Toyota skákmótið fer fram í dag

Hið árlega Toyota-skákmót verður haldið í höfuðstöðvum Toyota föstudaginn 2. febrúar. Tefldar verða 9 umferðir með 10 mínútna umhugsunartíma. Keppnin byrjar stundvíslega kl. 13. Keppt er um farandbikar og fjölda annarra verðlauna, sem allar eru gefnar af Toyota. Allir eldri skákmenn velkomnir á meðan húsrúm leyfir. Karlar 60+ og konur 50+.

Æsir skákfélag eldri borgara í Stangarhyl 4 sér um framkvæmd og stjórn mótsins. Væntanlegir keppendur eru vinsamlega beðnir að forskrá sig hjá Finni Kr. í síma 893 1238 eða í netfangið [e-mail] eða hjá Garðari í síma 898 4805 eða í netfangið [e-mail].

Vopnaglamm og viðsjár miklar í fjórðu umferð Skákhátíðar MótX

Fjórða umferð Skákhátíðar MótX var tefld þriðjudagskvöldið 30. janúar. Skákmenn kepptust við að þjarma hver að öðrum strax í byrjun með heimabrugguðum launráðum, fylkingum laust saman og vopnabrak mikið dundi um valinn. Svo mikið gekk á að leikjum var víxlað og ólöglegir leikir spruttu úr krumlum ráðvöndustu manna.

A flokkur

 

Efstir fyrir umferðina voru kempurnar Hjörvar Steinn Grétarsson, Björgvin Jónsson og Halldór Grétar Einarsson með tvo og hálfan vinning hver. Hjörvar Steinn sat yfir í fjórðu umferðinni en á efsta borði mættust forystusauðirnir Björgvin Jónsson og Halldór Grétar. Björgvin kom afar vel undirbúinn til leiks eins og hans er háttur, þann veg að Halldór Grétar, sem hafði leikið á als oddi á Skákhátíðinni fram að þessu, var skotinn niður með þeirri tegund lásboga er rýfur hverja brynvörn.

Á öðru borði mætti stórmeistarahrellirinn Þorsteinn Þorsteinsson Jóhanni Hjartarsyni. Úr varð hörkuskák þar sem allt virtist stefna í jafntefli þegar Þorsteinn hleypti taflinu upp á drottningarvæng. Reyndist upphlaup það feigðarflan hið mesta og laut hinn öflugi kappi Þorsteinn í dúk með brotinn boga og brostinn streng.

Þröstur Þórhallsson lagði Björn Þorfinnsson í vel útfærðri skák þar sem Þröstur fann réttu leiðina í vandasömu drottningarendatafli. Jón L var lengi vel með mun betra gegn Erni Leó og líklegast unnið á einhverjum stað en arnarljónið unga varðist af grimmd og hélt jöfnu. Meistarabaninn Baldur Kristinsson hélt uppteknum hætti og lagði hinn firnasterka fidemeistara Magnús Örn.

Mest gekk á í skák Huginskappanna Ingvars Þórs Jóhannessonar og Kristján Eðvarðssonar sem breyttist í örleikrit þegar á því harðasta stóð. Rétt eftir að Kristján lék jafnteflisstöðu niður í tapað tafl, henti það Ingvar Þór að leika ólöglegum leik. Gefum Ingvari orðið: „Ég veit ekki hvað ég hef teflt margar kappskákir, örugglega yfir 1.000, en þetta er í fyrsta skipti sem ég leik ólöglegum leik. Til að toppa þvæluna hefði ég getað verið sjúklega óheppinn. Ef það hefði ekki verið peð á f4, hefði ég orðið að bera drottninguna fyrir – snertur maður hreyfður! Þá hefði ég tapað „on the spot“ eins og maður segir. Það hefði nú verið meiri sagan!“

Önnur úrslit voru þau að Vignir Vatnar lagði félaga sinn úr TR, Benedikt Jónasson, sem var funheitur á Gestamótinu í fyrra en hefur ekki verið sjálfum sér líkur á þessu móti. Annað öflugt TR tvíeyki tókst á þar sem Daði Ómarsson lagði félaga sinn Bárð Örn Birkisson. Lenka náði loks vopnum sínum gegn Degi Ragnarssyni en Guðmundur Halldórsson og Oliver Jóhannesson skildu jafnir.

A-flokkur hjá Chess-Results

Stórmeistararimmur í 5. umferð

Alþjóðlegi meistarinn lögvísi, Björgvin Jónsson, er einn efstur að fjórum umferðum loknum með þrjá og hálfan vinning. Í humáttina koma tveir lögfróðir stórmeistarar og einn fasteignasérfræðingur: Jóhann Hjartarson, Hjörvar Steinn Grétarsson og Þröstur Þórhallsson með þrjá vinninga hver. Þriðjudaginn 6. febrúar kl. 19.30 verður baráttunni haldið áfram. Björgvin situr yfir en tveimur efstu borðum verður stórmeistaraslagur af bestu gerð. Jóhann Hjartarson hefur hvítt á móti Hjörvari Steini og Hannes Hlífar, nýkominn að utan, stýrir hvítu mönnunum gegn Þresti Þórhallssyni. 

Hvítir hrafnar

Þriðja umferð Hvítra hrafna var tefld 30. jan. Jónas Þorvaldsson lagði Björn Halldórsson með snaggaralegri kóngssókn, Friðrik Ólafsson og Bragi Halldórsson sættust á skiptan hlut eftir skammvinn vopnaviðskipti og Jón Þorvaldsson lét sverfa til stáls gegn Júlíusi Friðjónssyni sem hélt jöfnu á ystu nöf í langri skák.

Í fjórðu umferð Hvítra hrafna 6. feb. hefur Jónas Þorvaldsson hvítt gegn Friðriki Ólafssyni, Björn Halldórsson stýrir hvítum mönnunum gegn Júlíusi Friðjónssyni og Bragi Halldórsson hefur hvítt gegn Jóni Þorvaldssyni.

Hvítir hrafnar hjá Chess-Results 

B flokkur

Gauti Páll hélt sínu striki og vann núna Aron Þór Mai. Er með hreint borð, kominn með vinningsforskot og þar að auki búinn að tefla við þann sem er í öðru sæti. Í öðru sæti er Siguringi Sigurjóns sem vann góðan sigur með svörtu á móti hinum efnilega Hilmi Frey Heimissyni. Jafnir Siguringa eru svo tveir efnilegir Breiðablikspiltar þeir Birkir Ísak og Stephan Briem. Birkir Ísak vann Kristján Örn Elíasson örugglega í fjórðu umferð, en Stephan sat yfir í skólabúðunum að Laugum í Sælingsdal.

Í B-flokknum keppa Blikar um Unglingameistaratitil Breiðabliks. Birkir Ísak vann 2014-15 en Stephan er núverandi meistari. Þeir tefla saman í næstu umferð og gæti sú skák gefið vísbendingu um næsta meistara. Annar hluthafi í öðru sætinu er Agnar Tómas Möller sem vann Óskar Long.

B-flokkur hjá Chess-Results

 

Nánar á Skákhuganum. 

• Heimasíða Hugsins
• Chess-Results

 

Reykjavík Puffins töpuðu með minnsta mun

 

 

 

 

 

 

 

 

 

 

Eftir sterka byrjun í PRO Chess League þar sem jafntefli náðist við franska ofursveit í 1.umferð og hinir bresku London Towers voru lagðir í valinn í 2. umferð kom loks að tapi hjá Puffins.

Tap með minnsta mun varð niðurstaðan gegn slóvensku skjaldbökunum í Ljubljana Turtles. Sú sveit var mjög sterk og þétt en það var þó aðallega hjálp úr óvæntri átt á 4. borði þar sem þeirra stigalægsti maður, Luka Skkuhala, með aðeins 2114 stig var taplaus og með 2,5 vinning af 4.

Turtles byrjuðu betur og unnu 1,5-2,5 í fyrstu umferðinni og leiddu framan af. Stórskotahríð í þriðju umferð og mikill seiglusigur Jóhanns gegn Luca Lenic á 1. borði færði Puffins forystu 6.5-5.5 og viðureignin leit gríðarlega vel út.

Í síðustu umferðinni gekk hinsvegar allt á afturfótunum. Puffins þurftu aðeins 1,5 vinning til að tryggja allavega jafntefli. Jóhann hinsvegar lék snemma skelfilega af sér og leikar orðnir jafnir. Þvínæst var ljóst að Lenic stóð til vinnings gegn Hjörvari. Þröstur og Björn stóðu hinsvegar báðir betur en erfitt var að komast áfram. Báðir gerðu á endanum jafntefli og svekkjandi tap með minnsta mun niðurstaðan. Björn hefði mögulega getað "siglt þessu heim" í enn eitt skiptið ef hann hefði fundið mjög flókna tölvulínu en það hefði líklega verið of ómennskt til að vera möguleiki.

Öll úrslit er hægt að sjá á Prochessleague.com

Viðureignir Puffins eru alltaf sendar út með skýringum á Twitch.tv/reykjavikpuffins

 

Hægt er að sjá alla viðureign gærdagsins hér:

 

Einstaklingsúrslit:

Smári og Tómas sigruðu í undanriðlum Skákþings Hugins (N)

Riðlakeppni Skákþings Hugins í Þingeyjarsýslu er lokið. 11 skákmenn taka þátt í mótinu og er það teflt í tveimur riðlum, flippsturluðum austurriðli (teflt á Húsavík) og flippflennifínum vesturriðli (teflt á Vöglum).

Flippsturlaður austurrilill

Í austurriðli eru 6 keppendur sem tefla allir við alla. Smári Sigurðsson og Sigurður Daníelssonenduðu efstir og jafnir með 4 vinninga af 5 mögulegum, en Smári er sjónarmun á undan þar sem hann hafði betur í innbyrðisviðureign þeirra félaga. Sigurður Daníelsson er því í öðru sæti og Ævar Ákason í þriðja sæti með 3 vinninga. 

Skoða má stöðuna í austurriðli hér.

Flippflennifínn vesturriðill

Í vesturriðli, sem er tefldur á Vöglum í Fnjóskadal, eru fimm keppendur.

Tómas Veigar Sigurðarson lagði alla andstæðinga sína og er því efstur. Rúnar Ísleifsson er í 2. sæti með 3 vinninga og Ármann Olgeirsson og Hermann Aðalsteinsson eru jafnir í 3.-4. sæti með 1,5 vinning. Ármann er sjónarmun á undan og teflir því um 5.-6. sætið í úrslitakeppninni.

Skoða má stöðuna í vesturriðli hér.

Sprúðlandi úrslitakeppni

Úrslitakeppni Skákþingsins fer fram á næstu vikum. Hún fer þannig fram að sigurvegarar riðlanna tefla um 1. og 2. sætið o.s.frv.

1.-2.	Tómas Veigar Sigurðarson	Smári Sigurðsson
3.-4.	Rúnar Ísleifsson	Sigurður Daníelsson
5.-6.	Ármann Olgeirsson	Ævar Ákason
7.-8.	Hermann Aðalsteinsson	Hlynur Snær Viðarsson
9.-10.	Sigurbjörn Ásmundsson	Sighvatur Karlsson
11.-12.		Kristján Ingi Smárason

 

Sprúðlandi úrslitakeppnin hjá Chess-Results

Vigfús sigraði á hraðkvöld Hugins

Vigfús Ó. Vigfússon sigraði á hraðkvöldi Hugins sem fram fór 29. janúar sl. Vigfús fékk 6,5v í sjö skákum og kom jafnteflið lokaumferðinni í skák við Hörð Jónasson. Hörður varðist fimlega í erfiðri stöðu í miðtaflinu og með verri tíma. Hann hélt stöðu sinn samt saman og möguleikum opnum og var kominn með yfirhöndina í endataflinu þegar jafntefli var samið í tímahraki. Þessi skák var síðust til að ljúka. Næstir komu Gunnar Nikulásson og Hjálmar Sigurvaldason með 5v og var Gunnar hærri á stigum og hlaut annað sætið og Hjálmar það þriðja. Reyndar hafði Gunnar möguleika á sigri fram í síðustu umferð ef hún hefði teflst honum í hag. Tap í lokaumferðinni gegn Oddi Tómasi Oddssyni í lokaumferðinni lokaði þeim möguleika. Oddur Tómas var þarna á sínu fyrsta hraðkvöldi og óx ásmegin með hverri umferð.

Tölvan dró töluna 5 í happdrættinu sem var tala hins heppna Sigurðar Freys Jónatansson sem dráttarvélin á randaom.org hefur mikið dálæti á. Vigfús og Sigurður voru sammála í vali á verðlaunum og tóku báðir miða frá Saffran. Næsta skákkvöld verður mánudaginn 26. febrúar og þá verður atkvöld.

Lokastaðan á hraðkvöldinu:

1. Vigfús Ó. Vigfússon, 6,5v/7
2. Gunnar Nikulásson, 5v
3. Hjálmar Sigurvaldason, 5v
4. Hörður Jónasson, 3,5v
5. Sigurður Freyr Jónatansson, 3,5v
6. Björgvin Kristbergsson, 3v
7. Pétur Jóhannesson, 1,5v
8. Batel Goitom Haile, 1v

Lokastaðan í chess-results:

Toyota-skákmótið fer fram á morgun

Hið árlega Toyota-skákmót verður haldið í höfuðstöðvum Toyota föstudaginn 2. febrúar. Tefldar verða 9 umferðir með 10 mínútna umhugsunartíma. Keppnin byrjar stundvíslega kl. 13. Keppt er um farandbikar og fjölda annarra verðlauna, sem allar eru gefnar af Toyota. Allir eldri skákmenn velkomnir á meðan húsrúm leyfir. Karlar 60+ og konur 50+.

Æsir skákfélag eldri borgara í Stangarhyl 4 sér um framkvæmd og stjórn mótsins. Væntanlegir keppendur eru vinsamlega beðnir að forskrá sig hjá Finni Kr. í síma 893 1238 eða í netfangið [e-mail] eða hjá Garðari í síma 898 4805 eða í netfangið [e-mail].

Lundarnir fá Slóvenska sveit í þriðju umferð PRO Chess League

Í kvöld klukkan 19:25 hefst 3. umferð í PRO Chess League. Umferðin sjálf hefst í raun fyrr um daginn en viðureign Reykjavik Puffins og Ljubljana Turtles hefst á slaginu 19:25 á Chess.com.

Í síðustu viku unnu Lundarnir feykisterkan sigur á sveit frá London en vikuna þar áður gerðu Lundarnir jafntefli við Marseille Migraines með Maxime Vachier-Lagrave í broddy fylkingar.

Ljublana Turtles liðið er leitt af enska stórmeistaranum Luca Lenic sem er 1. borðsmaður Slóvena. Í raun er kjarninn í liðinu í landsliði Slóvena og því við ramman reip að draga. Sveitin er frekar stigahá en ungur drengur með 2114 stig er á síðasta borði. Sá hefur hinsvegar halað inn vinningum og því ljóst að verkefni er ærið!

Lið Lundana að þessu sinni skipa:

GM Hjörvar Steinn Grétarsson (2567), GM Jóhann Hjartarson (2539), GM Þröstur Þórhallsson (2420) og IM Björn Þorfinnsson (2398).

Allir tefla við alla á fjórum borðum og því 16 vinningar í boði. Búast má við jöfnum og spennandi match.

Hægt verður að fylgjast með skákunum og Chess.com en við mælum með því að kíkja á beina útsendingu Puffins í umsjón FM Ingvars Þórs Jóhannessonar sem verður hér: http://www.twitch.tv/reykjavikpuffins

Heimasíða PRO Chess League

Útsending Chess.com

Ný alþjóðleg skákstig

Ný alþjóðleg skákstig eru komin út og taka þau gildi á morgun, 1. febrúar. Héðinn Steingrímsson (2574) er sem fyrr stigahæsti skákmaður landsins. Stefán Már Pétursson er stigahæsti nýliðinn og reyndar sá eini. Benedikt Þórisson hækkar langmest frá janúar-listanum á stigum.

Topp 20

Litlar breytingar eru á stigalistanum nú enda skiluðu aðeins eitt innlent kappskákmót reiknað til stiga að þessu sinni. Miklu meira fjór verður á mars-listanum þegar Skákhátíð MótX, Skákþing Reykjavíkur, Skákþing Akureyrar og Meistarmót Hugins (N) verða öll reiknuð. Aðeins þrír skákmenn á topp 20 átta reiknaða skák í janúar og er röð efstu manna óbreytt frá því sem verið hefur. Héðinn Steingrímsson (2574), Hjörvar Steinn Grétarsson (2565) og Jóhann Hjartarson (2536) eru í efstu sætunum. 

No.	Name	Tit	feb.18	Diff	Gms
1	Steingrimsson, Hedinn	GM	2574	0	0
2	Gretarsson, Hjorvar Steinn	GM	2565	0	0
3	Hjartarson, Johann	GM	2536	0	0
4	Stefansson, Hannes	GM	2525	2	17
5	Olafsson, Helgi	GM	2508	0	0
6	Petursson, Margeir	GM	2499	0	0
7	Danielsen, Henrik	GM	2497	1	3
8	Gunnarsson, Jon Viktor	IM	2466	0	0
9	Arnason, Jon L	GM	2457	0	0
10	Kristjansson, Stefan	GM	2447	0	0
11	Kjartansson, Gudmundur	IM	2441	3	9
12	Gretarsson, Helgi Ass	GM	2441	0	0
13	Gunnarsson, Arnar	IM	2428	0	0
14	Thorfinnsson, Bragi	IM	2426	0	0
15	Thorsteins, Karl	IM	2426	0	0
16	Thorhallsson, Throstur	GM	2418	0	0
17	Kjartansson, David	FM	2409	0	0
18	Thorfinnsson, Bjorn	IM	2400	0	0
19	Ulfarsson, Magnus Orn	FM	2371	0	0
20	Arngrimsson, Dagur	IM	2370	0	0

Nýliðinn

Aðeins einn nýliði er á listanum að þessu sinni. Þar er á ferðinni enginn annar en Stefán Már Pétursson (1698), faðir Vignirs Vatnars. 

No.	Name	Tit	feb.18	Diff	Gms
1	Petursson, Stefan Mar		1698	1698	13

Mestu hækkanir

Benedikt Þórisson (+92) hækkaði langmest á milli janúar og febrúar listans eftir frábæra frammistöðu á Rilton Cup eins og lesa má um á heimasíðu TR. Í næstu sætum eru Birkir Ísak Jóhannsson (+37) og Bárður Örn Birkisson (+36) sem báðir stóðu sig afskaplega vel á minningarmótinu um Steinþór Baldursson. 

No.	Name	Tit	feb.18	Diff	Gms
1	Thorisson, Benedikt		1235	92	7
2	Johannsson, Birkir Isak		1797	37	7
3	Birkisson, Bardur Orn	CM	2226	36	7
4	Thorhallsson, Simon		2064	24	7
5	Davidsson, Oskar Vikingur		1871	17	7
6	Ottarsson, Tryggvi		1600	17	1
7	Briem, Benedikt		1481	17	6
8	Stefansson, Vignir Vatnar	FM	2320	16	9
9	Thor, Gudmundur Sverrir		2041	13	1
10	Thorarinsson, Pall A.	FM	2287	12	2

Stigahæstu ungmenni landsins (u20)

Vignir Vatnar Stefánsson (2320) endurheimti toppsætið á ungmennalistanum eftir smáfjarveru af toppnum. Jón Kristinn Þorgeirsson (23199 hefur aðeins einu stigi minna. Þriðji er Oliver Aron Jóhannesson (2263). Alexander Oliver Mai (1981) kemst í fyrsta skipti inn á topp 10.

No.	Name	Tit	feb.18	Diff	Gms	B-day
1	Stefansson, Vignir Vatnar	FM	2320	16	9	2003
2	Thorgeirsson, Jon Kristinn	FM	2319	0	0	1999
3	Johannesson, Oliver	FM	2263	-14	6	1998
4	Birkisson, Bardur Orn	CM	2226	36	7	2000
5	Jonsson, Gauti Pall		2160	-1	6	1999
6	Heimisson, Hilmir Freyr	CM	2136	0	0	2001
7	Thorhallsson, Simon		2064	24	7	1999
8	Birkisson, Bjorn Holm		2046	-38	7	2000
9	Mai, Alexander Oliver		1981	11	7	2003
10	Davidsdottir, Nansy		1975	0	0	2002

Reiknuð skákmót

Aðeins eitt innlent kappskákmót var reikað til stiga nú. Hraðskámótin voru hins vegar allnokkur. Það er ánægjulegt að sjá hversu dugleg íslensku félögin eru að senda mót inn til stiga. 

• Minningarmót um Steinþór Baldursson (kappskák)
• Hraðskákmótaröð TR I (hraðskák)
• Nýársmót Vinaskákfélagsins (hraðskák)
• Atkvöld Hugins (at- og hraðskák)
• Hraðkvöld Hugins (hraðskák)
• TR laugardagsmót I, II og III (hraðskák)
• Friðriksmót Vinaskákfélagsins (hraðskák)

Heimslistinn

Magnus Carlsen (2843) er venju samkvæmt stigahæsti skákmaður heims. Í næstu sætum er Shakhriyar Mamedyarov (2814) og Vladimir Kramnik (2800).

Topp 100 má nálgast hér. 

Meðfylgjandi er listinn yfir virka íslenska skákmenn í heild sinni. 

Skrár tengdar þessari bloggfærslu:

• Alþjóðleg skákstig, 1.febrúar 2018

Íslandsmót barnaskólasveita (1.-3. bekkur) fer fram 24. febrúar

Íslandsmót barnaskólasveita 1.-3. bekk 2018 fer fram í Rimaskóla, laugardaginn 24. febrúar nk.  

Tefldar verða sjö umferðir eftir svissneska kerfinu. Umhugsunartími 8+2 á hvern keppenda. Mótið hefst kl. 11 og áætlað er að því ljúki með verðlaunaafhendingu um kl. 14. Stutt hlé verður tekið um 12:30 til að keppendur geti fengið sér næringu.  

Hver skóli getur sent fleiri en eina sveit - en hver sveit er skipuð fjórum nemendum 1.-3. bekkjar (auk allt að fjögurra varamanna). 

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla. 

Veitt verða verðlaun fyrir efstu þrjár sveitirnar og einnig efstu b-e sveitir. Einnig borðaverðlaun fyrir bestan árangur á 1.-4. borði. 

Núverandi Íslandsmeistari barnaskólasveita (1.-3. bekkur) er Vatnsendaskóli. Nánar um mótið í fyrra hér.

Skráning fer fram á Skák.is (guli kassinn efst). Skráningu lýkur á hádegi (12:00), föstudaginn 23. febrúar.

Upplýsingar um þegar skráðar sveitir má finna hér.

Líf og fjör á Friðriksmóti Vinaskákfélagsins

Það var líf og fjör þegar skákmenn komu til leiks á Friðriksmót Vinaskákfélagsins sem var haldið mánudaginn 29 janúar kl: 13, í Vin að Hverfisgötu 47.

Mótið er haldið vegna afmæli Friðriks Ólafsson fyrsta stórmeistara Íslands, en hann átti afmæli 26 janúar og var 83 ára þá.

Tefldar voru 6 umferðir með 7 mínútur á skák. Skákstjóri var Hörður Jónasson og var mótið reiknað til hraðskákstiga.

Meðal skákmanna var afmælisbarnið Björgvin Kristbergsson sem varð 55 ára þennan dag. Ennfremur var gaman að geta þess að skákmaðurinn og skákrithöfundurinn Gunnar Örn Haraldsson sem skrifaði skákbókina um Karpov, tefldi á mótinu.

Í tilefni dagsins þá gaf Bókasafn Vinaskákfélagsins Björvini bókina um Karpov sem höfundurinn áritaði hana með gleði.

En aftur að mótinu. Róbert Lagerman sigraði mótið með fullu húsi eða 6 vinningum, en hann gaf svo afmælisbarninu Björgvini bikarinn og fór hann glaður heim á leið með skákbók og bikar.

Í öðru sæti varð Arnljótur Sigurðsson með 4,5 vinninga og í þriðja sæti var Jóhann Valdimarsson með 4 vinninga. Eftir mótið var boðið upp á kaffi og vöfflur að hætti Inga Hans og var góður rómur gerður að veitingunum. Héldu allir heim á leið mettir og glaðir, þrátt fyrir misjafnt gengi.

Sjá úrslit hér: Chess-Results

Nánar á heimasíðu Vinaskákfélagsins