Skák.is

Bloggfærslur mánaðarins, september 2012

4.9.2012 | 14:12

Spennandi Íslandsmót íþróttafélaganna á laugardaginn

Það stefnir í hörkuspennandi Íslandsmót íþróttafélaganna í skák á Hlíðarenda á laugardaginn og útlit fyrir að allt að 14 lið sendi keppnissveitir. Flest Reykjavíkurfélögin tefla fram liðum, og er búist við að KR-ingar mæti firnasterkir til leiks með Stefán Kristjánsson stórmeistara á 1. borði.

Valsmenn sigruðu með yfirburðum á Reykjavíkurmóti íþróttafélaganna í fyrra, en steinlágu fyrir KR á Lækjartorgi á menningarnótt. Lið Valsara er þó til alls líklegt með Jón Viktor Gunnarsson í broddi fylkingar.

Framarar ætluðu sér stóra hluti í fyrra en höfðu ekki erindi sem erfiði. Í liði þeirra núna verða m.a. stórmeistararnir Jóhann Hjartarson og Helgi Áss Grétarsson.

Allt bendir til að Reykjavíkurfélögin Fylkir, Þróttur, Leiknir og Víkingur verði með, líkt og í fyrra, og verða sagðar fréttir af þeim liðum á næstu dögum.

Norðanmenn senda sameiginlegt lið til keppni undir merkjum KA/Þórs og meðal liðsmanna eru Gylfi Þórhallsson og Halldór B. Halldórsson. Þá mæta galvaskir Skagamenn undir liðstjórn Einars K. Einarssonar, og Halldór Grétar Einarsson stýrir sterku liði Breiðabliks.

Björn Ívar Karlsson stýrir liði ÍBV, en auk þess er vonast eftir liðum frá Hafnarfirði og Garðabæ.

Skákakademían stendur að mótinu. Hvert lið er skipað 4 mönnum, auk varamanns og liðstjóra. Tefldar verða hraðskákir og hefst mótið klukkan 11 á laugardaginn. Tekið er við skráningum í stefan@skakakademia.is.

Spil og leikir | Slóð | Facebook | Athugasemdir (0)

4.9.2012 | 13:16

Ól-pistill nr. 9 - Asíubúar, Kasparov og dularfull vera undir brú

Það náðist fínt jafntefli gegn Austurríki í 6. umferð sem fram fór í gær. Stelpurnar koltöpuðu hins vegar fyrir sveit Venesúela. Í dag héldu nefndarfundir áfram hjá FIDE. Kasparov er mættur og þegar farinn að láta til sín taka.eru andstæðingarnir Íran og Suður-Kórea.

Gærdagurinn

Hjörvar Steinn Grétarsson var eini íslenski sigurvegarinn í gær en hann átti fína vinningsskák á þriðja borði. Henrik Danielsen og Þröstur Þórhallsson gerðu jafntefli. Henrik átti um tíma fína stöðu en yfirsást vinningsleikur í einni stöðu. Þröstur gerði jafntefli í maraþonskák (125 leikir) eftir að hafa lengi verið í köðlunum. Hannes náði sér aldrei á strik á fyrsta borði og tapaði.

Hjá stelpunum gerði Elsa María jafntefli en aðrar töpuðu. Hallgerður Helga átti mjög vænlega stöðu en fann ekki besta framhaldið. Tinna hafði einnig ágætis tafl um tíma en Lenka náði sér ekki strik. Semsagt ekki góð úrslit gegn Venesúela (fagna því mjög að þurfa aldrei að skrifa þetta erfiða nafn aftur sem ég get aldrei munað!).

Umferð dagsins

Í dag tefla strákarnir við Íran en stelpurnar við Suður-Kóreu.

Við höfum Írönum fjórum sinnum, 1958, 1964, 1910 og svo í Khanty-Mansiysk 2010 þar sem við töpuðum sannfærandi 1-3. Þeir eru heldur sterkari en íslenska liðið á pappírnum þótt það muni reyndar ekki miklu. Aðalliðið teflir, þ.e. Dagur hvílir aftur. Stelpurnar eiga svo að vinna lið Suður-Kóreu nokkuð auðveldlega, eru miklu sterkari. Hallgerður Helga hvílir.

FIDE-málefni - Kasparov í stuði

Alls konar nefndarfundir eru í gangi hjá FIDE. Manni er frjálst að sækja alla fundi en eina nefndin sem ég er formlega í er tækninefnd. Þar voru m.a. til umræðu svindlmál, skákklukkur, beinar útsendingar og fleira. Hér togast á tvenns konar hagsmunir. Það er hagsmunir áhorfenda og svo hagsmunir þeirra sem vilja koma í veg fyrir hvers konar svindl. Því miður er þróunin í síðari áttina, kannski lítið við því að gera við mennirnir eigum það greinlega til að svindla.

Hér í Istanbul komast t.d. áhorfendur hvergi nálægt skákmönnunum og finnst sumum gestunum, sem jafnvel hafa borgað háar fjárhæðir til að koma hingað heldur súrt í broti. Ég er loks búinn að fá aðgang í inn skáksalinn og get framvegis verið þar þegar mér sýnist. Mér skilist að það standi nú öllum forsetum skáksambandanna það til boða.

Einnig var fróðleg umræða um það sem kallað er „the ultimate chessboard". Skákborð sem þú þarft bara að leika. Um leið og þú klárar leikinn er leikurinn sjálfkrafa skráður og klukkan sett á andstæðinginn. Í raun og veru það sama og á netinu nema að þú setur fyrir framan andstæðinginn. Þetta er eitthvað sem menn dreymir um. Örugglega nokkuð langt í þetta.

Að loknum þeim fundi fór á fund hjá Skák í skóla-nefndina. Þar fannst mér athyglisverðast að heyra fulltrúa frá Armeníu tala. Skákin er þar í öndvegi og allir kunna skák. Sami maður er forseti landsins og skáksambandsins.

Krökkum á aldrinum 6-9 er kennd í skák og allt land og það eru til námsbækur bæði fyrir kennara og nemendur. Helsta vandamálið hefur verið að finna skákkennara en með góðu kennsluefni hefur það gengið. Þar eins og í Tyrklandi er stuðst við kennara í skólum. Kennd er skák í öllum skólum í Armeníu og er skák sjónvarpsefni í landinu. Og árangurinn stendur ekki á sér því Armenía er eitt sterkasta skákland heims, þrátt fyrir fámenni og helstu skákmenn landsins eru þjóðhetjur.

Einnig talaði þarna fulltrúi frá Argentínu. Þar hefur mikill árangur náðst. Skák þar er kennd 1.157 kennslustundir í hverri viku.

Í dag fór ég á tvenna fundi. Fyrst um grundvallarlög FIDE (statues) og síðar á fund um skáklög (law of chess). Á fundinum um grundvallarlögin var töluvert tekist á. Kasparov mættur ásamt lögfræðingi sínum og fór mikinn. Baráttan er bara forsmekkurinn fyrir FIDE-þingið 2014 þar sem forsetakosningar verða.

Heimsmeistarinn fyrrverandi er mikill ræðumaður en það fer ekki framhjá manni þegar honum líkar ekki eitthvað. Hristir hann þá hausinn og baðar út öllum öngum. FIDE-menn hafa komið til móts við tillögur Kasparovs að einhverjum leyti en um sumt eru menn sammála um að vera ósammála um. Málið verður væntanlega klárað á sjálfu FIDE-þinginu sem fram fer 7.-9. september með þá einhverjum kosningum.

Fjármál FIDE hafa verið til umræðu hér á öðrum fundum. Þar hefur t.d. komið í ljós að FIDE hefur borgað tæpa milljón evra í lögfræðikostnað. FIDE-menn eru ósáttir en lögsóknirnar eru gerðar af nokkrum skáksamböndum en flestum er ljóst að það er í raun og veru Kasparov sem borgar. Einnig hefur komið í ljós mun hærri ferðakostnaður Kirsans er það er greinilega liðin tíð að hann eða Kalmíkía borgi flugkostnað, heldur er það FIDE. Einnig hafa ekki borist greiðslur frá Albaníu, vegna HM kvenna, mótshöldurum Grand Prix-keppni kvenna og eitthvað vantar einnig frá Tyrkjunum vegna ólympíuskákmótsins.

Omar Salama, sem er hér meðal dómara, er nú búinn að fá stöðuhækkun og er nú svokallaður svæðisdómari (sector arbiter), sem er miklu skemmtilegra heldur en að setja yfir einni viðureign. Omar er einni þriggja slíkra í opnum flokki. Verður að teljast mikill heiður fyrir hann.

McDonalds og dularfull vera undir brú

Í fyrradag lentum við fjögur (ég, Davíð, Hjörvar og Hallgerður) í smá ævintýri. Hér rétt hjá er verslunarmiðstöð. Hins vegar er ekki auðvelt að komast þangað en til þess þarf að komast yfir eitthvað sem ýmist er kallað hér lækur eða fljót eða eitthvað þar á milli. Í þessu „fljóti" rennur svo ekki einu sinni vatn. Davíð fann brú, sem reyndar er mjög mjó og vægast sagt ótraust með lágt grindverk auk þess algjört myrkur er þarna á kvöldin. En yfir fórum við og komust í verslunarmiðstöðuna. Mikil gleði fyrir Hjörvar sem gat þá fengið sér langþráðan McDonalds-borgara.

Á heimleiðinni var ákveðið að finna aðra leið en hina mjög svo ótraustu brú. Stóð til að labba þar undir venjulega bílabrú þegar unga fólkið rak upp skaðræðisöskur, bentu eitthvað og sögðu eitthvað lifandi undir brúnni. Hljóp svo unga fólkið af stað en við þeir gömlu töltum á eftir. Farið var yfir gömlu ótraustu brúnna í enn meira myrkri. En hvað þau sá undir brúnni verður óleyst um ókomna tíð.

Toppbaráttan

Rússar, Armenar og Aserar eru efstir í opnum flokki með 11 stig en 5 þjóðir hafa 10 stig. Rússar tefla við Assera en Armenar við Kínverja.

Rússar og Pólverjar eru efstir í kvennaflokki með 11 stig en 5 þjóðir hafa 10 stig.

Norðurlandamótið:

Við erum í 3. sæti í opnum flokki en erum neðstir í kvennaflokki.

Í opnum flokki hafa allar þjóðirnar nema Færeyingar 7 stig. Svíar eru efstir og við í þriðja sæti. Allar þjóðirnar nema Finnar eru neðar en stigin þeirra gefa til kynna. Finnar náðu góðum úrslitum þegar þeir náðu 1,5 punkti gegn Frökkum.

Staðan í opnum flokki:

Rk.	SNo	Team	TB1	TB2	TB3	TB4
42	34	Sweden	7	84,5	16	32
50	52	Finland	7	69,5	14,5	35
53	51	Iceland	7	67	14	38
58	39	Denmark	7	60,5	15,5	28
62	54	Norway	7	57	14	32
118	74	Faroe Islands	4	37	10,5	35

Svíar eru einnig efstir í kvennaflokki með 8 stig. Við rekum lestina með 4 stig en allar hinar þjóðirnar hafa 6 stig.

Staðan í kvennaflokki:

Rk.	SNo	Team	TB1	TB2	TB3	TB4
38	46	Sweden	8	49	14,5	32
47	40	Norway	6	68	13	37
69	77	Finland	6	42	11	33
73	51	Denmark	6	33	11	31
95	62	Iceland	4	29,5	9	34

Nóg í bili.

Gunnar Björnsson

Spil og leikir | Slóð | Facebook | Athugasemdir (0)

4.9.2012 | 12:00

Beinar útsendingar: Íran og Suður-Kórea

Þá liggja fyrir viðureignir dagsins. Strákarnir tefla við Íran og hvílir Dagur Arngrímsson. Stelpurnar mæta Suður-Kóreu og hvílir Hallgerður Helga. Við teljumst lítisháttar lakari í opnum flokki en stelpurnar teljast umtalsvert betri en þær S-kóresku.

Viðureignir dagsins:

Round 7 on 2012/09/04 at 15:00
Bo.	51	Iceland	Rtg	-	45	Iran	Rtg	0 : 0
28.1	GM	Stefansson, Hannes	2515	-	GM	Ghaem Maghami, Ehsan	2579
28.2	GM	Danielsen, Henrik	2511	-	IM	Alavi, Seyed Javad	2458
28.3	IM	Gretarsson, Hjorvar Steinn	2506	-	IM	Darini, Pouria	2503
28.4	GM	Thorhallsson, Throstur	2426	-	GM	Golizadeh, Asghar	2472

Bo.	62	Iceland	Rtg	-	100	South Korea	Rtg	0 : 0
47.1	WGM	Ptacnikova, Lenka	2281	-		Wang, Chengjia	1988
47.2		Johannsdottir, Johanna B	1886	-	WCM	Kim, Taegyeong	1536
47.3		Finnbogadottir, Tinna K	1832	-	WCM	Byun, Sungwon	1566
47.4		Kristinardottir, Elsa M	1737	-	WCM	Oh, Minah	1522

Afar spennandi viðureignir eru í báðum flokkum. Í opnum flokki mætast m.a.: Aserbaídsjan - Rússland og Kína - Armenía og í kvennaflokki mætast m.a.: Rússland - Pólland og Georgía - Kína.

Viðureignir íslensku liðanna:

Íran (opin flokkur)
Suður-Kórea (kvennaflokkkur)

156 lið taka þátt í opnum flokki er í íslenska liðið (Ø-2490) talið það 51. sterkasta miðað við meðalstig. Í kvennaflokki eru þátttökuþjóðirnar 125 og er Ísland (Ø-1989) talið það 62. sterkasta.

Spil og leikir | Breytt s.d. kl. 11:25 | Slóð | Facebook | Athugasemdir (0)

4.9.2012 | 11:30

Barna-og unglingameistarmót sem og Stúlknameistaramót T.R. sunnud. 16. september!

Barna- og unglingameistaramót T.R. sem og Stúlknameistaramót Taflfélags Reykjavíkur fer fram sunnudaginn 16. september í félagsheimili T.R. Faxafeni 12. Taflið hefst kl.14.

Tefldar verða 7 umferðir eftir Monrad-kerfi með umhugsunartímanum 15 mín. á skák.

Teflt verður í einum flokki. Verðlaun verða veitt fyrir þrjú efstu sætin í mótinu og þar fyrir utan hlýtur efsti T.R.-ingurinn titilinn Unglingameistari T.R. 2012. Þá verða veitt verðlaun fyrir þrjár efstu stúlkurnar og þar fyrir utan hlýtur efsta stúlkan úr T.R. titilinn Stúlknameistari T.R. 2012. Til viðbótar verða veitt verðlaun fyrir þrjú efstu sætin í aldursflokknum 12 ára og yngri.

Mótið er opið öllum krökkum 15 ára og yngri (fædd 1997 og síðar). Skráning fer fram á taflfelag@taflfelag.is (vinsamlegast gefið upp nafn, fæðingarár og símanúmer) og einnig er hægt að skrá sig á mótsstað sunnudaginn 16. september frá kl. 13.30- 13.45.

Aðgangur á mótið er ókeypis.

Spil og leikir | Breytt s.d. kl. 11:14 | Slóð | Facebook | Athugasemdir (0)

4.9.2012 | 11:12

Skákæfingar T.R. hefjast á laugardaginn

Áratuga löng hefð er fyrir Laugardagsæfingum Taflfélags Reykjavíkur. Þær hefjast aftur eftir sumarfrí laugardaginn 8. september. Að venju fara æfingarnar fram í húsnæði félagsins að Faxafeni 12.

Á æfingunum eru æfingaskákmót, skákkennsla, skákþrautir ásamt ýmsum öðrum uppákomum. Þá er boðið upp á léttar veitingar um miðbik æfinganna, en sá partur er orðinn órjúfanlegur hluti af æfingunum hjá börnunum. Haldið er utan um mætingu og árangur barnanna og hverri æfingu er gerð góð skil í ítarlegum pistlum.

Á laugardögum kl. 11.30 - 13.30 verður boðið upp á sérstakar skákæfingar fyrir stelpur á öllum aldri. Þessar skákæfingar eru aðallega hugsaðar fyrir byrjendur. Allar stelpur, 5 ára og eldri, eru velkomnar. Allar mömmur, ömmur, frænkur og vinkonur eru sérstaklega velkomnar að taka þátt í skákæfingunum! Skákþjálfari verður Sigurlaug Regína Friðþjófsdóttir, formaður T.R. Við byrjum núna á laugardaginn 8. september!

Á laugardögum kl. 14 -16 verða skákæfingar fyrir börn og unglinga (stelpur og stráka) fædd 1997 og síðar. A-flokkurinn verður eingöngu opinn fyrir þau sem eru félagsmenn í T.R. og er fyrir alla unglinga fædd 1997-1999, svo og yngri börn sem eru lengra komin í skáklistinni. B-flokkurinn er opinn fyrir öll börn sem eru fædd 2000 og síðar.

Flokkarnir munu þó stundum vera saman í einum hópi. Fyrirkomulagið munu skákþjálfarar kynna betur á æfingunum. Skákþjálfarar á Laugardagsæfingunum verða eins og í fyrra Torfi Leósson og Daði Ómarsson, skákmenn í T.R.

Þátttaka á skákæfingunum er ókeypis.

Verið velkomin!

Fyrirspurnir sendist á taflfelag@taflfelag.is

Spil og leikir | Slóð | Facebook | Athugasemdir (0)

4.9.2012 | 06:00

Æsir byrja að tefla í dag eftir sumarfrí

Æsir byrja að tefla þriðjudag 4 september eftir að hafa legið í sumardvala. Teflt er í Ásgarði Stangarhyl 4. Allir skákmenn 60 ára og eldri hjartanlega velkomnir.

Hittumst á hvítum reitum og svörtum og skemmtum okkur með góðum félögum.

Spil og leikir | Breytt 2.9.2012 kl. 15:21 | Slóð | Facebook | Athugasemdir (0)

3.9.2012 | 23:04

Skákakademían: Skák í grunnskólum komin á fulla ferð

Smári Rafn og sigursveit Álfhólsskóla 2012

Skákakademían og Skákbúðin hafa gert með sér samkomulag þess efnis að Skákakademían noti kennsluefni Smára Rafns Teitssonar grunnskólakennara, en hann hefur í mörg ár þróað námsefni í skák, og er einn reyndasti skákkennari Íslands.

Kennsluefni Smára Rafns mun nýtast vel, enda er kennsla á vegum Skákakademíunnar nú farin á fulla ferð í grunnskólum Reykjavíkur. Kennsluhópinn í vetur skipa Aron Ingi Óskarsson, Björn Ívar Karlsson, Björn Þorfinnson, Bragi Þorfinnsson, Róbert Lagerman og Stefán Bergsson. Flestir eru þeir þrautreyndir skákkennarar og er helmingur hópsins með kennsluréttindi eða í kennsluréttindanámi.

Smári Rafn, höfundur kennsluefnisins sem Skákakademían mun nota í vetur, er þjálfari keppnissveitar Álfhólsskóla, sem varð Íslandsmeistari barnaskólasveita 2012. Kennsluhefti Smára Rafns eru að mestu byggð á skákþrautum, og er styrkleiki miðaður við fimm stig, frá byrjendum til lengra kominna, sem hafa þá tileinkað sér víðtækan skilning á skákinni. Einnig er farið í gegnum helstu lögmál skákarinnar á skýran og hnitmiðaðan hátt og geta heftin þannig nýst almennum grunnskólakennurum í byrjendakennslu. Kennarahandbók geymir svör við þrautunum, og margvíslegan fróðleik um skáksöguna.

Námsefni Smára Rafns er tilvalið í alla grunnskóla, og nýtist bæði við kennslu á vegum Skákakademíunnar og grunnskólakennara sem vilja kenna nemendum sínum grundvallaratriðin.

Mikill áhugi er innan grunnskóla um allt land að auka og efla skákkennslu. Reynslan og rannsóknir sýna að skákkunnátta hefur mjög jákvæð áhrif á námsárangur og bætir félagslega færni barnanna. Fjölmargir íslenskir skólastjórar og kennarar eru í fararbroddi skákvæðingar grunnskólanna.

Skipuleg kennsla fer fram í flestum grunnskólum Reykjavíkur og Kópavogs í vetur, sem og víðar á höfuðborgarsvæðinu. Skólar á landsbyggðinni sýna líka sífellt aukinn áhuga á skákkennslu, og býður Skákakademían öllum grunnskólum aðstoð og ráðgjöf við að byggja upp kennslu og skáklíf.

Í Skákbúðinni, sem Smári Rafn heldur úti, er hægt nálgast kennsluefnið, sem og taflsett og fleiri skákvörur.

Frekari upplýsingar um ráðgjöf og aðstoð við grunnskóla, sem hafa áhuga á kennslu og eflingu skáklífs, veitir Stefán Bergsson framkvæmdastjóri Skákakademíunnar í stefan@skakakademia.is.

Spil og leikir | Slóð | Facebook | Athugasemdir (0)

3.9.2012 | 19:07

Íran og Suður-Kórea á morgun

Íslenska liðið í opnum flokk mætir sveit Írans (Ø-2508), sem telst 45. sterkasta sveitin á mótinu, í sjöundu umferð ólympíuskákmótsins sem fram fer á morgun. Kvennaliðið mætir sveit Suður-Kóreu, sem er talin sú 100. sterkasta á mótinu.

Liðið í opnum flokki hefur 7 stig og er í 53. sæti. Rússar, Armenar og Aserar eru efstir með 11 stig.

Liðið í kvennaflokki hefur 4 stig og er í 95. sæti. Rússar og Pólverjar eru efstir með 11 stig.

Umferðin hefst kl. 12.

Andstæðingarnir:

45. Iran (RtgAvg:2508 / TB1: 7 / TB2: 56.5)
Bo.		Name	Rtg	FED	Pts.	Games	Rp
1	GM	Ghaem Maghami Ehsan	2579	IRI	2.0	5.0	2554
2	IM	Alavi Seyed Javad	2458	IRI	1.5	3.0	2444
3	IM	Darini Pouria	2503	IRI	2.5	5.0	2506
4	IM	Idani Pouya	2477	IRI	3.0	5.0	2493
5	GM	Golizadeh Asghar	2472	IRI	3.5	6.0	2500

100. South Korea (RtgAvg:1658 / TB1: 4 / TB2: 20.5)
Bo.		Name	Rtg	FED	Pts.	Games	Rp
1		Wang Chengjia	1988	KOR	1.5	5.0	1972
2	WCM	Kim Taegyeong	1536	KOR	0.0	4.0	1113
3	WCM	Byun Sungwon	1566	KOR	1.0	5.0	1659
4	WCM	Oh Minah	1522	KOR	3.0	5.0	1738
5		Cho Yeon Hee	1542	KOR	2.0	5.0	1730

Spil og leikir | Slóð | Facebook | Athugasemdir (0)

3.9.2012 | 18:36

Jafntefli gegn Austurríki

Liðið í opnum flokki gerði 2-2 jafntefli við lið Austurríkis í hörkuviðureign í sjöttu umferð ólympíuskákmótsins sem fram fór í dag. Hjörvar Steinn Grétarsson vann góðan sigur á 3. borði. Henrik Danielsen gerði jafntefli sem og Þröstur Þórhallsson sem jafntefli með mikilli seiglu í langri maraþonskák sem tók alls 125 leiki. Lengsta skák umferðarinnar. Hannes Hlífar Stefánsson tapaði. Kvennaliðið tapaði 0,5-3,5 fyrir Venesúela.

Armenar og Rússar gerðu 2-2 jafntefli í hörkuviðureign á fyrsta borði. Kramnik rúllaði yfir Aronian en Movsesian vann Grischuk. Kínverjar og Rússar gerðu og 2-2 jafntefli í kvennaflokki. Spennan heldur því áfram.

Skákir dagsins:

Opinn flokkur (Austurríki)
Kvennaflokkur (Venesúela)
Rússland - Armenía (opinn flokkur)
Kína - Rússland (kvennaflokkur)

Spil og leikir | Breytt 4.9.2012 kl. 12:05 | Slóð | Facebook | Athugasemdir (0)

3.9.2012 | 13:24

Ól-pistill nr. 8 - Úrslitaviðureignir í dag

Þá eru viðureignir dagsins hafnar eins og áður hefur komið fram á Skák.is. Austurríkismenn komu örlítið á óvart með því að hvíla Kindermann á 2. borði. Markus Ragger, þeirra langbesti maður, hefur reyndar átt slæmt mót og heldur því vonandi áfram í dag. Kvennaliðið teflir við sveit Venesúela.

Mikil spenna er í loftinu enda mjög mikilvægar viðureignir íbæði opnum- og kvennaflokki. Jafnvel úrslitaviðureignir í báðum flokkum.

Sjálfur fór ég FIDE-fundi í morgun, bæði um tækniefni og um skák í skólum. Athyglisverðir báðir og mun ég segja betur frá þeim í síðari pistlum. Sérstaklega hafði ég gaman að því að heyra fyrirlestur frá fulltrúa Armena um skákkennslu þar í landi. Á morgun halda FIDE-fundir áfram en þá heldur áfram umræða um lög (statues) FIDE. Kasparov er mættur á svæðið en var víst spakur á fundum í gær.

Smá krankleiki hefur verið trufla menn hér. Einstaka liðsmenn hafa fengið í magann en þó ekki alvarlega. Leigubílsstjórar hér eru afar athyglisverðir og örugglega ekki mikið minna hættulegt að fara í slíkan bíl í samanburði við fallhlífarstökk. Engin virðing er borin fyrir fótgangandi vegfarendum sem eiga fótum sínum fjör að launa. Enn minni virðing er borinn fyrir hámarkshraða.

Vel gekk hjá hinum Norðurlandaþjóðunum, sem sum hver tefldu við dúka (nýyrði Elvars Guðmundssonar yfir slakari skákþjóðir sem byggist á því á því að hægt sé að rúlla upp dúkum). Finnar, sem eru efstir Norðurlandanna, unnu heyrnardaufa, sem eru reyndar býsna þéttir, Danir unnu Trinidad og Tobago og Svíar unnu Andorra.

Finnar fá nú Frakka, Svíar mætum Skotum, Danir mæta Alsíringum, Norðmenn mæti Pakistönum og Færeyingar mæta Nýja-Sjálendingum. Danir og Norðmenn eiga að vera í góðum málum.

Hér í blaðmannaherberginu sit ég hliðin á manni sem segist vera umboðsmaður Karjakin. Hann er að sjálfsögðu búinn að fá bæklinga bæði um Reykjavíkurskákmótið 2013 og EM landsliða 2015!

Nóg í bili.

Gunnar Björnsson