Skák.is

Bloggfærslur mánaðarins, mars 2012

29.3.2012 | 20:33

EM - pistill nr. 9: 0-0 urðu úrslitin í tveimur skákum

Umferðin í dag var sú langviðburðaríkasta frá sjónarhóli skákstjórans. Tvær skákir voru dæmdar 0-0 og auk þess dæmdi ég fall í skák þar sem sá úrskurður var kærður til áfrýjunarnefndar. Spennan á toppnum er mikil en sjö skákmenn eru efstir og jafnir með 7 vinninga. Ivan Sokolov vinur vor mátti sætta sig við tap og þarf nú að fá a.m.k. 1,5 vinning í 2 síðustu skákunum til að komast áfram. Íslensku skákmennirnir hafa báðir 4 vinninga.

Toppbaráttan

Af þeim sjö sem eru efstir eru fimm Rússar. Frakkinn Laurent Fressinet (2693) er efstur á stigum en jafnir honum eru Rússarnir Inarkiev (2695), sem lagði Sokolov, og er aðalstjarnan frá Elista, heimabæ Kirsan. Malakhov (2705), Kobalia (2666), Andreikin (2689) og Matlakov (2632) og svo Armeninn Akopian (2684).

21 skákmaður hefur 6,5 vinning og þar á meðal má finna Íslandsvinina Jones (2635), Kuzubov (2615), Caruana (2767), Dreev (2698) og Smeets (2610).

Sokolov (2653) er í 29.-52. sæti ásamt t.d. Movsesian (2702), Cheparinov (2664) og fleirum. Minnt er á 23 efstu komast áfram á Heimsbikarmótið (World Cup) svo það þarf a.m.k. 7,5 vinning til að komast áfram.

Hannes og Héðinn

Héðinn komst lítt áleiðis í skák sinni og var jafntefli samið eftir rúmlega 40 leiki. Hannes virtist fá fínt tafl í byrjun en seildist í baneitrað peð á b2 og þurfti að gefa drottninguna nokkru síðar. Ekki góð umferð og hafa þeir nú báðir 4 vinninga en ná vonandi góðum úrslitum í lokaumferðunum tveimur og bjargi því sem bjargað veður.

Í tíundu og næstsíðustu umferð, sem fram fer á morgun, teflir Héðinn við úkraínska alþjóðlega meistarann Vasily Nedilko (2392) en Hannes við austurríska FIDE-meistarann Mario Schachinger (2391).

Skákstjórn

Á ýmsu gekk á í umferðinni sem varð sú langviðburðaríkasta hingað til frá sjónarhóli skákstjórans.

Eins og áður hefur komið fram eru reglur á EM að skákmenn megi ekki hafa samskipti sín á milli innan 40 leikja. Eina leiðin til að gera jafntefli fyrir þann tíma er semsagt að krefjast jafnteflis.

Í skák Baron (2497) og Safarli (2645) gerðist það að þeir þrátefldu í katalónskri byrjun eftir um 16 leiki. Þeir gengu frá því sjálfir án þess að bera undir skákstjóra, sem eru brot á reglum, og eftir töluverð fundarhöld ákvað yfirdómari mótsins að úrslitin yrðu skráð 0-0. Að sjálfsögðu mjög umdeilanleg ákvörðun. Henni var áfrýjað til áfrýjunardómstóls sem staðfesti úrskurð skákstjóra.

Á fyrsta borði tefldu Akopian og Malakhov. Þeir gerðu einnig jafntefli í 16 leikjum en fóru algjörlega rétt að, þ.e. jafnteflis var krafist í ljósi þess að sama staðan kæmi upp í þriðja skipti og það jafntefli staðfest af skákstjórum. Stigsmunur eða eðlismunur?

Svo gerðist það að Alonso (2513) og Mamedyarov (2752) sömdu jafntefli eftir um 20 leiki án þráteflis. Sú skák var dæmd 0-0. Mér skilst að Aserinn sætti sig við úrskurðinn og mun víst kvarta undir slappleika.

Um allt þetta má deila en ljóst er að ECU þarf að hafa reglurnar skýrari til að forðast slíkar uppákomur í framtíðinni. Og eins og samdómari minn frá Rúmeníu benti á, hvað gerist í þeim tilfellum þegar reglur ECU ber ekki saman við reglur FIDE? Skákdómara ber að fara eftir reglum FIDE. Og svo geri ég mér enga grein fyrir því hvernig þessar skákir verða reiknaðar til skákstiga!

Annað þessu skylt. Ivan, sem hefur ekkert á móti þessari 40 leikja reglu, bendir á ákveðið ósamræmi sé til staðar, það er að þessi regla gildi í undankeppni HM en svo ekki á síðari stigum. Mætti t.d. líkja við ef sérrangstöðureglur giltu í undankeppni HM knattspyrnu í Evrópu en ekki annars staðar!

Í dag gerðist eftirfarandi atvik: Tvær skákkonur voru að tefla. Önnur krefst vinnings í ljósi þess að hin sé fallin. Sú síðarnefnda neitar og segir að klukkan hljóti að vera biluð þar sem hún hafi leikið þegar um 12 sekúndur séu eftir. Skákstjórar kanna klukkuna sem virðist vera í fullkomnu lagi. Þegar sú sem krafðist er vinnings er spurð hvort hún hafi séð hvort klukkan hafi hagað sér óeðlilega er svarað um hæl, „hún er fallin, það er nóg". Niðurstaðan var sú að dæma að fallið gilti en ég skal viðurkenna að ég hafði það á tilfinningu að sú sem krafðist hafi ekki sagt alla söguna. Málinu var áfrýjað til áfrýjunardómstóls meðal annars stutt framburði eiginmanni þeirrar sem féll, sem fellur undir hugtakið sígilda og góða „Íslandsvinur", en niðurstaðan gat ekki verið önnur en hún varð.

Nóg í bili!

Gunnar Björnsson

Spil og leikir | Slóð | Facebook | Athugasemdir (0)

29.3.2012 | 16:24

EM: Héðinn með jafntefli - Hannes tapaði

Héðinn Steingrímsson (2556) gerði jafntefli við austurríska alþjóðlega meistarann Robert Kreisl (2400) í níundu umferð EM einstaklinga sem fram fór í dag í Plovdid í Búlgaríu. Hannes Hlífar Stefánsson (2531) tapaði hins vegar fyrir ísraelska FIDE-meistaranum Avital Boruchovsky (2333). Báðir hafa þeir 4 vinninga.

Frétt um pörun og stöðu mótsins síðar í kvöld.

Mikið var að gera hjá skákstjórum í dag en nánar um það einnig í pistli í kvöld.

Spil og leikir | Slóð | Facebook | Athugasemdir (0)

29.3.2012 | 14:25

Hrafn og Björn sigruðu á Haítí

Hrafn Jökulsson og Björn Ívar Karlsson komu fyrstir í mark á Grænlandsmótinu á Haítí á miðvikudagskvöld, hlutu 5,5 vinning af 7. Þar hituðu Grænlandsvinir upp fyrir páskahátíð í Ittoqqortoormiit, en þangað fara fjórir leiðangursmenn á vegum Hróksins og Kalak.

Mikil tilhlökkun ríkir meðal krakkanna í Ittoqqortoormiit, enda er þetta fimmta árið í röð sem Hrókurinn og Kalak standa fyrir hátíð í þessu afskekkta þorpi, sem er 800 kílómetra frá næsta byggða bóli.

Lokastaðan á Haítí:

1-2 Hrafn Jökulsson                    5.5
      Björn Ívar Karlsson                5.5
3   Jón Þór Bergþórsson               4.5
4-6 Hrannar Jónsson                    4
      Róbert Lagerman                    4
      Arnljótur Sigurðsson               4
7-8 Óskar Long                         3.5
      Vigfús Vigfússon                   3.5
9   Jón Birgir Einarsson               3
10   Jorge Fonsega                      2.5
11   Arnar Valgeirsson                  2

Fréttir af leiðangrinum til Grænlands eru sagðar á bloggsíðunni Góður granni.

Spil og leikir | Slóð | Facebook | Athugasemdir (0)

29.3.2012 | 12:46

EM: Níunda umferð hafin

Spennan magnast hér í Plovdid en nú er níunda umferð tiltölega nýlega hafin. Þrír keppendur eru efstir og jafnir með 6,5 vinning; Rússarnir Malakhov (2705) og Matlakov (2632), sem hefur komið manna mest á óvart á mótinu, og Armeninn Akopian (2684). 17 skákmenn hafa 6 vinninga og þeirra á meðal eru Íslandsvinirnir Jones (2635), Kuzubov (2615) og Sokolov (2653).

31 skákmaður kemur svo með 5,5 vinning og þar má helst nefna Caruana (2767), stigahæsta keppenda mótsins. Þeir skákmenn sem hafa 5,5 vinninga þurfa a.m.k. 2 vinninga til að verða meðal 23 efstu.

Hannes hefur 4 vinninga og mætir ísraelska FIDE-meistaranum Avital Boruchovsky (2333). Þessi ungi strákur frá Ísrael hefur verið að gera góða hluti og gerði jafntefli t.d. við Mamedyarov (2752). Hefur þegar tryggt sér áfanga að alþjóðlegum meistaratitli og með sigri á Hannesi tryggir hann sér stórmeistaraáfanga.

Héðinn teflir við austurríska alþjóðlega meistarann Robert Kreisl (2400) sem hefur verið að standa sig á pari.

Spil og leikir | Breytt s.d. kl. 14:03 | Slóð | Facebook | Athugasemdir (0)

29.3.2012 | 07:13

Þorvarður, Vignir og Magnús efstir á öðlingamóti

Þorvarður F. Ólafsson (2175), Vignir Bjarnason (1828) og Magnús Pálmi Örnólfsson (2175) eru efstir með fullt hús á Skákmóti öðlinga eftir 2. umferð sem fram fór í gærkveldi. Nokkuð hefur um óvænt úrslit og í 2. umferð gerði Þór Valtýsson (1973) jafntefli við Sigurð Daða og Vignir vann Halldór Pállsson (2000) en Vignir hafa unnið tvo töluvert stigahærri andstæðinga í fyrstu umferðunum tveimur. Heildarúrslit 2. umferðar má finna hér.

Stöðu mótsins má finna hér. Þriðja umferð fer fram eftir hálfan mánuð. Pörunina má nálgast hér.

Spil og leikir | Slóð | Facebook | Athugasemdir (0)

29.3.2012 | 07:00

Fimmtudagsmót hjá TR í kvöld

Fimmtudagsmót hjá TR 2012 verður í kvöld og hefst að venju kl. 19:30 en húsið opnar kl. 19:10.

Tefldar verða 7 umferðir með 7 mínútna umhugsunartíma.

Mótin fara fram í félagsheimili T.R., skákhöllinni að Faxafeni 12. Glæsilegur verðlaunapeningur er í boði fyrir sigurvegarann.

Mótin eru öllum opin og er aðgangseyrir kr. 500 fyrir 16 ára og eldri en frítt er fyrir 15 ára og yngri. Boðið er upp á kaffi ásamt léttum veitingum án endurgjalds.

Spil og leikir | Breytt 1.3.2012 kl. 10:51 | Slóð | Facebook | Athugasemdir (0)

28.3.2012 | 22:01

EM pistill nr. 8 - Lokaátökun nálgast

Nú fer að draga til tíðinda á mótinu og ljóst að margir stórmeistarar sitja þegar eftir með sárt ennið. Aðeins 23 komast áfram af 176 slíkum hér. Meðal þeirra sem munu sitja eftir er Anish Giri sem aðeins hefur hlotið 3 vinninga eftir 7 umferðir eins og 12 aðrir stórmeistarar sem segir margt um styrkleika mótsins. Sigur í dag breytir þar engu um, hann er úr leik.

Ég ræddi enn á ný við Ivan í gær enda ákaflega viðræðugóður maður og skemmtilegur með endemum. Er á köflum nokkuð hrokafullur en á mjög skemmtilegan hátt. Kallinn var í góðu skapi eftir góðan sigur í gær og í enn betra skapi eftir annan sigur í kvöld.

Hann staðfestir það sem ég þó vissi að heimur atvinnuskákmanna sé sífellt að verða harðari. Hér áður fyrr gat hann gert ráð fyrir að fá að jafnaði um 3.000-4.000 evrur fyrir þátttöku á mótum þá annaðhvort í formi komuþóknana og/eða verðlauna en þetta sé algjörlega liðin tíð. Nú reyni á það að menn séu nógu hugmyndaríkir til að geta haft það gott/þokkalegt sem stórmeistarar. Fyrir utan það auðvitað að vera ofarlega á heimslistanum.

Ivan bæði skrifar skákbækur og þjálfar og það gefur þetta honum í dag töluvert meiri tekjur en sjálf taflmennskan. Síðustu ár hefur hann séð um skákskýringar á Wijk aan Zee-mótinu fremur en tefla þar. Þó segir hann að það sé nauðsynlegt að tefla töluvert til að halda sér við og vera í umræðunni.

Ivan undirbýr sig að jafnaði í aðeins um 2-3 tíma fyrir hverja skák. Segir að meiri undirbúningur en það trufli fremur en hitt. Að sjálfsögðu gerir jafn lítill undirbúningur fyrir hverja skák ráð fyrir almennri mjög góðri byrjunarþekkingu. Ivan fer svo í sund og/eða í líkamsrækt fyrir umferðir.

Það er mjög fróðlegt að ræða við Ivan almennt um skákstarfsemi og gæti verið fróðlegt fyrir íslenska skákhreyfingu að notfæra sér kunnáttu og þekkingu þessa mikla Íslandsvinar sérstaklega í ljósi þess að árangur okkar besta manna hefur oft verið betri en síðustu misseri. En nóg um útúrdúra um Ivan vin okkar.

Hannes vann loks eftir 3 töp í röð. Fínn sigur hjá Hannesi eftir spennandi skák. Héðinn hefur lent í „Tyrkjaráni“ og tapaði nú fyrir einum af ungu efnilegu tyrknesku skákmönnunum eftir að hafa gert jafntefli við annan Tyrkja umferðina þar á undan. Hannes hefur 4 vinninga en Héðinn hefur 3,5 vinning. Sjálfur hef ég trú á því að þeir báðir komi sterkir inn í lokaumferðunum og spái því að báðir fari þeir yfir + 50% skor í restina.

Í níundu umferð sem fram fer á morgun teflir Hannes við austurríska alþjóðlega meistarann Robert Kreisl (2400) en Héðinn við ísraelska FIDE-meistarann Avital Boruchovsky (2333).

Fremur rólegt hefur verið vð skákstjórn hjá mér. Helst að þessi jafnteflismál séu að flækjast fyrir mönnun en það er ekki alltaf sem skákmennirnir átta sig á því að þeir megi ekki gera jafntefli innan 40 leikja án samþykkis skákstjóra. Í dag gerðist það að það að Mamedyarov (2752) var um hálfri til einni mínútu of seinn til leiks gegn georgíska alþjóðlega meistaranum Shota Azaladze (2419) og var dæmt á hann tap samkvæmt Zero-tolerance reglunni. Ég heyrði strax á mönnum hér í Plovdid að það hvarflaði að mönnum að það væri viljandi gert, Aserinn, sem væri með svart, væri ekki finna sig en Georgíumaðurinn stigalági Shota (2419) væri hins vegar í banastuði. Ég á hins vegar erfitt með trúa slíku enda hefði Aserinn enn átt góða sénsa að komast áfram á Heimsbikarmótið með sigri.

Nóg í bili, lokaátökin nálgast og spennan magnast!

Gunnar Björnsson

Spil og leikir | Breytt 29.3.2012 kl. 06:39 | Slóð | Facebook | Athugasemdir (0)

28.3.2012 | 17:01

EM: Hannes vann - Héðinn tapaði

Hannes Hlífar Stefánsson (2531) vann búlgarska FIDE-meistarann Tihomir Janes (2382) í 8. umferð EM einstaklinga sem fram fer í Plovdid í Búlgaríu. Héðinn Steingrímsson (2556) tapaði hins vegar fyrir tyrkneska alþjóðlega meistaranum Ogulcan Kanmazalp (2389). Hannes hefur 4 vinninga en Héðinn hefur 3,5 vinning.

Rússnesku stórmeistararnir Vladimir Malakhov (2705) og Maxim Matlakov (2632) eru efstir með 6,5 vinning. Auk þess er líklegt að armenski stórmeistarinn Vladimir Akopian (2684) bætist við í þann hóp. Að minnsta kosti 15 skákmenn hafa 6 vinninga, þeirra á meðal eru Sokolov (2653), Jones (2635) og Kuzubov (2615).

Athygli vakti að Aserinn Shakhriar Mamedyarov (2752) mætti rétt of seint til umferðar í dag og var dæmt tap á hann án taflmennsku.

Frétt um pörun og pistill kemur síðar í kvöld eða í fyrramálið.

Spil og leikir | Slóð | Facebook | Athugasemdir (0)

28.3.2012 | 14:32

Grænlandsmótið á Haítí í kvöld

Grænlandsmótið í skák verður haldið í kvöld á Kaffi Haítí, Geirsgötu, við gömlu höfnina í Reykjavík. Mótið hefst klukkan 20.30 og verða tefldar 6 umferðir, með tímafyrirtjöf fyrir stigalægri keppendur.

Til leiks mæta m.a. leiðangursmenn sem fara til Ittoqqortoormiit um páskana, þar sem vikulöng skákhátíð verður haldin. Þangað fara Arnar Valgeirsson, Hrafn Jökulsson, Jón Birgir Einarsson og Stefán Bergsson. Ittoqqortoormiit er á 70. breiddargráðu, heila 800 kílómetra frá næsta byggða bóli.

Allir eru velkomnir á mótið á Kaffi Haítí í kvöld, og eru keppendur hvattir til að mæta tímanlega. Þátttaka er ókeypis en Arnar leiðangursstjóri tekur við framlögum í vinningasjóð handa grænlensku börnunum. Mótstjóri verður Róbert Lagerman.

Spil og leikir | Slóð | Facebook | Athugasemdir (0)

28.3.2012 | 09:40

Vignir Vatnar sigraði á Páskaeggjamóti Hellis og Góu

Vignir Vatnar Stefánsson sigraði örugglega á vel sóttu páskaeggjamóti Hellis sem haldið var 26. mars sl. 56 keppendur mættu til leiks á þessu næst fjölmennast páskaeggjamóti Hellis og tefldu keppendur 7 umferðir með 7 mínútna umhugsunartíma. Vignir Vatnar vann allar sjö skákirnar og má segja að úrslitin hafi ráðist þegar Vignir Vatnar vann jafnteflisstöðu í endatafli sem upp kom á móti Hilmi Frey sem sést á myndum af mótinu. Annar varð Hilmir Freyr Heimisson með 6v og þriðja varð Nansý Davíðsdóttir með 5,5v. Að loknu vel heppnuðu móti voru svo allir keppendur leystir út með konfektmolum.

Eftirtaldir hlutu verðlaun á páskaeggjamótinu:

Yngri flokkur (fæddir 1999 og síðar):

1. Vignir Vatnar Stefánsson 7v
2. Hilmir Freyr Heimisson 6v
3. Nansý Davíðsdóttir 5,5v

Eldri flokkur (fæddir 1996-1998):

1. Hans Hólm Aðalsteinsson 4v

Stúlknaverðlaun: Svandís Rós Ríkharðsdóttir (5v) og Hildur Berglind Jóhannsdóttir (5v).

Fæddir 2003 og síðar: Mikael Kravchuk (4,5v) og Óskar Víkingur Davíðsson (4,5v)

Í lokin var svo nokkur slatti af páskaeggjum og dreginn út og þá duttu í lukkupottinn: Stefán Orri Davíðsson, Kolbeinn Ólafsson, Heimir Páll Ragnarsson, Aðalgeir Friðriksson, Þórður Hólm Hálfdánarson, Orri Snær Jónsson, Kristall Máni Ingason, Gauti Páll Jónsson, Erik Daníel Jóhannesson, Alec Elías Sigurðarson, Jón Otti Sigurjónsson og Ívar Andri Hannesson.

Lokastaðan á páskaeggjamótinu: