SÞR #8: Akureyrarhraðlestin út af sporinu

Áttunda umferð Skákþings Reykjavíkur var tefld í gær og var andrúmsloftið þrungið spennu. Er upp var staðið mátti sjá ummerki um blóðugar orrustur og drýgðar hetjudáðir. Akureyrarhraðlestin fór út af sporinu, unga fólkið lét til sín taka og spennan á toppnum er magnþrungin fyrir lokaumferðina sem tefld verður á miðvikudagskvöld.

Skákheimur hefur staðið á öndinni yfir framgöngu Stefáns Bergssonar að undanförnu og hafa hvatningarskeyti borist honum víða að, enda fáheyrt að skákmaður sem er fjórtándi í stigaröðinni vinni sjö fyrstu skákir sínar. Margir fylgdust því spenntir með er Stefán (2093) stýrði svörtu mönnunum gegn Braga Þorfinnssyni (2426) í 8.umferðinni í gær. Til að gera langa sögu stutta þá fór Akureyrarhraðlestin, með Stefán Bergsson við stýrið, út af sporinu eftir viðburðaríka ferð um sprengjusvæði Kóngs-Indverjans. Bragi kunni betri skil á byrjuninni og fékk snemma unnið tafl sem hann nýtti sér til að innbyrða sigur. Bragi hefur vaxið ásmegin eftir því sem liðið hefur á Skákþingið og hefur hann nú unnið fjórar síðustu tefldar skákir sínar. Hann situr því í 2.sæti með 6 vinninga og eygir enn von um að verða Reykjavíkurmeistari í annað skipti á ferlinum.

Jafnir Braga í 2.sæti eru Hilmir Freyr Heimisson og Dagur Ragnarsson sem báðir unnu með hvítu í dag. Hilmir Freyr (2136) vann Lenku Ptacnikovu (2218) og Dagur (2332) lagði Braga Halldórsson (2082). Stefán Bergsson trónir hins vegar enn á toppnum með 7 vinninga og nægir jafntefli í lokaumferðinni.

Af öðrum úrslitum bar hæst sigur Benedikts Þórissonar (1143) á Óskari Long Einarssyni (1785) en á þeim munar 642 skákstigum. Benedikt hefur sýnt miklar framfarir að undanförnu og rýkur hann upp stigalistann þessa mánuðina. Björn Hólm Birkisson (2084) gerði einnig vel er hann náði jafntefli gegn alþjóðlega meistaranum Einari Hjalta Jenssyni (2336).

Níunda og síðasta umferð Skákþingsins verður tefld á miðvikudagskvöld og verða klukkur settar í gang klukkan 19:30. Skákáhugamenn eru hvattir til þess að líta við í skáksalinn til að fá spennuna beint í æð og skeggræða stöður og gang mála. Í lokaumferðinni mætast í æsilegri toppbaráttu:

• Stefán Bergsson – Dagur Ragnarsson
• Hilmir Freyr Heimisson – Bragi Þorfinnsson

Nánari upplýsingar um úrslit og stöðu Skákþingsins, sem og aðgengi að skákum, má finna á Chess-Results.

Sjá nánar á heimasíðu TR.

 

• Heimasíða TR
• Chess-Results
• Beinar útsendingar (Chess24)

Hraðkvöld hjá Hugin í kvöld

Hraðkvöld Hugins verður mánudaginn 5. febrúar nk. og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur eða 5 mínútur + 3 sekúndur á hvern leik. Teflt er í félagsheimili Hugins í Álfabakka 14a í Mjóddinni. Hraðkvöldið verður reiknað til hraðskákstiga.

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþing Akureyrar: Kóngsindversk ský á himni

Það blésu hvassir kóngsindverskir vindar um landsmenn í dag, bæði sunnan og norðan heiða. Við Eyjafjörð var háð fimmta umferð Skákþings Akureyrar og áttunda umferð Skákþings Reykjavíkur í fenjum syðra. Af norðanvígum er það að frétta að Símon Þórhallsson - sem í seinni tíð hefur tekið ástfóstri við ofangreinda varnaraðferð - missté sig illilega snemma í skák sinni við Sigurð Eiríksson og mátti játa sig sigraðan. Ástfóstur Rúnars Sigurpálssonar á téðri vörn á sér hinsvegar lengri sögu og varð honum ekki skotaskuld úr því að snúa henni í kóngssókn, þar sem hrókur, drottning og riddari surfu svo að kóngi Haraldar Haraldssonar að hann mátti gefast upp.  Fráfarandi meistari, Jón Kristinn Þorgeirsson, ákvað að leika kóngsindverskt stef á flautu sína í þetta sinn og grípur hann þó sjaldan til þess ráðs. Það reyndist honum heldur ekki vel í þetta sinn; fékk þrönga stöðu og lagði fullmikið á hana.  Reyndist andstæðingur hans, Andri Freyr Björgvinsson, eiga allskostar við meistara fyrra árs, þvældi honum í erfitt hróksendatafl sem reyndist Jóni tapað. Var þetta önnur tapskák hans í röð og því ljóst að hann hreppir ekki hinn eftirsóknarverða titil í þetta sinn. Jón hefur þrjá vinninga og á einni skák ólokið, en framar honum eru þeir Andri Freyr með fjóra og Rúnar með þrjá og hálfan og eiga báðir tvær skákir eftir, m.a. innbyrðis skák, sem háð verður næsta sunnudag þegar næstsíðasta umferð verður tefld. Þá eigast líka við þeir Símon og Haraldur og Benedikt og Sigurður. Eru þeir allir miklir vígamenn.

Sjá stöðuna og öll úrslit á Chess-results

Úr Reykjavíkurhreppi er það að frétta að Stefáni félaga vorum brást Kóngsindverjinn í þetta sinn og beið ósigur fyrir Braga Þorfinnssyni alþjóðlegum meistara. Hefur Stefán nú vinningsforskot fyrir síðustu umferð og munu fáir frýja honum vopnfimi í lokasennunni. Það gerum við norðanmenn í það minnsta ekki. 

Heimaaíða SA

Skákþáttur Morgunblaðsins: Heimsmeistarinn lék af sér manni en vann samt!

Hjörvar Steinn Grétarsson, Björgvin Jónsson og Halldór Grétar Einarsson eru efstir eftir þrjár umferðir í A-flokki skákhátíðar MótX en í 3. umferð bar helst til tíðinda að Jóhann Hjartarson tapaði fyrir Björgvini Jónssyni en í vinningsstöðu var hann sleginn heiftarlegri skákblindu. Hjörvar Steinn tók ½ vinnings yfirsetu.

Í B-flokki er einn efstur Gauti Páll Jónsson með 3 vinninga en hjá „Hvítum hröfnum“ hefur Bragi Halldórsson tekið forystu með því að vinna tvær fyrstu skákir sínar.

Á Skákþingi Reykjavíkur eru tefldar tvær skákir í viku og hefur Stefán Bergsson tekið forystu og unnið allar fimm fyrstu skákir sínar. Í 2.-5. sæti með 4 vinninga koma svo Hilmir Freyr Heimisson, Björn Hólm Birkisson, Hrafn Loftsson og Gauti Páll Jónsson.

Stefán mætti Hilmi Frey í fjórðu umferð og hafði sigur með skemmtilegri fléttu. En áður hafði Hilmir Freyr misst af góðum færum:

Skákþing Reykjavíkur 2018:

Hilmir Freyr Heimisson – Stefán Bergsson

Reti-byrjun

1. Rf3 d5 2. g3 Rf6 3. Bg2 Bg4 4. O-O Rbd7 5. d4 e6 6. Rbd2 Bd6 7. He1 c5 8. c4 cxd4 9. cxd5 exd5 10. Rxd4 O-O 11. h3 Bh5 12. Rf5 Bc5 13. Rb3 Bb6 14. Bxd5 R5 15. Bf4

Flækir taflið að óþörfu. Eftir 15. Bxb7 hefur hvítur yfirburðastöðu.

15. ... Dd7! 16. Rxg7! Kxg7 17. Bxe5 Df5!

Skemmtilegar vendingar en hvíta staðan er aðeins betri.

18. Bxf6 Dxf6 19. Hf1?

Öruggara var 19. Bf3.

19. ... Hfd8 20. Dd3 De5 21. e4 Hac8 22. Hab1??

Tapleikurinn. Hann varð að leika 22. g4 og staðan er í jafnvægi eftir 22. ... f5! 23. gxh5 fxe4 24. Dxe5 Hxd5 o.s.frv.

22. ... Be2!

Vinningsleikurinn. Hvíta drottningin verður að sleppa taki sínu á g3-peðinu.

23. Dxe2 Dxg3+ 24. Kh1 Dxh3+ 25. Kg1 Kh8 26. Bxf7 Hg8+

– og hvítur gafst upp. Hilmir lét ekki deigan síga því að í næstu umferð lagði sigraði hann næst stigahæsta keppandann, Einar Hjalta Jensson. 

„Magnús leikur af sér manni á nokkurra ára fresti“

Þetta var haft eftir öflugasta skákmanni Hollendinga, Anish Giri, þegar einni umtöluðustu skák síðari ára lauk í 8. umferð Tata Steel mótsins í Wijk aan Zee milli heimsmeistarans og Gawain Jones. Giri vísaði til þess að þegar hann tefldi við Magnús á þessum sama stað fyrir nokkrum árum lék Norðmaðurinn af sér manni snemma tafls og mátti leggja niður vopnin eftir aðeins 23 leiki. Í báðum tilvikum var riddari hvíts að vandræðast á g5. En sagan er ekki öll sögð þó að g5-riddarinn fyki út af borðinu:

 

Tata Steel 2018:

Magnús Carlsen – Gawain Jones

Staðan kom upp úr hinu þekkta „Dreka-afbrigði“ sikileyjarvarnar. Um þá byrjun hefur Gawain Jones skrifað tvær bækur. Nú lék hvítur:

17. g4??

Og svarið kom um hæl...

17. ... f4!

Og hvítur tapar manni.

Það sem á eftir kom var furðulegt, Magnús tefldi áfram eins og ekkert hefði í skorist og Gawain Jones lét hjá líða að loka línum á kóngsvæng. Við það vænkaðist hagur hvíts og að lokum hafði Magnús sigur sem ætti að gagnast vel í baráttunni um efsta sætið. Í gær hófst lokaspretturinn og þá var staða efstu manna þessi:

1. – 3. Magnús Carlsen, Mamedyarov, og Giri 7 v ( af 10 ) 4. Kramnik 6 ½ v. 5. Anand 6 v. 6. – 7. So og Karjakin 5 ½ v. 8. Svidler 4 ½ v. 9. – 12. Jones, Caruana, Matlakov og Wei Yi 4 v. 13. Adhiban 3 v.14. Hou Yifan 2 v.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 27. janúar 2018.

Skákþættir Morgunblaðsins

Vesturbæjarbiskupinn fer fram á miðvikudaginn - skráningu lýkur á miðnætti

Vesturbæjarbiskupinn fer fram 6. febrúar í Hagaskóla og hefst mótið 16:00. Mótið er ætlað nemendum á grunnskólaaldri. Tefldar verða sex umferðir með sjö mínútna umhugsunartíma. Veitt verða verðlaun í þremur flokkum sem sjá má með því að klikka á myndina á viðhengi sem fylgir. 

Mótið er haldið af Skákakademíu Reykjavíkur og Þjónustumiðstöð Vesturbæjar, Miðborgar og Hlíða með stuðningi frá Melabúðinni og Hagaskóla.  

Skráning er á skak.is og er skráningarfrestur til miðnættis 4. febrúar. 

Upplýsingar um þegar skráða keppendur má finna hér.

SÞR #7: Ekkert fær Stefán Bergsson stöðvað

Akreyríski aflraunamaðurinn, Stefán Steingrímur Bergsson, mætti til leiks vopnaður mannganginum og eigin hugviti gegn FIDE-meistaranum Sigurbirni Björnssyni. Stefán lagði til hliðar æsilega sóknartilburði og þróttmiklar fórnir, sem hafa verið hans aðalsmerki í gegnum tíðina, en greip þess í stað til fíngerðra peðsleikja og nákvæmra hrókaflutninga um gjörvallt taflborðið. Stefán herti tökin jafnt og þétt í endataflinu þar til staða Sigurbjörns var orðin erfið viðfangs. Erfitt er að benda á hvar Sigurbjörn fór út af sporinu enda má segja að tækni Stefáns í hróksendataflinu hafi daðrað við fullkomnun. Húsfyllirinn Stefán Bergsson er langefstur með tveggja vinninga forskot á keppinauta sína þegar tveimur umferðum er ólokið. Fær eitthvað stöðvað KA-manninn?

Bragi Þorfinnsson fann loks reitina sína aftur eftir nokkuð brokkgenga taflmennsku til þessa. Bragi stýrði hvítu mönnunum gegn Hrafni Loftssyni og einkenndust flestir leikir Braga af áræðni og ásetningi. Snemma tafls sótti á Braga mikil fórnsótt sem áhorfendum þótti óvíst að ætti sér lækningu. Bragi sá lengra en aðrir og mundaði sleggjuna í 19.leik sem skildi eftir djúpa dæld í miðborðinu:

Bragi Þorfinnsson lék 19.d4!! og áhorfendur tóku andköf.

Hrafn kallar ekki allt ömmu sína þegar kemur að erfiðum varnarleik og honum lánaðist að þvælast fyrir Braga og búa til möguleika á þráskák með því að opna taflið. Bragi sá hins vegar við öllu mótspili Hrafns og hafði sigur í afar skemmtilegri skák.

Þeir Vignir Vatnar Stefánsson og Dagur Ragnarsson hafa marga hildi háð við taflborðin í gegnum tíðina. Þeir mættust í spennandi skák í 7.umferðinni þar sem Dagur hafði betur eftir taktískan darraðardans. Þeir misstu báðir af vænlegum leiðum í skákinni. Degi yfirsást vinningsleið í þessari stöðu:

Í stað 35…Rg5! og svartur hefur auðunnið tafl þá lék Dagur 35…Rh6 og skyndilega, eftir uppskipti á g6, var það Vignir Vatnar sem átti skemmtilega leið til að snúa taflinu sér í vil:

Þó Guðsmenn kæri sig sjaldnast um að vera settir út í horn þá hefði þessi tiltekni biskup betur fórnað sér í hornið því eftir 37.Bh8!! hefði opnast hraðbraut fyrir hennar hátign að æðsta presti svarts. Vignir missti af þessum möguleika og Dagur slapp því fyrir horn og gat haldið áfram óáreittur að þrengja að Vigni á kóngsvængnum. Dagur vann skákina að lokum og er nú kominn í röð næstefstu manna með 5 vinninga.

Engin skák sveiflaðist meira en viðureign Einars Valdimarssonar og Lenku Ptacnikovu. Reyk lagði frá skákreiknum þegar þeir hömuðust við að meta stöðuna eftir hvern leik. Einar sem hafði hvítt var ítrekað hársbreidd frá því að máta Lenku en alltaf fann Lenka leik til að halda taflinu gangandi. Skákin þróaðist á þann veg að Einar fékk mun betra, var svo með unnið, þá aftur jafnt, aftur unnið á Einar, jafnt, betra á Lenku, unnið á Einar, kolunnið á Einar, næstum því mát, jafnt, betra á Lenku, unnið á Einar, kolunnið á Einar, jafnt, betra á Einar, betra á Lenku, jafnt, betra á Lenku, unnið á Lenku, kolunnið á Lenku og loks 0-1. Upplifun áhorfenda var svipuð því að fylgjast með borðtenniskúlu Forrest Gump; umtalsverð hætta á svimaköstum.

Það var gott að grípa í kökurnar hjá Birnu á milli leikja í skák Einars og Lenku því með tóman maga var ógjörningur að átta sig á hvað var að gerast.

Stefán Bergsson er sem fyrr segir efstur með 7 vinninga og nægir honum eitt jafntefli til þess að tryggja sér sigur í mótinu. Hvorki fleiri né færri en níu skákmenn sitja í 2.sæti með 5 vinninga og þurfa þeir að stóla á að Stefán misstígi sig í síðustu tveimur skákunum. Það kemur í hlut Braga að takast á við þá snúnu áskorun að setjast gegnt Stefáni Bergssyni í 8.umferð.

Að lokinni 7.umferð Skákþings Reykjavíkur liggur ljóst fyrir að mótið hefur alla burði til þess að skipa veigamikinn sess í skáksögubókunum. Ef sögukennarinn að norðan, Stefán Bergsson, heldur uppteknum hætti í lokaumferðunum tveimur verður mótsins ekki einungis getið í sögubókum heldur fær það sérstakan kapítula.

Skákáhugamenn munu vafalítið sitja á sætisbrúnunum á sunnudag er stund sannleikans rennur upp. Þá mætast Stefán og Bragi og fer klukkan í gang klukkan 13:00. Munið að spenna sætisólar.

Allir nánari upplýsingar um úrslit og stöðu, sem og innslegnar skákir, má nálgast á Chess-Results.

Sjá nánar á heimasíðu TR.

 

• Heimasíða TR
• Chess-Results
• Beinar útsendingar (Chess24)

Reykjavíkurmót grunnskólasveita hefst 12. febrúar með keppni 1.-3. bekkjar

Reykjavíkurmót grunnskólasveita hefst í húsnæði TR að Faxafeni 12 mánudaginn 12. febrúar kl. 16.30 með keppni 1.-3. bekkja. Mótið er sem fyrr samstarfsverkefni Skóla- og frístundasviðs Reykjavíkurborgar og Taflfélags Reykjavíkur. Mótinu verður skipt í þrennt að þessu sinni; 1.-3. bekkur, 4.-7. bekkur og 8.-10. bekkur.

Keppni 4.-7. bekkjar og 8.-10. bekkjar fer fram viku seinna, mánudaginn 19. febrúar.

Tefldar verða 7 umferðir með umhugsunartímanum 5 mínútur fyrir hverja skák og bætast 3 sekúndur við eftir hvern leik (5+3). Allir grunnskólar Reykjavíkurborgar eru hvattir til þess að senda skáksveitir í mótið. Engar takmarkanir eru á fjölda skáksveita og er skáksveitum hvers skóla styrkleikaraðað með bókstöfum (a-sveit, b-sveit, c-sveit og svo framvegis). Í hverri skáksveit tefla 4 keppendur og má hver sveit hafa 0-2 varamenn. Keppanda er heimilt að tefla í eldri flokki en aldur hans segir til um, en þó má einungis tefla í einum flokki (sem dæmi þá má keppandi í 3.bekk tefla í flokki 4.-7.bekkjar, en hann getur þá ekki teflt í flokki 1.-3.bekkjar). Mikilvægt er að liðsstjóri fylgi liðum hvers skóla og er æskilegt að hver liðsstjóri stýri ekki fleiri en þremur liðum.

Dagskrá keppninnar:

• Mánudagur 12.febrúar kl.16:30-19:00; 1.-3.bekkur.

• Mánudagur 19.febrúar kl.16:30-19:00; 4.-7.bekkur.
• Mánudagur 19.febrúar kl.19:30-22:00; 8.-10.bekkur.

Veitt verða verðlaun fyrir þrjú efstu sætin í hverjum flokki. Einnig fær efsta stúlknasveit hvers flokks verðlaun.

Skráning fer fram í gegnum skráningarform sem finna má í gula kassanum á skak.is. Skráningu í  mót 1.-3.bekkjar lýkur sunnudaginn 11.febrúar klukkan 21:00. Skráningu í hin tvö mótin lýkur sunnudaginn 18.febrúar klukkan 21:00. Ekki verður hægt að skrá lið á mótsstað. Hér má fylgjast með skráningunni.

GAMMA Reykjavíkurskákmótið - minningarmót um Bobby Fischer hefst 6. mars

GAMMA Reykjavíkurskákmótið 2018 fer fram í Hörpu dagana 6.-14. mars nk. Mótið að þessu sinni er einnig minningarmót um Bobby Fischer en 9. mars nk. verða 75 ár liðin frá fæðingu ellefta heimsmeistarans í skák.

Í tilefni þess verður mótið einkar veglegt í ár. Ber þar hæst að þann 9. mars verður frídagur á sjálfu mótinu og verður þá teflt Fischer-slembi skákmót sem verður jafnframt fyrsta slíka Evrópumótið. Flestir sterkustu skákmenn sjálfs Reykjavíkurmótsins ætla einnig að taka þátt í því. Manngangurinn er sá sami en mögulegar upphafsstöður eru 960. Jafnframt verður sýning til heiðurs Fischer í Hörpu, hádegisfyrirlestrar tileinkaðir meistaranum og boðið upp á ferðir þar sem slóðir honum tengdar sýndar. Upplýsingar um sérviðburði má finna hér.

Um 200 keppendur eru þegar skráðir til leiks á mótið og þar af um 25 stórmeistarar. Þeirra stigahæstur er úkraínski ofurstórmeistarinn Pavel Eljavov sem hefur 2711 skákstig.  Meðal annarra keppenda má nefna Gata Kamsky fyrrum áskorenda Karpovs um heimsmeistaratitilinn, Indverjann sterka Baskaran Adhiban. Fyrrum sigurvegarar láta sig ekki vanta má þar nefna Indverjann Abhijeet Gupta og Hollendinginn Erwin L´Ami.  

Kvennahersveitin svipa meðal annars Sabina-Francesca Foisor, sem var bandarískur meistari í hitteðfyrra og löndu hennar Tatev Abrahamyan og Alinu L´Ami eiginkonu Erwins. Laura Unuk, frá Slóvakíu, heimsmeistari stúlkna undir 18 er meðal keppenda.

Ávallt hefur verið lögð á undrabörn og er þar engin undantekning núna.  Yngsti stórmeistari heims, Nodirbek Abdusattorv frá Úsbekistan teflir í fyrsta sinn. Hann er næstyngsti stórmeistari skáksögunnar. Aðeins Sergei Karjakin, síðasti áskorendi Magnúsar Carlsen, hefur orðið stórmeistari yngri. Indversku undradrengirnir Pragganandhaa og Nihal Sarin, sem slógu eftirminnilega í gegn í fyrra, eru meðal keppenda aftur í ár.  Sá fyrrnefndi hefur möguleika á að verða yngsti stórmeistari skáksögunnar.

Enn er nokkur spennandi boð útistandandi og á eiga mótshaldarar von á því að afar spennandi keppendur bætist við á keppendalistann á komandi vikum.

 

Heimavarnarlið íslenskra stórmeistara skipa sem stendur Hannes Hlífar Stefánsson og Þröstur Þórhallsson. Án efa á eftir fjölga í þeim hópi enda taka iðulega nánast allir sterkustu virku skákmenn landsins þátt í Reykjavíkurskákmótinu.

Mótið er afar mikilvægt fyrir íslenskt skáklíf og hefur verið flaggskip þess síðan framsýnir menn héldu fyrsta Reykjavíkurskákmótið í Lídó árið 1964. Mótið er afar vinsælt og hátt skrifað út í hinum stóra heimi og hefur síðustu ár lent í 2.-4. sæti yfir besta opna skákmót heims í vali atvinnuskákmanna.

Skráning fer fram á Skák.is (guli kassinn efst). Upplýsingar um þátttökugjöld má finna hér. Athugið að Íslendingar fá evruna á 100 kr., þ.e. hægt er að margfalda evruþátttökugjöldin með 100 kr. og leggja inn á 101-26-12763, kt. 580269-5409. Hægt er að senda fyrirspurnir um þátttökugjöld í netfangið [e-mail]

Heimasíða mótsins

 

Aronian sigurvegari í Gíbraltar eftir úrslitakeppni

Armeninn Levon Aronian (2797) sigraði á alþjóðlega mótinu í Gíbraltar sem lauk í í gær. Pia Cramling, sem er 54 ára, kom sá á sigraði í kvennaflokki, og sló við mörgum mun yngri og stigahærri skákkonum. 

Sjö skákmenn komu jafnir í mark á mótinu með 7,5 vinninga. Reglur mótsins eru þannig að fjórir hæstir efstir stigaútreikning mundu þá keppa til úrslita með styttri umhugsunartíma. Þar voru á ferðinni auk Aronian þeir Nakamura (2781), Rapport (2700) og MVL (2793). Aronian vann Rapport í undanúrslitum og svo MVL í úrslitum.

Mynd: Maria Emelianova/Chess.com 

Nánar á Chess.com.

Guðmundur sigraði á alþjóðlegu móti í Brasilíu

Guðmundur Kjartansson (2438) sigraði á alþjóðulegu móti sem er nýlokið í Florianpolis í Brasilíu. Guðmundur hlaut 6½ í 9 skákum. Gummi var stigahæstur keppenda. Frammistaðan samsvaraði 2400 skákstigum og lækkar hann um 3 stig.

Guðmundur heldur nú til Úrugvæ þar sem hann teflir í alþjóðlegu móti sem hefst í dag.

Nánar á Chess-Results.