Skákþáttur Morgunblaðsins: Engin „tígurmamma“ á bak við nýjan heimsmeistara kvenna

Allar sterkustu skákkonur heims að Polgar-systrum þó undanskildum voru samankomnar í byrjun desember sl. í Hatay í Tyrklandi vegna heimsmeistaramóts kvenna. Þarna var Maja Chiburdanidse, yngsti heimsmeistari sögunnar, Humpey Koneru, Pia Cramling, Alexandra Kosteniuk, Antoaneta Stefanova svo nokkrar séu nefndar. Þegar heimsmeistaramótinu lauk, sem 64 skákkonur hófu og háð var með útsláttarfyrirkomulagi, steig fram nýr heimsmeistari kvenna: hin 16 ára gamla kínverska stúlka Hou Yifan. Í lokaumferðinni vann hún kínverska stöllu sína, Ruan Lufei, en í fyrri umferðum lagði hún að velli Humpey Koneru hina indversku, sem álitin var sigurstranglegasti keppandi mótsins, Zhu Chen, fyrrv. heimsmeistara kvenna sem nú teflir fyrir Katar, og Katherinu Lahno frá Úkraínu.

Yngsti heimsmeistari skáksögunnar hefur vakið talsverða athygli fjölmiðla og blaðamaður breska blaðsins The Telegraph sem var sendur út af örkinni til að kynna sér bakland Hou Yifan var fyrirfram nánast sannfærður um að hitta fyrir „tígurmóður“ – með vísan í harðneskjulegt uppeldi kínverskra barna sem lýst hefur verið í frægri bók, Why Chinese Mothers Are Superior. Einbirnið Hou Yifan er altalandi á ensku og mikill unnandi verka Charles Dickens. Móðir hennar reyndist vera rösklega fertug hjúkrunarkona sem upplýsti að snemma hefðu komið fram hæfileikar Hou Yifan í alls kyns borð-leikjum. Hún hefði bent dóttur sinni á að ef hún ætlaði að leggja skáklistina fyrir sig yrðu önnur áhugamál að víkja. Sem varð raunin og frá unga aldri var prógrammið eitthvað á þá leið, að þegar heimalærdómnum lauk um kl. 17 dag hvern tóku við 5 til 6 klst. skákrannsóknir eða þátttaka í mótum. Og hún fékk aldrei ´leið á skákinni.Ástundunin ein er ekki nægjanleg; enginn kemst svo langt án þess að hafa hæfileika til að bera og þá virðist skákgyðjan hafa úthlutað hinni ungu stúlku í miklum mæli. Greinarhöfundur sló upp í gagnagrunni og fann þessa skák sem tefld var seint í september 2009. Það verður ekki af kínverskum skákmönnum skafið að þeim lætur vel að stýra liði sínu til sóknar:

Hou Yifan – Tan Zhongui

Pirc vörn

1. e4 d6 2. d4 Rf6 3. Rc3 g6 4. Be3 c6 5. Dd2 b5 6. Bd3 Rbd7 7. Rf3 e5 8. dxe5 dxe5 9. h3 Bg7 10. Re2 O-O 11. a4 Bb7 12. Rg3 a6 13. O-O De7 14. c4 b4 15. c5!

Byrjunin minnir á þekkta sigurskák Hannesar Hlífars gegn Ruslan Ponomariov á EM taflfélaga 2001. Ekki gengur 14. ... Rxc5 vegna 15. Dxb4 með óþægilegri leppun.

15. ... a5 16. Dc2 Re8 17. Hfd1 Rc7 18. Bc4 Kh8 19. Bb3 f5!?

Skiljanlegur leikur, ella myndi hvítur herða tökin með því að tvöfalda hrókana á d-línunni.

20. exf5 Rd5 21. fxg6 Rxe3 22. fxe3 Rxc5 23. Rf5! 23. ... Hxf5 24. Dxf5 Rxb3 25. Rg5 h6 26. Rf7 Kg8 27. Hd7 Bc8!

Krókur á móti bragði, 28. Had1 liggur beinast við en svartur fær varist með 28. ... De8! Hou Yifan hefur séð lengra.

28. Hd8+! Dxd8 29. Rxh6+ Kh8

30. Rf7+ Kg8 31. Rh6+ Kh8 32. Dh5! Ha7 33. Rg4+! Bh6

Eða 33. .. Kg8 34. Dh7 Kf8 35. Hf1+ Ke8 36. Dg8+.

34. Rxh6 Kg7 35. Rf7 Dd5 36. Dh6+ Kf6 37. g7 Kxf7 38. Hf1+ Ke7 39. Dg5+

- og svartur gafst upp.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum, 13. febrúar 2011.

Skákþættir Morgunblaðsins

Skákþáttur Morgunblaðsins: Björn Þorfinnsson skákmeistari Reykjavíkur 2011

Björn Þorfinnsson varð skákmeistari Reykjavíkur í annað sinn eftir geysispennandi lokaumferð en fyrir hana var hann efstur að vinningum ásamt Hjörvari Steini Grétarssyni. Björn vann Hrafn Loftsson nokkuð örugglega en Hjörvar tapaði fyrir Sigurbirni Björnssyni. Um 70 skákmenn tóku þátt í mótinu en efstu menn urðu þessir:

1. Björn Þorfinnsson 8 v. (af 9) 2. Sigurbjörn Björnsson 7½ v. 3. Hjörvar Steinn Grétarsson 7 v. 4.-5. Gylfi Þórhallsson og Guðmundur Gíslason 6½.

Björn Þorfinnsson er nú Reykjavíkurmeistari í annað sinn. Glöggir menn þykjast sjá að hann hafi náð að ráða bót á ýmsum annmörkum sem áður stóðu honum fyrir þrifum.

Önnur úrslit koma ekki á óvart. Vert er þó að benda á góða frammistöðu Hallgerðar Helgu Þorsteinsdóttur sem varð í 7.-13. sæti. Guðmundur Kristinn Lee hækkaði sig mest á stigum eða um tæplega 50 stig.

Nakamura sigraði í Wijk aan Zee

Úrslitin í efsta flokki stórmótsins í Wijk aan Zee eru mikill sigur fyrir Bandaríkjamanninn unga Hikaru Nakamura, sem eins og nafnið bendir til er af japönskum uppruna. Hann er einn ötulasti skákmaðurinn á hinu vinsæla vefsvæði ICC þar sem hann teflir jöfnum höndum „bullet" og venjulegar hraðskákir. Sigur hans var afar anngjarn. Magnús Carlsen deildi 3. sæti með Aronjan. Á lokasprettinum lagði hann Kramnik að velli með svörtu. Lokastaðan varð þessi:

1. Nakamura 9 v. (af 13) 2. Anand 8½ v. 3.-4. Carlsen og Aronjan 8 v. 5.-6. Vachier Lagrave og Kramnik 7½ v. 7.-8. Giri og Ponomariov 6½ v. 9.-10. Nepomniachchi og Wang Hao 6 v. 11.-13. Grichuk, Smeets og L´Ami 4½ v. 14. Alexei Shirov 4 v.

Kortsnoj gefur ekkert eftir

Á opna mótinu í Gíbraltar beinist athygli manna ekki aðeins að efsta manni, Vasilij Ivanstjúk sem hefur aðeins misst einn vinning í fyrstu níu umferðunum; Viktor Kortsnoj, fæddur 23. mars 1931, hlýtur að teljast besti öldungur allra tíma. Sem fyrr tekur hann sigrum með jafnaðargeði en er dálítið önugur þegar hann tapar og lætur þá yfirleitt nokkur vel valin orð falla. Eftir níu umferðir hafði Kortsnoj unnið þrjár skákir og gert sex jafntefli. Í 2. umferð vann hann þriðja stigahæsta keppandann, Ítalann Caruno, sem er með 2721 elo-stig:

Fabiano Caruno - Viktor Kortsnoj

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. d3 d6 6. c3 Be7 7. O-O O-O 8. He1 Rd7 9. Be3 Rb6 10. Bb3 Kh8 11. Rbd2 f5 12. Bxb6 cxb6 13. Bd5 g5!

Ekki verður því haldið fram að það vanti persónuleika í stíl Kortsnojs sem hikar ekki við að leggja til atlögu.

14. h3 g4 15. hxg4 fxg4 16. Rh2 Bg5 17. Rc4 b5 18. Re3 Bxe3

Það er meiri „hraði" í þessum leik en 18. ... h5.

19. Hxe3 Df6 20. De1 Re7 21. f3 Rxd5 22. exd5 Hg8 23. Dg3 gxf3 24. Dxf3 Bf5 25. Hf1 Hg5 26. Kh1 Dh6 27. Hf2 Hag8

Og svartur er með góð færi eftir g-línunni.

28. He1 Dg6

Enn betra var 28. ... Hh5 29. g3 Dg6 o.s.frv.

29. He3

29. ... Bxd3!

Nú strandar 30. Hxd3 á e4 og vinnur.

30. Kg1 e4 31. Dh3 Hxd5 32. Dd7 Hg5 33. g4 Dh6 34. Hf7 H5g7 35. Hxg7 Hxg7 36. Dd8+ Hg8 37. Db6 Df6 38. Dxb7 Hf8 39. Da7 b4 40. Hh3 Dg7 41. De3 bxc3 42. bxc3 Dxc3 43. Hh5 d5 44. g5 Da1+ 45. Kg2 Bf1+ 46. Kg3 De5+

- og hvítur gafst upp.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum, 6. febrúar 2011.

Skákþættir Morgunblaðsins

Skákþáttur Morgunblaðsins: Björn og Hjörvar jafnir fyrir lokaumferð Skákþings Reykjavíkur

Félagarnir úr ólympíuliði Íslands þeir Björn Þorfinnsson og Hjörvar Steinn Grétarsson heyja þessa dagana harða keppni um sæmdarheitið skákmeistari Reykjavíkur 2011. Lokaumferð mótsins fór fram á föstudagskvöldið og fyrir þá umferð voru þeir hnífjafnir að vinningum en Hjörvar átti að tefla við Sigurbjörn Björnsson, sem einnig gat blandað sér í baráttuna um titilinn. Björn átti að tefla við Hrafn Loftsson sem hefur hafið keppni á skákmótum aftur eftir nokkurt hlé. Staðan fyrir lokaumferðina var þessi:

1.-2. Björn Þorfinnsson og Hjörvar Steinn Grétarsson 7 v. (af 8) 3. Sigurbjörn Björnsson 6½ v. 4.-5. Hrafn Loftsson og Ingvar Þ. Jóhannesson 6 v. 6.-9. Gylfi Þórhallsson, Þór Valtýsson, Jón Úlfljótsson og Guðmundur Gíslason.

Um árangur einstakra keppenda í mótinu hafa bætt sig mest að stigum Guðmundur Kristinn Lee - 37 stig, Emil Sigurðarson - 30 stig og Hallgerður Helga Þorsteinsdóttir - 29 stig. Þá hefur verið gaman að fylgjast með tilþrifum yngstu keppendanna sem eru sumir í kringum 7 ára að aldri. Skipulagning mótsins hjá Taflfélagi Reykjavíkur hefur verið til fyrirmyndar og er t.d. hægt fylgjast með baráttunni á efstu borðum á netinu án þeirra tæknilegu vandkvæða sem stundum hafa plagað slíkar útsendingar.

Spennandi lokaumferðir í Wijk aan Zee

Heimsmeistarinn Anand og Hikaru Nakamura eru efstir á stórmótinu í Wijk aan Zee í Hollandi þegar þrjár umferðir eru eftir en útlit er fyrir mikla spennu á lokasprettinum. Staða efstu manna eftir tíu umferðir: 1.-2. Anand og Nakamura 7 v. (af 10) 3.-4. Aronjan og Kramnik 6½ v. 5-7. Carlsen, Nepomniachtchi og Vachier 5½ v. Magnús Carlsen tók góðan sprett eftir slaka byrjun en tapaði svo aftur fyrir jafnaldra sínum með hvítu; Rússinn Ian Nepomniachtchi gaf engin grið í tíundu umferð og verður að teljast harla ólíklegt að Norðmaðurinn nái efsta sætinu úr þessu. Bandaríkjamaðurinn Hikaru Nakamura teflir allra manna skemmtilegast og er mikill baráttujaxl en varð þó að láta í minni pokann fyrir Magnúsi þegar þeir mættust í áttundu umferð:

Magnús Carlsen - Hikaru Nakamura

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 a6 6. Be2 e5 7. Rb3 Be7 8. Be3 0-0

Eftir skákina taldi 8.... Be6 jafnvel nákvæmara því 9. g4 er þá svarað með 9.... d5.

9. g4! Be6 10. g5 Rfd7 11. h4 Rb6 12. Dd2 R8d7 13. f4 exf4 14. Bxf4 Re5 15. 0-0-0 Hc8 16. Kb1 Dc7 17. h5 Hfe8 18. Ka1!?

Merkilegur fyrirbyggjandi leikur. Magnús vildi leika 18. Rd4 en gaf það frá sér vegna 18....Rbc4 19. De1 Db6 20. Bc1 Ra3+ 21. Ka1 Dxd4 og 22. Hxd4 strandar á 22.... Rxc2+ og svartur hefur betur.

18.... Bf8 19. Rd4 Dc5 20. g6! Rec4

Hvítur vinnur eftir 20.... fxg6 21. hxg6 Rxg6 22. Rxe6 Hxe6 23. Bg4! o.s.frv.

21. Bxc4 Rxc4 22. Dd3 fxg6 23. hxg6 h6 24. Dg3! Db6 25. Bc1 Da5 26. Hdf1 Re5 27. Rd5! Bxd5 28. exd5 Dxd5

( STÖÐUMYND )

29. Bxh6! gxh6 30. g7! Be7

Eða 30.... Bxg7 31. Rf5 Hc7 32. Rxh6+ Kh7 33. Rf7+ Kg8 34. Hh8 mát.

31. 31. Hxh6 Rf7 32. Dg6 Rxh6 33. Dxh6 Bf6 34. Dh8+ Kf7 35. g8 (D)+ Hxg8 36. Dxf6 Ke8 37. He1+

- og Nakamura gafst upp. Hann verður að bera drottninguna fyrir, 37.... De5 en þá fellur hrókur til viðbótar: 38. Hxe5+ dxe5 39. De6+.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum, 30. janúar 2011.

Skákþættir Morgunblaðsins

Skákþáttur Morgunblaðsins: Björn vann Hjörvar og er efstur á Skákþinginu

Björn Þorfinnsson hrifsaði til sín forystuna á Skákþingi Reykjavíkur þegar hann lagði Hjörvar Stein Grétarsson sl. miðvikudagskvöld í 5. umferð mótsins. Hjörvar hefur unnið skákþingið tvö undanfarin ár og tefldi langa og erfiða baráttuskák við Björn félaga sinn úr ólympíuliði Íslands. Björn hafði sigur í jafnteflislegu endatafli en frumkvæðið var í hans höndum lengst af. Nokkuð hefur verið um óvænt úrslit á mótinu og aftur var Guðmundur Gíslason í stóru hlutverki er hann tapaði fyrir Hallgerði Helgu Þorsteinsdóttur í 4. umferð en þá vann Tinna Kristín Finnbogadóttir einnig óvæntan sigur á Þorvarði Ólafssyni eftir að hafa varið í afar erfiðri stöðu lengi vel. Í þessari umferð vann hinn sjö ára gamli Vignir Vatnar Stefánsson formann TR, Sigurlaugu Friðþjófsdóttur. Staða efstu manna eftir fimm umferðir er þessi:

1. Björn Þorfinnsson 4½ v. 2.-11. Sigurbjörn Björnsson, Hjörvar Steinn Grétarsson, Hrafn Loftsson, Ingvar Þór Jóhannesson, Gylfi Þórhallsson, Sverrir Þorgeirsson, Kjartan Maack, Júlíus Friðjónsson, Jóhann Ragnarsson og Sævar Bjarnason. Keppendur eru 70 talsins.

Skákþing Reykjavíkur 2011; 5. umferð:

Hjörvar Steinn Grétarsson - Björn Þorfinnsson

Enskur leikur

1. c4 e5 2. Rc3 Rc6 3. g3 g6 4. Bg2 Bg7 5. e3 d6 6. Rge2 Rge7 7. d3 Be6 8. Rd5 Dd7 9. Hb1

9. Da4 var annar möguleiki.

9.... Rd8 10. Rxe7 Dxe7 11. b4 Dd7 12. f4?

Ónákvæmni. Mun betra er 12. h4 t.d. 12.... h5 13. Rc3 eða Dc2 og hvíta staðan er liðlegri.

12.... Bh3 13. Bf3 Bg4 14. Bxg4 Dxg4 15. 0-0 h5 16. Bb2 h4 17. Rc3 Dh3 18. g4 Re6 19. Df3 Dxf3 20. Hxf3 exf4 21. exf4 0-0-0

Svartur á aðeins betri möguleika í þessari stöðu.

22. Re2 Bxb2 23. Hxb2 Hde8 24. Kf2 Kd7 25. Rc3 f5 26. gxf5 gxf5 27. Rd5 Hh6 28. b5 Hg8 29. Re3 Rd4 30. Hh3 Re6 31. Hf3 Hhg6 32. Hb1 b6 33. Hf1 a6 34. bxa6 Rd4 35. Hh3 Ha8 36. a4

36. Hxh4 kom einnig til greina t.d. 36.... Hxa6 37. Hh7+ Kc8 38. Ha1 Ha3 39. Rd5 með flókinni stöðu.

36.... Hxa6 37. Ha1 Hh6 38. Rg2 Ha8 39. Hxh4 Hxh4 40. Rxh4 Hh8 41. Rg2?

Eftir 41. Rf3 Rxf3 42. Kxf3 Hh3+ 43. Ke2 Hxh2+ 44. Ke3 ásamt - a5 við tækifæri en staðan dautt jafntefli.

41.... Hxh2 42. Kg3 Hh8 43. Re3 c6 44. Ha2 He8 45. Kf2 Ha8 46. Ke1 Kc7 47. Kd2 He8 48. Hb2 He7 49. Hb1 Hh7 50. Hf1 Hh2+ 51. Kc3 c5

Skyndilega er hvítur í vonlausri aðstöðu því hinn óburðugi riddari á e3 er þrælbundinn við að valda máreit hróksins á c2.

52. He1 Kd8 53. Hb1 He2 54. Hxb6 Hxe3 55. Hxd6+ Kc7 56. Hd5 Kc6 57. Hd8 He2 58. Hc8+Kd6 59. Hd8+ Kc7 60. Hxd4 cxd4 61. Kxd4 Kd6

- og hvítur gafst upp.

Anand og Nakamura efstir í Wijk aan Zee

Á nýbirtum elo-lista FIDE skipar Magnús Carlsen aftur efsta sætið en aðeins munar fjórum stigum á honum og heimsmeistaranum Anand. Ef fram heldur sem horfir á stórmótinu í Wijk aan Zee munu þeir fljótlega hafa sætaskipti því Magnús hefur ekki verið að tefla vel og er aðeins með 1½ vinning eftir fjórar umferðir; tapaði í aðeins 22 leikjum með hvítu fyrir mesta efni Hollendinga um þessar mundir, hinum unga Anish Giri. Staða efstu manna er þessi:

1.-2. Anand og Nakamura 3 v. (af 4). 3. Aronjan, Giri og Vachier-Lagrave 2½ v. Keppendur í efsta flokki eru 14 talsins.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum, 23. janúar 2011.

Skákþættir Morgunblaðsins

Skákþáttur Morgunblaðsins: Páll Andrason lagði meistarann í 15 leikjum

Skákþing Reykjavíkur 2001, níu umferða opið mót sem dregur nafn sitt af aðalstyrktaraðilanum og heitir því Kornax-mótið, skartar ýmsum af fremstu virku skákmönnum þjóðarinnar þó að ýmsir sterkir meistarar úr þeim hópi sitji heima.

Framundan er hið árlega Reykjavíkurskákmót og Skákþing Íslands sem fram fer á Egilsstöðum. Hjörvar Steinn Grétarsson er núverandi skákmeistari Reykjavíkur og reynir að verja titil sinn en hann mun eiga í harðri keppni við þá Björn Þorfinnsson, Guðmund Gíslason, Lenku Ptacnikovu, Sigurbjörn Björnsson, Ingvar Þ. Jóhannesson, Sverri Þorgeirsson, Snorra Bergsson, Sævar Bjarnason, Halldór Halldórsson, Þorvarð Ólafsson, Gylfa Þórhallsson og ýmsa fleiri.

Þótt flest úrslit hafi verið eftir bókinni og flestir þeir sem taldir voru upp hafi unnið tvær fyrstu skákir sínar hafa nokkur óvænt úrslit séð dagsins ljós. Þannig vann Grímur Björn Kristinsson óvæntan sigur á Lenku Ptacnikova í 2. umferð. Óvæntustu úrslitin komu þó í 1. umferð þegar Páll Andrason lagði Guðmund Gíslason að velli í aðeins 15 leikjum! Guðmundur Gíslason er tvímælalaust einn af sigurstranglegustu keppendunum og margir minnast þess þegar hann vann Skákþing Reykjavíkur á tíunda áratug síðustu aldar með fullu húsi. En aðstæður hans eru dálítið aðrar en annarra keppenda; hann er búsettur vestur á fjörðum en lætur sig ekki muna um að koma akandi eða fljúgandi frá Ísafirði til að geta teflt skákir sínar. En þessa skák í 1. umferð teflir hann satt að segja eins og maður sem er að reyna að ná kvöldvélinni vestur. Kannski tókst það - en ekki með þeim árangri sem að var stefnt. Páll Andrason er mikill keppnismaður og verður gaman að fylgjast með honum á þessu móti:

Skákþing Reykjavíkur 2011 - Kornax-mótið:

Páll Andrason - Guðmundur Gíslason

Sikileyjarvörn

1. e4 c5 2. Rf3 e6 3. d4 cxd4 4. Rxd4 a6 5. Rc3 Dc7 6. a3 b5 7. Bd2 Bb7 8. g3

Þrír varfærnislegir leikir ná að kalla fram sterk viðbrögð hjá Guðmundi.

8. ... f5?!

Hæpið. Svartur getur fengið góða stöðu með eðlilegri liðsskipan, 8. ... Rf6, d6, Be7, Rbd7 o.s.frv.

9. Bg2 fxe4 10. Rxe4 Bxe4??

Glapræði. Hann má alls ekki missa þennan biskup.

11. Bxe4 De5

12. De2! Dxd4

Sennilega hugðist Guðmundur leika 12. ... d5 en sést yfir að hvítur á hinn öfluga leik 13. Bg6+! og drottningin á e5 fellur.

13. Bxa8 Dxb2 14. O-O Rf6 15. Bf4

- og svartur gafst upp. Framhaldið gæti orðið 15. ... Be7 16. Bxb8 ( eða 16. Be5 strax ) O-O 17. Be5 og drottning fellur.

Stórmótið í Wijk aan Zee að hefjast

Um helgina hefst í smábænum Wijk aan Zee eitt sterkasta skákmót ársins en það er hluti skákhátíðar sem haldin hefur verið reglulega þar og í Bewerwijk síðan 1938. Í efsta flokki tefla 14 stórmeistarar en þeir eru samkvæmt stöðu á heimslistanum þessir: Magnús Carlsen, Wiswanthan Anand, Levon Aronjan, Vladimir Kramnik, Alexander Gritsjúk, Hikaru Nakamura, Ruslan Ponomariov, Ian Nepomniachtchi, Wang Hao, Alexei Shirov, Maxime Vachier - Lagrave, Anish Giri, Jan Smeets, Erwin I 'Ami.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í Sunnudagsmogganum, 16. janúar 2011.

Skákþættir Morgunblaðsins

Skákþáttur Morgunblaðsins: Miserfið skákdæmi

Skákþrautir þær sem hér birtast verða að teljast eilítið snúnari en þær sem undirritaður tók saman fyrir tveimur árum. Fyrsta dæmið er óvenjulegt. Þar þarf einungis að finna mátleikinn. Möguleikarnir eru æði margir en aðeins einn leikur er réttur.
 

 Dæmi nr. 1 T.P. Madely Mát í 1. leik!
 
 
Næsta dæmi ætti ekki að vefjast fyrir neinum
 
 

Dæmi nr. 2 A. Galitskí Mát í 2. leik
 
 
en í dæmum 3-6 sveiflast  erfiðleikastuðullinn talsvert upp á við en þau draga dám af þeim sem lögð eru fyrir keppendur á alþjóðlegum skákdæmamótum, sem njóta mikilla vinsælda um þessar mundir. Nýbakaður heimsmeistari í greininni er enski stórmeistarinn og stærðfræðingurinn John Nunn.

Dæmi nr. 3 E. J. Polglase Mát í 2. leik
 
 
 
 Dæmi nr. 4 Cecil A. L. Bull Mát í 3. leik
 
 
 
 
 

Dæmi nr. 5 Sigurd Clausen Mát í 3. leik.
 
 
 
 

 Dæmi nr. 6 Michael McDowell Mát í 3. leik
Í dæmi nr. 7 er komið að einum af höfuðsnillingum skákdæmagerðar, Leonid Kubbel.
 

Dæmi nr. 7 L. Kubbel Hvítur leikur og vinnur.

 

Lokadæmið nr. 8 á sér óvissan uppruna en nokkrar útgáfur eru til um söguna á bak við það og dæmið sjálft hefur birst annars staðar í eilítið breyttri mynd. Sú útgáfa sögunnar sem undirritaður heyrði fyrir 20 árum var á þá leið, að snemma á öldinni sem leið hefði ókunnur bóndi frá Georgíu komið þessu dæmi saman eftir mikla erfiðismuni en hugmyndina fékk hann eftir að hafa skoðað skák sem Capablanca tefldi á stórmótinu í Sankti Pétursborg árið 1914. Hann var svo stoltur af hugverki sínu að hann límdi mynd af upphafsstöðunni áfast við sitt hjartkæra landbúnaðartæki - dráttarvélina - sem með því hlaut merkilegan sess í skáksögunni. Nokkru síðar áræddi bóndi að senda rússnesku skákblaði dæmið með ósk um að það yrði birt. En bréfið frá honum lá hins vegar óopnað áratugum saman. Um það bil hálfri öld síðar reikaði „töframaðurinn frá Riga", Mikhail Tal, inn á skrifstofur skákvikublaðsins „64" og einhver þar bað hann að fara yfir gamlan póst sem hafði hrúgast upp hjá ritstjórninni. Þar fannst bréfið frá bóndanum frá Georgíu. Tal hafði hrist fram úr erminni marga glæsilega fléttu um dagana en þessi sem blasti við honum á gulnuðum blöðum lét hann ekki ósnortinn enda má kalla lausnina tæra snilld.

 

  Dæmi nr. 8. Höfundur ókunnur Hvítur leikur og vinnur.

 

Lausnir munu birtast í áramótablaði Morgunblaðsins.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í jólablaðinu, 24. desember.

Skákþættir Morgunblaðsins

Skákþáttur Morgunblaðsins: Þriggja stiga reglan færði Magnúsi Carlsen sigur

Þökk sé upptöku þriggja stiga reglunnar og öðrum sérstæðum ákvæðum náði Magnús Carlsson að endurtaka afrek sitt frá því í fyrra og vinna London chess classic-mótið. Eftir ævintýralegan endasprett þar sem Magnús náði 3½ vinningi úr síðustu fjórum skákum sínum, þar af jafntefli gegn Vladimir Kramnik eftir 85 leiki, en staða hans í þeirri skák var langtímum saman gjörtöpuð og eiginlega vonlaus að flestra mati. Í lokaumferðinni lagði Magnús heillum horfinn Nigel Short, sem átti sitt lélegasta mót frá upphafi, og náði aðeins tveimur jafnteflum í sjö skákum. Lokaniðurstaðan var þessi:

1. Magnús Carlsen 13 stig (4 ½ v.) 2. – 3. Wisvanatahan Anand og Luke McShane 11 stig (4½ v.) 4. Hikaru Nakamura 10 stig (4 v.) 5. Vladimir Kramnik 10 stig (4 v.) – Sigur Nakamura yfir Kramnik gilti. 6. Michael Adams 8 stig (3½ v.) 7. David Howell 4 stig (2 v.) 8. Nigel Short 2 stig (1 v.)

Þess má geta að ef gamla kerfinu hefði verið fylgt væri Magnús í 3. sæti samkvæmt Sonneborg-Berger stigakerfinu en hann tapaði fyrir bæði Anand og Luke McShane.

Eftir dapurt gengi á Ólympíumótinu í Khanty Manisk og síðan í Bilbao er Norðmaðurinn aftur kominn með byr í seglin, sigraði á „perlumótinu“ í Kína og sýndi mikla keppnishörku eftir tvö töp í fyrstu þremur skákum sínum. Spá greinarhöfundar um að Kramnik ynni þetta mót virtist ætla að rætast en hann yfirspilaði Magnús eftir öllum kúnstarinnar reglum í næstsíðustu umferð. Kramnik var manni yfir en í fremur einföldu endatafli leitaði hann eftir enn meiri uppskiptum. Þegar þessi staða kom upp varð mönnum skyndilega ljóst að vinningurinn var ekki svo einfaldur:

London; 6. umferð:

Kramnik – Carlsen

Þessi staða er unnin á hvítt en baráttan var orðin lýjandi og hafði staðið í u.þ.b. sjö klst. samfellt. Kramnik taldi sig sennilega getað náð sigri án þess að leggja á sig flókna útreikninga. En eftir næsta leik er vinningurinn úr greipum hans genginn.

69. Kg3? Vinningleiðin hefst með 69. g5! eins og nokkur óskeikul tölvuforrit bentu á: Aðalleiðin er þessi. 69. .. hxg5 70. g3!! Kd4 71. Kg4 Ke3 72. Kxg5 Kf3 73. Kh4 og svartur lendir í leikþröng: 73. ... g6 74. Be6 g5+ 75. Kh3 Kf2 76. Kg4 Kg2 77. Ba2 Kf2 78. Bd5! – svartur er í leikþröng.

69. ... Ke3 70. Kh4 Kf2 71. Bd5 g6! 72. Kh3 g5 73. Kh2 Kf1 74. Be6 Kf2 75. c4 Ke3 76. Kg3 Kd4 77. Be6 Ke3 78. Kh2 Kf2 79. Bc4 Ke3 80. Kg1 Kf4 81. Be6 Ke5 82. Bb3 Kf4 83. Be6 Ke5 84. Bb3 Kf4 85. Be6 Ke5 86. Bb3

– og hér sættist Kramnik á jafnteflið.

Þröstur Þórhallsson tefldi í B- flokki mótsins en þar voru keppendur 182 talsins. Þröstur náði sinum besta árangri í langan tíma, hlaut 7 vinninga af 9 mögulegum, hafnaði í 3. – 7. sæti.

Friðriks-mótið er jafnframt Íslandsmót í hraðskák

Hið árlega jólamót Landsbanka Íslands, Friðriks-mótið, fer fram í dag, 19. desember. Árni Emilsson útibússtjóri kom þessu móti á laggirnar á sínum tíma og bankinn vill eindregið halda uppi heiðri fyrsta stórmeistara Íslendinga. Mótið er jafnframt hraðskákmót Íslands. Þegar hafa skráð sig til leiks yfir 70 skákmenn og má búast við geysiharðri keppni en tefldar verða 11 umferðir eftir svissneska kerfinu.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 19. desember 2010.

Skákþættir Morgunblaðsins

[Event "2nd London Chess Classic"] [Site "London ENG"] [Date "2010.12.14"] [Round "6"] [White "Kramnik, Vladimir"] [Black "Carlsen, Magnus"] [Result "1/2-1/2"] [WhiteTitle "GM"] [BlackTitle "GM"] [WhiteElo "2791"] [BlackElo "2802"] [ECO "D07"] [Opening "QGD"] [Variation "Chigorin defence"] [WhiteFideId "4101588"] [BlackFideId "1503014"] [EventDate "2010.12.06"] 1. d4 d5 2. c4 Nc6 3. Nf3 Bg4 4. Nc3 e6 5. Bf4 Bd6 6. Bg3 Nf6 7. e3 O-O 8. a3 Ne7 9. Qb3 b6 10. Ne5 c5 11. Nxg4 Nxg4 12. Rd1 Bxg3 13. hxg3 Nf6 14. cxd5 exd5 15. Be2 Qd6 16. Qc2 h6 17. O-O c4 18. b3 Qxa3 19. bxc4 dxc4 20. Bf3 Rab8 21. Ra1 Qd6 22. Nb5 Qd7 23. Qxc4 a5 24. e4 Rfc8 25. Qe2 Rc6 26. Rab1 Rd8 27. Rfd1 Rdc8 28. d5 Rc2 29. Qe3 R2c5 30. Nd4 Re8 31. Qd3 Qd6 32. Qa6 Rb8 33. Nb3 Rc2 34. Nd4 Rc5 35. Nb3 Rc2 36. Qd3 Rcc8 37. Nd2 Ng6 38. Be2 Qc5 39. Rb5 Qc3 40. f4 a4 41. e5 Nd7 42. Qxc3 Rxc3 43. Ne4 Rc7 44. Ra1 Ra7 45. d6 Ngf8 46. Nc3 Nc5 47. Nd5 Ra5 48. Rxb6 Rxb6 49. Nxb6 Nfe6 50. Bc4 Kf8 51. f5 Nd8 52. Rf1 Ncb7 53. Re1 a3 54. e6 fxe6 55. fxe6 Nxd6 56. e7+ Ke8 57. exd8=R+ Kxd8 58. Rd1 Kc7 59. Ba2 Rg5 60. Nd5+ Kc6 61. Nc3 Rc5 62. Rxd6+ Kxd6 63. Ne4+ Kc6 64. Nxc5 Kxc5 65. Kf2 Kd4 66. Kf3 Kd3 67. g4 Kd2 68. Be6 Kd3 69. Kg3 Ke3 70. Kh4 Kf2 71. Bd5 g6 72. Kh3 g5 73. Kh2 Kf1 74. Be6 Kf2 75. Bc4 Ke3 76. Kg3 Kd4 77. Be6 Ke3 78. Kh2 Kf2 79. Bc4 Ke3 80. Kg1 Kf4 81. Be6 Ke5 82. Bb3 Kf4 83. Be6 Ke5 84. Bb3 Kf4 85. Be6 Ke5 86. Bb3 1/2-1/2

Skákþáttur Morgunblaðsins: Boris Spasskí á batavegi

Fáir skákmenn hafa notið viðlíkrar hylli hér á landi og Boris Spasskí. Aðdáendum hans og velunnurum hans var því illa brugðið þegar fréttir bárust af því að hann lægi alvarlega veikur eftir heilablóðfall í september sl. Hann var heiðursgestur á skákmóti kvenna í Moskvu þegar hann hné skyndilega niður. Spasskí er fæddur 30. janúar 1937 og þó kominn sé af léttasta skeiði hefur hann alla tíð verið vel á sig kominn líkamlega. Spasskí dvelur nú á sjúkrahúsi í París og mun væntanlega útskrifast þaðan um miðjan janúar og horfur á fullum bata munu vera góðar. Hann biður vini sína um að hafa ekki alltof miklar áhyggjur af sér.

Árið 1969 vann Spasskí Tigran Petrosjan 12 ½ : 10 og varð þar með heimsmeistari, sá tíundi í röðinni. Nafn hans er í dag ekki minna þekkt á alþjóðavísu en t.d. Kasparovs eða Karpovs en þó er samanburður við þessa tvo honum ekkert sérlega hagstæður. Eftir stóra einvígið í Reykjavík var hann lengi eins og skugginn af sjálfum sér. Þó hafa komið fram skákmenn, eins og t.d. bosníski stórmeistarinn Ivan Sokolov, sem telja Spasskí hiklaust einn af merkilegustu skákmönnum sem uppi hafa verið. Spasskí hefur sjálfur haldið því fram við ýmis tækifæri að tímabilið frá 1964 - 1970 sé sitt besta en frá þessum árum er oft vitnað til frábærrar meðhöndlunar hans á flóknum miðtaflsstöðum. Þar er að finna námu fróðleiks. Spasskí yfirbugaði Keres, Geller og Tal í áskorendaeinvígjunum árið 1965 og árið 1968 vann hann Geller, Larsen og Kortsnoj. Ef frá er skilið einvígið við Paul Keres (6:4) vann hann öll þessi einvígi með þriggja vinninga mun. Hann var óumdeildur og glæsilegur heimsmeistari árið 1970, vann þau mót sem hann tók þátt í og lagði Fischer að velli í frægu 1. borðs uppgjöri á Ólympíumótinu í Siegen.

Spasskí tefldi á þessu tímabili 462 kappskákir, vann 171 skák, tapaði 28 og gerði 263 jafntefli, um 65% árangur gegn bestu skákmönnum heims.

En það var eins og stríðsgæfan yfirgæfi hann árið 1971. Hvað gerðist?

Tölvutæknin gerir mönnum kleift að stunda alls kyns samanburðarannsóknir og greinarhöfundur freistaðist til að láta forritið Rybku rýna í skákir Spasskís frá þessu tímabili og niðurstaðan var athyglisverð, ýmis lausatök sem vart sáust áður koma fram í síauknum mæli árið 1971. Á dögunum vann Rybka með yfirburðum þrítugasta hollenska meistaramótið í tölvuskák. Forritið keyrði á 26 tölvum með samtals 260 örgjörva (kjarna) sem hver var knúinn af a.m.k. 2,93 Ghz, svo öllum ætti að vera ljóst að þarna er öflug vél á ferðinni.

Lítum á dæmi frá skák Spasskí, með „augum" Rybku, frá opna kanadíska meistaramótinu 1971:

Sjá stöðumynd

Spasskí - Suttles

Hvernig skyldu menn meta þessa stöðu? Heimsmeistari situr að tafli, hrókarnir ráða yfir opnu línunum og biskuparnir eru ógnandi.

Suttles lék 31. ... Hxd3 32. Dxd3 Rhxg3 en Spasskí vann eftir 33. Hfe1. Rybka mat þetta á augabragði og niðurstaðan var óvænt: svartur er með unnið tafl og fyrsti leikurinn er:

31. ... Rf4!!

Aðalafbrigðið leiðir til unnins hróksendatafls:

32. gxf4 Rd2 33. Dg3 Rxf1+ 34. Hxf1 Dxd5 35. Hd1 Dxd4! 36. Bxg6+ Kxg6 37. Hxd4 He2+ 38. Dg2 Haxa2 39. Dxe2 Hxe2+ 40. Kg3 b3

- og vinnur þó það taki nokkurn tíma til viðbótar.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 5. desember 2010.

Skákþættir Morgunblaðsins

Skákþáttur Morgunblaðsins: Larry Evans og samvinnan við Bobby Fischer

Sennilega var þetta rétt hjá Bent Larsen. Að þeir hafi komið inn í skákina með lögmál götustrákanna. Og gatan? Þar sem 42. stræti í New York rennur í gegnum Broadway og heilsar upp á Times Square sem margir kalla nafla alheimsins. Larry Evans, sem lést hinn 15. nóvember sl., 78 ára gamall, sat á því horni löngum stundum á árunum í kringum 1950 og tefldi við vegfarendur upp á 10 sent - og lærði öll „trixin" í leiðinni. Hann varð fyrst skákmeistari Bandaríkjanna árið 1951, 19 ára gamall. Time Magazine greindi frá því sumarið '72 að nokkrum árum síðar hefði annar ungur skákmaður, sem þá gekk undir nafninu „The robot", farið að dæmi Evans og teflt upp á peninga til þess að komast í bíó: Bobby Fischer. Stundum hurfu þessir ungu menn inn í hrikalega búllu við 42. stræti, „The Flea House", en þangað vöndu komur sínar ýmsir skrautlegir karakterar, tefldu, spiluðu kotru eða póker. Frægastur fastagesta var sennilega gamli heimsmeistarinn í fjölbragðaglímu, Kola Kwariani, betur þekktur sem „Nick the Wrestler". Sá lék í mynd Stanleys Kubricks frá 1956 „The Killing".

Nokkrum skrefum frá var hægt að ganga inn á „Tad's Steaks" og fá gegn vægu gjaldi verstu nautasteikur í heimi.

Samvinna þeirra Bobbys Fischers og Larrys Evans er nú hluti skáksögunnar. Árið 1964 skipulagði Evans fjöltefla-leiðangur Fischers um flest ríki Bandaríkjanna. Hvert fjöltefli kostaði 250 dali sem var dágóður skildingur í þá daga. Evans ritaði a.m.k. 20 skákbækur, ritstýrði „Modern Chess Openings" og skrifaði pistla í dagblöð vítt og breitt um Bandaríkin. En þekktast er framlag hans til hinnar frægu bókar Fischers „My 60 Memorable Games" sem kom út árið 1969. Evans ritaði inngang fyrir hverja skák og skrifaði upp eftir Fischer leikjaraðir, slanguryrði og nokkra ógleymanlega frasa. Þegar prenta átti bókina vildi Bobby skyndilega hætta við allt saman, en gaf sig að lokum með þeim rökum, að heimurinn væri hvort eð er að farast og í lagi að slíta upp fáeina dali áður en það gerðist. Í formála þakkar hann Evans fyrir hjálpina með óvenju hlýlegum hætti. Evans var aðstoðarmaður Fischers í áskorendaeinvígjunum 1971 en þeim sinnaðist þegar Fischer tefldi lokaeinvígið við Tigran Petrosjan í Buenos Aires. Hann kom til Íslands vegna einvígis aldarinnar, tefldi fjöltefli í skákklúbbnum í Glæsibæ og sat tímunum saman í Laugardalshöll og vann að bók um einvígið. Þegar allt var í óvissu um titilvörn Fischers árið 1974 bárust Evans tvö bréf frá Bobby Fischer sem birtust í lesendadálki „Chess Life and Review". Lesa má sáttatón úr bréfunum en þó er ekkert gefið eftir:

Sjá stöðumynd

Chess Life and Review - nóvemberhefti 1974.

„Kæri Larry... Þú fullyrðir í júníheftinu bls. 398 sem svar við bréfi Larrys Jadzaks að þetta sé öruggt jafntefli. Alveg er þetta dæmigert fyrir þá tilhneigingu þína að setja fram yfirborðskennda og vitlausa niðurstöðu. Eftir 29. Kd3 Rxf5 30. Be5 er jafnteflið víðsfjarri t.d. 30.... Kf7 31. Ke4 Re7 32. Bc3 ásamt Ke5 sem vinnur. Kannski tekst þér að sanna fyrir lesendum eitthvert „rinky-dink"- jafntefli en þú platar mig ekki - svarta staðan er koltöpuð..."

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 28. nóvember 2010.

Skákþættir Morgunblaðsins

Skákþáttur Morgunblaðsins: Magnús Carlsen dregur sig úr heimsmeistarakeppninni

Í byrjun þessa mánaðar barst FIDE yfirlýsing frá „norska undrinu“ Magnúsi Carlsen þess efnis að hann hygðist ekki nýta sér þátttökurétt sinn í áskorendakeppninni. Til höfðu verið kvaddir átta stórmeistarar sem áttu að tefla um réttinn til að skora á heimsmeistarann Anand. Magnús lét þess getið að heimsmeistarakeppnin, eins og hún væri rekin, gengi þvert á hugmyndir sínar um sanngjarnt keppnisfyrirkomulag. Hann nefndi að engum dytti í hug veita Spánverjum, heimsmeisturunum í knattspyrnu, þann rétt að mæta á HM eftir fjögur ár til þess eins að „verja“ titilinn í úrslitaleik keppninnar.

FIDE brást við með því að tilnefna Rússann Alexander Grischuk í stað Magnúsar og þátttakendur í áskorendaeinvígjunum, sem hefjast á næsta ári, koma því allir frá gömlu Sovétlýðveldunum að frátöldum Venselin Topalov. En knattspyrnutenging Magnúsar er athyglisverð. Sá munur er á heimsmeistarakeppni FIDE og FIFA, að styrkur knattspyrnunnar liggur í því að allar aðildarþjóðirnar eiga þess kost að vera með frá byrjun. Og í eina tíð virtu menn í hvívetna fyrirkomulag heimsmeistarakeppninnar í skák sem samanstóð af svæðamótum, millisvæðamótum og áskorendaeinvígjunum. Því kerfi var varpað fyrir róða eigi alls fyrir löngu og þar var Kasparov ekki lítill áhrifavaldur. Sú spurning vaknar hvort Magnús hefði tekið þessa ákvörðun ef FIDE-kosningarnar í Khanty Manyisk hefðu farið á annan veg. Yfirlýsing hans er talin áfall fyrir Kirsan, nýkjörinn forseta FIDE.

Af Magnúsi er það að segja að eftir að hafa unnið „Perlu-mótið“ í Nanjing í Kína á dögunum stefndi hann skónum til Moskvu en á fimmtudaginn lauk minningarmótinu um Tal með heimsmeistaramótinu í hraðskák. Eftir æsispennandi keppni þar sem 20 skákmenn tefldu tvöfalda umferð varð Armeninn Aronjan hlutskarpastur, hlaut 24 ½ v. af 38 mögulegum. Aserinn Radjabov kom næstur með 24 v. og Magnús varð í 3. sæti með 23 ½.

Í aðalmótinu, sem fram fór í stórversluninni GUM sem stendur við Rauða torgið, tefldu tíu skákmenn og þar var niðurstaðan þessi:

1. – 3. Karjakin, Aronjan, Mamedyarov 5 ½ v. (af 9) 4. – 6. Grischuk, Nakamura og Wang Hao 5 v. 7. Kramnik 4 ½ v. 8. Gelfand 3 ½ v. 9. Shirov 3 v. 10. Eljanov 2 ½ v.

Besti Rússinn, Vladimir Kramnik sem hefur heitið því að endurheimta heimsmeistaratitilinn náði sér ekki á strik og tapaði m.a. fyrir Karjakin sem nú er genginn í lið með Rússum eftir að hafa teflt fyrir Úkraínu.

Sergei Karjakin – Vladimir Kramnik

Petroffs-vörn

1. e4 e5 2. Rf3 Rf6 3. Rxe5 d6 4. Rf3 Rxe4 5. Rc3 Rxc3 6. dxc3 Be7 7. Be3 O-O 8. Dd2 Rd7 9. O-O-O Re5 10. h4 c6 11. c4 Be6 12. Rg5 Bf5 13. Kb1 He8 14. f3 h6 15. Be2!? d5

Kramnik hafnar fórninni en besti kosturinn var sennilega að leika 15. ... hxg5 16. hxg5 Dd7 og svartur getur varist.

16. g4 Bg6 17. f4 dxc4

Eða 17. ... Rxc4 18. Bxc4 dxc4 19. Df2 Da5 20. f5 með sterkri sókn.

18. Dc3 Rd3 19. f5

Óvenjuleg staða. Hér er allt á tjá og tundri.

19. ... Bxg5 20. fxg6 Hxe3 21. gxf7+ Kf8 22. Dxc4 Hxe2 23. hxg5 Dxg5 24. Dxd3 De3 25. Dh7 De4 26. Dg8+ Ke7 27. Dxg7! Dxc2+ 28. Ka1 Hf8 29. Hhf1 Hd2 30. Hfe1+ He2 31. Dc3! Kxf7 32. Df3+

- og Kramnik gafst upp.

Helgi Ólafsson | [e-mail]

Skákþættir Morgunblaðsins eru birtir á Skák.is u.þ.b. viku síðar en í blaðinu sjálfu.  

Grein þessi birtist í sunnudagsmogganum, 14. nóvember 2010.

Skákþættir Morgunblaðsins