Líf eftir dauðann (staðfest)

Svo öldum skiptir hafa vísindamenn leitað svara við ráðgátunni hvort líf sé eftir dauðann, með nokkuð misjöfnum árangri. Þeim áhorfendum sem lögðu leið sína í skáksal Tónlistarskóla Seltjarnarness í dag til að fylgjast með 8.umferð Skákþings Íslands varð nokkuð hverft við er svarið við þessari mögnuðu lífsgátu fékkst óvænt staðfest. Einn sigursælasti skákmaður Íslands fyrr og síðar, Jóhann Hjartarson, leysti gátuna eftir nokkra umhugsun og skákaði þar vísindamönnum um gjörvallan heim.

Jóhann Hjartarson stýrði hvítu mönnunum gegn Einari Hjalta Jenssyni í mjög þýðingarmikilli skák. Jóhann þurfti sigur til að styrkja stöðu sína á toppnum, en Einar Hjalti gat með sigri blandað sér í toppbaráttuna.

Hrókar Jóhanns villtust eilítið af leið í óbyggðum miðtaflsins og átti Jóhann í basli með að smala þeim aftur til byggða. Einar Hjalti gekk á lagið og byggði upp vinningsstöðu. Smám saman herti Einar Hjalti takið á stórmeistaranum og þótti áhorfendum næsta víst að dánarvottorðið yrði undirritað innan fárra leikja. Áhorfendur horfðu samúðarfullum augum á stórmeistarann hvar hann sat í stól sínum, þungur á brún, og bjó sig undir að draga andann í síðasta sinn.

Einar Hjalti lék sínum 51.leik og virtist Jóhann þá ætla að lina þjáningar sínar og stöðva klukkuna. Af einhverri óútskýrðri ástæðu snérist honum hugur á síðustu stundu og ákvað hann þess í stað að leika einum leik til; 52.Hc5. Stórmeistarinn lék hróknum í opinn dauðann. Áhorfendur litu hver á annan og hristu höfuð sín, enda leikurinn svo sannarlega ekki til þess fallinn að hafa verkjastillandi áhrif á stórmeistarann. Einar Hjalti þakkaði pent fyrir sig og drap hrókinn. Skyndilega lyftust augabrúnir stórmeistarans, hann hallaði undir flatt og starði á borðið í nokkrar sekúndur. Því næst greip hann um hinn hrókinn og fórnaði honum líka; 53.Hxg6! Hrókarnir sem snemma í miðtaflinu ráfuðu stefnulaust um kóngsvænginn höfðu loks fundið tilgang með tilvist sinni.

Þegar þarna var komið við sögu virtist Jóhann hafa bjargað töpuðu tafli í jafntefli. Yfirvofandi þráskákin varð ekki umflúin. Eða hvað? Einar Hjalti var ekki á þeim buxunum að ætla að sleppa stórmeistaranum úr snörunni og gekk með kóng sinn úr þráskákinni í þeirri von að hann gæti dregið björg í bú með frelsingja sínum á c-línunni. En þar fór kóngur Einars Hjalta úr öskunni í eldinn. Jóhann stillti drottningu sinni upp fyrir framan frelsingjann og sleppti lausum sínum eigin frelsingjum á kóngsvæng. Stórmeistarinn, sem stuttu áður hafði hangið í snörunni án sjáanlegs lífsmarks, hafði ekki aðeins bjargað töpuðu tafli í jafntefli, heldur hafði nú snúið jöfnu tafli yfir í gjörunnið tafl. Stuttu síðar sá Einar Hjalti sína sæng upp reidda og gaf taflið.

Eftir þessa lygilegu atburðarrás er gamla brýnið, Jóhann Hjartarson, einn efstur í einhverju mest spennandi Skákþingi Íslands í manna minnum.

 

Úrslit 8.umferðar:

Rtg		Name	Result		Name	Rtg
2410	IM	Thorfinnsson Bjorn	1 - 0		Ingvason Johann	2142
2280	FM	Gislason Gudmundur	½ - ½		Johannsson Orn Leo	2226
2371	FM	Kjartansson David	1 - 0	IM	Kjartansson Gudmundur	2457
2547	GM	Hjartarson Johann	1 - 0	IM	Jensson Einar Hjalti	2370
2426	IM	Thorfinnsson Bragi	½ - ½	GM	Gretarsson Hjorvar Steinn	2580
2454	IM	Gunnarsson Jon Viktor	½ - ½	GM	Steingrimsson Hedinn	2574

 

Staðan eftir 8.umferð:

Rk.		Name	FED	Rtg	Pts.	Rp	K	rtg+/-
1	GM	Hjartarson Johann	ISL	2547	6,0	2626	10	8,4
2	IM	Gunnarsson Jon Viktor	ISL	2454	5,5	2513	10	7,0
3	GM	Steingrimsson Hedinn	ISL	2574	5,5	2504	10	-4,8
4	IM	Thorfinnsson Bragi	ISL	2426	5,5	2561	10	14,7
5	FM	Gislason Gudmundur	ISL	2280	4,5	2497	20	44,4
6	IM	Thorfinnsson Bjorn	ISL	2410	4,5	2417	10	1,5
7	IM	Jensson Einar Hjalti	ISL	2370	4,0	2377	20	1,6
8	FM	Kjartansson David	ISL	2371	3,5	2361	20	-3,0
9	IM	Kjartansson Gudmundur	ISL	2457	3,0	2282	10	-18,6
10		Johannsson Orn Leo	ISL	2226	2,5	2267	20	5,0
11	GM	Gretarsson Hjorvar Steinn	ISL	2580	2,5	2248	10	-28,6
12		Ingvason Johann	ISL	2142	1,0	2115	20	-7,2

 

9.umferð hefst á fimmtudag kl.15:

Rtg		Name	Result		Name	Rtg
2574	GM	Steingrimsson Hedinn		IM	Thorfinnsson Bjorn	2410
2580	GM	Gretarsson Hjorvar Steinn		IM	Gunnarsson Jon Viktor	2454
2370	IM	Jensson Einar Hjalti		IM	Thorfinnsson Bragi	2426
2457	IM	Kjartansson Gudmundur		GM	Hjartarson Johann	2547
2226		Johannsson Orn Leo		FM	Kjartansson David	2371
2142		Ingvason Johann		FM	Gislason Gudmundur	2280

 

• Heimasíða mótsins
• Chess-Results
• Beinar útsendingar (kl. 15)