MP Reykjavíkurskákmótið: Sex skákmenn efstir fyrir lokaumferðina

Sex skákmenn eru efstir fyrir lokaumferð MP Reykjavíkurmótsins og þar á meðal þrír Úkraínumenn, þeir Yuriy Kuzubov, Vladmir Baklan og undrabarnið, yngsti stórmeistari heims, hinn 14 ára, Ilya Nyzhnik, sem vann landa sinn Miroshnichenko.  Aðrir í efsta sæti eru norski stórmeistarinn Jon Ludvig Hammer sem er nánast búinn að tryggja sér Norðurlandameistaratitilinn í skák, Pólverjinn Kamil Miton og Bosníumaðurinn Ivan Sokolov sem hefur farið mikinn í síðustu umferðum.  Lenka Ptácníková og Hallgerður Helga Þorsteinsdóttir eru efstar í Norðurlandamóti kvenna ásamt þremur öðrum skákkonum.  Pörun 9. og síðustu umferðar er aðgengilegt á Chess-Results.

Stórmeistararnir Henrik Danielsen og Hannes Hlífar Stefánsson eru efstir íslensku skákmannanna með 5,5 vinning svo ekki ná íslensku skákmennirnir að blanda sér alvarlega í toppbaráttuna að þessu sinni sem er í fyrsta skipti síðan það gerist í sjö ár.   Bragi og Björn Þorfinnssynir, Guðmundur Gíslason, Sigurður Daði Sigfússon, Róbert Lagerman og Jón Árni Halldórsson hafa 5 vinninga.   

Ungu mennirnir hafa nýtt tækifærið vel en þó enginn betur en hinn ungi og efnilegi skákmaður Oliver Aron Jóhannesson sem hefur náð 50% vinningshlutfalli þrátt fyrir að hafa teflt við mun stigahærri skákmenn í hverri einustu umferð.

Lokaumferðin hefst kl. 13 á morgun og verður Margeir Pétursson með skákskýringar sem hefjast um kl. 15.

Helstu tenglar

• Heimasíða mótsins
• Chess-Results
• Beinar útsendingar
• Myndaalbúm mótsins
• Bloggsíða Jan Gustafsson
• Chessbomb (beinar útsendingar með tölvuskýringum)

 

Stefán og Róbert efstir á Vin Open

Tuttugu keppendur voru mættir til leiks á hið árlega VIN-OPEN, sem er einn af hinum fjölmörgu skemmtilegu hliðarviðburðum MP-REYKJAVÍK-OPEN skákmótsins.

Tefldar voru sex umferðir með fimm mínútna umhugsunartíma. Æsilegri taflmennsku, jafnt sem á efstu borðum og þeim neðstu, lauk með því að hnífjafnir í mark komu framkvæmdarstjóri Skákakademíu Reykjarvíkur, Stefán Bergsson, og skákstjórinn Róbert Lagerman, með fimm vinninga, en Stefán var sjónarmun ofar á stigaútreikningnum flókna.

Jafnir í þriðja til fjórða, voru Spánverjinn Jorge Fonseca og víkingurinn Gunnar Freyr, báðir með fjórann og hálfan vinning, en Jorge hirti bronsið, enn eftir flókinn stigaútreikning.

Sérstaklega vakti athygli þátttaka alþjóðlega meistarans Hauks Angantýssonar, en hann sýndi skemmtilega takta eftir áralanga fjarveru við taflborðið, og gerði meðal annars öruggt jafntefli við skákstjórann sjálfan.

Mikael Jóhann Karlsson hlaut unglingaverðlaunin og Finnur Kr. Finnsson heldri manna verðlaunin.

Glæsilegt kaffihlaðborð var í umsjón Lenku sjálfboðaliða, þar sem heit eplakaka með ís sló hressilega í gegn.

Helstu styrktaraðilar mótsins voru Ísspor og Skákakademía Reykjarvíkur.

Myndaalbúm mótsins

Kuzubov efstur á MP Reykjavíkurskákmótinu (uppfært)

Úkraínski stórmeistarinn Yuriy Kuzubov leiðir sem fyrr á MP Reykjavíkurskákmótinu.  Í sjöundu umferð, sem enn er í gangi, gerði hann jafntefli við stigahæsta keppenda mótsins, Englendinginn Luke McShane.  Kuzubov hefur 6 vinninga.  Tíu skákmenn koma humátt á eftir Úkraínumanninum með 5,5 vinning.  Pörun  8. og næstsíðustu umferðar er aðgengilega á Chess-Results.

Hannes Hlífar Stefánsson og Sigurður Daði Sigfússon eru efstir íslensku skákmannanna með 5 vinninga en sá síðarnefndi hefur unnið 3 skákir í röð!

Mótið er jafnframt Norðurlandamót í skák bæði í opnum flokki og kvennaflokki.   Norðmaðurinn Jon Ludvig Hammer er efstur í opnum flokki með 5,5 vinning og Christin Andersson, Svíþjóð, og Oksana Vovk, Danmörku, eru efstar í kvennaflokki með 4 vinninga.   Lenka Ptácníková og Hallgerður Helga Þorsteinsdóttir hafa 3,5 vinning.

Í áttundu umferð mætast meðal annars:

• Kuzubov - Chatalbasev
• Miton - McShane
• Sokolov - Fier
• Williams - Hammer
• Baklan - Halkias
• Miroshnichenko - Nyzhnik
• Sigurður Daði - Adly
• Hansen - Hannes
• Hjörvar - Gustafsson
• Henrik - Jón Viktor

 

. Helstu tenglar

• Heimasíða mótsins
• Chess-Results
• Beinar útsendingar
• Myndaalbúm mótsins
• Bloggsíða Jan Gustafsson
• Chessbomb (beinar útsendingar með tölvuskýringum)

 

Sokolov sigraði Helga í æsispennandi einvígi í Deloitte í dag

Ivan Sokolov og Helgi Ólafsson tefldu 4ja skák hraðskákeinvígi í höfuðstöðvum Deloitte í turninum í dag.  Deloitte stóð fyrir einvíginu í samstarfi við Skáksambandið til að heiðra minningu Inga R. Jóhannsson, sem var einn eigenda Deloitte og starfsmaður þess um langt árabil.  Meðal gesta var fjölskylda Inga og margir gamlir félagar bæði úr skák- og endurskoðunarheimum.   Ivan hafði betur í einvíginu 3-1 en Helgi átti meira skilið.  Erlingur Tómasson, lék fyrsta leik einvígisins en hann sigraði á innanhúsmótinu Deloitte fyrir skemmstu!

Ivan vann fyrstu skákina með svörtu eftir að Helgi hafði lengi haft betra.   Helgi vann aðra skákina í mjög laglegri skák.  Ivan hafði svo betur í 3ju skákinni með svörtu mönnum og höfðu allar skákirnar því unnist á svart.  Í fjórðu skákinni hafði Helgi svart og benti flest til þess að hann jafnaði metinn en sá bosníski reyndist afar seigur í vörninni og hafði betur eftir mikinn barning.   Samtals því 3-1 fyrir Ivan sem var afar kátur í mótslok.  Sagði það vera nóg að tapað fyrir einum Ólafsson í einvígi en eins og kunnugt er lagði Friðrik hann í einvígi árið 2002.

Þorvarður Gunnarsson, forstjóri Deloitte, afhendi þeim köppunum verðlaun í mótslok.   Viðstaddir voru 7 stórmeistarar og var af því tilefni þeim safnað saman og tekin af þeim mynd.   

Skákstjóri var Gunnar Björnsson en tæknimál voru í öruggum höndum Halldórs Grétars og Kristjáns Arnar.

Myndir frá einvíginu teknar af þeim Calle Erlandsson, Einari S. Einarssyni og Helga Árnasyni má finna í myndaalbúmi einvígisins.

 

Oliver Aron sigraði á Deloitte Reykjavík Barna Blitz

 

Það voru átta efnilegustu skákkrakkar Reykjavíkur og nærsveita sem mættu í Ráðhús Reykjavíkur í gær. Tilefnið var úrslit í Reykjavík Deloitte Barnablitz - sem er árlegt hraðskákmót yngri kynslóðarinnar skipulagt af Skákakademíu Reykjavíkur með fulltingi taflfélaganna hér í borg. Úrslit mótsins komu ekki á óvart; unglingalandsliðsmaðurinn og Rimskælingurinn Oliver Aron Jóhannesson úr Fjölni lagði alla sína andstæðinga að velli og það á glæsilegan hátt. 

 

Félaga sinn úr Rimaskóla Jóhann Arnar Finnsson vann Oliver í 8-manna úrslitum, 2-0. Í undanúrslitum var það Dawid Kolka sem lá í valnum, 2-0, og í úrslitunum var það skákprinsessa Grafarvogs Nansý Davíðsdóttir sem tapaði báðum skákunum fyrir skólabróður sínum og liðsfélaga í a-sveit Rimaskóla.

 

Nansý hafði áður unnið vin sinn hann Vigni Vatnar Stefánsson úr TR, klossmátaði Vigni á h8 í bráðabana þegar Vignir átti unnið tafl. Vignir, sá baráttumaður mikli, lét það ekki á sig fá og tryggði sér 3. sætið með einvígissigri á Dawid Kolka, 2-0.

 

Að öðru leyti voru úrslit þessi;

 

8-manna úrslit

• Nansý Davíðsdóttir - Gauti Páll Jónsson 2-1
• Dawid Kolka - Heimir Páll Ragnarsson 2-0
• Oliver Aron Jóhannesson - Jóhann Arrnar Finnsson 2-0
• Vignir Vatnar Stefánsson - Veronika Steinunn Magnúsdóttir 2-0

Undanúrslit

 

• Nansý Davíðsdóttir - Vignir Vatnar Stefánsson 2-1
• Oliver Aron Jóhannesson - Dawid Kolka 2-0

 

3. sæti

 

Vignir Vatnar Stefánsson - Dawid Kolka 2-0

 

1. sæti

 

Oliver Aron Jóhannesson - Nansý Davíðsdóttir 2-0

 

Skákunum var varpað beint á sýningartjald og þónokkur fjöldi áhorfenda lagði leið sína í Ráðhúsið að fylgjast með meisturum framtíðarinnar.

 

Þorvarður Gunnarsson forstjóri Deloitte afhenti öllum þeim skákkrökkum sem komust í úrslitin forláta MP3-spilara merktum Deloitte.

 

Halldór Grétar Einarsson og Kristján Örn Elíasson voru tæknimenn og Stefán Bergsson skákstjóri.

 

Myndaalbúm mótsins

MP Reykjavíkurskákmótið: Sjöunda umferð hafin

Sjöunda umferð MP Reykjavíkurskákmótsins hófst í dag kl. 16:30.  Jóhann Hjartarson verður með skákskýringar sem hefjast upp úr kl. 18 í dag.  Í dag tefldu Helgi Ólafsson og Ivan Sokolov hraðskákeinvígi í Deloitte og hafði sá bosníski betur eftir afar harða og skemmtilega baráttu 3-1.  Einvíginu verður gerð betri skil síðar.

Enn hefur bæst við myndaalbúm mótsins en myndahöfundar mótsins eru Calle Erlandsson, Einar S. Einarsson, Helgi Árnason og nú síðast Þórir Benediktsson.

Helstu tenglar

• Heimasíða mótsins
• Chess-Results
• Beinar útsendingar
• Myndaalbúm mótsins
• Bloggsíða Jan Gustafsson
• Chessbomb (beinar útsendingar með tölvuskýringum)

 

Íslandsmót grunnskólasveita

Íslandsmót grunnskólasveita 2011 fer fram í húsnæði Taflfélags Reykjavíkur Faxafeni 12, Reykjavík dagana  19. og 20. mars nk.  Tefldar verða 9 umferðir eftir Monradkerfi - umhugsunartími 20 mín. á skák fyrir hvern keppenda.

Hver skóli getur sent fleiri en eina sveit - en hver sveit er skipuð fjórum nemendum 1. - 10. bekkjar grunnskóla (auk varamanna).  Keppendur skulu vera fæddir 1995 eða síðar.

 

Dagskrá:                    

• Laugardagur 19. mars kl. 13.00 1., 2., 3., 4. og 5. umf.
• Sunnudagur 20. mars kl. 11.00 6., 7., 8. og 9. umf.

Sigurvegari mótsins hlýtur rétt til þátttöku á Norðurlandamóti grunnskólasveita sem fram fer á Íslandi í september næstkomandi.  

Skráning fer fram hjá Skáksambandi Íslands í síma 568 9141 virka daga kl. 10-13 og í tölvupósti [e-mail].   Skráningu skal lokið í síðasta lagi 17. mars.

Ath.:  Áríðandi er að sveitirnar séu skráðar fyrirfram.

Reykjavíkurskákmótið í sjónvarpsfréttum

Ríkissjónvarpið var með ítarlega og góða frétt um MP Reykjavíkurskákmóitið í gær.   Hann má nálgast hér.  Meðal annars er þar viðtal við Luke McShane.

Vin Open fer fram í dag

Í samstarfi við Skákakademíu Reykjavíkur, heldur Skákfélag Vinjar hið árlega Vin - Open, mánudaginn 14. mars klukkan 13:00. Vin er að Hverfisgötu 47 í Reykjavík.

Mótið er einn hliðarviðburða MP Reykjavíkurmótsins og þátttakendur þaðan hafa fjölmennt í Vin undanfarin ár og gefið mótinu skemmtilegan lit.

Tefldar verða sex umferðir og mótið verður búið fyrir klukkan 15, jafnvel þó kaffihlé verði gert til að bústa upp orkuna.

Auk verðlaunapeninga eru bókaverðlaun fyrir þrjú efstu sætin auk sérstakra aukaverðlauna fyrir:

• Efsta þátttakandann 60 ára og eldri.
• Efsta þátttakandann fæddan 1993 og yngri
• Efst kvenna

 

Skákstjórn, dómgæsla  og utanumhald er í höndum Róberts Lagerman.

 

Allir velkomnir og kostar ekkert,  en endilega að mæta tímanlega svo mótið geti hafist klukkan 13:02!

Kuzubov efstur á MP Reykjavíkurskákmótinu

Úkraínski stórmeistarinn Yuriy Kuzubov er efstur með 5,5 vinning að sjöttu umferð MP Reykjavíkurskákmótinu sem fram enn er í gangi í Ráðhúsinu en öllum toppviðureignum er lokið. Kuzubov vann Pólverjann Miton Kamil.  Fjórir stórmeistarar hafa 5 vinninga, þeir Robert Hess, Bandaríkjunum, Luke McShane og Simon Williams, Englandi, og Grikkinn Stelios Halkias.  Henrik Danielsen er efstur Íslendinga með 4,5 vinning en Hannes Hlífar Stefánsson, Björn Þorfinnsson og Sigurður Daði Sigfússon eru næstir með 4 vinninga.  Pörun sjöundu umferðar liggur fyrir og er á Chess-Results.

Mótið er jafnframt Norðurlandamót í skák bæði í opnum flokki og kvennaflokki. Henrik er efstur i opnum flokki ásamt Tiger Hillarp Persson (Svíþjóð), Jon Ludvig Hammer (Noregi) og Sune Berg Hansen (Danmörku).   Lenka Ptácníková er efst í kvennaflokki ásamt Christin Anderson (Svíþjóð) og Oksana Vovk (Danmörku).

Í sjöundu umferð sem fram fer á morgun og hefst kl. 16:30 mætast meðal annars:

• McShane - Kuzubov
• Halkias - Williams
• Hammer - Hess
• Nyzhnik - Gustafsson
• Chatalbasev - Henrik
• Hannes - Sareen
• Getz - Björn
• Zelbel - Sigurður Daði
• Henrichs - Lenka

 

. Helstu tenglar

• Heimasíða mótsins
• Chess-Results
• Beinar útsendingar
• Myndaalbúm mótsins
• Bloggsíða Jan Gustafsson
• Chessbomb (beinar útsendingar með tölvuskýringum)