SÞR#4: Stefán Bergsson og Björn Hólm Birkisson einir með fullt hús

Stefán Bergsson (2093) stýrði svörtu mönnunum til sigurs gegn Hilmi Frey Heimissyni (2136) í æsispennandi skák. Stefán bauð upp á stakt peð á d5 sem hann síðar fórnaði til guðanna. Tveimur peðum undir, með vafasama kóngsstöðu en ógnvekjandi sóknarfæri, skellti Stefán fram sleggjunni 22…Be2!! og skyndilega var ballið búið (sjá stöðumynd eftir 22.Hab1).

Björn Hólm Birkisson (2084) beitti lævísu bragði gegn Caro Kann vörn Lenku Ptáčníkovu (2218). Hugsanlega hefur minnið brugðist hinum unga skákmeistara því hefði hann fært maddömmuna frá h5 á f3 strax í 9.leik, líkt og fræðibækur kveða á um, þá hefði skákin að öllum líkindum orðið stutt. Í 18.leik missti Björn Hólm af allt að því röktum vinning með taktíska högginu 18.Hhe1. Með tékknesku töfrabragði tókst Lenku að lifa af áhlaupið og komast í endatafl sem gaf betri jafnteflismöguleika. Björn Hólm er hins vegar sprenglærður endataflssérfræðingur líkt og allir sem setið hafa á skólabekk í endataflsháskóla Torfa Leóssonar. Björn Hólm tefldi endataflið af nákvæmni og hafði að lokum sigur.

Hrafn Loftsson (2163) gefur ekkert eftir á pallinum og vann í dag Júlíus Friðjónsson (2137). Mai-bræður, Aron Þór (2066) og Alexander (1970), gerðu báðir jafntefli með hvítu, Aron gegn Braga Halldórssyni (2082) og Alexander gegn Björgvini Víglundssyni (2167). Þá vann Þorvarður Fannar Ólafsson (2178) með hvítu gegn Birki Karli Sigurðssyni (1934).

Þeir stigaháu komust flestir á beinu brautina í þessari umferð. Einar Hjalti Jensson (2336), Sigurbjörn J. Björnsson (2288), Dagur Ragnarsson (2332) og Vignir Vatnar Stefánsson (2304) unnu allir í dag og eru á hraðferð upp töfluna. Fyrrum Reykjavíkurmeistarinn Bragi Þorfinnsson (2426) hikstaði þó hressilega og varð að gera sér að góðu jafntefli gegn Jóhanni H. Ragnarssyni (1991)..

Á neðri borðum gekk á ýmsu líkt og fyrri daginn. Rektor Menntaskólans við Hamrahlíð, Lárus H. Bjarnason (1539), hélt áfram góðu gengi sínu og gerði jafntefli við körfuboltasnillinginn Óskar Víking Davíðsson (1854). Óvæntustu úrslit umferðarinnar urðu á 15.borði þar sem Stefán Orri Davíðsson (1280) stýrði svarta hernum til sigurs gegn Óskari Haraldssyni (1733) en á þeim munar 453 skákstigum. Einnig var eftirtektarverður sigur Þorsteins Magnússonar (1425) á Sigurlaugu R. Friðþjófsdóttur (1734). Þá gerði Óskar Long Einarsson (1785) gott jafntefli við Jóhann Ingvason (2161).

Eftir 4.umferð eru aðeins tveir skákmenn með fullt hús, þeir Stefán Bergsson og Björn Hólm Birkisson. Skákáhugamönnum er ráðlagt að spenna sætisólar á miðvikudagskvöldið því þá mætast þeir og getur aðeins annar þeirra -augljóslega- staðið upp frá þeirri viðureign með fullt hús vinninga. Það er því vel úti látinn gortréttur í húfi.

Klukkur 5.umferðar fara í gang klukkan 19:30 á miðvikudagskvöld. Sem fyrr verður heitt á könnunni og nýbakaðar vöfflur í eldhúsinu fyrir gesti. Beinar útsendingar verða sem fyrr frá níu efstu borðunum.

Nánari upplýsingar um úrslit og stöðu ásamt innslegnum skákum má nálgast á Chess-Results.

Sjá nánar á heimasíðu TR.

 

• Heimasíða TR
• Chess-Results
• Beinar útsendingar (Chess24)

Svartur sunnudagur í Skákheimilinu - Andri og Jón Kristinn með fullt hús

Þriðju umferð Skákþings Akureyrar lauk í dag. Í öllum þremur skákunum sýndi svartur yfirburði sína. Jón Kristinn vann Sigurð, Andri vann Harald og Rúnar lagði Benedikt. Allt hörkuskákir.

Þeir Andri Freyr og Jón Kristinn hafa nú unnið allar þrjár skákir sínar og hafa þegar eins og hálfs vinnings forskot á þriðja menn, sem er Rúnar. Hann hefur reyndar bara teflt tvær skákir, þannig að bilið er ekki jafn breitt og það sýnist. 

Fjórða umferð verður háð nk. sunnudag 28. janúar og þá eigast við:

Rúnar og Sigurður

Jón Kristinn og Haraldur

Símon og Benedikt

Andri situr yfir. 

Sjá Chess-results

Næsta mót verður á fimmtudagskvöld þegar TM-mótaröðinni verður fram haldið. Taflið hefst kl. 20. 

 

Mótið á Chess-results  

Heimasíða Skákfélags Akureyrar

Skákþing Hugins norður hafið – Tómas og Sigurður efstir

Skákþing Hugins í Þingeyjarsýslu hófst um sl. helgi. 11 skákmenn taka þátt í mótinu og er það teflt í tveim riðlum. Í Húsavíkur-riðli eru 6 keppendur sem tefla allir við alla. Þegar keppni þar er rúmlega hálfnuð er Sigurður Daníelsson efstur með fjóra vinninga af fimm mögulegurm. Sigurður hefur lokið öllum sínum skákum og tapaði aðeins einni skák, gegn Smára Sigurðssyni. Smári Sigurðsson er með fullt hús eftir þrjár skákir.en þar sem hann á eftir tvær skákir getur hann náð efsta sætinu í riðlinum vinni hann þær. Sex skákum er ólokið í riðlinum og skoða má stöðuna í Húsavíkur-riðli hér 

Í Vestur-riðli, sem er tefldur á Vöglum í Fnjóskadal, eru fimm keppendur. Tómas Veigar Sigurðarson er efstur með þrjá vinninga eftir þrjár skákir. Næstur honum er Hermann Aðalsteinsson með 1,5 vinninga, en Hermann hefur lokið öllum sínum fjórum skákum. Í Vestur-riðli eru fjórar skákir eftir og skoða má stöðuna í Vestur-riðli hér.

Þegar öllum skákunum í riðlunum er lokið, fer fram Úrslitakeppni milli riðlanna, þannig að efsti maður úr hvorum riðli tefla tveggja skáka einvígi um sigur í mótinu og þar með meistaratitil félagsins 2018. Þeir sem lenda í öðru sæti í riðlunum tefla um þriðja sætið og svo koll af kolli. Verði jafnt eftir þessar tvær skákir, tefla menn hraðskákir þar til úrslit fást.

Tímamörk bæði í riðlakeppninni og í úrslitakeppninni eru 90mín +30sek/leik. Reiknað er með að úrslitakeppnin fari fram í febrúar, en nánari tímasetning liggur ekki fyrir.

• Heimasíða Hugins
• Chess-Results

Shakh sjóðheitur í Sjávarvík

Heitasti skákmaðurinn í Sjávarvík og raunar í heiminum þessa dagana er án efa Aserinn brosmildi, Shakhriyar Mamedyarov (2804). Hann hefur nú unnið þrjár skákir í röð en fórnarlamb gærdagsins var Wei Yi (2743). Eftir sjö umferðir hefur hann 5½ vinning og hefur vinningsforskot á næstu menn sem eru Giri (2752), Kramnik (2787), So (2792) og heimsmeistarinn Magnús Carlsen (2834). 

Aserinn er nú næststigahæsti skákmaður heims á læf-listanum. Hefur þar 2817,5 skákstig og hefur tæplega 20 stig á Wesley So sem er þriðji. Carlsen er efstur með 2835,4 skákstig.

Áttunda umferð hefst núna kl. 12:30. Mamedyarov mætir heimamanninum Anish Giri og Carlsen teflir við Gawain Jones (2640).

Myndir: Maria Emelianova/Chess.com

• Heimasíða mótsins
• Beinar útsendingar (hefjast kl. 12:30)

 

Hannes hóf seinna mótið í Tékklandi með sigri

Stórmeistarinn Hannes Hlífar Stefánsson (2523) hóf í gær þátttöku á alþjóðlega mótinu Open Marianske Lazne. Hannes teflir þar í lokuðum 10 manna flokki þar sem hann er næststigahæstur. Í fyrstu umferð sem fram fór í gær vann hann tékkneska alþjóðlega meistarann Thai Dai van Nguyen (2510). 

Önnur umferð fer fram í dag og þá teflir Hannes við heimamanninn Igor Janik (2411). Umferðin hefst kl. 16 og verður hægt að fylgjast með Hannesi á beinni á Chess24.

• Heimasíða mótsins
• Chess-Results
• Beinar útsendingar (Chess24)

Guðmundur með 2½ vinning í Floripa

Guðmundur Kjartansson (2438) situr þessa dagana að tafli á alþjóðlega mótinu Floripa Chess Open í Brasilíu. Eftir 3 umferðir hefur Gummi hlotið 2½ vinning. 

Ritstjóri getur hvorki fundið vefsíðu frá mótinu né beinar útsendingar. Mótið er þó á Chess-Results.

Alls taka 416 skákmenn frá 14 löndum þátt í mótinu. Meðal keppenda eru 10 stórmeistarar. Guðmundur er nr. 14 í stigaröð keppenda. 

Skákþáttur Morgunblaðsins: "Já, ég lét þig sleppa," sagði Friðrik

Óhætt er að fullyrða að skákvertíðin 2018 byrji með látum. Tveim dögum eftir að alþjóðlegu unglingamóti SÍ og Skákskólans sem haldið var til minningar um Steinþór Baldursson lauk í Stúkunni á Kópavogsvelli með sigri Hollendingsins Thomas Beerdsen hófst í sömu salarkynnum Skákhátíð Kópavogs kostuð af MótX, en mótshaldið er að samvinnuverkefni Hugins og Skákdeildar Breiðabliks. Jón Þorvaldsson á mestan heiðurinn af þessari framkvæmd og hefur með fortölulist mikilli fengið til leiks flesta af sterkustu skákmönnum landsins, t.d. stórmeistarana Hjörvar Stein Grétarsson, Jóhann Hjartarson, Hannes Hlífar Stefánsson, Jón L. Árnason, Helga Áss Grétarsson og Þröst Þórhallsson.

Í B-flokki hófu 33 skákmenn keppni og þriðji flokkur Skákhátíðarinnar sem fengið hefur nafnið Hvítir hrafnar skartar sex skákmönnum 60 ára og eldri og þar fer fremstur Friðrik Ólafsson. Jón Þorvaldsson fékk gamlan vopnabróður Friðriks, stórmeistarann Guðmund Sigurjónsson, til að leika fyrsta leikinn á borði Friðriks. Baksviðs rifjaðist upp að í vor verða 50 ár liðin síðan þessir tveir tefldu fræga maraþonskák á Fiske-mótinu í Oddfellow-húsinu við Vonarstræti í Reykjavík. Viðureigninni lauk með jafntefli eftir 109 leiki: „Já, ég lét þig sleppa,“ sagði Friðrik þegar skákina bar á góma.

„Góð vörn,“ áréttaði Guðmundur og brosti.

Áður en keppni á öðrum borðum hófst sagði bæjarstjórinn í Kópavogi nokkur orð og fagnaði sérstaklega því blómlega skáklífi sem þrifist í Kópavogi.

Skákþing Reykjavíkur hófst á miðvikudagskvöldið í húsakynnum TR og þar eru 57 skákmenn skráðir til leiks í efsta flokki. Stigahæstir eru Bragi Þorfinnsson, Einar Hjalti Jensson, Dagur Ragnarsson og Vignir Vatnar Stefánsson.

 

Vignir komst í efsta sætið

Með því að vinna rússneska stórmeistarann Kunin í sjöundu umferð alþjóðlega mótsins í Stuttgart í síðustu viku komst hinn 14 ára gamli Vignir Vatnar Stefánsson í efsta sætið þegar tvær umferðir voru eftir og hafði þá hlotið 6 vinninga af 7 mögulegum. Hann þurfti aðeins eitt jafntefli til að tryggja sér áfanga að alþjóðlegum meistaratitli en tapaði báðum skákunum í lokaumferðunum. Guðmundur Kjartansson hlaut 6½ vinning og hafnaði í 10. sæti.

 

Lítum á sigur Vignis yfir Kunin, en þar gekk á ýmsu í flóknu miðtafli:

Vignir Vatnar Stefánsson – Vitalí Kunin

Philidors-vörn

1. e4 d6 2. d4 Rf6 3. Rc3 Rbd7 4. Rf3 e5 5. Bc4 Be7 6. O-O O-O 7. He1 c6 8. a4 exd4 9. Rxd4 Re5 10. Be2 He8 11. f4 Rg6 12. g3 Dc7 13. Bf3 Bd7 14. Be3 Had8 15. b3 Db8 16. Kg2 d5 17. exd5 cxd5 18. Dd4 b6 19. a5 Bc5 20. Rxc5 bxc5 21. Dxc5 Dxb2 22. Ha2?

Mun sterkara var 22. Rxd5.

22. ... Db8 23. Hb1 Da8 24. a6 Hc8 25. Dd4 Re7?

Og hér var 25. ... Bg4 firnasterkur leikur.

26. Bf2 Bg4 27. Hb7 Bxf3+ 28. Kxf3 Hc4 29. Dd3 Dc8 30. Rb5 Dg4+ 31. Kg2 Rg6 32. Kh1 Re4 33. Bg1 h5 34. Ha3 Rf6 35. Rd6 He1

36. Rxc4 dxc4?

Hann gat leikið 36. ... Re4 með hótuninni 37. ... Rf2+ og 37. Df3 er svarað með 37. ... Rh4! með vinningsstöðu . Nú snýst taflið við.

37. Df3 Df5 38. He3 Hxe3 39. Bxe3 Re5 40. Dg2 Reg4 41. Bg1 Re4 42. He7 Rgf6 43. He5 Dg6 44. Bxa7 h4 45. Bg1 Rxg3+ 46. hxg3 hxg3 47. a7 Dh6+ 48. Bh2 Rg4 49. a8D+ Kh7 50. Dxg3 Rf2+ 51. Dxf2 Dc6+ 52. Dxc6

- og svartur gafst upp.

 

 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 13. janúar 2018.

Skákþættir Morgunblaðsins

SÞR #3: Mikið um óvænt úrslit (framhald) – en bara þrír eftir með fullt hús

Það voru bara þeir Hilmir Freyr Heimisson, Hrafn Loftsson og Bragi Halldórsson sem náðu "eðlilegum" úrslitum af þeim sem voru stigahærri og voru að tefla á efstu níu borðunum (en frá þeim eru beinar útsendingar) í þriðju umferð sem fram fór á miðvikudagskvöld.

Á efsta borði fékk Þorvarður F. Ólafsson (2178) fremur óvirka Benoni-stöðu upp úr Enskum leik í viðureign sinni við Stefán Bergsson (2093) og við að reyna að hrista fram eitthvert mótspil varð Þorvarði fótaskortur og Stefán fékk léttunnið endatafl.

Björgvin Víglundsson (2167) brást líklega aðeins of rólega við virkri taflmennsku Björns Hólms Birkissonar (2084) í byrjun og miðtafli. Eftir flækjur í miðtafli reyndust hrókar Björns njóta sín mun betur en drottning Björgvins í endataflinu. Á þriðja borði áttust við Júlíus Friðjónsson (2137) og Aron Þór Mai (2066) en í þeirri skák var stigamunur einna minnstur af viðureignunum á efstu borðum. Og niðurstaðan jafntefli eftir að Aroni hafði tekist að treysta stöðu sem leit fremur tætingslega út eftir byrjunina.

Þeir nafnarnir Einar Hjalti Jensson (2336) og Einar Valdimarsson (2023) tefldu í botn og stigu frá borði með kóngana eina eftir. Sigurbjörn Björnsson (2288) fórnaði peði til að opna kóngsstöðuna hjá Eiríki K. Björnssyni (1934) í tímahraki beggja en færin reyndust ekki nóg og þá átti sá síðarnefndi valdað frípeð hinum megin á borðinu sem réði þá úrslitum.

Það var þó ekki bara í beinni sem óvænt úrslit litu dagsins ljós. Þannig tókst Braga Þorfinnssyni (2426) ekki að koma boltanum í mark með svörtu hjá reynsluboltanum Ögmundi Kristinssyni (2005), né Jóhanni Ingvasyni (2161) með hvítu hjá Óskari Haraldssyni (1733). Loks hafði Hjálmar Sigurvaldason (1491) sigur með hvítu gegn Óskari Long Einarssyni (1785) sem hefur annars verið á siglingu upp stigalistann að undanförnu.

Vegna óvæntra úrslita í þessari umferð og þeim sem á undan voru, sem og leyfa sem sumir af sterkari skákmönnunum hafa tekið, eru þeir sterkustu ekki allir farnir að safnast við toppinn enn (það gerist nú yfirleitt eftir því sem líður á mót…) en þátttakendum með fullt hús vinninga fækkaði um heila fimm í þessari umferð. Það eru bara þrír slíkir eftir; tveir af þeim, þeir Hilmir Freyr Heimisson og Stefán Bergsson, mætast á efsta borði í næstu umferð en sá þriðji, Björn Hólm Birkisson mætir Lenku Ptáčníkovu (sem hefur reyndar ekki misst neitt niður ennþá en á frestaða skák við Ögmund Kristinsson úr 2. umferð).

Fjórða umferðin hefst kl. 13 n.k. sunnudag (21. janúar) í Skákhöll TR í Faxafeni.

Nánar um úrslit, stöðu og pörun á Chess-Results en þar má líka nálgast snilldina, mistökin og tilþrifin í skákunum sjálfum.

Sjá nánar á heimasíðu TR.

 

• Heimasíða TR
• Chess-Results
• Beinar útsendingar (Chess24)

Friðriksmót Vinaskákfélagsins 2018

Friðriksmót Vinaskákfélagsins verður haldið mánudaginn 29 janúar kl: 13, í Vin að Hverfisgötu 47. Mótið er haldið vegna afmæli Friðriks Ólafsson fyrsta stórmeistara Íslands, en hann á afmæli 26 janúar og verður 83 ára þá. Tefldar verða 6 umferðir með 7 mínútur á skák. Skákstjóri verður Hörður Jónasson. Mótið verður reiknað til hraðskákstiga.

Í hléi verður boðið upp á kaffi og vöfflur. Góð verðlaun verða í boði. Þið getið skráð ykkur á mótið á gula kassanum efst á síðunni á skak.is. Einnig getið þið skráð ykkur á staðnum.

Allir velkomnir!!

 

 

Hannes endaði á tapi í Prag

Stórmeistarinn Hannes Hlífar Stefánsson (2523) tapaði fyrir rússneska FIDE-meistaranum Ilya Chekletsov (2373) í áttundu og næstsíðustu umferð opna mótsins í Prag. Hannes náði sér ekki strik, enda þjáður af tannverkjum, víxlaði leikjum í upphafi skákar. Hann ákvað að tefla ekki lokaumferðina vegna verkja. Hannes hlaut 6 vinninga í 8 tefldum skákum. Þrátt fyrir tapið í lokaumferðinni hækkar hann um 1 skákstig fyrir frammistöðuna.

Hannes heldur á annað mót í Tékklandi sem hefst á morgun. Teflt er í Marienbad. 

 

• Heimasíða mótsins
• Chess-Results
• Beinar útsendingar