Skákakademían: Skák í grunnskólum komin á fulla ferð

Skákakademían og Skákbúðin hafa gert með sér samkomulag þess efnis að Skákakademían noti kennsluefni Smára Rafns Teitssonar grunnskólakennara, en hann hefur í mörg ár þróað námsefni í skák, og er einn reyndasti skákkennari Íslands.

Kennsluefni Smára Rafns mun nýtast vel, enda er kennsla á vegum Skákakademíunnar nú farin á fulla ferð í grunnskólum Reykjavíkur. Kennsluhópinn í vetur skipa Aron Ingi Óskarsson, Björn Ívar Karlsson, Björn Þorfinnson, Bragi Þorfinnsson, Róbert Lagerman og Stefán Bergsson. Flestir eru þeir þrautreyndir skákkennarar og er helmingur hópsins með kennsluréttindi eða í kennsluréttindanámi.

Smári Rafn, höfundur kennsluefnisins sem Skákakademían mun nota í vetur, er þjálfari keppnissveitar Álfhólsskóla, sem varð Íslandsmeistari barnaskólasveita 2012. Kennsluhefti Smára Rafns eru að mestu byggð á skákþrautum, og er styrkleiki miðaður við fimm stig, frá byrjendum til lengra kominna, sem hafa þá tileinkað sér víðtækan skilning á skákinni. Einnig er farið í gegnum helstu lögmál skákarinnar á skýran og hnitmiðaðan hátt og geta heftin þannig nýst almennum grunnskólakennurum í byrjendakennslu. Kennarahandbók geymir svör við þrautunum, og margvíslegan fróðleik um skáksöguna.

Námsefni Smára Rafns er tilvalið í alla grunnskóla, og nýtist bæði við kennslu á vegum Skákakademíunnar og grunnskólakennara sem vilja kenna nemendum sínum grundvallaratriðin.

Mikill áhugi er innan grunnskóla um allt land að auka og efla skákkennslu. Reynslan og rannsóknir sýna að skákkunnátta hefur mjög jákvæð áhrif á námsárangur og bætir félagslega færni barnanna. Fjölmargir íslenskir skólastjórar og kennarar eru í fararbroddi skákvæðingar grunnskólanna.

Skipuleg kennsla fer fram í flestum grunnskólum Reykjavíkur og Kópavogs í vetur, sem og víðar á höfuðborgarsvæðinu. Skólar á landsbyggðinni sýna líka sífellt aukinn áhuga á skákkennslu, og býður Skákakademían öllum grunnskólum aðstoð og ráðgjöf við að byggja upp kennslu og skáklíf.

Í Skákbúðinni, sem Smári Rafn heldur úti, er hægt nálgast kennsluefnið, sem og taflsett og fleiri skákvörur.

Frekari upplýsingar um ráðgjöf og aðstoð við grunnskóla, sem hafa áhuga á kennslu og eflingu skáklífs, veitir Stefán Bergsson framkvæmdastjóri Skákakademíunnar í [e-mail].