Carlsen efstur á áskorendamótinu - Gelfand vann Aronian

Enn á ný sýnir Magnus Carlsen (2872) mikla seiglu á áskorendamótinu í London. Í dag gerði hann jafntefli gegn Kramnik (2810) eftir að hafa lent í töluverðri beyglu. Aronian (2809) tapaði hins vegar fyrir Gelfand (2740), sem hefur unnið tvær skákir í röð. Mótið hefur nú heldur jafnast. Carlsen hefur 6 vinninga, Aronian 5,5 vinning og Kramnik 5 vinninga.  Frídagur er á morgun. Á miðvikudag mætast meðal annars: Carlsen-Gelfand og Aronian-Ivanchuk.

Úrslit 9. umferðar:

• Kramnik-Carlsen ½-½
• Svidler-Grischuk ½-½
• Ivanchuk-Radjabov 1-0
• Gelfand-Aronian 1-0

Staðan:

• 1. Carlsen (2872) 6 v.
• 2. Aronian (2809) 5½ v.
• 3. Kramnik (2810) 5 v.
• 4.-5. Gelfand (2740) og Grischuk (2764) 4½ v.
• 6. Svidler (2747) 4 v.
• 7. Ivanchuk (2757) 3½ v.
• 8. Radjbov (2793) 3 v.

Tenglar:

• Heimasíða mótsins
• Chessbomb (beinar útsendingar með tölvuskýringum)

Á fimmta tug skákkrakka á páskaskákæfingum TR!

Á fimmta tug skákkrakka tóku þátt í páskaskákæfingum TR 23. mars bæði á stelpu/kvenna skákæfingunni svo og á laugardagsæfingunni. Með fáum undantekningum voru þetta allt krakkar sem eru félagsmenn í Taflfélagi Reykjavíkur, en ásókn í félagið hefur aukist mikið í vetur. Krakkarnir sem sækja skákæfingarnar í TR koma úr öllum hverfum borgarinnar og er skákþjálfunin og allt námsefni þeim að kostnaðarlausu.

Í janúar sl. var auglýst nýtt fyrirkomulag á skákæfingum TR og hefur það mælst mjög vel fyrir (http://taflfelag.is/?c=frettir&id=1154&lid=&pid=&option=).

Bæði hafa krakkarnir og foreldrarnir látið í ljósi mikla ánægju með fyrirkomulagið og hið frábæra námsefni sem Björn Jónsson hefur tekið saman og sett snilldarlega í góðan búning. Námsefnið er sýnt á skjávarpa á æfingunum og svo afhent krökkunum í litríkum og skilmerkilegum skákheftum. Eins og alltaf helst skákþjálfun, skákkennsla og taflmennska í hendur á skákæfingum TR. Við sem stöndum að félaginu mælum árangur æfinganna ekki síður í ástundun og ánægju krakkanna - og þar erum við svo sannarlega í góðum málum!

Það var fjölmennt og mjög góðmennt á laugardagsæfingunni kl. 14. Nokkrir strákar úr afrekshópnum sem eru yngri en 13 ára tóku einnig þátt og því fengu þau sem styttra eru komin að reyna sig við reyndari skákmenn þótt ungir séu! Meðal þátttakenda var til að mynda Vignir Vatnar Stefánsson sem hefur halað inn titlum og verðlaunum í vetur þó hann sé aðeins 10 ára gamall. Hann er t.d. Unglingameistari TR, Unglingameistari Reykjavíkur, Íslandsmeistari barna og Norðurlandameistari barna. Úr afrekshópnum voru líka Guðmundur Agnar Bragason, sem varð í 3. sæti með liði Álfhólsskóla á Íslandsmóti grunnskólasveita um daginn og Mykhaylo Kravchuk sem varð í þriðja sæti á Íslandsmóti barna í janúar. Einnig voru tvíburabræðurnir Bárður Örn og Björn Hólm Birkissynir, en þeir sækja skákæfingar hjá afrekshópnum og skákæfingarnar á laugardögum jöfnum höndum.

Eftir fyrri hluta æfingarinnar þar sem tefldar voru 4 umferðir var boðið upp á Nóa/Síríus lófapáskaegg og djús í hressingu og síðan var páskaeggjahappdrætti. Dregið var um þrjú Nóa/Síríus páskaegg og þau sem höfðu heppnina með sér í dag voru: Guðjón Ármann Jónsson, Sana Salah og Tindri Freyr Möller sem mætti á sína fyrstu skákæfingu í dag! Eftir páskahressinguna var svo félagsæfing TR þar sem Matthías skákþjálfari tók m.a. fyrir skákritun.

Barnastarfið í Taflfélagi Reykjavíkur er í mjög góðum farvegi og einnig hefur verið gerður mjög góður rómur af skákæfingunum hjá afrekshópnum, sem æfir tvisvar í viku undir handleiðslu Daða Ómarssonar og Torfa Leóssonar.

Stelpu/kvennahópurinn fer vaxandi og nú þegar er kominn harður kjarni sem mættir reglulega. Skákþjálfunin hjá stelpunum er með svipuðu sniði og á laugardagsæfingunum. Það eru skákstúderingar í fyrri hlutanum og teflt í seinni hlutanum. Á páskaæfingunni sl. laugardag voru lófapáskaegg frá Nóa/Síríus í boði í hressingunni og síðan var páskaeggjahappdrætti. Þrjár heppnar stelpur fengu Nóa/Síríus páskaegg, þær Bríet Birna Guðmundsdóttir, Karitas Ólöf Ísfeld Hafsteinsdóttir og Rakel Róbertsdóttir.

Pistill og myndir Sigurlaug Regína Friðþjófsdóttir.

Myndaalbúm (SRF)

Páskaeggjamót Hellis fer fram í dag

Páskaeggjamót Góu og Hellis verður haldið mánudaginn 25. mars 2013, og hefst taflið kl. 17, þ.e. nokkru fyrr heldur en venjulegar mánudagsæfingar. Páskaeggjamótið kemur í stað mánudagsæfingar. Tefldar verða 7 umferðir með 7 mínútna umhugsunartíma. Mótið er opið öllum krökkum á grunnskólaaldri. Skráning í mótið verður á heimasíðu Hellis: http://hellir.blog.is/  

Ókeypis er fyrir félagsmenn í Helli en fyrir aðra er þátttökugjald kr. 500. Fyrirkomulagið verður kynnt síðar

Páskaeggjamótið verður haldið í félagsheimili Hellis að Álfabakka 14a í Mjóddinni. Inngangurinn er milli Subway og Fröken Júlíu og salur félagsins er á þriðju hæð hússins.

Atkvöld hjá Helli í kvöld

Taflfélagið Hellir heldur atkvöld mánudaginn  25. mars 2013 og hefst mótið kl. 20:00. Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Teflt er í félagsheimili Hellis í Álfabakka 14a í Mjóddinni. 

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna
möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Skákþáttur Morgunblaðsins: Allra augu beinast að Magnúsi Carlsen

Magnús Carlsen er sigurstranglegasti keppandinn í áskorendamótinu sem hófst á föstudaginn í London. Átta stórmeistarar tefla tvöfalda umferð og sigurvegarinn öðlast rétt til að skora á heimsmeistarann Anand. Magnús er nálega 100 elo-stigum hærri en Anand, og fara þarf aftur til ársins 1971 til að finna jafn mikinn stigamun á heimsmeistara og áskoranda sem þá var Bobby Fischer. Aðstaða Magnúsar nú er ekki ósvipuð þeirri sem Fischer var í á karabísku eyjunni Curacao árið 1962 þegar átta skákmenn tefldu fjórfalda umferð og megnið af andstæðingum hans voru „Rússar". Eftirmálar þess móts kristölluðust í frægu viðtali Fischers við Sports Illustrated: „Rússarnir svindla í skák". Áskorendakeppninni var þá breytt og tekið upp einvígisfyrirkomulag. Þó „dreifðir" séu í dag eru aðrir keppendur en Magnús frá gömlu Sovétlýðveldum: Armeninn Aronjan, Rússarnir Kramnik, Svidler og Gritsjúk, Hvítrússinn Gelfand sem teflir í dag fyrir Ísrael, Úkraínumaðurinn Ivantsjúk og Aserinn Radjabov.

David Bronstein vann réttinn til að skora á Botvinnik heimsmeistara eftir fyrsta áskorendamótið í Búdapest árið 1950. Aðrir sigurvegarar þessara móta fram til ársins ´62 voru Smyslov, Tal og Petrosjan. Magnús Carlsen er fyrsti Norðurlandabúinn sem á raunhæfa möguleika á heimsmeistaratitlinum. Bent Larsen hefði sennilega mótmælt þessari fullyrðingu. Af 100 síðustu kappskákum sem Magnús hefur teflt hefur hann tapað einni. Hann virðist ekki reiða sig mikið á tölvuundirbúning og kemur andstæðingum yfirleitt hressilega á óvart í byrjun tafls. Aðalstyrkur hans liggur í frábærri endataflstækni og miklum sigurvilja. Frægð hans í Noregi og víðar jókst gífurlega þegar Magnús kom Íslands árið 2004, gæddi sér á hnetum og drakk appelsínusafa á Reykjavíkurmótinu og síðan á „Reykjavik rapid" í Sjálfstæðishúsinu við Austurvöll. Myndefni frá viðureignum hans við Kasparov og Karpov er iðulega notað í umfjöllun um afrek hans í þáttagerð t.a.m. „60 Minutes". Hæfileikar hans voru þá á allra vitorði en á Aeroflot-mótinu nokkrum vikum fyrr lagði hann einn fremsta stórmeistara Rússa í aðeins 19 leikjum. Leikandi léttur stíll hans í þessari minnti á eitt frægasta undrabarn skáksögunnar, Paul Morphy:

Magnús Carlsen - Sergei Dolmatov

Hollensk vörn

1. Rf3 f5 2. d3!

Skynsamlega leikið gegn Dolmatov sem þekkti allar hefðbundnar leiðir út og inn.

2. ... d6 3. e4 e5 4. Rc3 Rc6 5. exf5 Bf5 6. d4 Rxd4

Opnar taflið fullmikið en Dolmatov gast ekki að 6. ... e4 7. Rg5 o.s,frv.

7. Rxd4 exd4 8. Dxd4 Rf6 9. Bc4 c6 10. Bg5 b5 11. Bb3 Be7 12. O-O-O Dd7 13. Hhe1

Þetta er allt saman afar einfalt - alveg eins og hjá Morphy!

13. ... Kd8

Löng hrókun, 13. .... O-O-O blasti við en eftir 14. g4! Bxg4 15. Hxe7 Dxe7 16. Dxg4+! er hvíta staðan gjörunnin.

- Sjá stöðumynd -

14. Hxe7! Dxe7

Eða 14. ... Kxe7 15. He1+ ásamt 16. Bxf6 o.s.frv.

15. Df4! Bd7 16. Re4! d5

Dolmatov gat líka reynt 16. ... Hf8 17. Rxd6 h6 en hvítur vinnur með 18. Db4! a5 19. Dc5 Ha6 20. Rb7+ Ke8 21. Dxe7! Kxe7 22. He1+.

17. Rxf6 h6 18. Bh4 g5 19. Dd4!

- og Dolmatov gafst upp. Hann gat reynt 19. ... Hf8 en taldi stöðu sína vonlausa eftir 20. Rxd5 cxd5 21. Dxd5 ( eða 21. Bxd5 ) Hc8 22. Bg3 o.s.frv.

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 17. mars 2013.

Skákþættir Morgunblaðsins

[Event "3rd Aeroflot Festival"] [Site "Moscow RUS"] [Date "2004.02.19"] [EventDate "2004.02.17"] [Round "3"] [Result "1-0"] [White "Magnus Carlsen"] [Black "Sergey Dolmatov"] [ECO "A04"] [WhiteElo "2484"] [BlackElo "2591"] [PlyCount "37"] 1. Nf3 f5 2. d3 d6 3. e4 e5 4. Nc3 Nc6 5. exf5 Bxf5 6. d4 Nxd4 7. Nxd4 exd4 8. Qxd4 Nf6 9. Bc4 c6 10. Bg5 b5 11. Bb3 Be7 12. O-O-O Qd7 13. Rhe1 Kd8 14. Rxe7 Qxe7 15. Qf4 Bd7 16. Ne4 d5 17. Nxf6 h6 18. Bh4 g5 19. Qd4 1-0

Jafntefli hjá Carlsen og Aronian

Jafntefli varð í skák Carlsen (2872) og Aronian (2809) í áttundu umferð áskorendamóts FIDE sem fram fór í London í dag. Þeir leiða því sem fyrr en forystan á Kramnik (2810) er nú aðeins einn vinningur en heimsmeistarinn fyrrverandi lagði Svidler (2747) í dag.

Úrslit 8. umferðar:

• Grischuk - Ivanchuk 1-0
• Carlsen - Aronian 0,5-0,5
• Radjabov - Gelfand 0-1
• Kramnik - Svidler 1-0

Staðan:

• 1.-2. Carlsen (2872) og Aronian (2809) 5,5 v.
• 3. Kramnik (2810) 4,5 v.
• 4. Grischuk (2764) 4 v.
• 5.-6. Svidler (2747) og Gelfand (2740) 3,5 v.
• 7. Radjbov (2793) 3 v.
• 8. Ivanchuk (2757) 2,5 v.

Tenglar:

• Heimasíða mótsins
• Chessbomb (beinar útsendingar með tölvuskýringum)

Bragi vann stórmeistara - Hjörvar með jafntefli

Bragi Þorfinnsson (2484) heldur áfram að standa sig afar vel í bresku deildakeppninni. Í áttundu umferð, sem fram fór í dag, vann hann stórmeistarann Stephen J Gordon (2533). Bragi hefur nú hlotið 5,5 vinning í 6 skákum og hefur allgóðan möguleika á að krækja sér í stórmeistaraáfanga gangi honum vel í lokahlutanum sem fram fer 4.-6. maí nk.

Hjörvar gerði jafntefli við enska stórmeistarann Nicholas Pert (2539) í dag. Klúbbnum þeirra, Jutes of Kent, gekk hins vegar ekki vel í dag, og tapaði 2,5-5,5.

• Heimasíða keppninnar
• Bein útsending

Gallerý Skák - Páskamótið: Gunni Gunn vann

Fríður hópur einbeittra skákunnenda mætti til tafls í Gallerýinu á fimmtudagskvöldið var. Þar voru 22 slíkir saman komnir til að sýna sig og sjá aðra, taka nokkrar bröndóttar sjálfum sér og öðrum til ómældrar ánægju og yndisauka.  Ekki spillti að menn tefldu fágað og fyrir fegurðina og að veglegir páskavinningar voru í boði fyrir besta skor á skákborðinu og nokkra aðra heppna skákgeggjara.

Vikið var að því utan dagskrár þátttakendum til fróðleiks og hinum eldri í þeirra hópi til nokkurs léttis að skv. nýjustu fréttum úr heimi dulspekinnar á Internetinu væri aldur manna afstæður. Oft er sagt að enginn sé eldri en honum sjálfum finnst hann vera, sem mikið er til í.  En nú er sem sagt komið í ljós að „afstæðiskenningin" hefur líka heilmikið með öldrun fólks að gera og líklegt sé talið „að skákin lengi lífið"!  Reyndar eins og allir aðrir skemmtilegir hlutir þar sem menn eiga það til að gleyma sér. Sökkva sér niður í eða þykja svo skemmtilegir að þeim finnst tíminn fljótur að líða.

 Kenningin gengur sem sagt út á það að ef tímaskynið hverfur þá eldast menn einungis um jafnlangan tíma og þeim finnst hafa liðið eða viðburðurinn/skákin/skákkvöldið hafa tekið.   Gott er til þessa að vita og mikill akkur fyrir þá sem oft lenda í tímaþröng og átta sig ekki að hratt líður stund.

Kannski er þetta  skýringin á góðu gengi og sigurgöngu hins  aldna meistara og sigurvegara kvöldsins Gunnars Kr. Gunnarssonar, sem er að nálgast áttrætt en teflir eins og unglingur og hefur teflt  manna mest um ævina.  Ánægju vakti hvað fjölmennur fjölbreytilegur hópur var saman kominn, sumir langt að,  sem allir nutu kvöldsins og þess að kljást og sjást við góðar aðstæður og  í léttu andrúmslofti, sem gerir gæfumuninn.

Eins og áður er fram komið vann Gunni Gunn mótið  og það með hvorki meira né minna en 10½ vinningi af 11 mögulegum.  Vigfús Vigfússon, hinn ötuli formaður Hellis, kom næstur með 9½ en mátti sætta sig við tap í lokaumferðinni gegn Sigurði E. Kristjánssyni, hinum drjúga endataflsmanni, sem réði úrslitum, því ella hefði hann orðið hæstur á stigum.

Þessir tveir eðalskáksjólar voru í sérflokki en önnur úrslit má sjá á meðf. mótstöflu og myndasafni.

 

 

ESE- skákþankar- 24.3.2013

Breska deildakeppnin: Bragi vann í gær - Hjörvar með jafntefli

Sjöunda og áttunda umferð bresku deildakeppninnar fara fram um helgina. Bragi Þorfinnsson (2484) og Hjörvar Steinn Grétarsson (2515) tefla fyrir klúbbinn Jutes of Kent. Bragi, sem tefldi á fyrsta borði í gær vann stórmeistarann Daniel W Gormally (2507) en Hjörvar gerði jafntefli við alþjóðlega meistarann Adam C. Hunt (2431).

Áttunda umferð hefst nú kl. 11 og verða þeir félagarnir þá í beinni útsendingu. Bragi mætir stórmeistaranum Stephen J Gordon (2533) en Hjörvar teflir við stórmeistaranum Nicholas Pert (2539). Frammistaða Braga hefur verið frábær í keppninni hingað til en hann hefur hlotið 4,5 vinning í 5 skákum.

• Heimasíða keppninnar
• Bein útsending

Oliver Aron og Vignir Vatnar efstir á páskaæfingu Fjölnis

Hún var vel mönnuð og fjölmenn páskaskákæfingin hjá Fjölni enda 11 páskaegg í vinning á skákmóti æfingarinnar.

Tefldar voru 5 umferðir og 29 skákkrakkar börðust um verðlaunin vinsælu. Nokkrir sterkir skákmenn frá öðrum félögum mættu á æfinguna og var þeim vel tekið af Fjölniskrökkum enda öll góðir félagar og hittast ekki ósjaldan.

Það voru þeir Oliver Aron Jóhannesson og Vignir Vatnar Stefánsson sem komu efstir í mark á mótinu með 4,5 vinninga af 5 mögulegum. Þeir gerðu innbyrðis jafntefli og unnu aðra andstæðinga. Aðrir sem fengu páskaegg í vinning voru þau Jón Trausti Harðarson (4), Nansý Davíðsdóttir (4), Gauti Páll Jónsson (4), Óskar Víkingur Davíðsson (3), Joshua Davíðsson (3), Mikolaj Oskar (3), Róbert Orri Árnason (3), Hilmir Hrafnsson (3) og Kristófer Halldór Kjartansson. Allir sem tóku þátt í æfingunni fengu lítið páskaegg og snakk sem var vel þegið af öllum. Auk skákmótsins var boðið upp á kennslu sem að þessu sinni var í öruggum höndum Hrundar Hauksdóttur. Fjölmargir foreldrar fylgdust með mótinu og æfingunni sem gengu hratt og vel fyrir sig.