NM í skólaskák - dagur 3

5. umferð: 6 vinningar af 10 mögulegum
Oliver Aron, Jón Kristinn, Hilmir Freyr, Aron og Óskar Víkingur unnu. Alexander og Róbert gerðu jafntefli. Stephan, Gunnar Erik og Batel töpuðu.

Jón Kristinn hafði hvítt gegn Dimitri Tumanov (2133) frá Finnlandi. Eftir byrjunina kom upp skrautleg staða þar sem Jón Kristinn var peði undir en með ákveðin færi sem þvældust fyrir Finnanum. Jokkó vann svo mann fyrir nokkur peð en var sjálfur algjörlega án peða en með ótrúlega virka létta menn og hróka sem spunnu mátnet í kringum svarta kónginn. Besti sóknarmaður hvíts var svo sjálfur kóngurinn sem þvældist alla leið upp til f6 til þess að fullkomna mátfléttuna. Algjörlega týpískur sigur fyrir Jón Kristin!

Svartur var að enda við að leika 33..b6 en hér var okkar maður fyrir löngu búinn að finna óverjandi mát í 6 leikjum: 34. Hcd1+ Ke7 35. Hg7+ Kf8 36. Kf6! Hxc5 37. Hd8+ Be8 38. Hf7+ og svartur gafst upp.

Hilmir Freyr hafði svart gegn Dananum Nicolai Kistrup (2115). Þegar Daninn virtist vera að ná undirtökunum eftir byrjunina fataðist honum flugið og með sinni alkunnu kænsku tókst Hilmi að snúa á hann með taktísku gegnumbroti á miðborðinu. Hann vann peð í framhaldinu og fékk upp endatafl þar sem báðir höfðu þungu mennina og biskup en Hilmir 4 peð gegn 3 á sama væng. Svo sannarlega ekki auðveld staða til þess að vinna en Hilmir hélt pressunni og á endanum urðu Dananum á mistök og þá var ekki að sökum að spyrja. Góður sigur í hús hjá okkar manni.

Hér lék Hilmir Freyr 24..e5! sem kemur hvítum í algjör vandræði. Ekki má taka á e5 með peði vegna leppunar á d-línunni og heldur ekki með biskup vegna Bg5 og allt hrynur. Daninn neyddist til þess að leika 25. Bh6 en eftir 25..exd4 26. Rd5 Bxd5 27. exd5 Hxd5 var Hilmir sælu peði yfir og sigldi sigrinum heim.

6. umferð: 6,5 vinningur af 9 mögulegum
Oliver Aron, Hilmir Freyr, Óskar Víkingur, Róbert og Batel unnu öll. Jón Kristinn, Alexander og Stephan gerðu jafntefli. Aron og Gunnar Erik töpuðu.

Spennan var mikil fyrir síðustu umferð í A- og B-flokki. Sú sérstaka staða var komin upp í A-flokknum að Oliver Aron og Jón Kristinn voru efstir ásamt þremur öðrum keppendum. Oliver var hæstur þeirra á stigum fyrir umferðina en allt gat gerst og í raun var lítið annað að gera en að einbeita sér að taflmennskunni og vona að önnur úrslit féllu með okkar mönnum. Oliver hafði hvítt gegn FM Felix Tuomainen (2215). Hann fékk mun betra tafl eftir byrjunina og þrengdi jafnt og þétt að andstæðingi sínum. Tuomainen neyddist til þess að gefa skiptamun og í framhaldinu peð til viðbótar. Oliver tókst að takmarka allt mótspil og smátt og smátt fækkaði möguleikum svarts. Á endanum var hann kominn í algjöra leikþröng og gafst upp. Mjög öruggur sigur.

Hér lék Oliver Aron 45. h4 og fullkomnaði öruggan sigur. Svartur er liði undir en auk þess í algjörri leikþröng og getur ekki hreyft neinn mann án þess að tapa meira liði. Það má segja að skákin hafi verið einkennandi fyrir skákstíl Olivers sem byggir á mjög skynsamri taflmennsku og á því að takmarka spil andstæðingsins og gera honum þannig erfitt fyrir.

Á sama tíma og þetta átti sér stað barðist Jón Kristinn í erfiðri stöðu og uppskar jafntefli. Norðmaðurinn Johannes Haug vann sína skák og því var ljóst að Oliver Aron og Haug voru efstir og jafnir en Jón Kristinn í 3. sæti. Eftir stigaútreikning stóð Oliver svo uppi sem Norðurlandameistari við mikinn fögnuð í íslensku herbúðunum!

Hilmir Freyr var fyrir umferðina líka efstur í B-flokknum ásamt Finnanum FM Toivo Keinanen (2347) en aðeins lægri á stigum og þurfti því að treysta á hagstæð úrslit.
Finninn fékk ekkert frumkvæði eftir byrjunina og samdi jafntefli eftir einungis rúma 20 leiki. Því lá það ljóst fyrir að með sigri gegn Færeyingnum Janus Skaale (1772) yrði Hilmir Freyr Norðurlandameistari. Janus hafði verið að tefla mjög vel allt mótið svo það var enginn ástæða til þess að ætla að hann yrði auðvelt fórnarlamb. En eins og áður tefldi Hilmir eins og sannur herforingi og Færeyingurinn sá aldrei til sólar. Annar Norðurlandameistaratitill í höfn! Hilmir Freyr tefldi allt mótið af miklum krafti, fullur sjálfstrausts og vel undirbúinn fyrir hverja skák.

Hér lék Hilmir 28. Hxf7! og eftir 28..Hxf7 29. He7 Hf8 30. Hxf7 Hxf7 31. d7 gafst svartur upp.

Í D-flokknum hafði Róbert Luu svart gegn Dananum Casper Liu (1963). Í miðtaflinu gaf Róbert skiptamun fyrir riddara og 2 peð á miðborðinu og það var ljóst að ef Daninn færi að teygja sig langt í sínum sóknaraðgerðum á kóngsvængnum gætu umfram peð Róberts orðið hættuleg. Þá tók Daninn skyndilega upp á því að skipta upp á drottningum og missti svo alveg tökin í vörninni. Róbert kom peðunum af stað og með skemmtilegu riddarahoppi vann hann lið af Dananum sem gafst upp í kjölfarið. Vel útfærður sigur.

Hér lék Róbert 45..Re3! og eftir 46. Hd2 Hc1+ 47. Kf2 Rc4!, með hótuninni 48..e3+, er ljóst að svörtu peðin verða ekki stöðvuð.

Batel hafði svart gegn Dananum AIM Albert Moller (1775). Eftir mikla stöðubaráttu, sem Batel tefldi skynsamlega, fékk hún upp endatafl þar sem Daninn sat uppi með mjög lélegan biskup sem tónaði illa við peðastöðu hans. Auk þess var Daninn með mjög rangstæðan hrók sem var við það að króast inni. Í framhaldinu tóku hvítu peðin að falla, eitt af öðru, og Batel innbyrti sigurinn af öryggi.

Í þessari stöðu lék Batel 36..Ke7 og eftir 37. Hf3 Hxe4 38. He1 Hxe1 39. Kxe1 hxg4 40. hxg4 Hh2 41. Kf2 Be4 var sigurinn í höfn.

Góður lokadagur hjá okkar fólki og mjög ánægjulegt að ná að landa tveimur Norðurlandameistaratitlum. Hópurinn hefur verið landi og þjóð til mikils sóma hérna á mótinu. Undirbúningur fyrir skákir, mataræði, svefn og almenn framkoma til fyrirmyndar.

Lokastaða Íslendinganna í öllum flokkum:
A-flokkur:
1. sæti Oliver Aron Jóhannesson 4,5 v.
3. sæti Jón Kristinn Þorgeirsson 4 v.
B-flokkur:
1. sæti Hilmir Freyr Heimisson 5 v.
9. sæti Aron Þór Mai 2,5 v.
C-flokkur:
5. sæti Alexander Oliver Mai 3,5 v.
10. sæti Stephan Briem 2 v.
D-flokkur:
3.-6. sæti Óskar Víkingur Davíðsson 3,5 v.
9.-10. sæti Róbert Luu 2,5 v.
E-flokkur:
6.-7. sæti Gunnar Erik Guðmundsson 3 v.
6.-7. sæti Batel Goitom Haile 3 v.

Verðlaunahafarnir: Jón Kristinn, Hilmir Freyr og Oliver Aron

Íslensku keppendurnir ásamt þjálfurum og fararstjórum.

Bestu kveðjur heim!

- Björn Ívar

Hraðskákmóti Reykjavíkur frestað vegna veðurs

Hraðskákmóti Reykjavíkur sem fyrirhugað var í dag hefur verið frestað um óákveðinn tíma vegna veðurs. Ný dagsetning verður tilkynnt á næstu dögum.

Hraðskákmót Reykjavíkur fer fram í dag

Hraðskákmót Reykjavíkur verður haldið í húsnæði Taflfélags Reykjavíkur að Faxafeni 12 sunnudaginn 11.febrúar og hefst taflið kl.13:00.

Tefldar verða 11 umferðir með tímamörkunum 4+2 (4 mínútur auk 2 sekúndna viðbótartíma eftir hvern leik). Mótið verður reiknað til hraðskákstiga og er opið öllum.

Þátttökugjald er 1.000kr. Frítt er í mótið fyrir félagsmenn TR sem eru 17 ára eða yngri. Skráning fer fram á skákstað og lýkur henni kl.12:50.

Eftir Hraðskákmótið fer fram verðlaunaafhending fyrir Skákþing Reykjavíkur.

Veitt verða verðlaun fyrir þrjú efstu sætin auk þess sem krýndur verður Hraðskákmeistari Reykjavíkur. Verði keppendur jafnir að vinningum verður skorið úr um sætaröð með stigaútreikningi (tie-break). Röð stigaútreiknings: 1.Innbyrðis úrslit 2.Bucholz (-1) 3.Bucholz (median) 4.Sonneborn-Berger.

Ríkjandi hraðskákmeistari Reykjavíkur er Dagur Ragnarsson. Sigurvegari mótsins í fyrra varð hins vegar Vestfjarðarvíkingurinn Guðmundur Gíslason sem vann það þrekvirki að vinna með fullu húsi! Undanfarin 11 ár hafa sex skákmeistarar borið titilinn Hraðskákmeistari Reykjavíkur, þar af einn stórmeistari og fjórir FIDE-meistarar:

2017: Dagur Ragnarsson 2016: Róbert Lagerman 2015: Dagur Ragnarsson 2014: Róbert Lagerman 2013: Oliver Aron Jóhannesson 2012: Davíð Kjartansson 2011: Hjörvar Steinn Grétarsson 2010: Torfi Leósson 2009: Hjörvar Steinn Grétarsson 2008: Davíð Kjartansson 2007: Davíð Kjartansson.

NM í skólaskák: dagur 2

3. umferð - 4,5 vinningur af 9
Hilmir Freyr, Óskar Víkingur og Gunnar Erik unnu allir. Jón Kristinn, Oliver Aron og Alexander Oliver gerðu jafntefli. Aron, Stephan, Róbert og Batel töpuðu öll.

Hilmir Freyr hafði svart á danska skákmanninn Mads Vestby-Ellingsen (2160). Upp kom mjög flókin staða úr hollenskri vörn þar sem sá danski óð á Hilmi og fórnaði mönnum hægri vinstri. Á hliðarlínunni var ekki nokkur leið að átta sig á því hvað væri eiginlega að gerast en þegar kóngur Hilmis hafði ferðast frá kóngsvængnum og í skjól yfir á drottningarvænginn dó mesti sóknarmáttur hvítu stöðunnar út.

Vestby-Ellingsen lék síðast 30. b4 sem Hilmir svaraði með 30..Hxf2+! 31. Kxf2 Dg2 mát

Óskar Víkingur hafði svart gegn hinum danska Simon Ehrenreich (1762). Upp kom nimzo-indversk vörn og jafnaði Óskar taflið auðveldlega. Hann hafði örlitla yfirburði í annars jafnteflislegu hróksendatafli en náði að setja Danann undir pressu og vinna peð. Ehrenreich fataðist flugið í vörninni og eftir rúmlega 80 leiki af miklum ,,svíðing" fékk Óskar upp stöðu sem hann hefur oftar en einu sinni og oftar en tvisvar farið yfir í skáktímum í gegnum tíðina og þekkir eins og handarbakið á sér.

Staðan er vel þekkt endataflsstaða sem gengur undir nafninu Lucena-staðan. Á íslensku er vinningsaðferðin jafnan kölluð ,,að byggja brú". Óskar Víkingur er þrautreyndur brúarsmiður og lék hér að sjálfsögðu 86..Hd5. Eftir 87. Kc2 Ke2 88. He8+ Kf3 89. Hf8+ Ke3 90. Hf7 Hd4 91. Kc3 Hf4 92. He7+ Kf3 var brúarsmíðin fullkomnuð og hvítur gafst upp.

4. umferð - 5 vinningar af 10
Stephan, Gunnar Erik og Batel unnu öll. Jón Kristinn, Oliver Aron, Aron og Róbert gerðu jafntefli. Hilmir Freyr, Alexander og Óskar Víkingur töpuðu.

Gunnar Erik hafði svart gegn Finnanum Niklas Jaakkola (1154). Upp kom Sikileyjarörn og eftir uppskipti í miðtaflinu fékk Gunnar Erik upp örlítið hagstæðara tvöfalt hróksendatafl þar sem hvítur hafði tvípeð. Eftir uppskipti á hrókunum kom upp peðsendatafl þar sem Finnanum varð á ónákvæmni sem gaf Gunnari Erik kost á því að nýta sér þekkingu sína á fjarlægum frípeðum.

Hér lék Gunnar Erik 42..h5+ og eftir 43. Kh4 Kh6 44. Kg3 Kg5 45. Kh3 h4 gafst hvítur upp þar sem svarti kóngurinn röltir yfir á miðborðið og gæðir sér á hvítu peðunum í skiptum fyrir fjarlæga frípeðið sitt á h-línunni.

Í dag fór einnig fram langur fundur fulltrúa allra skáksambandanna á Norðurlöndunum og sat undirritaður fundinn fyrir hönd SÍ. Staða skákarinnar á Norðurlöndunum var rædd og skiptust fulltrúarnir á ýmsum hugmyndum með það að markmiði að bæta samstarf þjóðanna í málefnum skákar í skólum. Við Íslendingar höfum, að mínu mati, verið að gera athyglisverða hluti í þeim málum á undanförnum 10 árum og voru hinar þjóðirnar sérlega áhugasamar um að reyna að læra eitthvað af okkur. Sérstaklega þó Finnarnir sem eru að kljást við talsvert áhugaleysi á skák meðal yngri kynslóðarinnar.

Eftir kvöldmat fór íslenski hópurinn í gönguferð í finnska kuldanum í skóginum sem umlykur svæðið. Hressandi endir á löngum degi.

5. umferð fer fram kl. 9:00 í fyrramálið (kl. 7:00 að íslenskum tíma)

Pörun 5. umferðar:

Mótið á chess-results

Skákirnar í beinni útsendingu

Bestu kveðjur heim,

- Björn Ívar Karlsson

 

Skákþáttur Morgunblaðsins: Stefán Bergsson getur unnið skákþingið með fullu húsi

Sú staða er komin upp þegar tvær umferðir eru eftir af Skákþingi Reykjavíkur 2018 að Akureyringurinn Stefán Bergsson hefur tveggja vinninga forskot á næstu menn og þarf aðeins jafntefli til að tryggja sigurinn. Hann mætir raunar stigahæsta keppandanum, Braga Þorfinnssyni, í áttundu umferð sem fram fer á morgun. Þá fæst svar við þeirri spurningu hvort skákþingið vinnist með fullu húsi, sem gerðist síðast fyrir 25 árum og var þar að verki Vestfirðingurinn Guðmundur Gíslason. Staða efstu manna fyrir lokasprettinn:

1. Stefán Bergsson 7 v (af 7), 2.-10. Hilmir Freyr Heimisson, Björn Hólm Birkisson, Þorvarður Ólafsson, Bragi Halldórsson, Lenka Ptacnikova, Einar Hjalti Jensson, Bragi Þorfinnsson, Júlíus Friðjónsson og Dagur Ragnarsson 5 v.

Í 6. umferð vann Stefán snaggaralegan sigur á Hrafni Loftssyni:

Hrafn Loftsson – Stefán Bergsson

Kóngsindversk vörn

1 d4 Rf6 2. Rf3 g6 3. c4 Bg7 4. Rc3 O-O 5. e4 d6 6. Be2 e5 7. Be3 Rg4 8. Bg5 f6 9. Bc1 Rc6 10. d5 Rd4!?

Þessi peðsfórn virðist gefa góð færi þó að algengara sé að víkja riddaranum undan til e7.

11. Rxd4 exd4 12. Dxd4 f5 13. Dd1 fxe4!

Með hugmyndinni 14. Bxg4 Dh4! sem hótar biskupinum og máti á f2.

14. Rxe4 De7 15. f3 Bf5 16. O-O

16. ... Rxh2!?

Freistandi, en gott var einnig 16. ... Bxe4, t.d. 17. fxg4 Be5! og hvíta kóngsstaðan stenst ekki álagið.

17. Kxh2 Dh4+ 18. Kg1 Bxe4 19. fxe4 Hxf1+ 20. Kxf1 Hf8+ 21. Bf3 Dxe4 22. De2 Dh4 23. Df2?

Hann gat varist með 23. De1!

23. ... Dxc4+ 24. Kg1 He8!

Með vinningsstöðu!

25. Kh2 Bd4 26. Dd2 Be5+ 27. Kh3 Df1 28. Kg4 h5+ 29. Kh4 Dh1+ 30. Kg5 Kg7!

Kóngurinn rekur smiðshöggið á vel útfærða sókn.

31. Dd3 Bf6+ 32. Kf4 Dh4+ 33. g4 Dh2 mát.

 

 

Björgvin efstur í Stúkunni

Björgvin Jónsson vann Halldór Grétar Einarsson í fjórðu umferð skákhátíðar MótX sem fram fer í Stúkunni á Kópavogsvelli og þar er tefld ein skák í viku. Skákhátíðin dregur til sín flesta af sterkustu skákmönnum Íslands en í efsta flokki eru línur aðeins teknar að skýrast þó að stór hluti keppenda hafi nýtt sér möguleika á ½ vinnings yfirsetu, sumir oftar en einu sinni. Staða efstu mann í A-flokki er þessi: 1. Björgvin Jónsson 3½ v. ( af 4 ) 2.–4. Jóhann Hjartarson, Hjörvar Steinn Grétarsson og Þröstur Þórhallsson 3 v. 

Sjötti sigur Magnúsar Carlsen í Wijk aan Zee

Fremsti skákmaður Hollendinga, Anish Giri, hefur um nokkurt skeið átt við sérkennilegan ímyndarvanda að stríða. Mót eftir mót rigndi niður jafnteflum í skákum hans. Svo dæmi sé tekið má nefna áskorendamótið í Moskvu sem fram fór fyrri part árs 2016 en þar tefldi hann 14 skákir og þeim lauk öllum með jafntefli. Fyrir Tata Steel-mótið í Wijk aan Zee var honum ljóst að hann yrði að reka af sér slyðruorðið. Niðurstaðan varð þessi: 

1.-2. Giri og Magnús Carlsen 9 v. (af 13 ) 3.–4. Kramnik og Mamedyarov 8½ v. 5.–6. Anand og So 8 v. 7. Karjakin 7½ v. 8. Svidler 6 v. 9. Wei 5 ½ v. 10.–11. Jones, Caruana og Matlakov 5 v. 13. Adhiban 3½ v. 14. Hou Yifan 2½ v.

Nú hefur verið er tekinn upp sá siður í Wijk að tefla til úrslita verði tveir eða fleiri efstir og í tveim hraðskákum sem Magnús og Giri tefldu um sigurvegaratitilinn hafði Norðmaðurinn betur, 1½:½ , og vann þar með sinn sjötta sigur á þessu merka móti.

 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 3. febrúar 2018

Skákþættir Morgunblaðsins

NM í skólaskák - dagur 1

Norðurlandamótið í skólaskák hófst hér í Vierumaki í Finnlandi í morgun. Teflt er venju samkvæmt í fimm aldursflokkum og hefur hver þjóð tvo fulltrúa í hverjum flokk. Fulltrúar Íslands að þessu sinni eru:

A-flokkur:
FM Jón Kristinn Þorgeirsson 2319
FM Oliver Aron Jóhannesson 2263

B-flokkur:
CM Hilmir Freyr Heimisson 2136
Aron Þór Mai 1965

C-flokkur:
Alexander Oliver Mai 1981
Stephan Briem 1876

D-flokkur:
Óskar Víkingur Davíðsson 1871
Róbert Luu 1680

E-flokkur:
Gunnar Erik Guðmundsson 1491
Batel Goitom Haile 1421

Þjálfarar og fararstjórar eru Helgi Ólafsson og Björn Ívar Karlsson.

Aðstæður hér eru til fyrirmyndar. Mótsstaðurinn er Vierumaki Olympic center sem er einhvers konar æfingasvæði fyrir ýmsar íþróttagreinar. Teflt er í rúmgóðum sal og allt til alls fyrir keppendur og áhorfendur. Helmingur skákanna er sýndur beint á netinu og hægt er að fylgjast með þeim í sérstökum sal við hliðina á keppnissalnum. Keppendur og fylgdarlið gista svo í rúmgóðum hótelherbergjum. Hér eru allir sammála um að boðið sé upp á talsvert betri aðstæður en gengur og gerist á Norðurlandamótum í skólaskák.

1. umferð
6,5 vinningur af 10 mögulegum
Jón Kristinn, Oliver Aron, Aron Þór, Hilmir Freyr, Alexander Oliver og Gunnar Erik unnu allir. Óskar Víkingur gerði jafntefli. Stephan, Róbert og Batel töpuðu. Aron Þór vann hinn sænsk/íslenska Baldur Teodor Petersson (2161) í vel útfærðri skák. Aron fékk mun betra tafl eftir byrjunina og þrengdi mjög að andstæðingi sínum sem neyddist á endanum til þess að gefa drottninguna fyrir ónægar bætur. Aron sigldi sigrinum í höfn af öryggi.

Aron lék síðast 18. f4 sem svartur svaraði með 18...Rd3 en eftir 19. Bf1 varð eitthvað undan að láta og Aron vann af öryggi.

2. umferð
5 vinningar af 9 mögulegum
Hilmir Freyr, Alexander Oliver og Batel unnu öll. Oliver Aron og Jón Kristinn gerðu innbyrðis jafntefli. Að auki gerðu Stephan og Róbert líka jafntefli. Aron Þór, Óskar og Gunnar Erik töpuðu.
Alexander og Batel unnu vel útfærðar skákir. Skák Hilmis gegn hinum sænska FM Milton Pantzar (2260) vakti talsverða athygli. Upp kom sjaldgæft afbrigði af London-system sem Hilmir var vel undirbúinn fyrir. Hann hafði einnig teflt London-system í nýlegri skák gegn Einari Hjalta Jenssyni í Skákþingi Reykjavíkur og hafði þar misst af skemmtilegu trikki með Bc7 eftir byrjunina. Þetta var rætt í undirbúningnum fyrir skákina og það kom skemmtilega á óvart þegar eftirfarandi staða kom upp:

Hér lék Hilmir að sjálfsögðu 14. Bc7! og það er ljóst að svartur tapar miklu liði eftir 14..Hxc7 15. a5. Svartur barðist í rúmlega 30 leiki en Hilmir vann af miklu öryggi. Hilmir, sem mætti vel klæddur til leiks í finnska kuldanum, lét eftirfarandi ummæli falla fyrir skákina: ,,When the gloves are on - the game is on"

3. umferð hefst kl. 9:00 að finnskum tíma í fyrramálið (7:00 að íslenskum tíma).

Pörun 3. umferðar:

Skákirnar í beinni útsendingu

Mótið á chess-results

Bestu kveðjur heim.

- Björn Ívar Karlsson

SÞR #9: Stefán Bergsson er Skákmeistari Reykjavíkur 2018

Spennustigið í skáksal Taflfélags Reykjavíkur var hátt er síðasta umferð Skákþings Reykjavíkur var tefld. Fyrir umferðina áttu fjórir skákmenn möguleika á efsta sæti en aðeins einn þeirra, Stefán Bergsson, átti þess kost að tróna einn á toppnum. Stefáni nægði jafntefli í lokaumferðinni gegn Degi Ragnarssyni til þess að tryggja sér sigur í mótinu en Dagur hefði náð Stefáni að vinningum með sigri. Á sama tíma mættust Hilmir Freyr Heimisson og Bragi Þorfinnsson og hefði annar hvor getað náð Degi og Stefáni að vinningum færi svo að Dagur myndi vinna Stefáni.

Stóra spurning lokaumferðarinnar var sú hvort Stefán stæðist pressuna sem fylgir því að nægja jafntefli í lokaumferð gegn mun stigahærri andstæðingi, hafandi í huga tapið í 8.umferð þar sem jafntefli nægði Stefáni líka. Til að gera langa sögu stutta þá stóðst Stefán pressuna með glæsibrag. Hann tefldi mjög vel gegn franskri vörn Dags, hann nýtti sér mistök sem Dagur gerði í miðtaflinu og vann að lokum skákina. Það var í þessari stöðu sem Stefán gerði út um skákina:

 

Stefán lék 20.Rf6+! og eftir 20…Bxf6 21.exf6 Rb3 22.De3 Rxd4 23.Hxd4 Bc6 24.Hg4 gafst Dagur upp.

Þessi sigur tryggði Stefáni 8 vinninga í skákunum 9 og sat hann því einn á toppnum við leiðarlok, heilum vinningi á undan næsta manni. Stefán Bergsson er því Skákmeistari Reykjavíkur árið 2018. Sannarlega stórbrotin frammistaða hjá Stefáni sem var í upphafi móts aðeins 14.stigahæsti keppandinn.

IM Bragi Þorfinnsson vann skák sína í lokaumferðinni gegn CM Hilmi Frey Heimissyni og lauk tafli með 7 vinninga. Það nægði Braga til að hreppa 2.sætið. Í humátt á eftir Braga komu IM Einar Hjalti Jensson og FM Sigurbjörn Björnsson með 6,5 vinning. Einar Hjalti hlaut 3.sætið eftir stigaútreikning.

Nánar verður fjallað um mótið á næstu dögum. Upplýsingar um einstök úrslit og lokastöðu, sem og skákir mótsins, má finna á Chess-Results.

Nánar á heimasíðu TR.

Guðmundur endaði í 3.-5. sæti í Úrúgvæ

Alþjóðlegi meistarinn, Guðmundur Kjarntassnon (2441) endaði í 3.-5. sæti á alþjóðlega mótinu í Copa Marcel Duchamp í Montevideo í Úrúgvæ. Guðmundur hlaut 7 vinninga í 9 umferðum. 

Frammistaða Guðmundar samsvaraði 2408 skákstigum og hækkaði hann um 1 stig fyrir hana.

Úrslit í skákum Guðmundar má finna á Chess-Results.

150 keppendur frá 9 löndum tóku þátt í mótin og þar af voru 7 stórmeistarar. Guðmundur var nr. 7 í stigaröð keppenda. 

Heimasíða mótsins.

Hraðskákmót Reykjavíkur fer fram á sunnudaginn

Hraðskákmót Reykjavíkur verður haldið í húsnæði Taflfélags Reykjavíkur að Faxafeni 12 sunnudaginn 11.febrúar og hefst taflið kl.13:00.

Tefldar verða 11 umferðir með tímamörkunum 4+2 (4 mínútur auk 2 sekúndna viðbótartíma eftir hvern leik). Mótið verður reiknað til hraðskákstiga og er opið öllum.

Þátttökugjald er 1.000kr. Frítt er í mótið fyrir félagsmenn TR sem eru 17 ára eða yngri. Skráning fer fram á skákstað og lýkur henni kl.12:50.

Eftir Hraðskákmótið fer fram verðlaunaafhending fyrir Skákþing Reykjavíkur.

Veitt verða verðlaun fyrir þrjú efstu sætin auk þess sem krýndur verður Hraðskákmeistari Reykjavíkur. Verði keppendur jafnir að vinningum verður skorið úr um sætaröð með stigaútreikningi (tie-break). Röð stigaútreiknings: 1.Innbyrðis úrslit 2.Bucholz (-1) 3.Bucholz (median) 4.Sonneborn-Berger.

Ríkjandi hraðskákmeistari Reykjavíkur er Dagur Ragnarsson. Sigurvegari mótsins í fyrra varð hins vegar Vestfjarðarvíkingurinn Guðmundur Gíslason sem vann það þrekvirki að vinna með fullu húsi! Undanfarin 11 ár hafa sex skákmeistarar borið titilinn Hraðskákmeistari Reykjavíkur, þar af einn stórmeistari og fjórir FIDE-meistarar:

2017: Dagur Ragnarsson 2016: Róbert Lagerman 2015: Dagur Ragnarsson 2014: Róbert Lagerman 2013: Oliver Aron Jóhannesson 2012: Davíð Kjartansson 2011: Hjörvar Steinn Grétarsson 2010: Torfi Leósson 2009: Hjörvar Steinn Grétarsson 2008: Davíð Kjartansson 2007: Davíð Kjartansson.

Icelandic Open - Skákþing Íslands - minningarmót um Hemma Gunn fer fram 1.-9. júní í Valsheimilinu

Íslandsmótið í skák 2018, fer fram í Valsheimilinu, 1.-9. júní nk. Mótið verður opið að þessu sinni og teflt í einum flokki. Rétt eins og var var 100 ára afmælismótinu árið 2013 þegar teflt var í Turninum í Borgartúni sællar minningar. Mótið ber jafnframt heitið Icelandic Open. Mótið nú verður minningarmót um Hemma Gunn, sem lést þegar mótið fór fram í Turninum. 

 

Mótið nú verður jafnframt Íslandsmót kvenna og unglingameistaramót ÍslandS (u22). Efsta konan á mótinu verður Íslandsmeistari kvenna sem og yngsta ungmenni, 22 ára og yngri. Engin áskorendaflokkur fer heldur fram í ár. Segja má því Íslandsmótið opna komi í stað fjögurra móta! 

Á næstu vikum, samt mjög líklega ekki fyrr en eftir GAMMA Reykjavíkurskákmótið, verður fyrirkomulag mótsins nánar kynnt en það verður mjög líklega mjög áþekkt því sem var á afmælinumótinu 2013. Þá sigraði á Hannes Hlífar Stefánsson eftir að hafa lagt Björn Þorfinnsson að velli í úrslitaeinvígi. Björn náði sér hins vegar í stórmeistaraáfanga á mótinu.

Vinsamlegast bókið þessar dagsetningar og takið frá. Þetta verður eitthvað.