Teflt við útitaflið 17. júní

Skákakademía Reykjavíkur hefur umsjón með útitaflinu við Bernhöftstorfu í sumar. Taflsettin verða tekin upp við útitaflið á morgun 17. júní og klukkur á staðnum. Frá 14:00 - 17:00. Engin formleg dagskrá en skákmenn hvattir til að fjölmenna og grípa í tafl og mynda alvöru skákgarðsmenningu eins og tíðkast víða erlendis.

Íslandsmót kvenna hefst 3. ágúst

Íslandsmót kvenna hefst miðvikudaginn 3. ágúst í húsnæði Skáksambands Íslands, Faxafeni 12, Reykjavík. Teflt verður í einum flokki, þ.e. mótið opið öllum konum/stúlkum.

Tímamörk: 90 mín. + 30 sek. á leik auk 30 mínútna eftir 40 leiki.

Dagskrá:         

• 1. umferð: Miðvikudagurinn, 3. ágúst, kl. 19:30
• 2. umferð: Föstudagurinn, 5. ágúst, kl. 19:30
• 3. umferð: Laugardagurinn, 6. ágúst kl. 14:00
• 4. umferð: Sunnudagurinn, 7. ágúst kl. 14:00
• 5. umferð: Þriðjudagurinn, 9. ágúst kl. 19:30
• 6. umferð: Fimmtudagurinn, 11. ágúst, kl. 19:30
• 7. umferð: Laugardagurinn, 13. ágúst kl. 14:00

Verðlaun:       

• 1. 75.000-
• 2. 45.000.-
• 3. 30.000.-

Íslandsmeistari kvenna fór einnig boð á Norðurlandamót kvenna sem fram fer í Sastamala Finnlandi 22.-30. október nk. 

Skráning fer fram hér á Skák.is (guli kassinn efst).

Upplýsingar um þegar skráða keppendur má finna hér. 

Góður árangur í Sardiníu – Þorsteinn fékk gull – 200 skákstig í íslenskt skákstigahagkerfi!

Sex íslenskir skákmenn tóku þátt í Portu Mannu-mótinu sem fram fór í Sardiníu dagana 4.-11. júní sl. Vel gekk hjá íslensku skákmönnununum sem samtals hækkuðu um 205 skákstig. Þorsteinn Magnússon fór fremstur í flokki íslensku skákmannanna en hann hækkaði um 77 skákstig og fékk gull í flokki skákmanna með 1500 skákstig og minna.

Árangur Íslendinga

Gunnar Björnsson (2110), Snorri Þór Sigurðsson (1953) og Baldur Teodór Peterson (2019) urðu efstir íslensku Íslendinga með 5 vinninga í 9 skákum. Stefán Bergsson (1974) hlaut 4½ vinning, Heimir Páll Ragnarsson (1575) 4 vinninga og Þorsteinn Magnússon (1338) 3½ vinning.

Enginn Íslendinganna lækkar á stigum. Þorsteinn hækkaði um 77 stig, Heimir um 70 stig, Gunnar um 20 stig og Snorri Þór og Stefán um 19 stig. Baldur stóð í stað. Samtals komu því 205 skákstig eða 41 skákstig að meðtali í hús í íslenskt skákstigakerfi sem verður að teljast býsna gott.

Ekki má svo gleyma því að á mótinu var íslenskur yfirdómari, Ingibjörg Edda Birgisdóttir, sem stóð sig feykilega vel og hélt afar vel utan um alla skákstjórn. Íslenska sendinefndin var á annan tuginn.

Gott mót

Óhætt er að mæla eindregið með þessu móti fyrir íslenska skákmenn. Aðstæður á skákstað eru hinar allra bestu. Góður skáksalur, góð tréskáksett, dúkuð borð, vatnsvélar og góð loftkæling. Hinir fullkomni skáksalur. Mótstjórinn,Yuri Garret, er mjög öflugur og þrautreyndur mótshaldari og sér um keppendum líði vel.´

Á mótinu er notuð aðlögun pörun „accelerated pairings“ sem virkar afar vel þarna. Svo vel að hinn þrjóski mótsstjóri Reykjavíkurskákmótsins er að kanna kosti þess að nota þetta kerfi á næsta Reykjavíkurskákmóti. 

Skemmtilegir keppendur

Keppendalistinn er skemmtilegur. Garret býður ávallt nokkrum stórmeisturum og veit ég til þess að íslenskir stórmeistararnir geta örugglega nánast allir sótt til hans boð hafi þeir áhuga. Allmargir alþjóðlegir meistarar sækja mótið á hverju ári. Eitt boðssæti mun renna til Íslands að ári og mun greinarhöfundur leggja til að það renni til efsta Íslendings á næsta Reykjavíkurskákmóti sem ekki sé stórmeistari til að styðja við íslenska titilveiðara. 

Gestir koma við að. Ítalarnir koma frá meginlandinu og er maður farinn að hitta gamla kunningja sem koma ár eftir ár og heilsa manni með nafni. Þjóðverjar eru ávallt fjölmennastir gestanna og Hollendingar einnig fjölmennir. Írarnir Patrick og Jim mæta á hverju ári og fara á kostum á barnum hvert kvöld, spila írska músik og syngja með! Eru hrókar alls fagnaðar.

Gott fyrir alla

Mótið hentar að ég tel íslensku skákmönnum vel. Mótið er mjög vel áfangahæft þótt enginn áfangi hafi reyndar komið í hús í ár.

Mótið hentar fjölskyldufólki vel en samkvæmt Yuri komu um það bil 50 aukafólk með keppendunum. Stutt er í ströndina og sundlaugina. Engum á að leiðast.

Mótið hefur einnig sannað sig sem gott mál fyrir íslenska skákstigaveiðara. Á keppendalistanum eru fáir ungir skákmenn með allt of lág skákstig.  Meira um skákmenn sem eru hlutfallslega stigahærri en Íslendingar.

Árangur minn

Sjálfur hef ég hækkað um 50 skákstig á síðustu tveimur árum. Í fyrra tók ég 30 stig og 20 stig í ár. Í ár tefldi ég fjóra alþjóðlega meistara og einn stórmeistara sem var gríðarleg áskorun og skemmtileg. Í tveimur skákunum koltapaði en þrjár þeirra voru hörkuskákir.

Ég fékk 1 vinning í þeim skákum en ég vann þýska alþjóðlega meistarann Jonathan Carlstadt (2459) í 92 leikja hörkuskák.  Sjálfur tefldi ég við keppendur á stigabilinu 1821-2466 sem miklu minna stigabil en menn lenda á í Reykjavíkurskákmótsins vegna kerfisins.

Hægt er að leigja sér bíl við komuna á Olbia-flugvöllinn á tiltölulega hagstæðu verði. Það gerði einhverjir íslensku gestanna nú. Fólk býr í húsum (bungalows) þar sem vel fer um alla og t.d. hægt að tefla og stúdera úti við. Á barnum voru einnig skáksett.

Verð fyrir keppenda með fullu úrvalsfæði er á €63 eða um 9.000 kr. á dag. Gisting og fullt fæði í 9 daga er því um 80.000 og ódýrara gerist það vart fyrir skákáhugamenn.  Ef pantað sé flug í tíma er hægt að kaupa flug á um 40.000-60.000 kr. til Olbia-flugvallarins í Sardiníu. Heildarkostaður um keppenda við þátttöku gæti því verið undir 150.000 kr.

Mótið að ári fer fram 3.-10. júní eða 10.-17. júní á næsta ári. Íslenskir skák- og skákáhugamenn eru hvattir til að skrá þær dagsetningar hjá sér!

Gunnar Björnsson

Ný fundargerð stjórnar SÍ

Fundargerð stjórnar SÍ frá 26. maí sl. liggur nú fyrir. 

Fundarefni

• Skipting embætta
• Íslandsmótið í skák
• EM ungmenna - rætt um val keppenda
• Umfjöllun á Vísir.is
• Erindi frá Héðni Steingrímssyni
• Norðurlandamótið í skák - ákveðið að boðssæti renni til þess sem lendir í 2. sæti á Íslandsmótinu í skák og þess sem lendir efstur þeirra sem ekki er stórmeistari til að koma til móts við titilveiðara. 
• Reykjavíkurskákmótið á komandi ári verður fært aftur til apríl 2017. 
• Ólympíuskákmót 16 ára og yngri.
• Mótaáætlun í vinnslu
• Nefndarskipan frestað.

Fundargerðina má finna hér.

 

Æsispennandi Skákþingi Íslands lokið

Skákþing Íslands árið 2016 lauk með sigri Jóhanns Hjartarsonar. Jóhann hlaut 8,5 vinning í skákunum ellefu en næstur honum kom Héðinn Steingrímsson með 8 vinninga. Þrír skákmenn deildu þriðja sætinu; Jón Viktor Gunnarsson, Bragi Þorfinnsson og Björn Þorfinnsson, allir með 6,5 vinning. 

Sjaldan hefur Skákþing Íslands boðið upp á jafn skemmtilegar skákir, háspennu og dramatík líkt og raunin varð. Keppendur lögðu allt í sölurnar og báru skákirnar gjarnan þess merki. Til marks um sigurvilja keppenda þá lauk innan við 30% skáka mótsins með jafntefli.

Íslandsmeistarinn

Jóhann Hjartarson sýndi gamalkunna takta í sal Tónlistarskóla Seltjarnarness og tryggði sér sinn sjötta Íslandsmeistaratitil. Jóhann tefldi mjög vel og sigldi taplaus í gegnum mótið. En stundum stóð það tæpt! Jóhann reis upp frá dauðum í gjörtapaðri stöðu gegn Einari Hjalta Jenssyni og stóð afar höllum fæti um tíma gegn Héðni Steingrímssyni sem og gegn Jóni Viktori Gunnarssyni. Jóhann er ekki þekktur fyrir að gefast upp þó á móti blási, enda hélt hann ótrauður áfram að leggja þrautir fyrir andstæðinga sína. Þessi mikla yfirvegun og þrautseigja í erfiðum stöðum skilaði Jóhanni 2 vinningum úr þessum þremur áðurnefndu skákum.

Margir hafa lýst þessum viðsnúningi í skákum Jóhanns sem heppni og kann það vel að vera rétt lýsing. En sú heppni er ekki tilviljanakennd heldur byggir tilvist hennar á sérstöku hugarfari; hugarfari sigurvegarans. Hugarfar Jóhanns í Skákþinginu kom einnig glögglega í ljós undir lok mótsins er helsti keppinautur hans fékk óvænt frían vinning á lokasprettinum. Í stað þess að láta það trufla sig tefldi Jóhann af sömu festu og yfirvegun og hann hafði gert allt mótið. Slíkt andlegt atgervi er gagnlegt mörgum að stúdera og tileinka sér, ekki síst okkar sterkustu skákmönnum sem dreymir um glæsta sigra við skákborðið.

Að því sögðu er hér með skorað á Jóhann Hjartarson að gefa kost á sér í íslenska landsliðið á nýjan leik og miðla þar af reynslu sinni og þekkingu til okkar bestu skákmanna. Jóhann, við þurfum á þér að halda!

 

Lokaumferðin

Lokaumferð Skákþingsins var æsispennandi. Jóhann Hjartarson og Héðinn Steingrímsson voru jafnir fyrir hana með 7,5 vinning. Væru þeir enn jafnir að henni lokinni yrði teflt hraðskákeinvígi til að fá úr því skorið hvor þeirra væri Íslandsmeistari.

Jóhann hafði svart gegn Jóhanni Ingvasyni á meðan Héðinn stýrði svörtu mönnunum gegn Einari Hjalta Jenssyni. Fljótlega varð ljóst að Héðinn átti undir högg að sækja á meðan Jóhann hafði mjög vænlegt tafl. Héðinn reyndi allt hvað hann gat að setja Einar Hjalta úr jafnvægi en Einari varð ekki haggað. Peði yfir bauð Einar upp á þrátefli sem Héðinn þáði. Á sama tíma stóð Jóhann til vinnings. Úrvinnslan vafðist ekki fyrir honum og titillinn var í höfn.

 

Vonarstjarnan

Nokkuð hefur verið deilt um réttmæti þess að Unglingameistari Íslands hljóti sæti í Landsliðsflokki. Er þá gjarnan bent á að líklega verði sá eða sú einungis fallbyssufóður fyrir sér stigahærri og reyndari skákmenn. Núverandi Unglingameistari Íslands, Örn Leó Jóhannsson, blés á allt slíkt tal og kom flestum að óvörum, nema hugsanlega sjálfum sér, með öflugri og þéttri taflmennsku. Örn Leó hlaut 4,5 vinning í skákunum 11 sem gefur honum stigahækkun sem nemur 31 stigi. Frammistaða hans samsvaraði 2354 skákstigum sem er harla gott verandi í fyrsta skipti á stóra sviðinu. Í upphafi móts virtist nokkur skjálfti í pilti enda andstæðingarnir ekki af verri endanum, alþjóðlegur meistari og stórmeistari. Örn Leó komst á blað í 3.umferð er hann gerði jafntefli við stórmeistarann Hjörvar Stein Grétarsson. Örn Leó vann þrjár skákir í mótinu, gegn Davíð Kjartanssyni og báðum Þorfinnssonbræðrum. Það verður að teljast ólíklegt að Örn Leó fái jólakort frá Þorfinnsson-fjölskyldunni í ár. Hvernig svo sem það fer þá á Örn Leó svo sannarlega framtíðina fyrir sér og verður gaman að fylgjast með honum næstu misserin.

 

Afrekið

Eftir afleita byrjun Guðmundar Gíslasonar reyndu stuðningsmenn hans að stappa í hann stálinu. Það var þó með öllu óþarft. Guðmundur lét engan bilbug á sér finna þrátt fyrir að tapa fyrstu þremur skákunum og lét hafa eftir sér að hann væri í svo góðu formi að hann myndi taka þetta á endasprettinum. Hófust þá hamskipti Guðmundar og verða þau lengi í minnum höfð. Í 4.umferð svaraði hann sikileyjarvörn stórmeistarans Héðins Steingrímssonar með því að leika hvítreitabiskupi sínum á e2 í öðrum leik. Olli það nokkru fjaðrafoki á meðal áhorfenda. Guðmundur tefldi skákina vel og lagði stórmeistarann að velli. Í 5.umferð settist hann gegnt stórmeistaranum Hjörvari Steini Grétarssyni og vann hann líka! Guðmundur vann fjórar skákir í röð og fékk alls 6 vinninga í síðustu 8 skákunum. Þessir 6 vinningar skiluðu Guðmundi 47 skákstigum, frammistöðu upp á 2450 skákstig og 6.sætinu í mótinu. Það sem meira var, Guðmundur náði áfanga að alþjóðlegum meistaratitli. Guðmundi vantar nú aðeins að ná 2400 stiga markinu til þess að verða útnefndur Alþjóðlegur meistari. Hæst hefur Guðmundur komist í 2382 skákstig á útgefnum stigalista.

 

Örlagavaldurinn

Áhrif Einars Hjalta Jenssonar á toppbaráttu Skákþingsins eru óumdeild. Tvær eftirminnilegustu skákir Einars Hjalta á Skákþinginu voru viðureignar hans við Jóhann Hjartarson annars vegar og hins vegar viðureign hans og Héðins Steingrímssonar. Einar Hjalti mætti Jóhanni Hjartarsyni í 8.umferð og hafði svo gott sem unnið skákina þegar hann lék ægilegum afleik og sleppti þar með líflausum verðandi Íslandsmeistara úr snörunni. Einar Hjalti endaði á því að tapa skákinni. Í lokaumferðinni tefldi Einar Hjalti mjög vel gegn Héðni Steingrímssyni og endaði sú skák með jafntefli. Það dugði Jóhanni Hjartarsyni, sem vann sína skák í lokaumferðinni, til þess að vinna mótið.

Sjálfur tefldi Einar Hjalti ágætlega í mótinu og var ekki fjarri toppbaráttunni. Hann lauk keppni með 5 vinninga og var frammistaða hans á pari við skákstigin, 2370.

 

Óvæntasta atvikið

Keppendur og áhorfendur í Tónlistarskóla Seltjarnarness ráku upp stór augu er Örn Leó Jóhannsson kom askvaðandi inn í skáksalinn 27 minútum eftir að lokaumferðin hófst. Hve naumlega Örn Leó slapp við að tapa skákinni vegna 30 mínútna reglunnar var ekki ástæða þess að hann fangaði athygli viðstaddra. Örn Leó hafði nefnilega fyrr um daginn tekið þátt í Lithlaupi svokölluðu og var því ansi vígalega málaður til höfuðsins. Vakti þetta heilmikla kátínu á meðal viðstaddra.

Þykir það tíðindum sæta að keppandi í Landsliðsflokki setjist málaður að tafli, alltént karlkyns keppandi. Gárungarnir höfðu á orði að sjálfur Hulk sæti að tafli í Landsliðsflokki þetta árið. Rímar það með ágætum við handleggi Arnar Leós en þeir eru töluvert gildari en hefðbundnir skákhandleggir. Ekki er ljóst á þessari stundu hvort þetta sprell Arnar Leós hafi haft truflandi áhrif á andstæðing hans, en hitt er ljóst að Örn Leó vann skákina.

 

Lokastaða Skákþingsins:

Rk.		Name	Rtg	1	2	3	4	5	6	7	8	9	10	11	12	Pts.
1	GM	Hjartarson Johann	2547	*	½	½	½	1	1	½	1	½	1	1	1	8,5
2	GM	Steingrimsson Hedinn	2574	½	*	½	½	1	0	1	½	1	1	+	1	8,0
3	IM	Gunnarsson Jon Viktor	2454	½	½	*	½	1	1	0	½	0	1	½	1	6,5
4	IM	Thorfinnsson Bragi	2426	½	½	½	*	½	1	0	1	1	0	½	1	6,5
5	IM	Thorfinnsson Bjorn	2410	0	0	0	½	*	1	1	1	1	0	+	1	6,5
6	FM	Gislason Gudmundur	2280	0	1	0	0	0	*	1	1	½	½	1	1	6,0
7	IM	Kjartansson Gudmundur	2457	½	0	1	1	0	0	*	½	0	½	1	1	5,5
8	IM	Jensson Einar Hjalti	2370	0	½	½	0	0	0	½	*	1	1	½	1	5,0
9	FM	Kjartansson David	2371	½	0	1	0	0	½	1	0	*	0	+	1	5,0
10		Johannsson Orn Leo	2226	0	0	0	1	1	½	½	0	1	*	½	0	4,5
11	GM	Gretarsson Hjorvar Steinn	2580	0	-	½	½	-	0	0	½	-	½	*	1	3,0
12		Ingvason Johann	2142	0	0	0	0	0	0	0	0	0	1	0	*	1,0

 

• Heimasíða mótsins
• Chess-Results

 

Skákþáttur Morgunblaðsins: Héðinn, Jón Viktor og Bragi efstir eftir þrjár umferðir

Línur eru þegar teknar að skýrast þegar tefldar hafa verið þrjár umferðir af ellefu í landsliðsflokki Skákþings Íslands sem hófst í tónlistarskólanum á Seltjarnarnesi á þriðjudag. Greinilegt er að Íslandsmeistarinn Héðinn Steingrímsson ætlar ekki að gefa neitt eftir í baráttunni, en hann er efstur ásamt Braga Þorfinnssyni og Jóni Viktori Gunnarssyni með fullt hús vinninga. Jóhann Hjartarson er hálfum vinningi á eftir, en hann býr sig nú undir þátttöku á heimsmeistaramóti öldungasveita sem hefst í Dresden í Þýskalandi undir lok mánaðarins.

Aðeins fjórir þátttakendur úr keppendahópnum hafa áður fagnað Íslandsmeistaratitlinum; Héðinn hefur unnið Íslandsmót þrisvar, Jóhann fimm sinnum, síðast árið 1995, Jón Viktor Gunnarsson varð Íslandsmeistari aldamótaárið 2000 og Guðmundur Kjartansson árið 2014. Stigahæsti keppandinn, Hjörvar Steinn Grétarsson, hefur enn ekki fundið taktinn. En staðan fyrir fjórðu umferð sem fram fór í gær var þessi:

1. – 3. Héðinn Steingrímsson, Jón Viktor Gunnarsson og Bragi Þorfinnsson 3 v. (af 3) 4. Jóhann Hjartarson 2½ v. 5. Björn Þorfinnsson 2 v. 6. Guðmundur Kjartansson 1½ v. 7.- 8. Hjörvar Steinn Grétarsson og Einar Hjalti Jensson 1 v. 9.-10. Örn Leó Jóhannsson og Davíð Kjartansson ½ v. 11.-12. Guðmundur Gíslason og Jóhann Ingvason 0 v.

Mótið í ár er öðru vísi samansett og ekki eins sterkt eins og það sem fram fór í Hörpunni í fyrra. Hannes Hlífar Stefánsson, Jón L. Árnason og Henrik Danielsen eru ekki með en Jón Viktor Gunnarsson bætist hins vegar í hópinn. Það skiptir máli í keppni af þessu tagi að vera vel undirbúinn og ekki verra að hafa tekið þátt í einu móti á undirbúningsferlinum. Björn Þorfinnsson tefldi á Evrópumóti einstaklinga í Kosovo á dögunum og fór vel af stað á Seltjarnarnesi:

Skákþing Íslands 2016:

Davíð Kjartansson – Björn Þorfinnsson

Enskur leikur

1. d4 Rf6 2. c4 c5 3. Rf3 cxd4 4. Rxd4 g6 5. Rc3 Rc6 6. g3 Bg7 7. Bg2 O-O 8. O-O d6!?

Skemmtileg peðsfórn sem oft hefur sést áður. Svartur tekur ekki mikla áhættu þó að hann missi peð.

9. Rxc6 bxc6 10. Bxc6 Hb8 11. Bg2 Da5 12. Rb5 Bd7 13. Bd2 Dd8 14. Rxa7?

Hagsmunum hvíts var best borgið með því að gefa peðið aftur og leika 14. Bc3 eða 14. b3.

14. ... Dc7 15. Rb5 Dxc4 16. Ra3 Da6 17. Bc3 Hfc8 18. Dd3 Da4 19. Rb1 Bf5 20. Dd1 Da6 21. a4 Rd7!

Með því að flytja allan þungann yfir á drottningarvæng hefur svartur fengið algerlega fullnægjandi bætur fyrir peðið.

22. Bxg7 Kxg7 23. e4 Be6 24. Rc3 Bc4 25. He1 Hxb2 26. Bh3

Kannski batt Davíð vonir sínar við 26. Rd5 með hugmyndinni 26. ... Bxd5 27. Dd4+ og hrókurinn á b2 fellur. en svartur á 26. ... Da7! sem valdar d4-reitinn og hótar á f2.

26. ... Da7 27. He3 Be6 28. Rb5 Db6 29. Bxe6 fxe6 30. Hc1 Hf8 31. Hc2 Hb4 32. Hc1 Re5 33. Kg2?

Óþarfa varkárni. Hann varð að reyna 33. Rc7! með hótuninni 34. Rxe6+. Svartur verður að leika 33. ... Kf7 og staðan er í jafnvægi. 

33. ... Hxf2+!?

Björn stenst sjaldan slíkar freistingar en 35. .. Rg4 var ekki síðri leikur.

34. Kxf2 Hxe4 35. Kg2?

Missir af bestu vörninni, 35. Hc3 Rg4+ 36. Kf3! Rxe3 37. De2! og hvítur heldur velli.

35. ... Hxe3 36. Hc7 Hd3! 37. Df1 Hd2+ 38. Kh3 Hf2 39. Dg1 De3 40. Dc1 De2 41. Hxe7+ Kf6 42. Hxe6+ Kg7 43. Dc7+ Hf7 44. Dxd6 Df1+ 45. Kh4 Rf3+ 46. Kg4 h5 mát.

Grein þessi birtist í Morgunblaðinu 4. júní

Skákþættir Morgunblaðsins

[Event "Icelandic Chess Championship"] [Site "?"] [Date "2016.05.31"] [Round "?"] [White "Kjartansson, David"] [Black "Thorfinnsson, Bjorn"] [ECO "A56"] [WhiteElo "2371"] [BlackElo "2410"] [Result "0-1"] 1. d4 Nf6 2. c4 c5 3. Nf3 cxd4 4. Nxd4 g6 5. Nc3 Nc6 6. g3 Bg7 7. Bg2 O-O 8. O-O d6 9. Nxc6 bxc6 10. Bxc6 Rb8 11. Bg2 Qa5 12. Nb5 Bd7 13. Bd2 Qd8 14. Nxa7 Qc7 15. Nb5 Qxc4 16. Na3 Qa6 17. Bc3 Rfc8 18. Qd3 Qa4 19. Nb1 Bf5 20. Qd1 Qa6 21. a4 Nd7 22. Bxg7 Kxg7 23. e4 Be6 24. Nc3 Bc4 25. Re1 Rxb2 26. Bh3 Qa7 27. Re3 Be6 28. Nb5 Qb6 29. Bxe6 fxe6 30. Rc1 Rf8 31. Rc2 Rb4 32. Rc1 Ne5 33. Kg2 Rxf2+ 34. Kxf2 Rxe4 35. Kg2 Rxe3 36. Rc7 Rd3 37. Qf1 Rd2+ 38. Kh3 Rf2 39. Qg1 Qe3 40. Qc1 Qe2 41. Rxe7+ Kf6 42. Rxe6+ Kg7 43. Qc7+ Rf7 44. Qxd6 Qf1+ 45. Kh4 Nf3+ 46. Kg4 h5# 0-1

Jóhann Hjartarson er Íslandsmeistari í skák árið 2016

Jóhann Hjartarson var rétt í þessu að tryggja sér sigur á Skákþingi Íslands. Jóhann vann Jóhann Ingvason í dag á meðan helsti keppinautur hans, Héðinn Steingrímsson, varð að gera sér jafntefli að góðu gegn Einari Hjalta Jenssyni.

Jóhann hlaut 8,5 vinning í 11 skákum og var eini taplausi keppandi mótsins.

Nánar verður fjallað um mótið hér á skak.is á morgun.

Héðinn Steingrímsson og Jóhann Hjartarson berjast um titilinn

Tónlistarskóli Seltjarnarness nötraði í dag þegar 10.umferð Skákþings Íslands var tefld, slík var taugaspenna keppenda.

Héðinn Steingrímsson fékk vinning á silfurfati því andstæðingur hans, Hjörvar Steinn Grétarsson, sá sér ekki fært að mæta til leiks af persónulegum ástæðum. Héðinn fékk því dýrmætan hvíldardag fyrir lokaátökin á morgun. Jóhann Hjartarson lét þessa atburðarás ekki trufla sig og sýndi engin veikleikamerki gegn Erni Leó Jóhannssyni. Jóhann vann nokkuð þægilegan sigur með hvítu og fylgir Héðni sem skugginn í baráttunni um Íslandsmeistaratitilinn.

Bragi Þorfinnsson tefldi í dag fyrir áfanga að stórmeistaratitli. Hann þurfti að vinna Guðmund Kjartansson sem hafði ekki teflt sannfærandi í mótinu til þessa. Bragi sótti hins vegar ekki gull í greipar Guðmundar að þessu sinni því Guðmundur rak af sér slyðruorðið og tefldi sína bestu skák í mótinu. Bragi varð að játa sig sigraðan eftir 31 leik.

Guðmundur Gíslason, sem hefur farið mikinn í síðustu 7 umferðum, mætti loks ofjarli sínum í Birni Þorfinnssyni. Guðmundur gerði sig líklegan til þess að máta Björn í miðtaflinu en þá tók Björn sig til og flúði með kóng sinn upp drottningarvænginn. Á b5 fann Björn góðar vistarverur fyrir kónginn og í kjölfarið sá Guðmundur þann kost vænstan að gefast upp.

Á morgun, laugardag, kl.13 verður lokaumferð Skákþingsins tefld. Þá fæst úr því skorið hver verður Íslandsmeistari í skák árið 2016. Héðinn Steingrímsson stýrir svörtu mönnunum gegn Einari Hjalta Jenssyni á meðan Jóhann Hjartarson hefur svart gegn Jóhanni Ingvasyni. Verði keppendur jafnir í efsta sæti þá tefla þeir hraðskákeinvígi um titilinn. Komi til þess þá mun það hefjast klukkan 19.

 

Úrslit 10.umferðar:

Rtg		Name	Result		Name	Rtg
2410	IM	Thorfinnsson Bjorn	1 - 0	FM	Gislason Gudmundur	2280
2371	FM	Kjartansson David	1 - 0		Ingvason Johann	2142
2547	GM	Hjartarson Johann	1 - 0		Johannsson Orn Leo	2226
2426	IM	Thorfinnsson Bragi	0 - 1	IM	Kjartansson Gudmundur	2457
2454	IM	Gunnarsson Jon Viktor	½ - ½	IM	Jensson Einar Hjalti	2370
2574	GM	Steingrimsson Hedinn	+ - -	GM	Gretarsson Hjorvar Steinn	2580

 

Staðan eftir 10.umferð:

Rk.		Name	FED	Rtg	Pts.	Rp	K	rtg+/-
1	GM	Steingrimsson Hedinn	ISL	2574	7,5	2534	10	-2,0
2	GM	Hjartarson Johann	ISL	2547	7,5	2608	10	8,5
3	IM	Gunnarsson Jon Viktor	ISL	2454	6,5	2503	10	7,5
4	IM	Thorfinnsson Bragi	ISL	2426	6,5	2529	10	14,3
5	IM	Thorfinnsson Bjorn	ISL	2410	5,5	2421	10	1,9
6	FM	Gislason Gudmundur	ISL	2280	5,5	2455	20	44,2
7	IM	Jensson Einar Hjalti	ISL	2370	4,5	2353	20	-4,4
8	FM	Kjartansson David	ISL	2371	4,5	2321	20	-12,6
9	IM	Kjartansson Gudmundur	ISL	2457	4,5	2357	10	-12,8
10		Johannsson Orn Leo	ISL	2226	3,5	2309	20	16,2
11	GM	Gretarsson Hjorvar Steinn	ISL	2580	3,0	2276	10	-30,3
12		Ingvason Johann	ISL	2142	1,0	2049	20	-17,6

 

Skákir 11.umferðar:

Round 11 on 2016/06/11 at 13:00
Rtg		Name	Result		Name	Rtg
2580	GM	Gretarsson Hjorvar Steinn		IM	Thorfinnsson Bjorn	2410
2370	IM	Jensson Einar Hjalti		GM	Steingrimsson Hedinn	2574
2457	IM	Kjartansson Gudmundur		IM	Gunnarsson Jon Viktor	2454
2226		Johannsson Orn Leo		IM	Thorfinnsson Bragi	2426
2142		Ingvason Johann		GM	Hjartarson Johann	2547
2280	FM	Gislason Gudmundur		FM	Kjartansson David	2371

 

• Heimasíða mótsins
• Chess-Results
• Beinar útsendingar (kl. 15)

 

 

Guðmundur Gíslason með áfanga að alþjóðlegum meistaratitli

Allt ætlaði um koll að keyra á Seltjarnarnesi í dag er 9.umferð Skákþings Íslands var tefld. Baráttan á toppnum var æsispennandi og hélt hún áhorfendum við efnið í hliðarsal Tónlistarskólans þar sem skákstöður eru gjarnan krufnar af mikilli innlifun. Tíðindi dagsins eru þó án nokkurs vafa árangur Guðmundar Gíslasonar.

Guðmundur hóf mótið á þremur töpum. Sjálfur tók hann afleitri byrjuninni létt og sagðist ætla að taka þetta á endasprettinum. Uppskar hann þá vandræðalegt bros og klapp á bakið. 6 umferðum seinna hafa 5,5 vinningur verið millifærður á kennitölu Guðmundar. Í dag vann Guðmundur skák sína gegn Jóhanni Ingvasyni og tryggði sigurinn honum áfanga að alþjóðlegum meistaratitli. Guðmundur hefur nú náð öllum þremur áföngunum og vantar aðeins að hífa sig yfir 2400 skákstig til þess að verða formlega útnefndur alþjóðlegur meistari.

Jóhann Hjartarson mætti Guðmundi Kjartanssyni og freistaði þess að halda toppsætinu. Jóhann missti af vinningsleið í skákinni sem að lokum endaði með jafntefli. Á sama tíma unnu Héðinn Steingrímsson og Bragi Þorfinnsson sínar skákir og náðu þeir Jóhanni þar með að vinningum í efsta sæti. Þremenningarnir hafa 6,5 vinning.

Jón Viktor Gunnarsson kemur í humátt á eftir forystusauðunum með 6 vinninga en hann gerði jafntefli við Hjörvar Stein Grétarsson. Í 5.sæti er áðurnefndur Guðmundur Gíslason með 5,5 vinning.

Örn Leó Jóhannsson, Unglingameistari Íslands, er að sanna sig á meðal þeirra bestu með öflugri og þéttri taflmennsku. Í dag vann hann Davíð Kjartansson með hvítu og hefur Örn Leó því halað inn 3,5 vinning.

Spennustigið í Tónlistarskólanum er að verða óbærilegt. Fjórir efstu menn mótsins hafa hvítt á morgun og má vænta þess að þeir tefli stíft til sigurs til að koma sér í kjörstöðu fyrir lokaumferðina sem fram fer á laugardag. Það má því reikna með miklu fjöri á morgun, föstudag, þegar línur fara að skýrast í baráttunni um Íslandsmeistaratitilinn.

Tekst Héðni Steingrímssyni að verja titilinn? Verður Jóhann Hjartarson Íslandsmeistari í fyrsta sinn í 19 ár? Verður Bragi Þorfinnsson Íslandsmeistari í fyrsta sinn? Verður Jón Viktor Gunnarsson Íslandsmeistari í annað sinn?

Skákáhugamenn eru hvattir til þess að leggja leið sína á skákstað og upplifa stemninguna á einhverju skemmtilegasta Skákþingi Íslands í manna minnum.

 

Úrslit 9.umferðar:

Rtg		Name	Result		Name	Rtg
2574	GM	Steingrimsson Hedinn	1 - 0	IM	Thorfinnsson Bjorn	2410
2580	GM	Gretarsson Hjorvar Steinn	½ - ½	IM	Gunnarsson Jon Viktor	2454
2370	IM	Jensson Einar Hjalti	0 - 1	IM	Thorfinnsson Bragi	2426
2457	IM	Kjartansson Gudmundur	½ - ½	GM	Hjartarson Johann	2547
2226		Johannsson Orn Leo	1 - 0	FM	Kjartansson David	2371
2142		Ingvason Johann	0 - 1	FM	Gislason Gudmundur	2280

 

Staðan eftir 9.umferð:

Rk.		Name	FED	Rtg	Pts.	Rp	K	rtg+/-
1	GM	Steingrimsson Hedinn	ISL	2574	6,5	2534	10	-2,0
2	GM	Hjartarson Johann	ISL	2547	6,5	2602	10	7,2
3	IM	Thorfinnsson Bragi	ISL	2426	6,5	2580	10	18,9
4	IM	Gunnarsson Jon Viktor	ISL	2454	6,0	2520	10	8,7
5	FM	Gislason Gudmundur	ISL	2280	5,5	2500	20	50,6
6	IM	Thorfinnsson Bjorn	ISL	2410	4,5	2396	10	-1,3
7	IM	Jensson Einar Hjalti	ISL	2370	4,0	2339	20	-6,8
8		Johannsson Orn Leo	ISL	2226	3,5	2324	20	18,8
9	FM	Kjartansson David	ISL	2371	3,5	2292	20	-16,8
10	IM	Kjartansson Gudmundur	ISL	2457	3,5	2309	10	-17,4
11	GM	Gretarsson Hjorvar Steinn	ISL	2580	3,0	2276	10	-30,3
12		Ingvason Johann	ISL	2142	1,0	2069	20	-13,4

 

Skákir 10.umferðar:

Round 10 on 2016/06/10 at 15:00
Rtg		Name	Result		Name	Rtg
2410	IM	Thorfinnsson Bjorn		FM	Gislason Gudmundur	2280
2371	FM	Kjartansson David			Ingvason Johann	2142
2547	GM	Hjartarson Johann			Johannsson Orn Leo	2226
2426	IM	Thorfinnsson Bragi		IM	Kjartansson Gudmundur	2457
2454	IM	Gunnarsson Jon Viktor		IM	Jensson Einar Hjalti	2370
2574	GM	Steingrimsson Hedinn		GM	Gretarsson Hjorvar Steinn	2580

 

 

• Heimasíða mótsins
• Chess-Results
• Beinar útsendingar (kl. 15)

 

 

Leikskólabörn heimsækja útitaflið

Leikskólinn Laufásborg hefur um árabil boðið nemendum sínum upp á skákkennslu en skákdómarinn og þjálfarinn Omar Salama hefur sinnt því verkefni af stakri prýði innan leikskólans. Hópur áhugasamra barna frá Laufásborg heimsótti útitaflið við Bernhöftstorfuna fyrr í dag. Svæðið, sem er í umsjá Skákakademíu Reykjavíkur í sumar, hefur fengið endurnýjun lífdaga en þar hefur verið komið fyrir borðum og bekkjum svo nú er þar afar góð aðstaða til taflmennsku. Björn Ívar Karlsson, skákkennari, tók á móti hópnum og leiddi þau í sannleikann um leyndardóma skáklistarinnar. Börnin höfðu öll góða grunnþekkingu á skák svo það verkefni reyndist honum ekki erfitt. Að lokinni kennslu var sest niður við taflmennsku. Allir þekktu krakkarnir að skák byrjar og endar á handarbandi, sem tákn um virðingu og kurteisi.

Þrátt fyrir kurteisi í upphafi skákar var ekkert gefið eftir á taflborðinu sjálfu. Hart var barist í öllum skákunum en allir stóðu þó glaðir upp frá borðinu að þeim loknum. 

Skákakademían mun í sumar standa fyrir reglulegum skákviðburðum á svæðinu. Skákmenn landsins eru hvattir til þess að nýta sér það á góðviðrisdögum í sumar.