Carlsen efstur í Shamkir eftir sigur á Topalov - Shankland og Caruana efstir í St. Louis

Heimsmeistarinn, Magnus Carlsen (2843), náði forystunni á minningarmótinu um Gashimov í Shamkir í Aserbaísjan í gær með sigri á Veselin Topalov (2749) þegar sjöunda umferð fór fram. Ding Liren (2778) lagði David Navara (2745) að velli en öðrum skákum lauk með jafntefli. 

Magnús er efstur með 4½ vinning. Topalov, Anish Giri (2777) og Ding Liren (2778) fylgja heimsmeistaranum fast eftir en þeir hafa 4 vinninga.  

Áttunda og næstsíðasta umferð fer fram í dag. Þá mætast vinirnir Anish Giri og Magnús Carlsen. Mótinu lýkur svo á morgun. 

Sjá nánari umfjöllun á Chess.com. 

• Heimasíða mótsins
• Beinar útsendingar (hefjast kl. 11)

Spennan á bandaríska mótinu er mikil að loknum átta umferðum af 11. Sam Shankland (2671) gerði jafntefli við Hikaru Nakamura (2787) þar sem hinn síðarnefndi var lengi í köðlunum. Sömu úrslit urðu í skák Wesley So (2786) og Caruana (2804). 

Shankland og Caruana eru því sem fyrr efstir en þeir hafa 5½ vinning. Wesley So (2786) hefur 5 vinninga. KR-ingurinn Aleksandr Lenderman (2599) er farinn að blanda sér í toppbaráttuna en hann er fjórði með 4½ vinning. 

Níunda umferð fer fram í kvöld. Aðalviðureign kvöldsins er skák Caruna og Nakamura. Þeim síðarnefnda þætti ekki leiðinlegt að gera áskorandanum skráveifu. Shankland mætir Zherebukh (2640).

Hin 15 ára, Annie Wange (2321) heldur áfram ótrúlegu gengi í kvennaflokki. Í gær vann hún sjöfaldan skákmeistara Bandaríkjanna (2422) í kvennaflokki og er efst með 7 vinninga. Nazi Paikidze (2352), skákmeistari Bandaríkjanna frá 2016, fylgir Wang eftir eins og skugginn en hún hefur 6 vinninga. Þær mætast í níundu umferð í kvöld.

Sjá nánar á Chess.com.

• Heimasíða mótsins
• Beinar útsendingar (hefjast kl. 18) 

Fjórða mót Hraðskákmótaraðar TR fer fram í kvöld

Fjórða mót Hraðskákmótaraðar Taflfélags Reykjavíkur fer fram föstudagskvöldið 27. apríl í skáksal TR að Faxafeni 12. Taflið hefst stundvíslega klukkan 19:30. Mótið er opið öllum skákmönnum með yfir 2000 skákstig, eða þeim sem hafa einhverntíman á ferlinum rofið 2000 stiga múrinn. Mótsnefnd áskilur sér rétt til þess að bjóða völdum gestum undir 2000 stigum að tefla með.

Tefldar verða 11 umferðir með tímamörkunum 3+2 og verður mótið reiknað til alþjóðlegra hraðskákstiga. Frítt inn!

Dagskrá mótaraðarinnar:

• Mót 1: 26.janúar
• Mót 2: 23.febrúar
• Mót 3: 23.mars
• Mót 4: 27.apríl

Mælst er til þess að skákmenn skrái sig í gegnum skráningarformið til þess að auðvelda skipulagningu mótsins. Einnig verður hægt að skrá sig til leiks á skákstað á mótsdegi en skráningu lýkur kl.19:20.

SKRÁNINGARFORM

SKRÁÐIR KEPPENDUR

Aðalfundur SÍ fer fram 26. maí

Til aðildarfélaga Skáksambands Íslands 

Reykjavík, 26. apríl 2018 

FUNDARBOР

Stjórn Skáksambands Íslands boðar hér með til aðalfundar Skáksambandsins í samræmi við 8. gr. laga S.Í.  

Fundurinn verður haldinn laugardaginn 26. maí nk. kl. 10.00 fyrir hádegi á höfuðborgarsvæðinu. 

Dagskrá:  Venjuleg aðalfundarstörf. 

Taflfélög skulu senda félagatal til Skáksambandsins - [e-mail] - fyrir 10. maí 2018 til úrvinnslu fyrir kjörbréfanefnd. 

Bréf þetta er sent ásamt gögnum í samræmi við 9. gr. laga S.Í., en sú grein hljóðar svo:

9. grein.

Við atkvæðagreiðslu á aðalfundi á hvert félag eitt atkvæði enda geti sýnt fram á a.m.k. 10 félagsmenn með lögheimili á Íslandi og geti sýnt fram á virka skákstarfsemi.  Eitt atkvæði bætist við hjá félagi fyrir hverja sveit sem það sendir í Íslandsmót skákfélaga það árið. Við atkvæðagreiðslu um kjörbréf í upphafi fundar skal gilda sú regla, að hvert félag fari ekki með fleiri atkvæði en það hafði á aðalfundi árið áður.  Enginn fulltrúi getur farið með meira en eitt atkvæði á fundinum.  Við atkvæðagreiðslur á aðalfundi ræður einfaldur meirihluti atkvæða, nema um þau mál sem sérstaklega eru tilgreind í þessum lögum.

Einnig skal bent á 6. grein: 

Standi aðildarfélag í gjaldfallinni skuld við sambandið hefur það ekki rétt til að eiga fulltrúa á aðalfundi.  Skákdeildir í félögum geta átt aðild að sambandinu, enda hafi þá minnst 10 menn bundist slíkum samtökum.  Heimilt er tveimur eða fleiri aðildarfélögum í sama landshluta að stofna með sér svæðissamband.

Taflfélögunum gefst kostur á að birta stutta skýrslu um starfsemi sína á síðasta starfsári í árrsskýrslu Skáksambands Íslands.  Hafi félögin áhuga á þessu þarf efni að hafa borist skrifstofu S.Í. í síðasta lagi 10. maí 2018. 

Hjálagt:  Lagabreytingatillögur.

 

                                                                       Virðingarfyllst,

                                                                       SKÁKSAMBAND ÍSLANDS

Skrár tengdar þessari bloggfærslu:

• Tillaga um Íslandsmót skákfélaga

Öðlingamótið: Sigurbjörn og Þorvarður enn efstir – Berjast um titilinn

Þegar ein umferð lifir af Skákmóti öðlinga eru Fide-meistarinn Sigurbjörn J. Björnsson (2278) og Þorvarður F. Ólafsson (2176) efstir og jafnir með 5,5 vinning en báðir lögðu þeir sinn andstæðing í sjöttu og næstsíðustu umferð sem fór fram í gærkveld. Sigurbjörn tefldi af öryggi með hvítu gegn stórmeistara kvenna, Lenku Ptacnikovu (2200), vann peð og mjakaði c-peði sínu rólega fram á sjöundu reitaröð og fórnaði síðan skiptamun til að tryggja stöðu þess. Með biskup og hrók ásamt c-peðinu gegn tveimur hrókum Lenku hafði Sigurbjörn að lokum sigur eftir að hafa bætt kóngi sínum við í pressuna enda vörnin mjög erfið fyrir svartan. Þorvarður lagði Stefán Arnalds (1999) með svörtu eftir slæman fingurbrjót þess síðarnefnda í miklu tímahraki en venju samkvæmt tefldi Stefán með innan við mínútu á klukkunni stóran hluta skákarinnar. Það er enginn vafi á því að með fínpússun á tímanotkun sinni mun Stefán hækka töluvert á Elo-stigunum góðu.

Ögmundur Kristinsson (2010) er einn í þriðja sæti með 4,5 vinning en hann fékk í gær frían vinning vegna forfalla andstæðings síns. Ögmundur getur þó ekki náð forystusauðunum að vinningum þar sem hann forfallast sjálfur í lokaumferðinni. Fjórir keppendur koma næstir með 4 vinninga, en þeir eru ásamt Lenku Haraldur Baldursson (1949), Jóhann H. Ragnarsson (1985) sem vann Pál Þórsson (1693) í snarpri viðureign og Kristinn J. Sigurþórsson (1744) sem hefur átt gott mót og knésetti síðast Jóhann H. Sigurðsson (1988).

Lokaumferðin fer fram næstkomandi miðvikudagskvöld og hefst að venju kl. 19:30. Þá fær Kristinn það verkefni að halda Sigurbirni í skefjum á fyrsta borði á meðan að Þorvarður og Lenka eigast við á öðru borði. Á þriðja borði mætast síðan reynsluboltarnir, Jóhann H. Ragnarsson og Haraldur. Mótinu lýkur svo formlega með verðlaunaafhendingu að loknu Hraðskákmóti öðlinga sem verður haldið miðvikudaginn 9. maí.

Úrslit og stöðu ásamt skákum mótsins er að finna á Chess-Results.

Heimasíða TR

Topalov efstur í Shamkir - Caruana efstur ásamt Shankland í St. Louis

Taflmennskan hófst á ný í Shamkir og Saint Louis í gær eftir frídag á báðum stöðum í fyrradag. Topalov (2749) hélt forystunni í Shamkir þrátt fyrir jafntefli. Baráttan um sigurinn á bandaríska meistaramótinu virðist vera á milli: Shankland (2671), Caruana (2804) og Wesley So (2786). 

Hefjum leikinn á minningarmótinu um Gashimov í Shamkir þar sem sjötta umferð fór fram í gær. Anish Giri(2777) vann David Navara (2745) en öðrum skákum lauk með jafntefli. Topalov er efstur með  4 vinninga. Giri og Magnus Carlsen (2843) eru í 2.-3. sæti með 3,5 vinninga. Sjöunda umferð fer fram í dag og þá mætast Carlsen og Topalov. Sigur fyrir heimsmeistarann væri afar mikilvægur. 

Frídagurinn var notaður til að spila fótbolta og spiluðu Carlsen og Topalov þar í sama liði. 

Sjá nánari umfjöllun á Chess.com. 

• Heimasíða mótsins
• Beinar útsendingar (hefjast kl. 11)

Fabiano Caruana (2804) virðist vera í feiknaformi og vann í gær Akobian (2647) í sjöundu umferð með glæsilegri taflmennsku. Caruana er nú efstur ásamt Sam Shankland (2671) sem gerði jafntefli við Wesley So (2785). So er þriðji með 4,5 vinning. Næstu menn hafa 3,5 vinninga svo baráttan virðist aðeins vera á milli þessara þriggja.

Óvænt úrslit urðu í gær þegar Zviad Izoria (2599) lagði Hikaru Nakamura (2787) að velli. Izoria þessi hafði fyrr í mótinu unnið Caruana. Nakamura eru heillum horfinn og er í 8.-10. sæti með 3 vinninga. 

Umferð dagsins gæti ráðið úrslitum. Caruana mætir Wesley So og Shankland teflir við Nakamura. 

Í kvennaflokki er hin 15 ára Annie Wang (2321) efst með 6 vinninga. Nazi Paikidze (2352) er önnu rmeð 5 vinninga og Irina Krush (2422) þriðja með 4,5 vinninga.

Sjá nánar á Chess.com.

• Heimasíða mótsins
• Beinar útsendingar (hefjast kl. 18) 

Sumarskákmót Fjölnis fer fram á laugardaginn

Næstkomandi laugardag, 28. apríl,  verður hið árlega Sumarskákmót Fjölnis haldið í hátíðarsal Rimaskóla og hefst kl. 11.00. Mótinu lýkur með glæsilegri verðlaunahátíð kl. 13:15. Mætið tímanlega til skráningar.

Að venju er mótið hið glæsilegasta og mikill fjöldi áhugaverðra vinninga í boði. Tíu gjafabréf frá Dominos, Fimm gjafabréf í SAM-bíóin og fimm af flottustu húfunum frá 66°N.

Rótarýklúbbur Grafarvogs er að venju styrktaraðili sumarskákmótsins og gefur klúbburinn eignarbikara til sigurvegara í eldri flokki, yngri flokki og stúlknaflokki.

Tilkynnt verður kjör Skákdeildar Fjölnis á afreksmeistara og æfingameistara deildarinnar 2017 – 2018.

Á sumarskákmótinu verða tefldar 6 umferðir með 6 mínútna umhugsunartíma. Sumarskákmót Fjölnis er eitt af síðustu grunnskólamótum vetrarins og er öllum áhugasömum grunnskólakrökkum í skák um allt land, boðin ókeypis þátttaka.

Mætið krakkar og takið með ykkur skólafélaga og vini.

Í skákhléi býðst þátttakendum að kaupa sér veitingar fyrir 250 kr, drykk og Prins póló. Heitt kaffi á könnunni fyrir foreldra.

Arnar og Benedikt kjördæmismeistarar Reykaness

Síðastliðinn miðvikudag var haldið Meistaramót Kópavogs í skólaskák og Kjördæmamót Reykjaness. 

 

 

Í eldri hópnum (8.-10..bekk) tóku 8 keppendur þátt. Tefldar voru 7 umferðir með 7 mínútum. Barist var um að fá þáttökurétt á landsmótinu sem haldið verður í byrjun maí, en 4 efstu í yngri og eldri flokki vinna sér inn þáttökurétt á mótinu. Toppbaráttan var æsispennandi alveg til enda þar sem Arnar Milutin Heiðarsson tókst að sigra mótið með 6,5 vinning. Á eftir honum kom Birkir Ísak Jóhannsson með 6 vinninga og í þriðja sæti lenti Stephan Breim með 5 vinninga. Í því fjórða var Viktor Ingi Birgisson. 

Lokastaðan á Chess-Results

.

Í yngri flokki (1.- 7. bekk) tóku 19 keppendur þátt. Tefldar voru 9 umferðir með 7 mínútum. Benedikt Breim sigraði mótið með miklum yfirburðum en hann hlaut 8,5 vinning. Í öðru sæti var Gunnar Erik Guðmundsson með 7 vinninga, þriðja sæti Freyja Birkisdóttir með 6,5 vinning og í fjórða sæti Örn Alexandersson.

Lokastaðan á Chess-Results. 

Fjórða mót Hraðskákmótaraðar TR fer fram á föstudagskvöldið

Fjórða mót Hraðskákmótaraðar Taflfélags Reykjavíkur fer fram föstudagskvöldið 27. apríl í skáksal TR að Faxafeni 12. Taflið hefst stundvíslega klukkan 19:30. Mótið er opið öllum skákmönnum með yfir 2000 skákstig, eða þeim sem hafa einhverntíman á ferlinum rofið 2000 stiga múrinn. Mótsnefnd áskilur sér rétt til þess að bjóða völdum gestum undir 2000 stigum að tefla með.

Tefldar verða 11 umferðir með tímamörkunum 3+2 og verður mótið reiknað til alþjóðlegra hraðskákstiga. Frítt inn!

Dagskrá mótaraðarinnar:

• Mót 1: 26.janúar
• Mót 2: 23.febrúar
• Mót 3: 23.mars
• Mót 4: 27.apríl

Mælst er til þess að skákmenn skrái sig í gegnum skráningarformið til þess að auðvelda skipulagningu mótsins. Einnig verður hægt að skrá sig til leiks á skákstað á mótsdegi en skráningu lýkur kl.19:20.

SKRÁNINGARFORM

SKRÁÐIR KEPPENDUR

Icelandic Open - Íslandsmótið í skák haldið 1.-9. júní

Icelandic Open - Íslandsmótið í skák fer fram dagana 1.-9. júní nk. Teflt verður Valsheimilinu við Hlíðarenda við frábærar aðstæður í veislusal hússins. Mótið fer eftir sama fyrirkomulagi og mótið 2013 í Turninum árið sem var 100 ára afmælismót Skákþings Íslands. Þá sigraði Hannes Hlífar Stefánsson eftir að hafa lagt Björn Þorfinnsson að velli í úrslitaeinvígi. Björn krækti sér hins vegar í stórmeistaraáfanga á mótinu. Teflt verður til minningar um Hemma Gunn - en hann einmitt lést á mótið fór fram í Turninum 2013. 

Nú þegar stórmeistararnir Hannes Hlífar Stefánsson, Bragi Þorfinnsson og Þröstur Þórhallsson skráð til leiks sem og alþjóðlegu meistararnir Jón Viktor Gunnarsson, Björn Þorfinnsson og Einar Hjalti Jensson. 30 keppendur hafa skráð sig en gera má ráð fyrir að þátttökutölur liggi á milli 60 og 70. 

Mótið er opið öllum íslenskum sem og erlendum skákmönnum. Tefldar verða 10 umferðir og má finna umferðartöflu mótsins hér. Hægt er að taka tvær hálfs vinnings yfirsetur í umferðum 1-7. 

Þátttökugjöld eru 10.000 kr. Stórmeistarar og alþjóðlegir meistarar fá frítt. FIDE-meistarar og unglingar 16 ára og yngri fá 50% afslátt. 

Góð verðlaun eru á mótinu eða samtals €7.500 eða um 950.000 kr. 

Allar nánari upplýsingar má nálgast á heimasíðu mótsins sem eins og er aðeins á ensku. Hægt er að skrá sig Skák.is (guli kassinn). Skákmenn eru hvattir til að skrá sig til leiks sem fyrst. 

Topalov í ham í Shamkir - Shankland mjög óvænt efstur í St. Louis

Eftir afar rólega byrjun á minningarmótinu um Gashimov í Shamkir í Aserbaísjan hafa leikar heldur best æsts. Topalov (2749) vann sína aðra skák í röð þegar hann vann David Navara (2749) í fimmtu umferð í gær. Heimsmeistarinn Magnus Carlsen (2843) vann sinn fyrsta sigur þegar hann vann góðan sigur á Wojtaszek (2744). 

Topalov, er efstur með 3½ vinning og Carlsen er annar með 3 vinninga. Frídagur er í dag en mótinu verður framhaldið á morgun. Þá teflir Topalov við Mamedov (2704) en Magnús við Karjakin (2778). Með Topalov í Aserbaísjan er hann hinn afar umdeildi Silvio Danaliov. 

Sjá nánari umfjöllun á Chess.com. 

• Heimasíða mótsins
• Beinar útsendingar (hefjast kl. 11)

 

Óvæntir hlutir eru í gangi á bandaríska meistaramótinu í skák. Sam Shankland (2671) er þar mjög óvænt efstur eftir 6 umferðir með 4½ vinning. Shankland vann í gær Varuzhan Akobian (2647) í skrautlegri skák. Caruana (2804) lagði Ray Robson (2660) að velli en öðrum skákum lauk með jafntefli. 

Caruana er í 2.-3. sæti ásamt Wesley So (2786) með 4 vinninga. Nakamura (2787) hefur gert jafntefli í öllum sínum skákum og er aðeins í 5.-6. sæti með 3 vinninga. 

Frídagur er í dag rétt eins og Shamkir. Sjöunda umferð gæti skipt miklu um framahaldið. Þá teflir Shankland við Wesley So og Caruana við Akobian.

Afar óvæntir hlutir eru einnig í gangi í kvennaflokki. Þar er hin 15 ára, Annie Wang (2321) efst með 5 vinninga. Önnur er Nazi Paikidze (2352) með 4½ vinning. 

 

• Heimasíða mótsins
• Beinar útsendingar (hefjast kl. 18)