Æskan og Ellin - Skák er fyrir alla

 

 

Síðastliðinn laugardag fór fram í húsnæði Taflfélags Reykjavíkur hið mikla kynslóðabrúarskákmót, Æskan og Ellin, sem var nú haldið í ellefta sinn. Mótið er samstarfsverkefni Riddarans, skákklúbbs eldri borgara, Taflfélags Reykjavíkur og OLÍS sem jafnframt er stærsti bakhjarl mótsins. Að auki veita mótahaldinu góðan stuðning POINT á Íslandi, Urður bókaútgáfa Jóns Þ. Þórs og Litla Kaffistofan í forsvari Stefáns Þormars.

Varðlaunasjóður var glæsilegur; 100.000 kr peningaverðlaun, flugmiðar til Evrópu með Icelandair, eldsneytisúttektir, verðlaunabikarar- og peningar, skákbækur og veitingaúttektir.

Mótinu er ætlað að brúa kynslóðabil skákmanna en það er opið skákmönnum 15 ára og yngri sem og 60 ára og eldri en fyrirkomulagið skapar sérlega skemmtilega stemningu þar sem kátínan skín úr andlitum ungra sem roskna. Skák er svo sannarlega fyrir alla og á sér engin aldursmörk.

Að þessu sinni mættu 81 galvaskir keppendur til leiks í Skákhöllina og því var þétt setið þegar skákklukkurnar hófu slátt sinn eftir sköruleg ræðuhöld Einars S. Einarssonar og hins magnaða Guðna Ágústssonar sem sló reyndar algjörlega í gegn á sinn einstæða máta. Að þrumuræðunni lokinni lék Guðni fyrsta leiknum ásamt hinni sex ára Iðunni Helgadóttur og aldurskóngi mótsins, hinum 87 ára Sverri Gunnarssyni, í skák Braga Halldórssonar og Ottós Bjarka Arnar.

Loftið í Skákhöllinni var rafmagnað þegar keppendur hófu að úða út leikjum og berja á klukkunum og ekki var óalgeng sjón að sjá þá rosknari þurfa að hafa sig alla við gegn hinum yngri og oftar en ekki risu börnin sigri hrósandi upp frá borðum og þá var sko gaman og gleðin skein úr augum.

Það er þó þannig að oft mega hinir nýrri sín lítils gegn mikilli reynslu þeirra sem lengur hafa fetað lífsins spor og um miðbikinn einokuðu höfðingjar mótsins nánast toppbaráttuna. Það var aðeins hinn ungi og eitilharði Vignir Vatnar Stefánsson sem veitti þeim keppni og það verðuga. Kappar á borð við alþjóðlega meistarann Sævar Bjarnason, Gylfa Þór Þórhallsson, Jóhann Örn Sigurjónsson, Braga Halldórsson og Sigurð Herlufsen máttu hafa sig alla við í baráttunni við hinn unga snilling sem knésetti hvern skákmanninn á fætur öðrum.

Ekki voru blóð sviti og tár alfarið bundin við baráttu hinna sterkustu því allstaðar var hart barist um hin fjölmörgu aukaverðalun sem í boði voru. Ungir keppendur náðu eftirtektarverðum árangri og sem lítið brot má þar nefna Sóleyju Lind Pálsdóttur, Róbert Luu, Aron Þór Mai, Óskar Víking Davíðsson, Nansý Davíðsdóttur og Felix Steinþórsson. Margir aðrir og enn yngri keppendur, sumir hverjir enn að stíga sína fyrstu dansa á reitunum svarthvítu, voru skákgyðjunni til mikils sóma.

Spennan var mikil og réðust úrslit ekki fyrr en í lokaumferðinni þegar Bragi lagði Vigni Vatnar eftir mikla dramatík innan borðs sem utan en aðeins Braga og alþjóðlega meistaranum Sævari tókst að sigra ljóshærða víkinginn. Með sigrinum tryggði Bragi sér efsta sætið annað árið í röð og í þriðja sinn á fjórum árum. Bragi hlaut 7,5 vinning úr skákunum níu en að þessu sinni var lítill afgangur af sigrinum því Guðfinnur R. Kjartansson var á miklu flugi í seinni hlutanum og kom í mark jafn Braga að vinningum. Guðfinnur mátti þó gera sér að góðu gott annað sæti eftir stigaútreikning en næstir með 7 vinninga komu Sævar, Jóhann Örn og Vignir Vatnar sem jafnframt varð efstur barna tólf ára og yngri.Aðstandendur mótsins vilja koma á framfæri miklum þökkum til bakhjarla þess og ekki síst til allra þeirra frábæru keppenda sem lögðu leið sína í Faxafenið. Birna Halldórsóttir á líka heiður skilinn fyrir að standa frábæra vakt í hinu margrómaða Birnu-Kaffi. Við vonumst til að sjá ykkur öll að ári!Hér að neðan fylgir yfirlit yfir efstu keppendur í hverjum flokki en heildarúrslit má sjá hér. Þá má benda á fjöldan allan af myndum áfésbókarsíðu Taflfélags Reykjavíkur.

Heildarúrslit·        

1.-2. Bragi Halldórsson, Guðfinnur R. Kjartansson 7,5v
3.-5. Sævar Bjarnason, Jóhann Örn Sigurjónsson, Vignir Vatnar Stefánsson 7v

60 ára og eldri·        

1.-2. Bragi Halldórsson, Guðfinnur R. Kjartansson 7,5v·        
3. Sævar Bjarnason 7v

70 ára og eldri

1. Jóhann Örn Sigurjónsson 7v·       
2.-4. Sigurður Herlufsen, Þór Már Valtýsson, Ásgeir Sigurðsson 6v

80 ára og eldri

1. Björn Víkingur Þórðarson 6v·        
2.-3. Páll G. Jónsson, Magnús V. Pétursson 5v

15 ára og yngri

1.-2. Felix Steinþórsson, Sóley Lind Pálsdóttir 6v·        
3. Aron Þór Mai 5,5v

12 ára og yngri

1. Vignir Vatnar Stefánsson 7v·        
2. Nansý Davíðsdóttir 6,5v·        
3.-4. Arnar Milutin Heiðarsson, Mikael Maron Torfason 5v

9 ára og yngri

1. Óskar Víkingur Davíðsson 6v·        
2. Róbert Luu 5,5v·        
3. Freyr Grímsson 5v

Myndaalbúm (ESE)

Vetrarmót öðlinga hefst í kvöld

Vetrarmót öðlinga 40 ára og eldri hefst miðvikudaginn 29. október kl. 19.30 í félagsheimili T.R. að Faxafeni 12. Tefldar verða sjö umferðir og er umhugsunartíminn 90 mínútur á alla skákina + 30 sekúndna viðbótartími á hvern leik.Mótið, sem hefur fengið góðar viðtökur, er nú haldið í fjórða sinn en fyrirkomulag þess hentar vel þeim sem ekki hafa tök á að tefla oft í viku eða yfir heila helgi því aðeins er teflt einu sinni í viku, á miðvikudagskvöldum kl. 19.30. Dagskráin er því ekki stíf og jafnframt lýkur mótinu vel fyrir jólaösina.Þátttökurétt hafa allir öðlingar fertugir (á árinu) og eldri.

Dagskrá:

• 1. umferð miðvikudag 29. október kl. 19.30
• 2. umferð miðvikudag 5. nóvember kl. 19.30
• 3. umferð miðvikudag 12. nóvember. kl. 19.30
• 4. umferð miðvikudag 19. nóvember kl. 19.30
• 5. umferð miðvikudag 26. nóvember kl. 19.30
• 6. umferð miðvikudag 3. desember kl. 19.30
• 7. umferð miðvikudag 10. desember kl. 19.30

Keppt er um veglegan farandbikar, en auk hans eru verðlaun fyrir þrjú efstu sætin.Þátttökugjald er kr. 4.000. Innifalið er frítt kaffi allt mótið. Skráning fer fram á vef Taflfélags Reykjavíkur.

• Vetrarmót öðlinga 2013
• Vetrarmót öðlinga 2012
• Vetrarmót öðlinga 2011

Afmælismót Einars Ben: Margir sterkustu skákmenn landsins mæta til leiks

Afmælisskákmót Einars Benediktssonar verður haldið á veitingastaðnum Einari Ben, laugardaginn 1. nóvember klukkan 14. Meðal keppenda verða margir af bestu skákmönnum Íslands. Tefldar verða sjö umferðir með 7 mínútna umhugsunartíma. Að mótinu standa Skákfélagið Hrókurinn og Taflfélag Reykjavíkur.

Þjóðskáldið Einar Benediktsson fæddist 31. október 1864 og lést árið 1940. Hann var ástríðufullur skákmaður og meðal stofnenda Taflfélags Reykjavíkur um aldamótin 1900. Í ljóðinu Væringjar nota skáldið líkingamál úr skákinni með eftirminnilegum hætti:

Vort heimslíf er tafl fyrir glöggeygan gest

þar sem gæfan er ráðin ef leikurinn sést.

Einar tók þátt í fyrsta opinbera skákviðburðinum á Íslandi sem sögur fara af, þegar hann tefldi sýningarskák á þjóðhátíð í Reykjavík 1901 með lifandi taflmönnum gegn Pétri Zóphóníassyni, sem var besti skákmaður landsins í upphafi 20. aldar. Fjöldi áhorfenda fylgdist með skákinni, sem lauk með jafntefli.

Þá var Einar mjög áhugasamur um málefni Grænlands, en þar hefur Hrókurinn staðið að útbreiðslu skáklistarinnar síðan 2003. Það fer því einkar vel á því að TR og Hrókurinn minnist skáldsins í sameiningu á hinum merku tímamótum. Veitingahúsið Einar Ben, Veltusundi 1 við Ingólfstorg, gefur veglega vinninga, m.a. gjafakort og bækur með ljóðum þjóðskáldsins.

Margir meistarar þegar skráðir til leiks. Það er sérstakt ánægjuefni að Friðrik Ólafsson, fyrsti stórmeistari Íslands og fv. forseti FIDE, mun tefla á mótinu. Friðrik, sem verður 80 ára í janúar, var um árabil meðal sterkustu skákmanna heims og bar hróður Íslands víða. Hann tefldi sína fyrstu kappskák á Íslandsmóti árið 1946, þegar hann var 11 ára gamall.

Fleiri nafntogaðir meistarar heiðra minningu skáldsins með þátttöku á mótinu, m.a. stórmeistararnir Jóhann Hjartarson, Jón L. Árnason, Þröstur Þórhallsson og Hjörvar Steinn Grétarsson, og alþjóðlegu meistararnir Björn Þorfinnsson og Jón Viktor Gunnarsson. Alls verða keppendur 40 og í þeim hópi verða mörg bestu og efnilegustu börn og ungmenni landsins.

Við setningu mótsins kl. 14 á laugardaginn mun Guðmundur Andri Thorsson rithöfundur flytja afmælisræðu um Einar Benediktsson, en að því búnu mun Einar Benediktsson sendiherra leika fyrsta leikinn á Afmælismóti Einars Benediktssonar á veitingastaðnum Einari Ben við Ingólfstorg. Áhorfendur hjartanlega velkomnir meðan húsrúm leyfir.

 

 

Haustskákmót Ása hefst kl. 13

Æsir tefla sitt haustmót á þriðjudag 28 okt. kl. 13.00 í Stangarhyl  4. Allir skákmenn 60 + velkomnir og skákkonur 50 +. Tefldar verða 10 umferðir með 10 mín. umhugsunartíma.

Valdimar Ásmundsson sigraði á síðasta haustmóti.

 

Gauti Páll vann í gær

 

Áttunda og næstsíðasta umferð EM ungmenna fór fram í gær. Gauti Páll Jónsson vann góða sigur, Dagur Ragnarsson og Oliver Aron Jóhannesson gerðu jafntefli. Sá síðarnefndi sitt sjötta jafntefli í röð! Allt þó baráttuskákir. Símon Þórhallsson tapaði í gær.

Oliver hefur 4 vinninga, Símon og Gauti hafa 3,5 vinning og Dagur hefur 2,5 vinning. Árangur Símonar og Gauta er einstaklega góður á þeirra fyrsta stórmóti. Oliver er tæplega á pari en Dagur hefur engan veginn náð sér á strik og hefur verið ófarsæll á mótinu.

Lokumferðin fer fram í dag og því loknu hefst langt og strang ferðalag fyrir íslensku fulltrúanna.Tæplega skákmenn frá 43 löndum taka þátt. Fulltrúar Íslands eru fjórir að þessu sinni. Dagur Ragnarsson (2154) teflir flokki 18 ára og yngri en Oliver Aron Jóhannesson (2192), Símon Þórhallsson (1796) og Gauti Páll Jónsson (1739) tefla í flokki 16 ára og yngri. Helgi Ólafsson er fararstjóri og þjálfari.

Dagur er nr. 42 í stigaröð 62 keppenda. Í flokki 16 ára og yngri taka 89 skákmenn þátt. Oliver er nr. 32 í stigaröð keppenda en Símon er nr. 77 og Gauti er nr. 82.

• Heimasíða mótsins
• Chess-Results
• Beinar útsendingar

Vignir Vatnar unglingameistari TR - Freyja stúlknameistari TR

 

Barna- og unglingameistaramóti TR var í ár skipt í tvo flokka, opinn flokk og stúlknaflokk, og mættu samtals 38 keppendur til leiks, flestir úr Taflfélagi Reykjavíkur, eða 31 talsins. Í opnum flokki varð Vatnar Stefánsson öruggur sigurvegari með fullt hús vinninga eða 7 og er því Barna- og unglingameistari Taflfélags Reykjavíkur 2014. Er þetta þriðja árið í röð sem hann hlýtur þessa nafnbót og er hann ekki einu sinni búinn að ná 12 ára aldri! 

 

Í öðru sæti varð Björn Hólm Birkisson með 6 vinninga og í 3.-5. sæti urðu Mykhaylo Kravchuk, Stefán Orri Davíðsson og Benedikt Ernir Magnússon, allir með 5 vinninga, en Mykhaylo hlaut 3. sætið eftir stigaútreikning.

Aldursflokkasigurvegarar urðu: Stefán Orri Davíðsson - flokki 8 ára og yngri, Róbert Luu - flokki 10 ára og yngri, Vignir Vatnar Stefánsson - flokki 12 ára og yngri Björn Hólm Birkisson - flokki 15 ára og yngri. Nánari úrslit í opnum flokki eru hér.

Í Stúlknameistaramótinu vann Freyja Birkisdóttir sigur eftir aukakeppni við Ylfu Ýr Welding Hákonardóttur og Vigdísi Lilju Kristjánsdóttur, en þær urðu efstar og jafnar í mótinu með 4 vinninga af 5 mögulegum. Í aukakeppninni vann Freyja báðar sínar skákir og Ylfa vann eina og varð þar með í 2. sæti á undan Vigdísi Lilju sem hlaut 3. sætið. Engin þeirra þriggja hefur náð 10 ára aldri og því framtíðin björt.

Aldursflokkasigurvegarar urðu: Freyja Birkisdóttir - 8 ára og yngri, Ylfa Ýr Welding Hákonardóttir - 10 ára og yngri og Sana Salah - 12 ára og yngri. Nánari úrslit í stúlknaflokki eru hér.

Æskan og Ellin: Bragi sigraði...aftur

 

Bragi Halldórsson stóð uppi sem sigurvegari á Stórmótinu Æskan og Ellin sem fór fram í fyrradag.  Þetta er annað árið í röð sem Bragi sigrar og í þriðja sinn á fjórum árum svo hann finnur sig svo sannarlega vel á þessu flotta móti.  Bragi hlaut 7,5 vinning og varð jafn Guðfinni R. Kjartanssyni að vinningum en ofar á stigum.  Jafnir í 3.-5. sæti með 7 vinninga komu alþjóðlegi meistarinn Sævar Bjarnason, Jóhann Örn Sigurjónsson og Vignir Vatnar Stefánsson.  

 

Nánari umfjöllun er væntanleg.

Heildarrúrslit

Mótstafla (má stækka með því að klikka á töfluna)

 

Unglingameistaramót Hugins hefst í dag

Unglingameistaramót Hugins 2014 (suðursvæði) hefst mánudaginn 27. október n.k. kl. 16.³⁰ þ.e. nokkru fyrr heldur en venjulegar mánudagsæfingar. Mótinu verður svo fram haldið þriðjudaginn 28. október n.k. kl. 16.^30.  Tefldar verða 7 umferðir eftir Monrad kerfi. Fyrri keppnisdaginn verða fjórar skákir og þrjár þann seinni. Umhugsunartími á hverja skák er 20 mínútur. Mótið er opið öllum 15 ára og yngri í grunnskóla en titilinn sjálfan getur aðeins félagsmaður í Huginn unnið. Á meðan á mótinu stendur falla venjulegar barna- og unglingaæfingar niður. Næsta barna- og unglingaæfing eftir unglingameistaramótið verður mánudaginn 3. nóvember n.k.  Keppnisstaður er Álfabakki 14a (inngangur milli Subway og Fröken Júlíu) og er salur félagsins á þriðju hæð. Engin þátttökugjöld.

Verðlaunagripir verða fyrir þrjú efstu sætin. Allir þátttakendur fá skákbók.

Umferðatafla:

1.-4. umferð:                Mánudaginn 27. október kl. 16.³⁰

5.-7. umferð:                Þriðjudaginn 28. október kl. 16.³⁰

Verðlaun:

1. Unglingameistari Hugins (suðursvæði) fær farandbikar til varðveislu í eitt ár.
2. Þrír efstu fá verðlaunagripi til eignar.
3. Allir keppendur fá skákbók.
4. Þrír efstu 12 ára og yngri fá verðlaunapening.
5. Stúlknameistari Hugins (suðursvæði) fær verlaunagrip til eignar.

Símon og Dagur unnu í dag

 

EM ungmenna var framhaldið í dag eftir frídag í gær. Símon Þórhallsson og Dagur Ragnarsson unnu í dag, Oliver Aron Jóhannesson gerði jafntefli en Gauti Páll Jónsson tapaði.

Oliver og Símon hafa 3,5 vinning, Gauti hefur 2,5 vinning og Dagur hefur 2 vinninga. Árangur Símonar er sérstaklega glæsilegur en hann hefur teflt við stigahærri andstæðinga í hverri einustu umferð og hefur engu síður 50% vinningshlutfall!

 

Fréttaritari Skák.is í Georgíu kom við á skákstað í dag. Aðstæður á skákstað eru almennt góðar. Þröngt var þó, en ekki þó óþægilega, á skákstað. Öllum öðrum en keppendum er vísað af skákstað í upphafi umferða. Sérstakt andrúmsloft er í lobbýi skákstaðarins þar sem foreldrar safnast saman. Meðal annars mætti fréttaritari Skák.is grátandi stúlku sem greinilega hafði tapað snemma leiks. 

 

 

Íslenska liðið hefur fengið fremur slakt hótel í samanburði við sumar aðrar þjóðir eins og lesa má í grein Helga Ólafssonar í Morgunblaðinu í dag. Styrkileiki íslensku keppendanna liggur í því að láta ekki slíkt á sig fá. Hafa menn engu að síður í kjölfarið velt fyrir sér að hafa sérstakt hótel fyrir fulltrúa Georgíu á EM landsliða 2015 í Reykjavík. 

 

Úrslit 7. umferðar

 

 Staða íslensku keppendanna

 

Tæplega skákmenn frá 43 löndum taka þátt. Fulltrúar Íslands eru fjórir að þessu sinni. Dagur Ragnarsson (2154) teflir flokki 18 ára og yngri en Oliver Aron Jóhannesson (2192), Símon Þórhallsson (1796) og Gauti Páll Jónsson (1739) tefla í flokki 16 ára og yngri. Helgi Ólafsson er fararstjóri og þjálfari.

Dagur er nr. 42 í stigaröð 62 keppenda. Í flokki 16 ára og yngri taka 89 skákmenn þátt. Oliver er nr. 32 í stigaröð keppenda en Símon er nr. 77 og Gauti er nr. 82.

• Heimasíða mótsins
• Chess-Results
• Beinar útsendingar

Skákþáttur Morgunblaðsins: Gripinn úr vinnuferð

Þeir ungu skákmenn sem tefla á Evrópumóti ungmenna sem hefst í Batumi í Georgíu á morgun gætu margt lært af Karli Þorsteins sem varð fimmtugur þann 13. október sl. og er einn sigursælasti skákmaður Íslands á vettvangi barna- og unglingamóta. Karl vann óopinbert heimsmeistaramót barna í Puerto Rico árið 1978 og síðan barnamót Sameinuðu þjóðanna í Rio í ársbyrjun 1982. Hann varð svo í 3. sæti á HM unglinga í Finnlandi 20 ára og yngri. Áhrif Kasparovs á skákmenn af hans kynslóð voru mikil og komu fram hjá Karli í heilbrigðum metnaði og yfirgripsmikilli þekkingu á fræðunum; keppendur á Skákþingi Íslands 1981 komust að því að jafnvel smásmugulegustu fræðirit höfðu ekki skotist fram hjá hinum 16 ára gamla nýliða í landsliðsflokki. Karl varð Íslandsmeistari árin 1985 og 1989, átti fast sæti í landsliði Íslands og var í sveit Íslands sem varð í 2.-3. sæti á heimsmeistaramóti landsliða undir 27 ára í Chicago sumarið 1983.

Vegna sérstakra aðstæðna var íslenska íslenska landsliðið búið að keyra á fjórum mönnum í fyrstu umferðum HM landsliða í Luzern haustið 1993 og þrátt fyrir sigur yfir Rússum voru menn orðnir lúnir. Þá bættist Karl Þorsteins í liðið gripinn úr vinnuferð með Jakobi Ármannssyni á vegum Búnaðarbanka Íslands. Hann hlaut 4 vinninga af fimm mögulegum og átti stóran þátt í þeim árangri Íslands að verða í 5. sæti í keppni við bestu skákþjóðir heims. En þar setti hann líka að sumu leyti punktinn aftan við glæsilegt tímabil í skákinni. Þó hann hafi alltaf annað veifið síðan tekið þátt í mótum með góðum árangri voru markmiðin önnur; fjölskyldan og bankastörf voru sett framar á forgangslistanum.

Þegar rennt er yfir skákir Karls frá virkasta tímabilinu, níunda áratugnum, bregður oft fyrir nöfnum skákmanna sem létu mikið að sér kveða á næstu árum: Curt Hansen Kiril Georgiev, Lembit Oll, Ferdinand Hellers, Alexei Dreev. Á Reykjavíkurmótinu 1990 var Karl meðal efstu manna framan af og vann þá eftirfarandi skák af góðkunningja Reykjavíkurskákmótanna:

Karl Þorsteins - Walter Browne

Nimzo-indversk vörn

1. d4 Rf6 2. c4 e6 3. Rc3 Bb4 4. Rf3 c5 5. g3 cxd4 6. Rxd4 O-O 7. Bg2 d5 8. Db3 Bxc3 9. Dxc3

Afbrigðið sem Karl beitti hafði farið í gegnum mikla „umræðu" á þessum árum en talið var að 9. bxc3 væri vænlegra til árangurs.

9. ... e5 10. Rb3 dxc4

Einnig er hægt að leika 10. ... Rc6 eða 10. ... d4.

11. Ra5!

Karl hafði leikið 11. dxc4 gegn Polugajevskí í stórveldaslagnum 1990 sem var undanfari Reykjavíkurmótsins.

11. ... Rd5 12. Dd2 Rc6 13. Rxc4

Og hér kom til greina að leika 13. Dxd5 Dxd5 14. Bxd5 Rxa5 15. Bd2 og hvítur stendur aðeins betur að vígi.

13. ... Be6 14. O-O b5 15. Ra3 a6 16. Rc2 Hc8 17. e4 Rb6 18. b3!

Það er mikilvægt að valda c4-reitinn. Hvítur hefur sloppið út úr byrjuninni með aðeins betri stöðu.

18. ... a5 19. De2 b4 20. Be3 Dc7 21. Hac1 Rd7 22. Hfd1 Db7

23. Bf1!

Snjall leikur sem hótar bæði 24. Da6 og 24. Db5. Biskupar hvíts eru allsráðandi á borðinu.

23. ... a4? 24. Da6!

Þennan leik mátti svartur ekki leyfa.

24. ... Dxa6 25. Bxa6 axb3 26. Bxc8 bxc2 27. Hxd7!

Sennilega hefur Browne sem var í tímahraki sést yfir þennan leik.

27. ... Hxc8 28. Hd2! b3 29. axb3 Bxb3 30. Hd3 Ra5 31. Bb6

- og Browne gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 18. október 2014

Skákþættir Morgunblaðsins

[Event "It (open)"] [Site "Reykjavik (Iceland)"] [Date "1990.??.??"] [EventDate "?"] [Round "?"] [Result "1-0"] [White "Karl Thorsteins"] [Black "Walter Shawn Browne"] [ECO "E21"] [WhiteElo "?"] [BlackElo "?"] [PlyCount "61"] 1.d4 Nf6 2.c4 e6 3.Nc3 Bb4 4.Nf3 c5 5.g3 cxd4 6.Nxd4 O-O 7.Bg2 d5 8.Qb3 Bxc3+ 9.Qxc3 e5 10.Nb3 dxc4 11.Na5 Nd5 12.Qd2 Nc6 13.Nxc4 Be6 14.O-O b5 15.Na3 a6 16.Nc2 Rc8 17.e4 Nb6 18.b3 a5 19.Qe2 b4 20.Be3 Qc7 21.Rac1 Nd7 22.Rfd1 Qb7 23.Bf1 a4 24.Qa6 Qxa6 25.Bxa6 axb3 26.Bxc8 bxc2 27.Rxd7 Rxc8 28.Rd2 b3 29.axb3 Bxb3 30.Rd3 Na5 31.Bb6 1-0