Vesturbæjarbiskupinn fer fram á þriðjudaginn

Vesturbæjarbiskupinn fer fram 6. febrúar í Hagaskóla og hefst mótið 16:00. Mótið er ætlað nemendum á grunnskólaaldri. Tefldar verða sex umferðir með sjö mínútna umhugsunartíma. Veitt verða verðlaun í þremur flokkum sem sjá má með því að klikka á myndina á viðhengi sem fylgir. 

Mótið er haldið af Skákakademíu Reykjavíkur og Þjónustumiðstöð Vesturbæjar, Miðborgar og Hlíða með stuðningi frá Melabúðinni og Hagaskóla.  

Skráning er á skak.is og er skráningarfrestur til miðnættis 4. febrúar. 

Upplýsingar um þegar skráða keppendur má finna hér.

Skrár tengdar þessari bloggfærslu:

• biskup_2018.pdf

160 krakkar tóku þátt í fjöltefli í Vatnsendaskóla

Föstudaginn 26. janúar var skákdagurinn í tilefni af afmæli Friðriks Ólafssonar fyrsta stórmeistara í skák hadlinn. Í tengslum við það var fjöltefli í Vatnsendaskóla. Metþátttaka var hjá nemendum og fengum við Birkir Karl Sigurðsson skákmeistara til að tefla fjöltefli við nemendur. Birkir Karl telfdi við 160 nemendur og stóð hann vaktina í 4 klukkutíma.

Við þökkum Birki kærlega fyrir skemmtilega heimsókn í Vatnsendaskóla.

Myndir á Facebook-síðu skólans. 

Vignir Vatnar sigurvegari á fyrsta móti Hraðskákmótaraðar TR

Á sjálfum skákdeginum, afmælisdegi Friðriks Ólafssonar, fór fram fyrsta mótið í Hraðskákmótaröð TR sem er nýtt mót í fjölbreyttri mótaflóru Taflfélagsins. 15 vaskir skákgarpar mættu, sumir að tefla fjórða daginn í röð, enda eru Skákþing Reykjavíkur og MótX mótið í gangi, auk þess sem Íslandsmótið í Fischer random fór fram daginn áður. Þetta eru sterk mót, 2000+, en það er líka nóg að hafa einhvern tíman á ferlinum rofið téðan 2000 stiga múr. Auk þess fá nokkrir gestir með minna en 2000 stig að taka þátt, en í þetta sinn voru það Páll Andrason, Róbert Luu, Arnljótur Sigurðsson og Óskar Long Einarsson.

Vignir Vatnar Stefánsson fékk 12,5 vinning af 14 en það þykir ansi gott í þetta sterku hraðskákmóti. Stórmeistarinn Helgi Áss Grétarsson, sem lagði svo skemmtilega til að fjölga umferðum svo allir tefldu við alla, var í öðru sæti með 10,5 vinning. Þriðji varð Dagur Ragnarsson með 10 vinninga.

Kjartan Maack sá um skákstjórn og gekk mótið hratt og snurðulaust fyrir sig. Næsta mót fer fram föstudaginn 23. febrúar en teflt verður síðasta föstudag hvers mánaðar fram að vori.

Nánari upplýsingar um úrslit og lokastöðu má finna á Chess-Results.

Sjá nánar á heimasíðu TR.

Rimaskóli og Grunnskóli Grindavíkur Íslandsmeistarar stúlknasveita

Laugardaginn, 27. janúar sl., fór fram Íslandsmót grunnskólasveita, stúlknaflokkur, í Rimaskóla. Sextán sveitir tóku þátt en teflt var í þremur flokkum. Rimaskóli sigraði í elsta (6.-10. bekkur) og yngsta flokki (1.-2. bekkur) en Grunnskóli Grindavíkur hafði sigur í miðflokknum (3.-5. bekkur). 

Yngsti flokkur (1.-2. bekkur)

Rimaskóli hafði mikla yfirburði í flokknum. Stelpurnar hlutu 18½ vinning í 20 skákum og urðu 1½ vinningi fyrir ofan næstu sveit.

Mikil spenna var um önnur sæti og aðeins munaði 1½ vinning á silfursveitinni og sveitinni í fjórða sæti. Svo fór að Salaskóli tók silfrið og Hörðuvallaskóli bronsið.Sveit Íslandsmeistara Rimaskóla skipuðu:

1. Svandís María Gunnarsdóttir
2. Nikola Klimaszweska
3. Vigdís Lilja Þórólfsdóttir
4. Adda Sif Snorradóttir

Liðsstjóri var Helgi Árnason. 

Silfursveit Salaskóla

Bronssveit Hörðuvallaskóla

 

Lokastaðan

Miðflokkur (3.-5. bekkur)

Grunnskóli Grindavíkur fór með himinskautum í miðflokknum og var þar yfirburðarsigur. Sveitin hlaut 18 vinninga af 20 mögulegum. Spennan um hin verðlaunasætin var hins vegar jafnari og svo fór að sveitir Háteigsskóla og Salaskóla komu hnífjafnar í mark. Var þá gripið til hlutkestis og kom silfrið í hlut Salaskóla en bronsið varð stelpnanna í Háteigsskóla

Sveit Íslandsmeistara Grunnskóla Grindavíkur skipuðu:

1. Svanhildur Röfn Róbertsdóttir 
2. Birta Eiríksdóttir
3. Ólöf María Bergvinsdóttir
4. Helga Rut Einarsdóttir

Liðsstjóri var Siguringi Sigurjónsson

Silfursveit Salaskóla

Bronssveit Háteigsskóla

 

 

Lokastaðan

 

Elsti flokkur (6.-10. bekkur)

Fjórar sveitir tóku þátt í elsta flokki og þar var tefld tvöföld umferð. Rétt eins og í hinum flokkum tveimur lá engin vafi á því hver myndi vinna mótið. Stelpurnar í Rimaskóla höfðu mikla yfirburði og hlutu 20 vinninga í 24 skákum. Samhverfan í úrslitum var reyndar algjör eins og sjá í töflu hér að neðan og koma Foldaskóli og Landakotsskóli hnífjafnir í mark. Var aftur gripið til hlutkestis, en það er mjög sjaldgæft að þess þurfi, hvað þá tvisvar í sama móti, og fékk Foldaskóli silfrið.

Sveit Íslandsmeistara Rimaskóla skipuðu:

1. Nansý Davíðsdóttir
2. Sara Sólvegi Ris
3. Ásdís Birna Þórarinsdóttir
4. Tinna Sif Aðalsteinsdóttir

Liðsstjóri var Helgi Árnason.

Silfursveit Foldaskóla

 

Bronssveit Landaskotsskóla

 

 

Lokastaðan:

Mótshaldið gekk afar vel fyrir sig. Skáksambandið þakkar liðsstjórum fyrir frábært samstarf. Helgi Árnason fær þakkir fyrir lán á skákstað. Skákstjórar voru Ingibjörg Edda Birgisdóttir og Gunnar Björnsson.

Nánari úrslit má finna á Chess-Results.

SÞR #6: Stefán Bergsson óstöðvandi

Við upphaf sjöttu umferðar þurfti að taka upp sögubækurnar og fletta aftur á síðustu öld til að finna skákmann með 6 vinninga eftir 6 umferðir í Skákþingi Reykjavíkur. Þess þarf ekki lengur því þeim áfanga náði hinn grjótharði Stefán Bergsson (2093) síðdegis á sunnudag þegar hann landaði sigri gegn Hrafni Loftssyni (2163). Sú staðreynd að Stefán hafi fullt hús vinninga þegar þrjár umferðir lifa af móti er í senn stórmerkileg en umfram allt stórglæsileg. Gárungarnir velta fyrir sér hverskonar kraftur sé kominn yfir kappann en einhverjir hafa fleygt því fram að þeim finnist sem Stefán hafi allur eflst við hetjusögur af sérsveitarmönnum. Hvað sem því líður þá er ljóst að hann er í lykilstöðu fyrir síðasta þriðjung mótsins enda með 1,5 vinnings forskot.

Stefán sér þó ekki alveg strax til hafnar því fimm vígreifir skákmenn koma næstir með 4,5 vinning, hver og einn fær um að mjaka sér á hinn kalda en eftirsótta topp. Þetta eru þeir Hilmir Freyr Heimisson (2136), Björn Hólm Birkisson (2084), Bragi Halldórsson (2082), Júlíus Friðjónsson (2137) og Sigurbjörn Björnsson (2288). Níu keppendur fylgja með 4 vinninga en athygli vekur að stigahæstu keppendur mótsins eru ekki í efstu sætunum…enn sem komið er.

Á öðru borði gerðu Björn Hólm og Hilmir Freyr meinlaust jafntefli og á því þriðja lagði Júlíus Gauta Pál Jónsson (2161). Nokkuð hefur dregið úr óvæntum úrslitum en þó gerðu Jón Úlfljótsson (1687) og Vignir Vatnar Stefánsson (2304) jafntefli og þá sigraði Örn Alexandersson (1366) Arnar Heiðarsson (1592).

Það er ljóst að síðasti þriðjungur mótsins verður æsispennandi og spurningin sem brennur mest á skákheimi er þessi: Nær einhver að stöðva Stefán Bergsson? Það verður Fide-meistarinn Sigurbjörn Björnsson sem situr fyrst fyrir svörum þegar hann stýrir svörtu mönnunum gegn þeim fyrrnefnda í sjöundu umferð sem fer fram næstkomandi miðvikudagskvöld. Á næstu borðum mætast Júlíus og Björn, sem og Bragi og Hilmir.

Það er eins gott að Birnu-vöfflurnar verði orkumiklar og Birnu-kaffið koffeinríkt til að viðstaddir höndli spennuna sem mun ríkja í Skákhöllinni en flautað verður til leiks á slaginu 19.30. Áhorfendur eru sem fyrr velkomnir. Stöðuna, einstök úrslit ásamt skákum mótsins er að finna á Chess-Results.

Sjá nánar á heimasíðu TR.

 

• Heimasíða TR
• Chess-Results
• Beinar útsendingar (Chess24)

Skákþing Akureyrar: Meistarar í kröppum dansi

Síðastliðinn sunnudag var tefld fjórða umferð á Skákþingi Akureyrar (sem skv. nýjustu útreikningum er hið 81. í röðinni!). Þrjár baráttuskákir voru á dagskrá. Fyrsta skal nefna viðureign bekkjarbræðranna Símonar Þórhallssonar og Benedikts Stefánssonar úr Hörgárdal. Þrátt fyrir lipurlega taflmennsku Bensa framan af skákinni sá hann ekki við brögðum Símonar og mátti játa sig sigraðan. Þá er komið að meisturunum. Rúnar Sigurpálsson, Akureyrarmeistari 2010, lenti í mikilli nauðvörn gegn fulltrúa sýslumanns í mótinu, Sigurði Eiríkssyni. Þrátt fyrir alldrjúgan stigamun, Rúnari í hag, náði Sigurður grimmilegu steinbítstaki á stöðunni og virtist ætla að sigla heilum vinningi í höfn. Honum fataðist þó málsmeðferðin á síðustu metrunum og lék sig í mát. Þá er ógetið viðureignar Akureyrarmeistara síðustu tveggja ára, Jóns Kristins og meistarans frá 2013, Haraldar nokkurs stýrimanns.

Þar mátti búast við sigri stigahæsta keppendans, sem reyndar hafði unnið allar skákir sínar til þessa, en Haraldur tapað sínum. Nú brá hinsvegar svo við að Haraldur náði undirtökum og hélt þeim fast. Jokko reyndi allt hvað hann gat til að grugga vatnið - reyndar mjög tímanaumur - og á endanum féll ungi maðurinn á tíma, en þá var staða hans eiginlega orðin óverjandi. Óvæntustu úrslit mótsins til þessa. 

Nú eru þeir enn efstir, Jón Kristinn og Andri Freyr og á sá síðarnefndi skák til góða. Rúnar nálgast þá félaga, sem hafa þrjá vinninga, en hann hálfum minna.

• Heimasíða Skákfélags Akureyrar
• Chess-Results

Hjörvar Steinn Íslandsmeistari í Fischer-random

Þann 25. janúar sl. stóð Skáksamband Íslands að fyrsta Íslandsmótinu í Fischer-random skák. Fischer-random er hugmynd hins goðsagnakennda skákmanns Bobby Fischers, sem þótti á sínum seinni árum hin hefðbunda skák vera of fyrirsjáanleg. Nákvæmlega sami manngangur er til staðar en dregið er um uppstafstöðu mannanna, með nokkrum takmörkunum - um 960 upphafsstöður eru þrátt fyrir það mögulegar í Fischer-random! Ólíkt hinni hefðbundnu skák, reynir Fischer random lítið á þekkingu á byrjunum sem spilar mjög stórt hlutverk í klassískri skák í dag. Fischer skákin getur því verið kjörin fyrir þá sem hafa áhuga á að tefla skák án þess að byrjanaundirbúningur ráði miklu um úrslit skákarinnar. 

Á GAMMA-Reykjavíkurskákmótinu, minningarmóti um Bobby Fischer, sem fram fer í Hörpu 6.-14. mars nk. verður fyrsta Evrópumótið í Fischer-random haldið í samvinnu við Skáksamband Evrópu. Búast má við allar skákstjörnur mótsins taki þátt og að mótið, sem fer fram á 75 áraafmælisdegi Fischers, 9. mars., muni vekja umtalsverða athygli í skákheiminum öllum. 

Alls tóku 29 skákmenn þátt í þessu fyrsta opinbera Íslandsmóti í Fischer-random og meðal keppenda voru tveir stórmeistarar. Svo fór að þeir röðuðust í tvö efstu sætin og virðist því sem að geta í klassískri skák og Fischer-random skák, fylgist að ef marka má úrslitin. 

 

Íslandsmeistari í Fischer-random 2018 varð Hjörvar Steinn Grétarsson en hann hlaut 6½ vinning af 7 mögulegum. Þröstur Þórhallsson varð annar með 6 vinninga. Í 3.-5. sæti, með 5 vinninga, urðu Björn Ívar Karlsson, Gauti Páll Jónsson og Hilmir Freyr Heimsson. 

Lisseth Acevedo Mendez, unnusta Hjörvar, hlaut kvennaverðlaun og Vignir Vatnar Stefánsosn unglingaverðlaun mótsins. 

Mótshaldið tókst framúrskarandi vel og höfðu keppendur afar gaman að því. Skrýtnar stöður koma upp og tekur það oft skákmennina töluverðan tíma á að átta sig á upphafsstöðunni. Það er líklegt að vegur Fischer-random skákar eigi eftir að aukast jafnt og þétt og er Íslandsmót- og Evrópumótið stór skref í þá átt. 

GAMMA styrkti myndarlega við Íslandsmótið í Fischer-Random.

Lokastaðan á Chess-Results.

Magnus Carlsen sigurvegari Tata Steel-mótsins

Tata Steel-mótið í Sjávarvík féll óneitanlega svolítið af skuggann af Skákdeginum á Ísland. Mótinu lauk í gær með sigri Magnusar Carlsen (2834). Heimsmeistarinn norski og heimamaðurinn Anish Giri (2752) komu jafnir í mark með 9 vinninga í 13 skákum. Þeir tefldu til úrslita með styttri umhugsunaríma og þar hafði heimsmeistarinn betur. Hollendingar þurfa því enn að bíða eftir sigri heimamanns en það gerðist síðast þegar Jan Timman sigraði á mótinu árið 1985! Carlsen hefur nú sigrað á mótinu oftast allra eða sex sinnum.

Kramnik (2787) og Mamedyarov (2804) urðu í 3.-4. sæti með 8½ vinning. 

Indverjinn Vidit (2718) vann b-flokki en hann hlaut 9 vinninga. Hann hefur þar með tryggt sér keppnisrétt í a-flokki að ári. 

Sjá nánari umfjöllun á Chess.com. 

Myndir: Maria Emelianova/Chess.com

• Heimasíða mótsins
• Beinar útsendingar (hefjast kl. 12:30)

 

Toyota-skákmótið fer fram á föstudaginn

Hið árlega Toyota-skákmót verður haldið í höfuðstöðvum Toyota föstudaginn 2. febrúar. Tefldar verða 9 umferðir með 10 mínútna umhugsunartíma. Keppnin byrjar stundvíslega kl. 13. Keppt er um farandbikar og fjölda annarra verðlauna, sem allar eru gefnar af Toyota. Allir eldri skákmenn velkomnir á meðan húsrúm leyfir. Karlar 60+ og konur 50+

Æsir skákfélag eldri borgara í Stangarhyl 4 sér um framkvæmd og stjórn mótsins. Væntanlegir keppendur eru vinsamlega beðnir að forskrá sig hjá Finni Kr. í síma 893 1238 eða í netfangið [e-mail] eða hjá Garðari í síma 898 4805 eða í netfangið [e-mail].

 

 

Hraðkvöld hjá Hugin í kvöld

Hraðkvöld Hugins verður mánudaginn 29. janúar nk. og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 3 sekúndur eða 5 mínútur + 3 sekúndur á hvern leik. Teflt er í félagsheimili Hugins í Álfabakka 14a í Mjóddinni. Hraðkvöldið verður reiknað til hraðskákstiga.

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).