Kappteflið um Friðrikskónginn hefst í kvöld

Eins og í fyrra standa klúbbarnir saman af mótaröðinni sem fram fer næstu fjögur mánudagskvöld vestur í skáksal KR í Frostaskjóli og hefst þann  29. janúar, kl.  19.30.

Mótið er liður í stóru viðburðahaldi í tilefni af "Skákdegi  Íslands"  sem SÍ og Skákakademía Reykjavíkur stóðu fyrir 26. janúar á afmælisdegi Friðriks Ólafssonar, fyrsta stórmeistara okkar og heiðursborgara Reykjavíkur, sem þá fagnaði 83. árs afmæli sínu.

Um er að ræða 4ra kvölda GrandPrix mótaröð þar sem átta efstu sæti í hverju móti telja til stiga  (10-8-6-5-4-3-2-1). Keppt er um veglegan farandgrip, taflkóng úr Hallormstaðabirki, merktan og áletraðan af meistaranum. Þrjú bestu mót hvers keppanda reiknast til stiga og vinnings. Sigurvegarinn ár hvert fær nafn sitt skráð gullnu letri á stall styttunnar og fagran verðlaunagrip til eignar .

Nöfn fyrrv. sigurvegara mótaraðarinnar, þeirra Gunnars Skarphéðinssonar; Gunnars I. Birgissonar; Gunnars Kr. Gunnarssonar, Gunnars Freys Rúnarssonar, Ólafs B. Þórssonar og Guðfinns R. Kjartanssonar prýða nú hinn sögulega grip.

Tefldar verða 9 umferðir með 10 mínútna umhugsunartíma á skákina. Mótin eru að sjálfssögðu öllum opin óháð aldri og félagsaðild enda þótt keppendur séu ekki með í öllum mótunum.   Vegleg verðlaun fyrir efstu menn og aukavinningar fyrir aðra. Þátttökugjöld kr. 500 

Friðriksskákmót Vinaskákfélagsins fer fram á morgun, mánudag, kl. 13

Friðriksmót Vinaskákfélagsins verður haldið mánudaginn 29 janúar kl: 13, í Vin að Hverfisgötu 47. Mótið er haldið vegna afmæli Friðriks Ólafsson fyrsta stórmeistara Íslands, en hann á afmæli 26 janúar og verður 83 ára þá. Tefldar verða 6 umferðir með 7 mínútur á skák. Skákstjóri verður Hörður Jónasson. Mótið verður reiknað til hraðskákstiga.

Í hléi verður boðið upp á kaffi og vöfflur. Góð verðlaun verða í boði. Þið getið skráð ykkur á mótið á gula kassanum efst á síðunni á skak.is. Einnig getið þið skráð ykkur á staðnum.

Allir velkomnir!!

 

 

TORG skákmót Fjölnis 2018. Glæsilegur viðburður á Skákdegi Íslands

Það voru hvorki fleiri né færri en 119 grunnskólakrakkar sem skráðu sig til leiks á TORG skákmót Fjölnismanna sem haldið var í Rimaskóla á afmælisdegi Friðriks Ólafssonar á Skákdegi íslands.

Afmælisbarnið sjálft, fyrsti stórmeistari Íslands, mætti sem heiðursgestur á mótið og var honum vel fagnað með afmælissöng og löngu lófaklappi. Friðrik gekk upp á svið, ávarpaði krakkafjöldann og minntist þess þegar að hann fyrst skráði sig til leiks á skákmót 11 ára gamall þá voru allir aðrir þátttakendur fullorðnir karlmenn. Mótsstjórnin varð að setjast á rökstóla og ákveða hvort að svo ungur drengur fengi að fá að vera með. Friðrik Ólafsson færði Helga Árnasyni formanni Skákdeildar Fjölnis mæta skákbók um eistneska skámeistarann Paul Keres sem er einn af goðsögnum skáksögunnar. Helgi bauð Friðriki og konu hans Auði upp á dýrindis afmælistertu ásamt fleiri skákvinum. Áður en að Friðrik settist að snæðingi þá lék hann 1. leik mótsins fyrir Anton Breka Óskarsson í Rimaskóla.

Fjölnismenn áttu alls ekki von á öllum þessum fjölda þátttakenda en með góðri aðstoð virtist endalaust vera hægt að fjölga borðum lengst fram á gang Rimaskóla.

Skákmótið gekk afar vel fyrir sig þó að hin mikla aðsókn tefði aðeins fyrir í byrjun og á milli umferða þegar keppendur leituðu að þeim borðum sem tefla ætti við. Björn Ívar Karlsson leysti skákstjórnina af hendi með einstakri yfirvegun og færni svo engin leiðindi komu upp á heldur bara gleði og það ekki af ástæðulausu. Hagkaup og Emmess ís gáfu öllum þátttakendum lystugar veitingar og uppi á sviði biðu 40 glæsilegir vinningar auk þriggja verðlaunabikara. Tefldar voru 6 umferðir.

Þegar svona gífurlegur fjöldi er til staðar verður staðan afar jöfn og spennandi á milli umferða og baráttan hörð um hvern vinning. Þegar komið var að verðlaunaafhendingu varð ljóst að tveir efnilegir skákmeistarar voru efstir og jafnir með fullt hús, sex vinninga. Vignir Vatnar Stefánsson 9. bekk Hörðuvallaskóla var þó ofar Joshua Davíðssyni í 7. bekk Rimaskóla og taldist því sigurvegari mótsins. Í næstu sætum voru þeir Gunnar Erik Guðmundsson Salaskóla, Kjartan Karl Gunnarsson Rimaskóla, Árni Ólafsson Hlíðaskóla, Benedikt Briem Hörðuvallaskóla, Ísak Orri Karlsson Álfhólsskóla, Arnór Gunnlaugsson Rimaskóla, Benedikt Þórisson Austurbæjarskola, Rayan Sharifa Álfhólsskóla og Gestur Andri Claudiusson, allir með 5 vinninga.

 

Stúlknabikarinn vann Iðunn Helgadóttir Landakotsskóla og bikar fyrir efsta sæti í yngri flokk hlaut Tómas Möller Vatnsendaskóla. Allir 30 efstu fengu verðlaun frá Hagkaup, Emmess, Pizzunni og fyrirtækjum á Torginu við Hverafold. Í lokin var dregið í happadrætti og fengu 11 heppnir þátttakendur gjöf frá Disneyútgáfunni. Allir krakkarnir sem tóku þátt í mótinu eiga heiður skilið fyrir góða frammistöðu og fína hegðun.

 

Fjöldi foreldra fylgdist með, þáði kaffiveitingar og hjálpaði til eins og þeir gátu. Mótsstjórar voru þeir Helgi Árnason og Gunnlaugur Egilsson úr stjórn Fjölnis. TORG mótið 2019 verður ábyggilega haldið í  tilefni Skákdagsins að ári eftir þessa góðu reynslu.

 

Ljósmyndir : Þórir Benediktsson

Skákdagurinn í Síðuskóla á Akureyri

Föstudaginn 26. janúar er Skákdagurinn haldinn hátíðlegur um allt land. Víða er teflt s.s. í skólum, vinnustöðum, heitum pottum, kaffihúsum og dvalarheimilum svo dæmi séu nefnd. Í Síðuskóla fengum við félaga úr Skákfélagi Akureyrar í lið með okkur og buðum upp á skákfræðslu og tækifæri til tefla í 5. - 10. bekk.

Fjölmargir nemendur þáðu boðið og á meðfylgjandi myndum má sjá ánægða og áhugasama nemendur við taflborðin. Hugmyndin er að bjóða upp á skólaskákmót í framhaldi af þessum viðburði en það verður dagsett og auglýst síðar. Skákdagurinn 2018 er tileinkaður Friðriki Ólafssyni, fyrsta stórmeistara Íslendinga og fv. forseta Alþjóða skáksambandsins. Friðrik varð 83 ára á Skákdaginn sjálfan. 

Myndir frá Skákdeginum. 

Hannes Hlífar endaði í öðru sæti í Marianski Lazne

Stórmeistarinn Hannes Hlífar Stefánsson (2523) endaði í öðru sæti á alþjóðlegu móti í Marianske Lazne sem kláraðist í gær. Hannes hlaut 6 vinninga í 9 skákum. Sigurvegari mótsins varð tékkneski stórmeistarinn Jiri Stocek (2566). 

Frammistaða Hannesar samsvaraði 2523 skákstigum og hækkar hann um 1 stig fyrir frammistöðu sína.

• Heimasíða mótsins
• Chess-Results
• Beinar útsendingar (Chess24)

SÞR #5: Stefán Bergsson einn eftir með fullt hús og efstur

Það var ekki lognmollunni fyrir að fara á efstu borðunum í 5. umferð á Skákþinginu á miðvikudagskvöldið. Á tíu efstu borðunum litu bara tvö jafntefli dagsins ljós. Hrafn Loftsson (2163) hélt jöfnu með því að gefa peð gegn Degi Ragnarssyni (2332) á öðru borði en tryggja sér nægileg gagnfæri gegn kóngi Dags í endatafli. Þá jafnaði Þorvarður F. Ólafsson (2178) svo rækilega taflið gegn Braga Halldórssyni (2082) á fimmta borði að ekki var annað gera eftir 20 leiki en að sættast á jafnan hlut.

Þar með eru rólegheitin upp talin, því á hinum átta borðunum var teflt af hörku og sviptingar miklar. Á efsta borði hjá þeim Stefáni Bergssyni (2093) og Birni Hólm Birkissyni (2084) var frumlega teflt í byrjuninni en að lokum kom upp einhvers konar Sikileysk staða með vissum Grand Prix einkennum, fyrir þá sem til þekkja í þeirri mætu byrjun. Átök brutust út á miðborði sem enduðu með því að hvorir um sig höfðu hættuleg frípeð. Staða Stefáns var þó vænleg megnið af skákinni og Björn lenti í miklu tímahraki. Svo miklu, að þegar Stefán hótaði báðum hrókum Björns í 36. leik, gafst Birni ekki tími til að sjá skemmtilega gagnsóknarleið sem hefði flækt málin töluvert fyrir Stefáni. Björn féll á tíma áður en hann náði að leika og Stefán er því einn efstur með fullt hús eftir umferðina og vinningi fyrir ofan næstu menn.

Þeir Einar Hjalti Jensson (2336) og Vignir Vatnar Stefánsson (2304) áttu það sammerkt að taktísk handvömm kostaði þá lið og skákina; Einar á þriðja borði gegn Hilmi Frey Heimissyni (2136) en Vignir á fjórða borði gegn Gauta Pál Jónssyni (2161).

Björgvin Víglundsson (2167) rétti sinn hlut gagnvart ungum og efnilegum liðsfélögum í TR með því að vinna öruggan sigur á Aroni Þór Mai (2066) á sjötta borði. Björgvin hafði þvílíka yfirburði í rými að bæði hrókur Arons og riddari á miðborði áttu enga reiti og voru báðir á leið yfir móðuna miklu þegar Aron gaf.

Bragi Þorfinnsson (2436) fékk hæpna stöðu upp úr byrjuninni gegn Eiríki K. Björnssyni (1936) á sjöunda borði og stóð höllum fæti í miðtaflinu. Hann fórnaði hins vegar peði fyrir kóngsóknarfæri; Eiríkur tapaði alveg taktíska þræðinum í tímahrakinu og Bragi vann örugglega. Jóhann Ragnarsson (1991) fórnaði tveimur mönnum gegn Sigurbirni Björnssyni (2288) sem lét sér hvergi bregða, þáði mennina og innbyrti vinninginn af öryggi.

Aftur á móti brá svo við í þessari umferð að gagnstætt efri borðunum voru úrslit að mestu eftir bókinni annars staðar en sú hefur hreint ekki verið raunin í mótinu fram til þessa.

Sjötta umferðin hefst kl. 13 n.k. sunnudag (28. janúar) í Skákhöll TR í Faxafeni. Nánar um úrslit, stöðu og pörun á Chess results og þar eru líka skákirnar, hver annarri skemmtilegri.

Sjá nánar á heimasíðu TR.

 

• Heimasíða TR
• Chess-Results
• Beinar útsendingar (Chess24)

Skákþáttur Morgunblaðsins: Hjörvar og Jóhann efstir á skákhátíð MótX

Öflug innanlandsmót: Skákþing Reykjavíkur 2018, Skákhátíð MótX Kópavogi og Skákþing Akureyrar 2018, eru komin á dágóðan rekspöl. Á Skákþingi Reykjavíkur hafa þrjár umferðir verið tefldar og eru í efsta sæti með fullt hús Hilmir Freyr Heimisson, Björn Hólm Birkisson og Stefán Bergsson.

Á MótX-skákhátíðinni eru þeir stigahæstu efstir; Hjörvar Steinn Grétarsson og Jóhann Hjartarson hafa unnið báðar skákir sínar. Staðan í þessu móti er alltaf dálítið óljós því þátttakendur eiga kost á hálfs vinnings yfirsetu þrisvar í sjö umferðum og mun t.d. Hjörvar Steinn ekki tefla í næstu umferð.

Í B-riðli eru Gauti Páll Jónsson og Siguringi Sigurjónsson efstir með tvo vinninga en hjá Hvítum hröfnum er dálítið um frestanir en Júlíus Friðjónsson er efstur eins og staðan er með 1½ vinning úr tveimur skákum.

Skákþing Akureyrar er nú haldið í 80. skipti, en Skákfélag Akureyrar fagnar brátt 100 ára afmæli sínu. Rúnar Sigurpálsson tekur þátt í þinginu aftur en sigurstranglegastan verður að telja Jón Kristin Þorgeirsson. 

Magnaður Anand í Wijk aan Zee

Skákhátíðin í Wijk aan Zee, sem tekur nafn sitt eftir aðalkostanda þess, stáliðjuverinu Tata Steel, dregur að venju til sín nær alla bestu skákmenn heims með heimsmeistarann Magnús Carlsen í broddi fylkingar. Hann hefur unnið mótið oftar en nokkur annar eða fimm sinnum. Eftir fimm umferðir hefur hann skipað sér í hóp efstu manna en þó aðeins unnið eina skák og taflmennska hans verið fremur tilþrifalítil. Staða efstu manna:

 

1.-3. Anand, Giri og Mamedyarov 3½ v. (af 5) 4.-6. Magnús Carlsen, Kramnik og So 3 v. Keppendur eru 14 talsins.

Frískleg taflmennska gamla heimsmeistarans Wisvanathans Anands hefur vakið mikla athygli, en á dögunum varð hann heimsmeistari í atskák. Hið létta handbragð hans naut sín í viðureigninni við Fabiano Caruana, sem hefur átt erfitt uppdráttar í Hollandi:

Wijk aan Zee 2018; 4. umferð:

Wisvanathan Anand – Fabiano Caruana

Petroffs-vörn

1. e4 e5 2. Rf3 Rf6 3. Rxe5 d6 4. Rf3 Rxe4 5. d4 d5 6. Bd3 Bd6 7. 0-0 0-0 8. c4 c6 9. Dc2 Ra6 10. a3 Bg4 11. Re5

Þessi staða er er ekki ný af nálinni og útheimtir gríðarlega undirbúningsvinnu. Hér hefur áður verið leikið 11. ... Bxe5 12. dxe5 Rac5 13. f3 Rxd3 14. Dxd3 Rc5 15. Dd4 Rb3 16. Dxg4 Rxa1 17. Bh6 g6 18. Rc3 með afar óljósri stöðu. Það kom á óvart að Caruana skyldi velja leik sem ekki hefur gefist vel.

11.... Bf5!? 12. b4 Rc7 13. f3 Bg6 14. c5 Bxe5 15. dxe5 Rg5 16. Bb2 d4?!

Hyggst hasla sér völl á e3 en hvítur er fyrri til. „Houdini“ telur 16.... a5 betra.

17. f4! Rd5 18. fxg5 Re3 19. Dd2 Bxd3 20. Dxd3 Rxf1 21. Kxf1 Dxg5 22. Rd2 Dxe5 23. Rf3 Dh5 24. Dxd4 f6 25. Dc4 Kh8 26. Bc1!

Vel leikið. Anand veit auðvitað að biskup og riddari eiga erfitt uppdráttar gegn hrók og peði, einkum ef línur eru opnar. Biskupinn stefnir skónum á d6 þar sem hróknum er haldið niðri.

26.... Hfe8 27. Bf4 a5 28. Bd6 axb4 29. Dxb4 Dd5 30. Dxb7 h6 31. Kg1 Ha4 32. h3 Hc4 33. Db2 Dd3 34. Ha2 Dd1 35. Kh2 Hc1 36. a4!

Kóngsstaðan er alveg örugg og frípeðið skundar af stað.

36.... f5 37. Db7 f4 38. Bxf4 Hxc5 39. Hd2 Dxa4 40. Df7 Hg8 41. Be5!

Hótar t.d. 42. Hd8.

41.... Dc4

42. Hd6!

Glæsilega leikið, 42.... Dxf7 er svarað með 43. Hxh6 mát. Caruana gafst því upp. 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 20. janúar 2018.

Skákþættir Morgunblaðsins

Hjörvar í Kerhólaskóla á Skákdaginn

Stórmeistarinn Hjörvar Steinn Grétarsson var einn fjölmargra sem tók þátt í hátíðarhöldunum á Skákdaginn. Hann ásamt unnustu sinni, Liss Acevedo Méndez, heimsóttu Kerhólaskóla í Grímness- og Grafningshreppi. Tefldi þar Hjörvar fjöltefli við skólanemendur og fór yfir leyndardóma skáklistarinnar. 

Árdegismót KR: Guðfinnur hafði það

Árdegismót KR í tilefni af Skákdeginum fór fram með glæsibrag í morgun og hófst stuttu eftir sólarupprás, en segja má að morgunstund gefi gull í mund, amk. sumum. Keppt var um Friðrikskort með frímerkjum af honum frá fyrir 3 árum þegar hann varð áttræður fyrstadagsstimpluðum.

Eftir níumferðatveggjaoghálfstímahörkuátök urðu úrslit þau að engin annar en Guðfinnur R. Kjartansson,  hinn sigursæli síteflandi ástríðuskákmaður að vestan rúllaði mótinu upp með "einari", uppskar 8 vinninga af níu mögulegum og fagnaði glæstum sigri. Aðrir með minna og þaðan af minna eins og sjá má á meðfylgjandi myndskreyttri mótstöflu.

Á mánudagskvöldið hefst svo vestur þar "Kappteflið um Friðriksbikarinn" - 4 kvölda Grand Prix mótaröð. Munið að mæta.

Sveitakeppni skóla á Suðurlandi: Vel heppnað mótshald

Sveitakeppni skóla á Suðurlandi var haldin 26. jan. s.l. í Fischersetri. Alls mættu 10 sveitir til leiks. Sveitunum var skipt í yngri (1.-5. bekkur) og eldri flokk (6.-10. bekkur) og voru sex sveitir í þeim eldri og fjórar í þeim yngri.

Úrslit keppninnar urðu þau að í yngri flokknum sigraði Flóaskóli örugglega með 19 vinninga, í öðru sæti Flúðaskóli með 13 vinninga og í þriðja sæti b-sveit Vallaskóla með 9 vinninga.

Nánar á Chess-Results

 

Í eldri flokknum var hörð barátta á milli efstu liðanna og réðust úrslitin ekki fyrr en íði síðustu skákm mótsins. Niðurstaðan var sú Grunnskólinn í Hveragerði sigraði með 14½ vinning, í öðru sæti a-sveit Flúðaskóla með 13½ vinning og í þriðja sæti b-sveit Flúðaskóla með 10 vinninga.  

Sjá nánar á Chess-Results.

Stefán Bergsson átti veg og vanda af undirbúningi mótsins. Gunnar Björnsson sá um skákstjórn. Aldís Lárusdóttir var ómetanleg hjálparhella á skákstað. Skákþjálfarnir fá miklar þakkir fyrir sitt skákstarf og að senda lið.

Stefnt er að halda áfram með fjölga sveitum að ári. Forseti SÍ hvatti umsjónarmenn liða til að stefna á að senda sveitir á Íslandsmót grunnakólasveita og/eða barnaskólasveita í vor.