Reykjavik Puffins með jafntefli við franska sveit með MVL í fararbroddi!

Í gærkvöldi hófst keppnistímabilið í hinni svokölluðu PRO Chess League sem er deild sem keyrð er af Chess.com. PRO stendur fyrir Professional Rapid Online og vísar til þess að skákirnar eru atskákir með 15+2 tímamörkum.

Deildin er þannig upp byggð að skipt er niður í fjóra átta liða riðla eftir heimshlutum (Atlantic, Central, Pacific og Eastern) og keppa þau innbyrðis. Hvert lið samanstendur af skákmönnum sem búa í þeirri borg sem liðið er frá eða tengjast því á einhvern hátt. Hverju liði er jafnframt heimilt að fá til liðs við sig "free agent" eða keppendur sem búa annarsstaðar í heiminum og því eru flestir af bestu skákmönnum heims skráðir í einhver lið.

Íslenka liðið, Reykjavík Puffins, er í eigu Ingvar Þórs Jóhannessonar og Björns Þorfinnssonar og sjá þeir um rekstur liðsins.

Fyrsta viðureignin í gær var gegn Marseille Migraines og var þar svo sannarlega höfuðverkur á ferðinni! Fyrirfram voru Frakkarnir taldir sigurstranglegir enda með einn besta skákmann heims, Maxime Vachier-Lagrave (MVL) innan sinna raða. Jafnframt var hans helsti meðreiðarsveinn Etienne Bacrot sem oft hefur verið yfir 2700 elóstigum og var sterkasti skákmaður Frakka þar til MVL kom á sjónarsviðið.

Reglur keppninnar eru þó skemmtilegar að því leyti að hvert lið má ekki hafa meðalstig yfir 2500 skákstigum. Nokkrar undantekningar eru á þeirri reglu og t.d. er veittur afsláttur á stigum allra stigahæstu skákmanna heims og bónus fyrir að vera með kvenmenn í liðinu svo eitthvað sé nefnt. Meðalstig Frakkanna voru því aðeins yfir 2500 stigum á meðan Puffins liðar voru í rúmum 2480 í meðalstigum liðsmanna. Veikasti hlekkur Frakkanna var efnilegur 11 ára drengur með um 1900 skákstig en ljóst var snemma að styrkleiki hans var mun hærri en það. Engu að síður var leikáætlun Puffins manna að hamra á litla guttanum og ná svo að lágmarki einum punkti í hinum þremur skákunum í hverri umferð.

Teflt er á fjórum borðum og tefla allir meðlimir sveitanna innbyrðis og því alls 16 vinningar í boði.

1. umferðin fór mjög skemmtilega af stað og setti Bragi Þorfinnsson tóninn með algjörri slátrun gegn Etienne Bacrot í einna af skákum dagsins!

Big win from IM Bragi Thorfinsson of the @RvkPuffins vs the @MarseilleMigs!

Playing White he goes for the gusto with a huge pawn attack and finishes sacrificially!#prochess pic.twitter.com/qzdWTOZxGX

— PROChessLeague (@PROChessLeague) January 18, 2018

 

Bragi og Etienne mættust einmitt í Disney móti árið 1993 sællar minningar fyrir Braga og ákvað hann að vera ekkert að sleppa takinu þó að ferill Bacrot hefði verið eilítið farsælli eftir það ævintýri!

Hjörvar þurfti að hafa mikið fyrir að leggja stigalægsta Frakkann og aðrar skákir töpuðust. Björn lá í endatafli gegn MVL sem hafði betra tafl lengst af þó Björn hefði verið mjög nálægt því að ná jafnteflinu. Helgi náði sér ekki á strik gegn Moussard og staðan eftir 1. umferð því 2-2.

Í annarri umferð lagði Helgi þann stigalægsta með laglegu taktísku skoti:

19.Rxd5! og svartur tapar peði þar sem dráp á d5 er svarað með Bxd5+ og svo slær hvítur á e8 tvisvar og vinnur lið.

Björn var að verjast vel með svörtu gegn Bacrot og líklegast jafntefli í augsýn þegar Frakkinn lék skyndilega heilum hrók í dauðann! Hjörvar fylgdi svo eftir með góðum sigri en Bragi tapaði gegn MVL.

Góð umferð hjá Puffins, 3-1 og staðan því 5-3!

Þriðja umferðin hófst á besta veg þegar Bragi lagði Marc Andria Maurizzi og staðan orðin 6-3 Puffins í vil! Hér voru áhorfendur farnir að veita viðureigninni verðskuldaða athygli enda stefni hér í mjög óvænt úrslit!

Helgi Ólafsson varðist glæsilega gegn MVL í mjög athyglisverðri skák þar sem Helgi stóð á tímabili betur. Hér voru Puffins menn komnir í 6.5 vinning og tvær skákir eftir í þriðju umferðinni og virtist vera að Puffins stæðu til vinnings í þeim báðum! Hjörvar sótti hart að Bacrot og Björn var liði yfir.....en þá dundi ógæfan yfir!

Bacrot í algjörri nauðvörn síðustu leiki með hvítu fann hér 36.Hxf7! sem bjargar taflinu. Hjörvar hefði líklegast getað náð jafntefli þar með bestu vörn en lenti í mátneti. Á nánast sama tíma lenti Björn í óvæntu mátneti líka og væntingarnar kramdar á nanósekúndu! Eftir þennan viðsnúning stóðu leikar 6.5-5.5 fyrir Puffins eftir þriðju umferðina.

Ljóst var að síðustu fjórar skákirnar yrðu æsispennandi. Bragi lék fljótlega illa af sér og tapaði peði fyrir litlar bætur. Frakkinn sigldi því örugglega í höfn og staðan því 6.5-6.5. Nú þurftum við að ná góðum punktum gegn þeirra bestu mönnum. Slæmu fréttirnar hættu ekki þegar Björn Þorfinnsson lék illa af sér og var orðinn peði undir og með vel rangstæðan riddara sem átti á hættu að komast ekki í heimahöfn. Á einhvern ótrúlegan hátt náði Björn að snúa á andstæðing sinn og loks að fella hann á tíma....við mikinn fögnuð liðsstjóra Puffins sem sá um beina útsendingu á netinu:

Nú voru tvær skákir eftir og báðar tvísýnar. Hjörvar virtist aldrei í taphættu gegn MVL og raunin varð sú að hann náði jafntefli þar og tryggði okkur stöðuna 8-7 og því ljóst að allt var undir í síðustu skákinni milli Helga og Bacrot. Þar náði Bacrot að rétta úr kútnum eftir erfiða byrjun og sneri á Helga og tryggði Frökkum að okkar mati heppnis jafntefli!

 

Frétt Chess.com

 

Puffins sendu út beina útsendingu á netinu en því miður láðist að geyma af henni afrit. Því verður kippt í liðinn næst og útsendingin auglýst betur næst enda gekk hún vel upp og menn ánægðir með hana. Enn er hægt að nálgast útsendingu Chess.com en þar er farið yfir Central  deildina (okkar) en skákir Puffins manna voru mikið í sviðsljósinu í þeirri útsendingu:

Bein útsending Chess.com

Heimasíða PRO Chess League

TORG skákmót Fjölnis verður haldið 26. janúar á Skákdegi Íslands – Ókeypis þátttaka

Skákdeild Fjölnis hefur staðið fyrir afar glæsilegu TORG – skákmóti, hvert ár síðan 2004. Þetta er eitt allra vinsælasta barna-og unglingaskákmót landsins og er ætlað öllum áhugasömum grunnskólanemendum í Grafarvogi og á landinu öllu. Teflt er um verðlaunagripi og 30 verðlaun eða happadrættisvinninga. Teflt er í hátíðarsal Rimaskóla og hefst skákmótið kl. 15:00 föstudaginn 26. janúar og lýkur sama dag um kl 17:00. Skráning á staðnum og því heppilegt að allir keppendur mæti korteri fyrir keppni.

TORG skákmótið ber að þessu sinni upp á Skákdag Íslands 26. janúar sem er afmælisdagur Friðriks Ólafssonar fyrsta stórmeistara Íslands í skák. Friðrik verður 83 ára þennan dag og verður honum boðið að vera viðstaddur mótið sem heiðursgestur og fylgjast með æsku Íslands að tafli. Þátttaka á þessu glæsilega móti er ókeypis. Hagkaup og Emmess ís eru styrktaraðilar mótsins. Fyrirtækin gefa fjölda vinninga og bjóða öllum þátttakendum upp á ís, drykk og nammi í skákhléi. Fyrirtækin á Torginu við Hverafold gefa einnig vinninga til mótsins, gjafabréf á pítsur, bækur, tískufatnað ofl.  Foreldrar sem eru meðvitaðir um áhuga barna sinna á skáklistinni ættu að hvetja börn sín til að taka þátt í þessu vinsæla skákmóti og taka tímann frá. Foreldrar eru einnig velkomnir að fylgjast með og þiggja kaffiveitingar á staðnum. Grunnskólanemendur, fjölmennum á skemmtileg skákmót í Rimaskóla á Skákdegi Íslands föstudaginn 26. janúar kl. 15.00 – 17:00.  

 

Jón Kristinn í forystu Skákþings Akureyrar

Önnur umferð Skákþings Akureyrar fór fram í gærkvöldi, 18. janúar. Úrslit:

Andri-Sigurður E        1-0

Jón Kristinn-Benedikt   1-0

Rúnar-Símon             1/2

 

Andri vann öruggan Sigur(ð) eftir að sá síðarnefndi tapaði skiptamun í miðtaflinu, bótalaust.  Þá vann fráfarandi meistari líka Benedikt örugglega. Eftir þetta sátu þeir Rúnar og Símon lengi einir að tafli. Tefldi sá fyrrnefndi til sigurs og hafði lengi vel smávægilega stöðuyfirburði. Símon tókst þá með klókindum að einfalda taflið.  Undir lokin áttust þeir við í hrókseendatafli fjögur peð gegn þremur á sama væng og var umframpeðið í liði Fidemeistarans. Símon varðist þó vel og náði jafntefli eftir tæpa 80 leiki. 

Þeir Jón Kristinn og Andri hafa unnið báðar sínar skákir. Sigurður hefur einn vinning og Rúnar og Símon hálfan og á sá fyrrnefndi skák til góða þar sem hann sat yfir í upphafsumferðinni. 

Næst verður teflt sunnudaginn 21. janúar og þá eigast við:

Benedikt og Rúnar

Sigurður og Jón Kristinn

Haraldur og Andri

Símon situr hjá. 

 

Mótið á Chess-results  

Heimasíða Skákfélags Akureyrar

Íslandsmótið í Fischer-random skák fer fram eftir viku

Skáksamband Íslands stendur fyrir fyrsta opinbera Íslandsmótinu í Fischer-random skák fimmtudaginn 25. janúar nk. Tilvalin æfing fyrir íslenska skákmenn Evrópumótið í Fischer-random skák fer fram í Hörpu 9. mars  á 75 ára afmælisdegi Fischers. Friðrik Ólafsson leikur fyrsta leik mótsins en mótið er hluti af hátíðarhöldunum í kringum Skákdag Íslands sem er afmælisdegi Friðrik, degi síðar. 

Teflt er í húsnæði Taflélags Reykjavíkur, Faxafeni 12, og hefst taflmennskan kl. 19:30.

Tefldar með 7 umferðir með umhugsunartímanum 5-3

Góð verðlaun verða í boði en GAMMA er styrktaraðili mótsins. 

1. 40.000 kr.
2. 25.000 kr.
3. 15.000 kr.
4. 10.000 kr.
5. 10.000 kr.

Verðlaun skiptast eftir Hort-kerfinu. 

Eftirtaldin aukaverðlaun verða í boði. 10.000 kr. í hverjum flokki: 

• Kvennaverðlaun
• Unglingaverðlaun (2002 og síðar)
• Öldungaverðlaun (1953 og fyrr)

Aukaverðlaun skiptast ekki – heldur er stuðst við Buchols-stig. Ekki er hægt að fá bæði aðal- og aukaverðlaun heldur fá menn þau sem eru hærri.

Skráning fer fram á Skák.is (guli kassinn).  

Þátttökugjöld eru kr. 1.000. Stór- og alþjóðlegir meistarar eru undanþegnir þátttökugjöldum. Helmingsafsláttur fyrir 16 ára og yngri. 

Stuðst er við FIDE-reglur um Fischer-random sem og almennar hraðskákreglur FIDE. Hvorug tveggja má nálgast hér. 

Upplýsingar um þegar skráða keppendur má finna hér. 

Mamedyarov efstur ásamt Giri og Anand

Íslandsvinurinn Shakhriyar Mamedyarov (2804) bættist við í hóp efstu manna á Tata Steel-mótinu með sigri á Caruana (2811). Aserinn brosmildi er nú kominn í annað sæti á "læf-listanum" og er þar eini maðurinn ásamt Carlsen með meira en 2800 skákstig. Anish Giri (2752) og Vishy Anand (2767) héldu sig jafnteflin í gær. Allir hafa þeir 3½ vinning eftir fimm umferðir. Heimsmeistarinn, Magnús Carlsen (2834) er þar skammt undan með 3 vinninga ásamt Vladimir Kramnik (2787). Þeir gerðu jafntefli í innbyrðis skák í gær. 

Í gær hittu þeir fígúrur úr Sesamstræti - alias muppets. 

Ítarlega frásögn frá gangi mála má finna á Chess.com.

Frídagur er í dag vegna umferðar á Skákþingi Akureyrar. Veislan í Sjávarvík heldur áfram á morgun. Giri og Anand mætast og spáir ritstjóri jafntefli. Carlsen mætir Svidler (2768) og Mamedyarov teflir við annan afar brosmildan, Indverjann Adhiban (2665). 

Myndir: Maria Emelianova/Chess.com

• Heimasíða mótsins
• Beinar útsendingar (hefjast kl. 12:30)

 

Hannes í 1.-4. sæti í Prag

Stórmeistarinn Hannes Hlífar Stefánsson (2523) gerði jafntefli við slóvakíska stórmeistarann Milan Parcher (2444) í sjöundu umferð Prag Open í gær. Hannes er í 1.-4. sæti á mótinu. Áttunda og næstsíðasta umferð fer fram í dag og þá teflir Hannes við rússneska FIDE-meistarann Ilya Chekletsov (2373). 

Umferðin hefst kl. 15. Hægt er að fylgjast með Hannesi beint á Chess24.

226 skákmenn frá 32 löndum taka þátt í mótinu. Þar af eru 10 stórmeistarar. Hannes er næststigahæstur keppenda.  

• Heimasíða mótsins
• Chess-Results
• Beinar útsendingar

Hannes vann ekki í gær - efstur ásamt Pacher

Stórmeistarinn Hannes Hlífar Stefánsson (2523) gerði jafntefli við slóvakíska stórmeistarann Marian Jurcik (2460) í sjöttu umferð alþjóðlega mótsins í Prag í gær. Sigurganga Hannesar stöðvuð eftir 5 sigurskákir í röð - sex ef fyrsta umferð MótX skákhátíðarinnar er talin með. Hannes hefur 5½ vinning og er í 1.-2. sæti ásamt öðrum slóvakískum stórmeistara, Milan Parcher (2444). 

Sjöunda umferð hefst á eftir kl. 15. Hægt er að fylgjast með Hannesi beint á Chess24.

226 skákmenn frá 32 löndum taka þátt í mótinu. Þar af eru 10 stórmeistarar. Hannes er næststigahæstur keppenda.  

• Heimasíða mótsins
• Chess-Results
• Beinar útsendingar

80. Skákþing Akureyrar hafið!

Skákþing Akureyrar, hið 80. í röðinni hófst sunnudaginn 14. janúar kl. 13. Alls eru sjö keppendur skráðir til leiks, sem er mun færra en undanfarin ár, en mótið er góðmennt engu að síður. Það eru í farabroddi meistari síðasta árs, Jón Kristinn Þorgeirsson og þarf enginn að veltast í vafa um það á hvaða sæti hann stefnir í þessu móti. Víst er að "gamalkunnur" meistari, sem kemur nú aftur til leiks eftir að hafa gert nokkurra ára hlé á þátttöku í Skákþinginu, Rúnar Sigurpálsson, stefnir á sama sæti. Það gera auðvitað aðrir keppendur líka, en þessir tveir eru stigahæstir og eru auk þess einu keppendurnir sem skarta hinum veglega titli FIDE-meistari (FM). 

Tveimur skákum er lokið úr fyrstu umferð:

Símon Þórhallsson-Jón Kristinn Þorgeirsson    0-1

Sigurður Eiríksson-Haraldur Haraldsson        1-0

Þeir Andri Freyr Björgvinsson og Benedikt Stefánsson tefla sína skák 17. janúar.

Annarri umferð verður svo hleypt af stokkunum fimmtudaginn 18. janúar og hefst kl. 18. Þá eigast þessir við:

Rúnar-Símon

Jón Kristinn-Benedikt

Andri-Sigurður

Haraldur situr yfir.

Mótið á Chess-results  

Heimasíða Skákfélags Akureyrar

Anand með glæsisigur á Caruana - efstur ásamt Giri

Vishy Anand (2767) vann  sigur á Caruana (2811), með glæsilegri drottningafórn, í þriðju umferð Tata Steel-mótsins í Sjávarvík í gær. Anand er nú efstur ásamt Anish Giri með 2½ vinning. Íslandsvinurinn Gawain Jones (2640), sem reyndar verður ekki meðal keppenda á GAMMA Reykjavíkurskákmótinu í ár, vann nýjasta Íslandsvininn Baskaran Adhiban (2655) sem mun hins vegar taka þátt.  

Lok skákar Anands og Caruana.

 

42. Hd6!! 

Öðrum skákum lauk með jafntefli og þ.m.t. skák Magnusar Carlsen (2834) og Wei Yi (2743).

Heimsmeistarinn var ókátur og neitaðai að tala við norska fjölmiðla þrátt fyrr skuldbindingar þar um. Hann hins vegar tjáði sig á samfélagsmðlum að skák lokinni

 

Rd6!! @vishy64theking #stillgotit

— Magnus Carlsen (@MagnusCarlsen) January 15, 2018

 

 Ítarlega frásögn frá gangi mála má finna á Chess.com

Fjórða umfeðr hefst kl. 12:30. Þá teflir Carlsen við Giri, Anand mætir landa sínum Adhiban. 

 

Myndir: Maria Emelianova/Chess.com

• Heimasíða mótsins
• Beinar útsendingar (hefjast kl. 12:30)

 

Stálin stinn mætast á Skákhátíð MótX

Skemmtilegur andi, keppnisskap og litríkir persónuleikar settu svip sinn á 1. umferð Skákhátíðar MótX í Skákmusterinu á Kópavogsvelli í síðustu viku. Gestamótið er sem fyrr í sameiginlegri umsjá Hugins og Skákdeildar Breiðabliks og hefur aldrei verið sterkara en í ár með þátttöku 24 titilhafa, þar af 8 stórmeistara, og eru meðalskákstig í A flokki 2.329. Alls eru þátttakendur á Skákhátíð MótX 2018 á sjöunda tug talsins.

A flokkur

Í A-flokki var stigamunur milli keppenda í fyrstu umferð nærri 200 stigum sem er auðvitað uppskrift að miklum sviptingum. Óvæntustu úrslitin voru sigur Kristjáns Eðvarðssonar (2186) á FM Degi Ragnarssyni (2332), þar sem Kristján náði að brjótast inn á 7. reitaröðina með ógnunum sem ekki varð mætt með góðu móti. Athygli vakti að FM Halldór Grétar Einarsson (2236) knúði fram jafntefli gegn stórmeistaranum Jóni L. Árnasyni með markvissri taflmennsku, CM Bárður Örn Birkisson (2190) og IM Ingvar Þór Jóhannesson gerðu stutt jafntefli og Baldur Kristinsson (2185) og IM Einar Hjalti Jensson (2336) skildu jafnir eftir að Baldur var þremur sælum peðum yfir.

Sérstaka athygli vakti viðureign stigahæsta keppandans í A-flokki og hins yngsta. Þar lenti hinn öflugi stórmeistari Hjörvar Steinn Grétarsson (2565) í kröppum dansi gegn ungstirninu Vigni Vatnari Stefánssyni (2304) en stórmeistarinn landaði loks sigrinum í miklu tímahraki.

Margir skemmtilegir skákmenn tefla á Skákhátíðinni eftir langt hlé frá kappskákmótum. Þar má t.d. nefna FM Ásgeir Pál Ásbjörnsson (2267) sem tekur nú þátt í sínu fyrsta kappskákmóti eftir margra áratuga hlé. Ásgeir Páll er til alls vís en þurfti þó að lúta í dúk að þessu sinni gegn GM Hannesi Hlífari Stefánssyni (2523) í vandtefldri skák þar sem æfingaleysið sagði til sín í lokin. Önnur úrslit í A-flokki voru eftir bókinni (sjá töflu hér að neðan).

• A-flokkur hjá Chess-Results 

Í annarri umferð í A-flokki sem fram fer þriðjudaginn 16. janúar kl. 19.30 verða margar athygli verðar viðureignir. Á efsta borði eigast við GM Hjörvar Steinn Grétarsson (2565) og IM Björn Þorfinnsson (2400). Dragist skák þeirra á langinn má búast við miklum sviptingum enda tveir af snjöllustu hraðskákmönnum landsins hér á ferð. Ekki verður spennan minni á næst efsta borði þar sem stórmeistararnir Þröstur Þórhallsson og Jóhann Hjartarson reyna með sér. Þröstur sigraði á þessu móti í fyrra ásamt Daða Ómarssyni og Jóhann er einn af fremstu stórmeisturum Íslendinga þannig að blikur verða á lofti þessari snerru. Aðrar viðureignir verða ekki síður spennandi: 

Hvítir hrafnar

Í flokki eldri skákkappa, Hvítum hröfnum, er fámennt en góðmennt. Í fyrstu umferð lagði Bragi Halldórsson (2082) Björn Halldórsson (2182). Sá síðarnefndi er nýstiginn inn á leikvanginn köflótta eftir áratuga fjarveru og er það skákunnendum fagnaðarefni. Björn vann mann af Braga og stefndi peðum upp í borð á drottningarvæng en gætti ekki að gagnsóknarfærum rithöfundarins margreynda á kóngsvæng og því fór sem fór. Skákmeistarinn talnaglöggi og fyrrum liðsmaður hinnar knáu skáksveitar Breiðagerðisskóla, Júlíus Friðjónsson (2137), lagði hinn öfluga meistara Jónas Þorvaldsson (2258) eftir að sá síðarnefndi var sleginn skákblindu. Jónas hefur mjög lítið teflt síðustu ár og er því mikill fengur að fá hann inn í íslenskt skáklíf á ný. Stórmeistarinn þjóðkunni, Friðrik Ólafsson (2365), frestaði skák sinni gegn Jóni Þorvaldssyni (2170). Mikill heiður er að þátttöku Friðriks í mótinu en þessi síungi kappi lætur engan bilbug á sér finna á hvítum reitum og svörtum.

• Hvítir hrafnar hjá Chess-Results

B-flokkur 

Vegna þess hve A-flokkurinn var vel skipaður í ár var ljóst að margir sem ættu undir venjulegum kringumstæðum fullt erindi þangað myndu þurfa að tefla í B-flokki. Oft er það þannig að menn eru ekkert alltof spenntir fyrir slíkum vistaskipti. En eins og vitur maður sagði þá er stundum betra að vera stór fiskur í lítilli tjörn en lítill fiskur í stórri. Við ákváðum að reyna að gera litlu tjörnina sem eftirsóknarverðasta og m.a. var ákveðið að peningaverðlaun fyrir þrjú efstu sætin yrðu helmingur samsvarandi sæta í A-flokknum. Smám saman safnaðist í tjörnina og endanleg þátttaka varð skemmtileg blanda af bestu ungu skákljónunum okkar, eldri og reyndari séntilmönnum og efnilegustu skákkrökkum landsins.

Aldursforsetinn er hinn geðþekki læknir Ólafur Gísli Jónsson og þau yngstu eru Gunnar Erik Guðmundsson og Batel Goitom Haile 10 ára. Stigahæstur er Gauti Páll Jónsson og fast á hæla hans koma skákljónin Hilmir Freyr Heimisson, Björn Hólm Birkisson og Aron Þór Mai. Skákþjálfararnir Siguringi Sigurjónsson og Birkir Karl Sigurðsson eru líklegir til að blanda sér í toppbaráttuna. Meðal þátttakenda eru einnig Agnar Tómas Möller sem auk þess að vera góður skákmaður, er mikilvægur bakhjarl fyrir skákhreyfinguna í gegnum fyrirtækið Gamma, knattspyrnumanninn Kristján Halldórsson, hinn skeggmyndarlega baráttumann Kristján Örn Elíasson, bæjarfulltrúann Andra Stein Hilmarsson og síðastan en ekki sístan hljómborðsleikara Hjaltalín og son Norðurlandameistarans í skák Hjört Yngva Jóhannsson.

Úrslitin í fyrstu umferð voru eftir bókinni enda stigamunurinn 4-500 stig. Þó gerði hinn efnilegi Örn Alexandersson úr Skákdeild Breiðabliks sér lítið fyrir og vann Ólaf Gísla og Robert Luu og Sigurður Freyr Jónatansson náðu báðir góðum jafnteflum á móti sér stigahærri mönnum.

• B-flokkur hjá Chess-Results 

Í annarri umferð teflir Gauti Páll við Kristján Halldórsson á fyrsta borði og líklegt má telja að skákin verði jafnari en stigamunurinn gefur til kynna. Á öðru borði eigast við ungstirnin Stephan Briem unglingameistari Breiðabliks og Aron Þór Mai sem er sigraði Vigni Vatnar á dögunum. Mjög áhugavert verður að fylgjast með mörgum öðrum viðureignum enda margir sem ætla sér að ná góðu móti og víst er að spenna og leiftrandi tilþrif eru síst minni í þessum flokki en hjá stigahærri keppendunum.

Nánar á Skákhuganum.