Mót í Brekkuskóla og Lundarskóla

Tvö mót hafa nýlega verið háð í grunnskólum Akureyrarbæjar. Í Brekkuskóla var teflt á skákdaginn 26. janúar og tóku þá tíu þátt í meistaramóti skólans. Þessi lentu í efstu sætum eftir fimm umferðir:

Tumi Snær Sigurðsson    5

Helgi Hjörleifsson      4

Hermann Þór Edvardsson  3

Sigurður Máni Guðmundsson 2,5

Benjamín Þorri Bergsson  2,5

Tumi, sem er í 10. bekk, er því skákmeistari Brekkuskóla 2018. Næstu menn eru allir í 6. bekk skólans. Myndirnar hér á síðunni eru frá þessu móti.

Í Lundarskóla var teflt þann 7. febrúar og var mikill áhugi fyrir mótinu. Taflið hófu 38 börn úr fjórða, fimmta og sjöunda bekk skólans og komust þó færri að en vildu. Vegna hins óvænta fjölda var ákveðið að tefla fyrst fjórar umferðir og eftir þær voru þrír keppendur með fullt hús vinninga, allir úr sjöunda bekk. Þeir eru:

Ágúst Ívar Árnason, Ívar Þorleifur Barkarson, Vignir Otri Elvarsson og Hjalti Valsson.  Þessir keppendur munu tefla til úrslita um skákmeistaratitil Lundarskóla síðar í mánuðinum. 

Eftirtaldir nemendur sem fengu þrjá vinninga:

Arnar Eyfjörð Jóhannsson	4 bk
Viktor Máni Sævarsson	4 bk
Ólafur Kristinn Sveinsson	5 bk
Tómas Kristinsson	5 bk
Gabríel Ómar Logason	7 bk
Íris Harpa Hilmarsdóttir	7 bk
Jóhannes Hafþór Búason	7 bk
Sigrún Rósa Víðisdóttir	7 bk
Vilhjálmur Svanberg Arngrímsson	7 bk
Víðir Guðjónsson	7 bk

 Mótið var sérlega skemmtilegt og vel heppnað. Hin góða þátttaka var óvænt og ánægjuleg!  

Nánar á heimasíðu SA.

Puffins bræddu snjóboltana frá Stokkhólmi!

Reykjavík Puffins komust aftur á sigurbraut í hinni vinsælu netdeild PRO Chess League.

Andstæðingar gærdagsins voru Stockholm Snowballs frá Svíaveldi. Tónninn var settur snemma þegar Þröstur lagði Agrest glæsilega og í kjölfarið fylgdu tveir sigrar til viðbótar og aðeins eitt tap. Puffins leiddu 3-1.

Í næstu umferðum var skipst á höggum og enduðu þær allar 2-2 þannig að Puffins leiddu 7-5 þegar kom að lokaumferðinni. Mjótt var þó á mununum þegar Jóhann sneri snaggarlega á Agrest eftir að hafa verið með hrók og mann fyrir drottningu og tapað tafl. Mikið munaði um þann viðsnúning.

Í lokaumferðinni skildu Puffins ekki neitt eftir fyrri ímyndunaraflið og slátruðu Svíunum aftur 3-1 og lokastaðan því 10-6 fyrir Puffins!

Hægt er að horfa á viðureignina í heild sinni hér:

 

Árangur einstakra liðsmanna:

 

 

 

 

 

 

 

 

Staðan í riðli Puffins er þá þessi:

 

 

 

 

 

 

 

 

 

 

 

 

 

 

 

 

 

 

 

Riðill Puffins er skipaður liðum úr Evrópu og er einn af fjórum riðlum. Fjögur efstu lið í hverjum riðli fara í úrslitakeppni þar sem keppt er með útsláttarfyrirkomulag en tvö neðstu liðin falla úr deildinni!

 

Frétt Chess.com með klippum úr útsendingu þeirra:

https://www.chess.com/blog/PROChessLeague/reykjavik-puffins-punish-stockholm-snowballs

 

Heimasíða PRO Chess League:

http://www.prochessleague.com

 

Háspenna og Gordonshnútar í 5. umferð Skákhátíðar MótX

Fimmta umferð Skákhátíðar MótX var tefld þriðjudagskvöldið 6. febrúar. Þessi umferð var sú æsilegasta á mótinu hingað til, þrungin þvílíkri spennu og flækjum að við lá skammhlaupi í taugakerfum teflenda frammi fyrir agndofa áhorfendum.

A flokkur

Efstur fyrir umferðina var Suðurnesjamaðurinn geðþekki, Björgvin Jónsson, með 31/2 vinning en hann sat yfir að þessu sinni. Á efsta borði öttu stórmeistararnir Jóhann Hjartarson og Hjörvar Steinn Grétarsson kappi í rammaslag miklum. Jóhann tefldi byrjunin hratt og náði þannig forskoti á tíma er reyndist skipta máli þegar á leið. Eftir mannsfórn Jóhanns á g7 kom upp gríðarflókið tafl þar sem Hjörvar Steinn hafði tvo menn fyrir hrók en möguleikarnir voru svo margslungnir að erfitt var fyrir mennskan heila að tæma stöðuna. Hvortveggi fékk færi á að hrifsa til sín vinninginn en að lokum veitti Jóhann betur. Vel tefld skák en ekki hnökralaus.

Á öðru borði mættust stórmeistararnir og Huginskapparnir Hannes Hlífar og Þröstur Þórhallsson. Hannes, sem stýrði hvítu mönnunum, langhrókaði og náði sóknarfærum gegn kóngi svarts. Þröstur varðist þeim hótunum fimlega en upp kom að lokum endatafl þar sem veikleikarnir í kringum kóng svarts riðu baggamuninn.

Jón Viktor fékk snemma betra tafl og vann peð gegn Baldri sem varðist af útsjónarsemi en varð að játa sig sigraðan. Helgi Áss kom Halldóri Grétari á óvart í byrjun með óvenjulegri leikjaröð. Hann náði smám saman tökum á miðtaflinu og vann mann og þar sem Halldóri Grétari tókst ekki að tryggja frípeði sínu sæluvist í himnaríki 8. reitaraðarinnar voru örlög svarts ráðin. Jón L. fékk þægilegra tafl gegn Oliver, tefldi markvisst eins og hans er háttur og knúði fram sigur í endatafli.

Örn Leo tefldi af mikilli varfærni gegn Þorsteini Þorsteinssyni sem vann mann með lúmskri gildru. En Arnarljónið var ekki á því að láta í minni pokann heldur braust inn bakdyramegin hjá bóndanum á Steinastöðum og knúði fram jafntefli. Kristján Eðvarðsson lagði Bárð Örn laglega, Ingvar Þór sveið félaga sinn í Hugin, Sigurð Daða, peði yfir í endatafli og Vignir Vatnar sigraði Guðmund Halldórsson nokkuð snaggaralega.

TR-ingarnir Björn Þorfinnsson og Daði Ómarsson sættust á skiptan hlut og sömu sögu var að segja af Huginskempunum Ásgeiri og Lenku þar sem Ásgeir náði ekki að ryðja sér sigurbraut í örlítið betra endatafli.

Áhugaverðar viðureignir í 6. umferð

Jóhann Hjartarson og Björgvin Jónsson eru efstir að fimm umferðum loknum með fjóra vinninga hvor. Í humáttina koma Hannes Hlífar, Helgi Áss og Jón Viktor sem situr yfir í 6. umferð. Þriðjudaginn 13. febrúar kl. 19.30 verður baráttunni haldið áfram. Hannes Hlífar hefur þá hvítt á Jóhann Hjartarson en takist öðrum hvorum þeirra að sigra, nær sá forystu á mótinu fyrir 7. og síðustu umferðina. Á öðru borði mun reyna á þrætubækur skákfræðanna þar sem Helgi stýrir hvítu mönnum gegn Björgvini. 

A-flokkurinn á Chess-Results.

Hvítir hrafnar

Lítið var flogið í Hrafnabjörgum í 4. umferð. Kapparnir Jónas Þorvaldsson og Friðrik Ólafsson sættust á skiptan hlut en skákir Braga Halldórssonar gegn Jóni Þorvaldssyni og Björns Halldórssonar gegn Júlíusi Friðjónssyni verða tefldar 13. febrúar.

Hvítir hrafnar á Chess-Results.

B flokkur

Gauti Páll, sem hafði unnið allar fjórar skákir sínar, mætti Agnari Tómas Möller í fimmtu umferð. Úr varð hörku skák sem Agnar Tómas vann eftir mikla baráttu. Nánar er fjallað um skákina á Skákhuganum.

Á öðru borði tefldu Blikarnir Birkir Ísak og Stephan Briem vel. Birkir Ísak hafði betur að þessu sinni og hefur unnið fjórar skákir í röð.
Siguringi heldur áfram með gott mót og sigraði Björn Hólm örugglega.

Sigurður Freyr var með mun betri stöðu gegn Hilmi Frey þegar maður datt í hafið og þrátt fyrir álitlega sókn sem fylgdi í kjölfarið þá héldu varnir Hilmis og hann sigldi vinningnum örugglega í höfn. 

Eftir fimm umferðir eru fjórir skákmenn jafnir og efstir með fjóra vinninga: Gauti Páll, Siguringi, Birkir Ísak og Agnar Tómas.

Margar spennandi viðureignir verða í sjöttu umferð:

B-flokkurinn á Chess-Results. 

Ítarlegri umfjöllun á Skákhuganum. 

Stefán Steingrímur Bergsson skákmeistari Reykjavíkur

Stefán Steingrímur Bergsson er skákmeistari Reykjavíkur 2018! Það er ljóst eftir lokaumferð mótsins sem fram fór í kvöld. Stefán vann sannfærandi sigur á Degi Ragnarssyni í lokaumferðinni og hlaut 8 vinninga í 9 skákum. Bragi Þorfinnsson varð annar og Einar Hjalti Jensson og Sigurbjörn Björnsson urðu í 3.-4. sæti. Á myndinni að ofan fagnar Stefán sigrinum ásamt Ingvari Þór Jóhannessyni.

Að myndinni að neðan bregður Bragi Halldórsson á leik við upphaf skákarinnar. Bragi sýndi svo snilldartaka í skák sinni gegn Birni Hólm Birkissyni.

 

Lokastöðuna má finna á Chess-Results. 

Nánar verður fjallað um Skákþingið og glæsilegan árangur Stefáns á morgun. 

Reykjavik Puffins gegn Stockholm Snowballs í kvöld

Í kvöld klukkan 19:25 hefst 4. umferð í PRO Chess League. Umferðin sjálf hefst í raun fyrr um daginn en viðureign Reykjavik Puffins og Stockholm Snowballs hefst á slaginu 19:25 á Chess.com.

Um síðustu helgi tóku Lundarnir þátt í Super Sunday sem taldi sem ein viðureign í töflunni. Þar munaði í lokin aðeins hálfum vinningi að Lundarnir fengu jafntefli á töfluna. Atti Helgi Ólafsson meðan annars tafli við heimsmeistarann Magnus Carlsen ásamt fjölmörgum öðrum sterkum meisturum svosem Andreikin og Gupta svo einhverjir séu nefndir.

Stockholm Snowballs liðið er leitt af þýska stórmeistaranum Georg Meier. Í raun er liðsuppstilling Svíana nákvæmlega sú sama og í fyrra þegar þeir lögðu okkur í spennandi viðureign. Við komum sterkari til leiks að þessu sinni!

Lið Lundana að þessu sinni skipa:

GM Jóhann Hjartarson (2539),GM Hannes Stefansson (2512), GM Þröstur Þórhallsson (2420) og IM Björn Þorfinnsson (2398).

Allir tefla við alla á fjórum borðum og því 16 vinningar í boði. Búast má við jöfnum og spennandi match.

Hægt verður að fylgjast með skákunum og Chess.com en við mælum með því að kíkja á beina útsendingu Puffins í umsjón FM Ingvars Þórs Jóhannessonar sem verður hér: http://www.twitch.tv/reykjavikpuffins

Heimasíða PRO Chess League

Útsending Chess.com

Hraðskákmót Reykjavíkur fer fram 11. febrúar

Hraðskákmót Reykjavíkur verður haldið í húsnæði Taflfélags Reykjavíkur að Faxafeni 12 sunnudaginn 11.febrúar og hefst taflið kl.13:00.

Tefldar verða 11 umferðir með tímamörkunum 4+2 (4 mínútur auk 2 sekúndna viðbótartíma eftir hvern leik). Mótið verður reiknað til hraðskákstiga og er opið öllum.

Þátttökugjald er 1.000kr. Frítt er í mótið fyrir félagsmenn TR sem eru 17 ára eða yngri. Skráning fer fram á skákstað og lýkur henni kl.12:50.

Eftir Hraðskákmótið fer fram verðlaunaafhending fyrir Skákþing Reykjavíkur.

Veitt verða verðlaun fyrir þrjú efstu sætin auk þess sem krýndur verður Hraðskákmeistari Reykjavíkur. Verði keppendur jafnir að vinningum verður skorið úr um sætaröð með stigaútreikningi (tie-break). Röð stigaútreiknings: 1.Innbyrðis úrslit 2.Bucholz (-1) 3.Bucholz (median) 4.Sonneborn-Berger.

Ríkjandi hraðskákmeistari Reykjavíkur er Dagur Ragnarsson. Sigurvegari mótsins í fyrra varð hins vegar Vestfjarðarvíkingurinn Guðmundur Gíslason sem vann það þrekvirki að vinna með fullu húsi! Undanfarin 11 ár hafa sex skákmeistarar borið titilinn Hraðskákmeistari Reykjavíkur, þar af einn stórmeistari og fjórir FIDE-meistarar:

2017: Dagur Ragnarsson 2016: Róbert Lagerman 2015: Dagur Ragnarsson 2014: Róbert Lagerman 2013: Oliver Aron Jóhannesson 2012: Davíð Kjartansson 2011: Hjörvar Steinn Grétarsson 2010: Torfi Leósson 2009: Hjörvar Steinn Grétarsson 2008: Davíð Kjartansson 2007: Davíð Kjartansson.

Síðari hluti Íslandsmóts skákfélaga fer fram 1.-3. mars

Seinni hluti Íslandsmóts skákfélaga 2017-2018 fer fram dagana 1.3. – 3.3. nk.  Mótið fer fram í Rimaskóla. Keppnin hefst (eingöngu í 1.deild) kl. 19.30 fimmtudaginn 1. mars.  Aðrar deildir munu hefja taflmennsku föstudaginn 2. mars  kl. 20.00 og síðan tefla laugardaginn 3. mars. kl. 11.00 og kl. 17.00 sama dag.  

Þau félög sem enn skulda þátttökugjöld þurfa að gera upp áður en seinni hlutinn hefst.

Vakin er athygli á nýrri grein í reglugerð.  Taflfélög í 1. deild eru beðin að tilkynna til SÍ nöfn skákstjóra sinna. 

2. gr.

Framkvæmdanefnd Íslandsmóts skákfélaga, sem skipuð er af stjórn Skáksambands Íslands, ákveður töfluröð og skipar skákstjóra og umsjónarmenn Íslandsmóts skákfélaga.  Öllum taflfélögum, sem eiga sveitir í 1. deild, ber að útvega einn skákstjóra. 

Mót 4 í Bikarsyrpu TR fer fram helgina 16.-18. febrúar

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað fjórða árið í röð. Líkt og síðastliðinn vetur verða mót syrpunnar fimm talsins og verða tefldar sjö umferðir í hverju móti. Mótin fara fram í Skákhöll TR að Faxafeni 12.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2002 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Fjórða mót Bikarsyrpunnar hefst föstudaginn 16. febrúar og stendur til sunnudagsins 18. febrúar. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Dagskrá:

1. umferð: 16. febrúar kl. 17.30 (fös)
2. umferð: 17. febrúar  kl. 10.00 (lau)
3. umferð: 17. febrúar  kl. 13.00 (lau)
4. umferð: 17. febrúar  kl. 16.00 (lau)
5. umferð: 18. febrúar  kl. 10.00 (sun)
6. umferð: 18. febrúar  kl. 13.00 (sun)
7. umferð: 18. febrúar  kl. 16.00 (sun)

Verðlaunaafhending fer fram strax að lokinni 7. umferð.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan.

Sjálfkrafa tap dæmist á keppanda sem mætir á skákstað meira en 15 mínútum eftir að viðkomandi umferð hefst.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar og þá hlýtur einnig efsta stúlkan í hverju móti bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir besta samanlagðan árangur, þar sem mest fjögur mót gilda; taflsett, skákklukka, 5.000kr bókainneign ásamt veglegum farandbikar. Þá verða veitt sérstök verðlaun fyrir besta samanlagðan árangur, þar sem mest fjögur mót gilda, fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Skráning fer fram í gegnum skráningarform hér að neðan. Hlökkum til að sjá ykkur!

Skráningarform

Skráðir keppendur

Mót Bikarsyrpunnar í vetur: 25.-27. ágúst, 29. sep-1. okt, 27.-29. okt, 16.-18. feb, 6.-8. apr

Skákstjórn: Þórir Benediktsson, s. 867 3109, [e-mail]

Toyotamót öldunga: Gylfi Þórhallsson vann

Hið árlega skákmót eldri borgara í boði Toyota fór fram sl. föstudag i höfuðstöðum þess í Kauptúni, Garðabæ. Mótið sem nú var haldið í 11. sinn var afar vel sótt og fór hið besta fram eins og vænta mátti undir styrkri stjórn ÆSIS manna þeirra Finns og Garðars. 

Úlfar Steindórsson, forstjóri afhenti hinum sigursælu efstu mönnum verðlaun sín, þeim Gylfa Þórhallssyni, Jóhanni Erni Sigurjónssyni og Ólafi Bjarnasyni, auk 10 næstu og tveimur neðstu peningaverðlaun. Gylfi vann mótið einnig 2016 og Jóhann árið 2009. 

Afar skemmtilegt mót í alla staði og vel við gamlingjana gert á öllum sviðum.

Kappteflið um Friðrikskónginn VII: Örn Leó í forystu

Mótaröðin um Taflkóng Friðriks Ólafssonar heldur áfram í kvöld og næstu tvö mánudagskvöld vestur í skáksal KR í Frostaskjóli og hefst kl. 19.30. Örn Leó Jóhannsson vann fyrsta mótið af fjórum á stigum en Björgvin Víglundsson var jafn honum að vinningum eftir harða keppni og skemmtilega baráttu eins og ávallt þegar svona öflugum hópi lýstur saman. Báðir fengu þeir 8 viinninga af 9 mögulegum. Munið að mæta.