Carlsen öruggur sigurvegari Tata Steel-mótsins

Magnus Carlsen (2844) vann öruggan sigur á Tata Steel-mótinu sem lauk í Wijk aan Zee í Hollandi í dag. Heimsmeistarinn gerði jafntefli við Ding Liren (2766) í lokaumferðinni og hlaut 9 vinninga í 13 skákum. Ding Liren varð í 2.-3. sæti með 8 vinninga ásamt Fabiano Caruana (2787).

Þetta er þriðji sigur Carlsens í röð á mótinu. Hann hefur unnið mótið í 6 af síðustu 8 skiptum.

Síðan 10. janúar sl. hefur hann 22 skákir (32 skákir tefldar alls). Hefur teflt 35 skákir í röð án taps. Hver segir að hann sé að gefa eitthvað eftir?

 

• Heimasíða mótsins
• Beinar útsendingar
• Chess24

Sigurður Eiríksson efstur á Skákþingi Akureyrar

Í dag var tefld fjórða umferð á Skákþingi Akureyrar. Leikar fóru sem hér segir:

• Sigurður Eiríksson-Hreinn Hrafnsson             1-0
• Jón Kristinn Þorgeirsson-Haraldur Haraldsson    1-0
• Andri Freyr Björgvinsson-Símon Þórhallsson      1-0

Sigurður Eiríksson hefur unnið allað sínar skákir, þrjár að tölu. Jón Kristinn hefur einnig unnið þrjár skákir, en tapað einni, fyrir fyrrnefndum Sigurði.

Aðrir keppendur eru skemmra komnir og virðist nú líklegast að keppnin um meistaratitilinn standi milli þeirra kumpána.

Heimasíða SA

Skáknámskeið fyrir fullorðna á Akureyri

Skáknámskeið fyrir fullorðna verður haldið í skákheimilinu Íþróttahöllinni fyrir byrjendur og skemmra komna. æfingarnar verða á Þriðjudagskvöldum kl 20:00 til 21:30 og byrjar 2 febrúar og er í 4 skipti. 

Ath. Sjá nánar í viðhengi.

Skrár tengdar þessari bloggfærslu:

• Skáknámskeið fyrir fullorðna

Ný alþjóðleg skákstig

Ný alþjóðleg skákstig eru komin út og eru miðuð við 1. febrúar. Þar sem listinn endurspeglar ákaflega litlar breytingar verður úttekin í skemmra falli. Hannes Hlífar Stefánsson (2600) er langstigahæsti skákmaður landsins, Heimir Bessason (1295) er eini nýliði listans og Hilmir Freyr Heimisson (141) hækkar langmest frá janúar-listanum. 

Um næstu mánaðarmót verða hins vegar breytingar miklar því þá koma Skákþing Reykjavíkur og Nóa Síríus-mótið til stigaútreiknings.

Topp 20

Nr.	Name	Tit	Rtng	Gms	Diff
1	Stefansson, Hannes	GM	2600	0	0
2	Gretarsson, Hjorvar Steinn	GM	2572	0	0
3	Steingrimsson, Hedinn	GM	2567	0	0
4	Olafsson, Helgi	GM	2546	0	0
5	Hjartarson, Johann	GM	2541	0	0
6	Petursson, Margeir	GM	2509	0	0
7	Arnason, Jon L	GM	2493	0	0
8	Danielsen, Henrik	GM	2488	7	-13
9	Kristjansson, Stefan	GM	2471	0	0
10	Kjartansson, Gudmundur	IM	2456	0	0
11	Gunnarsson, Jon Viktor	IM	2455	0	0
12	Gretarsson, Helgi Ass	GM	2452	0	0
13	Thorsteins, Karl	IM	2449	0	0
14	Gunnarsson, Arnar	IM	2426	0	0
15	Thorhallsson, Throstur	GM	2423	0	0
16	Thorfinnsson, Bragi	IM	2419	0	0
17	Thorfinnsson, Bjorn	IM	2418	0	0
18	Olafsson, Fridrik	GM	2377	0	0
19	Arngrimsson, Dagur	IM	2376	0	0
20	Ulfarsson, Magnus Orn	FM	2375	0	0

Mestu hækkanir:

Nr.	Name	Tit	Rtng	Gms	Diff
1	Bessason, Heimir		1295	9	1295
2	Heimisson, Hilmir Freyr		2088	7	141
3	Vidarsson, Hlynur Snaer		1476	6	60
4	Isleifsson, Runar		1833	7	34
5	Steingrimsson, Karl Egill		1693	7	15
6	Danielsson, Sigurdur		1763	6	10
7	Sigurdsson, Smari		1887	6	9
8	Halldorsson, Bragi		2098	1	2
9	Adalsteinsson, Hermann		1664	7	1

 

Stigahæstu ungmenni landsins (1996 og síðar)

Nr.	Name	Tit	Rtng	Gms	Diff
1	Ragnarsson, Dagur	FM	2219	0	0
2	Thorgeirsson, Jon Kristinn		2206	0	0
3	Johannesson, Oliver	FM	2198	0	0
4	Thorhallsson, Simon		2157	0	0
5	Heimisson, Hilmir Freyr		2088	7	141
6	Stefansson, Vignir Vatnar		2071	0	0
7	Hardarson, Jon Trausti		2059	0	0
8	Sigurdarson, Emil		1968	0	0
9	Birkisson, Bjorn Holm		1962	0	0
10	Birkisson, Bardur Orn		1954	0	0

 

Kappteflið um Friðrikskónginn - Júlíus Friðjónsson í forystu

Fyrsta mótið af fjórum í hinni árlegu mótaröð Gallerý Skákar og Sd. KR um „Taflkóng Friðriks“ fór fram sl. mánudag og heldur áfram næstu þrjú mánudagskvöld í Félagsmiðstöðinni í Frostaskjóli. Þrjú bestu mót hvers keppanda telja til stiga og vinnings svo allt er galopið enn fyrir nýja keppendur að blanda sér í baráttuna.

Hinn góðkunni meistari Júlíus Friðjónsson er efstur í kappteflinu sem stendur. Hann tefldi af yfirveguðu öryggi og uppskar laun erfiðis síns eftir hatramma baráttu við þrælsterka og snúna andstæðinga sem lögðu sumir hverjir of mikið á stöður sínar af einbeittum og óþrjótandi sigurvilja og urðu svo að bíta í það súra og lúta í gras. Skákin er grimmur leikur og ekki heiglum hent. 

Blekkingaleikur og klækjabrögð voru í algleymingi á skákborðunum tíu enda hart barist í hverri umferð. Mörg gamalkunnug andlit sem ekki höfðu sést lengi voru mætt til tafls og höfðu greinilega engu gleymt. Sigurvegarinn ár hvert fær nafn sitt skráð gullnu letri á stall styttunnar og fagran verðlaunagrip til eignar.

Tefld eru 9 umferðir með 10 mínútna umhugsunartíma á skákina. Mótin eru að sjálfsögðu öllum opin enda þótt keppendur séu ekki með í öllum mótunum. Sérstakir aukavinningar verða dregnir út öll kvöldin sem mótaröðin stendur en henni lýkur 15. febrúar. Friðrik mun verða viðstaddur verðlaunahátíðina í mótslok.  

Munið að mæta annað kvöld kl. 19.30

 

Metþátttaka á Íslandsmóti stúlknasveita - nýir Íslandsmeistarar

Þátttökumet var slegið í dag á Íslandsmóti stúlknasveita. Tuttugu og tvær sveitir mættu til leiks. Teflt var eftir nýju fyrirkomulagi en að þessu sinni var teflt í þremur flokkum. Er það í samræmi við þá þróun að flokkaskipta skákmótum yngri kynslóðarinnar meir eftir aldri en hefur áður verið gert.

Fyrsti til annar bekkur

Fjórar sveitir mættu til leiks og tefldu tvöfalda umferð. Fljótlega kom í ljós að stelpurnar í Salaskóla voru komnar lengst. Þær tóku gullið nokkuð örugglega enda búnar að vera í kennslu hjá Tomasi Rasmus. Háteigsskóli náði svo silfrinu á undan sveitum frá Álfhólsskóla. Sérstaklega gaman var að fylgjast með stelpunum í þessum flokki sem margar hverjar voru á sínu fyrsta skákmóti.

 

 

 

 

 

 

Íslandsmeistarar Salaskóla ásamt Tomasi Rasmus.

Þriðji til fimmti bekkur

Fyrirfram mátti búast við nokkuð jafnri keppni í þessum flokki. Tólf sveitir voru mættar til leiks og kom fljótlega í ljós að um helmingur þeirra gat stefnt að verðlaunasæti. Eftir fjórar umferðir af sex voru t.d. fjórar sveitir með 11.5 – 12 vinninga. Hópsskóli Grindavíkur var efstur fyrir síðustu umferðina með 15 vinninga. Rimaskóli kom næstur með 13 vinninga og  Foldaskóli og Smáraskóli 12.5 vinning. Grindvísku stúlkurnar mættu Smáraskóla í gríðarlega spennandi viðureign. Eftir þónokkrar sviptingar endaði sú viðureign 2-2 og þar með ljóst að titillinn færi suður með sjó þar sem heimastelpunum í Rimaskóla tókst ekki að vinna 4-0 gegn sveit Salaskóla þrátt fyrir góða tilburði. Foldaskóli skaust upp í annað sæti með því að hala inn fjóra vinninga og Rimaskóli tók því bronsið. Sannarlega glæsilegur árangur hjá Hópsskóla og til vitnis um mikið starf sem Siguringi Sigurjónsson hefur unnið. Öflugur foreldrahópur fylgir skáksveitinni sem gaman verður að fylgjast með á næstu árum. 

 

 

 

 

 

 

Sigursælar grindvískar stelpur með þjálfara sínum Siguringa.

Sjötti til tíundi bekkur

Sex sveitir voru mættar til leiks og tefldu allar innbyrðis í einfaldri umferð. Fyrirfram mátti búast við sigri Rimaskóla. Leiddar áfram af Nansý Davíðsdóttir er sveitin skipuð reynslumiklum stelpum í unglingadeild sem hafa teflt fyrir skólann sinn í mörg ár. Það var því þónokkuð óvænt þegar sveit Melaskóla náði jafntefli gegn Rimaskóla í annarri umferð. Ef til vill þarf það þó ekki að koma svo mjög á óvart þar sem sveit Melaskóla hefur alloft unnið til verðlauna síðustu árin. Styrkur Rimaskóla koma svo í ljós þegar leið á mótið og sigraði sveitin örugglega og enn einn Íslandsmeistaratitillinn í stúlknaflokki staðreynd fyrir þennan mikla skákskóla.

 

 

 

 

 

 

Íslandsmeistarar Rimaskóla, frá v.: Ásdís, Heiðrún, Nansý, Tinna og Valgerður.

Liðsstjórum er sérstaklega þakkað fyrir sín störf, þeir eru: Björn Ívar Karlsson Breiðagerðisskóla, Foldaskóla og Vættaskóla, Björn Karlsson Smáraskóla, Gunnar Finnlaugsson Árbæjarskóla, Helgi Árnason Rimaskóla, Kjartan Maack Háteigsskóla, Lenka Ptacnikova Álfhólsskóla, Siguringi Sigurjónsson Hópsskóla Grindavíkur og Tomas Rasmus Smáraskóla.

Að móti loknu fengu allir keppendur annað hvort verðlaun eða viðurkenningu í formi verðlaunapeninga, súkkulaðis og skákblýanta.

Skákakademía Reykjavíkur annaðist framkvæmd mótsins. Skákstjóri var Páll Sigurðsson og honum til aðstoðar Stefán Bergsson. Rimaskóla er þakkað fyrir gott samstarf.

Myndir frá mótinu

Skákþáttur Morgunblaðsins: Mikið um óvænt úrslit á Skákþingi Reykjavíkur

Óvænt úrslit hafa verið regla fremur en undantekning á Skákþingi Reykjavíkur sem stendur yfir þessa dagana í húsakynnum Taflfélags Reykjavíkur við Faxafen. Í sjöttu umferð sem fram fór á miðvikudagskvöldið gerði hinn 12 ára gamli Vignir Vatnar Stefánsson sér lítið fyrir og vann Íslandsmeistarann frá 2014, Guðmund Kjartansson, á sannfærandi hátt. Hann hafði áður unnið Björn Þorfinnsson og reiknast frammistaða hans nú upp á tæplega 2.400 elo-stig. Jón Viktor Gunnarsson er enn í forystu en hefur fengið félagsskap á toppnum. Efstu menn:

1.-2. Jón Viktor Gunnarsson og Stefán Kristjánsson 5½ v. (af 6) 3.-5. Vignir Vatnar Stefánsson, Dagur Ragnarsson og Björn Þorfinnsson 5 v. 6.-8 Guðmundur Gíslason, Mikael Jóhann Karlsson og Þorvarður Ólafsson 4½ v.

Í sjöundu umferð sem, fram fer á morgun, sunnudag, tefla efstu menn innbyrðis, Jón Viktor teflir við Stefán, Dagur við Vigni Vatnar og Björn Þorfinnsson mætir Þorvarði Ólafssyni. Og þá er komið að einni umtöluðustu skák mótsins:

Skákþing Reykjavíkur 216; 6. umferð:

Vignir Vatnar Stefánsson – Guðmundur Kjartansson

Reti – byrjun

1. Rf3 Rf6 2. g3 c5 3. d3 d5 4. Rbd2 g6 5. Bg2 Bg7 6. 0-0 0-0 7. e4

Kóngsindverska uppbyggingin sem Bobby Fischer hafði mikið dálæti á kom einnig fyrir í skák Vignis við Björn Hólm í 5. umferð.

7.... Rc6 8. c3 e5 9. a4 Dc7 10. exd5 Rxd5 11. He1 Hd8 12. Rc4 Rb6 13. De2 Rxc4!? 14. dxc4 Bf5 15. Rd2 Bd3 17. De3 Ra5?

Gallinn við uppskiptin á c4 liggur í veikingu á hvítu reitunum. Samt er þetta fyrsta ónákvæmni svarts, betra var 17.... Re7 sem hótar 18.... Rf5.

18. Bd5! Bc2 18. Df3 Hd7 19. Ha2

Lævís leikur sem hótar 20. b4.

19.... Bf5 20. Re4 Bxe4 21. Hxe4 Kh8 22. Hh4!

Hefur í hótunum. Nái hvítur að leika g3-g4 getur reynst erfitt að verja kóngsstöðuna.

22.... f5 23. g4!

Hótar 24. Hxh7+ Kxh7 25. Dh3+ og mátar.

23.... Hxd5?

Afræður að láta skiptamun af hendi en betra var 23.... f4 því að 24. Hxh7+ Kxh7 25. Dh3+ Bh6 26. g5 má svara með 26.... Hxd5! o.s.frv.

24. cxd5 f4 25. De4 Bf6 26. Hh3 Rb3 27. c4!

Snarplega leikið. Vignir sá að riddarinn á ekki afturkvæmt frá c1.

27.... Dd7 28. Dxg6!

Alls ekki 28. Hxb3 Dxg4+ og 29.... Dd1+.

28.... Hf8 29. Kf1! Bd8 30. Dh5 Rxc1 31. Ha1

Nú er eftirleikurinn auðveldur.

31. ... Dg7 32. Hxc1 Bg5 33. He1 h6 34. Hf3 Hd8 35. h4 Kg8 36. hxg5 hxg5 37. Kg2 b6 38. Hh3 Hf8

– og gafst upp um leið 

Afleikur ársins í Wijk aan Zee

Magnús Carlsen tók mikla áhættu í skák sinni við Hollendinginn Van Wely í 5. umferð stórmótsins í Wijk aan Zee sl. fimmtudag. Hann fórnaði skyndilega manni í jafnri stöðu og á einum stað gat Van Wely knúið fram vinning, missti af tækifærinu og tapaði í 39.leikjum. Þetta var fyrsta sigur heimsmeistarans en staðan er þessi:

1.-2. Caruana og Ding 3½ v. 3.-6. Hou Yifan, Wesley So, Magnús Carlsen og Eljanov 3 v. 7.-9. Karjakin, Wei Yi og Mamedyarov 2½ v. 10.-12. Giri, Tomashevsky og Navara 2 v. 13. Van Wely 1½ v. 14. Adams 1 v.

Afleikur ársins kom í 3. umferð í eftirfarandi stöðu:

Mamedyarov – Eljanov

Svartur lék síðast 37..... Hdc8 og nú vinnur 38. Hb6 létt. En Aserinn sem átti nægan tíma uggði ekki að sér og lék 38. c5?? Eftir 38.... Dxb1 stoppaði hann klukkuna og gafst upp.

Grein þessi birtist í Morgunblaðinu 23. janúar 2016.

Skákþættir Morgunblaðsins

Guðmundur Kjartansson efstur á Nóa Síríus mótinu.

Guðmundur Kjartansson (2456), sem vann nafna sinn Gíslason (2307) í 4. umferð í gær, er efstur með 3½ vinning á Nóa Síríus mótinu – Gestamóti Hugins og Breiðabliks. Sex skákmenn koma í humátt á eftir stórmeistaraefninu með 3 vinninga. Það eru þeir Dagur Ragnarsson (2219), sem er einnig í toppbaráttunni á Skákþingi Reykjavíkur, stórmeistarinn Stefán Kristjánsson (2471), Þorsteinn Þorsteinsson (2253), Halldór Brynjar Halldórsson (2209), Magnús Örn Úlfarsson (2375) og Björn Þorfinnsson (2418).

Þorsteinn og Stefán gerðu jafntefli í hörkuskák þar sem Þorsteinn kom Stefáni í opna skjöldu með hinu glaðbeitta Hornarfjarðarafbrigði gegn nimzo-indverskri vörn. Björn sveið félaga sinn í TR, Benedikt Jónasson (2203), í endatafli og varð Benna að orði eftir skákina: “Og þú líka, bróðir minn Brútus.” Magnús Örn (2375) vann Lenku í maraþonskák. Dagur, sem virðist vera í feiknaformi um þessar mundir, lagði Jón Kristinsson (2240). Halldór Brynjar þurfti lítið að hafa fyrir sínum sigri þar sem andstæðingur hans gaf skákina án taflmennsku vegna veikinda.

Vignir Vatnar Stefánsson (2071), gerði sér lítið fyrir og vann hinn þrautreynda skákmann Björgvin Víglundsson (2203) með mjög góðri úrvinnslu.

Fimmta og næstsíðasta umferð fer fram á fimmtudaginn. Þá mætast Stefán og Guðmundur. Þeir mætast einnig lokaumferð Skákþingsins á sunnudag og þá með skiptum litum! Á öðru borði teflir akureyska goðsögnin og stjörnulögfræðingurinn Halldór Brynjar við klækjarefinn og stjörnublaðamanninn Björn Þorfinnsson. Hinn geðþekki prófessor, Magnús Örn, fær það erfiða hlutskipti að tefla við ungstirnið Dag Ragnarsson. Þorsteinn Þorsteinsson situr yfir í næstu umferð og fær fyrir það hálfan vinning.

Mótstöflu má nálgast á Chess-Results.

B-flokkur

Dawid Kolka (1897) og Dagur Andri Friðgeirsson (1858) eru efstir með 3½ vinning. Dawid vann Guðmund Kristinn Lee (1897) örugglega en Dagur Andri (1858) hafði betur gegn Agnari Tómasi Möller (1894).  Þeir mætast í næstsíðustu umferð.

Tvíburabræðurnir, Bárður Örn (1954) og Björn Hólm (1962) eru í 3.-7. sæti með 3 vinninga ásamt Hrund Hauksdóttur (1777), Snorra Þór Sigurðssyni (1845) og Birki Karli Sigurðssyni (1812).

Stephan Briem (1360) heldur áfram að ná góðum úrslitum og gerði í gær jafntefli við Kristófer Gautason (1653).

Mótstöflu má finna á Chess-Results.

Skákhuginn.

Gylfi sigraði á Toyota-skákmótinu

Æsir skákfélag eldri borgara í Reykjavík og Toyota héldu sitt árlega stórmót í gær í söludeild  Toyota í Garðabæ. Þetta var áttunda Toyota mótið sem er haldið í söludeild Toyota. Fyrsta Toyota mótið var haldið 2008 í félagsheimili F E B Stangarhyl 4 árið  2008. Garðar Guðmundsson  formaður Ása setti mótið með stuttri ræðu

Þetta var þrælsterkt mót, mannað mörgum sterkum skákmeisturum og hart barist í öllum umferðum á flestum borðum. Það mættu tuttugu og átta öðlingar til leiks í gær. Höfðingjarnir í Toyota byrjuðu á því að gefa okkur þrjú skáksett sem Hrafn Jökulsson var nýbúinn að færa þeim fyrir veittan stuðning.

Við stjórnarmenn ákváðum strax að hafa þessi skáksett sem aukaverðlaun og verðlauna þá sem urðu neðstir þannig að tveir neðstu menn í mótinu fengu ný töfl  og elsti þátttakandinn sem var Björn Víkingur Þórðarson. Björn verður 85 ára á árinu, hann er samt ennþá stórvarasamur við skákborðið. Í fyrstu umferð tefldi Björn með hvítu á fyrsta borði og forstjóri Toyota Úlfar Steindórsson startaði mótinu með því að leika fyrsta leikinn fyrir hann. Guðfinnur R Kjartansson kom færandi hendi og gaf þrjú Kærleikstré sem voru dregin út í mótslok.

Þá er komið að úrslitum mótsins. Það voru aðeins tveir skákmenn sem fóru taplausir í gegnum mótið. Það voru þeir Gylfi Þórhallsson og Sævar Bjarnason sem báðir fengu 7½ vinning af 9 mögulegum. Gylfi var hærri á stigum og varðveitir því bikarinn  næsta ár.

Í þriðja sæti varð Guðfinnur R Kjartansson með 6½ vinning. Guðfinnur tapaði aðeins einni skák, það var Sævar sem náði að vinna hann. Júlíus Friðjónsson og Jóhann Örn Sigurjónsson voru svo jafnir í  fjórða til fimmta sæti með 6 vinninga. Í mótslok afhenti Úlfar sextán efstu mönnum peninga verðlaun.

Úlfar sagði svo í mótslok að hann vonaðist eftir að sjá okkur alla eftir eitt ár þegar tíunda Toyota mótið yrði haldið. 

Sjá nánari úrslit í töflu og myndir Frá ESE

Íslandsmót grunnskólasveita - stúlknaflokkur fer fram í dag

Íslandsmót grunnskóla - stúlknaflokkur fer fram í Rimaskóla laugardaginn 30. janúar klukkan 12:00.

Teflt verður í þremur flokkum.

Fyrsti og annar bekkur.

Fimm umferðir með fimm mínútna umhugsunartíma.

Þriðji til finmmti bekkur.

Sex umferðir með sjö mínútna umhugsunartíma.

Sjötti til tíundi bekkur.

Sex umferðir með tíu mínútna umhugsunartíma.

Umferðafjöldi getur breyst með tilliti til fjölda þátttökuliða.

Keppendur geta teflt upp fyrir sig, þ.e. með eldri sveit síns skóla.

Í hverri sveit skulu vera fjögur borð. Varamenn mega vera allt að þrír.

Þátttökugjald á sveit: 5000 kr. Hámark 10.000 á skóla.

Skákakademía Reykjavíkur sér um framkvæmd mótsins.