Korpúlfar: Mótið um Friðrikskónginn – ÞÓR VANN

Hinir öldnu meistarar sem mættir voru í Félagsmiðstöðina Borgir í Grafarvogi á fimmtudaginn var fóru létt með að þjófstarta Skákdeginum, sem hófst ekki formlega fyrr en daginn eftir, á afmælisdegi Friðriks Ólafssonar.  

Tefldar voru 10 skákir í anda meistarans sem dagurinn og mótið var helgað og skákgyðjunni til dýrðar. Svo fór að hinn þrautreyndi og valinkunni skákmeistari Þór Valtýsson sigraði og fór með frækinn sigur af hólmi með bara hálfan niður  eftir harðar baráttuskákir við skæðustu keppinauta sína. Úrslitin komu svo sem engum á óvart enda höfðu útgönguspár í byrjun móts bent til þess að svo gæti farið. Gunnar Örn Haraldsson, varð annar og Sæbjörn Larsen Guðfinnsson, sigurvegarinn frá í fyrra þriðji. Þetta var þriðja mót Gunnars á jafnmörgum dögum, hafði áður teflt með Æsum og Riddurum dagana á undan, en annað mót flestra hinna í vikunni. Svo ekki verður sagt að gamlingjarnir slái slöku við í skákiðkun sinni. 

Forsvarsmaður klúbbsins Hlynur Smári Þórðarson var því miður forfallaður og fjarri góði gamni vegna veikinda. Voru honum í byrjun móts færðar innilegar kveðjur og bestu bataóskir í hans erfiðu og langdregnu sjúkrahúsvist.. 

Formenn Ása og Riddarans, þeir Garðar Guðmundsson og Einar S. Einarsson, önnuðust um mótshaldið í fjarveru Hlyns, en Finnur Kr. Finnsson var skákstjóri.  Mótið fór hið besta fram.   

Korpúlfar og gestir þeirra mun tefla áfram í Borgum á fimmtudögum kl. 12.30 -16  allt til vors, en þetta er þeirra annað ár í skákmótahaldi fyrir eldri borgara.    

 Nánari úrslit má sjá á mótstöflunni hér að neðan

Skákharpan XI: Gunni Gunn vann fyrsta mótið með fullu húsi

Fyrsta mótið af fjórum um SKÁKHÖRPUNA að þessu sinni fór fram sl. miðvikudag i salarkynnum RIDDARANS í safnaðarheimili Hafnarfjarðarkirkju.  Keppnin um skákhörpuna er nú helguð meisturum framtíðarinnar undir kjörorðinu „Skákin lifi“.  Mótið er einnig hluti af dagskrá Skákdagsins eða vikunnar sem tengd er nafni fyrsta og fremsta stórmeistara okkar Friðrik Ólafssyni.  

Gunnar Kr. Gunnarsson sem er elsti þátttakandinn og að verða hálfníræður í sumar lék létt á hörpunnar strengi og vann mótið sannfærandi með fullu húsi. Voru þó engir aukvisar meðal keppenda eins og sjá má á meðf. mótstöflu hér að neðan. Líkt og kom fram hjá Jafeti Ólafssyni nú í kvöldfréttum Stöðvar 2 í sambandi við  bridgemótið sem nú er i gangi, "að menn geti spilað bridge alveg fram á grafarbakkann"  má segja að það eigi ekki síður við um skákmenn. Hugarleikfimi sé ekki síður mikilvæg en líkamsrækt til að halda fullri heilsu sem lengst.

Meistari GunniGunn eins og hann er almennt nefndur meðal skákmanna er fyrrv. Íslandsmeistari „í báða enda“ eins og stundum er grínast með, í knattspyrnu með Val 1956 og í skák 1966. Þá var hann einnig forseti SÍ í 4 ár, fyrst árin 1974-76 og síðar 1982-84 auk þess að vera alþjóðlegur skákdómari. Framlag Gunnar til skákarinnar og skákhreyfingarinnar er því mikið og afar þakkarvert. 

Sigurvegarar Skákhörpunnar hafa orðið þessir:  2008 Sigurður A. Herlufsen; 2009 Jóhann Örn Sigurjónsson; 2010 og 2017 Guðfinnur R. Kjartansson; 2011, 2o13 og 2014 Ingimar Halldórsson; 2012 Össur Kristinsson; 2015 Jón Þ. Þór; 2016 Gunnar Kr. Gunnarsson

Mótaröðin um Skákhörpuna heldur áfram næstu 3 miðvikudaga. Þrjú bestu mót hvers keppanda telja til stiga og vinnings. Mótin hjá Riddaranum eru jafnan mjög lífleg og fara fram í góðum anda þótt hart sé barist og varist og engin annars bróðir í leik frekar fyrri daginn. Telft er allan ársins hring, ávallt kl. 13-17 á miðvikudögum og jafnan heitt á könnunni.

Skákdagurinn í Fellaskóla

Eftir hádegi í dag komu 60 af rúmlega 100 nemendum Fellaskóla, Fellabæ saman og tefldu.

Sverrir Gestsson, skólastjóri segir svo frá á Facebook-síðunni, íslenskir skákmenn:

Ég sagði þeim af hverju skákdagurinn væri haldinn hátíðlegur um allt land og einnig sýndi ég þeim gamaldags sýningartafl sem skólinn á. Að lokum bætti ég því við að hápunkturinn á skákferli mínum væri þegar ég 15 ára að aldri fékk að vera "færari" á Reykjavíkurskákmótinu í Glæsibæ á því herrans ári 1972, þar sem Friðrik Ólafsson var einmitt meðal þátttakenda og sigraði á stigum ef ég man rétt.

Guðmundur endaði með 6½ vinning í Florpia

Guðmundur Kjartansson (2438) endaði með 6½ vinning í 10 skákum á alþjóðlega mótinu í Floripa í Brasiliú. Gummi endaði í 40. sæti. Guðmundur byrjaði vel og hafði 4½ eftir 5 umferðir. Verr gekk hins vegar í lokaumferðunum. 

Frammistaða Gumma samsvaraði 2360 skákstigum og lækkaði hann um 7 skákstig. 

Alls tóku 416 skákmenn frá 14 löndum þátt í mótinu. Meðal keppenda voru 10 stórmeistarar. Guðmundur var nr. 14 í stigaröð keppenda. 

• Heimasíða mótsins
• Chess-Results
• Beinar útsendingar 

Skákdagurinn í Stóru-Vogaskóla

Í dag, föstudaginn 26. janúar er Skákdagurinn haldinn hátíðlegur um allt land. Teflt verður í skólum, vinnustöðum, heitum pottum, kaffihúsum, úti á sjó, dvalarheimilum og leikskólum og er Stóru-Vogaskóli þar ekki undanskilin.
 
Skákdagurinn 2018 er tileinkaður Friðrik Ólafssyni, fyrsta stórmeistara Íslendinga og fv. forseta Alþjóða skáksambandsins. Friðrik verður 83ára á Skákdaginn sjálfan. 

Myndir frá Stóru-Vogaskóla.

Gleðilegan Skákdag! Tökum upp taflið!

Skákdagurinn verður haldinn hátíðlegur um land í dag föstudaginn 26. janúar á afmæli Friðriks Ólafssonar fyrsta stórmeistara okkar Íslendinga. Friðrik sem verður 83 ára gamall hefur verið virkur við skákborðið frá því á fimmta áratug síðustu aldar og teflir enn - tekur um þessar mundir þátt í heiðursflokki á MótX-skákhátíð Skákdeildar Breiðabliks og Hugins. Friðrik var um hríð meðal bestu skákmanna heims, tefldi m.a. á hinu fræga millisvæðamóti í Portoroz en á þessu ári verða liðin 60 ár frá því móti. 

Stíft er teflt í kappskákmótum þess dagana en Skákþing Reykjavíkur, Skákþing Akureyrar, MótX-skákhátíð Skákdeildar Breiðabliks og Hugins og Meistaramót Hugins norður eru öll í gangi í þessum mánuði. Til viðbótar við kappskákmótin verða fjölmargir viðburðir haldnir á Skákdaginn og dagana kringum hann og skal hér stiklað á stóru. 

Íslandsmótið í Fischer-random fer fram í gær. Hjörvar Steinn Grétarsson kom sá og sigraði. Nánar verður sagt frá úrslitum næstu daga.

Á Skákdaginn verður Helgi Ólafsson, skólastjóri Skákskóla Íslands, með fjöltefli í Landakotsskóla. Hjörvar Steinn Grétarsson heimsækir Kerhólsskóla og fjöltefli verður í Vatnsendaskóla þar sem Einar Ólafssonar sinnir skákkennslu. Akureyringar láta ekki sitt eftir liggja og standa fyrir mótum og kennslu í Lundarskóla, Brekkuskóla og Síðuskóla. Þá heimsækir Hjörleifur Halldórsson Grenivíkurskóla og verður með kennslu. 

Mikil gróska er í skáklífi grunnskóla á Suðurlandi um þessar mundir og stendur Skáksamband Íslands í samstarfi við Fischer-setrið fyrir Suðurlandsmóti grunnskólasveita í skák. 

Sundlaugartaflsett má finna víða um land og á Skákdaginn bætast í hópinn sundlaugarnar á Þingeyri og Dalvík. 

Skákdeild Fjölnis heldur TORG-mót Fjölnis á Skákdaginn. Afar vinsælt og vel sótt barna- og unglingamót sem hefur verið haldið frá árinu 2004. Mótið hefst kl. 15 og leikur afmælisbarnið, Friðrik Ólafsson, frysta leikinn.

Taflfélag Reykjavíkur hefur hraðskákmótaröð á Skákdaginn sjálfan. Mótið er opið öllum skákmönnum með 2000 skákstig eða meira. Fjögur mót eru í röðinni

Heldri skákmenn höfuðborgarsvæðisins halda margir hverjir mikið upp á Friðrik og sýna honum mikinn sóma kringum Skákdaginn með hverju mótinu á fætur öðru. KR-ingar halda sitt hefðbundna árdegismót næsta laugardag klukkan 10:30 í Frostaskjóli, KR-heimili. Mánudaginn 29. janúar hefst svo kappteflið um Friðrikskónginn en það stendur í fjögur mánudagskvöld með Grand-Prix fyrirkomulagi þar sem menn safna stigum á hverju móti og besti samanlagði árangur tryggir sigurvegaranum Friðrikskónginn. Þá tefldu Korpúlfar í Grafarvogi til heiðurs Friðriki í gær, 12:30 í félagsmiðstöðinni Borgum. Riddarar í Hafnarfirði, ætla að tefla í anda Friðriks í mótasyrpunni Skákhörpunni sem hófst á miðvikudaginn í Strandbergi, safnaðarheimili Hafnarfjarðarkirkju. 

Laugardaginn, 27. janúar fer fram Íslandsmót grunnskólasveita í stúlknaflokki fram í Rimaskóla. 

Mánudaginn, 29. janúar, stendur Vinaskákfélagið fyrir Friðriksmóti í Vin við Hverfisgötu. Mótið er opið öllum og hefst kl. 13. 

Sem fyrr eru það Skáksamband Íslands, Skákskóli Íslands og Skákakademía Reykjavíkur sem standa fyrir Skákdeginum í samstarfi við alla þá aðila sem heiðra Friðrik Ólafsson á hans 83. afmæli. 

Tilkynningar um viðburði og fréttir af viðburðum mega berast á [e-mail] 

Carlsen, Giri og Mamedyarov efstir í Sjávarvík

Það er mikil spenna á Tata Steel-mótinu í Sjávarvík í Hollandi. Þegar 10 umferðum af 13 er lokið eru Íslandsvinirnir Anish Giri (2752), Magnus Carlsen (2834) og Shahkriyar Mamedyarov (2804) efstir og jafnir með 7 vinninga. 

Giri gerði stutt jafntefli við Sergey Karjakin, væntanlega í þeirri von að helstu andstæðingar ynnu ekki. Sú varð ekki raunin því heimsmeistari norski lagði Wesley So (2792) að velli og Aserinn brosmildi vann Peter Svidler (2768). Vladimir Kramnik (2787) er fjórði með 6½ vinning.

Á morgun mætast tveir stigahæstu skákmenn heims. Mamedyarov og Carlsen. Giri teflir við Caruana (2811)

Sjá nánari umfjöllun á Chess.com. 

Myndir: Maria Emelianova/Chess.com

• Heimasíða mótsins
• Beinar útsendingar (hefjast kl. 12:30)

 

Lundarnir á ferð í kvöld!

Í kvöld klukkan 19:35 hefst 2. umferð í PRO Chess League. Umferðin sjálf hefst í raun fyrr um daginn en viðureign Reykjavik Puffins og London Towers hefst á slaginu 19:35 á Chess.com.

Í síðustu viku gerðu Lundarnir jafntefli við Marseille Migraines með Maxime Vachier-Lagrave í broddy fylkingar.

London Towers liðið er leitt af enska stórmeistaranum Gawain Jones (2659) sem notar frídaginn á Tata Steel mótinu til að styrkja London liðið. Aðrir í liðinu er: IM Ameet Ghasi (2467), GM Keith Arkell (2415) og IM Peter Roberson (2403).

Lið Lundana að þessu sinni skipa:

GM Jóhann Hjartarson (2539), GM Helgi Ólafsson (2512), IM Jón Viktor Gunnarsson (2460) og IM Björn Þorfinnsson (2398).

Allir tefla við alla á fjórum borðum og því 16 vinningar í boði. Búast má við jöfnum og spennandi match.

Hægt verður að fylgjast með skákunum og Chess.com en við mælum með því að kíkja á beina útsendingu Puffins í umsjón FM Ingvars Þórs Jóhannessonar sem verður hér: http://www.twitch.tv/reykjavikpuffins

Heimasíða PRO Chess League

Útsending Chess.com

Afleikir og atgangur harður í þriðju umferð Skákhátíðar MótX

Fjórða umferð Skákhátíðar MótX var tefld þriðjudagskvöldið 30. janúar. Skákmenn kepptust við að þjarma hver að öðrum strax í byrjun með heimabrugguðum launráðum, fylkingum laust saman og vopnabrak mikið dundi um valinn. Svo mikið gekk á að leikjum var víxlað og ólöglegir leikir spruttu úr krumlum ráðvöndustu manna.

A flokkur

 

Efstir fyrir umferðina voru kempurnar Hjörvar Steinn Grétarsson, Björgvin Jónsson og Halldór Grétar Einarsson með tvo og hálfan vinning hver. Hjörvar Steinn sat yfir í fjórðu umferðinni en á efsta borði mættust forystusauðirnir Björgvin Jónsson og Halldór Grétar. Björgvin kom afar vel undirbúinn til leiks eins og hans er háttur, þann veg að Halldór Grétar, sem hafði leikið á als oddi á Skákhátíðinni fram að þessu, var skotinn niður með þeirri tegund lásboga er rýfur hverja brynvörn.

Á öðru borði mætti stórmeistarahrellirinn Þorsteinn Þorsteinsson Jóhanni Hjartarsyni. Úr varð hörkuskák þar sem allt virtist stefna í jafntefli þegar Þorsteinn hleypti taflinu upp á drottningarvæng. Reyndist upphlaup það feigðarflan hið mesta og laut hinn öflugi kappi Þorsteinn í dúk með brotinn boga og brostinn streng.

Þröstur Þórhallsson lagði Björn Þorfinnsson í vel útfærðri skák þar sem Þröstur fann réttu leiðina í vandasömu drottningarendatafli. Jón L var lengi vel með mun betra gegn Erni Leó og líklegast unnið á einhverjum stað en arnarljónið unga varðist af grimmd og hélt jöfnu. Meistarabaninn Baldur Kristinsson hélt uppteknum hætti og lagði hinn firnasterka fidemeistara Magnús Örn.

Mest gekk á í skák Huginskappanna Ingvars Þórs Jóhannessonar og Kristján Eðvarðssonar sem breyttist í örleikrit þegar á því harðasta stóð. Rétt eftir að Kristján lék jafnteflisstöðu niður í tapað tafl, henti það Ingvar Þór að leika ólöglegum leik. Gefum Ingvari orðið: „Ég veit ekki hvað ég hef teflt margar kappskákir, örugglega yfir 1.000, en þetta er í fyrsta skipti sem ég leik ólöglegum leik. Til að toppa þvæluna hefði ég getað verið sjúklega óheppinn. Ef það hefði ekki verið peð á f4, hefði ég orðið að bera drottninguna fyrir – snertur maður hreyfður! Þá hefði ég tapað „on the spot“ eins og maður segir. Það hefði nú verið meiri sagan!“

Önnur úrslit voru þau að Vignir Vatnar lagði félaga sinn úr TR, Benedikt Jónasson, sem var funheitur á Gestamótinu í fyrra en hefur ekki verið sjálfum sér líkur á þessu móti. Annað öflugt TR tvíeyki tókst á þar sem Daði Ómarsson lagði félaga sinn Bárð Örn Birkisson. Lenka náði loks vopnum sínum gegn Degi Ragnarssyni en Guðmundur Halldórsson og Oliver Jóhannesson skildu jafnir.

A-flokkur hjá Chess-Results

Stórmeistararimmur í 5. umferð

Alþjóðlegi meistarinn lögvísi, Björgvin Jónsson, er einn efstur að fjórum umferðum loknum með þrjá og hálfan vinning. Í humáttina koma tveir lögfróðir stórmeistarar og einn fasteignasérfræðingur: Jóhann Hjartarson, Hjörvar Steinn Grétarsson og Þröstur Þórhallsson með þrjá vinninga hver. Þriðjudaginn 6. febrúar kl. 19.30 verður baráttunni haldið áfram. Björgvin situr yfir en tveimur efstu borðum verður stórmeistaraslagur af bestu gerð. Jóhann Hjartarson hefur hvítt á móti Hjörvari Steini og Hannes Hlífar, nýkominn að utan, stýrir hvítu mönnunum gegn Þresti Þórhallssyni. 

Hvítir hrafnar

Þriðja umferð Hvítra hrafna var tefld 30. jan. Jónas Þorvaldsson lagði Björn Halldórsson með snaggaralegri kóngssókn, Friðrik Ólafsson og Bragi Halldórsson sættust á skiptan hlut eftir skammvinn vopnaviðskipti og Jón Þorvaldsson lét sverfa til stáls gegn Júlíusi Friðjónssyni sem hélt jöfnu á ystu nöf í langri skák.

Í fjórðu umferð Hvítra hrafna 6. feb. hefur Jónas Þorvaldsson hvítt gegn Friðriki Ólafssyni, Björn Halldórsson stýrir hvítum mönnunum gegn Júlíusi Friðjónssyni og Bragi Halldórsson hefur hvítt gegn Jóni Þorvaldssyni.

Hvítir hrafnar hjá Chess-Results 

B flokkur

Gauti Páll hélt sínu striki og vann núna Aron Þór Mai. Er með hreint borð, kominn með vinningsforskot og þar að auki búinn að tefla við þann sem er í öðru sæti. Í öðru sæti er Siguringi Sigurjóns sem vann góðan sigur með svörtu á móti hinum efnilega Hilmi Frey Heimissyni. Jafnir Siguringa eru svo tveir efnilegir Breiðablikspiltar þeir Birkir Ísak og Stephan Briem. Birkir Ísak vann Kristján Örn Elíasson örugglega í fjórðu umferð, en Stephan sat yfir í skólabúðunum að Laugum í Sælingsdal.

Í B-flokknum keppa Blikar um Unglingameistaratitil Breiðabliks. Birkir Ísak vann 2014-15 en Stephan er núverandi meistari. Þeir tefla saman í næstu umferð og gæti sú skák gefið vísbendingu um næsta meistara. Annar hluthafi í öðru sætinu er Agnar Tómas Möller sem vann Óskar Long.

B-flokkur hjá Chess-Results

 

Nánar á Skákhuganum. 

• Heimasíða Hugsins
• Chess-Results

 

Íslandsmótið í Fischer-random skák fer fram á morgun - ÖLLUM OPIÐ!

Skáksamband Íslands stendur fyrir fyrsta opinbera Íslandsmótinu í Fischer-random skák fimmtudaginn 25. janúar nk. Tilvalin æfing fyrir íslenska skákmenn Evrópumótið í Fischer-random skák fer fram í Hörpu 9. mars  á 75 ára afmælisdegi Fischers. Friðrik Ólafsson leikur fyrsta leik mótsins en mótið er hluti af hátíðarhöldunum í kringum Skákdag Íslands sem er afmælisdegi Friðrik, degi síðar. 

Teflt er í húsnæði Taflélags Reykjavíkur, Faxafeni 12, og hefst taflmennskan kl. 19:30.

Tefldar með 7 umferðir með umhugsunartímanum 5-3

Góð verðlaun verða í boði en GAMMA er styrktaraðili mótsins. 

1. 40.000 kr.
2. 25.000 kr.
3. 15.000 kr.
4. 10.000 kr.
5. 10.000 kr.

Verðlaun skiptast eftir Hort-kerfinu. 

Eftirtaldin aukaverðlaun verða í boði. 10.000 kr. í hverjum flokki: 

• Kvennaverðlaun
• Unglingaverðlaun (2002 og síðar)
• Öldungaverðlaun (1953 og fyrr)

Aukaverðlaun skiptast ekki – heldur er stuðst við Buchols-stig. Ekki er hægt að fá bæði aðal- og aukaverðlaun heldur fá menn þau sem eru hærri.

Skráning fer fram á Skák.is (guli kassinn).  

Þátttökugjöld eru kr. 1.000. Stór- og alþjóðlegir meistarar eru undanþegnir þátttökugjöldum. Helmingsafsláttur fyrir 16 ára og yngri. 

Stuðst er við FIDE-reglur um Fischer-random sem og almennar hraðskákreglur FIDE. Hvorug tveggja má nálgast hér. 

Upplýsingar um þegar skráða keppendur má finna hér.