Kappteflið um Friðrikskónginn - Júlíus Friðjónsson í forystu

Fyrsta mótið af fjórum í hinni árlegu mótaröð Gallerý Skákar og Sd. KR um „Taflkóng Friðriks“ fór fram sl. mánudag og heldur áfram næstu þrjú mánudagskvöld í Félagsmiðstöðinni í Frostaskjóli. Þrjú bestu mót hvers keppanda telja til stiga og vinnings svo allt er galopið enn fyrir nýja keppendur að blanda sér í baráttuna.

Hinn góðkunni meistari Júlíus Friðjónsson er efstur í kappteflinu sem stendur. Hann tefldi af yfirveguðu öryggi og uppskar laun erfiðis síns eftir hatramma baráttu við þrælsterka og snúna andstæðinga sem lögðu sumir hverjir of mikið á stöður sínar af einbeittum og óþrjótandi sigurvilja og urðu svo að bíta í það súra og lúta í gras. Skákin er grimmur leikur og ekki heiglum hent. 

Blekkingaleikur og klækjabrögð voru í algleymingi á skákborðunum tíu enda hart barist í hverri umferð. Mörg gamalkunnug andlit sem ekki höfðu sést lengi voru mætt til tafls og höfðu greinilega engu gleymt. Sigurvegarinn ár hvert fær nafn sitt skráð gullnu letri á stall styttunnar og fagran verðlaunagrip til eignar.

Tefld eru 9 umferðir með 10 mínútna umhugsunartíma á skákina. Mótin eru að sjálfsögðu öllum opin enda þótt keppendur séu ekki með í öllum mótunum. Sérstakir aukavinningar verða dregnir út öll kvöldin sem mótaröðin stendur en henni lýkur 15. febrúar. Friðrik mun verða viðstaddur verðlaunahátíðina í mótslok.  

Munið að mæta annað kvöld kl. 19.30