Hraðskákmót Reykjavíkur verður haldið miðvikudagskvöldið 21. febrúar

Hraðskákmót Reykjavíkur, sem fresta þurfti síðastliðinn sunnudag vegna veðurs, verður haldið í húsnæði Taflfélags Reykjavíkur að Faxafeni 12 miðvikudaginn 21.febrúar og hefst taflið kl.19:30.

Tefldar verða 9 umferðir með tímamörkunum 4+2 (4 mínútur auk 2 sekúndna viðbótartíma eftir hvern leik). Mótið verður reiknað til hraðskákstiga og er opið öllum.

Þátttökugjald er 1.000kr. Frítt er í mótið fyrir félagsmenn TR sem eru 17 ára eða yngri. Skráning fer fram á skákstað og lýkur henni kl.19:20. Skákstjórar verða Ríkharður Sveinsson og Ólafur Ásgrímsson.

Eftir Hraðskákmótið fer fram verðlaunaafhending fyrir Skákþing Reykjavíkur.

Veitt verða verðlaun fyrir þrjú efstu sætin auk þess sem krýndur verður Hraðskákmeistari Reykjavíkur. Verði keppendur jafnir að vinningum verður skorið úr um sætaröð með stigaútreikningi (tie-break). Röð stigaútreiknings: 1.Innbyrðis úrslit 2.Bucholz (-1) 3.Bucholz (median) 4.Sonneborn-Berger.

Ríkjandi hraðskákmeistari Reykjavíkur er Dagur Ragnarsson. Sigurvegari mótsins í fyrra varð hins vegar Vestfjarðarvíkingurinn Guðmundur Gíslason sem vann það þrekvirki að vinna með fullu húsi! Undanfarin 11 ár hafa sex skákmeistarar borið titilinn Hraðskákmeistari Reykjavíkur, þar af einn stórmeistari og fjórir FIDE-meistarar:

2017: Dagur Ragnarsson 2016: Róbert Lagerman 2015: Dagur Ragnarsson 2014: Róbert Lagerman 2013: Oliver Aron Jóhannesson 2012: Davíð Kjartansson 2011: Hjörvar Steinn Grétarsson 2010: Torfi Leósson 2009: Hjörvar Steinn Grétarsson 2008: Davíð Kjartansson 2007: Davíð Kjartansson.

Reykjavik Puffins gegn Cannes Blockbusters í kvöld

Í kvöld klukkan 19:35 hefst 5. umferð í PRO Chess League. Umferðin sjálf hefst í raun fyrr um daginn en viðureign Reykjavik Puffins og Stockholm Snowballs hefst á slaginu 19:35 á Chess.com.

Um síðustu helgi lögðu Lundarnir lið Stockholm Snowballs að velli á glæsilegan hátt 10-6. Þröstur Þórhallsson átti stórleik fyrir Puffins og eins voru Jóhann og Hannes mjög traustir á meðan að Björn Þorfinnsson náði sér ekki á strik aldrei þessu vant.

Cannes Blockbusters er annað franskt lið í okkar riðli og tefla fram tveimur stórmiesturum en má segja að lið þeirra sé sýnd veiði en ekki gefin. Frakkarnir þurftu að breyta sinni liðsuppstillingu eftir á og hefjs því leik með hálfan vinning í refsingu. Því er ljóst að jafntefli í viðureigninni sjálfri dugir til sigurs Lundanna.

Lið Lundanna að þessu sinni skipa:

GM Hjörvar Grétarsson(2567),GM Hannes Stefansson (2512), IM Bragi Þorfinnsson (2461) og GM Þröstur Þórhallsson (2420).

Allir tefla við alla á fjórum borðum og því 16 vinningar í boði. Búast má við jöfnum og spennandi match.

Hægt verður að fylgjast með skákunum og Chess.com en við mælum með því að kíkja á beina útsendingu Puffins í umsjón FM Ingvars Þórs Jóhannessonar sem verður hér: http://www.twitch.tv/reykjavikpuffins

Heimasíða PRO Chess League

Útsending Chess.com

Reykjavíkurmót grunnskólasveita: Keppni 4.-7. og 8.-10. bekkja fer fram mánudaginn 19. febrúar

Reykjavíkurmót grunnskólasveita heldur áfram í húsnæði TR að Faxafeni 12 mánudaginn 19. febrúar kl. 16.30 með keppni 4.-7. bekkja og kl. 19.30 með keppni 8.-10. bekkja. Mótið er sem fyrr samstarfsverkefni Skóla- og frístundasviðs Reykjavíkurborgar og Taflfélags Reykjavíkur. Mótinu verður skipt í þrennt að þessu sinni; 1.-3. bekkur, 4.-7. bekkur og 8.-10. bekkur.

Tefldar verða 7 umferðir með umhugsunartímanum 5 mínútur fyrir hverja skák og bætast 3 sekúndur við eftir hvern leik (5+3). Allir grunnskólar Reykjavíkurborgar eru hvattir til þess að senda skáksveitir í mótið. Engar takmarkanir eru á fjölda skáksveita og er skáksveitum hvers skóla styrkleikaraðað með bókstöfum (a-sveit, b-sveit, c-sveit og svo framvegis). Í hverri skáksveit tefla 4 keppendur og má hver sveit hafa 0-2 varamenn. Keppanda er heimilt að tefla í eldri flokki en aldur hans segir til um, en þó má einungis tefla í einum flokki (sem dæmi þá má keppandi í 3.bekk tefla í flokki 4.-7.bekkjar, en hann getur þá ekki teflt í flokki 1.-3.bekkjar). Mikilvægt er að liðsstjóri fylgi liðum hvers skóla og er æskilegt að hver liðsstjóri stýri ekki fleiri en þremur liðum.

Mótshaldarar vilja ítreka mikilvægi þess að bæði liðsstjórar og keppendur mæti á mótsstað eigi síðar en 15 mínútum fyrir auglýst upphaf móts til að unnt sé að hefja mótið á tilsettum tíma.

 

Dagskrá:

• Mánudagur 19.febrúar kl.16:30-19:00; 4.-7.bekkur.
• Mánudagur 19.febrúar kl.19:30-22:00; 8.-10.bekkur.

Veitt verða verðlaun fyrir þrjú efstu sætin í hverjum flokki. Einnig fær efsta stúlknasveit hvers flokks verðlaun.

Skráning fer fram í gegnum skráningarform sem finna má í gula kassanum á skak.is. Skráningu lýkur sunnudaginn 18.febrúar klukkan 21:00. Ekki verður hægt að skrá lið á mótsstað. Hér má fylgjast með skráningunni.

Vigfús sigraði á hraðkvöldi Hugins

Vigfús Ó. Vigfússon sigraði á hraðkvöldi Hugins sem fram fór 5. febrúar sl. Vigfús fékk 9,5v í tíu skákum og var það Sigurður Freyr Jónatansson sem náði jafntefli. Sigurður Freyr varð líka örugglega í öðru sæti með 7,5v. Þriðji var svo Árni Ólafsson með 5,5v sem hefðu alveg getað orðið fleiri.

Tölvan var biluð á æfingunni svo ekki var hægt að nota hana til að draga. Það var því gert upp á gamla máttann og sigurvegarinn fékk það hlutverk. Þurfti þá ekki að spyrja að því hver yrði dreginn með þessu fyrirkomulagi. Pétur Jóhannesson kom upp úr hatttinum eins og við var að búast fyrst Björgvin var ekki mættur. Næsta skákkvöld verður mánudaginn 26. febrúar og þá verður atkvöld.

Lokastaðan á chess-results:

Íslandsmót barnaskólasveita - 1.-3. bekk

Íslandsmót barnaskólasveita 1.-3. bekk 2018 fer fram í Rimaskóla, laugardaginn 24. febrúar nk.  

Tefldar verða sjö umferðir eftir svissneska kerfinu. Umhugsunartími 8+2 á hvern keppenda. Mótið hefst kl. 11 og áætlað er að því ljúki með verðlaunaafhendingu um kl. 14. Stutt hlé verður tekið um 12:30 til að keppendur geti fengið sér næringu.  

Hver skóli getur sent fleiri en eina sveit - en hver sveit er skipuð fjórum nemendum 1.-3. bekkjar (auk allt að fjögurra varamanna). 

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla. 

Veitt verða verðlaun fyrir efstu þrjár sveitirnar og einnig efstu b-e sveitir. Einnig borðaverðlaun fyrir bestan árangur á 1.-4. borði. 

Núverandi Íslandsmeistari barnaskólasveita (1.-3. bekkur) er Vatnsendaskóli. Nánar um mótið í fyrra hér.

Skráning fer fram á Skák.is (guli kassinn efst). Skráningu lýkur á hádegi (12:00), föstudaginn 23. febrúar.

Upplýsingar um þegar skráðar sveitir má finna hér.

Lokamót Skákhörpunnar fer fram á morgun

Lokamótið Skákhörpunnar verður teflt á miðvikudaginn kemur og þá ræðst hver vinnur mótaröðina þetta árið. Aðeins þrjú bestu mót telja svo úrslitin eru óráðin enn. 

Gunnar vann fyrsta mótið, Friðgeir það annað og Guðfinnur það þriðja. Svo nú er að duga eða drepast fyrir hina síteflandi öldungadeildarskákmenn.   

Stöðuna má sjá á myndinni hér að neðan með því að tvíklikka á hana. 

Skákþing Akureyrar: Rúnar kominn í 1. sæti

Sjötta og næst síðasta umferð Akureyrarmótsins í skák fór fram í Skákhöllinni í dag. Þrjár skákir voru tefldar en Jón Kristinn Þorgeirsson sat yfir og nýtti tímann til að tefla á Norðurlandamótinu í skólaskák. Var fylgst með lokaskákinni í beinni útsendingu á meðan á umferðinni stóð. Jón gerði jafntefli gegn dönskum skákmanni og endaði í þriðja sæti í sínum flokki.

Hér heima áttust við Benedikt og Sigurður E., Símon og Haraldur og Rúnar og Andri.
Benedikt lenti í dálítilli beyglu gegn Sigurði og þurfti að láta mann fyrir tvö peð. Skömmu síðar missti hann af því að Sigurður gat skákað af honum annan mann og var þá tilgangslaust að halda baráttunni áfram.
Í skák Símonar og Haraldar var lengi vel þung undiralda. Í endatalinu náði Símon að tefla glimrandi vel og virkja kónginn sinn. Hafði hann biskup gegn riddara í opinni stöðu með peð á báðum vængjum. Reyndist biskupinn sterkari og svo fór að Haraldur varð að gefast upp þegar einsýnt var að Símon næði að vekja upp drottningu.

Mesta athygli vakti skák Rúnars og Andra. Fyrir umferðina var Andri einn efstur með fullt hús vinninga en Rúnar fylgdi á hæla honum með hálfum vinningi meira. Svo fór að Andri virtist jafna taflið nokkuð auðveldlega með svörtu en tefldi fyrri hluta miðtalfsins ekki nógu vel og lék af sér peði. Skákin var þó fjærri því að vera lokið og ýmsar víðsjár um allt borðið. Smátt og smátt tókst Rúnari að bæta stöðu sína og náði að opna g-línuna og ná kóngssókn sem Andri gat ekki staðist. Staða hans hrundi og Rúnar stóð uppi sem sigurvegari. 
Rúnar leiðir nú mótið með 4,5 vinninga en Andri hefur 4 vinninga. Þeir berjast því enn um titilinn.

• Heimasíða SA
• Chess-Results

Friðrikskóngurinn 2018 framhaldið í kvöld: Örn Leó enn efstur

Mótaröðin heldur áfram í kvöld þegar þriðja mótið af fjórum verður háð. Búast má við harðri baráttu því þrjú bestu mót hvers keppanda telja og því geta efstu þrír allir unnið enn.

Gunnar Fr. Rúnarsson kom sterkur inn síðast en hann vann keppnina 2015. Mikil ófærð hamlaði þá för sumra en það viðrar betur sem stendur í dag. 

Nú er að sjá hvernig köppunum þremur Erni Leó, Gunnari Frey og Björgvini 
gengur í þriðju atrennu að konungstigninni sómakæru. 

Vel heppnað Pönnuskákmót á Selfossi

Krakka- og unglingastarfið á Suðurlandi er ákaflega öflugt og er skemmst að minnast þegar 12 skólar mættu skólakeppni á Suðurlandi. Í gær var haldið Pönnukökuskákmóti á Selfossi. Létu ekki smá rok stöðva sig. Guðbergur Davíð Ágústsson vann í yngri flokki og Anton Kristinsson og Martin Srichakham í þeim yngri. 

Úrslit og má myndir má finna hér. 

Bikarsyrpa TR hefst á föstudaginn

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað fjórða árið í röð. Líkt og síðastliðinn vetur verða mót syrpunnar fimm talsins og verða tefldar sjö umferðir í hverju móti. Mótin fara fram í Skákhöll TR að Faxafeni 12.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2002 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Fjórða mót Bikarsyrpunnar hefst föstudaginn 16. febrúar og stendur til sunnudagsins 18. febrúar. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Dagskrá:

1. umferð: 16. febrúar kl. 17.30 (fös)
2. umferð: 17. febrúar  kl. 10.00 (lau)
3. umferð: 17. febrúar  kl. 13.00 (lau)
4. umferð: 17. febrúar  kl. 16.00 (lau)
5. umferð: 18. febrúar  kl. 10.00 (sun)
6. umferð: 18. febrúar  kl. 13.00 (sun)
7. umferð: 18. febrúar  kl. 16.00 (sun)

Verðlaunaafhending fer fram strax að lokinni 7. umferð.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan.

Sjálfkrafa tap dæmist á keppanda sem mætir á skákstað meira en 15 mínútum eftir að viðkomandi umferð hefst.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar og þá hlýtur einnig efsta stúlkan í hverju móti bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir besta samanlagðan árangur, þar sem mest fjögur mót gilda; taflsett, skákklukka, 5.000kr bókainneign ásamt veglegum farandbikar. Þá verða veitt sérstök verðlaun fyrir besta samanlagðan árangur, þar sem mest fjögur mót gilda, fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Skráning fer fram í gegnum skráningarform hér að neðan. Hlökkum til að sjá ykkur!

Skráningarform

Skráðir keppendur

Mót Bikarsyrpunnar í vetur: 25.-27. ágúst, 29. sep-1. okt, 27.-29. okt, 16.-18. feb, 6.-8. apr

Skákstjórn: Þórir Benediktsson, s. 867 3109, [e-mail]