlsen (2843), sem vann Anish Giri (2777) og Ding Liren (2778), sem lagði Rauf Mamedov 2704) að velli. Heimsmeistarinn hefur 5½ vinning en Ding hefur 5 vinninga. Þeir mætast í hreinni úrslitaskák í dag. Magnúsi dugar jafntefli til að tryggja sér sigur á mótinu en Kínverjinn þarf sigur með svörtu.

Lokaumferðin hefst fyrr en venjulega eða kl. 10

Sjá nánari umfjöllun á Chess.com. 

• Heimasíða mótsins
• Beinar útsendingar 

Öllum skákum bandaríska meistaramótsins í gær í níundu umferð lauk með jafntefli nema að Sam Shankland (2671) vann Yaroslov Zherebukh (2640). Þegar tveimur umferðum er ólokið er Shankland afar óvænt efstur með 6½ vinning. Eitthvað sem enginn átti von á fyrir mót. Áskorandinn, Caruana (2804), er annar með 6 vinning og Wesley So (2786) þriðji með 5½ vinning.

Hin, 15 ára, Annie Wang (2321) styrkti verulega stöðu sína í gær með jafntefli við Nazi Paikiddze (2352) í gær. Wang hefur 7½ vinning en Paikidze er önnur með 6½ vinning. Aðrar hafa ekki möguleika á titlinum.

Tíunda og næstsíðasta umferð bandaríska meistaramótsins hefst kl. 18 í kvöld.

Sjá nánari umfjöllun á Chess.com. 

 

Sjá nánar á Chess.com.

• Heimasíða mótsins
• Beinar útsendingar (hefjast kl. 18) 

Sumarskákmót Fjölnis í dag

Næstkomandi laugardag, 28. apríl,  verður hið árlega Sumarskákmót Fjölnis haldið í hátíðarsal Rimaskóla og hefst kl. 11.00. Mótinu lýkur með glæsilegri verðlaunahátíð kl. 13:15. Mætið tímanlega til skráningar.

Að venju er mótið hið glæsilegasta og mikill fjöldi áhugaverðra vinninga í boði. Tíu gjafabréf frá Dominos, Fimm gjafabréf í SAM-bíóin og fimm af flottustu húfunum frá 66°N.

Rótarýklúbbur Grafarvogs er að venju styrktaraðili sumarskákmótsins og gefur klúbburinn eignarbikara til sigurvegara í eldri flokki, yngri flokki og stúlknaflokki.

Tilkynnt verður kjör Skákdeildar Fjölnis á afreksmeistara og æfingameistara deildarinnar 2017 – 2018.

Á sumarskákmótinu verða tefldar 6 umferðir með 6 mínútna umhugsunartíma. Sumarskákmót Fjölnis er eitt af síðustu grunnskólamótum vetrarins og er öllum áhugasömum grunnskólakrökkum í skák um allt land, boðin ókeypis þátttaka.

Mætið krakkar og takið með ykkur skólafélaga og vini.

Í skákhléi býðst þátttakendum að kaupa sér veitingar fyrir 250 kr, drykk og Prins póló. Heitt kaffi á könnunni fyrir foreldra.

NM stúlkna: Ágætis byrjun íslensku stúlknanna

Norðurlandamót stúlkna í skólaskák hófst í kvöld á Borgarnesi. Alls taka 33 stúlkur þátt og þar af eru 9 íslenskar. Gunnlaugur Júlíusson, bæjarstjóri Borgarbyggðar, setti mótið og lék fyrsta leikinn fyrir Batel Goitom Haile á móti Guðrúnu Fanneyju Briem, yngsta keppenda mótsins. Íslensku stelpurnar fengu 5 vinninga af 9 mögulegum. Ylfa Ýr Welding Hákonardóttir, vann mjög góðan sigur í yngsta flokknum og hróksfórn Nansýjar Davíðsdóttir þótti nokkuð flott!

A-flokkur (u20)

Verónika Steinunn Magnúsdóttir tapaði fyrir hinni norsku Marte Kyrkjebo í langlengstu skák kvöldsins

 

B-flokkur (u16)

Naný Davíðsdóttir vann mjög góðan sigur á Ingrid Skaslien. Nansý átti leik í þessari stöðu

33. Hxe6+!! Kxe6 34. Dd5# 1-0.

C-flokkur (u13)

Sjö íslenskar skákstúlkur tefla í c-flokki (u13). Ylfa Ýr Welding Hákonardóttir vann mjög góðan sigur á mun stigahærri skákkonu. Freyja Birkisdóttir fékk fyrsta vinning mótsins þegar hún vann öruggan sigur.

Í tveimur tilfellum mættust íslenskar innbyrðis og unnu þær Batel Goitom Haile og Anna Katarina Thoroddsen þær Iðunni Helgadóttur og Guðrúnu Fanneyju Briem í hörkuskákum. Soffía Arndís Berndsen tapaði sinni skák.

Teflt er við úrvalsaðstæður á Hótel Borgarnesi og er öllum skákum umferðarinnar varpað upp á skjá auk þess að vera í beinni á netinu.

Tvær umferðir fara fram á morgun. Sú fyrri hefst kl. 10 og sú síðari kl. 16.

• Heimasíða mótsins
• Chess-Results
• Beinar útsendingar (kl. 10 og 16)

 

Norðurlandamót stúlkna hefst í kvöld á Borgarnesi

Norðurlandamót stúlkna fer fram Hótel Borgarnesi helgina 27.-29. apríl. Alls taka 33 stúlkur þátt á aldrinum 10-20 ára. Níu þeirra eru íslenskar og sjö þeirra tefla í yngsta flokknum (13 ára og yngri). Mikilvæg reynsla fyrir stelpurnar sem margar hverjar eru að tefla á sínum fyrsta alþjóðlega skákviðburði! 

Fyrsta Norðurlandamót stúlkna var haldið árið 2008 og er þetta í þriðja skiptið sem mótið fer fram á Íslandi. Guðfríður Lilja Grétarsdóttir, fyrrum forseti SÍ og þingmaður, átti frumkvæðið að koma mótinu á legg á sínum tíma. 

Fulltrúar Íslands eru sem hér segir: 

A-flokkur (u20) 

 

Verónika Steinunn Magnúsdóttir 

 

B-flokkur (u16) 

 

Nansý Davíðsdóttir – sem er margfaldur norðurlandameistari stúlkna 

 

C-flokkur (u13) 

 

Freyja Birkisdóttir

Batel Goitom Haile

Iðunn Helgadóttir

Guðrún Fanney Briem

Ylfa Ýr Welding Hákonardóttir

Soffía Berndsen

Anna Katarina Thoroddsen

 

Taflmennskan hefst kl. 20 á föstudagskvöldið. Á laugar- og sunnudegi eru tefldar tvær umferðir. Sú fyrri hefst kl. 10 og sú síðari kl. 16. Verðlaunaafhending er um kl. 20 á sunnudagskvöldið. Beinar útsendingar verða frá mótinu.

Heimasíða mótsins