Skákdagurinn - teflt um land allt!

Skákdagurinn verður haldinn hátíðlegur um land allt næstkomandi föstudag 26. janúar á afmæli Friðriks Ólafssonar fyrsta stórmeistara okkar Íslendinga. Friðrik sem verður 83 ára gamall hefur verið virkur við skákborðið frá því á fimmta áratug síðustu aldar og teflir enn - tekur um þessar mundir þátt í heiðursflokki á MótX-skákhátíð Skákdeildar Breiðabliks og Hugins. Friðrik var um hríð meðal bestu skákmanna heims, tefldi m.a. á hinu fræga millisvæðamóti í Portoroz en á þessu ári verða liðin 50 ár frá því móti. 

Stíft er teflt í kappskákmótum þess dagana en Skákþing Reykjavíkur, Skákþing Akureyrar, MótX-skákhátíð Skákdeildar Breiðabliks og Hugins og Meistaramót Hugins norður eru öll í gangi í þessum mánuði. Til viðbótar við kappskákmótin verða fjölmargir viðburðir haldnir á Skákdaginn og dagana kringum hann og skal hér stiklað á stóru. 

Íslandsmótið í Fischer-random fer fram á fimmtudagskvöldið. Góð verðlaun eru í mótinu og tilvalið fyrir skákmenn að hita upp fyrir Evrópumótið í Fischer-random sem fer fram samhliða Reykjavíkurskákmótinu – minningarmóti um Bobby Fischer í byrjun mars.  

Á Skákdaginn verður Helgi Ólafsson, skólastjóri Skákskóla Íslands, með fjöltefli í Landakotsskóla. Hjörvar Steinn Grétarsson heimsækir Kerhólsskóla og fjöltefli verður í Vatnsendaskóla þar sem Einar Ólafssonar sinnir skákkennslu. Akureyringar láta ekki sitt eftir liggja og standa fyrir mótum og kennslu í Lundarskóla, Brekkuskóla og Síðuskóla. Þá heimsækir Hjörleifur Halldórsson Grenivíkurskóla og verður með kennslu. 

Mikil gróska er í skáklífi grunnskóla á Suðurlandi um þessar mundir og stendur Skáksamband Íslands í samstarfi við Fischer-setrið fyrir Suðurlandsmóti grunnskólasveita í skák. 

Sundlaugartaflsett má finna víða um land og á Skákdaginn bætast í hópinn sundlaugarnar á Þingeyri og Dalvík. 

Skákdeild Fjölnis heldur TORG-mót Fjölnis á Skákdaginn. Afar vinsælt og vel sótt barna- og unglingamót sem hefur verið haldið frá árinu 2004. 

Taflfélag Reykjavíkur hefur hraðskákmótaröð á Skákdaginn sjálfan. Mótið er opið öllum skákmönnum með 2000 skákstig eða meira. Fjögur mót eru í röðinni

Heldri skákmenn höfuðborgarsvæðisins halda margir hverjir mikið upp á Friðrik og sýna honum mikinn sóma kringum Skákdaginn með hverju mótinu á fætur öðru. KR-ingar halda sitt hefðbundna árdegismót næsta laugardag klukkan 10:30 í Frostaskjóli, KR-heimili. Mánudaginn 29. janúar hefst svo kappteflið um Friðrikskónginn en það stendur í fjögur mánudagskvöld með Grand-Prix fyrirkomulagi þar sem menn safna stigum á hverju móti og besti samanlagði árangur tryggir sigurvegaranum Friðrikskónginn. Þá tefla Korpúlfar í Grafarvogi til heiðurs Friðriki fimmtudaginn næsta, 12:30 í félagsmiðstöðinni Borgum. Riddarar í Hafnarfirði, ætla að tefla í anda Friðriks í mótasyrpunni Skákhörpunni sem hefst á miðvikudaginn í Strandbergi, safnaðarheimili Hafnarfjarðarkirkju. 

Laugardaginn, 27. janúar fer fram Íslandsmót grunnskólasveita í stúlknaflokki fram í Rimaskóla. 

Mánudaginn, 29. janúar, stendur Vinaskákfélagið fyrir Friðriksmóti í Vin við Hverfisgötu. Mótið er opið öllum og hefst kl. 13. 

Sem fyrr eru það Skáksamband Íslands, Skákskóli Íslands og Skákakademía Reykjavíkur sem standa fyrir Skákdeginum í samstarfi við alla þá aðila sem heiðra Friðrik Ólafsson á hans 83. afmæli. 

Tilkynningar um viðburði og fréttir af viðburðum mega berast á [e-mail] 

Skákdeild KR og Gallerý Skák: Kappteflið um Friðrikskónginn VII.

Eins og í fyrra standa klúbbarnir saman af mótaröðinni sem fram fer næstu fjögur mánudagskvöld vestur í skáksal KR í Frostaskjóli og hefst þann  29. janúar, kl.  19.30.

Mótið er liður í stóru viðburðahaldi í tilefni af "Skákdegi  Íslands"  sem SÍ og Skákakademía Reykjavíkur standa fyrir  26. janúar á afmælisdegi Friðriks Ólafssonar, fyrsta stórmeistara okkar og heiðursborgara Reykjavíkur, sem þá  fagnar 83. árs afmæli sínu.

Um er að ræða 4ra kvölda GrandPrix mótaröð þar sem átta efstu sæti í hverju móti telja til stiga  (10-8-6-5-4-3-2-1). Keppt er um veglegan farandgrip, taflkóng úr Hallormstaðabirki, merktan og áletraðan af meistaranum. Þrjú bestu mót hvers keppanda reiknast til stiga og vinnings. Sigurvegarinn ár hvert fær nafn sitt skráð gullnu letri á stall styttunnar og fagran verðlaunagrip til eignar .

Nöfn fyrrv. sigurvegara mótaraðarinnar, þeirra Gunnars Skarphéðinssonar; Gunnars I. Birgissonar;  Gunnars Kr. Gunnarssonar, Gunnars Freys Rúnarssonar, Ólafs B. Þórssonar og Guðfinns R. Kjartanssonar prýða nú hinn sögulega grip.

Tefldar verða 9 umferðir með 10 mínútna umhugsunartíma á skákina. Mótin eru að sjálfssögðu öllum opin  óháð aldri og félagsaðild enda þótt keppendur séu ekki með í öllum mótunum.   Vegleg verðlaun fyrir efstu menn og aukavinningar fyrir aðra. Þátttökugjöld kr. 500 

Árdegismót KR helgað Skákdeginum

Næsta árdegismót Skákdeildar KR verður að þessu sinni tileinkað Skákdeginum eins og vera ber.  Allir árrisulir morgunhanar og skákmenn góðir er hvattir til að mæta og hrista af sér slenið og láta gammin geysa í anda Friðriks Ólafssonar, sem skákdagurinn er tileinkaður. 

Árdegismótin sem hafa farið vaxandi að vinsældum sl. ár og hefjast kl. 10.30 alla laugardaga. Tefldar eru 9 umferðir með 7 mínútna umhugsunartíma á skákina. Þeim lýkur um eitt leitið.

Að þessu sinni verða póstkort með mynd og frímerki Friðriks Ólafssonar í verðlaun, veitt fyrir  5 efstu sætin auk sárabótarverðlauna fyrir þann sem rekur lestina. 

Mótin í KR eru öllum opin áháð aldri. Lágt þátttökugjald fyrir utanfélagsmenn. 

Félagsheimili KR er í Frostaskjóli 2 eins og allir vita og skáksalurinn á 2. hæð.                 

Úrslit síðasta móts fylgja hér með til gamans: 

Korpúlfar tefla um Friðriksbikarinn í annað sinn

Á fimmtudaginn kemur 25. janúar, verður SKÁKDEGI ÍSLANDS þjófstartað á vikulegu skákmóti Korpúlfa, skákklúbbs eldri borgara í Grafarvogi og nágrenni í félagsmiðstöðinni BORGUM gengt Spöng. Reyndar á Friðrik Ólafsson, fyrsti stórmeistari Íslendinga, sem dagurinn er tileinkaður, ekki afmæli fyrr en daginn eftir - en viðburðir þessu tengdir dreifast yfir nokkurn tíma,  bæði fyrir og eftir skákdaginn sjálfan.       

Hjá Korpúlfum verður teflt um FRIÐRIKSBIKARINN, glæsilegan farandgrip sem klúbbnum áskotnaðist í fyrra og verðlaunapeninga með lágmynd meistarans.  Þá urðu tveir valinkunnir skákmenn að nafni LARSEN efstir, Sæbjörn sigraði og Jóhann kom næstur, Valdimar Ásmundsson þriðji. Góð þátttaka var af öllu höfuðborgarsvæðinu og Friðrik mætti á staðinn. Þess er vænst að svo verði einnig nú.  

Mótið hefst að þessu sinni kl. 12.30 og verða tefldar 10 umferðir með 10 mínútna umhugsunartíma á skákina. Allir eldri skákmenn „sem tafllmanni geta valdið“ eru eindregið hvattir til að mæta og sýna snilli sína í tilefni dagsins sem endranær.

Mótstaflan frá í fyrra:

Riddarar tefla um Skákhörpuna XI.

Hin árlega mótaröð  SKÁKHARPAN – GRAND PRIX MÓT ÖLDUNGA – hefst miðvikudaginn 24. janúar og verður tileinkuð Skákdeginum eins og undanfarin ár. Um er að ræða fjögra vikna mótaröð þar sem þrjú bestu mót keppenda telja til stiga og vinnings. 

Frá og með þessu ári hefur verið breytt um þema og er SKÁKHARPAN nú helguð komandi meisturum framtíðarinnar en SKÁKSEGLIÐ, mótaröð með sama sniði sem fram fer að hausti, hinum föllnu meisturum skákborðsins.

Það verður því slegið á létta hörpustrengi, á hvítum reitum og svörtum, í anda meistara Friðriks í Vonarhöfn, Strandbergi, Safnaðarheimili Hafnarfjarðarkirkju næstu fjóra miðvikudaga. En þar tefla eldri ástríðuskák skákmenn linnulaust allan ársins hring sér til afþreyingar og yndisauka.

Taflið hefst kl. 13 að venju og tefldar eru 11 umferðir með 10. mínútum á skákina. Lágt þátttökugjald innifelur kaffi og kruðerí meðan á tafli stendur. Allir skákmenn 60 ára og eldri velkomnir óháð þátttöku i öllum mótunumum, en tvö mót þurfa til að teljast með í keppninni um Skákhörpuna.

Hjörvar Steinn og Jóhann efstir á Skákhátíð MótX

Skákgyðjunni Caissu var fullur sómi sýndur í 2. umferð Skákhátíðar MótX í Skákmusterinu á Kópavogsvelli í síðustu viku. Mörg skemmtileg kykvendi spruttu flippspriklandi upp úr hatti töframannanna hugmyndríku þetta kvöldið. Sigur GM Jóns L. Árnasonar á Kristjáni Eðvarðssyni var glæstur. Stórmeistarinn rak smiðshöggið á skákina með snjallri leikfléttu en alkunna er að aldrei má hleypa Jóni L. í sókn – ekki einu sinni í vísi að sókn. Svipaða sögu er að segja af framvindu mála í skák IM Björgvins Jónssonar gegn CM Bárði Erni Birkissyni þar sem lagleg leikflétta Björgvins reið baggamuninn eftir langa og stranga stöðubaráttu.

Á efsta borði lagði GM Hjörvar Steinn Grétarsson IM Björn Þorfinnsson í hörkuskák þar sem Björn teygði sig fulllangt með húnvetnskri mannsfórn á h3 en Björn leggur eins og kunnugt er mikið upp úr stuðlum og höfuðstöfum í sinni taflmennsku. Á öðru borði sigraði GM Jóhann Hjartarson GM Þröst Þórhallsson eftir að Þröstur vélaði peð af andstæðingnum í byrjun tafls. Eftir miklar sviptingar kom upp endatafl sem Þresti tókst ekki að halda peði undir þrátt fyrir hetjulega viðleitni.

Óvæntustu úrslit kvöldsins voru sigur FM Halldórs Grétars Einarssonar á FM Ingvari Þór Jóhannessyni en Halldór fylgdi þar eftir góðu jafntefli við Jón L. í fyrstu umferð. Ingvar fékk betra út úr byrjuninni en síðan sneru kapparnir hvor á annan til skiptis þar til þá sundlaði en Halldór jafnaði sig fyrr af snú-snúinu og því fór sem fór. 

Þriðja umferð í A-flokki hefst þriðjudaginn 23. janúar kl. 19.30. Á efsta borði leiða saman hesta sína þeir GM Jóhann Hjartarson og IM Björgvin Jónsson en magnaðri skák þeirra á Gestamótinu í fyrra lauk með jafntefli. Á 2. borði tefla efnispiltarnir Guðmundur Halldórsson og FM Halldór Grétar Einarsson og á 3. borði mætast taktísku snillingarnir Björn Þorfinnsson og Jón L. Árnason. Næsta víst er að í þeirri orrustu verður bæði beitt stórskota- og fótgönguliði með mannfalli miklu. Á öðrum borðum verður spennan líka í algleymingi enda mannvit mikið að tafli. 

Hvítir hrafnar

Í flokki eldri skákkappa, Hvítum hröfnum, voru tefldar tvær skákir þetta kvöldið. Júlíus Friðjónsson og GM Friðrik Ólafsson skildu jafnir og sömu sögu er að segja af viðureign Björns Halldórssonar og Jóns Þorvaldssonar. Báðar skákirnar voru í jafnvægi frá upphafi. Skák Braga Halldórssonar og Jónasar Þorvaldssonar var frestað.

Þriðjudaginn 23. janúar eru tvær frestaðar skákir á dagskrá. GM Friðrik Ólafsson mætir Jóni Þorvaldssyni í úr 1. umferð og Bragi etur kappi við Jónas Þorvaldsson í skák úr 2. umferð.

B-flokkur

Eftir tvær umferðir í B-flokknum eru þrír skákmenn jafnir með fullt fús. Gauti Páll sem vann Kristján Halldórsson, Siguringi sem vann hinn unga og efnilega Óskar Víking og Birkir Karl sem vann Óskar Long. Aðrar athyglisverðar skákir úr annarri umferð var jafntefli hinna efnilegu Arons Þórs Mai og Stephans Briem og Alexander Oliver Mai náði góðu jafntefli gegn hinum reynda Kristjáni Erni Elíassyni.

Í þriðju umferð eigast Siguringi og Gauti Páll við á fyrsta borði. Á öðru borði mætir Danmörk Ástralíu, en Hilmir Freyr hefur verið búsettur í Danmörku og Birkir Karl í Ástralíu! Margar aðrar viðureignir eru athyglisverðar, t.d. skákpabbanna Agnars Tómas Möller gegn Kristófer Ómarssyni. Svo tefla saman hinar ungu og efnilegu Freyja Birkisdóttir og Batel.

Nánar á Skákhuganum. 

• Heimasíða Hugsins
• Chess-Results

 

Guðmundur með 4½ vinning eftir 6 umferðir í Floripa

Guðmundur Kjartansson (2438) hefur 4½ vinning eftir sex umferðir á alþjóðlega mótinu Floripa Chess Open sem nú er í gangi í Brasilíu. Í gær vann hann í fyrri skák dagsins gegn alþjóðlega meistarann Diego Rafael Di Berardino (2516) en tapaði í síðari skákinni fyrir stórmeistaranum Krikor Sevag Makhitarian (2529). Guðmundur er í 12.-27. sæti, aðeins hálfum vinningi á eftir efstu mönnum.

Sjöunda umferð fer fram í kvöld og hefst kl. 20. Þá teflir gummi við Douglas Da Silva Tores (2166). Hægt er að fylgjast með Íslandameistaranum á Chess 24.

Alls taka 416 skákmenn frá 14 löndum þátt í mótinu. Meðal keppenda eru 10 stórmeistarar. Guðmundur er nr. 14 í stigaröð keppenda. 

• Heimasíða mótsins
• Chess-Results
• Beinar útsendingar 

Hraðskákmótaröð Taflfélags Reykjavíkur hefst föstudaginn 26. janúar

Fyrsta mót Hraðskákmótaraðar Taflfélags Reykjavíkur fer fram föstudagskvöldið 26.janúar -á Skákdaginn- í skáksal TR að Faxafeni 12. Taflið hefst stundvíslega klukkan 19:30. Mótið er opið öllum skákmönnum með yfir 2000 skákstig, eða þeim sem hafa einhverntíman á ferlinum rofið 2000 stiga múrinn. Mótsnefnd áskilur sér rétt til þess að bjóða völdum gestum undir 2000 stigum að tefla með.

Tefldar verða níu umferðir með tímamörkunum 3+2 og verður mótið reiknað til alþjóðlegra hraðskákstiga. Þátttökugjald er 1.000kr.

Dagskrá mótaraðarinnar:

• Mót 1: 26.janúar
• Mót 2: 23.febrúar
• Mót 3: 23.mars
• Mót 4: 27.apríl

Mælst er til þess að skákmenn skrái sig í gegnum skráningarformið til þess að auðvelda skipulagningu mótsins. Einnig verður hægt að skrá sig til leiks á skákstað á mótsdegi en skráningu lýkur kl.19:20.

SKRÁNINGARFORM

Skráðir keppendur

Hannes sjóðheiður í Marianske Lazne

Stórmeistarinn Hannes Hlífar Stefánsson (2523) byrjar afar vel á alþjóðlega mótinu í Marianski Lazne í Tékklandi. Í dag vann hann sína þriðju skák í röð en fórnarlamb dagsins var rússneski FIDE-meistarinn Aram Yeriistyan (2309). Þrír vinningar í hús í þremur skákum. 

Á morgun eru tefldar tvær skákir. Sú fyrri hefst kl. 8 og síðari kl. 15. Andstæðingar morgundagsins eru Rao S V Srinath (2270) og Petr Neuman (2452). 

• Heimasíða mótsins
• Chess-Results
• Beinar útsendingar (Chess24)

Carlsen lék af sér manni en vann samt - Giri vann Mamedyarov

Það gekk mikið á í áttundu umferð Tata Steel-mótsins í Sjávarvík í gær. Magnús Carlsen (2834) lék af sér manni gegn Gawain JOnes (2640) fyrir takmarkaður bætur. Englendingum fataðist hins vegar flugið og Carlsen náði að snúa skákinni sér aftur í vil og vinna. Aserinn, sjóðheiti, Mamedyarov (2804), snöggkólnaði í gær og tapaði fyrir Anish Giri (2752).

Giri, Carlsen og Mamedyarov eru nú efstir og jafnir með 5½ vinning. Kramnik (2787) og Wesley So (2792) eru skammt undan með 5 vinninga. 

Frídagur var í dag. Veislan heldur áfram á morgun. Þá teflir Carlsen við Anand (2767), Mamedyarov við Kramnik (2787) og Giri við Matlakov (2718).

Sjá nánari umfjöllun á Chess.com. 

Myndir: Maria Emelianova/Chess.com

• Heimasíða mótsins
• Beinar útsendingar (hefjast kl. 12:30)