Skákþáttur Morgunblaðsins: Glæsileg tilþrif á HM ungmenna í Grikklandi

 

Íslendingar tefldu fram 17 keppendum á heimsmeistaramóti ungmenna sem lauk við frábærar aðstæður á sumardvalarstaðnum í Porto Carras í Grikklandi á fimmtudaginn. Þetta heimsmeistaramót er venju samkvæmt skipað nær öllum bestu ungu skákmönnum heims sem komu hvaðanæva úr heiminum, en keppendur voru 1.596 talsins. Bandaríkjamenn áttu flesta þátttakendur, 128, en næstir komu Grikkir með 78 þátttakendur, Rússar með 70, Indverjar voru með 50 skákmenn. Athygli vakti að Kanadamenn voru með 56 keppendur í hinum ýmsu flokkum. Norðmenn sem sigla á bylgju mikla skákáhuga áttu 35 fulltrúa. Teflt var sjö aldursflokkum stúlkna og pilta frá 8 ára til 18 ára aldurs. Við áttum tvær stúlkur í mótinu, Freyja Birkisdóttir tefldi í flokki stúlkna 10 ára og yngri og Steinunn Verónika Magnúsdóttir í flokki stúlkna 18 ára og yngri.

Helsta niðurstaða mótsins er sú að breiddin er mikil meðal ungra skákmanna okkar enda sáust glæsileg tilþrif í fjölmörgum viðureignum. Fyrirfram var Vignir Vatnar Stefánsson talinn eiga besta möguleika á verðlaunasæti í opna flokki 12 ára og yngri en hann hafnaði í 51. sæti af 202 keppendum hlaut, 6½ vinning af 11 mögulegum, fékk aðeins ½ vinning úr tveim síðustu skákum sínum. Heimsmeistaramótin eru merkilega þétt niður alla aldursflokkana og elo-stigatala hæpin viðmiðun þar sem stigin endurspegla engan veginn raunverulega styrk fjölmargra keppenda. Það er því til marks um góða frammistöðu nái menn að hækka á stigum og sá sem gerði best í þeim efnum í Grikklandi var Björn Hólm Birkisson en hann hlaut 5½ vinning af 11 mögulegum og hækkaði um 150 elo-stig. Akureyringurinn Símon Þórhallsson stóð sig einnig frábærlega en hann hlaut 6 vinninga af 11 mögulegum og hækkaði um 100 elo stig.

Hinn 10 ára gamli Óskar Víkingur Davíðsson var með á EM í Svartfjallandi fyrir tveim árum og hefur bætt sig mikið síðan, varð í 54. sæti af 185 keppendum og hlaut 6½ vinning í opna flokki 10 ára og yngri. Eftirfarandi skák er hans besta frá þessu skemmtilega heimsmeistaramóti:

HM ungmenna 10 ára flokkur; 4. umferð:

Óskar Víkingur Davíðsson – Ole Zeuner (Þýskaland)

Spænskur leikur

1. e4 e5 2. Rf3 Rc6 3. Bb5 a6 4. Ba4 b5 5. Bb3 Be7 6. c3 Rf6 7. d3 0-0 8. 0-0 d6 9. h3 Be6 10. He1 Ra5 11. Bxe6 fxe6 12. Rbd2 Rh5?!

Þetta ferðalag riddarans er of tímafrekt og Óskar Víkingur hrifsar til sín frumkvæðið með nokkrum beittum leikjum.

13. d4 exd4 14. Rxd4 Rf4 15. b4! Rb7 16. R2f3 Dd7 17. Db3 Rd8 18. Bxf4 Hxf4 19. Had1!

Góð liðsskipan og brátt eykur hvítur þrýstinginn á stöðu svarts.

19.... Kh8 20. c4! Hf7 21. c5 e5 22. Rf5 Dc6

23. Dd5!

Góður leikur sem mylur niður varnir svarts. Önnur leið var 23. Rxe5! dxe5 24. Hxd8! Hxd8 25. Dxf7 Bf6 26. Hd3 með vinningsstöðu þar sem 26.... Dd7 er svarað með 27. Dxd7 Hxd7 28. Ha3! og vinnur og eftir 26.... g6 á hvítur 27. Hd3! með óverjandi máthótunum.

23.... Dxd5 24. Hxd5 c6?

Hann varð að reyna 23.... Rb7 en ekki er staðan björguleg eftir 24. Hc1.

25. Hd3 dxc5 26. Rxe5

Vinnur lið og nú er eftirleikurinn auðveldur.

26.... Hf6 27. Rxe7 c4 28. Hd7 h6 29. Hed1 Rf7 30. Reg6+ Kh7 31. f4 Hxg6 32. Rxg6 Kxg6 33. Hc7 Hd8 34. Hxc6+ Kh7 35. Hxd8 Rxd8 36. Hc8 Re6 37. f5 Rf4 38. e5

– og svartur gafst upp. 

Helgi Ólafsson [e-mail]

Grein þessi birtist í Morgunblaðinu 7. nóvember

Skákþættir Morgunblaðsins

Bein útsending frá EM landsliða í skák í Reykjavík

2. umferð EM landsliða í skák er í fullum gangi. Fjölmargar spennandi viðureignir og skákir fara fram. 

Íslenska A-liðið er að tefla við lið Rúmeníu, Íslenska Gullaldarliðið teflir við nýliðana frá Kósóvó og kvennaliðið lið Letta.

Þá má nefna að Armenía, með ofurstórmeistarann Levon Aronian á 1. borði teflir við Frakka, Englendingar við Georgíu og Rússar eru að tefla við Grikki.

 

• Bein útsending frá opnum flokki
• Bein útsending frá kvennaflokki
• Staðan í kvennaflokki
• Staðan í opnum flokki

Armenar og Georguímenn efstir á EM landsliða í skák í Reykjavík

 

• Íslenska A-landsliðið lá gegn Armenum
• Gullaldarliðið tapaði fyrir Hollendingum
• Guðlaug hetja okkar gegn Tyrkjum

 

Íslenska A-landsliðið í skák steinlá fyrir Armenum, einni sterkustu skákþjóð heims, í fyrstu umferð Evrópumóts landsliða sem hófst í Laugardalshöll í dag. Armenar, sem tefla fram Levon Aronian á efsta borði, gáfu Íslendingum engin grið og þrátt fyrir góð færi Héðins Steingrímssonar tókst okkar mönnum ekki að komast á blað gegn hinum firnasterku Armenum.

Aðeins Armenar og Georgíumenn unnu viðureignir sínar með mesta mun. Georgíumenn, sem ofurstórmeistarann Baadur Jobava leiða, sigruðu Skota 4-0.

Gullaldarlið Íslendinga tapaði fyrir öflugri sveit Hollendinga með hálfum vinningi gegn þremur og hálfum, þar sem Margeir Pétursson tryggði að Ísland kæmist á blað. 

,,Þarna hefndum við Hollendingar fyrir tvö töp í fótbolta," sagði kampakátur Loek van Wely eftir viðureignina við íslenska liðið, og vísaði að sjálfsögðu í glæsileg úrslit Íslendinga í knattspyrnu gegn Hollendingum. 

Kvennalandsliðið tapaði 3-1 gegn Tyrkjum. Guðlaug Þorsteinsdóttir var hetja íslenska liðsins, lagði andstæðing sem var 250 skákstigum hærri.

Helstu úrslit í 1. umferð voru að Rússar, stigahæsta sveit mótsins, unnu Tyrki 3-1, Úkraína vann Rúmeníu 3-1, Evrópumeistarar Asera unnu Slóvena 3-1 og Frakkar unnu Svía 3-1. 

Danir náðu góðum úrslitum og lögðu sterka sveit Tékka, 2,5-1,5. Þá vakti mikla athygli að Kosovo, sem nú keppir í fyrsta sinn, náði góðum úrslitum á móti Grikkjum, töpuðu með minnsta mun. Frændur vorir í Færeyjum, sem eiga þriðju stigalægstu sveit landsins, náðu ágætum úrslitum gegn Króötum, 1-3.

Í kvennaflokki bar hæst að úkraínsku systurnar Anna og Mariya Muzichuk komust ekki til landsins í tæka tíð og varð Úkraína að gefa eina skák á móti Englendingum, en hafði engu að síður sigur, 2,5-1,5. Önnur helstu úrslit í kvennaflokki urðu að Georgía, stigahæsta sveit mótsins, sigraði Tékka 3,5-0,5 og Rússar unnu Grikki 3-1.

Evrópumótið í skák er öflugasta og sterkasta skákmót ársins í heiminum, og stærsti skákviðburður sem fram hefur farið á Íslandi síðan 1972.

Skáksamband Íslands stendur að viðburðinum í samvinnu við Skáksamband Evrópu, með stuðningi ríkisstjórnar Íslands, Reykjavíkurborgar og fjölmargra fyrirtækja, félaga og einstaklinga.

Við setningarathöfnina í dag fluttu Gunnar Björnsson forseti Skáksambands Íslands, Dagur B. Eggertsson borgarstjóri, Illugi Gunnarsson menntamálaráðherra og Zurab Azmaiparashivili forseti Skáksambands Evrópu ávörp. Tónlistarmaðurinn Svavar Knútur kom fram við setningu mótsins.

Önnur umferð Evrópumóts landsliða í skák fer fram laugardaginn 14. nóvember og hefst kl. 15. Allar skákir eru sendar beint út á netinu og hægt er að fylgjast með á heimasíðu mótsins, http://etcc2015.com

• Myndaalbúm

 

 

 

 

Evrópumót landsliða hefst kl. 15: Íslendingar mæta Evrópumeisturunum - Carlsen hvílir í fyrstu umerð

Í dag kl. 15 hefst stærsta skákveisla sem fram hefur farið í 43 ár á Íslandi. Sé það ekki nóg, þá er einnig um að ræða eitt af sterkustu skákmótum heims á árinu. Ísland keppir með tvær sveitir í opnum flokki og eina í kvenna flokki.

Borðaröðun 1. umferðar liggur nú fyrir og er ljóst að okkar bíður verðugt verkefni í viðureignum dagsins.

 

Opinn flokkur

A-Sveit Íslands, mætir sjálfum Evrópumeisturunum frá Armeniu!, en um er að ræða gríðarlega öfluga sveit ofurstórmeistara með ofurstórmeistarann Levon Aronian (2781) á 1. Borði. Hannes Hlífar Stefánsson fær það verðuga verkefni að glíma við Aronian í umferðinni!

Gullaldarliðið fær einnig gríðaröfluga sveit Hollendinga, en ofurstórmeistarinn Anish Giri (2778) leiðir sveitina og á 2. borði er Íslandsvinurinn GM Erwin L‘ami (2623) sem sigraði eftirminnilega á Opna Reykjavíkurskákmótinu nú í vor.

Nánar má skoða pörun hér

 

Kvennaflokkur

Kvennaliðið okkar teflir við öfluga sveit Tyrkja sem er talsvert stigahærri en okkar lið, en hafa verður í huga að skákstig tefla ekki, heldur getur allt gerst.

Nánar má skoða pörun í kvennaflokki hér.

Heimasíða mótsins (beinar útsendingar)

 

Setningarathöfn Evrópumóts landsliða í skák - þér er boðið kl. 14:30

Verið hjartanlega velkomin á setningarathöfn XXI. Evrópumóts landsliða í skák í Laugardalshöll. Þetta er stærsti skákviðburður ársins í heiminum og meðal keppenda eru heimsmeistarinn Magnus Carlsen og helmingur af 20 stigahæstu skákmönnum heims. 36 lið tefla í opnum flokki og 30 í kvennaflokki. Ísland fær sem gestgjafi að tefla fram tveimur liðum og í Gullaldarliði Íslands eru Friðrik Ólafsson, Helgi Ólafsson, Jóhann Hjartarson, Jón L. Árnason og Margeir Pétursson.

A-lið Íslands skipa Hannes Hlífar Stefánsson, Héðinn Steingrímsson, Hjörvar Steinn Grétarsson, Henrik Danielsen og Guðmundur Kjartansson. Kvennalið Íslands skipa Lenka Ptacnikova, Guðlaug Þorsteinsdóttir, Elsa María Kristínardóttir, Hrund Hauksdóttir og Veronika Steinunn Magnúsdóttir.

Við setningarathöfnina munu Gunnar Björnsson forseti Skáksambands Íslands, Dagur B. Eggertsson borgarstjóri, Zurab Azmaiparashvili, forseti Skáksambands Evrópu, og Illugi Gunnarsson menntamálaráðherra flytja ávörp og Svavar Knútur kemur fram.

Gens una sumus -- Við erum ein fjölskylda.

Evrópumót landsliða í skák 2015 í Laugardalshöll: Sterkasta skákmót ársins í heiminum

• Stærsti skákviðburður á Íslandi síðan 1972
• Skáksveitir frá 35 löndum
• Næstum 500 erlendir gestir
• Magnus Carlsen heimsmeistari og Mariya Muzychuk heimsmeistari kvenna meðal keppenda
• Friðrik Ólafsson í Gullaldarliði Íslands 

Evrópumót landsliða í skák fer fram í Laugardalshöllinni í Reykjavík, 13.-22. nóvember. Evrópumótið er stærsti skákviðburður sem fram hefur farið á Íslandi síðan Fischer og Spassky mættust í heimsmeistaraeinvígi árið 1972.  

Magnus Carlsen heimsmeistari leiðir lið Norðmanna, og af öðrum stórstjörnum má nefna Anish Giri, Levon Aronian, Alexander Grischuk, Vassily Ivanchuk, Peter Svidler, Alexei Shirov, Nigel Short, Ivan Sokolov og Luke McShane.

Gullaldarlið Íslands

Íslendingar mega tefla fram tveimur liðum í opnum flokki og er Friðrik Ólafsson, fyrsti stórmeistari Íslands, í ,,Gullaldarliðinu" ásamt Helga Ólafssyni, Jóhanni Hjartarsyni, Jóni L. Árnasyni og Margeiri Péturssyni.

Hin íslenska sveitin er skipuð Hannesi Hlífari Stefánssyni, Héðni Steingrímssyni, Hjörvari Steini Grétarssyni, Henrik Danielsen og Guðmundi Kjartanssyni.

Alls senda 35 lönd lið til keppni í opnum flokki og 30 í kvennaflokki, og er helmingur af tuttugu stigahæstu skákmönnum heims skráður til leiks. Af 178 keppendum í opnum flokki eru 133 stórmeistarar, og í kvennaflokki eru 13 stórmeistarar meðal 146 keppenda.

Rússar með stigahæstu sveitina

Á Evrópumótinu eru tefldar 9 umferðir og er hvert lið skipað fjórum liðsmönnum, auk varamanns. Rússar mæta með sterkustu sveitina á pappírnum, en meðalstig liðsmanna eru 2743. Næstir koma grannar þeirra í Úkraínu (2725) og Aserbaidsjan (2707).

Íslenska sveitin er í 24. sæti af 36 á stigalistanum með 2557 meðalstig og Gullaldarliðið hefur 2525.

Evrópumót landsliða var fyrst haldið í Vínarborg árið 1957 og fer nú fram í 20. skipti. Sovétmenn urðu Evrópumeistarar 9 skipti í röð og Rússar hafa unnið titilinn þrisvar. Rússnesku stórstjörnunum hefur þó mistekist að sigra á EM á síðustu þremur mótum. Aserar eru ríkjandi Evrópumeistarar, sigruðu í Varsjá 2013.

Heimsmeistari kvenna í sveit Úkraínu

Í kvennaflokki eru sveitir Georgíu, Rússland og Úkraínu langstigahæstar. Úkraína sigraði á Evrópumótinu fyrir 2 árum, en áður höfðu rússnesku stúlkurnar sigrað þrjú ár í röð. Heimsmeistari kvenna, Mariya Muzychuk, teflir með úkraínska liðinu, og munu langflestar af sterkustu skákmönnum heims leika listir sínar í Laugardalshöllinni.

Íslenska kvennaliðið er númer 29 af 30 í styrkleikaröð EM kvenna. Lenka Ptacnikova fer fyrir íslensku sveitinni sem jafnframt er skipuð Guðlaugu Þorsteinsdóttur, Elsu Maríu Kristínardóttur, Hrund Hauksdóttur og Veroniku Steinunni Magnúsdóttur.

Frábær aðstaða í Laugardalshöll

Skáksamband Íslands stendur að Evópumótinu, í samvinnu við Skáksamband Evrópu, með stuðningi ríkisstjórnar Íslands, Reykjavíkurborgar, Icelandair, Íslandsstofu, Actavis, Valitor, Brim, Landsbankans, Suzuki-bíla, Guðmundar Arasonar hf., GAMMA, Icelandic Glacial, Ölgerðarinnar, Heimilstækja, Tölvulistans, Marels  og fjölmargra fyrirtækja og einstaklinga.

Fyrsta umferð Evrópumótsins hefst föstudaginn 13. nóvember klukkan 15. Mjög góð aðstaða verður fyrir áhorfendur í Laugardalshöll, auk þess sem allar skákirnar verða sendar út á netinu.  

Frekari upplýsingar um mótið, dagskrá og úrslit, er hægt að nálgast á heimasíðu mótsins: etcc2015.com.

 

Hraðskákmót á Stofunni í kvöld

Hrókurinn og Vinaskákfélagið bjóða til hraðskákmóts á Stofunni, Vesturgötu 3, klukkan 20 í kvöld. Tefldar verða 8 umferðir með 5 mínútna umhugsunartíma. Mótið er tileinkað Willard Fiske, en hann fæddist 11. nóvember 1831. Fiske var mikill velgjörðarmaður Íslendinga og guðfaðir skáklífs á Íslandi á 20. öld.

Stofan er um þessar mundir helsta skákkaffihús höfuðborgarinnar, og þar er teflt af miklu andríki alla daga. Stofan leggur til verðlaun í tilefni dagsins. Þátttaka í mótinu er ókeypis og tilboð verður á veitingum.

 

Miðasala hafin á EM landsliða - sértilboð á mótapassa fyrir allar umferðir til 12. nóvember

Skákmönnum býðst sérstakur afsláttur af Mótspassa á Evrópumót í skák 2015. Þú þarft einfaldlega að nota kóðann "Evrópa2015". Tilboðið gildir fram til 12. nóvember. 

Verð kr. aðeins 4.900 í staðinn fyrir 6.900 kr. Frítt er inn fyrir 16 ára og yngri. 

Hvernig nota ég afsláttinn? Skráðu þig á Miði.is.

Smelltu á græna Kaupa miða takkann, veldu þér miða til kaups og í reitinn "Ertu með afsláttarkóða“ í skrefi #3 sláðu þá inn eftirfarandi: Evrópa2015

Smelltu á „Virkja“ og þá sérðu að afslátturinn kemur inn um leið. 

ATH: Staðfestið EKKI greiðslu fyrr en afsláttur er sýnilega orðinn virkur.

Nánar um mótið

Evrópukeppni landsliða í skák er stærsti skákviðburður hérlendis síðan einvígi aldarinnar var haldið í Laugardalshöll 1972.

Hingað koma til landsins nánast allar helstu stórstjörnur Evrópu. Ber þar hæst sjálfan heimsmeistarann í skák Magnus Carlsen.

Íslenska gullaldarliðið mun vekja mikla athygli en fyrir það tefla stórneistararnir eitilhörðu Jóhann Hjartarson, Helgi Ólafsson, Margeir Pétursson, Jón L. Árnason og goðsögnin Friðrik Ólafsson.

Meðal annarra stórstjarna má nefna Levon Aronian (Armeníu), Anish Giri (Hollandi), Alexei Shirov (Lettland), Shakryar Mamedyarov og Teimor Radjabov (Aserbajdan) og Vassily Ivanchuk, Úkraínu.

Í kvennaflokki mun heimsmeistari kvenna, Mariya Muzychuk, fara fyrir sterku liði Úkraínumanna.

Á skákstað verður boðið upp á toppaðstæður fyrir áhorfendur og óvæntar uppákomur munu gera þennan risaviðburð enn skemmtilegri. Skákskýringar í boði fyrir áhorfendur í umsjón Helga Áss Grétarssonar, Þrastar Þórhallssonar, Karls Þorsteins og Áskels Arnar Kárasonar. 

Fyrir utan það að komast í nálægð við skákmennina sjálfa verður einnig hægt að fylgjast með skákskýringum á skákstað og fylgjast með helstu skákum umferðarinnar á skjám.

Verð á einstakar umferðir er 1.400 kr. Hægt er að kaupa skákpassa á 6.900 kr. sem gildir á allar umferðir mótsins.

 

Vinsamlegast athugið að frítt er inn fyrir 16 ára og yngri

Ný skákverslun: Skákbúðin

Ný skákverslun hefur litið dagsins ljós: Skákbúðin.

Nánar má lesa um Skákbúðina hér: www.skakbudin.is

Sjö athyglisverðar staðreyndir um EM landsliða - fyrstu keppendurnir mæta til landsins í dag

Vefurinn öflugi Chess24 birti í gær mjög athyglisverða og skemmtilega samantekt um EM landsliða sem hefst í Laugardalshöllinni á föstudaginn.

Meðal annars er því velt upp afhverju Boris Gelfand sé að þjálfa Norðmenn í stað þess að tefla á EM með þjóð sinni en þátttökuleyti Ísraela, sem hefur tvívegis unnið silfur á EM landsliða, vekur nokkra athygli og hefur meira að komið til umræðu á ísrealska þinginu. 

Í dag koma fyrstu erlendu keppendurnir til landsins en stærsti hluti Evrópumeistara Asera lendir á Keflavíkurflugvelli um fjögurleytið í dag.

Umfjöllun Chess24 má finna hér.