Leikskólabörn heimsækja útitaflið

Leikskólinn Laufásborg hefur um árabil boðið nemendum sínum upp á skákkennslu en skákdómarinn og þjálfarinn Omar Salama hefur sinnt því verkefni af stakri prýði innan leikskólans. Hópur áhugasamra barna frá Laufásborg heimsótti útitaflið við Bernhöftstorfuna fyrr í dag. Svæðið, sem er í umsjá Skákakademíu Reykjavíkur í sumar, hefur fengið endurnýjun lífdaga en þar hefur verið komið fyrir borðum og bekkjum svo nú er þar afar góð aðstaða til taflmennsku. Björn Ívar Karlsson, skákkennari, tók á móti hópnum og leiddi þau í sannleikann um leyndardóma skáklistarinnar. Börnin höfðu öll góða grunnþekkingu á skák svo það verkefni reyndist honum ekki erfitt. Að lokinni kennslu var sest niður við taflmennsku. Allir þekktu krakkarnir að skák byrjar og endar á handarbandi, sem tákn um virðingu og kurteisi.

Þrátt fyrir kurteisi í upphafi skákar var ekkert gefið eftir á taflborðinu sjálfu. Hart var barist í öllum skákunum en allir stóðu þó glaðir upp frá borðinu að þeim loknum. 

Skákakademían mun í sumar standa fyrir reglulegum skákviðburðum á svæðinu. Skákmenn landsins eru hvattir til þess að nýta sér það á góðviðrisdögum í sumar.